“Niżirgħu Żerriegħa tas-​Saltna” f’Rotot bir-​Rivisti

¹ Għanja 133 fil-​ktieb Għannu Tifħir lil Jehovah jisimha “Niżirgħu Żerriegħa tas-​Saltna.” Hija bbażata fuq it-​tixbieha taʼ Ġesù li xxebbah ix-​xogħol taʼ li jintgħamlu dixxipli maż-​żrigħ taż-​żerriegħa. (Mt. 13:​4-8, 19-23) Il-​lirika taʼ l-​għanja tgħid: “Kemm taqaʼ żerriegħa fuq art li taf trodd/Jiddependi minnek taʼ spiss.” Kif nistgħu nżidu l-​effettività tal-​ministeru tagħna? Mod wieħed hu billi nistabbilixxu u nżommu rotta bir-​rivisti.

² Jistgħu jintlaħqu diversi objettivi permezz taʼ rotta bir-​rivisti. (1) Żjajjar regulari kull ġimagħtejn jgħinuk tagħmel ħbieb mal-​persuna li turi interess. (2) Lil dak li jkun tibqaʼ tfornih regolarment b’informazzjoni li ssalva l-​ħajja u li tinstab f’It-Torri taʼ l-​Għassa u Stenbaħ! (3) Permezz tal-​konversazzjonijiet tiegħek tistaʼ tgħin lill-​individwu jiżviluppa xenqa għall-​verità Skritturali, li tistaʼ twassal għal studju tal-​Bibbja.​—1 Pt. 2:2.

³ Kif Tibda Rotta bir-​Rivisti: Kulmeta xi ħadd juri interess fir-​rivisti, spjega kif artikli li jispikkaw jidhru f’kull ħarġa u li int se tieħu gost twassalhomlu kull ġimagħtejn. Wara li titlaq, ħu nota taʼ l-​isem u l-​indirizz taʼ dak li jkun, id-​data taż-​żjara, id-​dati tal-​ħarġiet li ħallejt, l-​artiklu li ppreżentajt, u s-​suġġetti li l-​iktar li interessaw lill-​individwu.

⁴ Tistaʼ tibda rotta bi ftit nies biss fiha. Imbagħad aħdem biex tkompli tkabbarha billi żżid lil oħrajn li tkun ħallejtilhom ir-​rivisti. Hekk kif ir-​rotta tiegħek tikber, tistaʼ torganizzaha ġeografikament sabiex ikun eħfef għalik li tkopriha. Żomm informazzjoni mniżżla bir-​reqqa dwar liema ħarġiet ħallejt f’kull żjara u meta. Żid noti dwar il-​konversazzjonijiet tiegħek u dwar kif se tkompli tiżviluppa l-​interess taʼ l-​individwu fil-​verità fiż-​żjara li jkun imiss.

⁵ Inkludi lil Nies tan-​Negozju u Dawk Professjonali: L-​esperjenza wriet li tal-​ħwienet u nies professjonali oħrajn x’aktarx li jaċċettawhom ir-​rivisti tagħna fuq bażi regulari. Wieħed anzjan saħansitra kellu s-​sindku tar-​raħal tiegħu fir-​rotta bir-​rivisti tiegħu. Pubblikatur beda studju maʼ individwu taʼ 80 sena, li hu sid taʼ kumpanija li tipprovdi materjal għall-​bini, wara li kien ilu jiħodlu r-​rivisti għal għaxar snin konsekuttivi!

⁶ Waħda oħt pijuniera daħlet f’ħanut u ltaqgħet maʼ koppja li ma tantx laqgħuha b’entużjażmu. Madankollu, peress li aċċettaw ir-​rivisti, hi ddeċidiet li żżid lil din il-​koppja mar-​rotta bir-​rivisti tagħha. Maż-​żmien, l-​oħt riedet taqtaʼ minn magħhom minħabba li ma kienu kordjali xejn u qatt ma kien ikollhom wisq x’jgħidu, saħansitra meta kienet issaqsihom x’kienet il-​ħarsa tagħhom dwar xi ħaġa. Imma l-​oħt talbet dwar din il-​kwistjoni u eventwalment ħalliet il-​ktieb Tgħix Għal Dejjem mal-​koppja. Wara li qratu, il-​mara esklamat: “Fl-​aħħar, sibtha l-​verità!” Inbeda studju tal-​Bibbja, u iktar tard il-​koppja tgħammdu. Il-​perseveranza tal-​pijuniera tassew tat frott tajjeb.

⁷ Isiru ż-​Żjajjar Lura: Meta tirċievi rivista ġdida, aqra kull artiklu. Fittex punti li se jappellaw għal kull individwu fir-​rotta tiegħek. Imbagħad meta terġaʼ tmur, tistaʼ tgħid: “Waqt li kont qed naqra dan l-​artiklu, ħsibt fik u kif dan jistaʼ jinteressak.” Pubblikaturi taʼ kull età jistgħu jieħdu gost li jkollhom rotta bir-​rivisti. Saħansitra tifel ċkejken jistaʼ jgħid: “Qed nieħu pjaċir li qed nerġaʼ narak. L-​aħħar ħarġiet taʼ It-​Torri taʼ l-​Għassa u Stenbaħ! waslulek. Naħseb li dan l-​artiklu li jismu . . . se jogħġbok.”

⁸ Qanqal l-​antiċipazzjoni għal xi artikli li jkunu ġejjin billi tiġbed l-​attenzjoni lejn il-​kaxxa intitolata “Fil-​Ħarġa li Jmiss.” Meta xi artikli jidhru bħala serje, iġbed l-​attenzjoni lejn dan il-​fatt u inkuraġġixxi lill-​qarrej biex ma jitlef l-​ebda parti minnha. Tinsiex li kull darba li twassal ir-​rivisti lil xi ħadd li jkun fir-​rotta bir-​rivisti tiegħek, tistaʼ tgħoddha bħala żjara lura. U fuq kollox, ftakar li l-​mira tagħna hi li niżviluppaw dawn iż-​żjajjar fi studji tal-​Bibbja fid-​dar.

⁹ Żur lin-​Nies fir-​Rotta Tiegħek bi Skeda Regulari: Tistaʼ tkopri r-​rotta bir-​rivisti tiegħek f’kull ħin li huwa prattiku​—fil-​għodu fost il-​ġimgħa, tard wara nofsinhar, kmieni fil-​għaxija, jew fi tmiem il-​ġimgħa wara li tkun qattajt xi ħin fix-​xogħol minn dar għal dar. Jekk ma tkunx tistaʼ tkopri r-​rotta tiegħek minħabba li tkun marid jew tkun fuq btala, itlob lil pubblikatur ieħor fil-​familja jew fil-​kongregazzjoni tiegħek biex iwassal ir-​rivisti għalik. B’dan il-​mod, dawk l-​uħud li jkunu fir-​rotta tiegħek mhux se jonqsu li jiksbu r-​rivisti tagħhom fil-​ħin.

¹⁰ Mod wieħed kif tiżraʼ ż-​żerriegħa tas-​Saltna huwa li tieħu It-​Torri taʼ l-​Għassa u Stenbaħ! regolarment lil dawk kollha fir-​rotta bir-​rivisti tiegħek. Hekk kif tgħallimhom il-​verità Skritturali, jistgħu jieħdu s-​sens tal-​kelma tas-​Saltna u fl-​aħħar mill-​aħħar jipproduċu frott tas-​Saltna flimkien miegħek.​—Mt. 13:​8, 23.