Programm Ġdid tal-​Jum t’Assemblea Speċjali

L-​għajn hija disinn meraviljuż. (Salm 139:14) Madankollu, din tistaʼ tiffoka biss fuq ħaġa waħda. Dan huwa minnu kemm b’mod letterali kif ukoll b’mod figurattiv. Sabiex ikollna ħarsa spiritwali ċara u ffokata, l-​attenzjoni tagħna għandha tkun fuq li nagħmlu r-​rieda t’Alla. Meta nqisu t-​tfixkil li dejjem qed jiżdied fid-​dinja taʼ Satana, kemm huwa adattat li l-​programm tal-​jum t’assemblea speċjali għas-​sena taʼ servizz 2006 se jiżviluppa t-​tema “Żomm Għajnek Sempliċi”!​—Mt. 6:​22.

X’nistgħu nagħmlu sabiex nirċievu barkiet mingħand Ġeħova? (Prov. 10:22) Din il-​mistoqsija se tiġi kunsidrata fit-​taħdita “Aħsad il-​Barkiet Talli Żżomm Għajn Sempliċi.” L-​intervisti se jenfasizzaw kif aħna nistgħu nibbenefikaw meta napplikaw il-​prinċipji Skritturali. L-​ewwel taħdita li se jagħti l-​kelliemi li se jżurna, “Inżommu Għajn Sempliċi f’Dinja mill-​Agħar,” se twissina dwar affarijiet li jistgħu jikkomplikaw lil ħajjitna u bil-​mod il-​mod ifixklu lispiritwalità tagħna. Aħna se nitgħallmu wkoll x’hemm bżonn isir sabiex nagħżlu “l-​aħjar sehem.”​—Lq. 10:42.

Kif jistgħu l-​ġenituri u oħrajn jinkuraġġixxu liż-​żgħażagħ Kristjani biex jiffokaw fuq miri spiritwali? It-​taħditiet “Ġenituri li Jimmiraw Sew il-​Vleġeġ Tagħhom” u “Żgħażagħ li Jirsistu biex Jilħqu Miri Spiritwali” se jkun fihom kummenti minn ġenituri u żgħażagħ fuq din il-​mistoqsija importanti. (Salm 127:4) L-​aħħar taħdita mingħand il-​kelliemi li se jżurna se tikkunsidra kif aħna nistgħu nżommu l-​pass maʼ l-​organizzazzjoni taʼ Ġeħova bħala individwi, bħala familji, u bħala kongregazzjoni.

Kemm jekk aħna għadna nibdew fil-​verità jew ilna naqdu lil Ġeħova għal għaxriet taʼ snin, huwa vitali li ‘nżommu għajnejna sempliċi.’ Il-​jum t’assemblea speċjali se jgħinna biex nagħmlu eżattament dan.