Kif il-​Membri tal-​Familja Jikkooperaw għal Sehem Sħiħ ​—Fl-​Istudju tal-​Bibbja

¹ Il-​verità żżid is-​sinjifikat veru u l-​iskop fil-​ħajja tal-​familja, imma s-​suċċess fis-​servizz taʼ Jehovah ma jiġix awtomatikament. Jinħtieġu l-​ħin u l-​isforz biex tinbena familja b’saħħitha spiritwalment. Huwa ferm bżonnjuż li membri tal-​familja jaħdmu flimkien mill-​qrib f’din l-​intrapriża. Dan l-​ewwel artiklu f’serje taʼ tliet partijiet se jiffoka fuq kif il-​familji jistgħu jikkooperaw biex jiżviluppaw drawwiet tajbin taʼ studju.

² Billi Taqraw il-​Bibbja Kuljum: Proverbji 24:5 (Karm Żammit) jgħid li “min għandu l-​għerf [“għarfien,” NW] iżid fil-​qawwa tiegħu.” L-​għarfien li jinkiseb mill-​qari regulari tal-​Kelma t’Alla jagħti lil dak li jkun il-​forza ġewwinija meħtieġa biex jirreżisti l-​attakki taʼ Satana fuq l-​ispiritwalità tiegħu. (Salm 1:​1, 2) Taqrawha l-​Bibbja flimkien u kuljum bħala familja? L-​iskeda taʼ l-​Iskola tal-​Ministeru Teokratiku tindika “Skeda Supplimentarja għall-​Qari tal-​Bibbja” għal kull ġimgħa tas-​sena. Biex issegwuha jkollkom bżonn għaxar minuti biss kuljum mill-​ħin tal-​familja. Agħżlu ħin konvenjenti, bħal waqt il-​kolazzjon, wara l-​ikla taʼ fil-​għaxija, jew qabel ħin l-​irqad, biex taqraw il-​Bibbja u tikkunsidraw l-​iskrittura tal-​jum minn Neżaminaw l-​Iskrittura. Agħmlu dan parti mir-​rutina taʼ kuljum tal-​familja tagħkom.

³ Billi Tistudjaw Flimkien Kull Ġimgħa: L-​istudju tal-​Bibbja tal-​familja għandu jkun taʼ interess speċjali fil-​ġimgħa taʼ familja. Kull membru għandu jappoġġah billi jipparteċipa bil-​ħerqa fl-​istudju. Il-​kap tal-​familja se jkun irid jikkunsidra l-​bżonnijiet tal-​familja meta jagħżel il-​materjal għall-​istudju u l-​ġurnata, il-​ħin, u t-​tul taʼ l-​istudju. L-​istudju tal-​familja jrid jingħata prijorità fl-​iskeda tal-​ġimgħa. Tħallux kwistjonijiet taʼ inqas importanza jkunu taʼ tfixkil.​—Fil. 1:​10, 11.

⁴ Wieħed missier li taʼ spiss kienu jċemplulu d-​dar dwar in-​negozju, kien jaqtaʼ l-​linja tat-​telefon matul l-​istudju tal-​familja. Jekk il-​klijenti kienu jiġu għandu, kien jistidinhom jingħaqdu miegħu fl-​istudju jew jistennew sakemm ikun spiċċa. Il-​missier kien iddeterminat li xejn ma jfixkel l-​istudju tal-​familja. Dan impressjona profondament lil uliedu, u inkwantu għan-​negozju tiegħu, irnexxa ħafna.

⁵ Kemm hu pjaċevoli meta membri taʼ familja jikkooperaw f’attivitajiet spiritwali! Fedeltà fl-​isforzi tagħna biex ikollna sehem sħiħ fl-​istudju tal-​Bibbja tal-​familja se ġġib il-​barka taʼ Jehovah.​—Salm 1:3.