ICIPANDE CA KUSAMBILILAMO 5
ULWIMBO 108 Ulukundo lwa kwe Leza Uluntasila
Ivizima Vino Tukazanamo mu Lukundo lwa kwe Yehova
“Klistu Yesu wizile munsi kukwizatula awawembu.”—1 TIM. 1:15.
VINO TWANDI TUSAMBILILE
Mwe co-o icipande twandi tusambilile pa vizima vino tungazanamo mu nzuwi, na pe vino tungacita pakulanjizya ukusalifya pe vino Yehova watukunda.
1. Avyani vino tuzipizile ukucita pakulenga Yehova ukusecelela?
YELENGANYANI ukuti mwapa wumwi icawila icizima swinya cino cikawomba icete. Ukwasowa nu kuvwilika mungivwa uwuwi nga cakuti weyo umuntu wacisunga nu kuciwililako. Lelo mungivwa icete nga cakuti akuciwomvya, akucisunga icete swinya akulanjizya nu kusalifya. Acani cino tukulandapo? E Yehova watumile Umwana wakwe ukwiza mukutufwila. Fwandi akakwivwa icete nkaninye nga walola tukusalifya pe co-o icawila icicindame cino watupa na pe vino watulanjizya ukuti watukunda pa kututumila Umwana wakwe ukuwa anzuwi.—Yoha. 3:16; Roma. 5:7, 8.
2. Avyani vino twandi tusambilile mwe co-o icipande?
2 Nga mwamala imyaka imivule mu cine, ncepamwi mungatalika ukulola ngati inzuwi yitacindama na nkani. Nga mwatalika ukulola wowo, cingawa ngati mwasunga icawila cino Yehova watupa kumwi kuno mutanga mwacilola nu kuciwilila. Acino pakuti ivya musango wo-o vitakacitike, tuzipizile twakwelenganyapo lyonsinye pe vino e Yehova ne Yesu watucitila. Co-o icipande candi citwavwe ukulola vino tungacita wo-o. Twandi tusambilile pa vizima vino tukazanamo mu nzuwi pe yo-o impindi, na pa vizima vino tulizanamo ku nkolelo. Swinya twandi tulande na pe vino tungalanjizya ukusalifya pe vino Yehova watukunda maka maka mu mpindi ya Cizusyo.
IVIZIMA VINO TUKAZANAMO PE YO-O IMPINDI
3. Acizima ci cimwi cino tukazanamo mu nzuwi pe yo-o impindi?
3 Twatalika kaali ukuzanamo ivizima mu nzuwi ya kwe Yesu. Ku cakulolelako, pa mulandu ni nzuwi e Yehova akatutetela nga twawembuka. Nomba asitutetela pa mulandu wakuti avino azipizile ukucita. Lelo apa mulandu wakuti avino umweneco akalonda. E kimbila Wilumbo wumwi walanjizizye ukusalifya pano walanzile ukuti: “We Mfumu Leza wemuzima swinya ukatetela.”—Amalu. 86:5; 103:3, 10-13.
4. Awaweni wano Yehova wawicilako inzuwi? (Luka 5:32; 1 Timoti 1:15)
4 Wamwi wangayivwa ngati watayana ukuwatetela. Kweni molimonye swensinye tutayana nu kutetelwa. Wonye avino nu mutumwa Paulo wayilolanga pa mulandu wakuti ‘wayimvizye awa mwi wungwe.’ Watili ‘ntazipila nanti akwitwa ukuti umutumwa.’ Walanzile nu kuti: “Ukuwa muno Leza wamfwila inkumbu indi ndivino indi.” (1 Kor. 15:9, 10) Nga cakuti twalapila, e Yehova akatutetela kwe vino twawembusile. Asicita wo-o pa mulandu wakuti avino cizipizile ukuwa, lelo apa mulandu wakutukunda. Fwandi nga cakuti mwatalika ukuyivwa ngati mutayana ukumitetela, mwakwizuka ukuti e Yehova atawikako inzuwi pa mulandu na wantu awapwililike. Lelo wacita wo-o pa mulandu na wantu wano wakawembuka swinya wano wakavwambisya ukupiluka.—Wazyani Luka 5:32; 1 Timoti 1:15.
5. Uzye tuzipizile twakwelenganya ukuti e Yehova angatutetela pa mulandu wakuti twamuwombela pa myaka imivule? Londololani.
5 Kusi nanti wumwinye wino azipizile awakwelenganya ukuti e Yehova angamutetela pa mulandu wakuti wamuwombela pa myaka imivule. Kweni e Yehova akakwizuka vino tukamuwombela ni cisinka. (Hebe. 6:10) Lelo watupile umwana wakwe ngati acawila, asa pa mulandu wakuti walondanga ukutulipila pe vino tukamuwombela. Nga tukulola ngati tukalondekwa ukuti e Yehova awatutetela pa mulandu wakuti twamucitila ivintu ivivule, lyo cili ngati tukulanda ukuti sweswe tusilondekwapo inzuwi.—Linganyaniko Wagalatiya 2:21.
6. Acani cino calenzile e Paulo awawombesya mu mulimo wa kwe Yehova?
6 E Paulo walolanga ngati e Yehova atanga amutetele pe vino wacisile. Nomba lyo acani cino calenzile awawombesya mu mulimo wa kwe Yehova? Wacitanga wo-o pa kulanjizya ukusalifya pe vino e Yehova walinji nu luse ni cikuku kwe weliwe. (Efes. 3:7) Ndi vino Paulo wacitanga, nasweswenye tutazipizile twawombesya pakuti e Yehova atutetele, lelo tuzipizile twacita wo-o pakulanjizya ukusalifya.
7. Acizima ci na cinji cino tukazanamo mu nzuwi? (Waroma 5:1; Jemusi 2:23)
7 Icizima cinji cino tukazanamo mu nzuwi pe yo-o impindi acakuti, tungawa na wuciwuza uwuzima ne Yehova.a Ndi vino twasambizile mu cipande cino cafumileko, swe wamwana Adamu swensinye tutalinjipo nu longo lwa kuwa na wuciwuza uwuzima ne Yehova. Nomba pa mulandu ni nzuwi, tukayitopwa “umutende nu Leza” swinya tungapalamila nkaninye kwe weliwe.—Wazyani Waroma 5:1; Jemusi 2:23.
8. Amulandu ci wuno tuzipizile twasalifya pa longo luno twawa nalo ulwa kulanda ne Yehova mwi pepo?
8 Pa mulandu wakuwa na wuciwuza uwuzima ne Yehova, calenga twawa nu longo lwakulanda nawe mwi pepo. E Yehova asiteyelezyavye ku mapepo yano tukapepa pano tulongine ponga, lelo akateyelezya na kumuntu wenga na wenga pano akupepa. Nga cakuti twapepa tukaleka ukusakamikwa nkani swinya wuciwuza witu ne Yehova wukaya wukuwomelako. (Amalu. 65:2; Jemu. 4:8; 1 Yoh. 5:14) Pano e Yesu walinji munsi, wapepanga imiku imivule amuno wamanyile ukuti e Yisi akwivwa swinya ipepo lyalenganga wuciwuza wakwe ne Yehova ukutwalilila ukuwa awuwome. (Luk. 5:16) Tukasalifya nkaninye pa nzuwi amuno yalenga twawa swe viwuza ne Yehova swinya twalanda nawe mwi pepo.
IVIZIMA VINO TULIZANAMO KU NKOLELO
9. Avizima ci vino awawomvi wa kwe Yehova awa cisinka walizanamo mu nzuwi ku nkolelo?
9 Avizima ci vino awawomvi wa kwe Yehova awa cisinka walizanamo mu nzuwi ku nkolelo? Waliwa nu wumi wamuyayaya. Awavule wakakwelenganya ukuti co-o citanga cicitike amuno awantu wakafwa. Lelo ukulonda kwa kwe Yehova kwalinji akwakuti awantu wakwikala umuyayaya. Wanga e Adamu atawembuka nga kutawapo nanti wumwinye wino akakwelenganya ukuti tutanga twikale umuyayaya. Kweni acisinka, pe yo-o impindi cingaloleka ngati ica musango wo-o citanga cicicitike. Lelo mwakwizuka ukuti e Yehova walipila umutengo uwukulu nkaninye pano watumile umwana wakwe wenganye ukwiza mukutufwila pakutivye co-o cicitike.—Roma. 8:32.
10. Avyani vino awapakwe na wa mwi wumba kulu wakavwambisya?
10 E Yehova akalonda twakwelenganya pa kwikala umuyayaya pe yonye impindi nanti acakuti vilicitika ko nkolelo. Awapakwe wakavwambisya ukuya mu kwikala kwi yulu pano waliwateka ponga ne Yesu. (Ukuwu. 20:6) Ne awa mwi wumba kulu wakavwambisya ukwikala mu paradaise muno mutaliwa uwulumila na malanda. (Ukuwu. 21:3, 4) Uzye mwawa mwi wumba kulu ilya wantu wano wawa ni suwilo lya kwikala umuyayaya munsi? Nga muno mwawa, mwamanya ukuti co-o icilambu acikulu nkaninye ukulusya na pakuya kwi yulu. Amuno e Yehova welewuzile awantu wonsinye ukuti wakwikala munsi. Swinya ukwikala munsi akuno kulilenga wawa ni nsansa nkaninye.
11-12. Avintu ci ivizima vino tukavwambisya ukwiza mukusambilila mu Paradaise? (Lolani ni cikope.)
11 Yelenganyaniko pe vino muliwakwikala mu Paradaise monye munsi. Mutaliwalwala nanti ukufwa. (Ayize. 25:8; 33:24) E Yehova alimipa ivizima vyonsinye vino mukalonda. Avyani vino mukalondesya sana ukwiza mukusambilila? Uzye mungatemwa ukwiza mukusambilila pa vinyunyi nanti pa vinyama? Uzye mukalonda ukwiza mukumanya ivyakuwomvya ivyakulizya lizya nanti ukudulowa? Mu paradaise muliwalondekwa awantu wano wamanya ivyakupanga ama pulani nu kuzenga. Swinya awantu waliwalondekwa awakuwalunjisizya ivintu, ukulima ivyakulya, ukupanga iviwombelo nu kusakamala incende. (Ayize. 35:1; 65:21) Nga twawa mu paradaise, muliwa nu longo lwakucita vyonsinye vyo-o na vinji.
12 Tuliwa ni nsansa nkaninye ukupocelela wano waliwazyulupuka. (Imili. 24:15) Swinya tuliwakwivwa icete sana ukusambilila na vinji pe Yehova ukupitila mwe vino welewula. (Amalu. 104:24; Ayize. 11:9) Ni cicindamisye pe vyonsinye acakuti, tutaliwawembukapo nu kulenga Yehova ukuti atutetele. Icakuti tuliwawombela Yehova ni myezo yitu yonsinye. Uzye mungatemwa ukupulumula vyonsinye vino vilicitika ku nkolelo pa mulandu wakuvwambisya ukuwa “muchimwemwe chaluwembu ichampindi ntichi?” (Hebe. 11:25) Kweni asa vino mungatemwa. Ukulandavye icisinka, imikalile munsi mpya yilizipa nkaninye ukucila pe vyonsinye vino tungawa navyo pe yo-o impindi. Mwakwizuka ukuti tutalilanga tukalindililavye ukuti e Paradaise yize. Lelo nombanye yandi yize tutalike nu kwikalamo. Pamulandu nu kutukunda, e Yehova watutumizile Umwana wakwe ukwiza mu kutufwila.
Avizima ci vino mukavwambisya sana ukuti vize vicitike mu paradaise? (Lolani amaragrafu 11-12)
VINO TUNGACITA PAKULANJIZYA UKUSALIFYA
13. Tungalanjizya wuli ukusalifya pe vino Yehova watukunda? (2 Wakorinte 6:1)
13 Tungalanjizya wuli ukusalifya pe vino Yehova watupile Umwana wakwe ukuwa anzuwi? Tungacita wo-o ukupitila mukuwika pa nkolelo ukuwomba umulimo wakwe. (Mat. 6:33) Amuno e Yesu wafwile “alyakuti wonsi wano wachili nuwumi watize swinya wayikalile, nkandi mwakwe wino wafwile swinya azyulupulwa muno woliwo.” (2 Kor. 5:15) E Yehova wawa ni cikuku kwe sweswe swinya akatutetela. Fwandi nga tukumuwombela ukufika pano papelezile amaka yitu lyo tukulanjizya ukuti tukasalifya pe vyonsinye vino watucitila.—Wazyani 2 Wakorinte 6:1.
14. Tungalanjizya wuli ukuti twasuwila vino Yehova akatunena ukucita?
14 Tungalanjizya ukuti tukasalifya pe vino Yehova watukunda ukupitila mukumusuwila nu kukonka vino akutunena. Tungacita wuli wo-o? Pano tukupingulapo pe vimwi ponga ngati apa masambililo nanti pa ncito yakuwomba, tuzipizile twakwelenganyapo na pe vino Yehova angalonda ukuti tucite. (1 Kor. 10:31; 2 Kor. 5:7) Nga cakuti tukulanjizya isuwilo mwe vino tukucita, ivintu ivizima vilituciticila, akuli ukuti isuwilo na wuciwuza witu ne Yehova viliwomelako. Swinya tulisinincizya ukuti tuliyikala umuyayaya.—Roma. 5:3-5; Jemu. 2:21, 22.
15. Tungalanjizya wuli ukuti tukasalifya pa nzuwi mu mpindi ya Cizusyo?
15 Kwawa inzila na yinjinye yino tungalanjizizyamo ukusalifya pe vino Yehova watukunda. Tungacita wo-o ukupitila mukwelezya ukufika pano papelezile amaka yitu ukucita vino vingalanjizya ukuti tukasalifya pa nzuwi pano kwasyala amasabata matitici ukuti kuwe icizusyo na pansizi ya cizusyo. Cinji acakuti, pano tukuyipekanizizya ukuti twize tuzanweko, twakwitako na wanji. (1 Tim. 2:4) Nga kuli wano mwita, mwawalondololela vino viliwacitika pe wowo uwanda. Mungawatambisyako ne vidyo yakuti Amulandu ci Wuno Yesu Wafwizile? ni yakuti Ukwizuka Imfwa ya kwe Yesu, yano yawa pa jw.org. Wa eluda nawo wazipizile ukusinincizya ukuti witako awatonte. Kukawa ukusecelela nkaninye mwi yulu na munsi nga cakuti umutonte wumwi wanyoka. (Luk. 15:4-7) Fwandi pa wanda wa Cizusyo, mutiza mwalamukanavye na wano mwamanyana, lelo mwize mwalamuka na wapya na wano pazimba pano wizizilepo mu kulongana. Tukulonda wize wayivwa ukuti tuwawisileko sana amano.—Roma. 12:13.
16. Amulandu ci wuno cicindamizile ukulundululako imiwombele yitu mu mpindi ya Cizusyo?
16 Uzye mungatemwa ukulundulula imiwombele yinu mu mulimo wa kwe Yehova mu mpindi ya Cizusyo? Nga mwacita wo-o, lyo mukulanjizya ukuti mukusalifya pe vyonsinye vino e Yehova ne Yesu watucitila. Nga mukuwombesya mu mulimo wa kwe Yehova, mulilola vino aliwamyavwa na co-o cililenga mumusuwile nkaninye. (1 Kor. 3:9) Mwawazya amawaliko yano watuwicila ukuwazya mu mpindi ya Cizusyo, yano yakawa mu kalibuku ka Ukuyisambilizya Amawaliko Cila Wanda nanti pe cati yino yikawa mu Kalibuku ka Mikaliile. Swinya nga mukulonda mungasolapo ukuwawazya ya-a amawaliko pa mpindi yino mwatantika ukuwazya Baibolo cila wanda.
17. Avyani vino vikalenga Yehova ukusecelela? (Lolani na kambokosi kakuti “Vino Tungalanjizya Ukusalifya pe Vino Yehova Watukunda.”)
17 Mpindi zimwi mutanga mukumanisye ukucita vyonsinye vyo-o vino twalandapo pa mulandu na vino ivintu vyawa mu wumi winu. Mwakwizuka ukuti e Yehova asilinganya vino mukamuwombela kwe wanji. Lelo akalola vino vyawa mu mwezo winu. Swinya akakwivwa icete nga walola mu kucita ivyakulanjizya ukuti mukasalifya pa nzuwi.—1 Sam. 16:7; Mar. 12:41-44.
18. Amulandu ci wuno tuzipizile twasalifizya nkaninye e Yehova ne Yesu?
18 Inzuwi ayino yalenga e Yehova awatutetela, twawa na wuciwuza uwuzima na weliwe nu kuwa nu longo lwa kwikala umuyayaya. Acino lekani tutwalilile ukusalifya e Yehova pe vino watulanjizya ukuti watukunda, amuno lonye ulukundo aluno lwalenga tuwe na vyonsinye vyo-o. (1 Yoh. 4:19) Swinya tutwalilile nu kusalifya e Yesu pe vino walanjizizye ukuti watukunda pano wayikundizile ukupa uwumi wakwe pakutivye atuluwule.—Yoha. 15:13.
ULWIMBO 154 Ulukundo Luno Lusisila
a E Yehova watetezile awawomvi wakwe awa ku nsizi na pano e Yesu atani ayize ape nuwumi wakwe ukuwa anzuwi. Wacisile wo-o pa mulandu wakuti wasuwizile Umwana wakwe ukuti alitwalilila ukuwa ni cisinka mpaka ni mfwa yakwe. Fwandi kwe Yehova calinji ngati inzuwi yapwa kaali na pano e Yesu atani afwe.—Roma. 3:25.