Henjin Huma Dawk li Jibqgħu Mqajmin!

“Arani ġej bħal ħalliel! Hieni min jishar [“jibqaʼ mqajjem,” “NW”]u jieħu ħsieb l-​ilbiesi tiegħu.”—APOKALISSI 16:15.

1. Ladarba l-​jum taʼ Jehovah huwa qrib, x’nistgħu nistennew?

IL-​JUM il-​kbir taʼ Jehovah huwa qrib, u dak ifisser gwerra! Fil-​viżjoni, l-​appostlu Ġwanni ra “spirti taʼ demonji” qishom żrinġijiet ħerġin għal għand is-​“slaten,” jew ħakkiema kollha taʼ l-​art. Biex jagħmlu liema ħaġa? Biex “jiġbruhom għall-​gwerra taʼ nhar il-​Jum il-​kbir taʼ Alla li jistaʼ kollox”! Ġwanni żied: “Jiġbruhom fil-​post li bil-​Lhudi jsejjħulu Ħarmagedon.”—Apokalissi 16:13-16.

2. Min hu Gog taʼ Magog, u x’se jiġri meta jattakka lin-​nies taʼ Jehovah?

² Dalwaqt, Jehovah se jqanqal lill-​element politiku taʼ din is-​sistema biex jeqred lil Babilonja l-​Kbira, l-​imperu dinji taʼ reliġjon falza. (Apokalissi 17:1-5, 15-17) Imbagħad Gog taʼ Magog, Satana x-​Xitan imbaxxi lejn il-​viċinanza taʼ l-​art, se jiġmaʼ lill-​qtajjiet tiegħu u se jattakka b’ħiltu kollha lin-​nies paċifiċi taʼ Jehovah li jidhru bla difiża. (Eżekjel 38:1-12) Imma Alla se jaġixxi biex jeħles lin-​nies tiegħu. Dak se jimmarka t-​tifqigħa taʼ “Jum il-​Mulej, kbir u tal-​biżaʼ!”—Ġoel 3:4 [Ġoel 2:31, NW]; Eżekjel 38:18-20.

3. Kif tiddeskrivi l-​iżviluppi mbassrin f’Eżekjel 38:21-23?

³ Iva, Jehovah se jeħles lin-​nies tiegħu u jeqred kull traċċa li jibqaʼ tas-​sistema taʼ Satana meta naslu fis-​sitwazzjoni tad-​dinja msejħa Ħar–​Magedon, jew Armageddon. Aqra l-​kliem profetiku li hemm f’Eżekjel 38:21-23, u immaġina x-​xena quddiem għajnejk. Jehovah jeżerċita l-​qawwa tiegħu biex iġib ħalbiet li jgħarrqu, silġ kbir li jagħmel ħerba, nar li jinfirex f’ħakka t’għajn, pesta qattiela. Il-​paniku jirrenja mad-​dinja kollha hekk kif il-​qtajjiet taʼ Gog jiġu mitfugħin f’konfużjoni, waqt li jiġġieldu kontra xulxin. Kwalunkwe għedewwa t’Alla li jistaʼ kollox li jibqgħu ħajjin jiġu mogħtijin l-​esekuzzjoni hekk kif Jehovah juża mezzi soprannaturali biex isalva lill-​qaddejja tiegħu. Meta t-​“tribulazzjoni kbira” mbassra tkun intemmet, xejn ma se jkun baqaʼ minn din is-​sistema ħażina taʼ Satana. (Mattew 24:21, NW) Saħansitra waqt li jkunu fl-​uġigħ tal-​mewt, madankollu, l-​uħud mill-​agħar se jsiru jafu min hu responsabbli għall-​hemm tagħhom. Dak Alla vittorjuż tagħna nnifsu jgħid: “[I]kunu jafu li jien il-​Mulej.” Dawn il-​ġrajjiet straordinarji se jseħħu fi żmienna, matul il-​preżenza taʼ Ġesù.

Ġej Bħal Ħalliel

4. Ġesù b’liema manjiera se jiġi biex jeqred lil din is-​sistema t’affarijiet mill-​agħar?

⁴ Il-​Mulej igglorifikat Ġesù Kristu qal: “Arani ġej bħal ħalliel!” Miġja bħal ħalliel tkun għal għarrieda, f’ħin mhux mistenni, meta l-​biċċa l-​kbira tan-​nies ikunu reqdin. Meta Ġesù jiġi bħal ħalliel biex jeqred lil din is-​sistema mill-​agħar, hu se jippreserva lil dawk li huma verament imqajmin. Hu qal lil Ġwanni: “Hieni min jishar [“jibqaʼ mqajjem,” NW] u jieħu ħsieb l-​ilbiesi tiegħu biex ma jimxix għarwien u jarawlu l-​għera tiegħu.” (Apokalissi 16:15) X’inhu s-​sinjifikat taʼ dak il-​kliem? U kif nistgħu aħna nibqgħu mqajmin spiritwalment?

5. Liema arranġament għas-​servizz tat-​tempju eżista meta Ġesù kien fuq l-​art?

⁵ Ġeneralment, għassies ma jiġix imneżżaʼ għarwien jekk ikun raqad fuq xogħlu. Imma dak ġara fit-​tempju f’Ġerusalemm meta Ġesù kien fuq l-​art u t-​taqsimiet taʼ qassisin u Leviti qdew fit-​tempju f’Ġerusalemm. Kien fis-​seklu 11 Q.E.K. li s-​Sultan David irranġa l-​mijiet taʼ qassisin u l-​eluf t’assistenti Levitiċi tagħhom f’organizzazzjoni magħmula minn 24 taqsima. (1 Kronaki 24:1-18) Kull taqsima taʼ iktar minn elf ħaddiem imħarreġ, skond kif kien imissha kienet tieħu ħsieb l-​aspetti tas-​servizz tat-​tempju minn taʼ l-​inqas darbtejn fis-​sena għal ġimgħa sħiħa kull darba. Fil-​Festa taʼ l-​Għerejjex, iżda, l-​24 taqsima kienu kollha jkunu preżenti fuq xogħlhom. Għajnuna miżjuda kienet meħtieġa wkoll fil-​festi tal-​Qbiż.

6. Ġesù għal xiex għandu mnejn alluda meta qal, “Hieni min jishar [“jibqaʼ mqajjem,” NW] u jieħu ħsieb l-​ilbiesi tiegħu”?

⁶ Meta Ġesù qal, “Hieni min jishar [“jibqaʼ mqajjem,” NW] u jieħu ħsieb l-​ilbiesi tiegħu,” għandu mnejn kien qiegħed jalludi għal proċedura taʼ dak iż-​żmien li kienet tinvolvi xogħol t’għassa fit-​tempju. Il-​Mixna Lhudija tgħid: “Il-​qassisin kienu joqogħdu għassa fi tliet postijiet fit-​Tempju: fil-​Kamra t’Abtinas, fil-​Kamra tal-​Fjamma, u fil-​Kamra tal-​Fuklar; u l-​leviti f’wieħed u għoxrin post: ħamsa fil-​ħames xatbiet tal-​Muntanja tat-​Tempju, erbgħa fl-​erbaʼ rkejjen tagħha fuq ġewwa, ħamsa fil-​ħames xatbiet tal-​Bitħa tat-​Tempju, erbgħa fl-​erbaʼ rkejjen fuq barra, u wieħed fil-​Kamra taʼ l-​Offerti, u wieħed fil-​Kamra tal-​Purtiera, u wieħed wara l-​post tas-​Siġġu tal-​Ħniena [barra l-​ħajt taʼ wara taʼ l-​Iktar Qaddis]. L-​uffiċjal tal-​Muntanja tat-​Tempju kien idur lil kull għassies b’torċi mixgħulin quddiemu, u jekk xi għassies ma kienx iqum u jgħidlu, ‘O Uffiċjal tal-​Muntanja tat-​Tempju, il-​paċi miegħek!’ u jkun evidenti li hu kien rieqed, kien isawtu bil-​bastun tiegħu, u kellu d-​dritt li jaħraqlu ħwejġu.”​—Il-​Mixna, Middoth (“Qisien”), 1, paragrafi 1-2, tradott minn Herbert Danby.

7. Il-​qassisin u l-​Leviti li kienu jkunu għassa fit-​tempju għala kien jeħtieġ li jibqgħu mqajmin?

⁷ Il-​partita Leviti u qassisin tat-​taqsima li tkun qiegħda taqdi kienu jibqgħu mqajmin il-​lejl kollu biex joqogħdu għassa u ma jħallu lil ħadd mhux nadif jidħol fil-​btieħi tat-​tempju. Ladarba “l-​uffiċjal tal-​Muntanja tat-​Tempju,” jew “il-​kmandant tat-​tempju,” kien jagħmel ir-​ronda taʼ l-​24 stazzjon kollha kemm huma matul l-​għases taʼ bil-​lejl, kull għassies kellu jibqaʼ mqajjem f’postu jekk ma riedx li jinqabad jiskarta.—Atti 4:1.

8. X’inhu l-​ilbies taʼ fuq figurattiv taʼ Kristjan?

⁸ Kristjani midlukin u qaddejja sħabhom jeħtieġ li jibqgħu mqajmin spiritwalment u jżommu l-​ilbies taʼ fuq figurattiv tagħhom. Dawn huma l-​evidenzi minn barra tal-​ħatra tagħna għall-​ministeru fit-​tempju spiritwali taʼ Jehovah. B’rikonoxximent taʼ dan, aħna għandna l-​ispirtu qaddis, jew forza attiva, t’Alla biex jgħinna nwettqu d-​dmirijiet tagħna u nattwaw il-​privileġġi tagħna bħala proklamaturi tas-​Saltna. Li norqdu fuq xogħlna bħala ministri t’Alla jpoġġina fil-​periklu taʼ li ninqabdu minn Ġesù Kristu, il-​Kmandant tat-​tempju l-​kbir spiritwali. Jekk inkunu reqdin spiritwalment f’dak iż-​żmien, aħna se niġu mneżżgħin għarwenin b’mod figurattiv u se jkollna l-​ilbies simboliku tagħna maħruq. Mela kif nistgħu nibqgħu mqajmin spiritwalment?

Kif Aħna Nistgħu Nibqgħu Mqajmin

9. Għala huwa tant importanti studju tal-​Bibbja bil-​għajnuna taʼ pubblikazzjonijiet Kristjani?

⁹ Studju diliġenti taʼ l-​Iskrittura bil-​għajnuna taʼ pubblikazzjonijiet Kristjani huwa stimulant għal li nibqgħu mqajmin spiritwalment. Studju bħal dan se jgħammarna għall-​ministeru, se jgħinna niffaċċjaw xi kriżijiet, u se jurina l-​mogħdija għall-​hena etern. (Proverbji 8:34, 35; Ġakbu 1:5-8) L-​istudju tagħna għandu jkun bir-​reqqa u progressiv. (Lhud 5:14–6:3) Ikel tajjeb li jittiekel regolarment jgħinna nibqgħu mqajmin u attenti. Jistaʼ jżomm lura t-​telqa li tistaʼ tkun sinjal taʼ malnutriment. M’għandna ebda raġuni biex inkunu malnutriti u bi ngħas spiritwalment, għax Alla qiegħed jagħmel provvediment abbundanti għal ikel spiritwali permezz taʼ “l-​irsir leali u diskret” midluk. (Mattew 24:45-47, NW) Konsum regulari taʼ ikel spiritwali permezz taʼ studju persunali u tal-​familja huwa mod wieħed biex nibqgħu mqajmin u nkunu ‘sħaħ fil-​fidi.’—Titu 1:13.

10. Il-​laqgħat, l-​assembleat, u l-​konvenzjonijiet Kristjani kif jgħinuna biex nibqgħu mqajmin spiritwalment?

¹⁰ Il-​laqgħat, l-​assembleat, u l-​konvenzjonijiet Kristjani jgħinuna nżommu mqajmin spiritwalment. Dawn jipprovdu inkuraġġiment u opportunitajiet biex “[i]nħajjru lil xulxin għall-​imħabba u għall-​għemil tajjeb.” Speċjalment għandna ninġabru flimkien regolarment hekk kif ‘naraw li qiegħed joqrob il-​Jum.’ Dak il-​jum issa huwa tabilħaqq qrib. Huwa “jum il-​Mulej,” meta hu se jivvindika s-​sovranità tiegħu. Jekk dak il-​jum huwa tassew importanti għalina​—u hekk għandu jkun—​aħna mhux se ‘naqtgħu mil-​laqgħat tagħna flimkien.’—Lhud 10:24, 25; 2 Pietru 3:10.

11. Għala jistaʼ jingħad li l-​ministeru Kristjan huwa essenzjali għal li aħna nżommu mqajmin spiritwalment?

¹¹ Parteċipazzjoni b’qalbna kollha fil-​ministeru Kristjan hija essenzjali biex nibqgħu mqajmin spiritwalment. Sehem regulari u żeluż fl-​ippridkar taʼ l-​aħbar tajba jżommna attenti. Il-​ministeru tagħna jagħtina ħafna opportunitajiet biex nitkellmu man-​nies dwar il-​Kelma t’Alla, is-​Saltna tiegħu, u l-​iskopijiet tiegħu. Huwa sodisfaċenti li nagħtu xiehda minn dar għal dar, nagħmlu żjajjar lura, u nikkonduċu studji tal-​Bibbja fid-​djar minn fuq pubblikazzjonijiet bħalma huwa l-​Għarfien Li Jwassal Għall-​Ħajja Taʼ Dejjem. Anzjani f’Efesu tal-​qedem setgħu jixhdu li Pawlu kien għallimhom “fil-​beraħ u kemm fid-​djar.” (Atti 20:20, 21) M’għandniex xi ngħidu, xi Xhieda leali taʼ Jehovah għandhom problemi serji taʼ saħħa li b’xi mod ifixklu l-​ministeru tagħhom, imma huma jsibu modi biex jgħidu lil oħrajn dwar Jehovah u l-​istat tiegħu taʼ Sultan u jiksbu ferħ kbir f’li jagħmlu dan.—Salm 145:10-14.

12, 13. Għal liema raġunijiet għandna nevitaw li nieklu u nixorbu b’mod eċċessiv?

¹² Li nevitaw li nitħanżru se jgħinna biex nibqgħu mqajmin spiritwalment. Meta kien qiegħed jitkellem dwar il-​preżenza tiegħu, Ġesù ħeġġeġ lill-​appostli tiegħu: “Oqogħdu attenti, u qisu li l-​ikel u x-​xorb żejjed u s-​sokor ma jmewwtulkomx qalbkom, u tħallux li l-​ħafna tħassib għall-​ħtiġiet tal-​ħajja jeħdilkom raskom, li ma ssibuhx dak il-​Jum fuqkom għal għarrieda. Għax hu Jum li għad jaqaʼ bħal nassa fuq kull min jgħammar fuq wiċċ l-​art kollha.” (Luqa 21:7, 34, 35) Il-​gula u s-​sokor m’humiex f’armonija mal-​prinċipji tal-​Bibbja. (Dewteronomju 21:18-21) Proverbji 23:20, 21 jgħid: “Tagħmilhiex maʼ dawk li jlegilgu l-​inbid, u maʼ dawk li għandhom kilba għal-​laħam; għax l-​ikel u x-​xorb żejjed iwasslu għall-​faqar, u min iħobb l-​irqad iċ-​ċraret jilbes.”—Proverbji 28:7.

¹³ Anki jekk l-​ikel żejjed u x-​xorb żejjed ma jwasslux sa dak il-​punt, madankollu, dawn jistgħu jagħmlu lil persuna bi ngħas, saħansitra traskurata dwar li tagħmel ir-​rieda t’Alla. Naturalment, se jkun hemm anzjetajiet li jinvolvu l-​ħajja tal-​familja, is-​saħħa, u affarijiet oħrajn. Madankollu, se nkunu ferħanin jekk inpoġġu l-​interessi tas-​Saltna l-​ewwel fil-​ħajja u jkollna fiduċja li Missierna tas-​sema se jipprovdilna. (Mattew 6:25-34) Inkella, “dak il-​Jum” se jiġi fuqna bħal “nassa,” forsi bħala nassa moħbija li se taqbadna għal għarrieda jew bħala nassa bil-​lixka bħal dik li tattira u mbagħad taqbad annimali li ma jkunu qegħdin jissuspettaw xejn. Dan mhux se jiġri jekk aħna nibqgħu mqajmin, konxji bis-​sħiħ li qegħdin ngħixu fiż-​“żmien taʼ l-​aħħar.”—Danjel 12:4.

14. Għala għandna nieħdu sehem f’talb bis-​serjetà?

¹⁴ Talb bis-​serjetà huwa għajnuna oħra biex wieħed jibqaʼ mqajjem spiritwalment. Fil-​profezija l-​kbira tiegħu Ġesù kompla ħeġġeġ: “Ishru [“Ibqgħu mqajmin,” NW], mela, u itolbu l-​ħin kollu, biex tkunu tifilħu tgħaddu minn kull ma għandu jiġri u tieqfu quddiem Bin il-​bniedem.” (Luqa 21:36) Iva, ejjew nitolbu sabiex inkunu dejjem fuq in-​naħa taʼ Jehovah u ngawdu waqfa approvata meta Ġesù, Bin il-​bniedem, jiġi biex jeqred lil din is-​sistema t’affarijiet mill-​agħar. Għall-​ġid tagħna stess u għall-​ġid taʼ kredenti sħabna li għalihom nitolbu, jeħtieġ li ‘nżommu sħaħ [“imqajmin,” NW] fit-​talb.’—Kolossin 4:2; Efesin 6:18-20.

Iż-​Żmien Dalwaqt Jiskadi

15. X’jitwettaq bis-​servizz tagħna bħala xandâra tat-​tjieba?

¹⁵ Hekk kif nistennew il-​jum il-​kbir taʼ Jehovah, bla dubju nixtiequ li nagħmlu dak kollu li nistgħu fis-​servizz tiegħu. Jekk aħna nitolbuh bis-​serjetà dwar dan, ‘bieb kbir fejn naħdmu sewwa’ jistaʼ jinfetaħ għalina. (1 Korintin 16:8, 9) Fiż-​żmien maħtur t’Alla, Ġesù se jagħmel ġudizzju u jissepara lin-​“nagħaġ” twajbin li jixirqilhom ħajja taʼ dejjem mill-​“mogħoż” mill-​agħar li jixirqilhom il-​qerda għal dejjem. (Ġwann 5:22) Mhux aħna li nisseparaw in-​ngħaġ mill-​mogħoż. Imma s-​servizz tagħna bħala xandâra tat-​tjieba qiegħed issa jagħti opportunità lin-​nies biex jagħżlu ħajja taʼ servizz lejn Alla u b’hekk ikollhom it-​tama li jkunu sseparati għall-​ħajja meta Ġesù “jiġi . . . fil-​glorja tiegħu.” Il-​ftit żmien li baqaʼ għal din is-​sistema t’affarijiet jintensifika l-​ħtieġa għal attività b’qalb sħiħa hekk kif infittxu lil dawk “disposti sewwa għall-​ħajja taʼ dejjem.”—Mattew 25:31-46; Atti 13:48, NW.

16. Għala għandna nkunu proklamaturi żelużi tas-​Saltna?

¹⁶ Iż-​żmien skada għad-​dinja taʼ żmien Noè, u dalwaqt se jiskadi għal din is-​sistema t’affarijiet. Ejjew għalhekk inkunu proklamaturi żelużi tas-​Saltna. Ix-​xogħol tagħna taʼ l-​ippridkar miexi ’l quddiem, għax kull sena mijiet t’eluf qegħdin jitgħammdu b’simbolu tad-​dedikazzjoni tagħhom lil Alla. Huma qegħdin isiru parti mill-​organizzazzjoni mbierka taʼ Jehovah​—il-​“poplu tiegħu u n-​nagħaġ tal-​mergħa tiegħu.” (Salm 100:3) X’ferħ hemm f’li tieħu sehem fix-​xogħol taʼ l-​ippridkar tas-​Saltna li jġib tama lil tant nies qabel “Jum il-​Mulej, kbir u tal-​biżaʼ”!

17, 18. (a) Hekk kif nippridkaw, liema reazzjoni għandna nistennew mingħand xi wħud? (b) X’se jiġrilhom żgur dawk li jwaqqgħu għaċ-​ċajt?

¹⁷ Bħal Noè, aħna għandna l-​appoġġ u l-​protezzjoni t’Alla. Iva, in-​nies, l-​anġli li mmaterjalizzaw, u n-​Nefilim għandhom mnejn li waqqgħuh għaċ-​ċajt il-​messaġġ taʼ Noè, imma dak lilu ma waqqfux. Illum xi wħud iwaqqgħuna għaċ-​ċajt meta nuruhom l-​evidenza abbundanti dwar li qegħdin ngħixu fl-​“aħħar tad-​dinja.” (2 Timotju 3:1-5) Irredikolar bħal dan huwa bi twettiq tal-​profezija tal-​Bibbja rigward il-​preżenza taʼ Kristu, għax Pietru kiteb: “Fl-​aħħar jiem jiġu nies kollhom tmaqdir u jwaqqgħu kollox għaż-​żufjett, nies li jaġixxu skond ix-​xewqat ħżiena tagħhom; u jibdew jgħidu: ‘Fejn hi l-​wegħda tal-​miġja [“preżenza,” NW] tiegħu? Għax sa minn meta mietu missirijietna, kollox baqaʼ miexi kif kien sa mill-​bidu tal-​ħolqien.’” (Korsiv tagħna.)—2 Pietru 1:16; 3:3, 4.

¹⁸ Uħud li jwaqqgħu għaċ-​ċajt fi żmienna għandhom mnejn jaħsbu: ‘Xejn ma nbidel mill-​ħolqien ’il hawn. Il-​ħajja għadha sejra, in-​nies jieklu, jixorbu, jiżżewġu, u jrabbu l-​familja. Anki jekk Ġesù hu preżenti, mhux se jesegwixxi ġudizzju fi żmieni.’ Xi żball għandhom! Jekk sadattant ma jmutux minn kawżi oħrajn, il-​jum li jispira l-​biżaʼ taʼ Jehovah żgur li se jiġi fuqhom, sewwa sew bħalma l-​qerda katakliżmika fid-​dilluvju temmet lill-​ġenerazzjoni mill-​agħar fi żmien Noè.—Mattew 24:34.

Jiġri X’Jiġri, Ibqgħu Mqajmin!

19. Kif għandna nqisu l-​attivitajiet tagħna li nagħmlu dixxipli?

¹⁹ Jekk aħna ddedikati lil Jehovah, jalla qatt ma nsiru bi ngħas minħabba raġunar mhux xieraq. Dan huwa żmien biex nibqgħu mqajmin, biex neżerċitaw fidi fil-​profezija divina, u biex inwettqu l-​inkarigu tagħna li ‘nagħmlu dixxipli mill-​ġnus kollha.’ (Mattew 28:19, 20) Hekk kif din is-​sistema tiffaċċja t-​tmiem finali tagħha, ma jistax ikollna privileġġ akbar minn dak li naqdu lil Alla Jehovah taħt it-​tmexxija taʼ Ġesù Kristu u li nieħdu sehem fix-​xogħol madwar id-​dinja taʼ li nippridkaw “l-​Evanġelju tas-​Saltna” qabel ma jiġi t-​tmiem.—Mattew 24:14; Mark 13:10.

20. Kaleb u Ġożwè liema eżempju stabbilew, u l-​korsa tagħhom x’tindikalna?

²⁰ Xi wħud min-​nies taʼ Jehovah ilhom jaqduh għal ħafna għaxriet taʼ snin, forsi għal għomorhom. U anki jekk ħaddanna l-​vera qima fi żmien riċenti, jalla nkunu bħal Kaleb l-​Israelit, li “żamm sħiħ mal-​Mulej.” (Dewteronomju 1:34-36) Hu u Ġożwè kienu ppreparati sewwa biex jidħlu fl-​Art Imwiegħda ftit wara l-​ħelsien taʼ Israel mill-​jasar fl-​Eġittu. L-​Israeliti adulti inġenerali, madankollu, naqsithom il-​fidi u kellhom iqattgħu 40 sena fix-​xagħri, fejn mietu. Kaleb u Ġożwè ssaportew tbatijiet flimkien magħhom tul dak iż-​żmien kollu, imma eventwalment dawk iż-​żewġt irġiel daħlu fl-​art tal-​wegħda. (Numri 14:30-34; Ġożwè 14:6-15) Jekk ‘inżommu bis-​sħiħ mal-​Mulej,’ u nibqgħu mqajmin spiritwalment, se jkollna l-​ferħ li nidħlu fid-​dinja l-​ġdida mwiegħda t’Alla.

21. X’se tkun l-​esperjenza tagħna jekk nibqgħu mqajmin spiritwalment?

Kif Twieġeb Int?

◻ Int kif tiddefinih l-​ilbies taʼ fuq figurattiv tagħna, u kif nistgħu nżommuh?

◻ Liema huma xi modi biex tibqaʼ mqajjem spiritwalment?

◻ Għala għandna nistennew li xi wħud iwaqqgħuna għaċ-​ċajt u kif għandna nqisuhom?

◻ Kif għandna nqisuh ix-​xogħol tagħna li nagħmlu dixxipli f’dawn l-​aħħar jiem?

[Kumment f’paġna 28]

Il-​Kristjani għandhom l-​ispirtu qaddis t’Alla biex jgħinhom jibqgħu mqajmin u jwettqu dmirijiethom

[Stampa f’paġna 27]

Determinat int li tibqaʼ mqajjem spiritwalment u żżomm fuqek l-​ilbies taʼ fuq figurattiv tiegħek?