Il-​Ħarsa tal-​Bibbja

Għandhom il-​Kristjani Jkunu Foqra?

ĠESÙ darba qal lil wieħed mexxej żagħżugħ u għani li kellu jmur ibigħ il-​ġid tiegħu kollu u jagħtih lill-​foqra. Ir-​rakkont jgħid li ż-​żagħżugħ tnikket minħabba dak li qal Ġesù u telaq b’qalbu sewda, “għaliex kellu bosta ġid.” Imbagħad Ġesù qal lid-​dixxipli tiegħu: “Kemm hi iebsa għall-​għonja li jidħlu fis-​Saltna taʼ Alla!” Ġesù żied: “Eħfef li ġemel jgħaddi minn għajn taʼ labra milli wieħed għani jidħol fis-​Saltna tas-​Smewwiet!”​—Mark 10:​21-23; Mattew 19:​24.

X’ried ifisser Ġesù? Huma l-​qima vera u l-​għana inkompatibbli? Għandhom il-​Kristjani jħossuhom ħatjin jekk ikollhom il-​flus? Qiegħed Alla jistenna li jgħixu ħajja mċaħħda totalment minn kumditajiet jew lussu materjali?

Alla Jilqaʼ “l-​Bnedmin Kollha”

Fl-​imgħoddi Alla ma stenniex li l-​Iżraelin jgħixu fil-​faqar. Ikkunsidra: Wara li l-​art ġiet imqassma u kulħadd ħa sehmu, in-​nies bdew jaħdmu fil-​biedja u jinnegozjaw biex jipprovdu għalihom infushom u għall-​maħbubin tagħhom. Fatturi bħall-​kundizzjonijiet ekonomiċi, it-​temp, is-​saħħa, jew id-​dehen fin-​negozju kienu se jeffettwaw is-​suċċess taʼ l-​isforzi tagħhom. Il-​Liġi taʼ Mosè dderiġiet lill-​Iżraelin biex juru l-​mogħdrija jekk xi wħud ikunu sofrew ekonomikament u ftaqru. (Levitiku 25:​35-40) Mill-​banda l-​oħra, xi wħud saru sinjuri. Bogħaż, raġel taʼ fidi u integrità li sar antenat taʼ Ġesù Kristu, hu deskritt bħala “bniedem għani ħafna.”​—Rut 2:1.

Is-sitwazzjoni baqgħet l-​istess matul il-​ħajja taʼ Ġesù. Meta Ġesù kellem liż-​żagħżugħ għani li semmejna fil-​bidu, ma kellux l-​intenzjoni li jinkuraġġixxi ħajja assolutament mingħajr ebda kumdità. Minflok, kien qed jgħallem lezzjoni importanti. Minn ħarsa umana, forsi jidher impossibbli li individwi għonja juru l-​umiltà u jaċċettaw il-​mezz tas-​salvazzjoni li pprovda Alla. Madankollu, Ġesù qal: “Għall-​bnedmin dan ma jistax ikun: għal Alla kollox jistaʼ jkun.”​—Mattew 19:26.

Il-kongregazzjoni Kristjana taʼ l-​ewwel seklu laqgħet lill-​“bnedmin kollha.” (1 Timotju 2:4) Dan inkluda lil xi wħud li kienu għonja, oħrajn li kienu jaqilgħuha biżżejjed biex jgħixu komdi, u ħafna li kienu foqra. Xi individwi setgħu forsi ġemmgħu r-​rikkezzi qabel ma saru Kristjani. F’każi oħrajn, ċirkustanzi favorevoli u deċiżjonijiet għaqlin fin-​negozju forsi żviluppaw f’ġid iktar tard.

Bl-istess mod illum, il-​fratellanza Kristjana tinkludi persuni f’ċirkustanzi ekonomiċi differenti. Ilkoll kemm huma jistinkaw biex isegwu l-​gwida tal-​Bibbja fuq il-​kwistjoni tal-​flus, għaliex il-​materjaliżmu jistaʼ jeffettwa lil kulħadd. Il-​lezzjoni li għallem Ġesù u li tinvolvi lill-​mexxej żagħżugħ għani tiftaħ għajnejn kull Kristjan għall-​fatt li l-​flus u l-​affarijiet materjali jistgħu jkollhom kontroll qawwi fuq persuna.—Mark 4:19.

Twissija għall-​Għonja

Waqt li l-​għana fih innifsu m’huwiex kundannat, l-​imħabba għall-​flus hija. Pawlu, wieħed mill-​kittieba tal-​Bibbja, qal: “Ir-​regħba għall-​flus hi l-​għerq taʼ kull ħażen.” Hu nnota li billi ċedew l-​interessi spiritwali għax-​xewqa li jkunu għonja, “xi wħud ħarġu barra mit-​triq tal-​fidi u nfnew b’niket kbir.”​—1 Timotju 6:10.

Taʼ interess, Pawlu ta istruzzjonijiet speċifiċi għall-​għonja. Hu qal: “Lil dawk li huma għonja bil-​ġid taʼ din l-​art widdibhom biex ma jitkabbrux u ma jqegħdux it-​tama tagħhom f’għana li ma tistax torbot fuqu, imma li għandhom jittamaw f’Alla li jagħtina kollox bix-​xabaʼ biex ingawdu bih.” (1 Timotju 6:​17) B’hekk, il-​kliem taʼ Pawlu jindika li hemm periklu li nies għonja jistgħu forsi jsiru kburin u jħossuhom superjuri għal oħrajn. Huma għandhom mnejn ukoll jiġu ttantati jaħsbu li l-​ġid jistaʼ joffri sigurtà vera​—xi ħaġa li Alla biss jistaʼ jipprovdiha bis-​sħiħ.

Kristjani tat-​tajjeb jistgħu jgħassu kontra dawn il-​perikli billi “jistagħnu b’opri tajba.” Dawn l-​opri jinkludu “li jkunu ġenerużi u jaqsmu maʼ oħrajn,” billi jagħtu assistenza ġeneruża lil dawk fil-​bżonn. (1 Timotju 6:​18) Il-​Kristjani—għonja u foqra—jistgħu jużaw ftit mir-​riżorsi tagħhom biex jaqsmu l-​aħbar tajba tas-​Saltna t’Alla, li hu wieħed mill-​interessi ewlenin għall-​Kristjani veri llum. Dan l-​ispirtu ġeneruż juri attitudni xierqa lejn l-​affarijiet materjali u jħabbeb persuna maʼ Alla Jehovah u Ġesù Kristu, li jħobbu lil min jagħti bil-​ferħ.​—Mattew 24:14; Luqa 16:9; 2 Korintin 9:7.

L-​Affarijiet Iktar Importanti

Jidher ċar li l-​Kristjani m’humiex mistennijin li jkunu foqra. Lanqas ma għandhom ikunu determinati li jistagħnu. (1 Timotju 6:9) Huma sempliċement jaħdmu iebes biex jaqilgħu l-​għajxien raġunevoli tagħhom. Minħabba s-​sistema ekonomika li jkunu jgħixu fiha u diversi fatturi oħra, l-​isforzi tagħhom se jġibu livelli differenti taʼ suċċess.​—Koħèlet 11:6.

Huma x’inhuma ċ-​ċirkustanzi finanzjarji tagħhom, il-​Kristjani għandhom jagħmlu l-​almu tagħhom biex ikunu “żguri mill-​affarijiet iktar importanti.” (Filippin 1:​10, NW) Billi jpoġġu valuri spiritwali l-​ewwel, huma jkunu qed “jaħżnu għalihom infushom teżor sabiħ għal li ġej, biex bih jiksbu l-​ħajja, il-​ħajja vera.”​—1 Timotju 6:19.