Tistaʼ Taqdi Fejn il-Bżonn Huwa Akbar?
1 Ġieli qgħadt taħseb biex tmur tgħix Għawdex fejn hemm bżonn taʼ iktar proklamaturi tas-Saltna? Jekk tkun mistieden biex ‘tiġi u tgħin,’ lest int li twieġeb bħalma għamel l-appostlu Pawlu? (Atti 16: 9, 10) Fil-kongregazzjoni t’Għawdex hemm bżonn taʼ familji maturi spiritwalment jew taʼ pijunieri biex jgħinu f’li jkopru t-territorju, jew anzjani kwalifikati u qaddejja ministerjali sabiex jgħinu fit-tmexxija. Dan it-territorju fih irħula mxerrdin madwar il-gżira kollha. Ix-xogħol sekulari jistaʼ jkun limitat. L-interess mhux dejjem ikun dak li nixtiequ. Int kieku tkun lest biex taċċetta sfida bħal din? Kif tistaʼ tirnexxi fiha?
2 Hemm Bżonn taʼ Fidi u Fiduċja: X’ħin Alla dderiġieh, Abram telaq minn Ur, il-post fejn trabba, u vvjaġġa xi 1,000 kilometru ’l bogħod lejn Ħaran flimkien maʼ martu, in-neputi, u missieru Teraħ, li kien kbir fl-età. (Ġen. 11:31, 32; Neħ. 9:7) Wara li miet Teraħ, Jehovah ordna lil Abram, li issa kellu 75 sena, biex jitlaq minn Ħaran u lill-qraba tiegħu sabiex jivvjaġġa lejn il-pajjiż li Alla kien se jurih. Abram, Saraj, u Lot “ħarġu biex imorru” fi triqithom. (Ġen. 12:1, 4, 5) M’għandniex xi ngħidu, Abram ma telaqx minfejn kien sabiex imur jaqdi fejn kien hemm bżonn akbar taʼ wħud li jaqdu fil-ministeru. Iżda l-vjaġġ tiegħu kien jeħtieġ xi ħaġa. X’kien jeħtieġ?
3 Abram kellu bżonn taʼ fidi u fiduċja sabiex jipprova jagħmel xi ħaġa bħal din. Il-mod taʼ kif jaħseb u jgħix kellhom jinbidlu. Hu kellu jitlaq mis-sigurtà li kellu fost il-qraba tiegħu. Iżda hu ħalla lil Jehovah jieħu ħsieb lilu u lill-familja tiegħu. Ħafna llum urew il-fiduċja tagħhom f’Jehovah b’mod li jixbah lil dak t’Abram.
4 Tmur Tgħin Fejn il-Bżonn Huwa Akbar: Int irtirajt mix-xogħol? Għandek dħul taʼ flus fiss? Jekk le, tistaʼ tirranġa biex tibda taħdem għal rasek? Int kapaċi taqlaʼ l-għajxien tkun fejn tkun permezz tat-telefon jew tal-kompjuter? Jekk ma tistax tmur int, tistaʼ tgħin lil xi membru tal-familja tiegħek biex ikun jistaʼ jaqdi xi mkien ieħor?
5 Jekk wara li tkun ikkunsidrajt dan bit-talb, tħossok li tistaʼ tiffaċċja l-isfida taʼ li tmur tgħix Għawdex, iddiskuti dan mal-familja tiegħek u maʼ l-anzjani tal-kongregazzjoni tiegħek. Imbagħad, lesti ittra u agħtiha lill-anzjani sabiex huma jkunu jistgħu jinkludu xi rimarki u rakkomandazzjonijiet qabel ma jibagħtuha lill-uffiċċju tas-soċjetà.
6 X’għandek tinkludi fl-ittra tiegħek? L-età tiegħek, id-data taʼ meta tgħammidt, ir-responsabbiltajiet li għandek fil-kongregazzjoni, jekk intix miżżewweġ, u jekk għandekx xi tfal li għadhom żgħar fl-età.
7 Int żeluż u taf tieħu l-inizjattiva? Iċ-ċirkustanzi tiegħek jippermettulek taqdi fejn il-bżonn huwa akbar? Jekk inhu hekk, mela ara kif Jehovah l-ħin kollu jferraʼ barkiet għonja fuq dawk li jafdaw fih hekk kif juru li għandhom spirtu li lesti jissagrifikaw lilhom infushom!—Salm 34:9 [34:8, NW]; Mal. 3:10.