Vino Yehova Akakwasuka Amapepo Yitu

1-2. Avyani vino mpindi zimwi tungavwilika nga cakuti twapepa?

UZYE mukatela amuyivwapo ngati Yehova atakwasuka amapepo yinu? Nga mwayivwapo, lyo mutawa mwenga. Awanawitu na wankazi awavule walanda ukuti wayivwapo wo-o, maka maka pano wapitanga mu ntazi. Nasweswenye nga cakuti tukupita mu ntazi, mpindi zimwi cingatuwomela ukulola vino Yehova akwasuka amapepo yitu.

² Mwe co-o icipande, twandi tulande pe vino vingalenga tusuwile ukuti e Yehova akakwasuka amapepo ya wawomvi wakwe. (1 Yoh. 5:15) Swinya twandi twasuke na mawuzyo ndi vino: Amulandu ci wuno manda yamwi cingaloleka ngati e Yehova atakwasuka amapepo yitu? Anzila ci zino akawomvya pa kwasuka amapepo mwe ya-a manda?

MPINDI ZIMWI ATANGA AYASUKE NDI VINO TUKWENECELA

3. Amulandu ci wuno Yehova akalonda twapepa kwe weliwe?

³ E Baibolo yikatunena ukuti e Yehova watukunda nkaninye swinya twacindama kwe weliwe. (Haga. 2:7; 1 Yoh. 4:10) Awuli umulandu wuno akalonda twalenga ukuti atwavwe. (1 Pet. 5:6, 7) Swinya akalonda ukutwavwa ukupalamila kwe weliwe nu kuti twasipicizya intazi.

4. Twamanya wuli ukuti e Yehova akakwasuka amapepo ya wawomvi wakwe? (Lolani ni cikope.)

⁴ Ilivule, mu Baibolo tukawazya pe vino Yehova wasusile amapepo ya wawomvi wakwe. Uzye mungelenganyako pe wamwi wano Yehova wasusile amapepo yawo? Wenga pe wa-a, amfumu Davidi. Mu wumi wakwe wonsinye, e Davidi walinji na walwani awavule swinya wapepanga na kwe Yehova ukuti amwavwe. Wanda wumwi walambilizizye e Yehova ukuti: “Mfumu Leza, yivwa ipepo lyane, yivwa ukulilizika kwane! Wemulungamane swinya umusuwilwa, achaleka njivwa!” (Amalu. 143:1) E Yehova wasusile amapepo yano Davidi wapepanga ukuti amupususye. (1 Sam. 19:10, 18-20; 2 Sam. 5:17-25) Fwandi wungalanga awuli umulandu wuno Davidi walandizile ukuti: “[E Yehova] akuyanga kwakwe wonsi wano wakumwita.” Naswenye tungazumila ukuti ya-a amazwi aya cisinka.​—Amalu. 145:18.

5. Uzye we lyonsinye pano Yehova wasukanga amapepo ya wawomvi wakwe ukulingana na vino wenecelanga? Landani pa cakulolelako. (Lolani ni cikope.)

⁵ Mpindi zimwi e Yehova atanga ayasuke amapepo ukulingana na vino tukwenecela. Wonye avino calinji ku mutumwa Paulo. Walenzile kwe Yehova ukuti amufumye ‘umunga mumuwili.’ Wapepezilepo imiku yitatu pe yo-o intazi. Nomba, uzye e Yehova wasusile ya-a amapepo? Wamwasusile, lelo atamwasusile ukulingana na vino wenecelanga. Atafumizyepo intazi yino Paulo wakweti, lelo wamupilevye amaka yano walondekwanga pa kuti atwalilile ukumuwombela ni cisinka.​—2 Kor. 12:7-10.

6. Amulandu ci wuno mpindi zimwi tungalola ngati Yehova atakwasuka amapepo yitu?

⁶ Nasweswenye mpindi zimwi e Yehova angasuka ipepo litu mu nzila yino tutakwenecela. Twasuwila ukuti e Yehova wamanya inzila iyizima yino angatwavwilamo. Angacita ‘ivivule ukulusye vyonsi vino tukalenga, nanti vino tukakwelenganya.’ (Efes. 3:20) Conye acino cikalenga awakwasuka amapepo yitu pa mpindi nanti mu nzila iyipusaneko na vino tukwenecela.

7. Amulandu ci wuno tuzipizile ukupiluka pe vino tukapepelapo? Landani pa cakulolelako.

⁷ Nga cakuti twivwicisya ukulonda kwa kwe Yehova, tuzipizile ukupiluka pe vino tukapepelapo. Lekani tulande pe cino caciticizile umwanawitu Martin Poetzinger. We-e umwanawitu watili watwala, patazimvile wizile awamunyepa nu kumutwala mu nkambi yakuculilamo iya wa Nazi. Pakutalika, wapefile kwe Yehova ukuti amwavwe afume mu nkambi yakuculilamo pa kuti aye mukusakamala umuci nu kutalika ukuwomba umulimo wakuwizya na swinya. Lelo patili papita ama sabata yawili, waweni ukuti patalinji nanti cimwinye cino calanjizyanga ukuti walinji nu kufuma. Acino watalisile ukupepa ukuti: “Yehova ndanjizya manye cino ukulonda ncite.” Swinya wapilusile na mwe vino welenganyanga nu kutalika ukwelenganya pe vino awanawitu wano walinji nawo mu nkambi yakuculilamo wapitangamo. Awavule pe wa-a awanawitu wasakamikwanga pa waci na wana wano wasile. Acino wapefile ukuti: “Nasalifya Yehova pakumpa wo-o umulimo uwupya. Munjavwe ukuwomelezya awanawitu.” Pa myaka yonsinye 9 yino yakonsilepo ukufuma pa-a, wawomelezyanga nkaninye awanawitu.

8. Acintu ci icicindame cino tuzipizile twakwizuka pano tukupepa?

⁸ Tuzipizile twakwizuka ukuti e Yehova alificilisya ukulonda kwakwe swinya alicita wo-o, pa mpindi yino umweneco watantika. Amuno akalonda ukufumyapo intazi zyonsinye zino tukapitamo, ponga ngati amasanso, indwala ni mfwa. Alicita wo-o ukuwomvya Uwufumu wakwe. (Dan. 2:44; Ukuwu. 21:3, 4) Lelo pe yo-o impindi e Yehova wazumilizya ukuti e Satana awateka mpaka impindi yize yifike iyakumufumyapo.b (Yoha. 12:31; Ukuwu. 12:9) E Yehova wanga afumyepo intazi zino tukapitamo palyanye pano wamupondocezile, canga ciloleke ngati e Satana akateka icetenye. Lelo nanti acakuti tuzipizile ukulindilila ukuti e Yehova aficilisye vino watulaya, cisisula mukuti atanga atwavwe. Lekani tulandeko pe vimwi vino Yehova akacita pa kutwavwa.

VINO YEHOVA AKAKWASUKA AMAPEPO YITU MWE YA-A AMANDA

9. Uzye e Yehova angatwavwa wuli nga cakuti tukulonda ukupingulapo pe vimwi? Lanjililani.

⁹ Akatupa amano. E Yehova watulaya ukuti wandi awatupa amano yakupingula icete pa vintu. Ku cakulolelako, tukalonda e Yehova ukutupanda amano pano tukupingulapo pi twala nanti ukwikala uwusimbe. (Jemu. 1:5) Lekani tulande pe cino caciticizile e nkazi uwizina lya kuti Maria.c We-e nkazi wizile awatalika ukuvwambana nu mwanawitu wumwi. Pe yo-o impindi lyo wawa ni nsansa nkaninye ukuwomba wupayiniya wa mpindi zyonsi. Watili: “Pano twayanga tukumanyana apano twayanga tukukundilanako. Nizile indola ukuti nazipizile ukupingulapo pe cino nalinji nu kucita. Acino na pepezilepo imiku imivule. Nalondanga ukuti e Yehova anjavwe, lelo namanyile ukuti atalinji nu kumpingulila cino nazipizile ukucita.” E Maria waweni ukuti e Yehova wasusile ipepo lino wapefile ukuti amupe amano. Wamwasusile wuli? Pano wavwambilizyanga mu mabuku yitu, wazanile ivyasuko ku mawuzyo yano wakweti. Wakonsile na vino e mama wakwe wamupanzileko amano. Vyonsinye vyo-o, vyamwavwizye ukumanya vino wazipizile ukupingulapo swinya wapinguzilepo icete.

10. Ukulingana na Wafilipi 4:13, avyani vino Yehova akacita pa kwavwa awawomvi wakwe? Landani pa cakulolelako. (Lolani ni cikope.)

¹⁰ Akatupa amaka yakusipicizya intazi. Ngati awulyanye vino Yehova wavwizye umutumwa Paulo, nasweswenye angatupa amaka yakusipicizya intazi yino tukupitamo. (Wazyani Wafilipi 4:13. NWT) Lekani tulande pe vino Yehova wavwizye umwanawitu uwizina lya kuti Benjamin ukusipicizya intazi zino wapitangamo. Pano walinji amutici, wikalanga mu Africa mu nkambi muno wakasunjila wano wakasamala ukufuma kunsi zinji. Mo-o mu nkambi walinji ponga na wakwasi wakwe na wanyina 4. E Benjamin watili: “Napepanga lyonsinye kwe Yehova ukuti ampe amaka yakucita vino vingamusecelesya. E Yehova wasusile ipepo lyane pano wampile umutende wa mu melenganyo, amabuku yakuwomya isuwilo lyane apano na maka yakutwalilila ukuwomba umulimo wa kuwizya.” E Benjamin walanzile nu kuti: “Ukuwazya pe vino awanawitu na wankazi wakapitamo na vino Yehova wawavwa ukusipicizya intazi, kwanjavwizye ukutwalilila ukuwa ni cisinka kwe weliwe.”

11-12. Uzye e Yehova angasuka wuli amapepo yitu ukuwomvya awanawitu na wankazi? (Lolani ni cikope.)

¹¹ Akawomvya awanawitu na wankazi. Uwusiku pano e Yesu atani afwe, wapefile kwe Yehova ukufuma pansi ya mwezo. Walambilizizye e Yehova ukuti amwavwe pa kuti awantu watalola ngati apondocezile e Leza. Lelo nanti ciwe wo-o, e Yehova atafumizyepo wo-o umukwelengula. Wamwavwizye vye ukupitila mu kutuma umungeli uwa kumuwomelezya. (Luk. 22:42, 43) Nasweswenye e Yehova angatwavwa ukuwomvya awanawitu na wankazi. Wa-a awanawitu ncepamwi wangatutandalila nanti ukututumila vye e foni. Co-o cikulanjizya apatiswenye ukuti swensinye tuzipizile ukulola inzila zya kulandilamo “amazwi yankumbu” ku wanawitu na wankazi.​—Imilu. 12:25.

¹² Lekani tulande pe nkazi uwizina lya kuti Miriam. We-e nkazi wafwizilwe umulume. Nomba pa nsizi ya masabata vye matici, wasyazile wenganye pa ng’anda, naco calenzile awatalalilwa nu kusakamikwa nkaninye. Walilanga lyonsinye swinya walondanga nu wakulanda nawe. Walanzile ukuti: “Ntakweti amaka yakutumila uwili wensinye, acino napefile kwe Yehova. Nomba pano nacilinji nkupepa ko lyonkulila, nizile injivwa vye e foni yalila. Wino watumile walinji we eluda wino twamanyine sana.” We-e eluda nu muci wasansamusizye nkaninye e Miriam. Vyo-o vino vyacitisile vyalenzile asinincizye ukuti e Yehova awino walenzile ukuti we-e umwanawitu atume foni.

13. Uzye Yehova angawomvya wuli wano wasimupepa pa kwasuka amapepo yitu? Lanjililani.

¹³ Angawomvya awantu wano wasimupepa. (Imilu. 21:1) Mpindi zimwi akacita wo-o ukupitila mukulenga wano wasimupepa ukwavwa wakapepa wakwe. Ku cakulolelako, walenzile Imfumu Ara-ta-kerkasi ukuzumilizya e Nahemiya ukuti anyocele ku Yerusalemu pa kuti akavwilizyeko ukulimbuzya umusumba. (Nehe. 2:3-6) Na mwe yanye amanda, e Yehova angawomvya wano wasimupepa pa kuti watwavwe.

14. Uzye vino e Soo Hing wapisilemo vingamyavwa wuli? (Lolani ni cikope.)

¹⁴ Lekani tulande pe nkazi uwizina lya kuti Soo Hing. Umwana wakwe walwala indwala zya ku wongo izivule. Swinya wenye umwana wizile awa mu wusanso uwuwipisye nu kuyicisa nkaninye. Acino e Soo Hing nu mulume walesile incito nu kutalika ukumusakamala. Na co-o calenzile wapotwa ukwakuzana indalama. E Soo Hing walanzile ukuti walolanga ngati atalinji nu kukumanisya ukusipicizya yo-o intazi. Acino wanenile e Yehova vyonsinye vino vyalinji ku mwezo nu kumulenga ukuti amwavwe. Swinya waweni ukuti e Yehova wamwavwizye ukupitila mwe dokota wumwi. We-e dokota wizile awawikako sana amano nu kulola inzila yino angawavwilamo. Wo-o vino dokota wacisile, calenzile uwuteko wavwe e Soo Hing nu lupwa lwakwe swinya wazanile nu mwakwikala umuzima. Mukupita kwa mpindi, e Soo Hing watili: “Twaweni vino Yehova watwavwizye swinya twasinincizizye ukuti ‘we katolelela wamapepo.’”​—Amalu. 65:2.

TUZIPIZILE UKUWA NI SUWILO PA KULOLA NU KUSININCIZYA UKUTI YEHOVA AYASUSILE IPEPO

15. Acani cino cavwizye e nkazi wumwi ukusinincizya ukuti e Yehova wasukanga amapepo yakwe?

¹⁵ Asa welyonsi pano e Yehova akakwasuka amapepo yitu ukulingana na vino tukwenecela. Lelo akakwasuka amapepo yitu mu nzila yino yikalenga tutwalilile ukuwa awa cisinka kwe weliwe. Acino mwawikako sana amano pa kulola vino e Yehova akakwasuka amapepo yinu. Lolani vino e nkazi uwizina lya kuti Yoko wacisile wino walolanga ngati e Yehova atasukanga amapepo yakwe. We-e nkazi watalisile ukulemba mwi buku vyonsinye vino wapepelangapo. Patili papitako impindi, wizile atalika ukupituluka mwi buku lino walembangamo. Swinya wazanile ukuti e Yehova wasusile amapepo mupipi na yonsinye ukuwikako nayalyanye yano weni wiwilizile. Fwandi lyonsinye tuzipizile twakwelenganyapo sana nu kulola vino Yehova akwasuka amapepo yitu.​—Amalu. 66:19, 20.

16. Tungalanjizya wuli ukuti twawa ni suwilo nga cakuti twapepela pe cimwi? (Waheberi 11:6)

¹⁶ Pakulanjizya ukuti twawa ni suwilo, tutazipizile ukupelela vye pa kupepa, lelo tuzipizile nu kwenecela ukuti e Yehova angasuka amapepo yitu mu nzila iyili yonsinye. (Wazyani Waheberi 11:6.) Lekani tulandeko pe Mike nu muci e Chrissy. Wa-a awatwalane, walondanga sana ukuwombelako pa Bethel. E Mike watili, “Nene ne wakwane twalemvile ama fomu ya kuwuzizyapo ukuwomba pa Bethel imiku imivule swinya twapepelangapo nu kupepela, lelo wasitela watwite.” E Mike ne Chrissy watwalilizile vye ukusuwila ukuti, e Yehova awino wamanyile inzila iyizima iyakuwawomvezyamo mu mulimo wakwe. Watwalilizile vye ukucita vino wangakumanisya, ponga ngati akuya mukuwombela kuno wakawizya wacepa nu kwavwilizyako mu mulimo wa wuzengo. Pe yo-o impindi wakawomba wukangalila wa muputule. E Mike walanzile nu kuti, “E Yehova wasuka amapepo yitu yonsinye mu nzila iyizima nkaninye ukucila na pe vino twenecelanga nanti aca kuti yamwi atasuka ukulingana na vino twalondanga.”

17-18. Ukulingana na Amalumbo 86:6, 7, avyani vino tungasuwila?

¹⁷ Wazyani Amalumbo 86:6, 7. E David wasuwizile ukuti e Yehova wivwanga nu kwasuka amapepo yakwe. Na mwemwenye mungasuwila ukuti e Yehova akakwivwa nu kwasuka amapepo yinu. Ivya kulolelako vino tulanzilepo mwe co-o icipande, vingatwavwa ukusuwila ukuti e Yehova angatupa amano na maka yakusipicizya. Angawomvya awanawitu na wankazi nanti awantu vye wanji pakutwavwa.

¹⁸ Kweni mpindi zimwi e Yehova atanga ayasuke amapepo yitu ukulingana na vino tukwenecela. Lelo icisinka acakuti akakwasuka. E Yehova wandi awatupa vino tukulonda swinya pa mpindi injanane. Acino twalililani ukusuwila Yehova pano mukupepa nu kwizuka ukuti wandi awamisakamala swinya mwamanya ukuti munsi mpya, “alipa ica wumi consinye vino cikalonda.” [NWT]​—Amalu. 145:16.