Tifridx Dak li Alla Għaqqad Flimkien

“M’għadhomx iżjed tnejn, imma ġisem wieħed. Għalhekk, dak li Alla għaqqad flimkien ħa ma jifirdu ebda bniedem.”​—MATTEW 19:6.

1, 2. Għala hu kemm Skritturali u kemm realistiku li tistenna li l-​koppji miżżewġin kultant ikollhom il-​problemi?

IMMAĠINA li se tibda vjaġġ twil bil-​karozza. Se ssib ostakli fil-​vjaġġ tiegħek? Ma tkunx realistiku jekk tassumi li le! Per eżempju, forsi tiltaqaʼ maʼ temp estrem, li jġagħlek issuq bil-​mod u b’attenzjoni. F’xi ħin jew ieħor, forsi tinqalagħlek problema fil-​karozza li ma tkunx tistaʼ ssolviha waħdek, u għalhekk ikollok tieqaf fil-​ġenb tat-​triq u tfittex l-​għajnuna. Għandhom dawn is-​sitwazzjonijiet iġagħluk tikkonkludi li għamilt ħażin li bdejt il-​vjaġġ u li għandek tabbanduna l-​karozza? Le. Meta tkun qed tivvjaġġa fit-​tul, tistenna li jinqalgħu xi problemi u b’mod għaqli tfittex soluzzjonijiet biex issolvihom.

² L-​istess hu minnu dwar iż-​żwieġ. Il-​problemi ma tistax tevitahom, u koppja li qed taħseb għaż-​żwieġ ma tkunx realistika jekk tistenna li jkollha ħajja mimlija hena biss. Fl-​1 Korintin 7:​28, il-​Bibbja tgħid ċar u tond li l-​irġiel u n-​nisa miżżewġin kien se jkollhom “tribulazzjoni f’laħamhom.” Dan għala? Fi ftit kliem, dan hu għaliex l-​irġiel u n-​nisa miżżewġin huma imperfetti, u aħna qed ngħixu fi “żminijiet kritiċi li diffiċli biex issib tarfhom.” (2 Timotju 3:1; Rumani 3:​23) Għalhekk, anki koppja li tkun kompatibbli u li tħobb tikkunsidra l-​affarijiet mill-​ħarsa t’Alla kultant se tiffaċċja l-​problemi.

3. (a) Ħafna fid-​dinja kif iħarsu lejn iż-​żwieġ? (b) Il-​Kristjani għala jistinkaw biex iżommu l-​għaqda taż-​żwieġ tagħhom?

³ F’din id-​dinja moderna, meta xi koppji jiffaċċjaw il-​problemi, l-​ewwel reazzjoni tagħhom tkun li jtemmu ż-​żwieġ. F’ħafna pajjiżi, ir-​rati tad-​divorzju qed jogħlew m’għola s-​smewwiet. Madankollu, il-​Kristjani veri jittrattaw il-​problemi minflok ma jaħarbu minnhom. Għala? Għaliex huma jħarsu lejn iż-​żwieġ bħala għotja prezzjuża mingħand Ġeħova. Ġesù qal dwar il-​koppji miżżewġin: “Dak li Alla għaqqad flimkien ħa ma jifirdu ebda bniedem.” (Mattew 19:6) Huwa minnu li m’huwiex dejjem faċli li tgħix skond dan il-​livell. Per eżempju, il-​qraba u oħrajn​—inkluż xi wħud li jagħtu l-​pariri dwar iż-​żwieġ​—li ma jirrikonoxxux il-​prinċipji tal-​Bibbja spiss jinkuraġġixxu lill-​koppji biex jisseparaw jew jiddivorzjaw fuq bażi li ma tkunx Skritturali.a Imma l-​Kristjani jafu li jkun ħafna aħjar li tirranġa jew iżżomm l-​għaqda taż-​żwieġ minflok ma tkun ħafif biex tħoll ir-​rabta malajr malajr. Tabilħaqq, huwa vitali li mill-​bidunett inkunu determinati li nagħmlu l-​affarijiet kif irid Ġeħova​—mhux skond il-​pariri li jagħtuna oħrajn.​—Proverbji 14:12.

Jingħelbu d-​Diffikultajiet

4, 5. (a) Liema sfidi jridu jiġu ffaċċjati fiż-​żwieġ? (b) Il-​prinċipji li jinsabu fil-​Kelma t’Alla għala huma tassew effettivi, anki meta jinqalgħu l-​problemi fiż-​żwieġ?

⁴ Il-​fatt hu li kull żwieġ jeħtieġ l-​attenzjoni minn żmien għal żmien. F’ħafna każi, dan se jinvolvi li jiġi solvut kull nuqqas taʼ ftehim żgħir. Però, f’xi żwiġijiet jistaʼ jkun hemm sfidi iktar serji li jheddu l-​pedament tar-​relazzjoni. Kultant, forsi jkollok bżonn titlob l-​għajnuna mingħand xi anzjan Kristjan miżżewweġ li jkun taʼ l-​esperjenza. Madankollu, dawn is-​sitwazzjonijiet ma jfissrux li ż-​żwieġ tiegħek hu fallut. Dawn sempliċement jenfasizzaw kemm hu importanti li dak li jkun iżomm mill-​qrib mal-​pariri tal-​Bibbja meta jsolvi l-​problemi.

⁵ Bħala l-​Ħallieq tar-​razza umana u l-​Oriġinatur taʼ l-​arranġament taż-​żwieġ, Ġeħova jaf iktar minn kulħadd x’għandna bżonn sabiex ikollna relazzjoni taʼ suċċess fiż-​żwieġ. Il-​mistoqsija hi, Se nisimgħu aħna mill-​pariri li nsibu fil-​Kelma tiegħu u nobduhom? Żgur li se nibbenefikaw jekk nagħmlu hekk. Ġeħova qal lill-​poplu tiegħu tal-​qedem: “Li kieku tajt widen għall-​kmandamenti tiegħi, kien ikun bħal xmara sliemek, u sedqek bħal mewġ tal-​baħar.” (Isaija 48:18) Min iżomm mal-​gwida misjuba fil-​Bibbja jistaʼ jkollu żwieġ li jirnexxi. L-​ewwel ejja nikkunsidraw il-​pariri li tagħti l-​Bibbja lill-​irġiel miżżewġin.

“Komplu Ħobbu lin-​Nisa Tagħkom”

6. X’inhu l-​parir Skritturali għall-​irġiel miżżewġin?

⁶ L-​ittra taʼ l-​appostlu Pawlu lill-​Efesin fiha gwida ċara għall-​irġiel miżżewġin. Pawlu kiteb: “Irġiel, komplu ħobbu lin-​nisa tagħkom, bħalma l-​Kristu wkoll ħabb lill-​kongregazzjoni u ta lilu nnifsu għaliha. L-​irġiel b’dan il-​mod għandhom iħobbu lin-​nisa tagħhom, bħal ġisimhom stess. Min iħobb lil martu jħobb lilu nnifsu, għax ebda bniedem qatt ma bagħad lil ġismu stess; imma jitimgħu u jgħożżu, bħalma l-​Kristu jagħmel ukoll lill-​kongregazzjoni. Minkejja dan, bl-​istess mod, kull wieħed minnkom għandu jħobb lil martu bħalu nnifsu.”​—Efesin 5:​25, 28, 29, 33.

7. (a) X’għandu jkun parti importanti mill-​pedament taʼ żwieġ Kristjan? (b) L-​irġiel miżżewġin kif ikomplu jħobbu lin-​nisa tagħhom?

⁷ Pawlu ma jiddiskutix kull problema immaġinabbli li tistaʼ tinqalaʼ bejn raġel u mara miżżewġin. Minflok, hu jmur fil-​qalba tal-​kwistjoni billi jidentifika dak li għandu jkun l-​iktar importanti fil-​pedament taʼ kull żwieġ Kristjan​—l-​imħabba. Fil-​fatt, l-​imħabba hija msemmija sitt darbiet fil-​versi li għadna kif semmejna. Innota wkoll li Pawlu jgħid lill-​irġiel miżżewġin: “Komplu ħobbu lin-​nisa tagħkom.” Żgur li Pawlu rrikonoxxa li l-​attrazzjoni romantika x’aktarx li hija iktar faċli fil-​bidu tar-​relazzjoni milli wara ż-​żwieġ. Dan hu speċjalment minnu matul dawn “l-​aħħar jiem,” meta ħafna saru “jħobbu lilhom infushom” u “ma jkunux iridu jiftiehmu.” (2 Timotju 3:​1-3) Dawn il-​kwalitajiet negattivi qed jeqirdu lil ħafna żwiġijiet illum, imma raġel li jħobb mhux se jippermetti li l-​karatteristiki egoistiċi tad-​dinja jinfluwenzaw il-​ħsibijiet u l-​azzjonijiet tiegħu.​—Rumani 12:2.

Kif Tistaʼ Tipprovdi għal Martek?

8, 9. Raġel Kristjan miżżewweġ b’liema modi jipprovdi għal martu?

⁸ Jekk int raġel Kristjan miżżewweġ, kif tistaʼ tirreżisti t-​tendenzi egoistiċi u turi mħabba ġenwina lejn martek? Fil-​kliem tiegħu lill-​Efesin li kkwotajna qabel, Pawlu identifika żewġ affarijiet li għandek bżonn tagħmel​—tipprovdi lil martek, u tgħożżha sewwasew bħalma tgħożż lil ġismek stess. Kif tistaʼ tipprovdilha? Mod wieħed hu materjalment​—billi tieħu ħsieb il-​bżonnijiet fiżiċi tagħha. Pawlu kiteb lil Timotju: “Ċertament li jekk xi ħadd ma jipprovdix għal tiegħu, u speċjalment għall-​membri taʼ daru, ikun ċaħad il-​fidi u jkun agħar minn bniedem mingħajr fidi.”—1 Timotju 5:8.

⁹ Madankollu, hemm iktar involut milli sempliċement tipprovdi l-​ikel, il-​ħwejjeġ, u l-​kenn. Għala? Għaliex raġel miżżewweġ jistaʼ jkun tassew kapaċi jipprovdi l-​bżonnijiet materjali taʼ martu, imma jonqos milli jissodisfa l-​bżonnijiet emozzjonali u spiritwali tagħha. Huwa essenzjali li jieħu ħsieb il-​bżonnijiet tagħha b’dawn il-​modi li għadna kif semmejna. Huwa minnu li ħafna rġiel Kristjani jinsabu mħabbtin jieħdu ħsieb affarijiet konnessi mal-​kongregazzjoni. Imma l-​fatt li jkollu responsabbiltajiet kbar fil-​kongregazzjoni ma jfissirx li raġel miżżewweġ għandu jittraskura l-​obbligi tiegħu mingħand Alla bħala kap tal-​familja. (1 Timotju 3:​5, 12) Meta kienet qed tikkummenta dwar din il-​kwistjoni, xi snin ilu din ir-​rivista qalet dan li ġej: “Fi qbil maʼ ħtiġijiet Bibliċi, jistaʼ jingħad li ‘xogħol pastorali jibda mid-​dar.’ Jekk anzjan jittraskura lill-​familja tiegħu, hu jistaʼ jipperikola l-​ħatra tiegħu.”b Jidher ċar li huwa importanti ferm li int tipprovdi għal martek​—fiżikament, emozzjonalment u, fuq kollox, spiritwalment.

Xi Jfisser li Tgħożż lil Martek?

10. Kif jistaʼ raġel jgħożż lil martu?

¹⁰ Jekk tgħożż lil martek, int se tieħu ħsiebha sew għaliex tħobbha. Hemm diversi modi kif tistaʼ tagħmel dan. L-​ewwelnett, qattaʼ biżżejjed ħin magħha. Jekk tittraskura lil martek f’dan ir-​rigward, l-​imħabba tagħha għalik tistaʼ tibred. Ikkunsidra wkoll li l-​ammont taʼ ħin u attenzjoni li int taħseb li martek għandha bżonn għandu mnejn m’huwiex l-​istess bħal dak li tħoss li għandha bżonn hi. Hemm involut iktar milli sempliċement tgħid lil martek li tgħożżha. Martek għandha tħoss li int tgħożżha. Pawlu kiteb: “Ħalli ħadd ma jibqaʼ jfittex dak li jaqbel lilu, imma dak li jaqbel lil ħaddieħor.” (1 Korintin 10:24) Bħala raġel miżżewweġ li turi mħabba, int trid tkun ċert li tifhem il-​bżonnijiet veri taʼ martek.​—Filippin 2:4.

11. Ir-​relazzjoni li raġel miżżewweġ għandu m’Alla u mal-​kongregazzjoni kif tiġi effettwata mill-​mod kif jittratta lil martu?

¹¹ Mod ieħor kif turi li tgħożż lil martek hu billi tittrattaha bit-​tenerezza, kemm bil-​kliem kif ukoll bl-​azzjoni. (Proverbji 12:18) Pawlu kiteb lill-​Kolossin: “Intom irġiel miżżewġin, ibqgħu ħobbu lin-​nisa tagħkom u tkunux ħorox magħhom.” (Kolossin 3:​19) Skond xogħol wieħed taʼ referenza, l-​aħħar parti taʼ l-​istqarrija taʼ Pawlu tistaʼ tiġi tradotta b’mod idjomatiku “tittrattahiex bħala seftura” jew “tagħmilhiex skjava.” Raġel miżżewweġ li jkun tirann​—fil-​privat jew fil-​pubbliku​—żgur li m’huwiex juri li jgħożż lil martu. Jekk jittratta lil martu b’mod aħrax, hu jistaʼ jeffettwa r-​relazzjoni tiegħu m’Alla. L-​appostlu Pietru kiteb lill-​irġiel miżżewġin: “Komplu għammru man-​nisa tagħkom skond l-​għarfien, billi tonoraw lill-​mara bħala reċipjent iktar dgħajjef, ladarba intom ukoll werrieta magħhom tal-​favur mhux mistħoqq tal-​ħajja, sabiex ma jkunx hemm tfixkil għat-​talb tagħkom.”c​—1 Pietru 3:7.

12. X’jistaʼ jitgħallem raġel Kristjan miżżewweġ mill-​mod kif Ġesù ttratta lill-​kongregazzjoni Kristjana?

¹² Qatt m’għandek taħseb li l-​imħabba taʼ martek għalik hija awtomatika. Żguraha li int dejjem tibqaʼ tħobbha. Ġesù ħalla eżempju għall-​irġiel Kristjani miżżewġin bil-​mod kif ittratta lill-​kongregazzjoni Kristjana. Hu kien ġentili, qalbu tajba, u lest li jaħfer​—anki meta s-​segwaċi tiegħu wrew kwalitajiet negattivi għal darba wara l-​oħra. Għalhekk, Ġesù setaʼ jgħid lil oħrajn: “Ejjew għandi, . . . għax jien ġwejjed u umli f’qalbi, u intom issibu serħan għal ruħkom.” (Mattew 11:​28, 29) Biex jimita lil Ġesù, raġel Kristjan jittratta lil martu bl-​istess mod li Ġesù ttratta lill-​kongregazzjoni. Raġel li tassew jgħożż lil martu, billi juriha dan bi kliemu u bl-​azzjonijiet tiegħu, se jkun sors taʼ serħan għaliha.

Nisa Miżżewġin li Jgħixu Skond il-​Prinċipji Bibliċi

13. Liema prinċipji fiha l-​Bibbja li jistgħu jgħinu lin-​nisa miżżewġin?

¹³ Il-​Bibbja fiha wkoll prinċipji Bibliċi li jistgħu jgħinu lin-​nisa miżżewġin. Efesin 5:​22-​24, 33 jgħid: “In-​nisa ħa jkunu sottomessi lejn żwieġhom bħallikieku lejn il-​Mulej, għax ir-​raġel hu l-​kap taʼ martu bħalma l-​Kristu wkoll hu l-​kap tal-​kongregazzjoni, billi hu s-​salvatur taʼ dan il-​ġisem. Fil-​fatt, bħalma l-​kongregazzjoni hi sottomessa lejn il-​Kristu, hekk ukoll in-​nisa għandhom ikunu sottomessi lejn żwieġhom f’kollox. . . . Il-​mara għandu jkollha rispett profond lejn żewġha.”

14. Għala l-​prinċipju Skritturali dwar is-​sottomissjoni ma jbaxxix lin-​nisa?

¹⁴ Innota l-​enfasi li Pawlu għamel fuq is-​sottomissjoni u r-​rispett. Il-​mara tiġi mfakkra biex tissottometti ruħha lejn żewġha. Dan hu fi qbil maʼ l-​arranġament t’Alla. Kull ħlejqa ħajja fis-​sema u fl-​art hija sottomessa lejn xi ħadd. Anki Ġesù hu sottomess lejn Alla Ġeħova. (1 Korintin 11:3) M’għandniex xi ngħidu, raġel li jeżerċita l-​istat taʼ kap kif suppost se jagħmilha iktar faċli għal martu biex tibqaʼ sottomessa.

15. X’inhuma xi ftit mill-​pariri li nsibu fil-​Bibbja għan-​nisa miżżewġin?

¹⁵ Pawlu qal ukoll li mara miżżewġa “għandu jkollha rispett profond lejn żewġha.” Mara Kristjana miżżewġa għandu jkollha “spirtu kwiet u ġwejjed,” u mhux tisfida lil żewġha b’mod arroganti jew taqbad triq indipendenti. (1 Pietru 3:4) Mara devota lejn Alla taħdem iebes għall-​ġid taʼ darha u ġġib unur lill-​kap tagħha. (Titu 2:​4, 5) Hi se tistinka biex titkellem tajjeb dwar żewġha, u għalhekk ma tagħmel xejn biex iġġiegħel lil oħrajn jonqsuh mir-​rispett. Ukoll, hi se taħdem iebes biex id-​deċiżjonijiet tiegħu jirnexxu.​—Proverbji 14:1.

16. In-​nisa Kristjani miżżewġin x’jistgħu jitgħallmu mill-​eżempji taʼ Sara u Rebekka?

¹⁶ Il-​fatt li mara Kristjana jkollha spirtu kwiet u ġwejjed ma jfissirx li m’għandhiex opinjonijiet jew li dak li taħseb m’huwiex importanti. Nisa li kienu devoti lejn Alla fil-​qedem, bħal Sara u Rebekka, ħadu l-​inizjattiva biex jesprimu t-​tħassib tagħhom dwar xi kwistjonijiet, u dak li hemm miktub fil-​Bibbja jurina li Ġeħova approva l-​azzjonijiet tagħhom. (Ġenesi 21:​8-​12; 27:46–28:4) In-​nisa Kristjani miżżewġin ukoll jistgħu jesprimu s-​sentimenti tagħhom. Madankollu, dan għandhom jagħmluh b’konsiderazzjoni, mhux b’ton li jbaxxi lil oħrajn. X’aktarx li se jsibu li żwieġhom se jwieġbu b’mod iktar favorevoli għall-​opinjonijiet tagħhom.

L-​Irwol taʼ l-​Impenn

17, 18. Liema huma xi ftit mill-​modi kif l-​irġiel u n-​nisa miżżewġin jistgħu jirreżistu l-​attentati taʼ Satana biex ikisser ir-​rabta taż-​żwieġ?

¹⁷ Iż-​żwieġ huwa impenn dejjiemi. Għalhekk kemm l-​irġiel u kemm in-​nisa miżżewġin għandu jkollhom xewqa ġenwina li jaħdmu biex iż-​żwieġ tagħhom jirnexxi. Nuqqas taʼ komunikazzjoni onesta tistaʼ ġġiegħel il-​problemi jikbru u jiggravaw. Ħafna drabi, l-​imseħbin fiż-​żwieġ ma jibqgħux jikkomunikaw meta jqumu l-​problemi, u b’hekk jibdew jistmerru lil xulxin. Xi mseħbin saħansitra jfittxu mod kif itemmu r-​relazzjoni, forsi billi jiżviluppaw interess romantiku barra ż-​żwieġ. Ġesù wissa: “Kulmin jibqaʼ jħares lejn mara biex jixtieqha jkun diġà għamel adulterju magħha f’qalbu.”​—Mattew 5:​28.

¹⁸ L-​appostlu Pawlu ta l-​parir lill-​Kristjani kollha, inkluż il-​Kristjani miżżewġin: “Inkorlaw, iżda tidinbux; tħallux ix-​xemx tinżel waqt li tkunu għadkom inkorlati, u tagħtux wisaʼ lix-​Xitan.” (Efesin 4:​26, 27) L-​akbar għadu tagħna, Satana, jipprova jieħu vantaġġ mid-​differenzi li jistgħu jinqalgħu bejn il-​Kristjani. Tħallihx jirnexxi! Meta jinqalgħu l-​problemi, fittex u ara x’tgħid il-​Bibbja dwar kif jaħsibha Ġeħova billi tuża pubblikazzjonijiet ibbażati fuq il-​Bibbja. Iddiskuti d-​differenzi bil-​kalma u bis-​sinċerità. Ġib l-​azzjonijiet tiegħek fi qbil maʼ dak li taf dwar il-​livelli taʼ Ġeħova. (Ġakbu 1:​22-​25) Fiż-​żwieġ tagħkom, kunu determinati li tkomplu mexjin m’Alla bħala koppja, u tħallu lil ħadd jew xejn jifred dak li hu għaqqad flimkien!​—Mikea 6:8.

[Noti taʼ taħt]

Tiftakar Int?

• Għala anki ż-​żwiġijiet Kristjani jistgħu jiffaċċjaw il-​problemi?

• Raġel kif jistaʼ jipprovdi għal martu u juriha li jgħożżha?

• X’tistaʼ tagħmel mara biex turi li għandha rispett profond lejn żewġha?

• Raġel u mara miżżewġin kif jistgħu jsaħħu l-​impenn taʼ bejniethom?

[Stampa f’paġna 20]

Raġel miżżewweġ għandu jkun jaf jipprovdi għal martu, mhux biss materjalment imma wkoll spiritwalment

[Stampa f’paġna 21]

Raġel li jgħożż lil martu huwa sors taʼ serħan għaliha

[Stampa f’paġna 23]

In-​nisa Kristjani miżżewġin jesprimu s-​sentimenti tagħhom bir-​rispett