ICIPANDE CA KUSAMBILILAMO 4
ULWIMBO 18 Tukasalifya pa Nzuwi
Uzye Inzuwi Yikatusambilizya Vyani?
“Mwakwe chonye-choo amuno Leza walanjizizya vino watukunda.”—1 YOH. 4:9.
VINO TWANDI TUSAMBILILE
Twandi tulande pe vino inzuwi yikatusambilizya pa miwele ya kwe Yehova ne Yesu.
1. Amulandu ci wuno e Yesu watupezile isundo lya kuti twazevya Icizusyo cila mwaka?
UKWASOWA nukuvwilika, na mwemwenye mungazumila ukuti inzuwi acawila icicindame nkaninye. (2 Kor. 9:15) Amuno pamulandu na yonye inzuwi tungawa swe viwuza ne Yehova. Swinya tungawa nu longo lwakuwa nu wumi wamuyayaya. Twawa ni milandu imivule iyakusalifizyapo e Yehova wino watumile umwana wakwe ukwiza mukutufwila pa mulandu vye nu kutukunda. (Roma. 5:8) Acino pakuti tutwalilile ukusalifya na pakuti tutakiwilile vino watucitila, e Yesu watupile isundo lya kuti twazevya Icizusyo cila mwaka.—Luk. 22:19, 20.
2. Avyani vino twandi tusambilile mwe co-o icipande?
2 Mwe wo-o umwaka Icizusyo ciliwako pa Ciwelusi pa 12 April, 2025. Tusakuvwilika ukuti swe wavule tukupanga ukuti twize tuzanweko. Tungiza tuyitopwe nkaninye nga cakuti pano Icizusyo capalamila nanti pa nsizi ya cizusyo, tukwelenganya sana pe vino e Yehova ne Yesu watucitila. Acino mwe co-o icipande twandi tulande sana pe vino inzuwi yikatusambilizya pe Yehova ne Yesu. Ne mu cipande cino cikonsilepo, tulisambilila pa vizima vino tungazanamo mu nzuwi na pe vino tungacita pakulanjizya ukusalifya.
VINO INZUWI YIKATUSAMBILIZYA PE YEHOVA
3. Uzye imfwa ya muntu wenga yingalenga wuli awantu awavule ukuluwuka? (Lolani ni cikope.)
3 Inzuwi yikatusambilizya ukuti e Yehova wawa nu mulinganya. (Amasu. 32:4) Pano e Adamu wakanile ukwivwila Yehova wawembusile nu kumfwa. Nasweswenye twapyana uluwembu nimfwa kwe weliwe. (Roma. 5:12) Acino pakuti tuluwuke, e Yehova watantisile ukuti e Yesu ayize ape uwumi wakwe ukuwa anzuwi. Nomba uzye inzuwi ya muntu wenga yalinji nu kuluwula wuli awantu awavule? Umutumwa Paulo walondolozile ukuti: “Awantu wonsi waponela muluwembu muno akuchila isundo kwamuntu wenga [e Adamu], wowonye avino awantu wavule walilungamikwa kwakwe Leza, amuno umuntu wenga [e Yesu] watontezile Leza.” (Roma. 5:19; 1 Tim. 2:6) Cino walandangapo pa-a acakuti, wo-o vino umuntu wenga umupwililike awino walumvinye nu kutuwika mu wuzya waluwembu nimfwa, palondekwangavye umuntu wenga umupwililike uwakutuluwula.
Umuntu wenganye e Adamu, awino walenga swensinye tuwawembuka nu kufwa. Swinya umuntu wenganye e Yesu awino watuluwula (Lolani paragrafu 3)
4. Amulandu ci wuno e Yehova atalecezilevye wa mwana Adamu awa civwila ukutwalilila ukwikala umuyayaya?
4 Uzye calondekwanga na nkani ukuti e Yesu ayize munsi mukutufwila pakuti atuluwule? Amulandu ci wuno e Yehova atalecezilevye wa mwana Adamu awa civwila ukutwalilila ukwikala umuyayaya? Kweni swe wantu wano watapwililika tungalola ukuti yo-o ayili inzila yino yanga yizipe. Lelo kwe Yehova kweni yo-o yitalinji anzila iyizima. Amuno wanga acite wo-o nga calolesile ngati uluwembu luno Adamu wacisile lutalinji alukulu, na wana wakwenye ngati watalinji awawembu.
5. Acani cino calenga tusuwile ukuti vino Yehova akacita lyonsinye vikawa avizima?
5 Uzye nga calinji wuli wanga e Yehova atawikako inzuwi nu kuleka wa mwana Adamu wano watapwililika wakwikala umuyayaya, swinya apiluke na pe vino walanzile ukuti avino vilicitika kwe Adamu nga wakana ukumwivwila? Awantu nga wakavwilika e Yehova nu kulola ukuti angapiluka na mwe vinjinye vino walanda ukuti alicita. Ku cakulolelako, wangavwilika nga cakuti alificilisya vino watulaya. Fwandi tutazipizile twalola ngati vino wapinguzilepo ukucita vitalinji icete. Amulandu ci? Amuno wapanzile umulinganya pano wayikundizile ukucita icintu icikulu, akuli ukuti ukupa Umwana wakwe ukuwa anzuwi. Swinya co-o cikatulanjizya ukuti lyonsinye alitwalilila ukacita vino avizima.
6. Acani cinji cino calenzile e Yehova atume Umwana wakwe ukwiza mukutufwila? (1 Yohani 4:9, 10)
6 Inzuwi yisitwavwavye ukumanya ukuti e Yehova wawa nu mulinganya, lelo yikatwavwa nu kumanya ukuti wawa nu lukundo. (Yoha. 3:16; wazyani 1 Yohani 4:9, 10.) Watumile umwana wakwe ukwiza mukutufwila pa mulandu wakuti akalonda twize tuwe nu wumi wamuyayaya nu kuwa mu lupwa lwakwe. Amuno pano Adamu wawembusile, e Yehova wamufumizye mu lupwa lwakwe. Na co-o calenga nasweswenye tutawamo. Lelo pa mulandu ni nzuwi, akatutetela swinya ku nkolelo aliwika awantu wano wawa ni suwilo ni civwila mu lupwa lwakwe. Ni cizima acakuti, na peyonye impindi, tungawa swe viwuza vya kwe Yehova na wanawitu na wankazi. Ukwasowa nukuvwilika e Yehova watukunda nkaninye!—Roma. 5:10, 11.
7. Uzye vino Yesu wacuzile vikatusambilizya cani pe Yehova?
7 Nga twelenganya pe vino Yehova wayivwanga pano umwana wakwe waculanga pano atani afwe, tungasinincizya ukuti watukunda nkaninye. E Satana akalanda ukuti kusi umuwomvi wa kwe Yehova uwili wensinye wino angatwalilila ukuwa ni cisinka ivintu nge vyatala. Nomba pakuti amusinile ukuti vino walanzile avyawufi, wazumilizizye Umwana wakwe ukucula mpaka wafwa. (Job 2:1-5; 1 Pet. 2:21) E Yehova walolanga kuno wakutumfya Umwana wakwe, wakumuma ivikoti na pano wamupopelanga pa cimuti. Swinya walolanga na kuno umwana wakwe akufwa imfwa imbipisye nkaninye. (Mat. 27:28-31, 39) Kweni walinji na maka yakufumyapo vyonsinye vyo-o vino vyacitikanga pakuti amucinjilile. Ku cakulolelako, pano awantu walandanga ukuti: “Ndi [Leza] amufyusye nanti amupususye kanonzi, ndi wamukunda” e Yehova nga akulonda ngevyo wacisile. (Mat. 27:42, 43) Lelo wange acite wo-o, e Yesu nge atapile inzuwi swinya nge tutawa ni suwilo ilili lyonsinye. Conye acino calenzile e Yehova ukuleka umwana wakwe ukucula mpaka wafwa.
8. Acani cino calenga tusinincizye ukuti e Yehova wayivwanga uwuwi pano walolanga umwana wakwe akucula? (Lolani ni cikope.)
8 Tutazipizile twakwelenganya ukuti e Yehova asikwivwa uwuwi amuno watambangavye kuno umwana wakwe akucula ukwasowa nu kuti acitepo nanti cimwinye. Wo-o vino twapangwa mu mukola wakwe tukakwivwa uwuwi nanti ukwivwa icete. Fwandi e Yehova nawenye akakwivwa uwuwi nanti ukwivwa icete pa vintu vimwi. E Baibolo yikalondolola ukuti e Yehova ‘akafwilimana’ swinya ‘akawa nu wulanda.’ (Amalu. 78:40, 41) Izukani vino calinji pano e Yehova wanenile Abrahamu ukupa umwana wakwe Ayizeki ngati anzuwi. (Inta. 22:9-12; Hebe. 11:17-19) Yelenganyani vino e Abrahamu afwile wayivwile pano walinji mukukoma umwana wakwe numupeni. E Yehova weni afwile wacizilemo ukuyivwa uwuwi pano walolanga umwana wakwe wakumucuzya mpaka wamukoma.—Lolani ne vidyo yakuti Mwakolanya Isuwilo Lyawo—Abrahamu, Uluwali 2 pa jw.org.
Yehova wivwile uwuwi nkaninye ukulola Umwana wakwe akucula (Lolani paragrafu 8)
9. Uzye iwaliko lye Waroma 8:32, 38, 39 likatusambilizya cani pe Yehova?
9 Inzuwi yikatusambilizya ukuti kutawa wino watukunda ndi vino Yehova nanti awalupwanye ni viwuza watange wafikeko. (Wazyani Waroma 8:32, 38, 39.) Swinya watukunda ukucila na vino twayikunda swe weneco. Uzye mukalonda ukwikala umuyayaya? E Yehova akavwambisya sana ukuti avino cize ciwe. Uzye mukalonda ukumitetela pe vino mukawembuka? E Yehova weni cilusye akalondesya sana ukumitetela. Cino weni akalondavye kwe sweswe, akulanjizya ukusalifya pe vino watucitila ukupitila mukuwa ni suwilo nu kumwivwila. Inzuwi acawila icicindame nkaninye cino cikalanjizya ukuti e Yehova watukunda. Swinya munsi mpya tulisambilila ivivule vino vikalanjizya ukuti e Yehova watukunda.—Ekawi. 3:11.
VINO INZUWI YIKATUSAMBILIZYA PE YESU
10. (a) Acani cino calenzile e Yesu ayivwe uwuwi nkani pano wamucuzyanga? (b) Uzye e Yesu wacindamisile wuli izina lya kwe Yehova? (Lolani na kambokosi kakuti “E Yesu Wacindamisile Izina lya kwe Yehova Pano Watwalilizile Ukuwa ni Cisinka”)
10 E Yesu wawikako sana amano kwe vino awantu wakalanda pa Mukwasi wakwe. (Yoha. 14:31) Wivwile uwuwi nkaninye pano awantu wamunenile ukuti atacindikanga Leza swinya wamupontelanga. Wivwile uwuwi amuno wamanyile ukuti amazwi ya musango wo-o yalinji nukukwelengula umukwasi wakwe. Conye acino calenzile apepe ukuti: ‘Oko we Tata, nd’achino chingachitwa, funtusya kapu yoo kwenene.’ (Mat. 26:39) Wo-o vino Yesu watwalilizile ukuwa ni cisinka mpaka nimfwa yakwe, wasinizile Satana pe vino walanzile nukulenga izina lya kwe Yehova ukucindikwa.
11. Avyani vino e Yesu wacisile pakulanjizya ukuti wakunda awantu? (Yohani 13:1)
11 Inzuwi yikatusambilizya ukuti e Yesu wawika nkaninye amano ku wantu, maka maka awasambi wakwe.(Imilu. 8:31; wazyani Yohani 13:1.) Ku cakulolelako, wamanyile ukuti ngawiza munsi aliwapita muntazi izivule pano palinji nukufwa imfwa imbipe. Nomba atasipicizizye vino wapitangamo pa mulandu wakuti awuli umulimo wuno Yehova wamupile, lelo apamulandu wakukunda awantu. E Yesu walanjizizye ukuti wakunda awantu ukupitila mukuwawizizya, ukuwasambilizya nukuwavwa. Swinya uwusiku pa wanda wuno walinji nu kufwa, wapawuzileko impindi yakupizya amatamba yawatumwa wakwe, ukuwanena amazwi yakuwasansamusya na vino walinji nukusyala wakuwomba.(Yoha. 13:12-15) Swinya pano walinji pa cimuti cakuculilapo walayile umonsi wumwi wino walinji acipondo ukuti alipusuka. Cinji acakuti, wavwamvile na wino walinji nukusyala akusakamala e mama wakwe. (Luk. 23:42, 43; Yoha. 19:26, 27) E Yesu atalanjizizye vye ukuti wakunda awantu mwe vino wacisile pano walinji mupipi nu kufwa, lelo walanjizizye ukuti wawakunda ukupitila mwe vyonsinye vino wacitanga pano walinji munsi.
12. Avyani vino e Yesu watwalilila ukutucitila pe yo-o impindi?
12 Nanti acakuti e Yesu ‘watufwizile,’ acili watwalilila ukutucitila ivintu na vinjinye. (Roma. 6:10) Avyani vyovyonye? Watwalilila ukutupa ivintu ivivule vino vyawako pa mulandu ni nzuwi. Ku cakulolelako, Amfumu yitu, we Simapepo Mukulu swinya amutwe wi wungwe. (1 Kor. 15:25; Efes. 5:23; Hebe. 2:17) Awino wawa pankolela ukutungulula umulimo wakulonganika awapakwe ni wumba likulu. Alimala ukuwomba wo-o umulimo pano uwucuzi wukulu wutani wusile.a (Mat. 25:32; Mar. 13:27) Swinya akasinincizya ukuti awawomvi wakwe awa cisinka wakweti vyonsinye vino vikulondekwa pakuti watwalilile ukuwombela Yehova ni cisinka mwe ya-a amanda yakucelezya. (Mat. 24:45) Cinji acakuti, na pa myaka 1,000 nye pano aliwateka, alitwalilila ukucita ivyakutuzipila. Vyo-o vikulanjizya ukuti e Yesu atizilevye mukutufwila lelo wizile na mukutucitila ivintu na vinji.
TWALILILANI UKUSAMBILILA
13. Uzye ukwelenganya pe vino e Yehova ne Yesu watucitila kungatwavwa wuli?
13 Nga mukwelenganya sana pe vino e Yehova ne Yesu watucitila, mulitwalilila ukusambilila na vinji pe vyo wakalanjizya ukuti watukunda. Ku cakulolelako, pano kwasyala ama sabata matici ukuti kuwe Icizusyo mwe wo-o umwaka, mungasolapo ukuwazya ibuku lyonga nanti ukucilapo pa mabuku ya Malandwe. Mutawazya ivipande ivivule pamuku wonganye. Lelo muzipizile ukutekanya nu kuvwambilizya ivyewo na vinji vino vikulanda pe cino cizipizile ukulenga tukunde e Yehova ne Yesu. Swinya mwakwelezya na maka ukunenako wanji vino mwasambilila.
14. Ukulingana na Amalumbo 119:97, uzye ukuvwambilizya ivyewo pa nzuwi na pa malyasi yanji kungatwavwa wuli? (Lolani ni cikope.)
14 Nga cakuti mwamala imyaka imivule mu cine, mungalola ngati mwamanya ivyewo ivivule vino vikalanda pevyo Yehova wawa nu mulinganya, pa nzuwi na pa lukundo swinya kutawa ivipya na vinji vino mungasambililako. Lelo icisinka acakuti, ukusambilila pe ya-a amalyasi ni vintu vinji kusisila. Nomba mungacita wuli pakuti mutwalilile ukusambilila? Mwawazya nu kuyisambilizya vino vyawa mu mabuku yitu. Nga mwazana vimwi vino mutivwicisizye, mwavwambilizya ivyewo na vinji. Nga mwacita wo-o mwakwelenganyapo sana nukulola vino vikumisambilizya pe Yehova, pa Mwana wakwe na pe vino wonsinye wawili wamikunda.—Wazyani Amalumbo 119:97.
Nanti acakuti twamala imyaka imivule mu cine, tungasambilila ivipya pa nzuwi. Na co-o cingalenga twasalifya pe vino e Yehova ne Yesu watucitila (Lolani paragrafu 14)
15. Amulandu ci wuno tuzipizile ukutwalilila ukuvwambilizya ivyewo ivipya?
15 Mutayivwa uwuwi nga cakuti mutazanile ivipya vimwi nanti vino mwatemwa pe vino mukuwazya nanti ukuvwambilizya. Pano mukuvwambilizya ivyewo mwayikolanya ku muntu wino akakwimba e golide. Wano wakawomba wo-o umulimo wakasumba amaawazi amavule nanti amanda pakutivye wazane akapimfya ke golide. Nga watayizanile wasileka, lelo wakatwalililavye ukwimba amuno wamanya ukuti nanti wazana akacepenye akacindame. Wonye avino cikawa na ku cipya cino twazana pano tukuyisambilizya Baibolo. Cikawa acicindame nkaninye ukulusya ne golide. (Amalu. 119:127; Imilu. 8:10) Acino mwatwalilila ukuwazya Baibolo nu kuvwambilizya ivyewo ivipya vino mungasambilila.—Amalu. 1:2.
16. Tungakolanya wuli e Yehova ne Yesu?
16 Pano mukuyisambilizya mwalola vino mungawomvya vyovyo ivyewo. Ku cakulolelako, mwawa nu mulinganya kwe wanji ngati avino Yehova wawa. Mwakolanya vino e Yesu wakunda e Yisi na wantu wanji ukupitila mukucita vyo vingasecelesya Yehova nu kwavwa wanji asa mulandu nukuti ukucita wowo kungamiwika mu ntazi. Swinya mwawizizyako wanji pakuti nawo wawe nu longo lwa kusuwila mu nzuwi nu kumanya ivizima vino Yehova watucitila.
17. Avyani vino tulisambilila mu cipande cino cikonsilepo?
17 Pano tukuya tukusambilila na vinji pa nzuwi nu kucita ivyakulanjizya ukuti tukasalifya, apano twandi twaya tukukundilako Yehova nu Mwana wakwe. Nga twacita wo-o, nawo waliwaya wakutukundilako. (Yoha. 14:21; Jemu. 4:8) Acino lekani tutwalilile ukuwomvya e Baibolo, na mabuku yano iwungwe lya kwe Yehova lyatupekanizizya pano tukuyisambilizya pa nzuwi. Mu cipande cino cikonsilepo tulisambilila pa vizima vino tungazanamo mu nzuwi, na pe vino tungacita pakulanjizya ukusalifya pe vino Yehova watukunda.
ULWIMBO 107 Leza Akatulanjizya Ivya Kuwa nu Lukundo
a Ukuwunganikwa ‘kwa vintu vyonsi’ ivya mwi yulu kuno Paulo walanzilepo pa Waefeso 1:10, kwapusanako nu kuwunganikwa ‘kwawasolwe’ kuno e Yesu walanzilepo pe Mateyu 24:31 na pe Marko 13:27. E Paulo walandanga pa mpindi pano e Yehova akasola wano waliwateka ponga ne Yesu ukuwomvya umuzimu wakwe uwutele. E Yesu nawe walandanga pa mpindi pano alilonganika awapakwe kwi yulu mu wucuzi wukulu wano walisyalapo munsi.