Il-​Kobor taʼ Jehovah Hu Bla Tarf

“Kbir il-​Mulej, taʼ min ifaħħru bil-​bosta, bla tarf il-​kobor tiegħu.”—Salm 145:3.

1, 2. David x’tip taʼ persuna kien, u kif qies lilu nnifsu ħdejn Alla?

IL-​KOMPOŻITUR taʼ Salm 145 hu wieħed mill-​iktar irġiel famużi fl-​istorja tal-​bniedem. Bħala tifel, hu ffaċċja ġgant armat sa snienu u qatlu. U bħala sultan gwerrier, dan is-​salmista rebaħ lil ħafna għedewwa. Kien jismu David, u kien it-​tieni sultan taʼ Iżrael tal-​qedem. Il-​fama taʼ David baqgħet tissemma anki wara mewtu, tant li saħansitra llum miljuni taʼ nies jafu xi ħaġa dwaru.

² Minkejja dak kollu li David irnexxielu jwettaq, hu kien bniedem umli. Hu għanna dwar Jehovah: “Inħares lejn is-​smewwiet, għemil subgħajk, il-​qamar u l-​kwiekeb li int qegħedt fihom! X’inhu l-​bniedem biex tiftakar fih, bin il-​bniedem, biex taħseb fih?” (Salm 8:4, 5 [8:3, 4, NW]) Minflok ma qagħad jaħseb li hu nnifsu kien xi ħaġa kbira, David ta l-​kredtu lil Jehovah talli ħelsu mill-​għedewwa kollha tiegħu u dwar Alla qal: “Int tajtni t-​tarka tas-​salvazzjoni tiegħek; l-​[“umiltà,” NW] tiegħek kabbritni.” (2 Samwel 22:1, 2, 36) Jehovah juri l-​umiltà meta juri ħniena mal-​midinbin, u David apprezza l-​qalb tajba mhix mistħoqqa t’Alla.

‘Inkabbar lil Alla s-​Sultan’

3. (a) David kif kien iqis il-​fatt li hu kien is-​sultan taʼ Iżrael? (b) David sa liema punt xtaq ifaħħar lil Jehovah?

³ Għalkemm David kien is-​sultan maħtur minn Alla, hu kien iqis lil Jehovah bħala s-​Sultan veru taʼ Iżrael. “Tiegħek is-​saltna, Mulej, int kap fuq kulħadd,” qal David. (1 Kronaki 29:11) U kemm kien japprezza David lil Alla bħala Ħakkiem! “Ħa nkabbrek, Alla tiegħi, sultan,” hu għanna, “u nbierek ismek għal dejjem taʼ dejjem. Kuljum irrid inbierkek, u nfaħħar ismek għal dejjem taʼ dejjem.” (Salm 145:1, 2) Ix-​xewqa taʼ David kienet li jfaħħar lil Alla Jehovah matul il-​jum u għall-​eternità kollha.

4. Salm 145 jikxef liema akkużi foloz?

⁴ Salm 145 jipprovdi tweġiba konvinċenti għall-​istqarrija taʼ Satana li Alla hu ħakkiem egoist li jċaħħad lill-​ħlejjaq tiegħu mil-​libertà. (Ġenesi 3:1-5) Dan is-​salm jikxef ukoll il-​gidba li qal Satana illi dawk li jobdu lil Alla jobduh biss għax jistgħu jakkwistaw xi ħaġa mingħandu, u mhux għax iħobbuh. (Ġob 1:9-11; 2:4, 5) Bħal David, il-​Kristjani veri llum qed jipprovdu t-​tweġiba għall-​akkużi foloz tax-​Xitan. Huma jgħożżu t-​tama tagħhom taʼ ħajja taʼ dejjem taħt il-​ħakma tas-​Saltna għax jixtiequ jfaħħru lil Jehovah għall-​eternità kollha. Miljuni taʼ nies diġà bdew jagħmlu dan billi jeżerċitaw il-​fidi tagħhom fis-​sagrifiċċju taʼ Ġesù bħala fidwa u billi jaqdu lil Jehovah b’ubbidjenza u bi mħabba bħala l-​aduraturi dedikati u mgħammdin tiegħu.—Rumani 5:8; 1 Ġwanni 5:3.

5, 6. X’opportunitajiet għandna biex inbierku u nfaħħru lil Jehovah?

⁵ Aħseb ftit dwar kemm opportunitajiet għandna biex infaħħru lil Jehovah bħala l-​qaddejja tiegħu. Nistgħu nagħmlu dan permezz tat-​talb meta tolqotna xi ħaġa li naqraw fil-​Kelma tiegħu, il-​Bibbja. Nistgħu nesprimu t-​tifħir u gratitudni mill-​fond taʼ qalbna meta naraw il-​mod kif Alla ttratta lill-​poplu tiegħu jew meta nħossuna mgħaġġbin b’ċertu aspett tal-​ħolqien meraviljuż tiegħu. Inbierku lil Jehovah ukoll meta niddiskutu dwar l-​iskopijiet tiegħu maʼ l-​aduraturi sħabna fil-​laqgħat Kristjani jew f’xi diskursata privata. Fil-​fatt, “l-​għemejjel tajba” kollha li jsiru fl-​interessi tas-​Saltna t’Alla jġibu tifħir lil Jehovah.—Mattew 5:16.

⁶ Eżempji reċenti t’għemejjel tajba bħal dawn jinkludu l-​bini taʼ ħafna postijiet għall-​qima li n-​nies taʼ Jehovah bnew f’pajjiżi fejn hemm ħafna faqar. Ħafna minn dan sar bl-​għajnuna finanzjarja t’aħwa Kristjani f’pajjiżi oħra. Xi Kristjani pprovdew l-​għajnuna billi marru jagħmlu xogħol volontarju fi nħawi bħal dawn sabiex jgħinu fil-​bini taʼ Swali tas-​Saltna. U l-​iktar xogħol importanti mill-​għemejjel tajba kollha hu t-​tifħir lil Jehovah permezz taʼ l-​ippridkar taʼ l-​aħbar tajba tas-​Saltna tiegħu. (Mattew 24:14) Kif insibu iktar ’l isfel fil-​versi taʼ Salm 145, David apprezza l-​ħakma t’Alla u faħħar bil-​bosta s-​saltna Tiegħu. (Salm 145:11, 12) Tħoss int l-​istess apprezzament għall-​mod kollu mħabba kif Alla jaħkem? U titkellem int regolarment m’oħrajn dwar is-​Saltna tiegħu?

Eżempji tal-​Kobor t’Alla

7. Agħti raġuni ewlenija għala għandna nfaħħru lil Jehovah.

⁷ Salm 145:3 jagħti raġuni ewlenija għalxiex għandna nfaħħru lil Jehovah. David jgħanni: “Kbir il-​Mulej, taʼ min ifaħħru bil-​bosta, bla tarf il-​kobor tiegħu.” Il-​kobor taʼ Jehovah huwa bla limitu. Il-​bnedmin ma jistgħux jiskopruh, jifhmuh, jew ikejluh kompletament. Imma aħna żgur se nibbenefikaw billi issa nikkunsidraw xi eżempji tal-​kobor bla tarf taʼ Jehovah.

8. L-​univers x’jirrivela dwar il-​kobor u l-​qawwa taʼ Jehovah?

⁸ Ipprova ftakar f’okkażjoni meta kont ’il bogħod mid-​dwal tal-​belt u ħarist bil-​lejl lejn is-​sema bla sħab. Ma bqajtx miblugħ bil-​viżibilju taʼ kwiekeb li kienu jidhru fis-​swidija taʼ l-​ispazju? Ma ħassejtekx titqanqal biex tfaħħar lil Jehovah għall-​kobor tiegħu bħala l-​Ħallieq taʼ dawk l-​oġġetti ċelestjali kollha? Madankollu, dak li rajt kien biss qatra min-​numru taʼ kwiekeb li hemm fil-​galassja li tinsab fiha l-​art. Barra minn hekk, huwa stmat li hemm iktar minn mitt biljun galassja, u tlieta biss minnhom jistgħu jidhru mingħajr teleskopju. Tabilħaqq, il-​kwiekeb u l-​galassji bla għadd li jifformaw l-​univers immens huma xiehda tal-​qawwa kreattiva u tal-​kobor bla tarf li għandu Jehovah.—Isaija 40:26.

9, 10. (a) Liema aspetti tal-​kobor taʼ Jehovah intwerew f’konnessjoni maʼ Ġesù Kristu? (b) L-​irxoxt taʼ Ġesù kif għandu jeffettwa l-​fidi tagħna?

⁹ Ikkunsidra xi aspetti oħra tal-​kobor taʼ Jehovah—dawk li jinvolvu lil Ġesù Kristu. Il-​kobor t’Alla deher meta ħalaq lil Ibnu u użah għal annati sħaħ bħala “mgħallem” Tiegħu. (Qwiel 8:22-31, Saydon) Il-​kobor taʼ l-​imħabba taʼ Jehovah deher meta ta lil Ibnu l-​waħdieni bħala sagrifiċċju taʼ fidwa għall-​bnedmin. (Mattew 20:28; Ġwanni 3:16; 1 Ġwanni 2:1, 2) U ħaġa li l-​bniedem ma jistax jifhem hu l-​ġisem glorjuż u immortali li Jehovah ħejja għal ibnu meta rxoxtah bħala spirtu.—1 Pietru 3:18.

¹⁰ L-​irxoxt taʼ Ġesù kien jinvolvi ħafna aspetti impressjonanti tal-​kobor bla tarf taʼ Jehovah. Bla dubju, Alla reġaʼ ġedded il-​memorja taʼ Ġesù dwar ix-​xogħol li kien involut fil-​ħolqien taʼ l-​affarijiet kemm li jidhru u kemm li ma jidhrux. (Kolossin 1:15, 16) Dawn jinkludu lil ħlejjaq spirti oħra, l-​univers, l-​art produttiva, u kull xorta taʼ ħajja fiżika fuq il-​globu tagħna. Minbarra li rrestawra l-​għarfien dwar l-​istorja kompluta tal-​ħajja fis-​sema u fuq l-​art li dan l-​Iben ra sseħħ quddiemu matul l-​eżistenza tiegħu qabel ma sar bniedem, Jehovah żiedlu wkoll dak li kien għadda minnu bħala bniedem perfett. Iva, il-​kobor bla tarf taʼ Jehovah jidher fl-​irxoxt taʼ Ġesù. Iktar minn hekk, dan l-​għemil taʼ l-​għaġeb huwa garanzija li l-​irxoxt t’oħrajn huwa possibbli. Dan għandu jsaħħilna l-​fidi li Alla jistaʼ jerġaʼ jagħti l-​ħajja lill-​miljuni taʼ mejtin li qed iżommhom fil-​memorja perfetta tiegħu.—Ġwanni 5:28, 29; Atti 17:31.

Għemejjel taʼ l-​Għaġeb u Atti Setgħana

11. Liema għemil kbir beda f’Pentekoste tas-​sena 33 E.K.?

¹¹ Mill-​irxoxt taʼ Ġesù ’l hawn, Jehovah wettaq ħafna għemejjel kbar u taʼ l-​għaġeb oħra. (Salm 40:6 [40:5, NW]) F’Pentekoste tas-​sena 33 E.K., Jehovah ħalaq ġens ġdid, l-​“Iżrael taʼ Alla,” magħmul mid-​dixxipli taʼ Kristu li kienu midlukin bl-​ispirtu qaddis. (Galatin 6:16) B’mod verament qawwi, dan il-​ġens spiritwali ġdid beda joktor u jinfirex iżjed fid-​dinja taʼ dak iż-​żmien. Minkejja l-​apostasija li minnha ħareġ il-​Kristjaneżmu wara l-​mewt taʼ l-​appostli, Jehovah baqaʼjagħmel għemejjel taʼ l-​għaġeb biex ikun żgur li l-​iskop tiegħu jitwettaq.

12. Il-​fatt li l-​Bibbja hija disponibbli bil-​lingwi ewlenin kollha tad-​dinja huwa xiehda taʼ liema ħaġa?

¹² Per eżempju, il-​kotba kollha tal-​Bibbja ġew preservati u maż-​żmien tradotti bil-​lingwi ewlenin kollha li hawn fid-​dinja llum. Kulmin kien jittraduċi l-​Bibbja spiss kien jagħmel dan f’ċirkustanzi diffiċli u bit-​theddida tal-​mewt mill-​aġenti taʼ Satana. Żgur li l-​Bibbja qatt ma setgħet tiġi tradotta b’iktar minn 2,000 lingwa kieku ma kinitx ir-​rieda t’Alla Jehovah, li l-​kobor tiegħu hu bla tarf!

13. Il-​kobor taʼ Jehovah f’konnessjoni maʼ l-​iskopijiet tiegħu tas-​Saltna kif deher mill-​1914 ’l hawn?

¹³ Il-​kobor taʼ Jehovah deher f’konnessjoni maʼ l-​iskopijiet tiegħu tas-​Saltna. Per eżempju, fis-​sena 1914, hu poġġa lil Ibnu, Ġesù Kristu, bħala Sultan fis-​sema. Ftit wara dan, Ġesù ħa azzjoni kontra Satana u d-​demonji tiegħu. Hu keċċiehom mis-​sema u llimitahom għall-​viċinanzi taʼ l-​art, jistennew sakemm jintefgħu fl-​abbiss. (Apokalissi 12:9-12; 20:1-3) Minn dakinhar ’l hawn, il-​persekuzzjoni fuq is-​segwaċi midlukin taʼ Ġesù baqgħet dejjem tiżdied. Madankollu, Jehovah sostniehom matul dan iż-​żmien tal-​preżenza inviżibbli taʼ Kristu.—Mattew 24:3; Apokalissi 12:17.

14. Liema għemil taʼ l-​għaġeb għamel Jehovah fl-​1919, u dan x’wettaq?

¹⁴ Fis-​sena 1919, Jehovah wettaq għemil taʼ l-​għaġeb ieħor li wera l-​kobor tiegħu. Is-​segwaċi midlukin taʼ Ġesù, li kienu saru inattivi spiritwalment, reġgħu ngħataw il-​ħajja. (Apokalissi 11:3-11) Minn dakinhar ’l hawn, il-​midlukin ippridkaw b’żelu kbir l-​aħbar tajba tas-​Saltna tas-​sema li kienet ġiet stabbilita. Inġabru oħrajn mill-​midlukin sabiex jgħaqqdu n-​numru sħiħ taʼ 144,000. (Apokalissi 14:1-3) U permezz tas-​segwaċi midlukin taʼ Kristu, Jehovah qiegħed il-​pedament taʼ “art ġdida,” soċjetà umana ġusta. (Apokalissi 21:1) Imma x’se jiġri mill-​“art ġdida” wara li l-​midlukin leali lkoll imorru fis-​sema?

15. Il-​Kristjani midlukin lil liema xogħol taw spinta, u b’liema riżultat?

¹⁵ Fl-​1935, il-​ħarġiet taʼ l-​1 t’Awissu u tal-​15 t’Awissu tar-​rivista Watchtower kien fihom artikli importanti li ddiskutew dwar il-​“kotra kbira” li tissemma f’Apokalissi kapitlu 7. Il-​Kristjani midlukin bdew b’żelu kbir ifittxu lil dawn l-​aduraturi sħabhom mill-​ġnus, tribujiet, popli, u ilsna kollha biex jissieħbu magħhom. Din il-​“kotra kbira” se ssalva mit-​tribulazzjoni l-​kbira li waslet biex tfaqqaʼ, u se jkollhom il-​prospett taʼ ħajja taʼ dejjem f’Ġenna taʼ l-​art bħala membri permanenti taʼ l-​“art ġdida.” (Apokalissi 7:9-14) Minħabba li l-​Kristjani midlukin taw spinta lix-​xogħol taʼ l-​ippridkar tas-​Saltna u taʼ li jagħmlu dixxipli, issa hemm iktar minn sitt miljun ruħ li għandhom it-​tama taʼ ħajja bla tmiem fuq art magħmula ġenna. Min għandu jieħu l-​kredtu għal din iż-​żjieda kollha minkejja l-​oppożizzjoni minn Satana u d-​dinja korrotta tiegħu? (1 Ġwanni 5:19) Jehovah biss jistaʼ jagħmel dan kollu, permezz taʼ l-​ispirtu qaddis tiegħu.—Isaija 60:22; Żakkarija 4:6.

Il-​Ġmiel Glorjuż u d-​Dinjità taʼ Jehovah

16. Il-​bnedmin għala ma jistgħux jaraw letteralment il-​‘ġmiel glorjuż tad-​dinjità taʼ Jehovah’?

¹⁶ Huma x’inhuma l-​“għemejjel” taʼ l-​għaġeb u l-​“atti setgħana” taʼ Jehovah, dawn qatt ma se jintesew. David kiteb: “Nisel lil nisel isebbaħ għemilek, u s-​setgħa [jew, “l-​atti setgħana,” NW] tiegħek ixandru. Il-​ġmiel [“glorjuż tad-​dinjità,” NW] tiegħek iħabbru, u fuq l-​għeġubijiet tiegħek jitħaddtu. Il-​qawwa taʼ l-​għemejjel tiegħek tal-​biżaʼ jxandru; u jien fuq l-​għemejjel kbar tiegħek nitħaddet.” (Salm 145:4-6) Iżda, David kemm setaʼ kien jaf dwar il-​ġmiel glorjuż taʼ Jehovah, ladarba “Alla huwa spirtu,” u għalhekk hu inviżibbli għal għajnejn il-​bnedmin?—Ġwanni 1:18; 4:24.

17, 18. David kif setaʼ jkabbar l-​apprezzament tiegħu għall-​‘ġmiel glorjuż tad-​dinjità taʼ Jehovah’?

¹⁷ Għalkemm David ma setax jara lil Alla, kien hemm modi biex hu jkabbar l-​apprezzament tiegħu lejn id-​dinjità taʼ Jehovah. Per eżempju, hu setaʼ jaqra r-​rakkont Skritturali dwar l-​atti setgħana t’Alla, bħal dak tal-​qerda taʼ dinja ħażina permezz taʼ dilluvju mad-​dinja kollha. X’aktarx li David innota kif l-​allat foloz Eġizzjani ġew umiljati meta Alla ħeles lill-​Iżraelin mill-​jasar taʼ l-​Eġittu. Dawn il-​ġrajjiet huma xiehda tad-​dinjità u l-​kobor taʼ Jehovah.

¹⁸ David bla dubju żied l-​apprezzament tiegħu lejn id-​dinjità t’Alla mhux biss billi kien jaqra l-​Iskrittura imma wkoll billi kien jimmedita fuqha. Per eżempju, hu setaʼ mmedita fuq dak li ġara meta Jehovah ta l-​Liġi lil Iżrael. Kien hemm ragħad, beraq, sħaba ħoxna, u ħoss qawwi taʼ tromba. Il-​muntanja Sinaj bdiet titheżżeż u ddaħħan. L-​Iżraelin miġburin ħdejn il-​muntanja saħansitra semgħu “l-​għaxar kelmiet” minn ġon-​nar u s-​sħaba hekk kif Jehovah kellimhom permezz taʼ rappreżentant anġeliku. (Dewteronomju 4:32-36; 5:22-24; 10:4; Eżodu 19:16-20; Atti 7:38, 53) X’turija tal-​kobor grandjuż taʼ Jehovah! Dawk li jħobbu l-​Kelma t’Alla u jimmeditaw fuq dawn ir-​rakkonti ma jistgħux ma jħossuhomx imqanqlin mill-​‘ġmiel glorjuż tad-​dinjità taʼ Jehovah.’ M’għandniex xi ngħidu, illum għandna l-​Bibbja kollha li fiha diversi viżjonijiet glorjużi li jġagħluna nibqgħu impressjonati bil-​kobor taʼ Jehovah.—Eżekjel 1:26-28; Danjel 7:9, 10; Apokalissi, kapitlu 4.

19. X’se jkabbrilna l-​apprezzament tagħna għad-​dinjità taʼ Jehovah?

¹⁹ Mod ieħor kif David setaʼ baqaʼ impressjonat bid-​dinjità t’Alla kien billi jistudja l-​liġijiet li Alla kien ta lill-​Iżraelin. (Dewteronomju 17:18-20; Salm 19:8-12 [19:7-11, NW]) L-​ubbidjenza lejn il-​liġijiet taʼ Jehovah tat id-​dinjità lill-​ġens taʼ Iżrael u għamlitu differenti b’mod li jispikka mill-​popli l-​oħra kollha. (Dewteronomju 4:6-8) Jekk naqraw l-​Iskrittura regolarment, nimmeditaw fil-​fond fuqha, u nistudjawha bil-​ħeġġa kollha, aħna wkoll se nkabbru l-​apprezzament tagħna għad-​dinjità taʼ Jehovah bħalma għamel David.

Kemm Jispikka l-​Kobor tal-​Kwalitajiet Morali t’Alla!

20, 21. (a) Salm 145:7-9 jfaħħar il-​kobor taʼ Jehovah f’konnessjoni maʼ liema kwalitajiet? (b) X’effett għandhom il-​kwalitajiet t’Alla li ssemmew hawnhekk fuq dawk kollha li jħobbuh?

²⁰ Bħalma diġà rajna, l-​ewwel sitt versi taʼ Salm 145 jagħtuna raġunijiet sodi biex infaħħru lil Jehovah għall-​affarijiet li għandhom x’jaqsmu mal-​kobor bla tarf tiegħu. Versi 7 sa 9 jfaħħru l-​kobor t’Alla billi jirreferu għall-​kwalitajiet morali tiegħu. David jgħanni: “It-​tjubija tiegħek bla qjies ifakkru, jgħajjtu bil-​ferħ minħabba l-​ġustizzja tiegħek. Twajjeb u ħanin il-​Mulej, idum biex jagħdab u [“kbir fil-​qalb tajba bl-​imħabba,” NW]. Twajjeb maʼ kulħadd il-​Mulej, tjubitu fuq kull ma għamel.”

²¹ Hawnhekk David l-​ewwel jenfasizza ttjubija u l-​ġustizzja taʼ Jehovah—kwalitajiet li Satana x-​Xitan qajjem dubju dwarhom. X’effett għandhom dawn il-​kwalitajiet fuq dawk kollha li jħobbu ’l Alla u li jissottomettu ruħhom lejn il-​ħakma tiegħu? It-​tjubija taʼ Jehovah u l-​mod ġust kif jaħkem tant iferrħu lill-​aduraturi tiegħu li dawn ma jistgħux ma jfaħħruhx b’għajat taʼ ferħ. Iktar minn hekk, Jehovah juri t-​tjubija tiegħu “maʼ kulħadd.” Nittamaw li dan se jgħin lil ħafna iktar nies jindmu u jsiru aduraturi t’Alla veru qabel ma jkun tard wisq.—Atti 14:15-17.

22. Jehovah kif jittrattahom lill-​qaddejja tiegħu?

²² David apprezza wkoll il-​kwalitajiet li Alla nnifsu enfasizza meta Hu ‘għadda minn quddiem [Mosè] u għajjat: “Jaħweh! Jaħweh! Alla li jagħder u jħenn; tqil biex jagħdab u kbir [“fil-​qalb tajba bl-​imħabba u fil-​verità,” NW].”’ (Eżodu 34:6) B’hekk, David setaʼ jiddikjara: “Twajjeb u ħanin il-​Mulej, idum biex jagħdab u [“kbir fil-​qalb tajba bl-​imħabba,” NW].” Għalkemm Jehovah għandu kobor bla tarf, hu jagħti dinjità lill-​qaddejja umani tiegħu billi jittrattahom bil-​mogħdrija. Hu mimli ħniena, lest li jaħfer lill-​midinbin li jindmu fuq il-​bażi tas-​sagrifiċċju li Ġesù ħallas bħala fidwa. Jehovah idum ukoll biex jagħdab, għax hu jagħti l-​opportunità lill-​qaddejja tiegħu biex jirbħu d-​dgħjufijiet li minħabba fihom jistgħu ma jidħlux fid-​dinja l-​ġdida mimlija ġustizzja.—2 Pietru 3:9, 13, 14.

23David ifaħħar bil-​bosta l-​qalb tajba bl-​imħabba, jew l-​imħabba leali t’Alla. Fil-​fatt, fil-​kumplament taʼ Salm 145 insibu kif Jehovah juri din il-​kwalità u kif il-​qaddejja leali tiegħu jwieġbu għall-​qalb tajba bl-​imħabba tiegħu. Dan se jiġi diskuss fl-​artiklu li jmiss.

Int Kif Twieġeb?

• Liema opportunitajiet hemm biex infaħħru lil Jehovah “kuljum”?

• Liema eżempji juru li l-​kobor taʼ Jehovah hu bla tarf?

• Kif nistgħu nkabbru l-​apprezzament tagħna għad-​dinjità glorjuża taʼ Jehovah?

23. Liema kwalità prezzjuża se nikkunsidraw fl-​artiklu li jmiss?

[Stampa f’paġna 10]

Il-​galassji taʼ l-​univers jixhdu l-​kobor taʼ Jehovah

[Sors]

Bil-​korteżija taʼ l-​Osservatorju Anglo-Awstraljan, ritratt minn David Malin

[Stampa f’paġna 12]

Il-​kobor taʼ Jehovah kif intwera f’konnessjoni maʼ Ġesù Kristu?

[Stampa f’paġna 13]

Meta l-​Iżraelin irċivew il-​Liġi ħdejn il-​Muntanja Sinaj, huma kellhom evidenza tad-​dinjità glorjuża taʼ Jehovah