Programm Ġdid tal-​Jum t’Assemblea Speċjali

Jekk naraw jew nisimgħu sinjal taʼ twissija imma ma niħdux azzjoni, ir-​riżultati jistgħu jkunu diżastrużi. Huwa saħansitra iktar importanti li naġixxu għad-​direzzjoni spiritwali li jipprovdi Jehovah. Dan se jiġi enfasizzat fil-​programm tal-​jum t’assemblea speċjali għas-​sena taʼ servizz li ġejja. It-​tema hija “Oqgħod Attent Kif Tismaʼ.”​—Lq. 8:​18.

Fl-ewwel taħdita tiegħu, il-​kelliemi li se jżurna se jikkunsidra kif il-​pariri li nsibu fl-​ewwel kapitli taʼ l-​ittra mnebbħa taʼ Pawlu lil-​Lhud japplikaw għalina llum. Fl-​aħħar taħdita, “Oqgħod Attent il-​Ħin Kollu għall-​Istruzzjoni Divina,” hu se jgħinna lkoll neżaminaw jekk aħniex verament nisimgħu lil Jehovah, lil Ibnu, u lill-​“ilsir leali u diskret.”​—Mt. 24:​45, NW.

Diversi partijiet tal-​programm se jkunu taʼ benefiċċju b’mod speċjali għall-​familji. It-​taħdita “Familji li Jisimgħu l-​Kelma t’Alla Mingħajr Aljenazzjoni” se tgħinna biex ma nħallux l-​affarijiet tad-​dinja joħonqu l-​ispiritwalità tagħna. Din se jkun fiha intervisti taʼ wħud li għamlu bidliet sabiex ipoġġu l-​affarijiet spiritwali fl-​ewwel post. It-​taħdita “Kif iż-​Żgħażagħ Tagħna Jissaħħu Billi Jisimgħu b’Attenzjoni l-​Kelma t’Alla” se tinkludi intervisti taʼ żgħażagħ li wrew lealtà lejn il-​verità fl-​iskola, maʼ dawk taʼ mparhom, jew fil-​ministeru. “Uħud Ċkejknin li Jisimgħu lil Alla u Jitgħallmu” hija taħdita li se tgħinna naraw kemm it-​tfal żgħar għandhom abbiltà li jitgħallmu. Intervisti maʼ wħud ċkejknin u l-​ġenituri tagħhom se jgħinuna naraw kemm joħroġ ġid meta t-​tfal jiġu mħarrġin mindu jkunu trabi fit-​triqat taʼ Jehovah.

Filwaqt li Satana qiegħed ‘iqarraq bid-​dinja kollha,’ Jehovah qiegħed juri lill-​qaddejja leali tiegħu minn liema triq għandhom jgħaddu. (Apk. 12:9; Is. 30:21) Jekk nisimgħu b’attenzjoni l-​pariri tiegħu u b’ubbidjenza napplikawhom f’ħajjitna, se niksbu l-​għerf, se jkollna l-​hena, u se ngħixu għal dejjem.​—Prov. 8:​32-​35.