Ittama f’Ġeħova, u Kun Kuraġġuż

“Ittama fil-​Mulej, żomm sħiħ [“kun kuraġġuż,” “NW”] u qawwi qalbek; ittama fil-​Mulej.”—SALM 27:14.

1. It-​tama kemm hi importanti, u dan it-​terminu kif inhu użat fl-​Iskrittura?

TAMA ġenwina hija bħal dawl qawwi. Tgħinna naraw iktar minn sempliċement il-​provi tal-​preżent u tgħinna niffaċċjaw il-​futur b’kuraġġ u tama. Ġeħova biss jistaʼ jagħtina tama ċerta, u dan jagħmlu permezz tal-​Kelma ispirata tiegħu. (2 Timotju 3:16) Fil-​fatt, kliem bħal “tama,” “ittamajt,” u “nittamaw” jidhru ħafna drabi fil-​Bibbja u jirreferu kemm għall-​ħerqa u kemm għall-​istennija ċerta għal xi ħaġa tajba jew għall-​objettiv taʼ dik l-​istennija.a Tama bħal din hija iktar minn sempliċi xewqa komuni li tistaʼ tkun bla bażi jew li ma jkollha ebda prospett li titwettaq.

2. It-​tama liema rwol kellha f’ħajjet Ġesù?

² Meta ffaċċja provi u diffikultajiet, Ġesù ma qagħadx jiffoka fuq il-​preżent imma ttama f’Ġeħova. “Għall-​ferħ li tqiegħed quddiemu ssaporta z-​zokk tat-​tortura, u ma qiesx l-​għajb, u qagħad bil-​qiegħda fuq il-​lemin tat-​tron t’Alla.” (Ebrej 12:2) Minħabba li kien iffokat sew fuq il-​prospett taʼ li jivvindika s-​sovranità taʼ Ġeħova u li jqaddes l-​isem Tiegħu, Ġesù dejjem baqaʼ ubbidjenti lejn Alla, minkejja l-​konsegwenzi li setaʼ sofra.

3. It-​tama liema rwol għandha fil-​ħajja tal-​qaddejja t’Alla?

³ Is-​Sultan David isemmi l-​konnessjoni li hemm bejn it-​tama u l-​kuraġġ billi jgħid: “Ittama fil-​Mulej, żomm sħiħ [“kun kuraġġuż,” NW] u qawwi qalbek; ittama fil-​Mulej.” (Salm 27:14) Jekk irridu nqawwu qalbna, m’għandna qatt inħallu t-​tama tagħna tiċċajpar, imma għandna dejjem inżommuha ċara f’moħħna u ngħożżuha. Jekk nagħmlu hekk se niġu megħjunin nimitaw lil Ġesù f’li nuru kuraġġ u żelu hekk kif nieħdu sehem fix-​xogħol li hu kkmanda lid-​dixxipli tiegħu biex jagħmlu. (Mattew 24:14; 28:​19, 20) Tabilħaqq, il-​Bibbja ssemmi t-​tama flimkien mal-​fidi u l-​imħabba bħala li huma vitali, kwalitajiet li jikkaratterizzaw il-​ħajja tal-​qaddejja t’Alla.—1 Korintin 13:13.

Qiegħed Int ‘Toktor fit-​Tama’?

4. Il-​Kristjani midlukin u sħabhom in-​“nagħaġ oħra” lejn xiex qed iħarsu bil-​quddiem b’tant ħerqa?

⁴ Il-​poplu t’Alla għandu futur mill-​aqwa quddiemu. Il-​Kristjani midlukin jistennew bil-​ħerqa li jaqdu maʼ Kristu fis-​sema filwaqt li n-​“nagħaġ oħra” jittamaw li ‘jinħelsu mill-​jasar tat-​taħsir u jkollhom il-​libertà glorjuża taʼ wlied Alla’ fuq l-​art. (Ġwanni 10:16; Rumani 8:​19-21; Filippin 3:20) Dik il-​“libertà glorjuża” tinkludi ħelsien mid-​dnub u mill-​konsegwenzi terribbli tiegħu. Tabilħaqq, Ġeħova—id-​Donatur taʼ “kull għotja tajba u kull rigal perfett”—ma jagħti xejn inqas mill-​aħjar lil dawk li huma leali lejh.—Ġakbu 1:17; Isaija 25:8.

5. Kif nistgħu ‘noktru fit-​tama’?

⁵ It-​tama Kristjana kemm għandha tkun importanti fil-​ħajja tagħna? F’Rumani 15:13 naqraw: “L-​Alla li jagħti t-​tama jimliekom b’kull ferħ u paċi talli temmnu, biex toktru fit-​tama bil-​qawwa taʼ l-​ispirtu qaddis.” Iva, it-​tama tistaʼ tiġi mqabbla, mhux maʼ xemgħa fid-​dlam, imma mar-​raġġi leqqiena tax-​xemx taʼ fil-​għodu, li timla l-​ħajja taʼ dak li jkun b’paċi, ferħ, skop, u kuraġġ. Innota li aħna ‘noktru fit-​tama’ meta nemmnu fil-​Kelma miktuba t’Alla u nirċievu l-​ispirtu qaddis tiegħu. Rumani 15:4 jgħid: “Kulma nkiteb minn qabel inkiteb għall-​istruzzjoni tagħna, biex permezz tas-​sabar tagħna u permezz tal-​faraġ mill-​Iskrittura jkollna t-​tama.” Għalhekk, staqsi lilek innifsek: ‘Inżommha ħajja t-​tama tiegħi billi nkun student tajjeb tal-​Bibbja, billi naqraha kuljum? Nitlob spiss jien għall-​ispirtu t’Alla?’—Luqa 11:13.

6. Sabiex inżommu t-​tama tagħna ħajja, kontra xiex għandna ngħassu?

⁶ Ġesù, ix-​Xempju tagħna, kien jissaħħaħ permezz tal-​Kelma t’Alla. Billi nikkunsidraw l-​eżempju tiegħu bir-​reqqa, aħna nevitaw li ‘negħjew u nċedu f’ruħna.’ (Ebrej 12:3) B’mod loġiku, jekk it-​tama li tana Alla tiċċajpar f’moħħna u f’qalbna jew jekk nibdew niffokaw fuq xi ħaġa oħra—forsi fuq affarijiet materjali jew miri sekulari—se niġu maħkumin minn għeja spiritwali, u eventwalment se nitilfu s-​saħħa morali u l-​kuraġġ biex ngħixu fi qbil mal-​prinċipji morali. Fi stat bħal dan nistgħu saħansitra nesperjenzaw ‘nawfraġju fil-​fidi tagħna.’ (1 Timotju 1:19) Min-​naħa l-​oħra, it-​tama vera ssaħħaħ il-​fidi tagħna.

It-​Tama—Essenzjali għall-​Fidi

7. It-​tama għala hija essenzjali għall-​fidi?

⁷ Il-​Bibbja tgħid: “Il-​fidi hi l-​istennija garantita t’affarijiet li nittamaw għalihom, it-​turija evidenti taʼ realtajiet li ma jidhrux.” (Ebrej 11:1) Għalhekk, it-​tama m’hijiex biss marbuta b’kumbinazzjoni mal-​fidi tagħna; hija element essenzjali mill-​fidi. Ikkunsidra lil Abraham. Mill-​ħarsa tal-​bniedem, hu u Sara, martu, kienu kibru wisq biex ikollhom it-​tfal meta Ġeħova wegħedhom li se jagħtihom werriet. (Ġenesi 17:​15-17) Abraham kif wieġeb għal dan? “Għalkemm ma kellu ebda tama, madankollu kellu fidi bbażata fuq it-​tama li jsir missier taʼ ħafna ġnus.” (Rumani 4:18) Iva, it-​tama li Alla ta lil Abraham ipprovdiet bażi soda għall-​fidi tiegħu li kien se jkollu wild. Min-​naħa l-​oħra, il-​fidi tiegħu saħħet it-​tama tiegħu. Tant hu hekk li Abraham u Sara kellhom saħansitra l-​kuraġġ jitilqu darhom u lil qrabathom u jgħixu l-​bqija taʼ ħajjithom fit-​tined f’art barranija!

8. Is-​sabar leali kif isaħħaħ it-​tama?

⁸ Abraham żamm it-​tama tiegħu b’saħħitha billi obda lil Ġeħova f’kollox, anki meta kien diffiċli. (Ġenesi 22:​2, 12) B’mod simili, permezz taʼ l-​ubbidjenza u s-​sabar fis-​servizz tagħna lil Ġeħova nistgħu nkunu fiduċjużi li se niġu premjati. “Is-​sabar,” kiteb Pawlu, jirriżulta fl-​“approvazzjoni t’Alla,” li min-​naħa l-​oħra din tipproduċi t-​tama, “u t-​tama ma twassalx għal diżappunt.” (Rumani 5:​4, 5) Kien għalhekk li Pawlu kiteb ukoll: “Aħna nixtiequ li kull wieħed minnkom juri l-​istess bżulija sabiex ikollu fiduċja sħiħa fit-​tama sat-​tmiem.” (Ebrej 6:11) Ħarsa pożittiva bħal din, li hija bbażata fuq relazzjoni intima maʼ Ġeħova, tistaʼ tgħinna niffaċċjaw kwalunkwe diffikultà b’kuraġġ, saħansitra bil-​ferħ.

“Thennew bit-​Tama”

9. X’nistgħu nagħmlu b’mod regulari biex niġu megħjunin ‘nithennew bit-​tama’?

⁹ It-​tama li jagħti Alla hi bil-​wisq superjuri għal kwalunkwe ħaġa li d-​dinja tistaʼ toffri. Salm 37:34 jgħid: “Ittama fil-​Mulej u ħares triqtu, hu jerfgħek biex tikseb l-​art; mbagħad tara l-​ħżiena meqruda.” Iva, għandna kull raġuni biex ‘nithennew bit-​tama.’ (Rumani 12:12) Madankollu, sabiex nagħmlu hekk irridu nżommu t-​tama tagħna ħajja f’moħħna. Tirrifletti int regolarment fuq it-​tama li jagħti Alla? Tistaʼ tara lilek innifsek fil-​Ġenna taʼ l-​art, mimli saħħa, ħieles mill-​ansjetà, imdawwar bin-​nies li tħobb, u tieħu sehem f’xogħol sodisfaċenti? Timmedita int fuq ix-​xeni tal-​Ġenna taʼ l-​art li hemm fil-​pubblikazzjonijiet tagħna? Riflessjoni regulari bħal din tistaʼ titqabbel maʼ li tnaddaf tieqa li minnha tistaʼ tara veduta mill-​isbaħ. Jekk ma nnaddfux il-​ħġieġ, il-​ħmieġ ma jdumx ma jinġemaʼ u ma jħalliniex naraw ix-​xena sew. Imbagħad affarijiet oħra jistgħu jisirqulna l-​attenzjoni tagħna. Jalla qatt ma nħallu dan jiġri!

10. Il-​fatt li nħarsu bil-​quddiem għall-​premju għala jirrifletti tajjeb fuq ir-​relazzjoni tagħna maʼ Ġeħova?

¹⁰ M’għandniex xi ngħidu, ir-​raġuni primarja għala naqdu lil Ġeħova hi l-​imħabba tagħna għalih. (Marku 12:30) Madankollu, għandna nħarsu bil-​quddiem b’ħerqa għall-​premju. Fil-​fatt, Ġeħova jistenna li nagħmlu hekk! Ebrej 11:6 jgħid: “Mingħajr fidi impossibbli li togħġbu sew, għax min jersaq lejn Alla jrid jemmen li hu jeżisti u li jippremja lil dawk li jfittxuh bil-​ħeġġa.” Ġeħova għala jridna nqisuh bħala l-​Wieħed li jippremja? Għax meta nagħmlu hekk, inkunu qed nuru li aħna nafu sew lil Missierna tas-​sema. Hu ġeneruż, u jħobb lil uliedu. Aħseb ftit kemm inkunu mdejqin u kemm ikun faċli biex niskuraġġixxu ruħna kieku ma kellniex “ġejjieni mimli tama.”—Ġeremija 29:11.

11. It-​tama li jagħti Alla kif għenet lil Mosè jieħu deċiżjonijiet għaqlin?

¹¹ Eżempju li jispikka taʼ wieħed li baqaʼ jiffoka fuq it-​tama li jagħti Alla kien Mosè. Peress li kien “bin bint il-​Fargħun,” Mosè kellu l-​qawwa, il-​pożizzjoni, u l-​ġid kollu taʼ l-​Eġittu għad-​dispożizzjoni tiegħu. Kien hu se jiġri wara dawn l-​affarijiet jew kien se jaqdi lil Ġeħova? B’kuraġġ, Mosè għażel li jaqdi lil Ġeħova. Għala? Għax hu “ħares fiss lejn il-​ħlas tal-​premju.” (Ebrej 11:​24-26) Iva, Mosè kien jgħożż it-​tama li Ġeħova poġġa quddiemu.

12. It-​tama Kristjana għala hi bħal elmu?

¹² L-​appostlu Pawlu qabbel it-​tama m’elmu. L-​elmu figurattiv tagħna jipproteġi l-​fakultajiet mentali tagħna, billi jgħinna nieħdu deċiżjonijiet tajbin, inpoġġu prijoritajiet f’lokhom, u nżommu l-​integrità. (1 Tessalonikin 5:8) Tilbsu int l-​elmu figurattiv il-​ħin kollu? Jekk inhu hekk, mela bħal Mosè u Pawlu, int se tqiegħed it-​tama tiegħek mhux “f’rikkezzi li ma tistax torbot fuqhom imma f’Alla, li jagħtina kollox b’mod għani għat-​tgawdija tagħna.” Veru, jeħtieġ kuraġġ biex tagħti dahrek għat-​tendenzi popolari billi twarrab miri egoistiċi, imma l-​isforz li tagħmel verament jiswa! Wara kollox, għala għandek tikkuntenta b’xi ħaġa inqas mill-​“ħajja vera,” li qed tistenna lil dawk li jittamaw u jħobbu lil Ġeħova?—1 Timotju 6:​17, 19.

“Żgur Ma Nitilqekx”

13. Ġeħova liema assiguranza jipprovdi lill-​qaddejja leali tiegħu?

¹³ Dawk li jpoġġu t-​tama tagħhom fis-​sistema preżenti għandhom jaħsbu bis-​serjetà dwar l-​affarijiet terribbli li se jiffaċċjaw hekk kif id-​dinja ssofri iktar “uġigħ.” (Mattew 24:8) Imma dawk li jittamaw f’Ġeħova m’għandhomx għalfejn jibżgħu minn dawn l-​affarijiet. Huma se jkomplu ‘jgħixu moħħhom mistrieħ, bla ebda tfixkil, bla biżaʼ tal-​ħsara.’ (Proverbji 1:33) Minħabba li huma ma jpoġġux it-​tama tagħhom fis-​sistema preżenti, huma b’ferħ jagħtu kas il-​parir taʼ Pawlu: “Ħa jkun il-​mod kif tgħixu ħieles mill-​imħabba għall-​flus, waqt li tkunu kuntenti b’dak li għandkom fil-​preżent. Għax hu qal: ‘Żgur ma nitilqekx u żgur ma nabbandunakx.’”—Ebrej 13:5.

14. Il-​Kristjani għala m’għandhomx għalfejn ikunu ansjużi żżejjed dwar il-​bżonnijiet materjali tagħhom?

¹⁴ L-​espressjoni enfatika “żgur” li hija użata darbtejn ma tħalli ebda dubju li Alla se jieħu ħsiebna. Ġesù assigurana wkoll li Alla bi mħabba jaħseb fina, billi qal: “Mela, ibqgħu fittxu l-​ewwel is-​saltna u s-​sewwa tiegħu, u dawn l-​affarijiet l-​oħrajn kollha [il-bżonnijiet materjali tal-​ħajja] se jiżdidulkom. Għalhekk, qatt tkunu ansjużi dwar l-​għada, għax l-​għada se jkollu l-​ansjetajiet tiegħu.” (Mattew 6:​33, 34) Ġeħova jaf li hija sfida għalina biex inkunu żelużi għas-​Saltna tiegħu u fl-​istess ħin inġorru t-​toqol kollu tar-​responsabbiltà biex nipprovdu l-​bżonnijiet fiżiċi tagħna. Mela jalla npoġġu l-​fiduċja sħiħa tagħna fl-​abbiltà u x-​xewqa tiegħu li jieħu ħsieb il-​bżonnijiet tagħna.—Mattew 6:​25-32; 11:​28-30.

15. Il-​Kristjani kif iżommu ‘għajn sempliċi’?

¹⁵ Aħna nuru li nistrieħu fuq Ġeħova meta nżommu ‘għajn sempliċi.’ (Mattew 6:​22, 23) Għajn sempliċi hija sinċiera, għandha motivi puri, u hi ħielsa mir-​regħba u l-​ambizzjoni egoistika. Li jkollna għajn sempliċi ma jfissirx li ngħixu f’faqar estrem jew li nittraskuraw li nieħdu ħsieb ir-​responsabbiltajiet Kristjani tagħna. Għall-​kuntrarju, tfisser li nuru “moħħ f’loku” hekk kif inkomplu nħallu s-​servizz tagħna lejn Ġeħova fl-​ewwel post.—2 Timotju 1:7.

16. Għala hemm bżonn il-​fidi u l-​kuraġġ biex inżommu għajn sempliċi?

¹⁶ Biex iżżomm għajn sempliċi jeħtieġ li jkollok il-​fidi u l-​kuraġġ. Per eżempju, jekk l-​imgħallem jinsisti li int taħdem regolarment fil-​ġranet meta jkollok il-​laqgħat Kristjani, sejjer int b’kuraġġ iżżomm il-​prijoritajiet spiritwali tiegħek? Jekk individwu għandu dubju jekk Ġeħova hux se jwettaq il-​wegħda Tiegħu li jieħu ħsieb lill-​qaddejja Tiegħu, kulma jrid jagħmel Satana hu li jżid il-​pressjoni u individwu bħal dan għandu mnejn saħansitra jieqaf jattendi l-​laqgħat. Iva, jekk nuru nuqqas taʼ fidi nkunu qed inħallu lil Satana jikkontrollana, u b’hekk hu u mhux Ġeħova jibda jpoġġilna l-​prijoritajiet. Xi traġedja tkun din!—2 Korintin 13:5.

“Ittama fil-​Mulej”

17. Dawk li jafdaw f’Ġeħova kif qed jitbierku saħansitra issa?

¹⁷ Għal darba wara l-​oħra, l-​Iskrittura turi li dawk li jittamaw u jafdaw f’Ġeħova qatt m’hu se jmorru minn taħt. (Proverbji 3:​5, 6; Ġeremija 17:7) Veru, kultant għandu mnejn ikollhom jikkuntentaw b’inqas, imma dan huma jqisuh bħala sagrifiċċju żgħir meta mqabbel mal-​barkiet li hemm maħżunin għalihom. B’hekk, huma juru li ‘jittamaw fil-​Mulej’ u huma fiduċjużi li hu eventwalment se jagħti lil dawk li huma leali dawk l-​affarijiet tajbin kollha li tixtieq qalbhom. (Salm 37:​4, 34) Għalhekk, huma ferħanin ġenwinament saħansitra minn issa. “L-​istennija tan-​nies sewwa hi hena, imma l-​istess tama taʼ l-​uħud mill-​agħar se tgħib.”—Proverbji 10:28.

18, 19. (a) Liema assiguranza kollha mħabba jagħtina Ġeħova? (b) Kif nistgħu nżommu lil Ġeħova fl-​id “il-​leminija” tagħna?

¹⁸ Meta tifel żgħir jimxi id f’id maʼ missieru, hu jħossu fis-​sigurtà. L-​istess inħossuna aħna hekk kif nimxu maʼ Missierna tas-​sema. “La tibżax,” qal Ġeħova lil Iżrael, “għax miegħek jien! . . . Jien ngħinek. . . . Jiena l-​Mulej, Alla tiegħek, nwieżnek minn idek il-​leminija, u ngħidlek: ‘La tibżax, jiena l-​għajnuna tiegħek.’”—Isaija 41:​10, 13.

¹⁹ Xi stampa mimlija mħabba ġġibilna quddiem għajnejna—Ġeħova jaqbdilna idejna! “Nżomm il-​Mulej dejjem quddiemi,” kiteb David. “Għax bih f’leminti qatt ma nitħarrek.” (Salm 16:8) Kif nistgħu nżommu lil Ġeħova fuq l-​id “il-​leminija” tagħna? Dan nistgħu nagħmluh minn taʼ l-​inqas b’żewġ modi. Mod wieħed hu billi nħallu l-​Kelma tiegħu tiggwidalna kull aspett taʼ ħajjitna; it-​tieni mod hu billi niffokaw fuq il-​premju glorjuż li Ġeħova poġġa quddiemna. Is-​salmista Asaf kanta: “Jiena dejjem miegħek; inti żżommni minn idi l-​leminija; skond il-​ħsieb tiegħek tmexxini, [“u mbagħad tiħodni lejn il-​glorja,” NW].” (Salm 73:​23, 24) B’assiguranza bħal din nistgħu verament niffaċċjaw il-​futur b’fiduċja.

‘Il-​Ħelsien Tagħkom Qed Joqrob’

20, 21. X’futur qed jistenna lil dawk li qed jittamaw f’Ġeħova?

²⁰ Maʼ kull ġurnata li tgħaddi, isir iktar urġenti li nżommu lil Ġeħova fuq l-​id il-​leminija tagħna. Dalwaqt, id-​dinja taʼ Satana se tesperjenza tribulazzjoni li qatt ma kien hawn bħalha, u din se tibda bil-​qerda tar-​reliġjon falza. (Mattew 24:21) Il-​biżaʼ se jaħkem lill-​umanità bla fidi. Madankollu, matul dan iż-​żmien taʼ taqlib, il-​qaddejja kuraġġużi taʼ Ġeħova se jifirħu bit-​tama! “Malli jibdew iseħħu dawn l-​affarijiet,” qal Ġesù, “qumu dritti u għollu raskom ’il fuq, għax ikun qorob il-​ħelsien tagħkom.”—Luqa 21:28.

²¹ Għalhekk, ejja nifirħu bit-​tama li tana Alla u jalla ma nitqarrqux u ma niġux ittantati mill-​aljenazzjonijiet makakki taʼ Satana. Fl-​istess ħin, ejja naħdmu iebes biex nikkultivaw il-​fidi, l-​imħabba, u l-​biżaʼ minn Alla. Jekk nagħmlu hekk, se jkollna l-​kuraġġ biex nobdu lil Ġeħova f’kull ċirkustanza u biex nopponu lix-​Xitan. (Ġakbu 4:​7, 8) Iva, “issaħħu [“kunu kuraġġużi,” NW] u qawwu qalbkom, intom ilkoll li tittamaw fil-​Mulej.”—Salm 31:25 (31:​24, NW).

[Nota taʼ taħt]

Taf Twieġeb?

• It-​tama li kellu Ġesù b’liema mod għenitu jkollu kuraġġ?

• Il-​fidi u t-​tama kif inhuma relatati flimkien?

• It-​tama flimkien mal-​fidi kif tistaʼ tagħti lill-​Kristjani l-​kuraġġ biex fil-​ħajja jpoġġu prijoritajiet f’lokhom?

• Dawk li ‘jittamaw fil-​Mulej’ għala jistgħu jħarsu lejn il-​futur b’fiduċja?

[Stampa f’paġna 28]

Kemm jekk għadek żgħir u kemm jekk kbirt, tistaʼ int tara lilek innifsek fil-​Ġenna taʼ l-​art?