ICIPANDE CA KUSAMBILILAMO 15
ULWIMBO 30 Amukwasi Wane, We Leza Wane Swinya we Ciwuza
Cazipa ndi Wuli kwe Sweswe Ukuwa Mupipi ne Leza!
“Ukuwa nenji, acizima ndi wuli ukuwa mupipi nawe [Leza].” —AMALU. 73:28.
VINO TWANDI TUSAMBILILE
Twandi tusambilile pe vino vingatwavwa ukupalamila kwe Yehova, ni vizima vino tungazanamo mukucita wo-o.
1-2. (a) Avyani vino tuzipizile ukucita nga tukulonda ukuwa iviwuza nu muntu wumwi? (b) Avyani vino twandi tusambilile mwe co-o icipande?
UZYE mwawa ne ciwuza wino mwakunda sana? Mwacisile wuli pakuti muwe iviwuza? Mufwile mwasumbanga impindi inkulu ponga nawe, ukumanya vino wapitamo, vino wakunda nanti vino wapata. Cinji mwaweni imiwele imizima yino wawa nayo yino mungakunda ukukolanya. Vyo-o vino twalandapo, vifwile avino vyalenzile mumukunde.
2 Pakuti muwe sana iviwuza nu muntu, muzipizile mwazanwa nawe ponga impindi inkulu. Wonye avino cawa nga tukulonda ukuwa iviwuza ne Yehova. Tuzipizile twasumba impindi inkulu ukuwa ponga nawe. Acino mwe co-o icipande twandi tusambilile pe vino tungacita pakuti tuwe sana iviwuza ne Yehova ni vizima vino tungazanamo. Lekani tutalicisile ukulanda pa mulandu wuno cicindamizile ukuwa iviwuza vya kwe Yehova.
3. Amulandu ci wuno tuzipizile ukuwakwelenganizizya pa wuzima wuno wawa mukuwa iviwuza vya kwe Yehova? Lanjililani.
3 Ukwasowa nu kuvwilika na mwemwenye mwamanya ukuti ukupalamila kwe Yehova kwazipa sana. Lelo nga tukwelenganya pa wuzima wuno wawa mukuwa iviwuza vya kwe Yehova, tuliwavwambisya ukupalamila nkaninye kwe weliwe. (Amalu. 63:6-8) Amulandu ci wuno twalandila wo-o? Katulanjilile: Awantu wamanya ukuti cacindama sana ukulya ivyakulya ivizima, ukutukusya umuwili, ukulala utulo utukumanile nu kumwa aminzi amayane cila wanda. Lelo awavule wasivicita, na co-o calenga watawa nu wumi uwuzima. Nomba wano wakakwelenganya ukuti vyacindama, awano wavulila ukuvicita. Nasweswenye nga twamanya umulandu wuno cacindamila ukuwa iviwuza vya kwe Yehova, tuliwavwambisya sana ukupalamila kwe weliwe.—Amalu. 119:27-30.
4. Avyani vino wino walemvile Amalumbo 73:28 walanzile?
4 Wazyani Amalumbo 73:28. Wino walemvile Amalumbo 73 walinji amwina Levi wino wasonsilwe ukuti awakwimbila indwimbo pi tempile lya kwe Yehova. Swinya afwile wawombezile e Yehova ni cisinka pa myaka imivule. Lelo nanti ciwe wo-o wamanyile ukuti ukupalamila kwe Yehova kwacindime nkaninye kwe weliwe. Swinya wonye avino walondanga ukuti awantu wanji walola. Amulandu ci wuno cazipila “ukuwa mupipi” ne Yehova nu kuwa sana iviwuza na weliwe?
“UKUWA MUPIPI NE LEZA” KUKALETA INSANSA
5. (a) Amulandu ci wuno ukupalamila sana kwe Yehova kukaletela insansa? (b) Uzye amano yano Yehova akatupa yakatwavwa nu kutucinjilila wuli? (Imilumbe 2:6-16).
5 Pano tukuya tukupalamila kwe Yehova apano tukaya tukuwelako ni nsansa. (Amalu. 65:4) Kwawa imilandu imivule yino yingalenga tuwe ni nsansa. Ku cakulolelako, nga cakuti twawazya vino Yehova akutunena mu Baibolo nu kuvikonka, tukawa na mano. Vino Yehova akatusambilizya vingatucinjilila kwe vino vingatuletelela nanti vino vingalenga tuluvyanye. (Wazyani Imilumbe 2:6-16.) Awuli umulandu wuno e Baibolo yikalandila ukuti: “Awachimwemwe umuntu wamano wino akakwivwichisya.”—Imilu. 3:13.
6. Acani cino calenzile e kimbila wa malumbo aleke ukuwa ni nsansa?
6 Awawomvi wa kwe Yehova nawonye mpindi zimwi wakayivwa uwuwi. E kalemba wa Amalumbo 73, nawenye wizile aleka ukuwa ni nsansa pa mulandu wakutalika ukwelenganya pe vino vitacindime. Watalisile ukwelenganya ukuti wano wasiwombela Yehova wakakwikala icete. Na co-o calenzile atalike ukuyivwa uwuwi nukutalika ukuwakumbucila. Walolanga ukuti awantu wano walinji awankalwe swinya awacilumba, wawanga na vyonsinye vino walondanga swinya wataculanga nanti cimwinye. (Amalu. 73:3-7, 12) Impindi yimwi wino wimbizile ya-a amalumbo wayivwile uwuwi nkaninye icakuti watalisile ukulola ngati ukuwombela Yehova akuyisumbilavye impindi. Vino wayivwile vyalenzile alande ukuti: “Wuzye fwandi achavye kwenene, pano nenji nkachita ichete, namakasa yane yasichita uluwembu?”—Amalu. 73:13.
7. Avyani vino tuzipizile ukucita nga twivwa uwuwi? (Lolani ni cikope pa nkupo.)
7 Nanti acakuti e kimbila wa malumbo wivwile uwuwi nkaninye, wacisilepo cimwi cino calenzile atatwalilila ukuyivwa uwuwi. “Winjizile mung’anda yakwe Leza iyakupepelamo,” muno Yehova wayile amwavwa ukuwalola ivintu ndi vino weliwe akavilola. (Amalu. 73:17-19) Nga cakuti kuli cimwi cino calenga twivwa uwuwi, e Yehova akamanya. Acino tuzipizile ukupepa kwe weliwe nu kumulenga ukuti atwavwe. Nawe alitwavwa ukupitila mwi Zwi lyakwe e Baibolo na mu wanawitu na wankazi pakuti tutwalilile ukumuwombela. Na palyanye pano tuli ni ntazi icakuti tutamanyile ni vyakucita e Yehova alitwavwa ukuteka umwezo.—Amalu. 94:19.a
Umwina Levi wino walemvile Amalumbo 73, ayimilile “mu ng’anda yakupepela Leza.” (Lolani paragrafu 7)
UKUWA “MUPIPI NU LEZA” KUNGALENGA TUWE NI NSANSA NI SUWILO LYA KU NKOLELO
8. Amilandu ci nayinji yiwili yino cacindamila ukuwa iviwuza vya kwe Yehova?
8 Kwawa imilandu nayinji yiwili yino cacindamila ukuwa iviwuza vya kwe Yehova. Uwa kutalicila awakuti, tungawa nu wumi uwuzima. Uwa citi wili, tungawa ni suwilo iwome mwe vino Yehova walaya. (Jere. 29:11) Lekani tulande pe yo-o imilandu wonga na wonga.
9. Uzye ukuwa iviwuza vya kwe Yehova kungalenga twayivwa wuli?
9 Ukuwa iviwuza vya kwe Yehova kungalenga tuwe nu wumi uwuzima. Awantu awavule wakati kutawa e Leza, na co-o calenga watamanya umulandu wuno twawela munsi. Swinya wasuwila ukuti ku nkolelo insi yilisyalavye, mutaliwa umuntu uwili wensinye. Lelo sweswe twasambilila mwe Baibolo ukuti e ‘Leza akuno wawa swinya akalambula wano wakamuvwamba.’ (Hebe. 11:6) Co-o cikalenga twawa ni nsansa pano tukuwombela Yehova, amuno twelewuzilwe ukuti twamuwombela.—Amasu. 10:12, 13.
10. Avyani vino Yehova walaya wano wamusuwila? (Amalumbo 37:29)
10 Awantu a wavule watamanya ukuti ku nkolelo ivintu vilizipa. Co-o cikalenga wawikavye amano ku ncito, kwi twala, ukuwa na wana nga nu kuyipekanizizya kwe vino waliyikala nga wakota. Watamanya vino Leza watulaya ukutucitila ku nkolelo. Lelo sweswe swe wawomvi wakwe twamanya ukuti akatusakamala. (Amalu. 25:3-5; 1 Tim. 6:17) Twasuwila nkaninye e Yehova swinya twamanya ukuti alificilisya vino watulaya. Kwawa ivizima ivivule nkaninye vino Leza watulaya, pano pawa nu kumupepa ku ciyayaya mu Paradaise.—Wazyani Amalumbo 37:29.
11. Avizima ci vino tukazanamo mukuwa e ciwuza wa kwe Leza, swinya tukalenga awayivwa wuli?
11 Ukupalamila kwe Leza kwazipa na mu nzila na zinjinye. Ku cakulolelako, e Yehova akatutetela nga cakuti twalapila ku luwembu luno twacisile. (Ayize. 1:18) Fwandi tutazipizile twatwalilila ukuyivwa uwuwi pe vino twaluvinye. (Amalu. 32:1-5) Swinya tukalenga Yehova ukusecelela nga cakuti twapalamila kwe weliwe. (Imilu. 23:15) Kweni kwawa ivizima na vinjinye vino tukayitopwa pa mulandu wakuwa iviwuza vya kwe Leza. Nomba avyani vino tungacita pakuti tutwalilile ukuwa iviwuza vya kwe Leza?
VINO TUNGACITA PAKUTWALILILA “UKUPALAMILA KWE LEZA”
12. Avyani vino muzipizile ukutwalilila ukucita pakuti muwe iviwuza vya kwe Yehova?
12 Nga cakuti mwabatizwa, tusakuvwilika ukuti mwawombesizye nkaninye pakuti muwe iviwuza vya kwe Yehova. Mwamanyile icisinka pe Yehova ne Yesu, mwalapizile kwe vino mwacita, mwalanjizizye ukuti mwasuwila e Yehova swinya mukacita ukulonda kwakwe. Lelo pakuti tutwalilile ukuwa iviwuza vya kwe Leza, tuzipizile ukutwalilila ukucita ivizima vino twacitanga.—Kolo. 2:6.
13. Avintu ci vitatu vino vingatwavwa ukutwalilila ukupalamila kwe Yehova?
13 Avyani vino vingatwavwa ukutwalilila ukupalamila kwe Yehova? (1) Tuzipizile ukutwalilila ukuyisambilizya Baibolo. Pano tukucita wo-o, tutazipizile ukupelelavye pakumanya ivisinka pe Leza. Lelo tuzipizile twakwelezya ukumanya vino Yehova akulonda tucite nu kuleka vyovyonye avino vyatutungulula. (Efes. 5:15-17) (2) Tuzipizile ukuwomya isuwilo litu ukupitila mukwelenganya pe vino vikalanjizya ukuti watukunda wenga na wenga. (3) Tuzipizile ukutwalilila ukupata vino Yehova wapata nu kukanayizya na wano wakavicita.—Amalu. 1:1; 101:3.
14. Ukulingana ne 1 Wakorinte 10:31, avyani vino tuzipizile ukucita pakuti twasecelesya Yehova? (Lolani ni vikope.)
14 Wazyani 1 Wakorinte 10:31. Cacindama nkaninye ukuwacita ivintu vino vingasecelesya Yehova. Pe vino vingamusecelesya patawavye ukuya mu kulongana nu kuwizya. Lelo navyonsinye vino tukucita cila wanda, vizipizile vyamusecelesya. Ku cakulolelako, nga tuli awa cisinka mwe vyonsinye swinya tukupako na wanji vino tukweti, tuliwalenga Yehova ukusecelela. (2 Kor. 8:21; 9:7) Cinji acakuti akalonda twalanjizya ukusalifya pa wumi wuno watupa. Fwandi tuzipizile twawikako sana amano kwe vino tukalya nu kumwa. Swinya tuzipizile twacita na vino vingalenga tuwe nu wumi uwuzima. Tuzipizile twakwelezya na maka ukuwasecelesya Yehova na mwetulyanye tuno tukuloleka ukuti atutici. Nga tukucita wo-o, e Yehova aliwatukundilako.—Luk. 16:10.
Vimwi vino tungacita pakusecelesya Yehova, akuwa swe wakapisya awazima, ukutukusya umuwili, ukulya ivyakulya ivizima nu kupako wanji vino tukweti. (Lolani paragrafu 14)
15. Uzye e Yehova akalonda twalola wuli awantu wanji?
15 E Yehova wawa ni cikuku kwe wonsinye, wano wakamuwombela na wano wasimuwombela. (Mat. 5:45) Wonye avino akalonda na sweswe twawa ni cikuku ku wantu wanji. Ku cakulolelako, tutazipizile “twavwanjila wumwi uluwi pamwi nanti akukatusya impokoto, . . . twalanjizya wucimyamya ku wantu wonsi.” (Tait. 3:2) Nanti acakuti kwawa awantu wamwi wano watazumila mwe Yehova, tutazipizile twawalola ngati watacindama. (2 Tim. 2:23-25) Tungapalamila kwe Yehova nga cakuti tuli ni cikuku kwe wonsinye.
TUNGAPALAMILA KWE LEZA NA PANO TWALUVYANYANYE
16. Uzye wino walemvile Amalumbo 73 wayivwile wuli pa mpindi yimwi?
16 Mpindi zimwi mungalola ngati mutanga mupalamile kwe Yehova pa mulandu na vino mukaluvyanya. Wonye avino wino walemvile Amalumbo 73 wino tulanzilepo wayivwile. Walanzile ukuti: “nanenenchezile ukuti mpone pansi; amanama yane yanenechezile ukutelemuka.” (Amalu. 73:2) Walanzile nu kuti amelenganyo yakwe “yawifile” ‘awakana ukwiluka’ swinya ‘awacita ngati achinyamana’ kwe Yehova. (Amalu. 73:21, 22) Nomba uzye walolanga ngati Yehova walesile ukumukunda nanti atanga amutetele pa viluwo vino wacisile?
17. (a) Uzye e kimbila wa malumbo wacisile wuli pano wivwile sana uwuwi? (b) Avyani vino tungasambililako kwe vino wacisile? (Lolani ni vikope.)
17 Nga cakuti e kimbila wa malumbo welenginyepo ukuti e Yehova amulecelezizye, lyo afwile welenginyevye wo-o pa mpindi ntici. Cikaloleka ukuti pano wivwile uwuwi sana, wizile alola ukuti walondekwanga ukupalamila kwe Yehova. Twamanya wo-o ukupitila mu mazwi yano walanzile ayakuti: “Ukuwa naponye indi nawe, ukandema ikasa. Ukantungulula nilango lyako, napakupelelechezya ulimpochelela numuchinzi.” (Amalu. 73:23, 24) Nasweswenye nga twivwa uwuwi pe vino twacisile, tuzipizile ukupepa kwe Yehova ukuti atuwomye. (Amalu. 73:26; 94:18) Na palyanye pano twacita iciluwo icikulu, tungasuwila ukuti e Yehova ‘angatutetela’ nu kuwa we ciwuza witu naswinya. (Amalu. 86:5) Fwandi cicindime ukupalamila kwe Yehova maka maka pano twivwa sana uwuwi.—Amalu. 103:13, 14.
Nga cakuti twivwa uwuwi, tuzipizile ukupalamila sana kwe Yehova ukupitila mu kupepa nu kuwazanwa mu kulongana lyonsinye (Lolani paragrafu 17)
TWALILILANI UKUPALAMILA KWE LEZA
18. Amulandu ci wuno tuzipizile ukutwalilila ukupalamila kwe Yehova?
18 Tuzipizile ukutwalilila ukupalamila kwe Yehova, amuno tutalitela tulekepo ukusambilila pe weliwe. E Baibolo yikati inzila zya kwe Yehova na mano yakwe ‘avyakuzungusya.’—Roma. 11:33.
19. Uzye amazwi yano yawa mu Amalumbo yangatwavwa ukusuwila cani?
19 Pa Amalumbo 79:13, pakati: “Nga naswe, swe wantu wako, swe ng’onzi zyako, tuwakusalifya penye, tulange tukakutumvya kumpindi yonsi yino iliyiza.” Nasweswenye nga twatwalilila ukupalamila kwe Yehova tungasuwila ukuti alitupaala ku ciyayaya. Nga twacita wo-o, tungalanda ndi vino e kimbila wa malumbo walanzile ukuti: ‘Ukuwa Leza wemaka yane; swinya we Leza wane umuyayaya.’—Amalu. 73:26.
ULWIMBO 32 Wani ku Luwali lwa kwe Yehova!
a Wamwi wano wakasakamikwa nanti ukwivwa uwuwi pa mpindi intali, wazipizile ukuya kwa dokota pakuti wawavwe. Nga mukulonda ukumanyilapo ivyewo na vinji, lolani Ulupungu lwa kwa Kalinda, Na. 1 2023.