Sinincizyani Ukuti e Yehova Wamikunda

1. Amulandu ci wuno mwayipezile kwe Yehova ukuti mwandi mwamuwombela uwumi winu wonsinye? (Lolani ni cikope.)

UZYE mukwizuka pano mwayipile kwe Yehova ukuti mukulonda mwamuwombela uwumi winu wonsinye? Mwacisile wo-o pamulandu wakuti mwizile amumumanya nu kumukunda swinya mwamulayile ukuti mulitwalilila ukumukunda nu mwezo winu wonsinye, nu wumi winu wonsinye, nu kwelenganya kwinu konsinye na maka yinu yonsinye. (Mar. 12:30) Ukufumilila peyilyanye impindi mwatwalilila ukumukundilako. Ngacakuti wumwi wakukolowozya ukuti, “Uzye mwelimonye wamukunda e Yehova ungasuka wuli?” Ukwasowa nu kuwayawaya ungalanda ukuti, “Namukunda nkaninye ukwasowa uliwensinye nanti iciliconsinye!”

2-3. Avyani vino e Yehova akalonda ukuti tusinincizye, swinya avyani vino twandi tusambilile mwe co-o icipande? (Jeremiya 31:3)

² Uzye mungasuka wuli ngacakuti wumwi wamikolowozya ukuti, “Uzye molimonye wasinincizya ukuti e Yehova wakukunda?” Uzye muliwayawaya ukwasuka nanti ukutalika ukwelenganya ngacakuti mwelimonye e Yehova wamikunda? E nkazi wumwi wino walolanga ngati atakundikwa ku wutici watili: “Namanya ukuti nakunda e Yehova. Nsivwilika nanti katicinye pe co-o. Lelo ilivule nkavwilika ngacakuti e Yehova wankunda”. Nomba avyani vino vingamyavwa ukumanya ukuti e Yehova wamikunda?

³ E Yehova akalonda musinincizye ukuti wamikunda. (Wazyani Jeremiya 31:3.) Icisinka acakuti e Yehova wamipalamika kwe weliwe. Pano mwayipile kwakwe weliwe nu kubatizwa, mwapocelezile icintu cimwi icicindamisye nkaninye akuli ukuti ulukundo luno lusisila. Co-o calanjizizye ukuti wamikunda sana swinya atalitela amisye. Lo-o ulukundo luno lusisila lukalenga e Yehova alola awantu wakwe awacisinka ukuwikako namwemwenye ukuti ‘awantu wakwe’ awakundikwe. (Mala. 3:17) E Yehova akalonda tusinincizye ukuti watukunda ndivino umutumwa Paulo wasinincizizye. E Paulo walemvile ukuti: ‘Amuno nkupanichisya kuno pasi nanti chonga chino chingatupawula ku lukundo lwakwe: nanti amfwanye nanti awumi; nanti awangeli nanti amfumu nanti amaka yamwiyulu; nanti avintu vino vilipo, nanti avintu vino viliyiza; nanti avyamupela nanti avyapansi, pasi ichintu nanti chonga chino chingatupawula kulukundo lwakwe.’ (Roma. 8:​38, 39) Mweco icipande twandi tulande, umulandu wuno cacindamila ukuzumila ukuti e Yehova watukunda na vino tungacita pakusinincizya ukuti watukunda.

UMULANDU WUNO CACINDAMILA UKUSININCIZYA UKUTI E YEHOVA WATUKUNDA

4. Awufi ci wuno Satana akalonda ukuti tuzumile, swinya tungamukanya wuli?

⁴ Nga cakuti twasinincizya ukuti, e Yehova watukunda tungawa “namaka yakulwisya imichenjelo nikopeko lya kwe Satana.” (Efes. 6:11) E Satana akalonda ukuti tuleke ukuwombela Yehova. Akakwelezya namaka ukuficilisya vino akalonda. Inzila yonga yino akawomvya, akalonda twakwelenganya ukuti e Yehova atatukunda. Lelo wo-o awufi. E Baibolo yakolanya e Satana ku nkalamu. (1 Pet. 5:​8, 9) Inkalamu zyatemwa ukusansa ivinyama vino vitakweti amaka swinya vino vitanga viyicinjilile. Wonye avino wawa, akatusansa pano tutakweti amaka, tutonsile nanti pano tukwivwa uwulanda pamulandu navino vyatuciticizile kunsizi, intazi zino tukupitamo nanti ukutina vino vilituciticila ku nkolelo. (Imilu. 24:10) Akalola ngati angatutonsya pakuti tuleke ukuwombela Yehova. Lelo ‘tungakanya Satana’ navino akawomvya ukupitila mukucita vino vingalenga tusinincizye ukuti e Yehova watukunda.—Jemu. 4:7.

5. Amulandu ci wuno tuzipizile twayivwa ukuti e Yehova watukunda swinya twacindama kweweliwe?

⁵ Nga cakuti twasinincizya ukuti e Yehova watukunda apano wuciwuza witu na weliwe wukawomelako. Amulandu ci wuno twalandila wo-o? E Yehova watwelewula mu nzila ya kuti twakundikwa nu kukunda wanji. Nga cakuti wumwi watulanjizya ulukundo na sweswenye cikalenga twavwambisya ukumukunda. Acino nga tukuyivwa ukuti e Yehova watukunda swinya twacindama kwe weliwe nasweswenye tulimukundilako. (1 Yoh. 4:19) Pano tukuya tukumukundilako nawenye aliwaya akutukundilako. Wonye avyo Baibolo ikatunena. Ikati: “Palamilani pakwe Leza, nawe wandi apalamile kwemwemwe.” (Jemu. 4:8) Nomba tungacita wuli pa kuti tusinincizye ukuti e Yehova watukunda?

VINO VINGAMYAVWA UKUSININCIZYA UKUTI YEHOVA WAMIKUNDA

6. Avyani vino muzipile ukucita nga cakuti mukuvwilika nga cakuti e Yehova wamikunda?

⁶ Muwapepa lyonsinye swinya mukulungatika. Mwalenga kwe Yehova lyonsinye ukuti awamyavwa ukuwayilola ndi vino akamilola. Mpindi zimwi mungayivwa uwuwi pe vyo mwawa, icakuti cingamitalila nu kumitalila ukuwalola nga cakuti e Yehova wamikunda. Mwakwizuka ukuti e Yehova wakula ukulusya imyezo yinu. (1 Yoh. 3:​19, 20) Wamimanya icete sana ukucila na vino mweweneco mwayimanya. Akalola imiwele mizima yino mwawa nayo yino nce mpamwi mutamanya nu kumanya nga cakuti mwawa nayo. (1 Sam. 16:7; 2 Imila. 6:30) Acino “mwamunena” mukulungatika vino mukuyivwa nu kumulenga ukuti amyavwe ukusinincizya ukuti wamikunda. (Amalu. 62:8) Apano mwacita ivintu ukulingana na vino mukupepelapo.

7-8. Uzye Amalumbo yakatwavwa wuli ukusinincizya ukuti e Yehova watukunda?

⁷ Muwasuwila vino Yehova walanda mwi Zwi lyakwe Baibolo. E Yehova wapile wano walemvile e Baibolo umuzimu wutele, acino vino walanda pe weliwe avya cisinka. Mwi lumbo limwi e Devedi walondolozile e Yehova mu nzila inzima nkaninye pe vino akatusakamala. Watili: ‘Imfumu Leza akuwanga na wano wasi ninsipo; akatula wano isuwilo lyawo lyapelela.’ (Amalu. 34:18) Nga cakuti muli nu wulanda mungakwelenganya ukuti pasi wino amanyile vino mukuyivwa nanti wino angamyavwa. Lelo e Yehova walaya ukuti mu mpindi zya musango wo-o akapalamila kwewewe swinya akamanya ukuti apano ukuvwambisya sana ukuti akwavwe. Mwi lumbo linji e Devedi walemvile ukuti: “wawalika mwekalata ukuvula kwaminsozi yane.” (Amalu. 56:8) E Yehova akalola pano muli nu wulanda, swinya akamisakamala. E Yehova akasunga ivilamba vinu swinya akavicindamika ndiwulyanye vino aminzi yano umuntu apayile nanti asenzile pano ali pawulendo yacindama. Ne pa Amalumbo 139:​3, walanzile nu kuti: “wamanya imiwombele yane yonsi.” (Amalu. 139:3) E Yehova akalola vyonsinye vino mukacita, lelo cino akawikako sana amano apa vizima vino mukacita. (Hebe. 6:10) Amulandu ci? Amuno akacindamika vyonsinyene vino mukakwelezya na maka ukucita pa kuti muwamusecelesya.a

⁸ E Yehova akawomvya ya-a amawaliko ya kuwomelezya pa kuminena ukuti akamisakamala swinya wamikunda nkaninye.” Nomba ndi vino tusambilizile e Satana akalonda tuzumile ukuti e Yehova atatukunda. Nga cakuti mpindi zimwi mukavwilika nga cakuti Yehova wamikunda mungelenganyapo pe wino mukulonda ukusuwila. Uzye mungakunda ukusuwila e Satana ‘e cawufi’ nanti e Yehova, e “Leza musuwilwa.”?—Yoha. 8:44; Amalu. 31:5.

9. Avyani vino Yehova walaya wano wamukunda? (Ukufuma 20:​5, 6)

⁹ Muwakwelenganya pe vino Yehova akayivwa pe wano wamukunda. Lekani tulande pe vino e Yehova wanenile e Mozesi na wina Israeli. (Wazyani Ukufuma 20:​5, 6.) E Yehova walaya ukuti alitwalilila ukulanjizya ulukundo luno lusisila kwe wano wamukunda. Pa mulandu wakuti e Yehova we Leza wa cisinka tungasuwila ukuti atalileka ukukunda wano wamukunda. (Nehe. 1:5) Acino nga mwatalika ukwelenganya ukuti e Yehova atamikunda muwakwizuka ukuti mwemwe mwamukunda. Nga cakuti mwamukunda swinya mukacita nivya kumusecelesya mungasininincizya ukuti nawenye wamikunda nkaninye. (Dan. 9:4; 1 Kor. 8:3) Co-o cikusula mu kuti nga cakuti mwakunda e Yehova lyo mutazipizile ukuvwilika ukuti namwemwenye wamikunda. Fwandi mungasinincizya ukuti e Yehova alitwalilila ukumikunda swinya atalitela amisye.

10-11. Uzye e Yehova akalonda mwalola wuli inzuwi? (Wagalatiya 2:20)

¹⁰ Muwakwelenganya pa nzuwi. E Yehova watupile icawila icikulu pano watumile umwana wakwe ukwiza tufwila. (Yoha. 3:16) Uzye ukalola ukuti e Yehova watumile umwana wakwe ukwiza kufwila nawewenye? Lekani tulande pe vino calinji kwe Paulo. E Paulo pano atani awe amwina Klistu wacitanga ivintu iviwipe nkaninye. Lelo na pano wizile awa amwina Klistu nye watwalilizile ukuwombela pe vino atacitanga icete. (Roma. 7:​24, 25; 1 Tim. 1:​12-14) Lelo nawenye wizile asinincizya ukuti e Yesu wamufwizile. (Wazyani Wagalatiya 2:20.) E Yehova walenzile e Paulo ukulemba ya-a amazwi mwe Baibolo, pa kuti tungasambililako. (Rom. 15:4) Amazwi yano e Paulo walemvile yakalanjizya ukuti e Yehova akalonda usinincizye ukuti e Yesu wakufwizile pa lwako. Nga cakuti ukulola inzuwi mu musango wo-o lyo nawewenye ulisinincizya ukuti e Yehova wakukunda pa lwako.

¹¹ Tukasalifya nkaninye e Yehova pa nzuwi yino watupa. Nu mulandu wunji wuno Yesu wizizile munsi amukusambilizya wanji icisinka pe Yehova. (Yoha. 18:37) Pe vino wasambilizyanga palinji na vino e Yehova wakunda awantu wakwe.

VINO E YESU AKATWAVWA UKUSININCIZYA UKUTI E YEHOVA WATUKUNDA

12. Amulandu ci wuno tuzipizile ukusuwila vino Yesu walanda pe Yehova?

¹² Pano e Yesu walinji munsi wayikundizile ukuwuzya awantu pe vino Yehova wawa. (Luk. 10:22) Tungasuwila vino Yesu walanzile pe Yehova, amulandu ci? Amuno e Yesu walinji ne Yisi e Yehova kwi yulu pa myaka imivule ukucila uwili wensinye pano atani ayize munsi. (Kolo. 1:15) E Yesu wamanyile vino Umukwasi wakwe wamukunda swinya walola na vino akalanjizya ulukundo ku wangeli wa cisinka, na ku wantu wakwe awa munsi. Uzye e Yesu akatwavwa wuli pa kuti tusinincizye ukuti e Yehova watukunda?

13. Uzye e Yesu akalonda twalola wuli e Yehova?

¹³ E Yesu akalonda twalola e Yehova ndi vino akamulola. Mu mabuku ya Malandwe, e Yesu walinginye e Yehova ku ‘mukwasi’ imiku 160. Swinya pano e Yesu walandanga na wasambi wakwe, wawomvyanga amazwi ponga ngati ‘Umukwasi winu’ nanti ‘Mukwasi winu uwa mwi yulu.’ (Mat. 5:16; 6:26) Pano e Yesu atani ayize munsi awawomvi wakwe awa cisinka witanga e Yehova amazina ponga ngati ‘Uwa Maka Yonsi,’ ‘Umupulisyemo’ e ‘Kelewula Mukulu,’ nga na mazina yanji ayakoleko. Lelo ilivule e Yesu witanga e Yehova ukuti ‘Umukwasi’ witu. Ya-a amazwi yakalanjizya ukuti e Yehova akalonda awawomvi wakwe wayivwa ukuti wapalamizile kwe weliwe ndi vino umwana akayivwa nga cakuti apalamizile ku mukwasi wakwe uwa lukundo. Fwandi e Yesu watusambilizyanga ukuti e Yehova watukunda ndi wulyanye vino umukwasi muzima wakunda awana wakwe. Lekani tulandeko pa vyakulolelako viwili muno e Yesu wawomvizye izwi lya kuti “Tata” pa kulanda pe Yehova.

14. Uzye e Yesu walanjizizye wuli ukuti twacindama ku Mukwasi witu e Yehova? (Mateyu 10:​29-31) (Lolani ni cikope.)

¹⁴ Icakutalicila, lekani tulande pa mazwi yano e Yesu walanzile aya pe Mateyu 10:​29-31. (Wazyani) Utunsawa atunyunyi ututici nkaninye tuno tutange tukunde Yehova nanti ukumupepa. Lelo e Yesu watili: Umukwasi witu wa kwi yulu akamanya kuno cila kanyunyi kali. Nga cakuti e Yehova angasakamala utunyunyi utwacepa wo-o, lyo sweswe angacilamo ukutusakamala amuno twamukunda swinya tukamupepa. E Yesu walanzile nu kuti Umukwasi witu wamanya ni mpendwa zya nyele zinu. Pa mulandu wa kuti e Yehova wamanya nu tuntu ututicinye pe sweswe, lyo tutanga tuvwilike nanti katicinye ukuti akatusakamala. Ukwasowa nu kuvwilika e Yesu akalonda tusinincizye swensinye wenga na wenga ukuti e Yehova akatusakamala.

15. Uzye amazwi yano e Yesu walanzile pe Yohani 6:44 yakasula mwinye?

¹⁵ Lolani icakulolelako caciti wili muno e Yesu wawomvizye izwi lya kuti “Tata.” (Wazyani Yohani 6:44.) Umukwasi winu uwa kwi yulu wamyavwizye ukuti mu mumanye nu kumukunda. Amulandu ci wuno wacitizile wo-o? Amuno waweni imiwele imizima mwe mwemwe. (Imili. 13:48) Amazwi yano e Yesu walanzile pe Yohani 6:​44, afwile walozizye kwe yano yakazanwa pe Jeremiya 31:3. Pa-a e Yehova wanenile awantu ukuti: “Nakupalamika kwenene ukuwomvya ulukundo luno lusisila.” (Jere. 31:3; linganyani e Hosiya 11:4.) Lolani muno ya-a amazwi yakasula. Umukwasi witu uwa kwi yulu watwalilila ukulola imiwele mizima yino nce mpamwi mutamanya nu kumanya nga cakuti mwawa nayo.

16. (a) Uzye pano e Yesu walanzile pe Yehova ukuti Amukwasi witu calinji ngati akutunena cani, swinya amulandu ci wuno tuzipizile ukumusuwila? (b) Avyani vino vingamyavwa ukusinincizya ukuti e Yehova Amukwasi umuzima? (Lolani akambokosi “Umukwasi Wino Swensinye Tukalonda.”)

¹⁶ Pano e Yesu walanzile pe Yehova ukuti amukwasi witu calinji ngati akuti: “E Yehova asamukwasi wanevye lelo namwemwenye Amukwasi winu. Swinya nkulonda musinincizye ukuti wamikunda nkaninye swinya akamisakamala wenga na wenga.” Acino nga cakuti mpindi zimwi mukavwilika nga cakuti e Yehova wamikunda, mwakwizuka vino e Yesu walanzile swinya mwamusuwila, amuno lyonsinye akalanda icisinka swinya awino wamanya icete Umukwasi witu uwa kwi yulu.—1 Pet. 2:22.

TWALILILANI UKUCITA VINO VINGALENGA MUSININCIZYE UKUTI E YEHOVA WAMIKUNDA

17. Amulandu ci wuno tuzipizile ukutwalilila ukucita vino vingalenga tutwalilile ukusinincizya ukuti e Yehova watukunda?

¹⁷ Tuzipizile ukutwalilila ukwelezya na maka ukucita vino vingalenga tutwalilile ukusinincizya ukuti e Yehova watukunda. Mwakwizuka ukuti e Satana akakwelezya na maka ukuti tuleke ukuwombela e Yehova. Akalonda ukututonsya, acino alitwalilila ukutwelezya pa kuti tutasinincizya ukuti e Yehova watukunda. Lelo tutazipizile ukumusuwila!—Job 27:5.

18. Avyani vino muzipizile ukucita pa kuti mutavwilika ukuti e Yehova wamikunda?

¹⁸ Mwe co-o icipande tusambilizile vino tuzipizile ukucita pa kuti tusinincizye ukuti e Yehova watukunda. Muwapepa kwe weliwe swinya mwamulenga ukuti amyavwa ukumanya umulandu wuno wamikundila. Mwakwelenganya pa mawaliko yano yakalondolola vino e Yehova akasakamala wano wamukunda. Muwakwizuka ukuti lyonsinye e Yehova alitwalilila ukukunda wano wamukunda. Swinya e Yehova watumile Umwana wakwe ukwiza mifwila pa lwinu. Mwakwizuka nu kuti e Yehova Amukwasi winu ndi wulyanye vino e Yesu walanzile. Nga mukwelenganya pe vyo-o ivisinka, uwili wensinye nga wamikolowozya ukuti, “Uzye molimo e Yehova wamikunda?” Mulimwasuka nu mwezo winu wonsinye ukuti, “Ee wankunda! Swinya awuli umulandu wuno cila wanda nkakwelezya na maka yane yonsinye ukucita vino vikalanjizya ukuti namukunda.”