Isaías
10 Ndáʼviní na̱ tává ley ña̱ sáxo̱ʼvi̱* inkana,
na̱ káʼyi ña̱ sáxo̱ʼvi̱ inka na̱ yiví,
2 tasaá kǒo kuniso̱ʼona ku̱a̱chi ña̱ ndátaxi na̱ nda̱ʼví ndaʼa̱na,
ta kǒo kandíxana ndatiinna ku̱a̱chi xíʼin na̱ ñuu,
na̱ ndákiʼin ná ni̱xi̱ʼi̱ yii̱ táki̱ʼva ndákiʼinna ña̱ʼa tá xáʼa̱nna nu̱ú ku̱a̱chi
ta saátu ndáʼviní na̱ kíndaa ña̱ʼa ndaʼa̱ na̱ kǒo yivá.
3 ¿Ta ndáaña keʼéndó ki̱vi̱ ña̱ ná ndakiʼinndó castigo,
tá xíkáka ná kixi ña̱ sandíʼi-xa̱ʼa̱ ndóʼó?
¿Ndáana kunundó ku̱ʼu̱nndó nu̱ú ña̱ chindeétáʼanna xíʼinndó
ta ndáa míí sandákoondó ña̱ ku̱i̱ká ña̱ kúúmiíndó?
4 Kǒo inkaka ña̱ kivi keʼéndó,
chi xíʼin na̱ ñúʼu veʼeka̱ava ndakundeendó* á kuvivandó.
Ni ná kuu ndiʼi ña̱yóʼo sa̱a̱kavara xíʼinndó,
taxikara castigo ndaʼa̱ndó ta kanikara ndóʼó.
5 “Kotondó, na̱ ñuu Asiria,
na̱yóʼo kúú yitu̱n tú kuniñúʼi̱ ña̱ va̱ʼa na̱ʼi̱ ña̱ sáa̱níi̱.
Na̱yóʼo níʼina karroti* tú kuniñúʼi̱ ña̱ va̱ʼa na̱ʼi̱ ña̱ sáa̱níi̱ xíʼinndó.
6 Chindaʼíi̱na ña̱ ku̱ʼu̱nna kanitáʼanna xíʼin iin ñuu ña̱ ku̱a̱ʼa̱n contra Ndióxi̱,
kanitáʼanna xíʼin ñuu na̱ sa̱sáa̱ní yi̱ʼi̱;
kaʼndai̱ chiñu nu̱úna ña̱ ná ndakiʼinna ndiʼi ña̱ʼa na̱ ñuu yóʼo ku̱ʼu̱n xíʼinna
ta ná ku̱a̱ñi̱nana* nda̱a̱ táki̱ʼva xáñi̱na nda̱ʼyi̱ ña̱ íyo chí calle.
7 Ni su̱ví saáví íyona soo chikaa̱va-inina ña̱ keʼéna ña̱yóʼo;
saáchi ña̱ kúni̱na kúú ña̱ sandíʼi-xa̱ʼa̱na ku̱a̱ʼání ñuu,
su̱ví loʼoña kúni̱na sandíʼi-xa̱ʼa̱na.
8 Saáchi na̱yóʼo káchina:
‘¿Á su̱ví rey kúú ndiʼi na̱ kúúmií chiñu ña̱ ndáyáʼvi na̱ káchíñu nu̱úndi̱?
9 ¿Á su̱ví inkáchi íyo ñuu Calnó xíʼin ñuu Carquemis?
¿Á su̱ví inkáchi íyo ñuu Hamat xíʼin Arpad?
¿Á su̱ví inkáchi íyo ñuu Samaria xíʼin ñuu Damasco?
10 Xa̱a̱ nda̱kiʼii̱n ndiʼi ñuu na̱ ndióxi̱ na̱ kǒo ndáyáʼvi,
ta ku̱a̱ʼáka ña̱’a ña̱ i̱xava̱ʼana ña̱ ndasakáʼnuna xi̱kuumií na̱yóʼo nu̱ú na̱ ñuu Jerusalén xíʼin na̱ ñuu Samaria.
11 ¿Á va̱ása kuchiñui̱ keʼíi̱ xíʼin na̱ ñuu Jerusalén táʼan ña̱ ke̱ʼíi̱ xíʼin na̱ ñuu Samaria?
¿Ta á va̱ása kuchiñui̱ sandíʼi-xa̱ʼíi̱ ña̱ʼa ña̱ ndásakáʼnuna
nda̱a̱ táki̱ʼva ke̱ʼíi̱ xíʼin ndióxi̱ na̱ kǒo ndáyáʼvi na̱ xi̱ndasakáʼnu na̱ ñuu Samaria?’.
12 ”Tá ná sandíʼi Jehová keʼéra chiñu chí yuku̱ Sion ta saátu chí Jerusalén, taxira castigo ndaʼa̱ ta̱ rey ñuu Asiria, saáchi va̱ása vitá-inira, ni̱nuní kúnira ta kúta̱aní-inira. 13 Saáchi ta̱yóʼo káchira:
‘Xíʼin ndee̱ miíi̱ keʼíi̱ ña̱yóʼo
ta saátu keʼíi̱ña xíʼin xi̱ní miíi̱, saáchi ndíchiníi̱.
Va̱ása taxikai̱ ña̱ koo xáʼñu* ñuʼúna,
ndakiʼii̱n ndiʼi ña̱ ku̱i̱ká ña̱ kúúmiína
ta kuchiñui̱ kanitáʼi̱n xíʼinna nda̱a̱ táki̱ʼva kéʼé iin ta̱a ta̱ ndakúní ta̱ xáʼa̱n nu̱ú ku̱a̱chi.
14 Nda̱a̱ táki̱ʼva kéʼé iin ta̱a ña̱ ndákiʼinra ndiʼi ndi̱vi̱ ña̱ ñúʼu ini iin chi̱ʼyo̱ ña̱ ni̱ndo̱ondaʼa̱,
saá keʼíi̱ ta ndakiʼii̱n ndiʼi ña̱ʼa ña̱ kúúmií na̱ ñuu;
kindo̱i̱ xíʼin ndiʼi ñuʼúna.
Ndiʼi na̱ yiví koona táki̱ʼva íyo tí saa tí va̱ása kívi ndakiʼin tu̱ʼun’”.
15 ¿Á kivi kuta̱aka-ini yácha nu̱ú ta̱ xíniñúʼuña?
¿Á kivi kuta̱aka-ini sierra nu̱ú ta̱ xíniñúʼuña?
¿Á kuchiñu iin karroti sakándanú ta̱ tíinnú?
¿Á kuchiñu iin yitu̱n ndaniʼinú ta̱ tíinnú?
16 Xa̱ʼa̱ ña̱kán, Jehová ta̱ xáʼndachíñu nu̱ú na̱ ángel,
ta̱ kúú Ndióxi̱ ta̱ nda̱a̱, ndasalekera na̱ ta̱a na̱ ndakú,*
va̱ása kooka ndee̱ na̱ ñuu Asiria,
nda̱a̱ táki̱ʼva koo na̱ kaʼmira xíʼin ñuʼu̱ saá koona.
17 Ta̱ túu̱n nu̱ú na̱ ñuu Israel nduura iin ñuʼu̱,
ta ta̱ yi̱i̱ nu̱úna nduura iin ñuʼu̱;
kokora* ta kaʼmira ndiʼi ku̱ʼu̱ ña̱ va̱ása va̱ʼa xíʼin tú iñú
tú kúú kuenta ta̱ rey ñuu Asiria ta iin ki̱vi̱ kuití kuu ña̱yóʼo.
18 Sandíʼi-xa̱ʼa̱ra ña̱ livi ña̱ íyo yuku̱ ña̱ kúú kuentara ta saátu ña̱ íyo nu̱ú chíʼira;
ta koora nda̱a̱ táki̱ʼva íyo iin ta̱a ta̱ kúúmií iin kue̱ʼe̱ ta loʼo tá loʼo xáʼníñara.
19 Yitu̱n tú kindo̱o yuku̱ra va̱ása ku̱a̱ʼáka koonú
ta iin ta̱ loʼo kuitíva kúú ta̱ kuchiñu ndakaʼvinú.
20 Ki̱vi̱ saá, na̱ kindo̱o ti̱xin ñuu Israel
ta saátu na̱ kutaku ti̱xin veʼe ta̱ Jacob
va̱ása kundaaka-inina ta̱ ka̱ni miína,
chi kundaa-inina Jehová Ndióxi̱ na̱ ñuu Israel, Ndióxi̱ ta̱ yi̱i̱,
ta nda̱kúní koo inina xíʼinra.
21 Ta ndáa si̱lóʼova na̱ veʼe ta̱ Jacob ndikó nu̱ú Ndióxi̱ ta̱ íyoní ndee̱.
22 Saáchi ndóʼó na̱ ñuu Israel
ni ku̱a̱ʼání kúúndó nda̱a̱ táki̱ʼva ku̱a̱ʼání kúú yu̱ti ña̱ íyo yuʼú tá mar,
ndáa loʼo kuitívandó ndikó.
Nda̱a̱ táki̱ʼva kúu tá ndákutú ti̱kui̱í,
saá kuu tá ná taxira castigo ndaʼa̱ndó ta sandíʼi-xa̱ʼa̱ra ndóʼó.
23 Táta káʼnu Jehová ta̱ xáʼndachíñu nu̱ú na̱ ángel,
xa̱a̱ chi̱kaa̱-inira sandíʼi-xa̱ʼa̱ra na̱ ndóo iníísaá ñuu yóʼo.
24 Ta ña̱yóʼo kúú ña̱ káʼa̱n táta káʼnu Jehová ta̱ xáʼndachíñu nu̱ú na̱ ángel: “Ndóʼó na̱ ñuu miíi̱ na̱ ndóo chí Sion, va̱ása yi̱ʼvíndó kunindó na̱ ñuu Asiria, na̱ ka̱ni ndóʼó xíʼin yitu̱n ta nda̱niʼina karrotina nu̱úndó nda̱a̱ táki̱ʼva ke̱ʼé na̱ ñuu Egipto. 25 Saáchi ndáa si̱lóʼo kuití kúma̱ní ta ndiʼi ña̱ sáa̱níi̱; ta tá ná ndiʼi-xa̱ʼa̱na saá kúú ña̱ va̱ása sa̱a̱ka̱i̱. 26 Jehová ta̱ xáʼndachíñu nu̱ú na̱ ángel kanirana xíʼin yoʼo̱, ta nda̱a̱ táki̱ʼva ke̱ʼéra tá sa̱ndíʼi-xa̱ʼa̱ra na̱ ñuu Madián yatin síi̱n yu̱u̱ ña̱ Oreb saá keʼéra xíʼinna, ta ndaniʼira karrotira sa̱tá tá mar nda̱a̱ táki̱ʼva ke̱ʼéra chí Egipto.
27 Ki̱vi̱ saá va̱ása taxikara kuisondó ña̱ʼa ve̱e,
va̱ása taxikara kunúu yókóra* su̱kúnndó,
ta ta̱ʼnu̱ tú yókó yóʼo ixaa aceite”.
28 Ki̱xaa̱ra chí Ayat;
ni̱ya̱ʼara chí Migrón;
ta chí Micmash sa̱ndákoora ña̱ʼa ña̱ kúúmiíra.
na̱ ñuu Guibeá* na̱ kúú kuenta ta̱ Saúl xi̱nuna.
30 Ndóʼó ná se̱ʼe ñuu Galim nda̱ʼyi̱ndó xíʼin ndiʼi ndee̱ndó.
Ndóʼó na̱ ñuu Laisa kuniso̱ʼondó.
Ta ndóʼó na̱ ñuu Anatot ndáʼviníndó.
31 Na̱ ñuu Madmená xi̱nuna ku̱a̱ʼa̱nna.
Na̱ ñuu Guebim ndúkúna iin nu̱ú kivi ka̱kuna.
32 Mií ki̱vi̱ saá xa̱a̱ra chí Nob.
Xíka ndaʼa̱ra nu̱ú yuku̱ ña̱ ñuu Sion,
xi̱kí ña̱ níndichi chí Jerusalén.
33 Jehová Ndióxi̱ ta̱ nda̱a̱ ta̱ xáʼndachíñu nu̱ú na̱ ángel,
xáʼndara ndaʼa̱ yitu̱n ta ndeéní níʼi íxaara;
xáʼndara yitu̱n tú súkunní,
ta ni náʼnunínú, táʼnda̱nú.
34 Xíʼin yácha xáʼndara ndiʼi yitu̱n tú íyo yuku̱,
Iin ta̱ ndakúní sandíʼi-xa̱ʼa̱ Líbano.