Missjunarji “sa l-​Iktar Parti Mbiegħda taʼ l-​Art”

Ġesù qal lid-​dixxipli tiegħu: Intom “tkunu xhieda tiegħi . . . sa l-​iktar parti mbiegħda taʼ l-​art.” (Atti 1:8) Illum, ix-​Xhieda taʼ Ġeħova qed iwettqu dan ix-​xogħol biż-​żelu. Madankollu, xi partijiet mid-​dinja, inkluż postijiet kbar fejn joqogħdu ħafna nies, għadhom ma rċivewx xhieda bir-​reqqa. U xi pajjiżi veru għandhom ftit Xhieda. (Mattew 9:37, 38) X’qegħdin nagħmlu biex nilħqu kemm nistgħu nies?

Biex jgħinna nobdu l-​kmand taʼ Ġesù, il-​Kumitat tas-​Servizz tal-​Ġemgħa li Tiggverna tax-​Xhieda taʼ Ġeħova jibgħat missjunarji f’postijiet fejn hemm il-​bżonn madwar id-​dinja. Fil-​preżent, hemm 3,090 missjunarju madwar id-​dinja.a Il-​biċċa l-​kbira minnhom irċivew taħriġ minn xi skola tal-​Bibbja, bħall-​Iskola għall-​Evanġelizzaturi tas-​Saltna. Il-​missjunarji huma lesti li jitilqu djarhom u jmorru f’art barranija. Grazzi għall-​maturità tagħhom, għat-​taħriġ u l-​esperjenza li rċivew, dawn il-​missjunarji leali jgħinu biex tinxtered l-​aħbar tajba u jagħtu eżempju mill-​aħjar lil dixxipli ġodda.

Ngħinu lill-​Missjunarji Jgħinu Oħrajn

F’kull uffiċċju tal-​fergħa, il-​Field Ministers Desk tad-​Dipartiment tas-​Servizz jaħdem mal-​Kumitat tal-​Fergħa biex jieħu ħsieb il-​bżonnijiet tal-​missjunarji, bħal li jkollhom dar diċenti, kura tas-​saħħa, u xi ħaġa tal-​flus għall-​ispejjeż tal-​ħajja. Matul is-​sena taʼ servizz tal-​2020, ix-​Xhieda taʼ Ġeħova nefqu kważi €23 miljun biex jgħinu lill-​missjunarji. Grazzi għal din l-​għajnuna, il-​missjunarji jistgħu jiffokaw l-​attenzjoni u l-​enerġija kollha tagħhom fuq il-​ministeru, kif ukoll biex isaħħu l-​kongregazzjoni tal-​lokal.

Ix-​xogħol tal-​ippritkar kif ibbenefika minn dawn il-​missjunarji? Frank Madsen, li jaqdi fil-​Kumitat tal-​Fergħa tal-​Malawi, jgħid: “Minħabba l-​kuraġġ u t-​taħriġ li rċivew, il-​missjunarji għenu lil xi kongregazzjonijiet biex ikopru territorji diffiċli, bħal meta komunitajiet joqogħdu f’bini b’ħafna sigurtà u fejn in-​nies jitkellmu lingwi barranin. Ukoll, l-​isforz kbir tagħhom biex jitgħallmu l-​lingwa u l-​kultura tal-​lokal hu taʼ eżempju għal oħrajn. Dan jgħin ukoll liż-​żgħażagħ biex jaħsbu dwar li jidħlu fis-​servizz full-​time. Aħna nirringrazzjaw lil Ġeħova għall-​missjunarji.”

Membru tal-​Kumitat tal-​Fergħa minn pajjiż ieħor jgħid: “Il-​missjunarji huma eżempji ħajjin li l-​poplu taʼ Ġeħova huwa magħqud mad-​dinja kollha. Anke dawk li mhumiex Xhieda jistgħu jaraw ċar li l-​kulturi ma jifirduniex, imma li t-​tagħlim tal-​Bibbja għinna nsiru poplu magħqud.”

Il-​missjunarji kif għenu lill-​pubblikaturi tal-​lokal? Paulo, minn Timor-​Leste, japprezza l-​missjunarji li marru fil-​kongregazzjoni tiegħu. Hu jgħid: “Tagħmel ħafna u ħafna sħana fejn noqogħdu aħna. Imma għalkemm il-​missjunarji huma minn post kiesaħ, huma qatt ma jħallu lit-​temp iwaqqafhom milli jippritkaw. Filgħodu dejjem ikunu preżenti għal-​laqgħat tas-​servizz tal-​għalqa. Spiss narahom jagħmlu żjajjar lura f’nofsinhar, meta tkun ħafna sħana, u anke filgħaxijiet. Huma għenu lil ħafna nies jitgħallmu l-​verità, inkluż lili. Huma jużaw ħajjithom kollha biex jaqdu lil Ġeħova biż-​żelu u bl-​entużjażmu, u dan jimmotiva lill-​kongregazzjoni kollha biex taqdih iktar bis-​sħiħ.”

Ketti, pijuniera regulari fil-​Malawi, tgħid kif koppja missjunarja għenu lill-​familja tagħha: “Meta koppja missjunarja ġiet fil-​kongregazzjoni tagħna, jien biss kont Xhud fil-​familja tiegħi. Imma din il-​koppja appoġġatni ħafna, u saru ħbieb tal-​familja tagħna. L-​eżempju tajjeb tagħhom għenu lit-​tfal tiegħi jaraw illi li jaqdu lil Ġeħova jġibilhom ferħ u sodisfazzjon fil-​ħajja. Minħabba l-​effett tajjeb li ħallew fuq il-​familja tiegħi, it-​tliet uliedi bniet qed jaqdu bħala pijunieri regulari u r-​raġel beda jattendi l-​laqgħat.”

Kif jiġu provduti l-​ispejjeż biex jieħdu ħsieb il-​missjunarji? Permezz taʼ donazzjonijiet għax-​xogħol taʼ madwar id-​dinja, li ħafna minnhom isiru bil-​metodi li qegħdin fuq donate.jw.org. Dawn il-​kontribuzzjonijiet ġenerużi huma apprezzati ferm.