Il-Maħbubin Mejtin Tiegħek—Se Terġaʼ Tarahom?

JOHN kellu biss disaʼ snin meta mietet ommu. Iktar tard, ftakar x’kien ġara fil-​kamra mortwarja: “Pinġejtilha stampa u ktibt nota żgħira fuqha fejn tlabtha biex tistenniena lkoll fis-​sema. Tajtha lid-​daddy biex ipoġġiha fit-​tebut magħha, u saħansitra għalkemm kienet mejta, nixtieq naħseb li ħadet dak l-​aħħar messaġġ minn għandi.”​—How it Feels When a Parent Dies, minn Jill Krementz.

Ma jistaʼ jkun hemm ebda dubju li John kien iħobbha ħafna lil ommu. Wara li ddeskriva l-​kwalitajiet tajbin tagħha, qal: “Forsi huwa sempliċement għax ma rridx niftakar l-​affarijiet ħżiena, imma ma nistaʼ naħseb li kellha xejn ħażin. Kienet l-​isbaħ mara li qatt rajt f’ħajti kollha.”

Bħal John, ħafna għandhom memorji għeżież tal-​maħbubin mejtin tagħhom u jammettu li għandhom il-​bżonn emozzjonali li jerġgħu jarawhom. Edith, li mietilha tifel taʼ 26 sena bil-​kanċer, qalet: “Għandi l-​bżonn li nemmen li ibni jeżisti x’imkien imma ma nafx fejn. Se nerġaʼ narah? Ma nafx imma nittama li iva.”

Ċertament, il-​Ħallieq kollu mħabba tal-​bniedem m’huwiex mingħajr sentimenti dwar din ix-​xewqa umana normali. Huwa għalhekk li wiegħed li se jasal iż-​żmien meta miljuni se jingħaqdu mill-​ġdid mal-​maħbubin mejtin tagħhom. Il-​Kelma t’Alla fiha referenzi bla għadd għal din il-​wegħda taʼ rxoxt tal-​mejtin fil-​futur.—Isaija 26:19; Danjel 12:2, 13; Ħosea 13:14; Ġwann 5:28, 29; Rivelazzjoni 20:12, 13.

Min Jiġi Rxoxtat Għas-​Sema?

Ejjew nikkunsidraw it-​tama taʼ John li ommu l-​għażiża qiegħda tistennieh fis-​sema. Ħafna nies li jmorru l-​knisja għandhom din it-​tama jew twemmin. Fi sforz biex jappoġġjaw opinjonijiet bħal dawn, il-​membri tal-​kleru u xi ħaddiema soċjali japplikaw ħażin testi mill-​Bibbja.

Per eżempju, Dr. Elisabeth Kübler-Ross, esperta f’li tgħin lill-​imnikktin, qalet fil-​ktieb tagħha On Children and Death: “Li mmutu jfisser biss li narmu l-​ġisem tagħna bħalma nistgħu nwarrbu fil-​ġenb xi kowt qadim li ilu għandna, jew li mmorru minn kamra għal oħra. F’​Ekkleżjasti 12:7, naqraw: ‘Imbagħad it-​trab se jerġaʼ lura lejn l-​art bħalma kien; u l-​ispirtu se jerġaʼ lura għand Alla li tah.’ Ġesù qal: ‘Jien sejjer inħejji post għalikom biex fejn inkun jien hemm tistgħu tkunu intom ukoll.’ U lill-​ħalliel fuq is-​salib: ‘Illum int se tkun miegħi fil-​ġenna.’”

Juru verament dawn il-​versi t’hawn fuq li l-​maħbubin mejtin tagħna issa huma ħajjin u qegħdin jistennewna fis-​sema? Ejjew nikkunsidraw il-​versi iktar bir-​reqqa, billi nibdew b’​Ekkleżjasti 12:7. Ovvjament, ir-​raġel għaref li kiteb dawn il-​kelmiet ma kellux l-​intenzjoni li jikkontradixxi dak li hu kien diġà stqarr fl-​istess ktieb Bibliku: “Il-​ħajjin huma konxji li se jmutu; imma inkwantu għall-​mejtin, m’huma konxji taʼ xejn affattu.” (Ekkleżjasti 9:5) Hu kien qiegħed jiddiskuti l-​mewt taʼ l-​umanità inġenerali. Huwa raġonevoli li temmen li dawk kollha li bil-​miftuħ jgħidu li huma atei u l-​kriminali stabbiliti jerġgħu lura għand Alla mal-​mewt tagħhom? Bil-​kemm. Fil-​fatt, dak ma jistaʼ jingħad għall-​ebda wieħed minna, minkejja jekk inqisux lilna nfusna tajbin jew ħżiena. Ladarba ħadd minna ma kien fis-​sema m’Alla, kif jistaʼ jingħad li nerġgħu lura għandu?

X’ried ifisser, allura, il-​kittieb tal-​Bibbja meta qal li mal-​mewt ‘l-​ispirtu jmur lura lejn dak Alla veru’? Billi uża l-​kelma Ebrajka tradotta “spirtu,” hu ma kienx qiegħed jirreferi għal xi ħaġa unika li tiddistingwi bniedem minn ieħor. Minflok, f’​Ekkleżjasti 3:19, l-​istess kittieb imnebbaħ tal-​Bibbja jispjega li l-​bniedem u l-​annimali “lkoll għandhom biss spirtu wieħed.” B’mod evidenti hu ried ifisser li l-​“[i]spirtu” huwa l-​forza tal-​ħajja fiċ-​ċelloli li jifformaw l-​iġsma fiżiċi tal-​bniedem u taʼ l-​annimali. Ma rċevejniex dan l-​ispirtu direttament mingħand Alla. Ġie mgħoddi lilna mill-​ġenituri umani tagħna fil-​konċepiment u iktar tard fit-​twelid tagħna. Iktar minn hekk, dan l-​ispirtu ma jivvjaġġax litteralment fl-​ispazju u jerġaʼ lura għand Alla mal-​mewt. L-​espressjoni, ‘l-​ispirtu jmur lura lejn dak Alla veru,’ hija mod tal-​kelma li tfisser li l-​prospetti taʼ ħajja futura taʼ xi ħadd mejjet issa qegħdin f’idejn Alla. Qiegħda f’idejh id-​deċiżjoni taʼ lil min se jiftakar u eventwalment jirxoxta. Innota għalik innifsek kemm il-​Bibbja turi dan b’mod ċar f’​Salm 104:29, 30.

Alla Jehovah għandu l-​iskop li numru limitat taʼ segwaċi leali taʼ Kristu, li jgħoddu biss 144,000, se jiġu rxoxtati għal ħajja fis-​sema bħala wlied spirti t’Alla. (Rivelazzjoni 14:1, 3) Dawn jifformaw gvern tas-​sema maʼ Kristu għall-​barka taʼ l-​umanità fuq l-​art.

L-ewwel uħud li saru jafu dwar dan kienu l-​appostli leali taʼ Ġesù, li lilhom qalilhom: “F’dar Missieri hemm bosta għamajjar. Inkella, kont ngħidilkom, għaliex jien sejjer fi triqti biex inħejji post għalikom. Ukoll, jekk immur fi triqti u nħejji post għalikom, nerġaʼ niġi u se nilqagħkom id-​dar għandi, biex fejn inkun jien tistgħu tkunu intom ukoll.” (Ġwann 14:2, 3) Dawk l-​appostli u Kristjani bikrin oħrajn mietu u kellhom jistennew bla ma kienu jafu xejn fil-​mewt sal-​miġja taʼ Ġesù biex jippremjahom b’irxoxt għas-​sema. Dak hu għala naqraw li l-​ewwel martri Kristjan, Stiefnu, “raqad fil-​mewt.”—Atti 7:60; 1 Tessalonkin 4:13.

L-​Irxoxt Għal Ħajja Fuq L-​Art

Imma xi ngħidu dwar il-​wegħda taʼ Ġesù lill-​kriminal li miet maġenbu? Bħal ħafna Lhud taʼ dak iż-​żmien, dan ir-​raġel emmen li Alla kellu jibgħat Messija li kien se jwaqqaf saltna u jirrestawra l-​paċi u s-​sigurtà lill-​ġens Lhudi fuq l-​art. (Qabbel 1 Slaten 4:20-25 maʼ Luqa 19:11; 24:21 u Atti 1:6.) Barra minn hekk, dak ir-​raġel ħażin esprima fidi li Ġesù kien dak il-​Wieħed stess magħżul minn Alla biex ikun is-​Sultan. Madankollu, f’dak il-​mument, il-​mewt imminenti taʼ Ġesù bħala bniedem ikkundannat għamlet dan jidher li ma kienx probabbli. Dak hu għala Ġesù żgura lill-​kriminal billi introduċa l-​wegħda Tiegħu b’dawn il-​kelmiet: “Verament ngħidlek illum, Int se tkun miegħi fil-​Ġenna.”—Luqa 23:42, 43.

Traduzzjonijiet tal-​Bibbja li jdaħħlu comma qabel il-​kelma “illum” joħolqu problema għan-​nies li jridu jifhmu l-​kliem taʼ Ġesù. Ġesù ma mar f’ebda ġenna f’dak il-​jum stess. Minflok, hu kien mimdud bla ma jaf xejn fil-​mewt għal tlett ijiem sakemm Alla rxoxtah. Saħansitra wara l-​irxoxt taʼ Ġesù u t-​tlugħ tiegħu fis-​sema, hu kellu jistenna f’id il-​leminija taʼ Missieru sakemm wasal iż-​żmien għalih biex jaħkem bħala Sultan fuq l-​umanità. (Ebrej 10:12, 13) Dalwaqt, il-​ħakma tas-​Saltna taʼ Ġesù se ġġib serħan lill-​umanità u tbiddel l-​art kollha kemm hi f’ġenna. (Luqa 21:10, 11, 25-31) Imbagħad hu se jwettaq il-​wegħda tiegħu lil dak il-​kriminal billi jirxoxtah għall-​ħajja fuq l-​art. U Ġesù se jkun mar-​raġel fis-​sens li Hu se jgħin lir-​raġel fil-​ħtiġijiet tiegħu kollha, inkluża l-​ħtieġa biex iġib il-​mod taʼ ħajja tiegħu f’armonija mal-​liġijiet taʼ tjieba t’Alla.

L-​Irxoxt Taʼ Ħafna

Bħal fil-​każ taʼ dak il-​kriminal niedem, l-​irxoxt tal-​biċċa l-​kbira tal-​bnedmin se jseħħ hawn fuq l-​art. Dan hu f’armonija maʼ l-​iskop t’Alla f’li ħalaq lill-​bniedem. L-​ewwel raġel u mara ġew impoġġijin fi ġnien ġenna u ntqalilhom biex irażżnu l-​art. Li kieku baqgħu ubbidjenti lejn Alla, qatt ma kienu jixjieħu u jmutu. Fiż-​żmien xieraq t’Alla, l-​art kollha kienet se tkun imrażżna, magħmula ġenna globali minn Adam u d-​dixxendenti perfetti tiegħu.—Ġenesi 1;28; 2:8, 9.

Madankollu, minħabba li Adam u Eva dinbu minn jeddhom, ġabu l-​mewt fuqhom infushom u fuq in-​nisel futur tagħhom. (Ġenesi 2:16, 17; 3:17-19) Dak hu għala l-​Bibbja tistqarr: “Permezz taʼ bniedem wieħed [Adam] id-​dnub daħal fid-​dinja u l-​mewt permezz tad-​dnub, u b’hekk il-​mewt infirxet fuq il-​bnedmin kollha għaliex kollha kienu dinbu.”—Rumani 5:12.

Kien hemm biss bniedem wieħed li twieled meħlus mid-​dnub tan-​nisel. Dak kien l-​Iben perfett t’Alla, Ġesù Kristu, li ħajtu ġiet ittrasferita mis-​sema għal ġol-​ġuf taʼ verġni Lhudija, Marija. Ġesù baqaʼ bla dnub u ma kienx jixraqlu li jiġi mogħti l-​mewt. Għalhekk, il-​mewt tiegħu għandha valur taʼ rahan għan-​nom tad-​“dnub tad-​dinja.” (Ġwann 1:29; Mattew 20:28) Dak hu għala Ġesù setaʼ jgħid: “Jien hu l-​irxoxt u l-​ħajja. Dak li jeżerċita fidi fija, avolja jmut, se jiġi għall-​ħajja.”—Ġwann 11:25.

Mela, iva, int tistaʼ żżomm f’moħħok il-​prospett li tingħaqad mill-​ġdid mal-​maħbubin mejtin tiegħek, imma dan jirrikjedi li teżerċita fidi f’Ġesù bħala l-​Feddej tiegħek u tobdih bħala s-​Sultan maħtur t’Alla. Dalwaqt is-​Saltna t’Alla se tiknes għalkollox il-​ħażen kollu minn fuq din l-​art. Il-​bnedmin kollha li jirrifjutaw li jissottomettu ruħhom għall-​ħakma tagħha se jiġu meqrudin. Madankollu, is-​sudditi tas-​Saltna t’Alla se jsalvaw u se jkunu mehdijin fix-​xogħol taʼ li jbiddlu din l-​art f’ġenna.—Salm 37:10, 11; Rivelazzjoni 21:3-5.

Imbagħad iż-​żmien eċċitanti se jasal biex jibda l-​irxoxt. Se tkun hemm int biex tilqaʼ lura l-​mejtin? Dan kollu jiddependi fuq dak li tagħmel issa. Barkiet taʼ l-​għaġeb jistennew lil dawk kollha li issa jissottomettu ruħhom għall-​ħakma tas-​Saltna taʼ Jehovah permezz taʼ Ibnu, Ġesù Kristu. (w94 6/15)