ICIPANDE CA KUSAMBILILAMO 16
ULWIMBO 87 Zanji Musansamuke!
Ukuwa Iviwuza na Wanawitu na Wankazi Kwazipa Sana!
‘Cazipa swinya cikaleta insansa, nga cakuti awantu wakwe Leza wakwikala apaliponga ngati awang’anda yonga!’—AMALU. 133:1.
VINO TWANDI TUSAMBILILE
Twandi tusambilile pe vino tungacita pakuti tuwe iviwuza na wanawitu na wankazi na vino Yehova alitupaala nga twacita wo-o.
1-2. Acintu ci cino cacindama sana kwe Yehova, swinya avyani vino akalonda twacita?
VINO tukacita ku wantu wanji, vyacindama nkaninye kwe Yehova. E Yesu watusambilizizye ukuti tuzipizile twakunda awantu wanji ndi vino twayikunda. (Mat. 22:37-39) Co-o cikusula mukuti tuzipizile ukukunda na walyanye wano wasiwombela Yehova. Nga tukucita wo-o, lyo tukukolanya Yehova wino “akaleka ilanzi likuwalila awawipe nawazima, swinya akaleka imvula itonyelela kuwazima nakuwawipenye.”—Mat. 5:45.
2 Nanti acakuti e Yehova wakunda awantu wonsinye lelo wakunda nkani wano wakamwivwila. (Yoha. 14:21) Akalonda ukuti twamukolanya. Awuli umulandu wuno akatunenela ‘ukukunda nkaninye’ awanawitu na wankazi nu kuwalanjizya “ulukundo lwenecho.” (1 Pet. 4:8; Roma. 12:10) Lo-o ulukundo luzipizile ukuwa ngati alulyanye luno tukalanjizya kwa lupwa lwitu nanti ku viwuza ivipalamisye.
3. Uzye ulukundo walukolanya ku cani, swinya amulandu ci?
3 Ulukundo walukolanya ku cilimwa. Pakuti icilimwa citwalilile ukukula icete pakalondekwa ukucisakamala. Wonye avino tuzipizile ukucita pakuti tutwalilile ukukunda awantu wanji, tuzipizile ukuwombesya. Awuli umulandu wuno umutumwa Paulo wawomelezizye awina Klistu wawuye ukuti: “Lekani ulukundo lwa wunyina lulandalile.” (Hebe. 13:1) E Yehova akalonda twatwalilila ukukunda wanji. Acino mwe co-o icipande twandi tusambilile pe vino tungacita pakuti tupalamile sana ku wanawitu na wankazi na vino tungacita pakuti tutwalilile ukuwakunda.
UMULANDU WUNO TUZIPIZILE UKUKUNDANA SANA
4. Ukulingana ni waliko lya Amalumbo 133:1, tungacita wuli pakuti tutwalilile ukulola ukuti awanawitu na wankazi wacindama? (Lolani ni vikope.)
4 Wazyani Amalumbo 133:1. Nasweswenye tungazumilizyako ku mazwi yano e kimbila wa malumbo walanzile ayakuti ukuwa iviwuza na wano wakunda Yehova ‘kwazipa’ swinya ‘kukaleta insansa.’ Ndi wulyanye vino umuntu angaleka ukulola uwuzima mu cintu cino akalola lyonsinye, avino tungaleka ukulola uwuzima wuno wawa mu kulemenkana caponga na wanawitu na wankazi. Amuno impindi imvule tukazanwa nawo swinya tukalolana. Tungacita wuli pakuti tutwalilile ukuwalola ukuti wacindama? Cimwi cino tungacita akuwakwelenganya pe vino wenga na wenga wacindama kwe sweswe na mwi wungwe. Swinya ukucita wo-o kulilenga tuwakunde.
Ukulemenkana kuno kwawa mwi wungwe lya kwe Yehova mutange mukuzane ukuli konsinye (Lolani paragrafu 4)
5. Avyani vino wanji wakavwambisya ukucita nga walola vino twakundana?
5 Wamwi nga wiza mu kulongana pa muku wakutalicila, wakakwivwa icete nkaninye ukulola vino twakundana. Co-o cikalenga walola ukuti wazana ukupepa kwa cisinka. E Yesu watili: “Ndimwakundana, apano awantu wonsi walimanya kuno mwewasambilizi wane.” (Yoha. 13:35) Katulande pe Chaithra wino wasambililanga ni Nte zya kwe Yehova lyo acili ali ku yuniveziti. Wino wamusambilizyanga Baibolo wamulalisile ukuti ayize azanwe mu kulongana kwa citungu. Pano wazanilweko uwanda wakutalicila, wanenile wino wamusambilizyanga Baibolo ukuti: “Awakwasi wane wasitela wankumbatilepo, lelo pe ko-o ukulongana awantu awavule sana wano wankumbatizile. E Yehova awomvizye wa-a awantu pakundanjizya vino wankunda. Nkulondesya sana ukuwa mwe lo-o ulupwa.” E Chaithra watwalilizile ukusambilila Baibolo nu kupilula imiwele yakwe. Swinya wizile abatizwa mu 2024. Fwandi nga cakuti awantu walola imiwele yitu imizima, pano pawa na vino twakundana, wakavwambisya ukuwombela Yehova.—Mat. 5:16.
6. Uzye ukuwa iviwuza na wanawitu na wankazi kungatucinjilila wuli?
6 Ukupanga iviwuza na wanawitu na wankazi kungatucinjilila. E Paulo wanenile awina Klistu wawuye ukuti: “Socelenanji nanti womelezyanyanji wila wanda alyakuti wumwi atacenjezwa nu luwembu.” (Hebe. 3:13) Fwandi nga cakuti twawa ni ntazi yino yingalenga catuwomela ukucita ivizima, e Yehova angawomvya umwanawitu nanti e nkazi ku kutwavwa. (Amalu. 73:2, 17, 23) Ukwavwa kwa musango wo-o kungatuwomelezya nkaninye amuno kungalenga tutacita iviwipe.
7. Uzye ulukundo nu kulemenkana vyalemenkana wuli? (Wakolose 3:13, 14)
7 Twawa mu lupwa muno mwawa awantu wano wakakwelezya na maka ukulanjizya ukuti wakundana. Co-o cikalenga twayitopwa ivizima ivivule. (1 Yoh. 4:11) Ku cakulolelako, ulukundo lukalenga ‘twazizimicizya,’ icakuti tukatwalilila ukulemenkana na wanawitu na wankazi. (Wazyani Wakolose 3:13, 14; Efes. 4:2-6) Swinya pano tuli pa kulongana tukayitopwa umutende ni nsansa vino tutanga tuzane ku mipepele iyili yonsinye.
MUWACINDIKANA
8. Uzye e Yehova akatwavwa wuli pakuti tutwalilile ukulemenkana na wanawitu na wankazi?
8 E Yehova awino akatwavwa ukutwalilila ukulemenkana insi yonsinye asa mulandu nu kuti tutapwililika. (1 Kor. 12:24, 25) E Baibolo yikati, ‘twasambilizwa nu Leza ukuti tuwakundana.’ (1 Tes. 4:9) Co-o cikusula mukuti e Yehova akawomvya e Baibolo pakutunena vino tuzipizile ukucita pakuti tutwalilile ukukundana. ‘Tungasambilizwa nu Leza’ ukupitila mukuwikako sana amano pano tukuyisambilizya swinya tukuwomvya na vino tukusambilila. (Hebe. 4:12; Jemu. 1:25) Wonye avino Inte zya kwe Yehova wakakwelezya na maka ukucita.
9. Avyani vino tungasambililako ku mazwi yano yawa pe Waroma 12:9-13 pa kucindikana?
9 Avyani vino e Baibolo yikalanda ukuti avino tuzipizile ukucita pakupalamila ku wanawitu na wankazi? Lekani tulande pa mazwi yano Paulo walanzile yano yakazanwa pe Waroma 12:9-13. (Wazyani.) Nga mwalola pa-a, e Paulo walanzile ukuti, “mwawa pankolelo kukucindikana.” [NWT] Uzye ya-a mazwi yakasula cani? Yakasula mukuti tuzipizile ukuyikundila ukulanjizya “ulukundo lweneco” munzila impusane pusane ndi vino ukutetela wanji, ukuwapocelela pa ma ng’anda nu kuwapako vino tukweti. (Efes. 4:32) Tutazipizile ukulindilila ukuti awanawitu na wankazi awano watalicilepo ukupalamila kwe sweswe. Lelo aswewano tuzipizile ‘ukuwa pankolelo’ mukucita wo-o. Nga twacita wo-o, tuliwa ni nsansa ndi wulyanye vino Yesu walanzile ukuti: “Ukupa akwalongo wuli ukulusye ukupochelela.”—Imili. 20:35.
10. Tungalanjizya wuli ukuti tukawombesya pakulanjizya ukuti twawa “pankolelo kukucindikana”? (Lolani ni cikope.)
10 Pa nsizi yakulanda ukuti tuzipizile ukuwa pa nkolelo mukucindikana, e Paulo walanzile ukuti: “Wombesyanji mutize muwawa mwewakata.” Umuntu wino akawombesya nga wamupa umulimo wumwi, akawikako sana amano pano akuwomba. Pa Imilumbe 3:27, 28 pakati: “Yavwilizyanga wano wali muntazi, wachitilange ndimuno ungawachitila. Utize uwanena wumwi ukumuchitila mutondo, ndi ichakumuchitila chilipo kanonzinye.” Nga twalola wumwi wino akulondekwa ukumwavwa, tuzipizile ukumwavwa paponye. Tutazipizile ukwelenganya ukuti tulimwavwa impindi yinji nanti ukuti winji alimwavwa.—1 Yoh. 3:17, 18.
Tuzipizile twayitalicilako ukwavwa awanawitu na wankazi wano wakulondekwa ukuwavwa (Lolani paragrafu 10)
11. Acani cimwi cino cingatwavwa ukupalamila ku wanawitu na wankazi?
11 Inzila yinji yino tungalanjizizyamo ukuti tukacindika wanji akupitila mukuwatetela nga watuluvyanya. Pa Waefeso 4:26 pakati: “Mutize muwavitwa nanti ukufulwa uwanda wonsi.” Amulandu ci? E vesi 27 yikati “mutiza musile e Satana umwenko nanti apakwikala.” E Yehova watunena mwe Baibolo imiku imivule ukuti twatetelana. Pa Wakolose 3:13 pakati “tetelananji.” Ukutetela wanji kwawa pa vintu vino vingalenga tupalamile kwe woliwo. Nga twacita wo-o tuliwa ‘numwezo uwuliwonga ndi vino umuzimu walenga tuwe nu mwezo wonga, numutende wuno watulemenkanya apaliponga.’ (Efes. 4:3) Mukufupizya, ukutetela wanji, kungalenga tuwe pa mutende na wanawitu na wankazi.
12. Uzye Yehova akatwavwa wuli pakuti twatetela wanji?
12 Kweni mpindi zimwi cisipepuka ukutetela wino watuluvyanya. Lelo nga cakuti umuzimu wa kwe Leza watwavwa tungamutetela. Co-o cikusula mukuti umuzimu wa kwe Leza wungalenga twawombesya nu kuvwambisya ukucita icizima. Co-o casanzyamo ukulanjizya ulukundo lweneco nga nu kuyikundila ukutetela wanji. Awuli umulandu wuno lyonsinye tukalenjela kwe Yehova ukuti atwavwe.—Luk. 11:13.
“MWAKWE MWEMWE MUTAWA UKUPAWUNKANA”
13. Avyani vimwi vino vingalenga tupawunkane?
13 Mwi wungwe lya kwe Leza mwawa ‘awantu wonsinye’ awankulilo impusane mpusane. (1 Tim. 2:3, 4) Nomba nga tutacenjezile tungatalika ukupawunkana pamulandu na vino cila muntu wawa ni nsambu zya kusolapo ndi vino imizwalile, imilolecele, imipozezye nga ni ndwizyo. (Roma. 14:4; 1 Kor. 1:10) Lelo pamulandu wakuti ‘twasambilizwa nu Leza ukuti twakundana,’ tutazipizile twavwamba ukuti vino twakunda avyo nawanji wakonke.—Flpi. 2:3.
14. Acani cino tuzipizile twavwambisya ukucita swinya amulandu ci?
14 Cinji cino cingalenga mwi wungwe mutawa ukupawunkana, akuwalanda amazwi amazima swinya ayakuwomelezya ku wantu wonsinye. (1 Tes. 5:11) Pe yo-o impindi awavule wano watonsile na wano wawafumizye mwi wungwe watalika ukuwombela Yehova naswinya. Swinya tukawapocelela ni nsansa. (2 Kor. 2:8) Lolani vino e nkazi wumwi wino walesile ukulongana pa myaka 10 walanzile pansizi yakutalika ukulongana naswinya. Watili, “Awanawitu na wankazi wampocelezile ni cimwemwe. Pa kundamuka wamwentulanga nu kumwentula.” (Imili. 3:19) Uzye co-o calenzile ayivwe wuli? Watili, “Co-o calenzile njivwe ukuti e Yehova akulonda imbe ni nsansa naswinya.” Nga cakuti tukwelezya na maka ukuwomelezya wanji, e Yesu alituwomvya kukuwomelezya wano “wakucula swinya awang’wamilwe.” [NWT].—Mat. 11:28, 29
15. Acani na cinji cino tuzipizile ukucita pakuti mwi wungwe muwe ukulemenkana? (Lolani ni cikope.)
15 Inzila yinji yino yingalenga mwi wungwe muwe ukulemenkana, akuwomvya amazwi amazima pano tukulanda na wanji. Pe Job 12:11 pakati: “Uzye ikutwi lisimanya ukuti ya-a amazwi amazima nanti amawipe ndi wulyanye vino ululimi lukamanya ukuti vyo-o ivyakulya vinonile nanti awe?” Ndi wulyanye vino e katenda akatela tesasula mu vyakulya pano atani ape wanji, avino nasweswenye tuzipizile ukusola amazwi amazima pano tutani tuyalande. (Amalu. 141:3) Fwandi lyonsinye pano tutani tulande amazwi yamwi, tuzipizile ukusinincizya ukuti ayakuwomelezya, ayakusansamusya swinya “yangavwilizya wano wakwivwa.”—Efes. 4:29.
Mwakwelenganyapo pa mazwi yano mukulonda ukuwomvya pano mutani mulande (Lolani paragrafu 15)
16. Awaweni maka maka wano wazipizile ukuwomvya amazwi yano yangawomelezya wanji?
16 Awalume nanti awakwasi wazipizile ukusola icete amazwi yakuwomvya yano yangawomelezya awa mu lupwa. (Kolo. 3:19, 21; Tait. 2:4) Wa eluda na wonye wazipizile ukusola icete amazwi amazima yano yangawomelezya nu kusansamusya ing’onzi zya kwe Yehova. (Ayize. 32:1, 2; Gal. 6:1) E Baibolo mwi buku lya Imilumbe yikatunena ukuti: ‘Cazipa wuli ukulanda amazwi mazima pampindi yino yakulondekwa!’—Imilu. 15:23.
MWAKUNDA AWANTU NU MWEZO WINU WONSINYE
17. Avyani vino tuzipizile ukucita pakuti tukunde awanawitu na wankazi nu mwezo witu wonsinye?
17 Umutumwa Yohani watuwomelezizye ukuti, “Ulukundo lwitu lutize luwe amazwi yapamulomo patupu; ukuwa lwazipila aluwa alukundo lwakusimichila, luno lukaloleka kwe vino tukachita.” (1 Yoh. 3:18) Tuzipizile ukukunda awanawitu na wankazi nu mwezo witu wonsinye. Avyani vino vingatwavwa ukucita wo-o? Tuzipizile twazanwa ponga na wanawitu na wankazi. Twawako ni mpindi yakulanzyanya nawo pano tuli pa kulongana nu kuwombela ponga mu mulimo wakuwizya. Cinji, twawatandalilako. Nga twacita vyonsinye vyo-o, tuliwaya tukuwakundilako swinya lyo tukulanjizya ukuti ‘twasambilizwa nu Leza ukuti twakundana.’ (1 Tes. 4:9) Naco cilifumamo acakuti, tulitwalilila ukulola vino ‘cazipa swinya cikaleta insansa, nga cakuti awantu wakwe Leza wakwikala apaliponga ngati awang’anda yonga!’—Amalu. 133:1.
ULWIMBO 90 Muwawomelezyanya