Ukulingana ne Yohani

4 Walile Tatakulu* wamanya kuno Awafalisi wivwile ukuti akubadizya nu kupanga awasambi awavule ukucila Yohani— 2 nanti acakuti e Yesu asa wino wabadizyanga lelo awasambi wakwe awano wabadizyanga— 3 wafumile mu Yudeya nu kunyocela naswinya ku Galili. 4 Lelo calondekwanga ukuti mpaka apite mu Samariya. 5 Acino wizile mu kaya* ka Samariya kano wakakwita ukuti Sikari mupipi ni mpanga yino e Yakobi wapile umwana wakwe e Jozefu. 6 Kulyanye akuno kwalinji nicifula ca kwe Yakobi. Walile e Yesu watonta pa mulandu nu wulendo, wisile pe conye co-o icifula. Impindi yalinji kuma 12 awazi ya musanya.

7 Umwanaci umwina Samariya wizile mukusemba aminzi. Nga Yesu amunena ati: “Nkulengako aminzi.” 8 (Lyo awasambi wakwe wayile mu kaya mukukala ivyakulya.) 9 Ngu mwanaci umwina Samariya amwasuka ati: “Nga cani cino wewe we mu Yuda ukulenga nene ne mwina Samariya aminzi yakumwa?” (Amuno awa Yuda wasikwivwana na wina Samariya.) 10 Nge Yesu amwasuka ati: “Utamanyile icawila cino Leza akukupa swinya utamanyile na wino akuti, ‘mpako aminzi yakumwa.’ Amuno wange umanye nga tewamulenga, nawe nga tewakupa aminzi yano yakapa uwumi”. 11 Nu mwanaci amwasuka ati: “Musambilizya, nga vyo utakweti ne baketi yakusembela aminzi, ni cifula naco acitali, nga minzi ya wumi wandi uyafumye kwi? 12 Uzye wakulisya ukucila umukwasi witu uwa ku kali* e Yakobi wino watusila co-o icifula, swinya wino wamwanga na wana wakwe ni ng’ombe mwe conye icifula?” 13 Nge Yesu amwasuka ati: “Wensinye wino akamwa ya-a aminzi, aliwa nu lusala na swinya. 14 Nomba wensinye wino wamwa aminzi yano niza namupa, ataliyivwa ulusala na swinya, lelo ya-a aminzi yano ndimupa yaliwa mwe weliwe ngati acifula ca minzi amavule yano yakapa uwumi wa muyayaya.” 15 Ngu mwanaci amunena ati: “Musambilizya mpaa yayo aminzi, pakuti ntize njivwe ulusala naswinya nanti ukwiza kawili kawili mukusemba aminzi kwe yo-o incende.”

16 Apano e Yesu amwasuka ati: “Yanga kite wakwako mwize nawe.” 17 Ne umwanaci alanda ati: “Ntatwalwa.” Nga Yesu amunena ati: “Acisinka cino walanda ukuti, ‘Utatwalwa.’ 18 Amuno watwazilwepo ku wonsi 5, ne wino ukwikala nawe pe yo-o impindi, ase wakwako. Fwandi cino tewalanda acisinka.” 19 Nu mwanaci amunena ukuti: “Musambilizya, nalola ukuti we kasesema. 20 Awakwasi witu awakukali wapepelanga pe wo-o umwamba, lelo mwe wa Yuda mukati awantu wazipizile ukupepelavye mu Yerusalemu.” 21 Nga e Yesu amunena ati: “Nsuwila, impindi yikwiza pano mwemwe mutaliwa mwapepa Tata pe wo-o umwamba nanti mu Yerusalemu. 22 Mukapepa cino mutamanya, lelo sweswe tukapepa cino twamanya amuno awa Yuda awano Leza watalicizile ukusokololela vino alicita pakupususya awantu. 23 Nanti ciwe wo-o, impindi yikwiza, swinya ayonye yo-o, pano wano wakapepa Leza ukulingana na vino akalonda, waliwa mupepa mu muzimu wakwe na mu cisinka. Swinya e Tata akalondesya sana awamusango wo-o ukumupepa. 24 E Leza amuzimu, fwandi wano wakamupepa wazipizile ukumupepela mu muzimu wakwe na mu cisinka.” 25 Ne umwanaci wamunenile ukuti: “Namanya kali ukuti wino akakwitwa ukuti Klistu aliyiza. Swinya awino alitulondololela vyonsinye”. 26 Nge Yesu amunena ati: “Anenenye, ne muno nkulanda nawewe.”

27 Nomba pe yilyanye impindi, awasambi wakwe wanyosile, swinya wazungusile nkaninye pano wazanile e Yesu akulanda na we-e umwanaci. Lelo pasi nanti wumwi pe woliwo wino wakolowozizye Yesu cino walandilanga na we-e umwanaci, nanti vino walondanga kwe weliwe. 28 Acino umwanaci wasile icakusembelamo aminzi,* aya mukaya nu kunena awantu ukuti: 29 “Tuyani mukalole umuntu wino anenile vyonsinye vino nacitanga. Uzye angalanga awili e Klistu?” 30 Na wantu wafumile mukaya awaya kwe Yesu.

31 Pano awantu watani wafike, awasambi wanenanga Yesu ukuti: “Rabi,* lya ivyakulya.” 32 Lelo wawasusile ukuti: “Nkweti kali ivyakulya vino mwemwe mutamanyile.” 33 Apano awasambi awatalika ukuwuzyanya ukuti: “Uzye lyo weweni wino amuletezile ivyakulya?” 34 Nga Yesu awanena ati: “Ivyakulya vyane akucita ukulonda kwa kwe Leza wino wantumile nu kumalizya umulimo wakwe.” 35 Mukuti kwasyalavye imyezi 4 pakuti kuwe ukusombola, lelo nkuminena nkuti: Lolecesyani ivilimwa mu vyalo, vicile kali vikulondekwa ukusombola. 36 Wino akasombola akapocelela icilambu nu kulonganika ivilimwa vya wumi wamuyayaya pakuti wino akakomela na wino akusombola wize wasecelele ponga. 37 Acino imvwango yakuti: “Wenga akakomela ne winji akasombola, ayacisinka.” 38 Namituma mukusombola vino mutakomezile. Wano wawomvilemo awanji, lelo mwemwe mwazanamo uwuzima mwe vino wanji wawomvile.”

39 Awina Samariya awavule awa mwe kako akaya, wasuwizile Yesu pa mulandu nu wusinincizyo wuno umwanci wapile uwakuti awino wamunenile vyonsinye vino wacisile kali. 40 Acino pano awina Samariya wayile kwe weliwe, wanenile Yesu ukuti ayikale nawo. Nawe wisile nawo amanda yawili. 41 Walile awantu wivwa vino Yesu wasambilizyanga, awavule wamusuwizile nkaninye, 42 swinya wanenile we-e umwanaci ukuti: “Pa-a tutasuwizilevye pa mulandu na mazwi yano tewatunena; amuno twayivwila sweweneconye swinya twamanya ukuti we-e umuntu alipususya awantu pakuti e Leza ayize awapale.”

43 Pansizi ya manda yawili e Yesu wafumileko aya ku Galili. 44 Wayilandizile umweneconye ukuti e kasesema wasimucindika ku mwawo. 45 Acino pano wafisile mu Galili, awina Galili wamupocelezile pa mulandu wakuti waweni ivizungusyo vino wacisile mu Yerusalemu pa cakupitililwa.

46 Yesu wanyocezile na swinya ku Kana mu Galili kuno wapiluzile aminzi ukuwa waini. Nomba ku Kapenahumu kwalinji e songo wa kwi sano* wino umwana wakwe walwile. 47 Pano we-e umonsi wivwile ukuti e Yesu afumile ku Yudeya ayile mu Galili, wayile kwe weliwe nu kumulambilizya ukuti apite nawe ku Kapenahumu pakuti akapozye umwana wakwe, amuno walinji mukufwa. 48 Lelo e Yesu wamunenile ati: “Pasi wino angazumila pe mwemwe sukavye nga mwalola ivizungusyo ni vimanyilo.” 49 Nge songo wa kwi sano* amunena ati: “Tatakulu, tuye tupite zuwa pano umwana wane atani afwe.” 50 Yesu nawe amunena ukuti: “Pitanga ku ng’anda, umwana wako apozile.” Umonsi wasuwizile ya-a amazwi yano Yesu wamunenile, apita nu kupita. 51 Lelo pano wanyocelanga, wasunkinye awawomvi wakwe wano wamukoncezile mukumunena ukuti, umwana wako apozile. 52 Nawe wawakolowozizye impindi yino wapozile. Nga awamwasuka ati: “Wapozile yo-o indwala ye malelya* mutondo* ku ma 13 awazi.”* 53 Nga yisi wa mwana ayiluka ukuti ayilyanye impindi yino Yesu walandizilepo ukuti: “Umwana wako apozile.” Apano weliwe na wa mu ng’anda yakwe wonsinye awasuwila mwe Yesu. 54 Co-o acili icizungusyo ca citi wili cino Yesu wacisile mu Galili pano wafumile ku Yudeya.