Isaías
12 Ki̱vi̱ kán ka̱ʼún ña̱yóʼo:
“Táxii̱ tíxa̱ʼvi ndaʼún Jehová,
saáchi ni ni̱sa̱ún xíʼi̱n
vitin va̱ása sáa̱kaún xíʼi̱n ta sa̱ndíkoún-inii̱.
2 Kotondó. Ndióxi̱ kúú ta̱ sáka̱ku yi̱ʼi̱.
Kundaa-inii̱ra ta va̱ása yi̱ʼvíi̱,
saáchi Jehová* kúú ta̱ táxi ndee̱ ndaʼíi̱
Jehová kúú ta̱ ndáa yi̱ʼi̱
ta̱yóʼo kúú ta̱ sáka̱ku yi̱ʼi̱”.
3 Kusi̱íní-inindó tá ná tavándó ti̱kui̱í
nu̱ú kána ti̱kui̱í tá sáka̱ku ndóʼó.
4 Ta ki̱vi̱ kán ka̱ʼa̱nndó ña̱yóʼo:
“Taxindó tíxa̱ʼvi ndaʼa̱ Jehová, kuniñúʼundó ki̱vi̱ra ña̱ ka̱ʼa̱nndó xíʼinra,
ta natúʼunndó xíʼin inka na̱ ñuu xa̱ʼa̱ ña̱ kéʼéra.
Natúʼunndó xíʼin inkana ña̱ káʼnuní ki̱vi̱ra.
5 Katandó yaa* nu̱ú Jehová saáchi ke̱ʼéra ña̱ʼa ña̱ nda̱kanda̱ní-inindó* xíʼin.
Ná kunda̱a̱-ini ndiʼi na̱ yiví xa̱ʼa̱ ña̱yóʼo.
6 Ndóʼó na̱ ñuu Sion, ndeéní nda̱ʼyi̱ndó xa̱ʼa̱ ña̱ kúsi̱í-inindó,
saáchi Ndióxi̱ ta̱ yi̱i̱, Ndióxi̱ na̱ ñuu Israel káʼnuníra ta íyora xíʼinndó”.