“Ħa Jsir Kollox Fostkom bl-Imħabba”
1 “Il-membri tagħkom fihom verament għaxqa; iġibu ruħhom bil-korteżija u r-rispett kollu.” Din l-osservazzjoni ġiet minn uffiċċju governattiv għat-turiżmu u l-konvenzjonijiet f’belt fl-Istati Uniti fejn inżammet waħda mill-konvenzjonijiet distrettwali tagħna. Huwa taʼ inkuraġġiment li nirċievu tifħir bħal dan għal mod kif inġibu ruħna fil-pubbliku. Dan juri li b’mod ġenerali qed inħallu ‘jsir kollox fostna bl-imħabba.’ (1 Kor. 16:14) Fl-istess ħin, hemm xi kwistjonijiet importanti li jekk jiġu injorati se jnaqqsu mir-reputazzjoni tajba tal-poplu t’Alla.
2 Nagħmlu l-Ġid maʼ Kulħadd: Hija l-imħabba għal Jehovah u għal għajrna li tqanqalna jkollna manjieri tajbin u kondotta eżemplari. (Mt. 22:37-39; Ġak. 3:13) Il-Bibbja tħeġġiġna biex inħobbu lin-nies kollha u nuru interess fihom. (Gal. 6:10) Dan il-prinċipju żgur li japplika meta nużaw il-faċilitajiet mill-aħjar fiċ-Ċentru għall-Konferenzi tan-New Dolmen Hotel. Jekk ma nkunux lesti li nikkooperaw se nħassru r-reputazzjoni tagħna, nipperikolaw l-arranġamenti tagħna mal-lukanda, u nġagħlu lill-aħwa jħossuhom irrabjati. Huwa dan taʼ mħabba jew qalb tajba? Kemm ikun aħjar li nuru mħabba u nagħmlu l-ġid m’oħrajn billi nżommu f’moħħna x’inhuma l-aħjar interessi tagħhom minflok tagħna stess!—Mt. 7:12; Ġw. 13:34, 35.
3 Aħna nħarsu ’l quddiem bil-ħerqa li nattendu l-Konvenzjoni Distrettwali “Nagħmlu Dak li Tgħid il-Kelma t’Alla.” Għamilt il-preparamenti kollha tiegħek u arranġamenti oħrajn sabiex tattendi t-tlett ijiem kollha? Jalla l-kondotta tagħna ġewwa l-lukanda u matul il-konvenzjoni dejjem tirrifletti l-verità li qegħda f’qalbna, u l-imħabba li għandna lejn il-Ħallieq tagħna.