“Yisolelani mwe Weneco . . . Wino Mwandi Mwawombela”

1. Avyani vino tuzipizile twacita pakuwa ni nsansa zya cisinka, swinya amulandu ci? (Ayizeya 48:​17, 18)

UMUKWASI witu uwa kwi yulu watukunda nkaninye, swinya akalonda twawa ni nsansa pe yo-o impindi na ku nkolelo. (Ekawi. 3:​12, 13) Watwelewuzile mu nzila yakuti twacita ivintu ivilekane lekane. Lelo atatupa amaka yakuti twayitungulula nanti ukuyisolela icizima ni ciwipe. (Ekawi. 8:9; Jere. 10:23) Wamanya ukuti nga tukumuwombela nu kukonka amasundo yakwe, apano tungawa ni nsansa zya cisinka.—Wazyani Ayizeya 48:​17, 18.

2. Avyani vino Satana akalonda tusuwile, swinya avyani vino Yehova wacita pakusinila Satana ukuti awa wufi?

² E Satana akalonda tusuwile ukuti tungawa ni nsansa nga cakuti tusakuwombela Yehova swinya tukuyitungulula sweweneco. (Inta. 3:​4, 5) Nomba pakuti e Yehova asinile e Satana ukuti awa wufi, wazumilizya ukuti awantu wayitungulula pa mpindi yimwi. Twayilolela na minso ukuti awantu watanga wayitungulule. E Baibolo yalanda pa wonsi na wanaci awavule wano walinji ni nsansa pa mulandu wakuwombela Yehova. E Yesu awino walinji ni nsansa nkaninye pe wa-a. Acino mwe co-o icipande twandi tulande pe cino calenzile asolepo ukuwombela Yehova. Swinya twandi twize tulande umulandu wuno Yehova wayanila ukumupepa. Na mukulecelezya twandi twize tulande pa milandu yino yalenga tusolepo ukuwombela Yehova.

CINO CALENZILE E YESU ASOLEPO UKUWOMBELA YEHOVA

3. Avyani vino e Satana walanjizizye Yesu, swinya e Yesu wacisile wuli?

³ Pano e Yesu walinji munsi, walanjizizye ukuti wasozile ukuwombela Yehova. Ku cakulolelako, patazimvile ukufumilila pano Yesu wabatizizwe, e Satana wizile amulanjizya ama wufumu yonsinye aya munsi nu kumunena ukuti walinji nu kumupa nga cakuti wamupepa. Yesu wizile amwasuka ukuti: “Fuma paa Satana! Amuno amawaliko matele yavwanga yati, ‘Uwafukamila Imfumu e Leza wako wenganye-nsu awino uwamupakata nanti ukuwombela!’” (Mat. 4:​8-10) Amulandu ci wuno Yesu walandizile wo-o? Katulande pa milandu yimwi.

4-5. Avyani vimwi vino vyalenzile Yesu asolepo ukuwombela Yehova?

⁴ E Yesu wakunzile sana e Yisi e Yehova. Wo-o awuli umulandu uwukulu wuno walenzile asolepo ukumuwombela. (Yoha. 14:31) Umulandu wunji awakuti, acili icintu icicindame cino walondekwanga ukucita. (Yoha. 8:​28, 29; Ukuwu. 4:11) Wamanyile ukuti e Yehova awili Kelewula swinya awino akatupa ivizima vyonsinye. Ukumanya vyo-o ivisinka kwalenzile amusuwile. (Amalu. 33:4; 36:9; Jemu. 1:17) E Yehova asitela awipepo Yesu, na vyonsinye vino wakweti weliwe wamupile. (Yoha. 1:14) Lelo e Satana weni wapusanako nkaninye ne Yehova, amuno awino walenga awantu wawembuka nu kufwa. We cawufi. Cino calenzile awe wo-o apamulandu wakuyikunda nu kuvwambisya ukuwa ni vivule. (Yoha. 8:44) Pa mulandu wakuti Yesu wamanyile sana Yehova ne Satana atalondanga nanti katicinye ukupondocela Yisi ndi vino Satana wacisile.—Flpi. 2:​5-8.

⁵ Cinji cino calenzile Yesu asolepo ukuwombela Yehova, akumanya ukuti ngawatwalilila ukumuwombela ni cisinka vino vilifumamo vilizipa. (Hebe. 12:2) Amuno walinji nu kulenga izina lya kwe Yehova ukucindikwa nu kulenga uluwembu ni mfwa ukusila.

UMULANDU WUNO YEHOVA WAYANILA UKUMUPEPA

6-7. Amulandu ci wuno awavule pe yo-o impindi wasiwombela Yehova, swinya amulandu ci wuno e Yehova wayanila ukumupepa?

⁶ Awavule pe yo-o impindi wasiwombela Yehova pa mulandu wakuti watamanya ukuti wawa ni miwele imizima swinya watamanya ukuti akawacitila ivizima ivivule. Avino calinji na ku wantu wano Paulo wa wizizyanga mu Ateni. Nawonye watamanyile e Leza.—Imili. 17:​19, 20, 30, 34.

⁷ E Paulo wawavwizye ukumanya ukuti e Leza wacisinka we “kapa wawumi nukufuta navinjinye kuwantu wonsi.” Walanzile nu kuti: “Mwakwe weliwe tukayinganila swinya tuli nuwulanzi.” E Leza wekelewula, swinya “mumuntu wenganye amuno welewulizile imyiko yonsi.” Awuli umulandu wuno wayanila ukumupepa.—Imili. 17:​25, 26, 28.

8. Acani cino e Yehova atalitela acitepo, swinya walanjizya wuli ukuti watukunda?

⁸ Pa mulandu wakuti e Yehova wekelewula swinya awino wayana ukuteka munsi na mwi yulu, nga akulonda angatupaticizya ukuti twamuwombela. Lelo e Yehova atalitela acitepo icamusango wo-o. Watupa uwusinincizyo uwuvule wuno wukalanjizya ukuti akuno wawa nukuti watukunda wenga na wenga. E Yehova akalonda awantu awavule ukuwa iviwuza vyakwe pe yo-o impindi na kuciyayaya. (1 Tim. 2:​3, 4) Awuli umulandu wuno akatusambilizya ivyakusambilizya wanji pa vizima vino alicitila awantu. (Mat. 10:​11-13; 28:​19, 20) Swinya watuwika mwi wungwe ilizima nkaninye muno mwawa awonsi wano wakatusakamala.—Imili. 20:28.

9. Avyani vimwi vino vikalanjizya ukuti e Yehova wakunda awantu wonsinye?

⁹ E Yehova akalanjizya ukuti wakunda na walyanye wano watamusuwila. Akacita wo-o ukupitila mukuwapa ivintu ivizima. Ku cakulolelako, pa myaka imivule awantu wakayicitila vino aweneco wakulola ukuti avizima nanti aviwipe. Lelo nanti ciwe wo-o, e Yehova akawapa vino wakulondekwa pakuti watwalilile ukuwa nu wumi ni nsansa. (Mat. 5:​44, 45; Imili. 14:​16, 17) Pe vyo-o pawa iviwuza, ulupwa, awana ni ncito zyakuwomba. (Amalu. 127:3; Ekawi. 2:24) Vyonsinye vyo-o vikalanjizya ukuti e Yehova wakunda awantu wonsinye. (Ukuf. 34:6) Lekani nomba tulande pe vino vikalenga tusolepo ukuwombela Yehova ni vizima vino tukazanamo nga twasolapo ukumuwombela.

IMILANDU YINO YALENGA TUSOLEPO UKUWOMBELA YEHOVA

10. (a) Amulandu ci uwukulu wuno wukalenga twawombela Yehova? (Mateyu 22:37) (b) Avyani vino vikalanjizya ukuti e Yehova wamitekanizizya? (Amalumbo 103:​13, 14)

¹⁰ Umulandu uwukulu wuno wukalenga twawombela Yehova akumukunda ndi wulyanye vino calinji kwe Yesu. (Wazyani Mateyu 22:37.) Tukapalamila kwe Yehova nga twelenganya pa miwele yino wakwata. Ku cakulolelako, akayikundila ukututetela. Wonye avino wacisile ku wina Israeli, nanti acakuti wamupondocelanga wawalambilizyanga ukuti: “Si-nyokani, wensi uwakwe mwemwe, ndafume kumiwele yinu ni miwombele yinu.” (Jere. 18:11) Nasweswenye asa mulandu nu kuti tukaluvyanya, akatutetela amuno akakwizuka ukuti tutapwililika swinya swe litukumbu. (Wazyani Amalumbo 103:​13, 14.) Uzye nga mwelenganya pa miku yino Yehova wamitetela, cikalenga mwavwambisya ukumuwombela?

11. Amilandu ci yinji yino yikalenga tusolepo ukuwombela Yehova?

¹¹ Umulandu wunji wuno wukalenga tusolepo ukuwombela Yehova awakuti, avino tuzipizile ukucita. (Mat. 4:10) Twamanya ukuti nga twatwalilila ukuwa ni cisinka kwe weliwe, mulifuma ivizima ivivule. Amuno tulilenga izina lyakwe ukucindikwa, tulisinila e Satana ukuti we cawufi swinya tulilenga umwezo wa kwe Yehova ukusecelela. Cinji acakuti nga twasolapo ukumuwombela pe yo-o impindi, tungiza tuwe nu longo lwa kumuwombela ku ciyayaya.—Yoha. 17:3.

12-13. Avyani vino tukusambililako kwe Jane ne Pam?

¹² Tungatalika ukukunda Yehova pano tucili swe wacitinye, swinya lo-o ulukundo lungaya lukukulilako pano tukuya tukukula. Wonye avino calinji na kwa nkazi wawili, e Jane ne Pam.a E Jane walinji ni myaka 11 ne e Pam walinji ni myaka 10 pano watalisile ukusambilila Baibolo. Awakwasi wa kwe wa-a wankazi watalinji awa Nte, lelo wawazumilizizye ukuti wasambilila ni Nte zya kwe Yehova cikuluvye nga wakuzanwa ku ceci ku mwawo. E Jane watili, “vino Inte zya kwe Yehova wansambilizizye, vyalenzile ntacita vino wakasukulu wanji wacitanga ponga ngati ukuwomvya imiti yino yikakola nu kucita uwuzelele.”

¹³ Pano papisile imyaka yitici, wa-a awakazyana wizile awawa awakawizya. Mukupita kwa mpindi pansizi yakubatizwa, wizile awatalika ukuwomba wu payiniya. Swinya pano awakwasi wawo wakula wizile awatalika ukuwasakamala ko-o lyo watwalilila na wu payiniya. E Jane walondolozile vino akayivwa pe vino Yehova wawacitizile ukuti: “Naweni ukuti e Yehova akasakamala iviwuza vyakwe swinya ndi vino e 2 Timoti 2:19 yikalanda, ‘Imfumu yamanya wano awakwe.’” Ukwasowa nu kuvwilika e Yehova akasakamala wonsinye wano wasolapo ukumuwombela pa mulandu wa kumukunda.

14. Uzye tungacita wuli nga twivwa awantu wakulanda iviwipe pe Yehova? (Lolani ni cikope.)

¹⁴ Tukalonda awantu wamanye ukuti vyonsinye iviwipe vino wivwa pe Yehova avyawufi. Yelenganyani ukuti mwawa ne ciwuza wino wawa ni cikuku, umwenzo wakupa swinya akatetela. Nomba wanda wumwi mwivwa wamwi wakuti e ciwuza winu wakalala swinya atawa ni cisinka. Uzye mungacita wuli? Ukwasowa nu kuvwilika mungamulandilako. Wonye avino nasweswenye tukacita ngatwivwa wakulanda iviwipe pe Yehova, tukamulandilako. (Amalu. 34:1; Ayize. 43:10) Tukalanjizya ukuti tukalonda ukuwombela Yehova ni myezo yitu yonsinye ukupitila mwevyo tukalanda na vino tukacita.

15. Avizima ci vino umutumwa Paulo wazanilemo mukupilula uwumi wakwe? (Wafilipi 3:​7, 8)

¹⁵ Tukayikundila ukupilukako mwe vimwi pakuti twasecelesya Yehova nanti pakuti twamuwombela sana. Ku cakulolelako, umutumwa Paulo wasozilepo ukusya icifulo cino wakweti mu mipepele ya ciYuda pakuti awe amusambi wa kwe Yesu nu kuwawombela Yehova. (Gal. 1:14) Na cino cafumilemo acakuti wazanilemo ivizima ivivule swinya wawa nu longo lwa kuteka ne Yesu kwi yulu. Asitela alangulukepo pe vino wasozilepo ukuwombela Yehova. Wonye avino ciliwa na kwe sweswenye, tutalitela tulangulukepo nga twasolapo ukutalika ukuwombela Yehova.—Wazyani Wafilipi 3:​7, 8.

16. Avyani vino tukusambililako kwe Julia? (Lolani ni vikope.)

¹⁶ Nga twawika sana amano ku kuwombela Yehova, alitupaala pe yo-o impindi na ku nkolelo. Lekani tulande pe vino vyaciticizile e nkazi Julia. Pano we-e e nkazi atani asambilile icine, wimbilanga e kwaya ukufuma ku wutici. Pano wino wamanya ivyandwimbo wamanyile ukuti we-e nkazi wawa ni cawila ca kwimbila, watalisile ukumusambilizya pakuti awe wekimbila muzima. E Julia wizile amanyikwa sana swinya wayanga mukwimbila mu ncende izilumbuke. Wanda wumwi lyo acili akusambilila ivya ndwimbo, wino wasambililanga nawe wizile amunena pe Leza nu kumulondololela ukuti wakwata izina lyakuti Yehova. Patazimvile e Julia wizile atalika ukusambilila Baibolo swinya wacitanga wo-o imiku yiwili mwe sabata. Mukupita kwa mpindi, wizile asolapo ukuwomvya impindi na maka kukuwombela Yehova ukucila ukusambilila ivyakwimbila. Lelo ukucita wo-o kutapepusile. Watili, “Awantu awavule wanenanga ukuti ntapinguzilepo icete ukutalika ukuwombela Yehova. Lelo nemweneco nalondanga ukuwomvya uwumi wane ku kuwombela Yehova.” Akayivwa wuli pe vino wasozilepo ukutalika ukuwombela Yehova imyaka 30 yino yapita? Watili, “Nawa ni nsansa nkaninye swinya namanya ukuti e Yehova alincitila vyonsinye vino nkalonda ku nkolelo.”—Amalu. 145:16.

TWALILILANI UKUWOMBELA YEHOVA

17. Uzye ukumanya ukuti tukwikala mu manda yakulecelezya kwakuma wuli wano watani wasolepo ukuwombela Yehova na wano wasolapo ukumuwombela?

¹⁷ Tukwikala mu manda ya kulecelezya ayakwe yo-o insi mbipe. Umutumwa Paulo walemvile ukuti: “Amuno impindi ntichi ndikwazimba katichi, apano weyo wino aliyiza alila ale ayize; nanti kuzimba.” (Hebe. 10:37) Uzye ya-a amazwi yakasula mwinye? Wano watani wasolepo ukuwombela Yehova wazipizile ukumanya ukuti impindi yakuti wasolepo ukumuwombela yicefile, acino wazipizile ukucitapo cimwi nombanye. (1 Kor. 7:29) Ne nga cakuti twasolapo kaali ukuwombela Yehova, tuzipizile ukumanya ukuti intazi zino tukupitamo azya pa ‘mpindi ntichi.’

18. Uzye e Yehova ne Yesu wakalonda twacita cani?

¹⁸ E Yesu wawomelezizye awantu ukuwa awasambi wakwe nu kutwalilila ukumukonka. (Mat. 16:24) Acino nga cakuti twawombela Yehova pa myaka imivule, tutazipizile ukunenuka. Tuzipizile ukuwombesya pakuti tutwalilile ukuwombela Yehova. Manda yamwi ukucita wo-o kutapepuka, lelo nga twatwalilila ukumuwombela tungawa ni nsansa pe yo-o impindi na ku nkolelo.—Amalu. 35:27.

19. Avyani vino tukusambililako kwe Gene?

¹⁹ Wamwi wangakwelenganya ukuti nga watalika ukuwombela Yehova wangapuswa ivivule. Nga cakuti mwe wacitici, uzye namwemwenye avino mukayivwa? Wonye avino calinji ku mwanawitu uwacitici uwizina lyakuti Gene. Watili: “Nalolanga ngati nga nawa Inte ya kwe Yehova ntaliwawa ni nsansa. Nalolanga ngati awacitici wanji walinji ni nsansa pamulandu wakuti wayanga ku ma pate, wateyanga indwizyo muno mwawa uwunkalwe nu kuvwambana. Co-o calenzile nalola ukuti ukuya mu kulongana na mukuwizya akuyisumbila vye impindi.” Acani cino cafumilemo mwe vino Gene welenganyanga? Walanzile ukuti, “Natalisile ukucita iviwipe vino awacitici wanji wacitanga. Lelo nizile imba ni nsansa zya pa kampindivye katici. Co-o celenzile ntalike ukwelenganya pa wuzima wuno wawa mu kukonka vino Baibolo yikalanda swinya nasozilepo ukutalika ukuwombela Yehova nu mwezo wane wonsinye. Ukufuma pe yilyanye impindi, nalola vino Yehova akakwasuka amapepo yane.”

20. Avyani vino tuzipizile ukutwalilila ukucita?

²⁰ E kimbila wa malumbo wumwi watili: “Awalongo awasolwa wako, wano wawasenda ukuti wakwikala mumasyo matele.” (Amalu. 65:4) Acino lekani tutwalilile ukuwombela Yehova ndi wulyanye vino Joshua wacisile wino walanzile ukuti: “Nene na wa mu ng’anda yane twandi twawombela Yehova.”—Josh. 24:15.