Eclesiastés
3 Íyo iin tiempo ña̱ keʼéyó ndiʼi ña̱ʼa;
íyo iin tiempo ña̱ keʼéyó iin tá iin ña̱ʼa nu̱ú ñuʼú yóʼo:
2 íyo iin tiempo ña̱ kakuyó ta íyo iin tiempo ña̱ kuviyó;
íyo iin tiempo ña̱ chiʼiyó ta íyo iin tiempo ña̱ tuʼunyó ña̱ chi̱ʼiyó;
3 íyo iin tiempo ña̱ kaʼníyó ta íyo iin tiempo ña̱ ndaʼayó;
íyo iin tiempo ña̱ sandíʼi-xa̱ʼa̱yó iin veʼe ta íyo iin tiempo ña̱ keʼéyóña;
4 íyo iin tiempo ña̱ kuakuyó ta íyo iin tiempo ña̱ ku̱a̱ku̱yó;
íyo iin tiempo ña̱ kusuchí-iniyó ta íyo iin tiempo ña̱ tixáʼayó;
5 íyo iin tiempo ña̱ sakánayó yu̱u̱ ta íyo iin tiempo ña̱ chindoo koʼndoyóña;
íyo iin tiempo ña̱ numiyó ta íyo iin tiempo ña̱ va̱ása numiyó;
6 íyo iin tiempo ña̱ nandukúyó ña̱ nda̱ñúʼu ta íyo iin tiempo ña̱ va̱ása nandukúkayóña;
íyo iin tiempo ña̱ chikaa̱va̱ʼayó* iin ña̱ʼa ta íyo iin tiempo ña̱ sakánayóña;
7 íyo iin tiempo ña̱ ndatáyó ti̱ko̱to̱ ta íyo iin tiempo ña̱ ku̱kuyóña;*
íyo iin tiempo ña̱ ka̱ʼa̱nyó ta íyo iin tiempo ña̱ va̱ása ka̱ʼa̱nyó;
8 íyo iin tiempo ña̱ kuʼvi̱-iniyó kuniyó iin ña̱ʼa* ta íyo iin tiempo ña̱ sa̱a̱-iniyó kuniyóña;
íyo iin tiempo ña̱ kanitáʼanyó ta íyo iin tiempo ña̱ va̱ása kanitáʼanyó.
9 ¿Ndáaña va̱ʼa ndákiʼin na̱ ndeéní káchíñu? 10 Xi̱nii̱ chiñu ña̱ ta̱xi Ndióxi̱ ndaʼa̱ na̱ yiví ña̱ va̱ʼa keʼénaña. 11 Ndióxi̱ i̱xava̱ʼara ndiʼi ña̱ʼa mií tiempo ña̱ xi̱niñúʼu kuva̱ʼaña, ta liviní ña̱ ke̱ʼéra. Chi̱kaa̱ra-ini na̱ yiví ña̱ kuni̱na kutakuna ndiʼi tiempo; soo ni saá, na̱ yiví va̱ása kúnda̱a̱-inina xíʼin ndiʼi ña̱ʼa ña̱ i̱xava̱ʼa Ndióxi̱ ta̱ nda̱a̱.
12 Ni̱xa̱i̱ ku̱ndaa̱-inii̱ ña̱ kǒo inka ña̱ va̱ʼa kivi keʼé na̱ yiví, chi ña̱ va̱ʼaníka kúú ña̱ kusi̱í-inina ta keʼéna ña̱ va̱ʼa ndiʼi tiempo ña̱ tákuna, 13 saátu ña̱ kuxuna ta koʼona ta kusi̱í-inina xa̱ʼa̱ ndiʼi chiñu ndeéní ña̱ kéʼéna. Iin ña̱ va̱ʼaní ña̱ táxi Ndióxi̱ ndaʼa̱yó kúú ña̱yóʼo.
14 Sa̱kúaʼi̱ ña̱ ndiʼi ña̱ kéʼé Ndióxi̱ ta̱ nda̱a̱ íyoña ndiʼi tiempo. Kǒo ña̱ kivi ndachinúuyó ta kǒo ña̱ kivi kindaayó nu̱ú ña̱ kéʼé Ndióxi̱. Saá ke̱ʼé Ndióxi̱ ña̱yóʼo ña̱ va̱ʼa ixato̱ʼó na̱ yiví miíra.
15 Ña̱ kúu vitin kúú ña̱ xa̱a̱ ku̱u tá ya̱chi̱, ta ña̱ koo chí nu̱únínu xa̱a̱ ni̱xi̱yovaña. Ndióxi̱ ta̱ nda̱a̱ nándukúra ña̱ ndíku̱n na̱ yiví sa̱tá.
16 Saátu xa̱a̱ xítoi̱ kúu ndiʼi ña̱yóʼo nu̱ú ñuʼú: nu̱úka ña̱ keʼéna ña̱ nda̱kú, na̱ ndi̱va̱ʼa-ini kúúna ta nu̱úka ña̱ keʼéna ña̱ va̱ʼa, kéʼéna ña̱ va̱ása va̱ʼa. 17 Xa̱ʼa̱ ña̱kán ki̱xáʼíi̱ ndákani-inii̱: “Ndióxi̱ ta̱ nda̱a̱ ndatiinra ku̱a̱chi xíʼin na̱ kéʼé ña̱ nda̱kú ta saátu xíʼin na̱ ndi̱va̱ʼa-ini, saáchi íyo iin tiempo ña̱ kuu iin tá iin ña̱ʼa”.
18 Saátu nda̱kani-inii̱ ña̱ kotondosó Ndióxi̱ ta̱ nda̱a̱ na̱ yiví ta na̱ʼa̱ra nu̱úna ña̱ íyona nda̱a̱ táki̱ʼva íyo kití, 19 saáchi ña̱ ndóʼo na̱ yiví kúú ña̱ ndóʼotu kitíva: inkáchi koo ña̱ kundoʼo na̱ yiví ta saátu kití. Nda̱a̱ táki̱ʼva xíʼi̱ na̱ yiví saátu xíʼi̱ kití, inkáchi íyo ndee̱ ña̱ táxi Ndióxi̱ ndaʼa̱ na̱ yiví ta saátu kití. Ña̱kán va̱ása ndáyáʼvika na̱ yiví nu̱ú kití, va̱ása ndáyáʼvi nda̱a̱ ni iin ña̱ kéʼé na̱ yiví. 20 Iin nu̱ú ku̱a̱ʼa̱n ndiʼi na̱ yiví ta saátu kití, ndiʼina ku̱vaʼana xíʼin ñuʼú ta ndiʼina ndúuna ñuʼú ta saátu ndóʼo kití. 21 ¿Ndáana kúnda̱a̱-ini á chí ndiví ku̱a̱ʼa̱n ndee̱ ña̱ táxi Ndióxi̱ ndaʼa̱ na̱ yiví? ¿Ndáana kúnda̱a̱-ini á nu̱ú ñuʼú ku̱a̱ʼa̱n ndee̱ ña̱ táxi Ndióxi̱ ndaʼa̱ kití? 22 Ta ki̱ʼii̱n kuenta ña̱ kǒo inka ña̱ va̱ʼa kivi keʼé na̱ yiví chi ña̱ va̱ʼaníka kúú ña̱ kusi̱í-inina xíʼin chiñuna, ña̱yóʼo kúú ña̱ va̱ʼa ña̱ ndákiʼinna. Saáchi, ¿ndáana kivi ka̱ʼa̱n xíʼinna ndáaña kuu tá ná kuvina?