Ukulingana ne Luka

3 Mu mwaka wa 15 uwakuteka kwa kwe Tiberia kaisare, lyo Ponti Pilato we kateka wa mu citungu ca Yudeya, e Herodi* watekanga mu citungu ca Galili, ne Filipi umunyina watekanga mu citungu ca Ituriya ne Trakoniti, ne Lisanya nawe lyo we kateka wacitungu ca Abileni, 2 e Anasi walinji pa ntunguluzi zya simapepo, ne Kayafasi lyo we simapepo mukulu, izwi lya kwe Leza lizile kwe Yohani umwana Zekariya mu mpanga.

3 E Yohani wapisile mu twaya twa Yordani tonsinye, nu kuwizizya awantu ukuti wabadizwe pakulanjizya ukuti walapizile pakuti watetelwe ku membu zyawo. 4 Vyacitisile ndi wulyanye vino vyalemvilwe mwi buku lya kwe Ezaya ukuti: “Wumwi akupunda mu mpanga akuti: ‘Pekanyani inzila ya kwe Yehova!* Nu kuyizifya. 5 Zicilani imikonko yonsinye mupase ni myamba; yololani inzila inyongane muzifye ni nzila ya vizinji yololoke; 6 apano awantu wonsinye walilola ukupususya kwa kwe Leza.’”

7 Pano awantu wayanga kwe Yohani ukuti wabadizwe, wawanenanga ukuti: “Mwe wana wanzoka mwee! Weweni wino waminena ukuti mulipusuka ku wukali wa kwe Leza wuno wuli mukwiza? 8 Citanji vino vikulanjizya ukuti mulapizile. Mutati mwayiwipa ukuti, ‘Mwe wana wa kwe Abrahamu.’ Amuno nkuminena nkuti, e Leza nga kulonda angakatusya awana wa kwe Abrahamu mwe yanye ya-a amawe. 9 Impasa yili mupipi nu kuputula umusisi wa vimiti, acino umuti wonsinye wuno wusikoma ivikomwa ivizima waliwukoma nu kuwusumbila mu mulilo.”

10 Awantu watalisile ukumukolowozya wakuti: “Avyani fwandi vino tuzipizile ukucita?” 11 Nawe wawasusile ukuti: “Wensinye wino ali ni vizwalo viwili apeko wino atakweti ne wino ali ni vyakulya apeko wino atakweti.” 12 Wakasoncezya wa misonko nawonye wayile kwe weliwe ukuti wabadizwe swinya wamunenile ukuti: “Musambilizya avyani vino tuzipizile ukucita?” 13 Nawe wawasusile ukuti: “Mwapoka imisonko ukulingana na vino isundo lyalanda, mutalundapo.” 14 Awasoja nawonye wamukolowozizye ukuti: “Nga sweswe avyani vino tuzipizile ukucita?” Nawe wawanenile ukuti: “Mutapoka awantu impiya pa maka swinya mutawafyenjelecezya, lelo mwatima na vino wamilipizile.”

15 Nomba pa mulandu wakuti awantu wenecelanga e Klistu, watalisile ukwelenganya ukuti: “Nce pamwi e Yohani nye awili e Klistu?” 16 E Yohani nawe wawanenile ukuti: “Nene nkumibadizya vye mu minzi lelo wino akwiza awamaka ukundusya wino ntawa ni nsambu zyakumuzula indyatu. Weni alimibadizizya ku muzimu wa kwe Leza nu mulilo. 17 Alemile icakwelela ingano, aliyela impumba zya ngano nu kuziwika umwakusunjila ivyakulya, ni lyelelo alilyoca mu mulilo wuno wutange wuzime.”

18 E Yohani wawomelezizye awantu mu nzila impusane pusane swinya watwalilizile nu kuwizya ilyasi ilizima ku wantu. 19 Lelo e Yohani wakalipizile e Herodi e kateka wa citungu ca Galili, pa mulandu wakuti watwazile Herodiya e muka songo wakwe, swinya wamukalipizile na pa viwipe vyonsinye vino wacisile. 20 E Herodi wacisile iciwipe nacinji: Wawisile e Yohani mu cifungo.

21 E Yohani wabadizizye awantu awavule swinya awino wabadizizye ne Yesu. Nomba pano Yesu wapepanga, iyulu lizile aliyuka, 22 umuzimu wa kwe Leza wuno walolekanga ngati ankunda wizile pe weliwe ni zwi livwisile ukufuma mwi Yulu aliti: “We mwana wane wino nakunda; ukansecelesya nkaninye.”