Noffru l-​Letteratura f’Territorju Fejn Hemm Iktar minn Lingwa Waħda

1. Ħafna kongregazzjonijiet għala għandhom bżonn letteratura b’lingwa barranija?

¹ F’ħafna postijiet, l-​għalqa saret tinkludi nies minn pajjiżi oħra. Ħafna minn dawn jitgħallmu ħafna iktar malajr u jifhmu iktar meta jitgħallmu bil-​lingwa tagħhom proprja. X’arranġamenti hemm biex jiġu provduti pubblikazzjonijiet ibbażati fuq il-​Bibbja bil-​lingwa li wħud interessanti jifhmu l-​iktar?

2. Liema kooperazzjoni hemm bżonn meta żewġ kongregazzjonijiet jew iktar li jitkellmu lingwi differenti jaħdmu l-​istess territorju?

² Meta Għandek Toffri l-​Letteratura: Meta żewġ kongregazzjonijiet jew iktar li jkunu jitkellmu lingwi differenti jaħdmu l-​istess territorju, il-​ġemgħat taʼ l-​anzjani li jkunu involuti għandhom jikkooperaw maʼ l-​indokraturi tas-​servizz sabiex jistabbilixxu ftehim li hu aċċettat minn kull kongregazzjoni biex b’hekk kull grupp taʼ lingwa jingħata xiehda bir-​reqqa. Meta jippridkaw minn dar għal dar, il-​pubblikaturi normalment ma joffrux letteratura bil-​lingwa tal-​kongregazzjoni(jiet) l-​oħra. Madankollu, meta l-​pubblikaturi jagħtu xiehda informali jew f’postijiet pubbliċi, huma jistgħu jużaw letteratura bil-​lingwi mitkellma f’dawk il-​lokalitajiet.—Ara l-​Kaxxa għall-​Mistoqsija fl-​Our Kingdom Ministry t’Ottubru taʼ l-​1990.

3. Kongregazzjoni meta għandha żżomm ħażna taʼ letteratura b’lingwa barranija?

³ Meta Għandha Tinżamm Letteratura Maħżuna: X’jistaʼ jsir jekk f’xi post ikun hemm popolazzjoni kbira mhux ħażin taʼ wħud li jitkellmu b’lingwa barranija imma ma jkunx hemm kongregazzjoni li titkellem b’dik il-​lingwa partikulari? F’dawn iċ-​ċirkustanzi, il-​kongregazzjonijiet jistgħu jżommu maħżun ammont żgħir taʼ letteratura bażika li tkun disponibbli b’dik il-​lingwa, bħal xi fuljetti, il-​browxers X’Jirrikjedi u Il-​Ħabib t’Alla, u l-​ktieb Għarfien. Il-​pubblikaturi jistgħu joffru din il-​letteratura kulmeta jiltaqgħu maʼ wħud li jistgħu jaqraw b’dik il-​lingwa.

4. Kif tistaʼ tinkiseb letteratura b’lingwa li l-​kongregazzjoni ma jkollhiex maħżun?

⁴ Kif Tordna l-​Letteratura: Jekk il-​kongregazzjoni m’għandhiex maħżun letteratura bil-​lingwa li l-​persuna interessata taqra, kif tistaʼ tinkiseb letteratura b’dik il-​lingwa? Il-​pubblikatur għandu jiċċekkja mal-​ħu li jieħu ħsieb il-​letteratura biex jiddetermina liema pubblikazzjonijiet huma disponibbli b’dik il-​lingwa sabiex tkun tistaʼ tiġi ordnata l-​letteratura li jkun hemm bżonn maʼ l-​ordni li jkun imiss tal-​kongregazzjoni.

5. X’jistaʼ jsir jekk il-​letteratura hija meħtieġa qabel tasal l-​ordni li jkun imiss?

⁵ Jekk ikun hemm bżonn taʼ servizz iktar mgħaġġel, il-​pubblikatur jistaʼ jistaqsi lill-​wieħed mill-​Kumitat tas-​Servizz tal-​Kongregazzjoni jekk l-​ordni tistax tiġi konsenjata qabel l-​ordni li jkun imiss tal-​kongregazzjoni. Jekk dan jiġi approvat, il-​koordinatur tal-​letteratura jew xi ħu ieħor li jiġi inkarigat minnu jistaʼ jagħmel ordni taʼ malajr bil-​posta jew bit-​telefon lill-​uffiċċju tal-​fergħa. Il-​letteratura se tintbagħat fl-​indirizz tal-​konsenji tas-​soltu tal-​kongregazzjoni jew f’indirizz temporanju, jekk dan ikun mixtieq. Jekk il-​konsenja tiġi mitluba mil-​llum għall-​għada jew fi żmien jumejn, il-​kongregazzjoni tintalab tħallas in-​nefqa tal-​konsenja.

6. X’inhi l-​mira tagħna meta nagħmlu l-​letteratura Kristjana disponibbli?

⁶ Jalla nagħmlu użu tajjeb mill-​pubblikazzjonijiet Kristjani sabiex ngħinu lill-​“bnedmin kollha,” tkun xi tkun il-​lingwa tagħhom, ħalli ‘jaslu biex jagħrfu l-​verità u jsalvaw.’—1 Tim. 2:​3, 4.