Mwawomelezyanya Pano Muli pa Kulongana

1. Amulandu ci wuno tukakwasucilapo pa kulongana?

AMULANDU ci wuno tukazanilwa mu kulongana? Icicindamisye acakuti, tukaya mukulumbanya Yehova. (Amalu. 26:12; 111:1) Cinji acakuti, tukazanwa mukulongana pakuti twawomelezyanya mwe ya-a manda amatale. (1 Tes. 5:11) Fwandi nga cakuti twatumpula ikasa nu kwasukapo, lyo tukucita vyonsinye vyo-o viwili.

2. Ampindi ci pano tungasukapo pa kulongana?

² Cila sabata, tukawa nu longo lwa kwasukapo pa kulongana. Ku cakulolelako, pansilo ye sabata, tungasukapo pi sambililo lya Ulupungu lwa kwe Malonda. Ne pakulongana kwa mukasi ke sabata, tungasukapo pa Vyuuma, pi Sambililo lye Baibolo Ilya pi Wungwe, na mumbali zinji izyakulanzyanya.

3. Avyani vino vingalenga ciwatuwomela ukwasukapo, swinya iwaliko lya Waheberi 10:24, 25 lingatwavwa wuli?

³ Swensinye tukalonda ukulumbanya Yehova nu kuwomelezya awanawitu na wankazi. Lelo kungawa vimwi vino vingalenga ciwatuwomela ukwasukapo. Tungakwivwa intete zya kwasukapo, nanti tungavwambisya ukwasukapo imiku imivule, nomba mpindi zimwi wino akutungulula angakana ukutusonta. Mungacita wuli nga cakuti ivya musango wo-o vyacitika? Amazwi yano e Paulo walembezile awaHeberi yangatwavwa ukuzana ivyasuko. Pano walandanga pa wucindami wuno wawa mukusunkana ponga, watili tuzipizile ukuwika amano ‘kukuchinchizyanya.’ (Wazyani Waheberi 10:24, 25.) Tutaliwakwivwa intete zya kukatusya ikasa nga tukwizuka ukuti, tungawomelezya wanji nga twasukapo, asamulandu nu kuti twasuka icasuko icifupi. Swinya nga watatusonsile imiku imivule ukulingana na vino tetukulonda, tutaliwafulwa. Amuno tulimanya ukuti na wanji wandi wawe nu longo lwa kwasukapo.​—1 Pet. 3:8.

4. Avisinka ci vitatu vino twandi tusambilile mwe co-o icipande?

⁴ Mwe co-o icipande, twatalicila ukulanzyanya pe vino tungacita pakuti twawomelezyanya nga cakuti twacepa mwi wungwe swinya asa wavule wano wakwasukapo. Twandi tusambilile na pe vino tungacita nga cakuti twawa mwi wungwe muno mwawa awantu awavule wano wakakwasukapo. Namukulecelezya twalanda pe vino tungacita pakuti ivyasuko vitu vyawomelezya wanji.

NGA CAKUTI MWACEPA MWI WUNGWE

5. Tungacita wuli pa kuti twawomelezyanya nga cakuti twacepa mwi wungwe?

⁵ Mu mawungwe muno awantu wacepa, asa wavule wano wakakwasukapo. Mpindi zimwi nga cakuti e katungulula wawuzya iwuzyo, pakapitako impindi pa kuti kuweko nanti wenganye uwakutumpula ikasa. Ivyamusango wo-o nga vyacitika, ncepamwi nu kulongana kungatalalila. Nomba asa vino cizipizile ukuwa. Acino mungacita wuli nga cakuti avino cawa? Mwatumpula lyonsinye. Nga mwacita wo-o, mungalenga na wanji wavwambisya ukwasukapo.

6-7. Mungacita wuli nga cakuti mukakwivwa intete zya kwasukapo?

⁶ Mungacita wuli nga cakuti mukakwivwa intete zya kwasukapo? Nga avino mukayivwa, lyo mutawa mwenga. Nomba pakuti mwawomelezya awanawitu na wankazi, muzipizile ukulolako inzila zimwi zino zingamyavwa ukuleka ukwivwa intete zya kwasukapo. Mungacita wuli wo-o?

⁷ Mungazana ivyakumyavwa vimwi mwa Magazini wa kaali awa Ulupungu lwa kwe Malonda.b Ku cakulolelako, mwapekanizizya nkaninye ukulongana. (Imilu. 21:5) Mutaliwakwivwa intete zya kwasuka nga cakuti mukupekanya icete nu kwivwicisya ivyewo vino muliwasambilila. Cinji acakuti, mwapekanya ivyasuko ivifupi. (Imilu. 15:23; 17:27) Nga cakuti mwapekanya icasuko icifupi, mutaliwakwivwa ni ntete zyakwasukapo. Asa coco citupu, ncepamwi ukulandavye icasuko icipepuke, akuno kungavwa awanawitu na wankazi ukwivwicisya cino mukulandapo, ukucila nu kulanda ivyewo ivivule muno muli ivisinka ivilekane lekane. Ukwasuka icasuko icifupi mu mazwi yinu, kungalanjizya apatiswenye ukuti mwapekinye icete ukulongana swinya mwivwicisizye na vyovyo ivyewo.

8. Uzye e Yehova akayivwa wuli pe vino tukawombesya?

⁸ Uzye mungacita wuli nga cakuti mwacita vyonsinye vyo-o, lelo mucili mukwivwa intete zya kwasukapo ukucila pa muku wonga nanti yiwili? Mwatwalilila vye ukuwombesya nu kumanya ukuti e Yehova akasalifya pe vino mukacita. (Luk. 21:1-4) Mwakwizuka ukuti e Yehova asitunena ukucita vino tutanga tukumanisye. (Flpi. 4:5) Fwandi muzipizile ukutantika ukucita na vinji vino mungakumanisya. Ku cakulolelako, swe wamwi cino tungatalicila ukucita, akutantika ukuti twize twasukepo icasuko icifupi, nu kupepelapo ukuti e Yehova ayize atwavwe ukuteka umwezo pano tuliwakwasuka.

NGA CAKUTI MWAVULA MWI WUNGWE

9. Acani cino cingacitika nga cakuti mwavula mwi wungwe?

⁹ Nga cakuti mwawa mwi wungwe muno wakawizya wavula, asa welyonsi pano mungakwasukapo. Amuno ncepamwi awavule wangatumpula pakuti wasukepo. Na co-o cingalenga e katungulula awapotwa ukukumanisya ukusonta wonsinye. Wonye avino calinji na kwe Danielle, akakwivwa icete nkaninye ukwasukapo pa kulongana.c Amuno akalola ukuti ukwasukapo, aluwali lwakupepa Yehova swinya anzila yakuwomelezezyamo wanji nu kuwomya isuwilo lyakwe. Lelo pano wacintizile mwi wungwe muno wavula, watamusontanga nkani swinya mpindi zimwi wanyokangavye ukwasowa ukwasukapo. Walanzile ukuti “Nayivwanga uwuwi nkaninye. Nalolanga ngati kuli cimwi cino ntacisile. Ukulandavye icisinka, ivyamusango wo-o nga vyacitika imiku imivule, kukawa ukutalika ukuyikolowozya amawuzyo pecino cilenzile.”

10. Tungacita wuli pakuti tuwe nu longo lwa kwasukapo?

¹⁰ Uzye mukatela amuyivwapo ndi vino e Danielle wayivwanga? Nga vino mukayivwa, lyo ncepamwi mungatalika nu kwelenganya ukuti mwandi muleke ukutumpula nu kuwateyelezya vye pano wanji wakwasuka. Lelo wo-o, asa vino cizipizile ukuwa. Mwemwe muzipizile vye ukupekanya ivyasuko ivivule pakuti nanti watamisonsile pakutalika, mungasukapo impindi yinji pano ukulongana kucili kutwalilizile. Swinya pano mukupekanya Isambililo lya Ulupungu lwa kwe Malonda, mwakwelenganya pe vino cila paragrafu yilemenkine nu mutwe wa cipande. Nga mukucita wo-o, muliwawa nivyasuko ivizima vino mungasukapo mwi sambililo lyonsinye. Cinji acakuti, mwapekanya nu kwasukapo mu ma paragrafu muno muli ivisinka vya mu Baibolo vino vyatala ukulondolola. (1 Kor. 2:10) Amulandu ci? Amuno ncepamwi kutanga kuwe awavule wano wangakunda ukwasukapo mwe yayo amaparagrafu. Nomba mungacita wuli, nga cakuti zyonsinye zyo-o inzila mwaziwomvya, lelo naponye mutakukwatapo ulongo lwa kwasukapo? Pano ukulongana kutani kutalike, munganena wino wandi awatungulula nu kumulanjizya e paragrafu yino mupekinye ukuti ayino mukulonda ukuti mwize mwasukepo.

11. Uzye iwaliko lya Wafilipi 2:4 likatuwomelezya ukucita cani?

¹¹ Wazyani Wafilipi 2:4. Pe lyo-o iwaliko umutumwa Paulo wawomelezizye awina Klistu ukuti wazipizile ukucita vino vingazipila wanji. Nga sweswe tungawomvya wuli ko-o ukusunda pano tuli pa kulongana? Tuzipizile twakwizuka ukuti, na wanjinye wakulonda ukwasukapo.

12. Anzila ci na yinji yino tungawomelezezyamo wanji pano tuli pakulongana? (Lolani ni cikope

¹² Teyelenganyani pe co-o. Tuti muli ni viwuza vinu mukusimika, uzye vwilani mungatemwa ukuti mulange mukulanda mwenganye ukwasowa nu kuleka iviwuza vinu nawo awalandako? Ukwasowa nu kuvwilika asa vino mungacita. Mungamyalalako pakuti na wonye awalandako. Wonye avino cawa na pakulongana. Tukamyalala nu kuleka wanji nawo awasukako. Ukucita wo-o yawa anzila iyizima iyakuwomelezezyamo awanawitu na wankazi. Amuno tukaleka nawo awawa nu longo lwa kulanda pi suwilo lyawo. (1 Kor. 10:24) Lekani tusambilile pe vino tungacita wo-o.

13. Tungacita wuli pakuti twaleka na wanji mwi wumba wakwasukapo?

¹³ Icakutalicila tuzipizile ukufupizya ivyasuko, pakuti na wanji wasukeko. Waeluda na kawizya wasongo mu vya kwe Leza, awano wazipizile ukuwa pa nkolelo mukucita wo-o. Na co-o cingalenga na wanji wasambililako. Icaciti wili, mwakwizuka ukuti asa mulandu icasuko cinu acifupi, mutazipizile ukulanda ivisinka vyonsi. Amuno nga mwasuka vyonsinye mwe paragrafu, lyo mutandi musyale nanti cimwi cino wanji wandi wasukepo. Ku cakulolelako, mwe yo-o paragrafu muli ivintu viwili vino tuzipizile ukucita. Akuli ukuti ukwasuka ivyasuko ivifupi nu kukanalanda ivisinka vyonsi. Fwandi nga cakuti amwe wano watalicilapo ukusonta, cingazipa ukwasukavye conga pe vyo-o viwili.

14. Acani cino cingamyavwa ukumanya pano muzipizile ukutumpula ikasa? (Lolani ni cikope.)

¹⁴ Ukwiluka kungamyavwa ukumanya pano muzipizile ukutumpula na pano mutazipizile ukutumpula. Amuno nga cakuti tukutumpula ikasa kawili kawili, tungalenga e katungulula awacula nu mwezo wakuti atusonte nanti acakuti kuli wanji wano watani wasukepo. Na co-o cingalenga wanji walanguluka ukutumpula.​—Ekawi. 3:7.

15. (a) Avyani vino tuzipizile ukucita nga cakuti watatusonsile? (b) Uzye e katungulula angalanjizya wuli ukuti awisileko amano kwe wonsinye? (Lolani akambokosi kano kakuti “Nga Cakuti Amwe Wano Mukutungulula.”)

¹⁵ Nga cakuti wakawizya awavule wakutumpula pano tukulongana, asa welyonsi pano tungakwasukapo ukulingana na vino tukulonda. Amuno mpindi zimwi e katungulula atanga awatusonta nga cakuti twakatusya ikasa. Kweni, ivyamusango wo-o nga vyacitika, pamwi tungivwa uwuwi, lelo tutazipizile ukufulwa nga cakuti watatusonsile.​—Ekawi. 7:9.

16. Tungawomelezya wuli wanji wano wakwasukapo?

¹⁶ Nga cakuti mutasusile imiku imivule ukulingana na vino temukulonda, cingazipa ukuwikako sana amano pano wanji wakwasukapo nu kuwasalifya pansizi yakulongana. Mungawomelezya nkaninye awanawitu na wankazi nga cakuti mwawasalifya ngati awulyanye vino cingawa nga mwasukapo. (Imilu. 10:21) Fwandi ukusalifya, anzila na yinji yino tungawomelezezyamo wanji.

INZILA NA ZINJI IZYA KUWOMVYA PAKUWOMELEZYANYA

17. (a) Uzye awakwasi wangavwa wuli awana wawo ukupekanya ivyasuko vino viwayanile? (b) Ukulingana ne vidyo, avintu ci 4 vino tuzipizile ukukonka pakupekanya ivyasuko? (Lolani futunoti.)

¹⁷ Anzila ci na zinji zino tungawomvya pa kuwomelezya wanji pano tuli pa kulongana? Mwe wakwasi, mwakwavwa wana winu ukupekanya ivyasuko vino viwayanile ukulingana ni cimo. (Mat. 21:16) Manda yamwi, pisambililo pakawa ukulanzyanya pa milandu imikulu, ponga ngati aya mu matwala nanti pakuwa ni miwele imisanguluke na pa vintu vye vinji. Lelo nanti ciwe wo-o, kukawako amaparagrafu yamwi yano awana wangasukapo. Muwalondololela awana winu cino cingalenga mpindi zimwi wakane ukuwasonta nga watumpula ikasa. Ukucita wo-o kulilenga watakwivwa uwuwi nga watawasonsile.​—1 Tim. 6:18.d

18. Tungacita wuli pa kuti tutawika nkani amano pa vya pa lwitu pano tukwasukapo? (Imilumbe 27:2)

¹⁸ Swensinye tungapekanya ivyasuko ivizima vino vingacindika e Yehova nu kuwomelezya awanawitu na wankazi. (Imilu. 25:11) Swinya mpindi zimwi cingazipa nu kulandako pe vino twapisilemo. Pano tukucita wo-o, tutazipizile twalanda sana pa vya pa lwitu. (Wazyani Imilumbe 27:2; 2 Kor. 10:18) Lelo tuzipizile ukuwika amano pe Yehova, pi Zwi lyakwe na pa wantu wakwe wonsinye. (Ukuwu. 4:11) Nomba nga cakuti iwuzyo mwe yoyo paragrafu lilanzile ukuti tulande pa vya pa lwitu, cingazipa ukucita wowo. Mwe paragrafu yino yakonkapo, lekani tulole vino mungasuka pe co-o icisinka cino twalandapo.

19. (a) Avyani vino vingafumamo nga cakuti tukuwika amano kwe wanji pano tuli pa kulongana? (Waroma 1:11, 12) (b) Uzye mwemwe pa lwinu avyani vino mwatemwapo sana pa vyakwasukapo pa kulongana?

¹⁹ Nanti acakuti kutawa amasundo yakukonka pa vyakwasukapo pa kulongana, swensinye tungawomelezyanya. Tungacita wo-o ukupitila mukukana vwambisya ukwasukapo imiku imivule nu kulecelako wanji nawo awasukapo. Cinji acakuti, tutazipizile ukwivwa uwuwi nga cakuti tutasusilepo, lelo twakwivwa icete pamulandu wakuti twalenga wanji nawo wawa nu longo lwa kwasukapo. Nga cakuti tukuwika amano kwe vino vingazipila wanji, swensinye tuliwasecelela amuno tulipocelela “ukwavwa ukuli konga.”​—Wazyani Waroma 1:11, 12.