Programm Ġdid Għall-​jum t’Assemblea Speċjali

Il-​provvediment tal-​jiem t’assemblea speċjali beda fl-​1987. Dawn il-​laqgħat taʼ jum wieħed urew li kienu edifikanti għall-​qaddejja taʼ Jehovah u għal uħud interessati li jattendu. Minn Settembru 1998, se jiġi ppreżentat programm ġdid għall-​jum t’assemblea speċjali. Id-​disaʼ taħditiet u l-​għadd taʼ intervisti u esperjenzi se ssibhom taʼ benefiċċju spiritwalment.

“Uri Apprezzament għall-​Mejda taʼ Jehovah” hija t-​tema tal-​programm il-​ġdid. (Is. 65:14; 1 Kor. 10:21) Se jsaħħaħ id-​determinazzjoni tagħna li nagħtu l-​ewwel post f’ħajjitna lill-​qima taʼ Jehovah. (Salm 27:4) Il-​parti taʼ l-​indokratur tas-​circuit se tittratta dwar li “Neżaminaw l-​Inklinazzjonijiet taʼ Qlubna” rigward l-​attendenza għal-​laqgħat. Kelliemi mistieden se jagħtina t-​taħdita “Żomm l-​Ispiritwalità billi Tiekol mill-​Mejda taʼ Jehovah,” u se jurina kif nagħmlu dan. Se jingħata inkuraġġiment prattiku liż-​żgħażagħ fl-​organizzazzjoni taʼ Jehovah biex iżommu sod fis-​servizz lejn Jehovah. It-​taħdita prinċipali tal-​kelliemi li jkun qed iżurna, intitolata “Imsaħħin Spiritwalment biex Nagħtu Xiehda Qalbiena,” se turina kif il-​provvedimenti magħmulin permezz tal-​kongregazzjoni jgħammruna biex nagħtu xiehda bil-​qlubija dwar is-​Saltna. Min m’huwiex se jkun irid jibbenefika minn dan il-​programm?

Uħud iddedikati ġodda li jixtiequ jitgħammdu jridu jinformaw lill-​indokratur li jippresiedi mill-​iktar fis possibbli. Aħna fiduċjużi li hekk kif nibdew it-​tnax-il sena taʼ l-​arranġament għall-​jum t’assemblea speċjali, kulmin jattendi se jiġi mibni spiritwalment għax-​xogħol li hemm quddiemna.