Programm Ġdid għall-​Assemblea tas-​Circuit

Aħna nafu li Alla Jehovah jixraqlu l-​imħabba u d-​devozzjoni esklużivi tagħna. Madankollu, id-​dinja tipprova tħajjarna biex ma nibqgħux inżommu r-​relazzjoni mill-​qrib miegħu. (Ġw. 17:14) Sabiex isaħħaħ l-​imħabba tagħna għal Jehovah u jqawwina biex nirreżistu l-​affarijiet tad-​dinja li jipperikolaw l-​ispiritwalità tagħna, il-​programm ġdid għall-​assemblea tas-​circuit għas-​sena taʼ servizz 2001 se jkollu t-tema “Ħobb lil Alla—Mhux l-​Affarijiet tad-​Dinja.”—1 Ġw. 2:15-17.

L-imħabba profonda għal Jehovah ġġagħalna nagħtu xiehda dwaru. Minkejja dan, is-​servizz taʼ l-​għalqa m’huwiex faċli għal ħafna mill-​poplu t’Alla. Fil-​parti “L-​Imħabba għal Alla Tqanqalna fil-​Ministeru Tagħna,” tgħallem kif ħafna għelbu l-​mistħija u ostakli oħrajn sabiex jieħdu sehem sħiħ f’dan ix-​xogħol.

Kif jinfluwenzawna l-​livelli tad-​dinja li qed jinżlu fil-​baxx? L-​affarijiet li xi darba kienu kunsidrati mill-​agħar, illum isejħulhom imġiba normali. It-​taħdita “Dawk li Jħobbu lil Jehovah Jobogħdu Dak li Hu Ħażin” u s-​simposju “L-​Affarijiet fid-​Dinja—Kif Tqishom?” se jsaħħulna d-​determinazzjoni tagħna biex ngħidu le għax-​xewqat ħżiena.

Il-​programm se jinkludi l-​Iskola tal-​Ministeru Teokratiku u l-​Laqgħa tas-​Servizz bħala mudell, kif ukoll ġabra fil-​qosor taʼ l-​artiklu taʼ studju tat-​Torri taʼ l-​Għassa għal dik il-​ġimgħa. It-​taħdita pubblika, “Kif l-​Imħabba u l-​Fidi Jirbħu d-​Dinja,” se tinkuraġġina biex nimitaw lil Ġesù f’li nirreżistu l-​pressjonijiet tad-​dinja. (Ġw. 16:33) Kun ċert li tistieden lill-​istudenti tiegħek tal-​Bibbja sabiex jattendu. Kulmin jixtieq jitgħammed għandu jgħid lill-​indokratur li jippresiedi malajr kemm jistaʼ jkun sabiex isiru l-​arranġamenti meħtieġa.

Din l-​assemblea tas-​circuit se tiffoka l-​attenzjoni tagħna fuq x’għandna nħobbu l-​iktar sabiex ingawdu l-​barkiet kbar taʼ Jehovah. Titlef xejn minnha!