“Ħares! Qed Nagħmel l-​Affarijiet Kollha Ġodda”

1-4. (a) F’liema fatturi mill-​istampa taʼ quddiem tixtieq ikollok sehem? (b) Liema prospett glorjuż qed jitqiegħed quddiemek hawn? (ċ) X’inhuma xi ftit mit-​testi tal-​Bibbja li jappoġġjaw tama bħal din?

ĦARES lejn in-​nies ferħana fuq il-​qoxra taʼ dan il-​ktejjeb. Tixtieq tkun wieħed minnhom? ‘U żgur,’ inti tgħid. Għax hawn naraw il-​paċi u l-​armonija mixtieqa mill-​bnedmin kollha. Nies taʼ kull razza​—is-​suwed, il-​bojod, is-​sofor—​qed jitħalltu bħala familja waħda. X’ferħ! X’għaqda! Ovvjament dawn in-​nies mhux qed jinkwetaw dwar xi splużjoni nukleari jew it-​theddida tat-​terroriżmu. M’hemmx ajruplani tal-​gwerra jfarrku l-​paċi tas-​sema fuq dan il-​park mill-​isbaħ. M’hemmx suldati, tankijiet, kanuni. Lanqas lembuba waħda m’hi meħtieġa biex iżżomm l-​ordni. Il-​gwerer u d-​delitti sempliċement ma jeżistux. U m’hemm ebda nuqqas taʼ djar, għax kulħadd għandu dar sabiħa li jistaʼ jsejħilha tiegħu.

² Ħares ftit lejn dawk it-​tfal! Il-​logħob tagħhom tieħu pjaċir tarah. X’annimali dawk biex tilgħab magħhom! Ebda gaġeġ m’huma meħtieġa f’dan il-​park, għax l-​annimali kollha qed igħixu fil-​paċi mal-​bnedmin u bejniethom. Saħansitra l-​iljun u l-​ħaruf saru ħbieb. Ara dawk l-​agħsafar ikkuluriti hekk kif jittajru ’l hawn u ’l hemm, u ismaʼ l-​kant sabiħ tagħhom jingħaqad mad-​daħq tat-​tfal f’li jimla l-​arja. Xejn gaġeġ? Le, għax kollox hu ħelsien u ferħ bla rażan f’dan il-​qasam. Xomm daqsxejn il-​fwieħa taʼ dawk il-​fjuri, ismaʼ l-​ġiri tax-​xmara, ħoss is-​sħana ħelwa tax-​xemx. O, kemm tixtieq idduq il-​frott f’dak il-​basket, għax hu l-​aħjar li l-​art tistaʼ tipproduċi, assolutament l-​aħjar, bħal kull ħaġa li tistaʼ tara u tgawdi f’dan il-​ġnien glorjuż bħal park.

³ ‘Iżda stenna,’ xi ħadd igħid, ‘fejn huma x-​xjuħ? M’għandhomx huma, ukoll, ikollhom sehem minn din is-​soċjetà ferħana?’ Attwalment, ix-​xjuħ qegħdin hemm, iżda qed jerġgħu jsiru żgħażagħ mill-​ġdid. F’dan il-​park ħadd ma jmut bix-​xjuħija. Iż-​żgħar issa jikbru lejn il-​maturità u ma jixjiħux. Kemm jekk taʼ 20 sena jew taʼ 200 sena, kull wieħed mill-​miljuni taʼ nies li jgħixu f’dan il-​park igawdi l-​fjur tal-​ħajja bħal żagħżugħ, f’saħħa perfetta. Miljuni, qed tgħid? Iva, miljuni, għax dan il-​park qed jinfirex mal-​art kollha. Se jkun ifur bil-​ħajja, bil-​paċi, u bis-​sbuħija sa truf l-​art, minn Fiji sal-​Andes, minn Hong Kong sal-​Mediterran. Għax l-​art kollha qed tiġi trasformata f’ġenna tal-​art. Se tkun Ġenna restawrata mal-​art kollha.

⁴ ‘Ma jitwemminx,’ qed tgħid? L-​ewwel, iżda, ikkonsidra l-​fatti bħala prova. Huwa possibbli għalik u għall-​familja tiegħek li ssalvaw meta tgħaddi din is-​sistema taʼ affarijiet preżenti kollha nkwiet u li tidħlu fil-​Ġenna rrappreżentata fuq il-​qoxra tagħna.a

Il-​Ktieb Li Jispjega Dwar Il-​Ġenna Tal-​Art

5. (a) Liema ktieb jispjega dawn l-​affarijiet? (b) B’liema modi huwa dan ktieb li jispikka?

⁵ Dawn l-​affarijiet glorjużi kollha, u ċ-​ċertezza tagħhom, huma spjegati fi ktieb, l-​aqwa ktieb li qatt inkiteb. Dan jissejjaħ il-​Bibbja. Huwa ktieb antik ferm, billi partijiet minnu nkitbu madwar 3,500 sena ilu. Fl-​istess ħin, huwa l-​iktar ktieb aġġornat f’li joffri parir għaqli u prattiku għall-​ħajja moderna tal-​lum. Il-​profeziji tiegħu jqajmu tama mill-​isbaħ għall-​futur. Huwa l-​akbar “best-seller” fl-​istorja kollha, b’aktar minn 2,000,000,000 kopja tal-​Bibbja kollha jew partijiet ewlenin minnha li tqassmu f’madwar 1,810 lingwi.

6. X’inhu li jiddistingwi l-​Bibbja minn kitbiet oħra meqjusin qaddisa?

⁶ L-​ebda ktieb sagru ieħor ma kellu distribuzzjoni hekk universali, u l-​biċċa l-​kbira m’humiex tant qodma. Il-​Koran tal-​Islam inkiteb anqas minn 1,400 sena ilu. Buddha u Konfuċju għexu madwar 2,500 sena ilu, u l-​kitbiet tagħhom ilhom minn dak iż-​żmien. L-​Iskrittura tax-​Xinto ġiet komposta fil-​forma preżenti tagħha anqas minn 1,200 sena ilu. Il-​Ktieb tal-​Mormoni għandu biss 160 sena. Ebda wieħed minn dawn il-​kotba qaddisa ma jeħodna lura b’mod eżatt fl-​istorja umana minn 6,000 sena ’l hawn, bħalma tagħmel il-​Bibbja. Biex nifhmu r-​reliġjon oriġinali, irridu għalhekk immorru fil-​Bibbja. Huwa l-​uniku ktieb b’messaġġ universali għall-​bnedmin kollha.

7. Nies li jaħsbu x’qalu dwar il-​Bibbja?

⁷ L-​għerf u s-​sbuħija tal-​messaġġ tal-​Bibbja ġew imfaħħrin minn nies li jaħsbu mad-​dinja kollha u minn kull sfond tal-​ħajja. Ix-​xjenzat famuż Sir Isaac Newton, li skopra l-​liġi tal-​gravità, qal: “Ebda xjenza m’hi ppruvata aħjar milli hi l-​Bibbja.” Patrick Henry, il-​mexxej revoluzzjonarju Amerikan li baqaʼ famuż għall-​kliem “Agħtini l-​libertà, jew agħtini l-​mewt,” ukoll iddikjara: “Il-​Bibbja tiswa daqs il-​kotba l-​oħra kollha li qatt ġew stampati.” Anki x-​xwejjaħ għaref Ħindu Mohandas K. Gandhi darba qal lill-​viċirè Ingliż tal-​Indja: “Meta pajjiżek u pajjiżi jingħaqdu flimkien fuq it-​tagħlim mogħti minn Kristu fil-​Priedka tiegħu tal-​Muntanja, se nkunu solvejna l-​problemi, mhux biss tal-​pajjiżi tagħna iżda wkoll dawk tad-​dinja kollha.” Gandhi kien qed jitkellem dwar Mattew kapitli 5 sa 7 fil-​Bibbja. Aqra dawn il-​kapitli int stess u ara jekk ma tħossokx imqanqal bil-​messaġġ qawwi li fihom.

Il-​Bibbja​—Ktieb Orjentali

8, 9. (a) Għala huwa ħażin li ssejjaħ il-​Bibbja ktieb tal-​Punent? (b) Il-​Bibbja kif inkitbet, u fuq liema perijodu taʼ żmien? (ċ) Il-​Bibbja għala tistaʼ tissejjaħ librerija? (d) Kemm kien hemm irġiel li ntużaw biex jiktbu l-​Bibbja? (e) Liema xiehda taw xi wħud minn dawn l-​irġiel dwar is-​Sors tal-​Bibbja?

⁸ Kuntrarju għal dak li jaħsbu ħafna nies, il-​Bibbja mhix xi prodott taċ-​ċivilizzazzjoni tal-​Punent u lanqas ma tigglorifika lil dik iċ-​ċiviltà. Kważi l-​Bibbja kollha kemm hi nkitbet f’pajjiżi Orjentali. L-​irġiel li kitbuha kienu kollha Orjentali. Elf sena qabel Buddha, fis-​sena 1513 Q.E.K., Mosè, li għex fil-​Lvant Nofsani, ġie mnebbaħ minn Alla biex jikteb l-​ewwel ktieb tal-​Bibbja, msejjaħ il-​Ġenesi. Minn dan il-​bidu, il-​Bibbja segwiet tema waħda armonjuża li baqgħet l-​istess sal-​aħħar ktieb tar-​Rivelazzjoni. Il-​Bibbja ġiet kompluta fis-​sena 98 E.K., xi 600 sena wara Buddha. Kont taf li l-​Bibbja hija magħmula minn 66 ktieb differenti? Iva, il-​Bibbja hija librerija fiha nfisha!

⁹ B’hekk, tul perijodu taʼ 1,600 minn żmien Mosè ’il quddiem, madwar 40 raġel kellhom sehem f’li jiktbu r-​rekord armonjuż tal-​Bibbja. Dawn jagħtu xiehda li l-​kitbiet tagħhom kienu spirati minn qawwa li hi ferm ogħla minn dik tal-​bniedem li jmut. L-​appostlu Kristjan Pawlu kiteb: “L-​Iskrittura kollha hija mnebbħa minn Alla u tiswa għat-​tagħlim, għat-​twiddib, biex tiddritta l-​affarijiet, biex tiddixxiplina fit-​tjieba.”b (2 Timotew 3:16) U l-​appostlu Pietru spjega: “Ebda profezija tal-​Iskrittura ma toħroġ minn xi interpretazzjoni privata. Għax il-​profezija f’ebda żmien ma nġiebet bir-​rieda tal-​bniedem, iżda nies tkellmu minn Alla waqt li kienu mqanqlin mill-​ispirtu mqaddes.”​—2 Pietru 1:20, 21; 2 Samwel 23:2; Luqa 1:70.

10. (a) Il-​Bibbja kif waslet sa żmienna? (b) Għala nistgħu nkunu żguri li għad għandna t-​test oriġinali tal-​Bibbja spirata?

¹⁰ Tassew tal-​għaġeb, ukoll, hu l-​mod li bih il-​Bibbja waslet sa żmienna. Għal eluf taʼ snin, sakemm ġie vvintat l-​istampar madwar 500 sena ilu, kopji tal-​Bibbja kellhom isiru bl-​idejn. L-​ebda xogħol letterarju taʼ żmien l-​antik ma ġie kkopjat u kkopjat mill-​ġdid b’tant diliġenza. Ġie kkopjat għal darba wara l-​oħra, iżda dejjem b’attenzjoni kbira. Il-​kopjisti għamlu biss ftit żbalji żgħar, u tqabbil tagħhom stabbilixxa t-​test oriġinali mnebbaħ minn Alla. Wieħed li hu awtorità ewlenija dwar il-​manuskritti tal-​Bibbja, Sir Frederic Kenyon, igħid: “L-​aħħar traċċi taʼ dubju dwar jekk l-​Iskrittura waslitx għandna sostanzjalment kif kienet inkitbet issa tneħħew.” Illum, għadhom jeżistu madwar 16,000 kopja tal-​Bibbja jew partijiet tagħha miktubin bl-​idejn, li xi wħud minnhom ilhom mit-​tieni seklu qabel Kristu. Iktar minn hekk, traduzzjonijiet bir-​reqqa saru mil-​Lhudi, mill-​Aramajk u mill-​Grieg, il-​lingwi li fihom inkitbet il-​Bibbja oriġinalment, għal fi kważi l-​lingwi kollha tal-​art.

11. Liema sejbiet moderni huma fi qbil mar-​rakkont tal-​Bibbja?

¹¹ Xi wħud ipprovaw iwaqqgħu l-​Bibbja billi jgħidu li mhix eżatta. Madankollu, fi snin riċenti l-​arkeoloġisti ħaffru fir-​rovini taʼ bliet antiki f’artijiet Bibliċi u sabu skrizzjonijiet u evidenzi oħra li jagħtu prova konklusiva li l-​persuni u l-​postijiet imsemmija saħansitra fl-​eqdem rakkonti Bibliċi tassew eżistew. Minn taħt l-​art ġabru ħafna evidenza li kien hemm dulluvju globali, li l-​Bibbja tgħid li ġara aktar minn 4,000 sena ilu, fi żmien Noè. Dwar dan il-​punt, il-​Prinċep Mikasa, arkeoloġista magħruf, stqarr: “Veru kien hemm Dulluvju? . . . Il-​fatt li d-​dulluvju tassew seħħ ġie pprovat b’mod konvinċenti.”c

Alla tal-​Bibbja

12. (a) Xi wħud li jmaqdri x’igħidu dwar Alla? (b) Il-​Bibbja għala tirreferi għal Alla bħala Missier? (ċ) Il-​Bibbja x’turi li hu isem Alla?

¹² Bħalma xi wħud ixenglu rashom dwar il-​Bibbja, oħrajn jiddubitaw dwar l-​eżistenza taʼ Alla li Jistaʼ Kollox. (2 Pietru 3:3-7) Dawn igħidu, ‘Kif nistaʼ nemmen f’Alla, ladarba ma nistax narah? Hemm xi prova li Ħallieq inviżibbli, li hu akbar mill-​bniedem, tassew jeżisti? Ma jinstabx Alla f’kull ħaġa?’ Oħrajn igħidu, ‘M’hemmx Alla jew Buddha.’ Madankollu, il-​Bibbja turi li, bħalma aħna lkoll irċevejna l-​ħajja permezz taʼ missier fuq l-​art, hekk l-​antenati oriġinali tagħna rċevew il-​ħajja minn Missier tas-​sema, jew Ħallieq, li l-​isem persunali tiegħu hu Jehovah.​—Salm 83:18; 100:3; Isaija 12:2; 26:4.

13. Jehovah b’liema żewġ modi kixef lilu nnifsu lill-​bnedmin?

¹³ Jehovah ħalla lilu nnifsu jsir magħruf mill-​bnedmin b’żewġ modi li jispikkaw. Il-​mod prinċipali hu permezz tal-​Bibbja, li tgħarraf il-​veritajiet tiegħu u l-​għanijiet eterni tiegħu. (Ġwann 17:17; 1 Pietru 1:24, 25) Il-​mod l-​ieħor hu permezz tal-​ħolqien tiegħu. Billi osservaw l-​affarijiet meraviljużi taʼ madwarhom, bosta nies waslu biex japprezzaw li bilfors hemm Alla-Ħallieq li l-​personalità grandjuża tiegħu hi riflessa f’xogħlijietu.​—Rivelazzjoni 15:3, 4.

14. Il-​Bibbja x’tgħidilna dwar Jehovah?

¹⁴ Alla Jehovah hu l-​Awtur tal-​Bibbja. Huwa l-​Ispirtu l-​Kbir li ilu jeżisti tul l-​eternità kollha. (Ġwann 4:24; Salm 90:1, 2) Ismu “Jehovah” jiġbed l-​attenzjoni lejn il-​għan tiegħu għall-​ħlejjaq tiegħu. Huwa l-​għan tiegħu li jnaddaf dak l-​isem kbir billi jeqred lill-​ħżiena u jżomm ħajjin lil dawk li jħobbuh biex jistgħu jgħixu f’Ġenna tal-​art. (Eżodu 6:2-8; Isaija 35:1, 2) Billi hu dak Alla li Jistaʼ Kollox, għandu l-​qawwa li jagħmlu dan. Bħala l-​Ħallieq tal-​univers kollu, hu ferm ogħla minn kull alla jew idolu nazzjonali ordinarju.​—Isaija 42:5, 8; Salm 115:1, 4-8.

15. Studji dwar il-​ħolqien minn nies intelliġenti wasslu għal liema konklużjonijiet?

¹⁵ Tul l-​aħħar seklu, nies taʼ xjenza qattgħu ħafna ħin jistudjaw ix-​xogħlijiet tal-​ħolqien. X’ikkonkludew? Wieħed mill-​pijunieri fil-​qasam tal-​elettriku, il-​fiżiċista magħruf Ingliż Lord Kelvin, iddikjara: “Jiena nemmen li iktar ma tiġi studjata bir-​reqqa x-​xjenza iktar teħodna ’l bogħod minn kull ħaġa li titqabbel mal-​atejiżmu.” Ix-​xjenzat imwieled fl-​Ewropa Albert Einstein, għalkemm jingħad li kien ateju, stqarr: “Huwa biżżejjed għalija li . . . nirrifletti dwar l-​istruttura meraviljuża tal-​univers, li bil-​kemm għadna lmaħnieh, u nipprova umilment nifhem anki parti l-​iktar ċkejkna tal-​intelligenza li tidher fin-​natura.” Ix-​xjenzat Amerikan u rebbieħ tal-​premju Nobel Arthur Holly Compton qal: “Univers li qed jinkixef b’mod ordnat jixhed għall-​verità tal-​aktar stqarrija majestuża li qatt intlissnet​—‘Fil-​bidu Alla.’” Hu kien qed jikkwota l-​kelmiet li bihom il-​Bibbja tiftaħ.

16. L-​univers kif ifaħħar il-​għerf kreattiv u l-​qawwa t’Alla?

¹⁶ Ħakkiema taʼ ġnus setgħana forsi jiftaħru dwar l-​intelliġenza tagħhom u t-​twettieq xjentifiku billi rnexxielhom jibagħtu n-​nies fl-​ispazju. Iżda kemm huma nsinjifikanti s-​satelliti spazjali tagħhom meta tqabbilhom mal-​qamar li jdur madwar l-​art, u l-​pjaneti li jduru madwar ix-​xemx! Kemm huma vojta t-​twettiqiet taʼ dawn in-​nies mortali meta tqabbilhom mal-​ħolqien minn Jehovah taʼ biljuni taʼ galassi fis-​smewwiet, li kull galassa fiha biljuni taʼ xmux bħal tagħna u li Hu ġabarhom u poġġiehom fl-​ispazju għal żmien li ma jistax jitkejjel! (Salm 19:1, 2; Ġob 26:7, 14) Mhux taʼ b’xejn li Jehovah iqis lill-​bnedmin daqs li kieku ġurati, u lil ġnus setgħana “bħala xejn.”​—Isaija 40:13-18, 22.

17. Għala hu raġonevoli li temmen f’Ħallieq?

¹⁷ Inti tgħix f’dar? Probabbli li mhux int stess bnejtha d-​dar, u lanqas taf min bnieha. Madankollu, il-​fatt li ma tafx min kien il-​bennej ma jtellfekx milli taċċetta l-​verità li xi persuna ntelliġenti bnieha. Li tirraġuna li d-​dar bniet lilha nfisha jkun jidher stupidu ferm! Ladarba l-​univers kbir, u dak kollu li hemm fih, jinħtieġ intelliġenza ferm u ferm akbar biex ġie kostruwit, ma hux raġonevoli li tikkonkludi li bilfors irid ikun hemm Ħallieq Intelliġenti? Tabilħaqq, l-​iblah biss igħid f’qalbu, “M’hemm ebda Jehovah.”​—Salm 14:1; Lhud 3:4.

18. X’juri li Alla hu persuna, u jixraqlu kull tifħir?

¹⁸ L-​egħġubijiet glorjużi taʼ madwarna​—il-​fjuri, l-​agħsafar, l-​annimali, il-​ħolqien meraviljuż imsejjaħ il-​bniedem, il-​mirakli tal-​ħajja u t-​twelid—​dawn kollha jagħtu xiehda għas-​Sid Intelliġenti nviżibbli li pproduċiehom. (Rumani 1:20) Fejn hemm intellett, hemm moħħ. Fejn hemm moħħ, hemm persuna. L-​intellett suprem huwa dik il-​Persuna Suprema, il-​Ħallieq taʼ kull ħaġa ħajja, il-​Għajn tal-​ħajja nnifsu. (Salm 36:9) Il-​Ħallieq tassew jixraqlu kull tifħir u adorazzjoni.​—Salm 104:24; Rivelazzjoni 4:11.

19. (a) Għala ma jistaʼ ebda ġens illum igħid li ngħata r-​rebħa fi gwerra minn Alla? (b) Alla għala m’għandu l-​ebda parti mill-​gwerer tal-​ġnus?

¹⁹ Hemm xi wħud li t-​twemmin tagħhom f’Alla ġie mriegħed bl-​esperjenzi ħorox tat-​Tieni Gwerra Dinjija. F’dak iż-​żmien kull ­pajjiż talab lil “Alla” tiegħu, kemm jekk tar-​reliġjon Kattolka jew Protestanta jew tar-​reliġjonijiet Orjentali. Jistaʼ jingħad li “Alla” ta r-​rebħa lil xi wħud minn dawn il-​ġnus u ħalla lil oħrajn jiġu megħluba? Il-​Bibbja turi li l-​ebda wieħed minn dawn il-​ġnus ma kien qed isejjaħ lill-​veru Alla. Alla Jehovah, il-​Ħallieq tas-​sema u l-​art, m’huwiex responsabbli għall-​konfużjoni u l-​gwerer taʼ bejn il-​ġnus. (1 Korintin 14:33) Ħsibijietu huma ferm ogħla minn dawk tal-​ġnus politiċi u militari tal-​art. (Isaija 55:8, 9) Bl-​istess mod, il-​vera reliġjon u l-​qima taʼ Jehovah ma għandhom l-​ebda sehem fil-​gwerer tal-​ġnus. Jehovah huwa ferm ogħla mill-​allat nazzjonalistiċi. Huwa uniku billi hu Alla taʼ rġiel u nisa li jħobbu l-​paċi mill-​ġnus kollha. Bħalma tgħid il-​Bibbja: “Alla mhux parzjali, iżda f’kull ġens il-​bniedem li jibżaʼ minnu u jagħmel is-​sewwa hu milqugħ minnu.” (Atti 10:​34, 35) Persuni nklinati lejn is-​sewwa mill-​ġnus kollha qegħdin issa jitgħallmu l-​Bibbja u jħaddnu l-​qima tal-​veru “Alla li jagħti l-​paċi,” il-​Ħallieq tal-​bnedmin kollha.​—Rumani 16:20; Atti 17:24-27.

20. X’juri li l-​Kristjaneżmu hu kontra Alla u mhux Kristjan?

²⁰ Xi nies jippuntaw lejn il-​qsim u l-​ipokrezija fir-​reliġjonijiet tal-​Kristjaneżmu, li jgħidu li jsegwu l-​Bibbja. Huma jgħidu wkoll, ‘Kif nistaʼ nemmen f’Alla tal-​Bibbja, meta l-​ġnus li għandhom il-​Bibbja huma fost dawk li qed jaħżnu bla rażan l-​armi nukleari?’ Il-​fatt hu li, waqt li l-​Bibbja tibqaʼ dejjem vera, il-​ġnus tal-​Kristjaneżmu saru mbegħdin mill-​Kristjanità tal-​Bibbja daqs kemm in-​North Pole hu mbiegħed mis-​South Pole. Huma ipokriti f’li jgħidu li huma Kristjani. Għandhom il-​Bibbja, iżda ma jobdux it-​tagħlim tagħha. Il-​president Amerikan li ta l-​ordni biex tintafaʼ l-​ewwel bomba atomika fuq Hiroxima darba qal: “O, mhux li kieku kellna xi Isaija jew xi San Pawl!” biex jiggwidaw lill-​bnedmin f’din il-​kriżi dinjija. Kieku kien jaqbel maʼ Isaija tal-​Bibbja, kieku qatt ma kien jixħet il-​bomba atomika, għax Isaija ħeġġeġ biex ‘is-​sjuf jagħmluhom sikek tal-​moħriet u l-​lanez imqassijiet taż-​żabra.’ Iktar minn hekk, kien Pawlu tal-​Bibbja li ddikjara: “Ma nagħmlux gwerra skond dak li aħna fil-​laħam. Għax l-​armi tal-​gwerra tagħna m’humiex tal-​laħam.” (Isaija 2:4; 2 Korintin 10:3, 4) Madankollu, minflok ma jsegwu l-​parir għaqli tal-​Bibbja, il-​ġnus tal-​Kristjaneżmu involvew irwieħhom f’tellieqa suwiċidali tal-​armamenti. Kull stqarrija li jagħmlu li huma Kristjani li jobdu l-​Bibbja hi falza. Se jkollhom jiffaċċjaw il-​ġudizzju t’Alla talli naqsu li jagħmlu r-​rieda tiegħu.​—Mattew 7:18-23; Sofonija 1:17, 18.

Il-​Ħolqien u l-​Mirakli taʼ Jehovah

21. Għala hu raġonevoli li ma tiddubitax il-​mirakli t’Alla?

²¹ Jehovah joħloq, u jwettaq il-​mirakli. Qatt ħsibt dwar il-​bdil tal-​ilma f’demm, il-​frid tal-​Baħar l-​Aħmar, it-​twelid taʼ Ġesù minn verġni, u mirakli oħra li naqraw dwarhom fil-​Bibbja? Ladarba l-​bniedem għandu qawwa ntellettwali limitata, probabbli qatt ma se jifhem kif ġraw xi wħud minn dawn il-​mirakli, l-​istess bħalma ma jistax jifhem għalkollox il-​miraklu taʼ tlugħ u nżul ix-​xemx kuljum. Il-​ħolqien tal-​bniedem huwa miraklu. Il-​bniedem modern ma rahx dak il-​miraklu, iżda jaf li ġara, għax hu ħaj illum biex jagħti prova taʼ dan. Tabilħaqq, il-​ħajja kollha u l-​univers kollu jikkostitwixxu miraklu wieħed perpetwu. Allura sejrin aħna niddubitaw meta l-​Kelma t’Alla, il-​Bibbja, tgħid li hi wettqet mirakli speċifiċi għal żminijiet speċifiċi, għalkemm mirakli bħal dawn ma humiex meħtieġa llum?

22. Iddeskrivi l-​ewwel ħolqien t’Alla.

²² Il-​ħolqien kollu taʼ Jehovah huwa mirakoluż u tal-​għaġeb! Madankollu, l-​ewwel ħolqien stess tiegħu kien l-​aktar wieħed meraviljuż minnhom kollha. Kien il-​ħolqien taʼ Iben spirtu, l-​“ewwel imwieled” tiegħu. (Kolossin 1:15) Dan l-​Iben tas-​sema sar jismu “l-​Kelma.” Żmien twil ferm wara l-​ħolqien tiegħu, hu ġie fuq din l-​art u ġie msejjaħ “il-​bniedem, Kristu Ġesù.” (1 Timotew 2:5) Imbagħad intqal dwaru: “Mela l-​kelma saret laħam u għammret fostna, u aħna kellna dehra tal-​glorja tagħha, glorja bħalma tappartjeni lil iben uniġenitu minn missier; u kien mimli ħniena mhix mistħoqqa u verità.”​—Ġwann 1:14.

23. (a) Ir-​relazzjoni bejn Alla u Ibnu kif tistaʼ tiġi spjegata? (b) Permezz taʼ Ibnu, Jehovah x’ħalaq?

²³ Ir-​relazzjoni taʼ bejn Jehovah u Ibnu tistaʼ titqabbel maʼ dik taʼ wieħed li hu sid u mgħallem u ibnu f’azjenda, fejn l-​iben igħin f’li jagħmel affarijiet iddisinjati minn missieru. Permezz tal-​ewwel Iben u ħaddiem bi sħab tiegħu, Jehovah ħalaq ħafna ħlejjaq spirti oħra, ulied Alla. Iktar tard, dawn ferħu meta raw lill-​Iben taʼ Jehovah, il-​Ħaddiem Ewlieni tiegħu, iġib ’il quddiem is-​smewwiet materjali u l-​art li fuqha ngħixu. Tiddubita int li dawn l-​affarijiet inħolqu? Eluf taʼ snin ilu, Jehovah staqsa lil wieħed raġel lejali: “Fejn inzertajt li kont int meta jien sejjist l-​art? Għidli, jekk int taf il-​għarfien. Meta l-​kwiekeb taʼ fil-​għodu għajtu bil-​ferħ, u wlied Alla kollha bdew igħajtu b’applaws?”​—Ġob 38:4, 7; Ġwann 1:3.

24. (a) Liema ħolqien tal-​art minn Jehovah jispikka, u b’liema modi? (b) Għala mhux raġonevoli li tgħid li l-​bniedem evolva ’l fuq mill-​annimali?

²⁴ Maż-​żmien, Jehovah ħalaq affarijiet materjali ħajjin fuq din l-​art, il-​pjanti, is-​siġar, il-​fjuri, il-​ħut, l-​agħsafar, u l-​annimali. (Ġenesi 1:11-13, 20-25) Imbagħad Alla qal lill-​Ħaddiem Ewlieni tiegħu: “Ħa nagħmlu l-​bniedem fix-​xbieha tagħna, skond ix-​xebh tagħna . . . U Alla ssokta joħloq lir-​raġel fi xbieha tiegħu, fi xbieha t’Alla ħolqu; raġel u mara ħalaqhom.” (Ġenesi 1:26, 27) Billi ġie maħluq fi xbieha u fix-​xebh t’Alla, bl-​attributi l-​kbar t’Alla tal-​imħabba, l-​għerf, il-​ġustizzja, u l-​qawwa, il-​bniedem oriġinali kien ferm aktar superjuri mill-​annimali. Il-​bniedem huwa fi klassi apparti mill-​annimali billi hu kapaċi jirraġuna, jistaʼ jippjana għall-​futur, u għandu l-​kapaċità li jqim lil Alla. L-​annimali m’għandhomx intellett biex jirraġunaw bih, iżda jgħixu bl-​istint. Kemm ma hux raġonevoli li tgħid li m’hemmx Ħallieq iżda li l-​bniedem bħala ħlejjaq intelliġenti u mogħni tant evolva ’l fuq minn annimali mhux intelliġenti u iktar baxxi!​—Salm 92:6, 7; 139:14.

25, 26. (a) Liema prospett grandjuż tqiegħed quddiem il-​bniedem? (b) Għala m’hu se jkun hemm ebda problema taʼ popolazzjoni żejda fuq l-​art?

²⁵ Alla poġġa lill-​bniedem fi “ġnien taʼ Għeden, lejn il-​Lvant.” Kien ġnien taʼ pjaċir, bħall-​ġnien fuq il-​qoxra taʼ dan il-​ktejjeb, għalkemm kien għad hemm żewġ bnedmin biss, Adam u martu. Din il-​Ġenna tal-​Art oriġinali m’għadhiex teżisti, billi nqerdet fid-​Dulluvju taʼ żmien Noè. Iżda l-​lok approssimattiv tiegħu fil-​Lvant Nofsani huwa magħruf, peress li ċerti xmajjar imsemmijin fil-​Bibbja bħala li jgħaddu minnha għadhom hemm sal-​lum. (Ġenesi 2:​7-14) Il-​bniedem kellu l-​opportunità grandjuża li juża dan il-​ġnien bħala ċentru li minnu kellu jifrex ’il barra u jikkultiva l-​art kollha kemm hi, ħalli ssir ġenna globali.​—Isaija 45:​12, 18.

²⁶ Bħalma Alla u Ibnu huma t-​tnejn ħaddiema, hekk ukoll Alla ta xogħol lill-​bniedem x’jagħmel fuq l-​art. (Ġwann 5:17) Lil Adam u Eva, l-​ewwel raġel u mara, qalilhom: “Kunu għammiela u siru ħafna u imlew l-​art u rażżnuha, u ħa jkollkom suġġetti lejkom il-​ħut tal-​baħar u l-​ħlejjaq li jtiru tas-​smewwiet u kull ħlejqa ħajja li qed titħarrek fuq l-​art.” (Ġenesi 1:28) Kien ifisser dan li l-​bniedem kellu jimmoltiplika, jimla l-​art, u mbagħad jibqaʼ jimmoltiplika sakemm l-​art kienet tfur bin-​nies? Le. Meta xi ħadd igħidlek biex timla kikkra bit-​te, int ma tibqax tferraʼ sakemm it-​te jfur mill-​kikkra u jinxtered fuq il-​mejda. Int timla l-​kikkra u mbagħad tieqaf. Bl-​istess mod, Jehovah ikkmanda lill-​bnedmin, “Imlew l-​art,” b’mod li indika l-​għan tiegħu li l-​bnedmin jimlew l-​art b’mod konfortabbli, u mbagħad ir-​riproduzzjoni tal-​bnedmin hawn fuq l-​art kellha tieqaf. Din ma tippreżenta ebda problema f’soċjetà umana perfetta. Huwa biss fid-​dinja taʼ bnedmin imperfetti tal-​lum li ż-​żjieda kbira fil-​popolazzjoni qed toħloq problema.

L-​Affarijiet Ħżiena​—Alla Għala Jippermettihom?

27. Liema mistoqsijiet issa jinħtieġu tweġiba?

²⁷ Jekk il-​għan t’Alla hu li jibni ġenna tal-​art, kif inhu li l-​art illum hi mimlija bil-​ħażen, bit-​tbatija, u bin-​niket? Jekk Alla hu wieħed li Jistaʼ Kollox, għala ppermetta dawn il-​kundizzjonijiet għal tant żmien? Hemm xi tama għal tmiem tal-​inkwiet kollu tagħna? Il-​Bibbja xi tgħid?

28. L-​irvell kif daħal fil-​ġnien tal-​Ġenna tal-​art?

²⁸ Il-​Bibbja turi li l-​inkwiet tad-​dinja beda meta wieħed mill-​ulied spirti t’Alla rvella kontra s-​sovranità, jew id-​dominanza, taʼ Jehovah. (Rumani 1:20; Salm 103:22, nota taʼ taħt fin-​NW Ref. Bi.) Bla dubju dan l-​anġlu kien fost dawk li kienu ferħu meta raw il-​ħolqien tal-​bniedem. Iżda mbagħad ir-​regħba u l-​kburija sabu l-​egħruq f’qalbu, u ġie mħajjar mix-​xewqa li Adam u Eva jqimu lilu minflok lill-​Ħallieq tagħhom, Jehovah. Billi tkellem permezz taʼ serpent, l-​istess bħalma ventrilokwist jitkellem permezz taʼ pupu, dan l-​anġlu qanqal lil Eva biex tkun diżubbidjenti lejn Alla li Jistaʼ Kollox. Żewġha Adam imbagħad segwieha fid-​diżubbidjenza tagħha.​—Ġenesi 2:15-17; 3:1-6; Ġakbu 1:14, 15.

29. (a) Liema kwistjonijiet qamu biex jiġu determinati? (b) Alla kif laqaʼ l-​isfida? (ċ) Kif tistaʼ int ikollok sehem f’li tipprovdi tweġiba għall-​inbix taʼ Satana?

²⁹ Dak l-​anġlu ribelluż sar magħruf bħala “s-​serpent oriġinali.” (Rivelazzjoni 12:9; 2 Korintin 11:3) Huwa jissejjaħ ukoll Satana, li jfisser “Wieħed li jopponi,” u Xitan, li jfisser “Kalunnjatur.” Hu qajjem kwistjoni dwar jekk hux sewwa u jekk għandux dritt li Jehovah jaħkem fuq l-​art, u sfida ’l Alla li issa hu, Satana, kien kapaċi jdawwar lill-​bnedmin kollha mill-​qima vera. Alla ħalla lil Satana għal madwar 6,000 sena biex jipprova jwettaq l-​isfida tiegħu, u dan sabiex il-​kwistjoni dwar is-​sovranità taʼ Jehovah tkun tistaʼ tiġi stabbilita għall-​eternità kollha. Il-​ħakma tal-​bniedem indipendentement minn Alla falliet b’mod tal-​biki. Iżda rġiel u nisa taʼ fidi, li fosthom Ġesù huwa l-​eżempju li jispikka, żammew l-​integrità lejn Alla taħt provi l-​aktar ħorox, b’mod li wrew li Jehovah għandu raġun u li x-​Xitan huwa giddieb. (Luqa 4:1-13; Ġob 1:7-12; 2:1-6; 27:5) Int, ukoll, tistaʼ tkun wieħed li żżomm l-​integrità. (Qwiel 27:11) Iżda Satana m’huwiex l-​uniku għadu li jweġġagħna. X’għadu ieħor hemm?

Il-​Għadu​—Il-​Mewt

30. L-​Iskrittura xi tgħid dwar il-​kastig li jirriżulta lill-​bniedem minħabba d-​diżubbidjenza?

³⁰ Alla kien stqarr x’kellu jkun il-​kastig għad-​diżubbidjenza​—il-​mewt. Meta għadda s-​sentenza fuq l-​ewwel mara, Jehovah qal: “Jien se nżid bil-​kbir l-​uġigħ tat-​tqala tiegħek; fl-​uġigħ tat-​twelid inti twelled it-​tfal, u x-​xenqa tiegħek se tkun għal żewġek, u hu se jiddominak.” Lir-​raġel Adam qallu: “Fil-​għaraq taʼ wiċċek se tiekol il-​ħobż sakemm terġaʼ lura lejn l-​art, għax minnha kont meħud. Għax trab int u lejn it-​trab se terġaʼ lura.” (Ġenesi 3:16-19) Dik il-​koppja diżubbidjenti tkeċċiet ’il barra mill-​Ġenna taʼ ferħ għal ġol-​art mhix ikkultivata. Maż-​żmien mietu.​—Ġenesi 5:5.

31. X’inhu d-​dnub, u x’kien ir-​riżultat tiegħu għall-​bnedmin?

³¹ Kien biss wara li naqsu li jilħqu l-​marka tal-​perfezzjoni li Adam u Eva bdew jipproduċu t-​tfal. Il-​bnedmin kollha llum huma d-​dixxendenti tagħhom fl-​imperfezzjoni, u b’hekk kollha mmutu. Wieħed kittieb tal-​Bibbja spjegaha b’dawn il-​kelmiet: “Bi bniedem wieħed id-​dnub daħal fid-​dinja u l-​mewt permezz tad-​dnub, u b’hekk il-​mewt infirxet fuq il-​bnedmin kollha għaliex kollha kienu dinbu.” X’inhu dan id-​“dnub”? Huwa li tonqos li tilħaq il-​marka tal-​perfezzjoni jew li tkun komplut. Jehovah ma japprovax u ma jżommx ħaj lil kull ħaġa li mhix perfetta. Ladarba l-​bnedmin kollha wirtu d-​dnub u l-​imperfezzjoni mill-​ewwel raġel Adam, il-​mewt “ħakmet bħala sultan” fuqhom. (Rumani 5:12, 14) Il-​bniedem midneb imut, bl-​istess mod li l-​annimali jmutu.​—Ekkleżjasti 3:19-21.

32. Il-​Bibbja kif tiddeskriviha l-​mewt li writna?

³² X’inhi din il-​“mewt”? Il-​mewt hi l-​oppost tal-​ħajja. Alla kien poġġa quddiem il-​bniedem il-​prospett taʼ ħajja bla tmiem fuq l-​art jekk jobdih. Madankollu, ma obdiex, u l-​kastig kien il-​mewt, stat taʼ li ma tħoss xejn, ma tkunx teżisti. Alla ma kien qal xejn dwar li jitrasferixxi l-​ħajja tal-​bniedem għal xi qasam tal-​ispirti jew għal “infern” tan-​nar jekk ma jobdix u jmut. Hu kien wissa lir-​raġel: “Int żgur tmut.” Kien il-​qattiel tal-​bnedmin ix-​Xitan li gideb meta qal: “Intom żgur ma tmutux.” (Ġenesi 2:17; 3:4; Ġwann 8:44) Dak li l-​bnedmin kollha wirtu minn Adam huwa mewta fit-​trab.​—Ekkleżjasti 9:5, 10; Salm 115:17; 146:4.

33. (a) Liema futur glorjuż hemm għall-​bniedem u għal din l-​art? (b) Liema tliet affarijiet importanti jwettaq Jehovah permezz taʼ Ibnu?

³³ Ma hemm, allura, l-​ebda futur għall-​bniedem li jmut? Hemm tassew futur tal-​għaġeb! Il-​Bibbja turi li l-​għan t’Alla li jkollu ġenna tal-​art għall-​bnedmin kollha, inklużi dawk li diġà mietu, qatt ma se jfalli. Jehovah igħid: “Is-​smewwiet huma t-​tron tiegħi, u l-​art hi l-​banketta taʼ saqajja.” “Jien se nig­glorifika l-​istess post taʼ saqajja.” (Isaija 66:1; 60:13) Sforz l-​abbundanza taʼ mħabbtu, Jehovah bagħat lil Ibnu, il-​Kelma, lejn din l-​art, biex id-​dinja tkun tistaʼ tikseb il-​ħajja permezz tiegħu. (Ġwann 3:16; 1 Ġwann 4:9) Hemm tliet affarijiet importanti li rridu issa niddiskutu u li Jehovah wettaq permezz taʼ Ibnu, jiġifieri, (1) li jipprovdi ħelsien mis-​setgħa tal-​mewt; (2) li attwalment iġib il-​mejtin lura għall-​ħajja; u (3) li jistabbilixxi gvern perfett fuq il-​bnedmin kollha.

Ħelsien mill-​Mewt

34, 35. (a) Il-​bniedem kif biss setaʼ jiġi mifdi mill-​mewt? (b) X’inhu rahan?

³⁴ Minn żmien il-​qedem, il-​profeti t’Alla esprimew il-​fiduċja tagħhom, mhux fl-​immortalità tal-​bniedem, iżda fit-​tama li Alla kien se “jġibhom lura” mill-​mewt. (Ħosea 13:14) Iżda l-​bniedem kif setaʼ jkun meħlus mill-​irbit tal-​mewt? Il-​ġustizzja perfetta taʼ Jehovah kienet tirrikjedi ‘ruħ għal ruħ, għajn għal għajn, sinna għal sinna.’ (Dewteronomju 19:21) B’hekk, ladarba Adam ġab il-​mewt li tintiret għall-​bnedmin kollha billi m’obdiex apposta lil Alla u hekk tilef il-​perfezzjoni tal-​ħajja umana, bniedem perfett ieħor kellu jissostitwixxi lil Adam billi jħallas bil-​ħajja perfetta tiegħu, biex jixtri lura dak li Adam kien tilef.

³⁵ Il-​prinċipju ġust taʼ li tħallas ‘għajn b’għajn u sinna b’sinna’ ġie aċċettat fil-​wisgħa tul l-​istorja. L-​espressjoni li soltu tintuża hi “li tħallas ir-​rahan.” X’inhu rahan? Huwa “prezz imħallas biex tikseb lura lil xi persuna jew xi ħaġa minn xi ħadd li jkun qed jaħtaf lil dik il-​persuna jew il-​ħaġa. B’hekk il-​priġunieri tal-​gwerra jew l-​ostaġġi jingħad li jkunu mifdijin b’rahan meta jinħelsu bi bdil maʼ xi ħaġa taʼ valur. . . . Hu x’inhu li jiġi sostitwit jew impartat bħala kumpens għal dak li jinħeles huwa r-​rahan tiegħu.”d Mindu sar id-​dnub t’Adam, il-​bnedmin kollha kienu bħal priġunieri tal-​gwerra jew irsiera, marbutin bil-​ktajjen tal-​imperfezzjoni u l-​mewt. Biex jinħelsu, rahan kellu jiġi pprovdut. Biex tiġi evitata kull kontroversja issa jew iktar tard rigward kemm hu xieraq il-​prezz tar-​rahan, kellu jkun neċessarju li tiġi ssagrifikata ħajja umana perfetta, jiġifieri, l-​ekwivalenti eżatta taʼ Adam.

36. Jehovah kif ipprovda ħajja umana perfetta bħala rahan?

³⁶ Madankollu, fejn setgħet tinstab ħajja umana perfetta bħal din? Il-​bnedmin kollha, bħala dixxendenti taʼ Adam l-​imperfett, twieldu mperfetti. “L-​ebda wieħed minnhom ma jistaʼ b’xi mod jifdi mqar lil ħuh, lanqas li jagħti lil Alla rahan għalih.” (Salm 49:7) Biex iwieġeb għal dik il-​ħtieġa, Jehovah, imqanqal mill-​imħabba profonda tiegħu għall-​bnedmin, attwalment ipprovda lill-​Iben prezzjuż “l-​ewwel imwieled” tiegħu biex isir is-​sagrifiċċju meħtieġ. Hu trasferixxa l-​ħajja perfetta taʼ dan l-​Iben spirtu, il-​Kelma, ġewwa l-​ġuf taʼ xebba Lhudija, Marija. Il-​mara żagħżugħa kkonċepiet u maż-​żmien welldet iben, li ġie msemmi “Ġesù.” (Mattew 1:18-25) Il-​Ħallieq tal-​ħajja żgur li kien se jkun kapaċi jwettaq miraklu meraviljuż bħal dan.

37. Ġesù kif wera mħabbtu lejn il-​bnedmin kollha li jixtiequ l-​ħajja?

³⁷ Ġesù kiber biex sar raġel, ippreżenta ruħu lil Jehovah, u tgħammed. Alla mbagħad ħatru biex jagħmel ir-​rieda Tiegħu. (Mattew 3:13, 16, 17) Ladarba l-​ħajja taʼ Ġesù fuq l-​art ġiet mis-​sema u hu kien perfett, hu setaʼ jissagrifika dik il-​ħajja umana perfetta, biex jużaha ħalli jeħles lill-​bnedmin mill-​mewt. (Rumani 6:23; 5:18, 19) Bħalma qal hu: “Jien ġejt biex huma jistaʼ jkollhom il-​ħajja u jkollhom lilha bil-​kotra.” “Ħadd ma għandu mħabba akbar minn din, li xi ħadd għandu jċedi ruħu għal ħbiebu.” (Ġwann 10:10; 15:13) Meta Satana kkaġuna l-​qtil taʼ Ġesù fuq zokk tat-​torturi, Ġesù ssottometta għal din il-​mewta krudili, billi kien jaf li l-​bnedmin li jeżerċitaw fidi fih kienu se jiksbu l-​ħajja permezz taʼ dan il-​provvediment taʼ rahan.​—Mattew 20:28; 1 Timotew 2:5, 6.

Restorazzjoni għall-​Ħajja

38. L-​Iben t’Alla kif ingħata lura l-​ħajja, u x’hemm li juri dan?

³⁸ Għalkemm l-​egħdewwa tiegħu qatluh, l-​Iben t’Alla qatt ma tilef id-​dritt tiegħu għal ħajja umana perfetta, għax hu kien żamm l-​integrità tiegħu lejn Alla. Iżda, bħala wieħed mejjet fil-​qabar, kif setaʼ Ġesù juża din il-​ħaġa tant imprezzabbli, id-​dritt għal ħajja umana, biex igħin lill-​bnedmin? Kien hawn li Jehovah wettaq miraklu ieħor, l-​ewwel wieħed tax-​xorta tiegħu. Fit-​tielet jum mit-​tqegħid taʼ Ġesù fil-​qabar, Jehovah qajmu mill-​mewt bħala ħlejqa spirtu, immortali. (Rumani 6:9; 1 Pietru 3:18) Biex jistabbilixxi t-​twemmin fl-​irxoxt, f’okkażjonijiet differenti Ġesù mmaterjalizza iġsma umani u deher lid-​dixxipli tiegħu, darba minnhom lil 500 jew aktar minnhom. L-​ebda wieħed minn dawn u lanqas l-​appostlu Pawlu li aktar tard għama meta deherlu Ġesù gglorifikat, ma kellu xi raġuni li jiddubita l-​miraklu tal-​irxoxt.​—1 Korintin 15:3-8; Atti 9:1-9.

39. (a) Ġesù kif juża l-​valur tas-​sagrifiċċju tiegħu, u l-​ewwel b’riżq min? (b) Dwar liema miraklu kbir ieħor tkellem Ġesù?

³⁹ Wara 40 jum Ġesù rxoxtat telaʼ ’l fuq ġewwa l-​preżenza t’Alla nnifsu fis-​smewwiet, biex hemm jippreżenta l-​valur tas-​sagrifiċċju uman perfett tiegħu bħala ħelsien għall-​bnedmin. “Iżda dan ir-​raġel offra sagrifiċċju wieħed għad-​dnubiet għal dejjem u qagħad fuq il-​lemin t’Alla, minn dak iż-​żmien ’il quddiem jistenna sakemm l-​egħdewwa tiegħu jitqiegħdu bħala banketta għal saqajh.” (Lhud 10:12, 13) L-​ewwel uħud li kellhom jinħelsu permezz taʼ dan ir-​rahan huma “merħla ċkejkna” taʼ Kristjani lejali “li huma tal-​Kristu.” (Luqa 12:32; 1 Korintin 15:​22, 23) Dawn huma “mixtrijin minn fost il-​bnedmin,” u b’hekk fl-​irxoxt huma jsiru mseħbin spirti taʼ Kristu fis-​smewwiet. (Rivelazzjoni 14:1-5) Madankollu, x’ingħidu dwar il-​mases kbar taʼ bnedmin li issa jinsabu mejtin fl-​oqbra? Meta kien fuq din l-​art, Ġesù qal li Missieru kien tah l-​awtorità li jiġġudika u jagħti l-​ħajja. Huwa żied: “Tistagħġbux b’dan għax ġejja s-​siegħa li fiha dawk kollha fl-​oqbra tal-​mafkar se jisimgħu leħnu u joħorġu, . . . għal irxoxt.” (Ġwann 5:26-29) Hu se jerġaʼ jġib lil dawn lura għall-​ħajja fil-​Ġenna tal-​art.

40, 41. (a) Spjega eżatt xi jfisser “irxoxt.” (b) Għala jistaʼ jkollna fidi fil-​wegħda t’Alla taʼ rxoxt?

⁴⁰ Innota l-​kliem taʼ Ġesù, “Tistagħġbux b’dan.” Xorta waħda, kif jistaʼ wieħed li ilu mejjet jinħeles mill-​mewt u jinġieb lura għall-​ħajja? Ma reġax ġismu lura lejn it-​trab? Partijiet li kienu jiffurmaw dak il-​ġisem forsi saħansitra saru jiffurmaw parti minn affarijiet ħajjin oħra, bħalma huma pjanti u annimali. Madankollu, l-​irxoxt ma jfissirx li terġaʼ ġġib l-​istess elementi kimiċi flimkien mill-​ġdid. Ifisser li Alla joħloq mill-​ġdid lill-​istess persuna, bl-​istess personalità. Hu jislet ġisem ġdid mill-​elementi tal-​art, u f’dak il-​ġisem iqiegħed l-​istess karatteristiċi, l-​istess kwalitajiet distintivi, l-​istess memorja, l-​istess drawwiet tal-​ħajja li dik il-​persuna kienet bniet saż-​żmien li mietet.

⁴¹ Forsi ġralek xi darba li darek li tant kont tħobb inħarqet. Madankollu, int stajt faċilment terġaʼ tibni l-​istess dar, għax il-​mudell bid-​dettalji tant maħbuba tagħha huwa ċar ferm fil-​memorja tiegħek. Żgur, mela, li Alla li hu l-​Oriġinatur tal-​memorja jistaʼ joħloq mill-​ġdid lill-​bnedmin li lilhom ikun żamm fil-​memorja tiegħu għax ħabbhom. (Isaija 64:8) Huwa għalhekk li l-​Bibbja tuża l-​espressjoni “oqbra tal-​mafkar.” Meta jasal iż-​żmien xieraq t’Alla biex iġib il-​mejtin lura għall-​ħajja, hu se jwettaq dak il-​miraklu, sewwa sew bħalma wettaq miraklu f’li ħalaq lill-​ewwel raġel, biss din id-​darba se jwettqu għal bosta u bosta drabi.​—Ġenesi 2:7; Atti 24:15.

42. Il-​ħajja taʼ dejjem fuq l-​art għala hi possibbli u ċerta?

⁴² Alla se jġib lill-​bnedmin lura għall-​ħajja, bil-​prospett taʼ li qatt ma jerġgħu jmutu minn fuq l-​art. Iżda kif jistaʼ jkun li tgħix għal dejjem fuq l-​art? Jistaʼ u żgur li jkun għaliex hija r-​rieda u l-​għan t’Alla. (Ġwann 6:37-40; Mattew 6:10) L-​unika raġuni għala l-​bniedem imut minn fuq l-​art illum hi għax wiret il-​mewt minn Adam. Madankollu, meta nqisu l-​varjetà infinita taʼ affarijiet tal-​għaġeb fuq l-​art li l-​bniedem suppost li jgawdi, iż-​żmien qasir li ngħixu taʼ inqas minn mitt sena huwa qasir wisq! Meta ta din l-​art lil ulied il-​bnedmin, Alla kellu f’moħħu li l-​bniedem jibqaʼ jgħix u jgawdi l-​isplendur tal-​ħolqien Tiegħu, mhux biss għal mitt sena, jew saħansitra għal elf sena, iżda għal dejjem!​—Salm 115:16; 133:3.

Il-​Gvern Perfett tal-​Paċi

43. (a) Liema ħtieġa hemm għal gvern perfett? (b) X’inhu l-​għan taʼ Jehovah f’dan ir-​rigward?

⁴³ Billi l-​ewwel ġenituri tagħna ċaħdu l-​liġi t’Alla, il-​gvern uman ġie taħt il-​kontroll taʼ Satana. B’mod xieraq il-​Bibbja ssejjaħ lil Satana “l-​alla taʼ dis-sistema taʼ affarijiet.” (2 Korintin 4:4) Il-​gwerer, il-​ħruxijiet, il-​korruzzjoni, u l-​instabilità tal-​gvernijiet umani jagħtu prova taʼ dan. Il-​Lega tan-​Nazzjonijiet u l-​Ġnus Magħquda naqsu li jġibu l-​paċi fost il-​konfużjoni. Il-​bniedem qed jitlob bil-​ħniena għal gvern taʼ paċi. Ma taħsibx li hu raġonevoli li l-​Ħallieq, li bi ħsiebu jġedded il-​Ġenna fuq din l-​art, sejjer jipprovdi wkoll gvern perfett għal dik il-​ġenna tal-​art? Dak hu preċiż li Jehovah għandu l-​għan li jagħmel. Is-​Sultan li jirrappreżentah f’dan il-​gvern hu l-​“Prinċep tal-​Paċi” tiegħu, Kristu Ġesù, u “għall-​abbundanza tal-​ħakma taʼ prinċep u għall-​paċi mhux se jkun hemm tmiem.”​—Isaija 9:6, 7.

44. (a) Dan il-​gvern fejn se jkun? (b) Kif se jkun iffurmat?

⁴⁴ Il-​Bibbja turi li l-​gvern perfett se jkun fis-​sema. Minn dan il-​punt taʼ vantaġġ, is-​Sultan Ġesù Kristu se jmexxi b’mod effettiv fuq l-​art kollha bit-​tjieba. Madankollu, hu se jkollu ħakkiema mseħbin f’dak il-​gvern inviżibbli tas-​sema. Dawn jintgħażlu minn fost il-​bnedmin lejali, segwaċi taʼ Ġesù li baqgħu miegħu minkejja provi tqal u li lilhom igħidilhom: “Jien nagħmel patt magħkom, sewwa sew bħalma Missieri għamel patt miegħi, għal saltna.” (Luqa 22:28, 29) Huma biss ftit minn fost il-​bnedmin li jittieħdu fis-​sema biex jaħkmu maʼ Kristu Ġesù. Hu simili għall-​ġnus illum, fejn biss ftit jintgħażlu biex imexxu fil-​parlament. Il-​Bibbja turi li Ġesù Kristu se jkollu biss 144,000 ħakkiema mseħbin. Mela s-​Saltna t’Alla, jew il-​gvern tas-​sema, tikkonsisti fi Kristu Ġesù u 144,000 persuna meħudin mill-​art għas-​sema. (Rivelazzjoni 14:1-4; 5:9, 10) U x’ingħidu għall-​art? Salm 45:16 isemmi li s-​Sultan se jaħtar “prinċpijiet mal-​art kollha.” “Prinċpijiet” umani, jew indokraturi governattivi, se jinħatru mis-​sema minħabba d-​devozzjoni profonda tagħhom għall-​prinċipji tat-​tjieba.​—Qabbel Isaija 32:1.

45, 46. (a) X’kienet it-​tema ewlenija tal-​ippridkar taʼ Ġesù fuq l-​art? (b) Il-​gvern perfett għala ma ġiex stabbilit immedjatament? (ċ) Is-​sena 1914 E.K. kif kienet sena li tispikka fil-​profezija u fil-​ġrajjiet tad-​dinja?

⁴⁵ Meta u kif jiġi stabbilit il-​gvern perfett? Meta Ġesù kien fuq l-​art din is-​Saltna kienet it-​tema ewlenija tal-​ippridkar tiegħu. (Mattew 4:17; Luqa 8:1) Madankollu, hu ma stabbiliex is-​Saltna f’dak iż-​żmien, u lanqas mal-​irxoxt tiegħu. (Atti 1:6-8) Anki meta telaʼ s-​sema, xorta kellu jistenna saż-​żmien maħtur minn Jehovah. (Salm 110:1, 2; Lhud 1:13) Il-​profezija Biblika turi li dak iż-​żmien maħtur intemm fl-​1914 E.K. Madankollu, xi ħadd se jistaqsi, ‘Minflok gvern perfett, ma mmarkatx l-​1914 il-​bidu taʼ żjieda fil-​gwaj tad-​dinja?’ Dak hu eżattament il-​punt! Hemm konnessjoni mill-​qrib bejn il-​miġja tas-​Saltna t’Alla u l-​ġrajjiet katastrofiċi tas-​snin riċenti, kif se naraw issa.

⁴⁶ Minn xi 35 sena qabel l-​1914, The Watchtower (It-Torri tal-​Għassa, li issa hi l-​iktar rivista mxerrda mad-​dinja kollha) bdiet tiġbed l-​attenzjoni lejn l-​1914 bħala sena mmarkata fil-​profezija tal-​Bibbja. Dawn il-​profeziji bdew ikollhom twettieq li jispikka fl-​1914. Waħda minn dawn kienet il-​profezija taʼ Ġesù stess, imlissna 1,900 sena ilu, rigward “is-​sinjal” li kellu jidher fit-​tmiem tas-​sistema t’affarijiet u li kellu jagħti prova li hu kien preżenti b’mod inviżibbli bil-​qawwa taʼ sultan. Bit-​tweġiba għall-​mistoqsija tad-​dixxipli tiegħu dwar dan “is-​sinjal,” hu qal: “Ġens se jqum kontra ġens u saltna kontra saltna, u se jkun hemm nuqqas taʼ ikel u terremoti f’post wara l-​ieħor. Dawn l-​affarijiet kollha huma bidu tal-​weġgħat taʼ hemm.” (Mattew 24:3, 7, 8) Fi twettieq li jolqtok, l-​ewwel minn gwerer dinjin bdiet fl-​1914, billi ġabet qerda sebaʼ darbiet akbar mid-​900 gwerer kollha fl-​2,500 sena taʼ qabel! Weġ­għat taʼ hemm baqgħu jinħassu minn dak iż-​żmien ’il hawn. Ġarrabt int il-​qerda tal-​gwerra, in-​nuqqas tal-​ikel, jew xi wieħed mit-​terremoti l-​kbar li flagellaw l-​art mill-​1914 ’il hawn? Jekk inhu hekk, inti rajtu b’għajnejk “is-​sinjal” taż-​“żmien tat-​tmiem” tas-​sistema t’affarijiet.​—Danjel 12:4.

47. Il-​ġrajjiet li jwettqu “is-​sinjal” kif intensifikaw fi snin riċenti?

⁴⁷ Il-​“weġgħat taʼ hemm” laħqu quċċata matul it-​Tieni Gwerra Dinjija, li kienet erbaʼ darbiet iktar qerrieda mill-​Ewwel Gwerra Dinjija, u komplew fl-​era nukleari, bi twettieq taʼ profezija oħra taʼ Ġesù: “Fuq l-​art dieqa taʼ ġnus, billi ma jafux kif joħorġu . . . , waqt li rġiel iħosshom ħażin bil-​biżaʼ u l-​istennija tal-​affarijiet li ġejjin fuq l-​art abitata.” (Luqa 21:25, 26) Iż-​żjieda fid-​delitti u l-​ħażen, fid-​diżubbidjenza u d-​delinkwenza fost it-​tfal, flimkien maż-​żjieda fin-​nuqqas taʼ mħabba lejn Alla u fl-​immoralità​—dawn l-​iżviluppi allarmanti kienu mbassrin ukoll bħala li jimmarkaw “l-​aħħar jiem” taʼ dis-sistema ħażina.​—2 Timotew 3:1-5; Mattew 24:12.

48. Min hu responsabbli għall-​gwaj fuq l-​art, u għala żdiedu l-​gwaj mill-​1914?

⁴⁸ Madankollu, jekk il-​gvern tas-​sema ġie stabbilit fl-​1914, għala hawn tant niket fuq l-​art? Huwa Satana x-​Xitan li jaħti. Meta Kristu rċieva l-​gvern tas-​Saltna, l-​ewwel att tiegħu kien li jikkumbatti fi gwerra maʼ Satana fis-​smewwiet inviżibbli. Bħala riżultat, Satana, “li qed iqarraq bl-​art kollha abitata,” ġie mixħut flimkien mal-​anġli tiegħu ’l isfel fil-​viċinanza tal-​art. Billi jaf li l-​qerda tiegħu tinsab fil-​qrib, hu jqanqal kemm jiflaħ inkwiet fuq l-​art. Huwa “jaħasra għall-​art u għall-​baħar, għaliex ix-​Xitan niżel għandkom billi għandu għadab kbir, għax jaf li perijodu qasir taʼ żmien baqagħlu.”​—Rivelazzjoni 12:7-9, 12.

49. (a) X’se jiġri lil dawk li qed “jirrovinaw l-​art”? (b) Jehovah kif se jesegwixxi d-​“deċiżjoni ġudizzjarja” tiegħu fuq il-​ġnus?

⁴⁹ Se jkun hemm tmiem għal dan il-​gwaj? Iva!​—meta l-​gvern tas-​sema nnifsu, is-​Saltna t’Alla li Jistaʼ Kollox, imur fl-​azzjoni biex “iġib f’rovina lil dawk li qed jirrovinaw l-​art.” (Rivelazzjoni 11:18; Danjel 2:44) Alla qatt ma se jippermetti lill-​qawwiet politiċi, lill-​Kristjani foloz, jew lil kwalunkwe xi ħadd ieħor li jeqridlu x-​xogħol taʼ jdejh, l-​art, bit-​tagħmir nukleari tagħhom. Minflok, hu jiddikjara: “Id-​deċiżjoni ġudizzjarja tiegħi hi li niġbor il-​ġnus, għalija biex niġbor flimkien saltniet, sabiex inferraʼ fuqhom id-​denunzja tiegħi, il-​għadab jaħraq kollu tiegħi.” (Sofonija 3:8) Jehovah, permezz tal-​Kristu tiegħu, se juża forzi kbar li hu jikkontrolla fl-​univers biex iġib qerda li tgħaġġeb fuq dawk kollha li jsegwu lil Satana fuq l-​art. Din se tkun fuq skala globali, simili għall-​kobor immens tad-​Dulluvju taʼ żmien Noè.​—Ġeremija 25:31-34; 2 Pietru 3:5-7, 10.

50. (a) X’inhi “Armageddon”? (b) Min biss se jibqaʼ ħaj wara Armageddon?

⁵⁰ Fil-​Bibbja din il-​qerda tal-​ġnus ħżiena hi msejħa l-​battalja t’Alla taʼ Armageddon. (Rivelazzjoni 16:14-16) Nies ġwejdin biss, dawk li jfittxu lil Jehovah u t-​tjieba tiegħu, jistgħu jibqgħu ħajjin wara Armageddon għal ġos-​sistema ġdida taʼ paċi t’Alla. (Sofonija 2:3; Isaija 26:20, 21) Rigward dawn il-​Bibbja tgħid: “Iżda l-​ġwejdin infushom se jkollhom pussess tal-​art, u tassew se jsibu l-​għaxqa bnina tagħhom fl-​abbundanza taʼ paċi.” (Salm 37:11) Ix-​xogħol grandjuż taʼ li nġeddu l-​Ġenna fuq l-​art imbagħad se jibda!

Edukazzjoni biex Tidħol fil-​Ġenna tal-​Art

51. Għala hu neċessarju għalik li tieħu azzjoni issa?

⁵¹ Tixtieq int tgħix fil-​Ġenna tal-​art? Jekk it-​tweġiba tiegħek hi ‘Iva,’ int tifraħ li tkun taf li meta Ġesù tkellem dwar is-​sistema kollha nkwiet tal-​lum u “s-​sinjal” tal-​qerda li ġejja fuqha, hu żied, “Din il-​ġenerazzjoni bl-​ebda mod m’hi se tgħaddi sakemm dawn l-​affarijiet kollha jseħħu.” Xi wħud, tal-​anqas, mill-​ġenerazzjoni li rat il-​“bidu tal-​weġgħat taʼ hemm” fl-​1914 se jgħixu biex jaraw il-​Ġenna mġedda fuq l-​art. (Mattew 24:3-8, 34) Madankollu, huwa fatt taʼ niket li l-​biċċa l-​kbira tan-​nies qegħdin fit-​triq il-​wiesgħa li twassal għall-​qerda. (Mattew 7:13, 14) Ma tantx fadal żmien għalihom biex jinbidlu. Kemm għandek għalxiex tkun grat li Jehovah ipprovda t-​twissija fil-​waqt! Peress li Jehovah jridek tgħix, hu se jgħinek biex tieħu l-​passi għaqlin.​—2 Pietru 3:9; Eżekjel 18:23.

52. X’tinħtieġ biex tagħmel għażla tajba rigward reliġjon?

⁵² Il-​bżonn urġenti tiegħek issa hu għal tagħrif eżatt. (1 Timotew 2:4; Ġwann 17:3) Dan fejn tistaʼ tiksbu? Tistaʼ ssibu fi kwalunkwe reliġjon? Xi nies igħidu li r-​reliġjonijiet kollha jwasslu lejn l-​istess mira, sewwa sew bħalma l-​passaġġi kollha taʼ muntanja jwasslu lejn il-​quċċata. Kemm huma żbaljati! Biex isibu l-​passaġġ it-​tajjeb, dawk li jmorru fuq il-​muntanji jużaw il-​mapep, u anki jikru gwidi. Bl-​istess mod, hemm biss reliġjon waħda tal-​verità li twassal għall-​ħajja taʼ dejjem, u tinħtieġ il-​gwida biex issibha.​—Atti 8:26-31.

53. (a) Biex tikseb il-​ħajja taʼ dejjem, xi trid tkompli tagħmel int? (b) Liema tentazzjonijiet minn Satana jistaʼ jkollok tegħleb?

⁵³ Dan il-​ktejjeb ġie pprovdut mix-​Xhieda taʼ Jehovah biex igħin lilek. Diġà għenek biex tifhem xi wħud mill-​veritajiet bażiċi tal-​Bibbja, hux tassew? Bla dubju int ikkonfermajt għalik innifsek li kull punt hu bbażat fuq il-​Kelma spirata t’Alla. Issa, biex tagħmel progress lejn il-​mira tiegħek, int trid tkompli titgħallem. Bħalma edukazzjoni sekulari xierqa hi meħtieġa biex wieħed ikollu post fis-​soċjetà taʼ kuljum, hekk ukoll hi meħtieġa edukazzjoni Biblika xierqa biex inkunu mgħammrin biex nidħlu fis-​soċjetà li se tibqaʼ ħajja fil-​Ġenna tal-​art. (2 Timotew 3:16, 17) Satana jistaʼ jtellfek billi jqanqal lil xi ħbieb tal-​qalb jew lil membri tal-​familja biex jopponuk jew billi jiġbdek lejn mogħdijiet egoistiċi materjalistiċi jew immorali. Iċċedilux lil Satana. Is-​sigurtà tiegħek u l-​futur kollu tiegħek u tal-​familja jiddependi fuq li int tistudja l-​Bibbja aktar.​—Mattew 10:36; 1 Ġwann 2:15-17.

54. Liema provvediment ieħor għal edukazzjoni għamel Jehovah fl-​inħawi tiegħek?

⁵⁴ Minbarra li tkompli fl-​istudju preżenti tiegħek tal-​Bibbja, hemm mod ieħor kif titgħallem. In-​nies tal-​inħawi tiegħek li huma nteressati f’edukazzjoni Biblika jattendu regolarment il-​laqgħat fis-​Sala tas-​Saltna lokali. Dawk kollha li jattendu jkunu qegħdin hemm biex jieħdu struzzjoni mill-​Bibbja u qegħdin sinċerament jipprovaw isiru persuni aħjar. Huma jilqgħu lill-​ġodda mill-​qalb, billi jgħidulhom, “Ejjew, u ħa nitilgħu lejn il-​muntanja taʼ Jehovah [il-post taʼ qima tiegħu] . . . u hu se jgħallimna dwar mogħdijietu, u aħna se nimxu fil-​passaġġi tiegħu.” (Isaija 2:3) Raġunijiet tajba għala għandna nattendu laqgħat Bibliċi huma spjegati f’​Lhud 10:24, 25, li jaqra hekk: “Ejjew inqisu lil xulxin biex inqanqlu l-​imħabba u xogħlijiet tajba, billi ma nitilqux il-​ġbir tagħna flimkien, bħalma xi wħud għandhom drawwa, iżda billi ninkuraġġixxu lil xulxin, u dan aktar hekk kif taraw il-​jum riesaq fil-​qrib.”

55. (a) L-​organizzazzjoni taʼ Jehovah b’liema modi hi differenti minn oħrajn? (b) Ix-​Xhieda taʼ Jehovah kif inhuma magħqudin bħal ebda poplu ieħor?

⁵⁵ Meta int tassoċja mal-​organizzazzjoni taʼ Jehovah, issib li l-​atmosfera hi ferm differenti minn dik tat-​tempji u l-​knejjes. Ma hemm ebda ġbir taʼ flus bil-​kopp, ebda lletikar u ġlied, u ebda diskriminazzjoni minħabba l-​isfond tal-​familja jew il-​qagħda finanzjarja taʼ dak li jkun. L-​aktar kwalità li tispikka fost ix-​Xhieda taʼ Jehovah hi l-​imħabba. L-​ewwel, iħobbu lil Jehovah, u t-​tieni, iħobbu lin-​nies. Dawn huma l-​marki tal-​veri Kristjani. (Mattew 22:37-39; Ġwann 13:35) Int imissek tattendi l-​laqgħat tagħhom u tara int stess kif dan hu veru. Żgur li tibqaʼ mpressjonat bil-​għaqda tagħhom. Hemm aktar minn tliet miljuni Xhieda mad-​dinja kollha f’aktar minn 200 art. Madankollu, ix-​Xhieda mal-​art kollha jsegwu l-​istess programmi fil-​laqgħat tagħhom. U bis-​saħħa taʼ stampar simultaneju f’bosta lingwi, fil-​laqgħat taʼ kull ġimgħa tagħhom ix-​Xhieda taʼ Jehovah mad-​dinja kollha jistudjaw l-​istess suġġetti Skritturali f’temp taʼ ftit sigħat minn xulxin. Il-​għaqda li teżisti fl-​organizzazzjoni taʼ Jehovah fiż-​żminijiet tal-​lum huwa miraklu f’din id-​dinja maqsuma.

56. (a) Liema benefiċċji tistaʼ tikseb int minn sħubija mal-​organizzazzjoni taʼ Jehovah? (b) Meta jqumu l-​problema, kif għandek tirreaġixxi? (ċ) Għala hu mportanti għalik li tiddedika ħajtek lil Jehovah?

⁵⁶ Hekk kif tibda tassoċja regolarment man-​nies taʼ Jehovah, int tkun trid tlibbes lilek innifsek bil-​“personalità l-​ġdida” u tikkultiva l-​frott tal-​ispirtu t’Alla​—“l-​imħabba, l-​ferħ, il-​paċi, is-​sabar fit-​tul, il-​qalb tajba, it-​tjubija, il-​fidi, il-​ħlewwa, ir-​rażna.” (Kolossin 3:10, 12-14; Galatin 5:22, 23) Dan iġiblek ferħ profond. Jistaʼ jkollok problemi x’tegħleb minn żmien għal żmien peress li tgħix f’dinja korrotta u wkoll minħabba l-​imperfezzjonijiet tiegħek stess. Iżda Jehovah se jgħinek. Il-​Kelma tiegħu tassigura lil dawk li sinċerament qegħdin jipprovaw jogħġbuh: “Tkunu anzjużi fuq xejn, iżda f’kollox bit-​talb u bit-​tħannin flimkien maʼ radd il-​ħajr ħa jkunu t-​talbiet tagħkom imgħarrfin lil Alla; u l-​paċi t’Alla li tisboq kull ħsieb se tgħasses lil qlubkom u l-​qawwiet taʼ moħħkom permezz taʼ Kristu Ġesù.” (Filippin 4:6, 7) Int se tħossok miġbud mill-​imħabba taʼ Jehovah, tant li tkun trid taqdih. Ix-​Xhieda taʼ Jehovah jieħdu pjaċir juruk kif tistaʼ int tiddedika ħajtek lil dan Alla l-​maħbub u ssir wieħed mix-​xhieda pprivileġġjati tiegħu. (Salm 104:33; Luqa 9:23) Iva, huwa privileġġ. Aħseb ftit! Bħala adoratur taʼ Jehovah, int tistaʼ tilħaq il-​mira taʼ li tgħix għal dejjem f’ġenna hawn fuq l-​art.​—Sofonija 2:3; Isaija 25:6, 8.

57. (a) Fis-​sistema l-​ġdida, liema relazzjoni intima se jkun hemm bejn Alla u l-​bnedmin? (b) X’inhuma xi wħud mill-​barkiet li se tkun tistaʼ tgawdi int imbagħad?

⁵⁷ Kompli, mela, studja u ikber fl-​imħabba u fl-​apprezzament lejn Alla Jehovah, Ibnu, u l-​gvern taʼ tjieba tas-​sema. Waqt li tiddeskrivi l-​gvern t’Alla u l-​barkiet li se tferraʼ fuq il-​bnedmin, il-​profezija tal-​Bibbja tgħid: “Ħares! It-​tinda t’Alla hi mal-​bnedmin u hu se jgħammar magħhom u huma se jkunu l-​popli tiegħu. U Alla nnifsu se jkun magħhom.” “Alla nnifsu,” li hu mgħolli ferm ’il fuq mill-​ħakma egoista u qerrieda tal-​bniedem tal-​lum, se jkun qrib ferm bħala Missier ħanin għal dawk kollha li jħobbuh u jqimuh f’dik is-​sistema l-​ġdida. Tabilħaqq, se jkun hemm biss reliġjon waħda, il-​vera qima taʼ Alla Jehovah, u l-​adoraturi tiegħu se jgawdu r-​relazzjoni intima miegħu bħal taʼ wlied mal-​Missier. X’Missier taʼ mħabba se juri li hu! “U se jimsaħ kull demgħa minn għajnejhom, u l-​mewt ma tkunx iżjed, la l-​għali la l-​biki lanqas l-​uġigħ ma jkunu iżjed. L-​affarijiet taʼ qabel għaddew.”​—Rivelazzjoni 21:3, 4.

58. Għala tistaʼ tibqaʼ ċert li Jehovah se ‘jagħmel l-​affarijiet kollha ġodda’?

⁵⁸ B’hekk il-​miraklu kbir taʼ li tiġi stabbilita ġenna fuq l-​art taħt gvern perfett tas-​sema se jkun twettaq. Dan ċert daqs kemm hu ċert li x-​xemx se titla u se tinżel għada. Għax il-​wegħdiet t’Alla Jehovah, il-​ħallieq tas-​sema u l-​art, huma dejjem ‘fidili u veri.’ Huwa hu li jiddikjara mit-​tron tiegħu fis-​sema: “Ħares! Qed nagħmel l-​affarijiet kollha ġodda.”​—Rivelazzjoni 21:5.

Waqt li terġaʼ teżamina dan il-​ktejjeb, kif twieġeb int għal dawn il-​mistoqsijiet li ġejjin?

Il-​Bibbja b’liema modi tispikka?

X’tgħallimt int dwar Alla?

Min hu Kristu Ġesù?

Min hu Satana x-​Xitan?

Alla għala ppermetta l-​ħażen?

Il-​bniedem għala jmut?

X’inhi l-​qagħda tal-​mejtin?

X’inhu r-​rahan?

Fejn u kif iseħħ l-​irxoxt?

Is-​Saltna x’inhi, u x’se twettaq?

X’inhu “is-​sinjal” tal-​“egħluq tas-​sistema taʼ affarijiet”?

Kif tistaʼ int tħejji għal ħajja taʼ dejjem fil-​Ġenna tal-​art?

[Noti taʼ taħt]

[Stampi f’paġna 13]

Bħala ħolqien, il-​bniedem hu ferm superjuri mill-​annimali

[Stampa f’paġna 18]

Ġesù kien daqs ir-​raġel perfett Adam