Isaías
11 Na̱ se̱ʼe ta̱ Jesé íyona nda̱a̱ táki̱ʼva íyo xa̱ʼa̱ iin yitu̱n,
ta xa̱ʼa̱ túyóʼo kuaʼnu iin ndaʼa̱nú ta ti̱oʼonú ka̱a̱ña ta taxiña ku̱i̱ʼi.
2 Ta taxi Jehová espíritu santora ndaʼa̱ra,
xa̱ʼa̱ ña̱kán ndíchi koora, kunda̱a̱-inira,
va̱ʼaní consejo taxira, ndakúní koora,
kuxini̱níra ta ixato̱ʼóníra Jehová.
3 Kusi̱íní-inira xa̱ʼa̱ ña̱ ixato̱ʼóníra Jehová.
Va̱ása ndatiinra ku̱a̱chi xíʼinna xa̱ʼa̱ ña̱ xíto kuitíra,
ta va̱ása ndaka̱xinra ña̱ keʼéra xíʼinna xa̱ʼa̱ ña̱ kuniso̱ʼo kuitíra.
4 Nda̱kúní ndatiinra ku̱a̱chi xíʼin na̱ nda̱ʼví,*
viíní ndaka̱xinra ña̱ keʼéra ña̱ va̱ʼa kundaara na̱ vitá-ini na̱ íyo nu̱ú ñuʼú.
Tu̱ʼunra kooña nda̱a̱ táki̱ʼva íyo iin yitu̱n tú kuniñúʼura ña̱ kanira nu̱ú ñuʼú yóʼo
ta xíʼin ña̱ ka̱ʼa̱nra sandíʼi-xa̱ʼa̱ra na̱ ndi̱va̱ʼa-ini.
5 Nda̱kúní koo ña̱ keʼéra, nda̱a̱ táki̱ʼva koo cinturón ña̱ kundikaa̱ tokóra saá kooña,
ta saátu ña̱ nda̱kú koo inira, kooña nda̱a̱ táki̱ʼva íyo iin cinturón ña̱ kundikaa̱ tokóra.
6 Tí lobo kutáʼanrí xíʼin tí ndikachi* loʼo,
tí leopardo* kandúʼúrí* xíʼin tí ti̱xúʼú* loʼo,
tí si̱ndi̱ki̱ loʼo, tí ndikaʼa* xíʼin tí si̱ndi̱ki̱ tí ndu̱nduʼú inkáchi kutáʼanrí kakarí;*
ta iin ta̱ loʼo kuniʼi yichi̱ nu̱úrí.
7 Tí si̱ndi̱ki̱ síʼi xíʼin tí oso síʼi, inkáchi kutáʼanrí kixáʼanrí*
ta inkáchi kutáʼan se̱ʼerí.
Yita* kixáʼan tí ndikaʼa nda̱a̱ táki̱ʼva kéʼé tí si̱ndi̱ki̱.
8 Ta̱ lée loʼo* kusíkíra ya̱vi̱ tí ko̱o̱,
ta iin ta̱ loʼo chinúura ndaʼa̱ra sa̱tá chi̱ʼyo̱ ko̱o̱ tí kue̱ʼe̱.*
9 Va̱ása satúkue̱ʼe̱rí nda̱a̱ ni iinna
ta ni va̱ása sandíʼi-xa̱ʼa̱rí yuku̱i̱ ña̱ yi̱i̱,
saáchi iníísaá nu̱ú ñuʼú kunda̱a̱-inina xa̱ʼa̱ Jehová
ta kutúña nda̱a̱ táki̱ʼva chútú ti̱kui̱í ini mar.
10 Ki̱vi̱ saá, ti̱oʼo* ta̱ Jesé kooña iin señal nu̱ú na̱ ñuu.
Na̱ ñuu ku̱ʼu̱nna nu̱úra ña̱ kuniʼira yichi̱ nu̱úna,*
ta liviní koo nu̱ú ndakindee̱ra.
11 Ta ki̱vi̱ saá, Jehová tuku sakáa̱ra ndaʼa̱ra ta ndatavára na̱ ñuura na̱ kindo̱o chí Asiria, Egipto, Patrós, Cus, Elam, Sinar,* Hamat xíʼin isla ña̱ íyo nu̱ú mar. 12 Kanindichira iin yitu̱n tú kuni ndiʼi na̱ ñuu ta ndakayara na̱ ñuu Israel, na̱ kundoo xa̱a̱ síín síín ñuu ta saátu ndakayara na̱ ñuu Judá na̱ kundoo xa̱a̱ síín síín ñuu.
13 Va̱ása koo kúini̱ka-ini* ta̱ Efraín,
ta ndiʼi-xa̱ʼa̱ na̱ ku̱a̱ʼa̱n contra na̱ ñuu Judá.
Ta̱ Efraín va̱ása kukúini̱ka-inira kunira ta̱ Judá
ni ta̱ Judá va̱ása kookara contra xíʼin ta̱ Efraín.
14 Ta na̱yóʼo, kanitáʼanna xíʼin na̱ filisteo chí nu̱ú kíʼvi ñu̱ʼu;*
inkáchi ndakutáʼanna ta ndakiʼinna ña̱ʼa na̱ yiví na̱ ndóo chí Oriente.
Na̱yóʼo kuchiñuna kanitáʼanna xíʼin na̱ ñuu Edom ta saátu xíʼin na̱ ñuu Moab,
ta kaʼndachíñuna nu̱ú na̱ ammonita.
15 Jehová ndataʼvíra* iin táʼví tá mar tá íyo chí Egipto
sakísira ndaʼa̱ra sa̱tá yu̱ta Éufrates.
Ndeéní tivira ta̱chí niʼní ta sayíchi̱ra u̱xa̱ saá tá yu̱ta,
ta taxira ná ya̱ʼa xáʼá na̱ yiví ma̱ʼñú ti̱kui̱í yóʼo ta kuñuʼu ndu̱xa̱n xa̱ʼa̱na.
16 Ta chí Asiria kita iin yichi̱ ña̱ ku̱ʼu̱n na̱ ñuura na̱ kindo̱o,
táki̱ʼva ni̱xi̱yo iin yichi̱ nu̱ú ke̱e na̱ ñuu Israel tá ke̱ena ñuu Egipto.