Isaías
9 Su̱ví táki̱ʼva naa ni̱xi̱yo xi̱naʼá saá koo vitin, tá xi̱ndiʼiní-inina nu̱ú ñuʼú yóʼo, tá ku̱ndasína xi̱nina ñuʼú ta̱ Zabulón xíʼin ñuʼú ta̱ Neftalí. Soo tá ná ya̱ʼa tiempo, Ndióxi̱ taxira ná ixato̱ʼóna ñuʼú yóʼo, yichi̱ ña̱ ku̱a̱ʼa̱n chí yatin yuʼú tá mar ña̱ ndíkaa̱ chí Jordán ta saátu ñuʼú Galilea nu̱ú ki̱xaa̱ na̱ inka ñuu íyona.
2 Na̱ ñuu na̱ ni̱xi̱ka nu̱ú naa
xi̱nina iin ñuʼu̱ káʼnuní.
Ta nda̱ye̱ʼe̱ ñuʼu̱ yóʼo sa̱tá na̱ ndóo nu̱ú ñuʼú yóʼo,
na̱ xi̱ndoo nu̱ú naa.
3 Ku̱a̱ʼání nda̱saún na̱ ñuu yóʼo;
sa̱kúsi̱íníún-inina.
Kúsi̱íní-inina nu̱ún,
nda̱a̱ táki̱ʼva kúsi̱íní-ini na̱ yiví tá kíxaa̱ tiempo ña̱ sákeena,*
nda̱a̱ táki̱ʼva kúsi̱íní-ini na̱ yiví na̱ ndátaʼví ña̱ʼa ña̱ nda̱kiʼinna nu̱ú ni̱xa̱ʼa̱nna ka̱nitáʼanna.
4 Saáchi sa̱kúachiún yókó* tú xi̱ndisona,
yitu̱n tú xi̱ndisona, karroti* tú níʼi na̱ xáʼndachíñu nu̱úna,
nda̱a̱ táki̱ʼva ke̱ʼún tá ndi̱ʼi-xa̱ʼa̱ na̱ ñuu Madián.
5 Ndiʼi ndu̱xa̱n na̱ soldado na̱ sáka̱nda̱ ñuʼú tá xíkana ku̱a̱ʼa̱nna
ta saátu ndiʼi ti̱ko̱to̱na ña̱ nda̱xi* xíʼin ni̱i̱
kuniñúʼunaña ña̱ ndakaʼmina ñuʼu̱.
6 Saáchi ka̱ku iin ta̱ loʼo nu̱úyó,
ta̱xina iin se̱ʼeyó;
ta kaʼndachíñura.
Ka̱ʼa̱nna xíʼinra Ta̱ va̱ʼaní táxi consejo, Ndióxi̱ ta̱ íyo ndee̱, Yiváyó ta̱ íyo ndiʼi tiempo, Ta̱ chíñu ta̱ táxi ku̱a̱ʼání ña̱ va̱ʼa.
7 Iníísaá kaʼndachíñura
ta va̱ʼaní kundoona ndiʼi tiempo
nu̱ú íyo ta̱ David xáʼndachíñura,
va̱ása ndiʼi-xa̱ʼa̱ ña̱ xáʼndachíñura
ta nda̱kúní kaʼndachíñura,
vitin ta saátu ndiʼi tiempo.
Jehová ta̱ xáʼndachíñu nu̱ú na̱ ángel, mií ña̱ nda̱a̱ keʼéra ña̱yóʼo.
8 Jehová chi̱ndaʼára tu̱ʼun yóʼo ku̱a̱ʼa̱nña nu̱ú ta̱ Jacob,
ta ku̱a̱ʼa̱nña nu̱ú na̱ ñuu Israel.
9 Ta ndiʼi na̱ ñuu kunda̱a̱-inina xa̱ʼa̱ña,
na̱ ñuu ta̱ Efraín xíʼin na̱ ñuu Samaria,
xa̱ʼa̱ ña̱ ni̱nuní kúnina ta kǒo íxato̱ʼóna, káʼa̱nna ña̱yóʼo:
10 “Ni̱ko̱yo ndo̱ʼo,
soo sandáʼayóña xíʼin yu̱u̱.
Xa̱ʼndana yitu̱n tú sicómoro,
soo ndachiʼiyó* yitu̱n tú cedro”.
11 Jehová taxira ña̱ ná kixi na̱ sáa̱-ini xíni ta̱ Rezín
ta ná kanitáʼanna xíʼinra,
12 na̱ ñuu Siria keena chí nu̱ú kíta ñu̱ʼu* ta na̱ filisteo keena chí nu̱ú kíʼvi ñu̱ʼu;
táki̱ʼva koo na̱ ndakuná yuʼú ña̱ kokóna na̱ ñuu Israel saá koo na̱yóʼo.
Ni ná kuu ndiʼi ña̱yóʼo sa̱a̱kavara xíʼinna,
taxikara castigo ndaʼa̱na ta kanikarana.
13 Saáchi na̱ ñuu yóʼo ta̱ʼán ndandikóna nu̱ú ta̱ káni miína;
ta̱ʼán nandukúna Jehová ta̱ xáʼndachíñu nu̱ú na̱ ángel.
14 Jehová kaʼndara xi̱ní na̱ ñuu Israel ta kaʼndara si̱ʼma̱na,*
ta táki̱ʼva keʼéra xíʼin ndaʼa̱ yitu̱n xíʼin yu̱ku̱ ndaʼa̱nú* saá keʼéra xíʼinna chi kaʼndarana iin kuití ki̱vi̱.
15 Xi̱nína kúú na̱ níʼi yichi̱ nu̱úna* na̱ íxato̱ʼónína,
ta si̱ʼma̱na kúú na̱ profeta na̱ sánáʼa̱ ña̱ vatá.*
16 Na̱ níʼi yichi̱ nu̱ú na̱ ñuu yóʼo sándañúʼunana,
ta na̱ níʼina yichi̱ nu̱ú yóʼo kǒo kúnda̱a̱-inina ndáaña keʼéna.
17 Xa̱ʼa̱ ña̱kán, Jehová va̱ása kusi̱í-inira xíʼin na̱ kúa̱an na̱ íyo ñuuna,
ta ni va̱ása kundáʼvi-inira kunira na̱ kǒo yivá xíʼin ná ni̱xi̱ʼi̱ yi̱i̱
saáchi ndiʼi na̱yóʼo ku̱a̱ʼa̱nna contra Ndióxi̱ ta ndi̱va̱ʼaní-inina
ta nina ña̱ kíʼví káʼa̱nna.
Ni ná kuu ndiʼi ña̱yóʼo sa̱a̱kavara xíʼinna,
taxikara castigo ndaʼa̱na ta kanikarana.
18 Ña̱ va̱ása va̱ʼa, íyoña nda̱a̱ táki̱ʼva íyo iin ñuʼu̱ ña̱ xíxi̱,
ta xáʼmiña tú iñú xíʼin ku̱ʼu̱ ña̱ va̱ása va̱ʼa.
Kaʼmiña yitu̱n tú íyo yuku̱,
tá ná koko* túyóʼo, yi̱ʼma̱ ndaaña nda̱a̱ táki̱ʼva kéʼé vi̱kó.
19 Xa̱ʼa̱ ña̱ sáa̱ní Jehová ta̱ xáʼndachíñu nu̱ú na̱ ángel
ki̱xáʼara xáʼmira nu̱ú ñuʼú yóʼo,
ta kuniñúʼura na̱ ñuu yóʼo ña̱ ndakaʼmira ñuʼu̱ yóʼo.
Nda̱a̱ ni iinna va̱ása ixakáʼnu-inina xa̱ʼa̱ na̱ ñanitáʼanna, chi kaʼnína ndiʼina.
20 Iinna kaʼnda ku̱ñu ña̱ íyo chí ndaʼa̱ kúaʼa ta kuxunaña;
soo kuni̱kavana kuxuna.
Inkana kaʼnda ku̱ñu ña̱ íyo chí ndaʼa̱ yitin ta kuxunaña,
soo va̱ása xa̱a̱ví-inina.*
Iin tá iinna kuxuna ku̱ñu ndaʼa̱na;
21 ta̱ Manasés kuxura ta̱ Efraín,
ta ta̱ Efraín kuxura ta̱ Manasés.
Ta u̱vi̱ saána koona contra xíʼin ta̱ Judá.
Ni ná kuu ndiʼi ña̱yóʼo sa̱a̱kavara xíʼinna,
taxikara castigo ndaʼa̱na ta kanikarana.