Millennju Grandjuż Riesaq

“U jien rajt tronijiet, u kien hemm dawk li qagħdu bil-​qiegħda fuqhom, u l-​qawwa li jiġġudikaw ingħatat lilhom. Iva, jien rajt l-​erwieħ taʼ dawk maqtulin bil-​mannara għax-​xiehda li taw għal Ġesù u talli tkellmu dwar Alla, u dawk li la kienu qiemu lill-​bhima selvaġġa u lanqas lix-​xbiha tagħha u li ma kinux irċevew il-​marka fuq moħħhom u fuq idhom. U ħadu l-​ħajja u saltnu bħala slaten mal-​Kristu għal elf sena.” “U [Alla] se jimsaħ kull demgħa minn għajnejhom [tal-umanità], u l-​mewt ma tkunx iżjed, u la l-​għali u la l-​biki u lanqas l-​uġigħ, ma jkunu iżjed. L-​affarijiet taʼ qabel għaddew.”—Rivelazzjoni 20:4; 21:4.

B’HEKK il-​Bibbja tbassar millennju grandjuż li qed joqrob—ir-​Renju taʼ Elf Sena taʼ Ġesù Kristu u ġemgħa taʼ slaten sħab miegħu fis-​sema. Forsi int inklinat li twarrab din il-​profezija bħala sempliċi illużjoni, xi viżjoni. Imma xorta waħda, hemm raġuni biżżejjed għalik biex tqis lil dan il-​Millennju bħala rejaltà li ġejja!

Minn banda, studju tal-​Bibbja se jirrivelalek kif hi ttrattat lil dawn is-​sitt millennji taʼ storja umana li għaddew b’mod tal-​għaġeb u taʼ min jafdah. Iktar minn hekk, il-​Bibbja hija ktieb taʼ profezija, u numru kbir mit-​tbassiriet, jew profeziji, tagħha diġà twettqu f’kull dettal.a Jekk inhu hekk, il-​Bibbja għala għandha ma tkunx taʼ min jafdaha meta tbassar il-​Millennju li riesaq tal-​ħakma taʼ Kristu? Int forsi tiskanta, iżda x’għandha xi tgħidilna l-​Bibbja dwar dak il-​perijodu taʼ żmien. X’inhu l-​għan tiegħu? U taʼ interess partikulari għalik, kif se jeffettwa lil ħajtek?

Wirt Mitluf

Il-​Bibbja turi li r-​Renju taʼ Elf Sena taʼ Kristu huwa l-​mod kif hu se jgħaddi wirt l-​iktar prezzjuż lit-​“tfal” tiegħu. Imma x’wirt hu? U liema “tfal”? Wirt jistaʼ jiġi definit bħala xi ħaġa mgħoddija lil nisel taʼ dak li jkun f’mewtu. Meta l-​antenat tagħna Adam ta prova tad-​diżubbidjenza lejn Alla, hu tilef għalih innifsu u għal nislu kollu—ir-​razza umana kollha—id-​dritt għall-​ħajja taʼ dejjem f’ġenna tal-​art. Adam b’hekk għadda wirt taʼ dnub, mewt, u miżerja lid-​dixxendenti tiegħu.—Ġenesi 3:l-19; Rumani 5:12.

Ġesù ġie fuq l-​art fil-​laħam biex jirbaħ lura għall-​umanità l-​wirt li tilef Adam. Dan għamlu billi ta prova taʼ fedeltà lejn Alla Jehovah, billi minn jeddu offra ħajtu għan-​nom tal-​umanità. (Ġwann 3:16) Billi għex ħajja perfetta u bla dnub, Ġesù kiseb id-​dritt għall-​ħajja taʼ dejjem u perfetta f’Ġenna fuq l-​art—l-​istess ħaġa li tilef Adam. Madankollu, Ġesù qatt ma eżerċita dak id-​dritt. u lanqas ma tilfu meta miet u ġie rxoxtat għall-​ħajja fis-​sema. Hu setaʼ għalhekk jużah bħala wirt prezzjuż x’jgħaddi lit-​“tfal” tiegħu.—Rumani 5:18,19.

Il-​Werrieta—It-​“Tfal” taʼ Kristu

F’Isaija 9:6 Ġesù jissejjaħ b’mod profetiku “Missier Etern.” Hu jsir il-​Missier Etern tad-​dinja taʼ umanità mifdija, f’pożizzjoni li jgħaddi wirt lil dawn l-​uħud mifdijin, jew tfal adottati. (Mattew 20:28; ara wkoll Salm 37:18, 29.) Dan hu muri b’mod ċar fil-​wegħda tiegħu: “Ejjew, intom li ġejtu mberkin minn Missieri, irtu s-​saltna mħejjija għalikom mit-​tisjis tad-​dinja.” Hu kompla jgħid: “Henjin huma l-​kalmi, ladarba se jirtu l-​art.”−Mattew 5:5; 25:34.

Biex l-​art tkun wirt xieraq, madankollu, iridu jinbidlu b’mod radikali l-​kundizzjonijiet—jinġiebu għall-​perfezzjoni! Trid issir dinja fejn il-​paċi u l-​armonija perfetti jirrenjaw fost il-​ħlejjaq kollha t’Alla. (Isaija 11:6-9) Kull traċċa taʼ imperfezzjoni umana trid tiġi mħassra, inkluża l-​mewt. (1 Korintin 15:25, 26) Dan ifisser li l-​mejtin, li huma parti mill-​umanità mifdija, jridu jiġu rxoxtati. B’dan il-​mod biss jistaʼ jkollhom l-​opportunità li jsiru l-​werrieta taʼ Kristu!—Ġwann 5:28,29.

B’hekk ir-​Renju taʼ Elf Sena taʼ Kristu se jkun perijodu hieni li fih l-​umanità se tiġi bil-​mod il-​mod ‘meħlusa mill-​jasar għall-​korruzzjoni’ u tilħaq il-​perfezzjoni. (Rumani 8:21) Taʼ interess, saħansitra sorsi sekulari jirrikonoxxu dan bħala l-​għan tal-​millennju. Webster’s Ninth New Collegiate Dictionary (l-edizzjoni tal-​1985) jiddefinixxi l-​“millennju” bħala “perijodu taʼ hena kbira jew perfezzjoni umana.”

Jisboq lill-​Hakma taʼ Salamun

Dan il-​Millennju glorjuż jistaʼ jiġi mxebbah mal-​ħakma taʼ 40 sena tas-​Sultan Salamun li kienet tant prosperuża u mimlija paċi fuq Iżrael tal-​qedem. (1 Slaten 4:24, 25, 29) Meta s-​sultana taʼ Xeba żaret lis-​Sultan Salamun, hi qalet: “Vera wriet li hi l-​kelma li jien smajt f’arti stess dwar dawn il-​ħwejjeġ u dwar il-​għerf tiegħek. U ma poġġejtx fidi fil-​kliem sakemm kont ġejt biex għajnejja stess jistgħu jaraw; u, ħares! ma kienx intqalli n-​nofs. Inti sboqt fil-​għerf u l-​prosperità l-​affarijiet mismugħin li jiena smajt. Henjin huma l-​irġiel tiegħek; henjin huma dawn il-​qaddejja tiegħek li qegħdin bil-​wieqfa quddiemek il-​ħin kollu, jisimgħu l-​għerf tiegħek!”—1 Slaten 10:6-8.

Jekk il-​paċi, il-​prosperità, u l-​għerf tal-​ħakma taʼ 40 sena fuq l-​art tas-​Sultan Salamun kienu jisbqu, iva, iktar mid-​doppju, lill-​istennijiet kbar tas-​sultana taʼ Xeba, mela żgur li l-​Ħakma taʼ Elf Sena tas-​Sultan Salamun akbar tas-​sema, Ġesù Kristu, se tisboq kull immaġinazzjoni umana! Fil-​kliem taʼ Ġesù nnifsu, hu “xi ħaġa iktar minn Salamun.”(Mattew 12:42) Ipprova ġib quddiem għajnejk l-​iktar kundizzjonijiet taʼ saħħa, taʼ prosperità, taʼ paċi, taʼ tjieba, u taʼ ferħ fuq l-​art li int tistaʼ qatt timmaġina, u ma tkunx tistaʼ tifhem saħansitra qatra minn dak li l-​Millennju taʼ Kristu għandu maħżun.

Se Jaħbat Mat-​Tielet Millennju?

Il-​ġrajjiet tad-​dinja mis-​sena 1914 ’il hawn juru li aħna qed ingħixu fil-​“konklużjoni tas-​sistema taʼ affarijiet.” Ġesù kompla jgħid li l-​ġenerazzjoni li kellha x’taqsam maʼ dawn il-​ġrajjiet imbassrin “bl-​ebda mod ma se tgħaddi sakemm dawn l-​affarijiet kollha jseħħu.” Ifisser dan, mela, li l-​Ħakma taʼ Elf Sena taʼ Kristu se taħbat mat-​tielet millennju?—Mattew 24:3-21, 34.

Ġesù wissa lid-​dixxipli tiegħu biex ma jispekulawx. Hu qal: “Ma jappartjenix lilkom li tiksbu tagħrif taż-​żminijiet jew l-​istaġuni li l-​Missier qiegħed fil-​ġurisdizzjoni tiegħu nnifsu.” (Atti 1:7) U rigward “il-​jum u s-​siegħa” eżatti meta dawn il-​ġrajjiet kellhom iseħħu, Ġesù qal li Missieru biss, Alla Jehovah, kien jafhom. (Mattew 24:36) B’hekk, il-​Bibbja ma tappoġġja lil ebda wieħed minn dawk il-​profeti li issa dejjem qed jiżdiedu taʼ jum tal-​biżaʼ u movimenti li jippuntaw lejn id-​daqq taʼ nofs il-​lejl taʼ Lejlet is-​Sena l-​Ġdida, 1999, bħala l-​aħħar tad-​dinja.

Madankollu il-​ġrajjiet dinjin preżenti juru biċ-​ċar li ż-​żmien tat-​tmiem taʼ din is-​sistema taʼ affarijiet mudlama u ħażina “daħal sewwa” u li l-​Millennju taʼ Kristu “qorob.” (Rumani 13:12) Minflok ma nispekulaw fuq il-​ġurnata u s-​siegħa eżatti li ġej fihom, issa huwa l-​ħin f’waqtu biex nieħdu għarfien tal-​htiġijiet t’Alla biex insalvaw. (Ġwann 17:3) B’dan il-​mod inti tistaʼ titgħallem kif tistaʼ tkun fost dawk li lilhom Ġesù se jgħid: “Ejjew, intom li ġejtu mberkin minn Missieri, irtu s-​saltna mħejjija għalikom mit-​tisjis tad-​dinja.” (Mattew 25:34) Ix-​Xhieda taʼ Jehovah lesti u jistgħu jgħinuk biex tkun fost dawk li se jgawdu l-​barkiet tal-​Millennju grandjuż li ġej.b

[Noti taʼ taħt]