Aqdi lil Jehovah Lealment

“ Maʼ min hu leali int [Jehovah] se taġixxi bil-​lealtà.”−2 SAMWEL 22:26.

1. Jehovah kif jaġixxi maʼ dawk leali lejh?

JEHOVAH ma jistax jitħallas lura taʼ dak kollu li jagħmel għall-​poplu tiegħu. (Salm 116:12) Kemm huma tal-​għaġeb il-​għotjiet spiritwali u materjali tiegħu u l-​ħniena tenera tiegħu! Is-​Sultan David taʼ Iżrael tal-​qedem kien jaf li Alla jaġixxi wkoll bil-​lealtà maʼ dawk leali lejh. David qal dan f’għanja li kkompona “dak in-​nhar li Jehovah kien ħelsu ’l barra mill-​pala tal-​għedewwa kollha tiegħu u ’l barra mill-​pala ta[s-Sultan] Sawl.”−2 Samwel 22:1.

2. Liema huma xi punti ppreżentati fil-​għanja taʼ David imniżżla fit-​2 Samwel kapitlu 22?

² David beda l-​għanja tiegħu (li hi parallel maʼ Salm 18) billi faħħar lil Jehovah bħala “Dak li jipprovdi l-​ħarba” bi tweġiba għat-​talb. (2 Samwel 22:2-7) Mit-​tempju tiegħu tas-​sema, Alla aġixxa biex jeħles lill-​qaddej leali tiegħu minn għedewwa setgħanin. (Versi 8-19) David b’hekk kien ippremjat talli segwa korsa retta u talli żamm il-​mogħdijiet taʼ Jehovah. (Versi 20-27) Imbagħad ġew enumerati għemejjel magħmulin b’saħħa mogħtija minn Alla. (Versi 28-43) Fl-​aħħar, David semma ħelsien minn dawk li jsibu d-​difetti fid-​dar u minn għedewwa barra ’l pajjiż u iżża ħajr lil Jehovah bħala “Dak li qiegħed jagħmel atti kbar taʼ salvazzjoni għas-​sultan tiegħu u qiegħed jeżerċita qalb tajba bl-​imħabba mal-​wieħed midluk tiegħu.” (Versi 44-51) Jehovah jistaʼ jeħles lilna wkoll jekk insegwu korsa retta u nistrieħu fuqu għas-​saħħa.

Xi Jfisser li Tkun Leali

3. Minn ħarsa Skritturali, xi jfisser li tkun leali?

³ Il-​għanja taʼ David taʼ ħelsien tagħtina din l-​assigurazzjoni taʼ faraġ: “ Maʼ min hu leali int [Jehovah] se taġixxi bil-​lealtà.” (2 Samwel 22:26) Huwa l-​aġġettiv Ebrajk cha·sidhʹ li jissinjifika “min hu leali,” jew wieħed taʼ qalb tajba bl-​imħabba.” (Salm 18:25, nota taʼ taħt) In-​nom cheʹsedh fih il-​ħsieb taʼ qalb tajba li b’imħabba tintrabat maʼ xi ħaġa sakemm il-​għan tagħha f’konnessjoni magħha jitwettaq. Jehovah jesprimi dik ix-​xorta taʼ qalb tajba lill-​qaddejja tiegħu, saħansitra bħalma huma jesprimuha għalih. Din il-​lealtà qaddisa u taʼ tjieba tiġi tradotta “qalb tajba bl-​imħabba” u “imħabba leali.” (Ġenesi 20:13; 21:23) Fl-​Iskrittura Griega, “lealtà” ġġorr l-​idea taʼ qdusija u reverenza, espressa fin-​nom ho·si·oʹtes u l-​aġġettiv hoʹsi·os. Din il-​lealtà tinkludi fedeltà u devozzjoni u tfisser li tkun devot u li twettaq bl-​attenzjoni d-​doveri kollha lejn Alla. Li tkun leali lejn Jehovah ifisser li taqbad miegħu b’devozzjoni tant qawwija li hija taġixxi bħal kolla b’saħħitha.

4. Kif inhi murija l-​lealtà taʼ Jehovah?

⁴ Il-​lealtà taʼ Jehovah innifsu tintwera f’ħafna modi. Per eżempju, hu jieħu azzjoni ġudizzjarja kontra dawk mill-​agħar minħabba mħabba leali għall-​poplu tiegħu u lealtà lejn il-​ġustizzja u t-​tjieba. (Rivelazzjoni 15:3, 4; 16:5) Lealtà għall-​patt tiegħu maʼ Abraham qanqlitu biex juri sabar fit-​tul lejn l-​Iżraeliti. (2 Slaten 13:23) Dawk leali lejn Alla jistgħu jkunu żguri mill-​għajnuna tiegħu sat-​tmiem tal-​korsa leali tagħhom u jistgħu jibqgħu ċerti li hu se jiftakar fihom. (Salm 37:27, 28; 97:10) Ġesù kien imsaħħaħ bil-​għarfien li bħala l-​“wieħed leali” ewlieni t’Alla, ruħu ma kinetx se titħalla f’Xeol.—Salm 16:10; Atti 2:25, 27.

5. Ladarba Jehovah huwa leali, hu x’jirrikjedi mill-​qaddejja tiegħu, u x’mistoqsija se tingħata konsiderazzjoni?

⁵ Ladarba Alla Jehovah huwa leali, hu jirrikjedi lealtà mill-​qaddejja tiegħu. (Efesin 4:24) Per eżempju, irġiel iridu jkunu leali biex jikkwalifikaw għal ħatra bħala anzjani tal-​kongregazzjoni. (Titus 1:8) Liema fatturi għandhom iqanqlu lin-​nies taʼ Jehovah biex jaqduh bil-​lealtà?

Apprezzament għall-​Affarijiet li Tgħallimna

6. Kif għandna nħossuna dwar l-​affarijiet Skritturali li tgħallimna, u x’għandna niftakru dwar dan il-​għarfien?

⁶ Gratitudni għall-​affarijiet Skritturali li tgħallimna għandha tqanqalna biex naqdu lil Jehovah bil-​lealtà. L-​appostlu Pawlu ħeġġeġ lil Timotew: “Kompli fl-​affarijiet li tgħallimt u ġejt ipperswadut biex temmen, billi taf mingħand liema persuni tgħallimthom u li mill-​infanzja ilek taf il-​kitbiet qaddisa, li jistgħu jagħmluk għaref għas-​salvazzjoni permezz tal-​fidi f’konnessjoni maʼ Kristu Ġesù.” (2 Timotew 3:14, 15) Ftakar li dak il-​għarfien ġie mingħand Alla permezz tal-​“irsir fidil u diskret.”−Mattew 24:45-47.

7. L-​anzjani kif għandhom iħossuhom dwar l-​ikel spiritwali pprovdut minn Alla permezz tal-​irsir fidil?

⁷ B’mod speċjali għandhom l-​anzjani maħturin japprezzaw l-​ikel spiritwali nutrijenti pprovdut mingħand Alla permezz tal-​irsir fidil. Ftit tas-​snin ilu xi ftit anzjani ma kellhomx dan l-​apprezzament. Wieħed osservatur innota li dawn l-​irġiel “kienu jikkritikaw l-​artikli taʼ The Watchtower, billi ma ridux jaċċettawh bħala . . . il-​mezz taʼ verità t’Alla, billi dejjem jipprovaw jinfluwenzaw oħrajn fil-​mod taʼ kif jaħsbuha huma.” Madankollu, anzjani leali qatt ma jipprovaw jinfluwenzaw lil oħrajn biex jirriffjutaw kwalunkwe ikel spiritwali pprovdut minn Alla permezz tal-​irsir fidil.

8. Xi ngħidu jekk ma napprezzawx bis-​sħiħ xi punt Skritturali ppreżentat mill-​irsir fidil u diskret?

⁸ Bħala x-​Xhieda ddedikati taʼ Jehovah, ilkoll kemm aħna rridu nkunu leali lejh u lejn l-​organizzazzjoni tiegħu. Qatt m’għandna saħansitra nikkontemplaw li nduru ’l hemm mid-​dawl tal-​għaġeb t’Alla, billi nsegwu korsa apostata li tistaʼ twassal għal mewt spiritwali issa u eventwalment għall-​qerda. (Ġeremija 17:13) Imma xi ngħidu jekk huwa iebes għalina li naċċettaw jew napprezzaw bis-​sħiħ xi punt Skritturali ppreżentat mill-​irsir fidil? Allura ejjew bl-​umiltà nirrikonoxxu minfejn tgħallimna l-​verità u nitolbu għall-​għerf biex nittrattaw maʼ din il-​prova sakemm tiġi fit-​tmiem tagħha b’xi kjarifika ppubblikata dwar il-​kwistjoni.—Ġakbu 1:5-8.

Apprezza l-​Fratellanza Kristjana

9. L-​1 Ġwann 1:3-6 kif juri li l-​Kristjani jridu jkollhom spirtu taʼ sħubija?

⁹ Apprezzament mill-​qalb għall-​ispirtu taʼ sħubija li jeżisti ġewwa l-​fratellanza Kristjana tagħna jipprovdi inċentiva oħra biex taqdi lil Jehovah bil-​lealtà. Fil-​fatt, ir-​relazzjoni tagħna m’Alla u maʼ Kristu ma tistax tkun b’saħħitha spiritwalment mingħajr dan l-​ispirtu. L-​appostlu Ġwanni qal lill-​Kristjani midlukin: “Dak li rajna u smajna qegħdin aħna nirrapportaw ukoll lilkom, biex intom ukoll jistaʼ jkollkom sehem [“sħubija,” Diaglott] magħna. Iktar minn hekk, dan is-​sehem tagħna hu mal-​Missier u maʼ Ibnu Ġesù Kristu. . . . Jekk nagħmlu l-​istqarrija: ‘Għandna sehem miegħu,’ u madankollu nibqgħu mexjin fid-​dlam, qegħdin nigdbu u m’aħniex nipprattikaw il-​verità.” (1 Ġwann 1:3-6) Dan il-​prinċipju japplika għall-​Kristjani kollha, kemm jekk it-​tama tagħhom hi għas-​sema kemm jekk hi għall-​art.

10. Għalkemm Evodja u Sintike milli jidher kellhom diffikultà f’li jsolvu xi problema persunali, Pawlu kif kien iħares lejn dawn in-​nisa?

¹⁰ Huwa meħtieġ sforz biex jinżamm spirtu taʼ sħubija. Per eżempju, in-​nisa Kristjani Evodja u Sintike milli jidher sabuha diffiċli li jsolvu xi problema bejniethom. Pawlu b’hekk ħeġgiġhom “biex ikunu tal-​istess fehma fil-​Mulej.” Hu żied: “Nitlob lilek ukoll, sieħeb ġenwin fil-​madmad, ibqaʼ għin lil dawn in-​nisa li tħabtu ġenb maʼ ġenb miegħi fl-​aħbar tajba flimkien maʼ Klement kif ukoll mal-​bqija tal-​ħaddiema sħabi, li isimhom qiegħed fil-​ktieb tal-​ħajja.” (Filippin 4:2, 3) Dawk in-​nisa taʼ tjieba kienu ġġieldu spalla maʼ spalla maʼ Pawlu u oħrajn “fl-​aħbar tajba,” u hu kien ċert li huma kienu fost dawk ‘li l-​ismijiet tagħhom kienu fil-​ktieb tal-​ħajja.’

11. Jekk Kristjan leali jiffaċċja xi problema spiritwali, x’ikun xieraq li jżomm f’moħħu?

¹¹ Il-​Kristjani ma jilbsux xi tabella biex juru x’kienu pprivileġġjati li jagħmlu fl-​organizzazzjoni taʼ Jehovah u kif qdewh bil-​lealtà. Jekk għandhom xi problema spiritwali, kemm ikun nieqes mill-​imħabba li tinjora s-​snin tagħhom taʼ servizz leali lejn Jehovah! Wisq probabbli, il-​wieħed imsejjaħ “sieħeb ġenwin fil-​madmad” kien ħu leali li kien ħerqan biex igħin lil oħrajn. Jekk int anzjan, int “sieħeb ġenwin fil-​madmad,” li lest biex tagħti l-​għajnuna b’mod taʼ mogħdrija? Jalla lkoll kemm aħna nikkunsidraw it-​tajjeb li jsir minn kredenti sħabna, saħansitra bħalma jagħmel Alla, u b’imħabba ngħinuhom iġorru t-​tagħbijiet tagħhom.—Galatin 6:2; Ebrej 6:10.

Imkien Iżjed fejn Immorru

12. Meta l-​istqarrijiet taʼ Ġesù ġagħlu lil ‘ħafna dixxipli li jmorru lura lejn l-​affarijiet li ħallew warajhom,’ Pietru x’pożizzjoni ħa?

¹² Aħna se niġu mħeġġin biex naqdu lil Jehovah bil-​lealtà mal-​organizzazzjoni tiegħu jekk niftakru li m’hemm imkien iżjed fejn immorru għall-​ħajja taʼ dejjem. Meta l-​istqarrijiet taʼ Ġesù ġagħlu lil ‘ħafna dixxipli biex imorru lura lejn l-​affarijiet li ħallew warajhom,’ hu staqsa lill-​appostli: “Ma tridux tmorru intom ukoll, hux?” Pietru wieġeb: “Mulej, għand min se mmorru? Int għandek qwiel taʼ ħajja taʼ dejjem; u aħna emminna u sirna nafu li inti l-​Qaddis t’Alla.”−Ġwann 6:66-69.

13, 14. (a) Il-​Ġudaiżmu tal-​ewwel seklu għala ma kellux il-​favur t’Alla? (b) Wieħed li ilu Xhud taʼ Jehovah x’qal dwar l-​organizzazzjoni viżibbli t’Alla?

¹³ “Qwiel taʼ ħajja taʼ dejjem” ma kinux jinsabu fil-​Ġudaiżmu tal-​ewwel seklu E.K. Id-​dnub ewlieni tiegħu kien li ċaħad lil Ġesù bħala l-​Messija. Fl-​ebda waħda mill-​għamliet tiegħu ma kien il-​Ġudaiżmu bbażat esklussivament fuq l-​Iskrittura Ebrajka. Is-​Sadduċej kienu jiċħdu l-​eżistenza tal-​anġli u ma kinux jemmnu fl-​irxoxt. Għalkemm il-​Fariżej ma kinux jaqblu magħhom f’dawn l-​aspetti, huma b’mod midneb għamlu l-​Kelma t’Alla invalida minħabba t-​tradizzjonijiet mhux skritturali tagħhom. (Mattew 15:1-11; Atti 23:6-9) Dawn it-​tradizzjonijiet jassru lil-​Lhud u għamluha diffiċli għal ħafna biex jaċċettaw lil Ġesù Kristu. (Kolossin 2:8) Ħeġġa għat-​‘tradizzjonijiet taʼ missirijietu’ ġagħlet lil Sawlu (Pawlu) meta kien għadu fl-​injoranza li jkun persekutur feroċi tas-​segwaċi taʼ Kristu.—Galatin 1:13, 14, 23.

¹⁴ Il-​Ġudaiżmu ma kellux il-​favur t’Alla, imma Jehovah bierek l-​organizzazzjoni ffurmata mis-​segwaċi taʼ Ibnu—‘poplu żeluż għal xogħlijiet mill-​aħjar.’ (Titus 2:14) Dik l-​organizzazzjoni għadha teżisti, u dwarha wieħed li ilu Xhud taʼ Jehovah qal: “Jekk kien hawn xi ħaġa li kienet l-​iktar importanti għalija, din kienet li nżomm qrib tal-​organizzazzjoni viżibbli taʼ Jehovah. L-​esperjenza bikrija tiegħi għallmitni kemm mhux għaqli li tistrieħ fuq raġunar uman. Ladarba kont determinat fuq dak il-​punt, iddeċidejt li nibqaʼ mal-​organizzazzjoni fidila. B’liema mod ieħor jistaʼ wieħed jikseb il-​favur u l-​barka taʼ Jehovah?” M’hemm imkien iżjed fejn nistgħu mmorru għall-​favur divin u l-​ħajja taʼ dejjem.

15. Għala għandna nikkoperaw mal-​organizzazzjoni viżibbli taʼ Jehovah u maʼ dawk li jerfgħu r-​responsabbiltà fiha?

¹⁵ Qlubna għandhom iqanqluna biex nikkoperaw mal-​organizzazzjoni taʼ Jehovah għaliex nafu li hija biss diretta mill-​ispirtu tiegħu u qiegħda tgħarraf lil ismu u l-​għanijiet tiegħu. M’għandniex xi ngħidu, dawk li jerfgħu r-​responsabbiltà fiha huma imperfetti. (Rumani 5:12) Imma “r-​rabja taʼ Jehovah saret sħuna” kontra Aronne u Mirjam meta huma kkritikaw lil Mosè u nsew li hu, mhux huma, kien fdat b’responsabbiltà mogħtija minn Alla. (Numri 12:7-9) Illum, Kristjani leali jikkoperaw maʼ “dawk li qegħdin jieħdu t-​tmexxija” għaliex dak hu li Jehovah jirrikjedi. (Ebrej 13:7, 17) Evidenza tal-​lealtà tagħna tinkludi li nattendu l-​laqgħat regolarment u li nikkummentaw biex ‘inqanqlu lill-​oħrajn għall-​imħabba u xogħlijiet mill-​aħjar.’—Ebrej 10:24, 25.

Kun Edifikanti

16. Xewqa li nagħmlu liema ħaġa għal oħrajn għandha tqanqalna wkoll biex naqdu lil Jehovah?

¹⁶ Xewqa li nkunu edifikanti għal oħrajn għandha wkoll tqanqalna biex naqdu lil Jehovah bil-​lealtà. Pawlu kiteb: “Il-​għarfien ineffaħ, imma l-​imħabba tibni.” (1 Korintin 8:1) Ladarba ċertu tip taʼ għarfien neffaħ lil min kien jippossjedih, Pawlu żgur li ried ifisser li l-​imħabba tibni wkoll lil dawk li juru dik il-​kwalità. Ktieb mill-​Professuri Weiss u English igħid: “Il-​persuna li għandha l-​kapaċità li tħobb hi normalment maħbuba hija wkoll. Il-​kapaċità li testendi rieda tajba u konsiderazzjoni f’kull aspett tal-​ħajja . . . għandha effett kostruttiv li jidher fuq il-​persuna li testendi dawn is-​sentimenti kif ukoll fuq il-​persuna li tirċevihom u b’hekk iġġib pjaċir lilhom it-​tnejn.” Billi nuru l-​imħabba, aħna nibnu lill-​oħrajn u lilna nfusna, kif inhu mplikat mill-​kliem taʼ Ġesù: “Hemm iktar ferħ f’li tagħti milli hemm f’li tirċievi.”−Atti 20:35.

17. L-​imħabba kif tibni, u x’se żżommna milli nagħmlu?

¹⁷ Fl-​1 Korintin 8:1, Pawlu uża l-​kelma Griega a·gaʹpe, li tissinjifika mħabba taʼ prinċipju. Hija tibni, għaliex hija ssofri fit-​tul u qalbha tajba, tissaporti u ġġarrab kollox, u qatt ma tonqos. Din l-​imħabba tkeċċi emozzjonijiet taʼ ħsara, bħalma huma l-​kburija u l-​għira. (1 Korintin 13:4-8) Din l-​imħabba se żżommna lura milli ngergru kontra ħutna, li huma imperfetti bħalna. Se żżommna lura milli nsiru bħall-​“irġiel taʼ mingħajr Alla li “ddeffsu” fost il-​Kristjani veri tal-​ewwel seklu. Dawn l-​irġiel kienu “ma jqisux is-​setgħat u jitkellmu b’abbuż dwar il-​glorjużi,” billi milli jidher immalafamaw lil xi individwi bħal indokraturi Kristjani midlukin li kellhom ċerta glorja mogħtija lilhom. (Ġuda 3, 4, 8) B’lealtà lejn Jehovah, ejjew ma nċedu qatt għat-​tentazzjoni li nagħmlu xi ħaġa simili.

Irreżisti lix-​Xitan!

18. Satana x’jixtieq jagħmel lin-​nies taʼ Jehovah, imma għala ma jistax jagħmel hekk?

¹⁸ Għarfien li Satana jrid jeqred l-​unità tagħna bħala l-​poplu t’Alla għandu jżid id-​determinazzjoni tagħna biex naqdu lil Jehovah bil-​lealtà. Satana saħansitra jixtieq li jeħles mill-​poplu kollu t’Alla, u l-​qaddejja tax-​Xitan li għandu fuq l-​art xi drabi joqtlu lill-​adoraturi veri. Imma Alla mhux se jħalli lil Satana li jeqridhom kollha. Ġesù miet biex “[i]ġib fix-​xejn lil dak li għandu l-​mezzi biex jikkaġuna l-​mewt, jiġifieri, ix-​Xitan.” (Ebrej 2:14) B’mod speċjali l-​qasam taʼ Satana biex jeżerċita poter ġie llimitat minn mindu ntefaʼ ’l barra mis-​sema wara li Kristu sar Sultan fl-​1914. U fiż-​żmien xieraq taʼ Jehovah, Ġesù se jeqred lil Satana u lill-​organizzazzjoni tiegħu.

19. (a) Liema twissija dwar l-​isforzi taʼ Satana tat din ir-​rivista xi snin ilu? (b) Biex nevitaw in-​nasbiet taʼ Satana, x’attenzjoni rridu neżerċitaw meta nittrattaw maʼ kredenti sħabna?

¹⁹ Din ir-​rivista darba wissiet: “Jekk Satana, ix-​xitan, jistaʼ joħloq diżordni fost il-​poplu t’Alla, jistaʼ jġagħalhom jitlewmu u jiġġieldu bejniethom, jew juru u jiżżviluppaw dispożizzjoni egoista li twassal għall-​qerda tal-​imħabba għall-​aħwa, hu b’hekk jirnexxilu jiblagħhom.” (The Watch Tower, 1 taʼ Mejju, 1921, paġna 134) Ejjew ma nħallux lix-​Xitan jeqred l-​unità tagħna, forsi billi jħajjarna nikkalunnjaw, jew niġġieldu maʼ xulxin. (Levitiku 19:16) Jalla Satana qatt ma jegħlibna b’tali mod li nagħmlu ħsara personalment lil dawk li jaqdu lil Jehovah lealment jew nagħmlulhom il-​ħajja iżjed diffiċli. (Qabbel 2 Korintin 2:10, 11.) Minflok, ejjew napplikaw il-​kliem taʼ Pietru: “Ibqgħu f’sensikom, kunu għassa. L-​avversarju tagħkom, ix-​Xitan, idur bħal iljun igħajjat, ifittex biex jiblaʼ lil xi ħadd. Imma ħudu l-​waqfa tagħkom kontra tiegħu, solidi fil-​fidi.” (1 Pietru 5:8, 9) Billi nieħdu waqfa soda kontra Satana, aħna nistgħu nżommu l-​unità mbierka tagħna bħala l-​poplu taʼ Jehovah.—Salm 133:l-3.

Strieħ fuq Alla bit-​Talb

20, 21. Serħan fuq Jehovah bit-​talb kif inhu marbut maʼ li naqduh bil-​lealtà?

²⁰ Serħan fuq Alla bit-​talb se jgħinna biex inkomplu naqdu lil Jehovah bil-​lealtà. Meta naraw li ħu qed jismaʼ t-​talb tagħna, ninġibdu eqreb lejh. Serħan fuq Alla Jehovah bit-​talb ġie mħeġġeġ meta l-​appostlu Pawlu kiteb: “Nixtieq li f’kull post l-​irġiel ikomplu bit-​talb, billi jerfgħu jdejn leali, apparti mill-​korla u t-​tħaqqiq.” (1 Timotew 2:8) Per eżempju, kemm hu importanti li anzjani jistrieħu fuq Alla bit-​talb! Turija bħal din taʼ lealtà lejn Jehovah meta jiltaqgħu biex jiddiskutu affarijiet tal-​kongregazzjoni se tgħin biex tevita dibattiti bla tmiem u possibilment xi tfaqqiegħ taʼ korla.

²¹ Serħan fuq Alla Jehovah bit-​talb igħinna biex inwettqu privileġġi fis-​servizz tiegħu. Wieħed raġel li kien qeda lil Jehovah bil-​lealtà għal għaxriet taʼ snin setaʼ jgħid: “Li aħna naċċettaw mill-​qalb kwalunkwe inkarigu mogħti lilna fl-​organizzazzjoni t’Alla mad-​dinja kollha, u li nibqgħu fuq xogħolna, bla ma nitħarrku, iġib it-​tbissima taʼ approvazzjoni t’Alla fuq l-​isforzi ħerqana tagħna. Saħansitra jekk ix-​xogħol li ningħataw jistaʼ jidher li hu servili, taʼ spiss jirriżulta li jekk dan ma jsirx bil-​fedeltà ħafna servizzi vitali oħrajn ma jkunux jistgħu jsiru. B’hekk jekk aħna umlin u interessati direttament f’li nigglorifikaw isem Jehovah u mhux tagħna, allura nistgħu nkunu żguri li dejjem se nkunu ‘sodi, ma nitħarrkux, dejjem għandna ħafna x’nagħmlu fix-​xogħol taʼ Jehovah.”—1 Korintin 15:58.

22. Il-​ħafna barkiet taʼ Jehovah kif għandhom jeffettwaw il-​lealtà tagħna?

²² Hu x’inhu li nagħmlu fis-​servizz taʼ Jehovah, m’għandniex xi ngħidu, ma nistgħux inħallsuh lura taʼ dak li jagħmel għalina. Kemm aħna fis-​sigurtà fl-​organizzazzjoni t’Alla, imdawrin b’dawk li huma l-​ħbieb tiegħu! (Ġakbu 2:23) Jehovah berikna b’unità li tiġi mill-​imħabba tal-​aħwa li tant għandha għeruq fil-​fond li Satana nnifsu ma jistax iqaċċatha. Ejjew għalhekk nibqgħu mal-​Missier leali tagħna tas-​sema u naħdmu flimkien bħala l-​poplu tiegħu. Issa u għall-​eternità kollha, ejjew naqdu lil Jehovah bil-​lealtà.

Kif Twieġeb Int?

◻ Xi jfisser li tkun leali?

◻ Liema huma xi fatturi li għandhom iqanqluna biex naqdu lil Jehovah bil-​lealtà?

◻ Għala għandna nirreżistu lix-​Xitan?

◻ It-​talb kif jistaʼ jgħinna biex inkunu qaddejja leali taʼJehovah?