8 Chinúundó iin yichi̱ va̱ʼa nu̱ú na̱ va̱lí se̱ʼendó

¿NDÁAÑA KÚNI̱ KACHI ÑA̱YÓʼO?

Ña̱ va̱ʼa chinúuyó iin yichi̱ va̱ʼa nu̱ú inkana xíniñúʼu keʼéyó nda̱a̱ táki̱ʼva káʼa̱nyó xíʼinna. Iin ta̱ íyo se̱ʼe va̱ása kivi kundatura ña̱ ná ka̱ʼa̱n ta̱ loʼo se̱ʼera ña̱ nda̱a̱ ndiʼi tiempo, tá xi̱niso̱ʼo ta̱yóʼo ña̱ ni̱ka̱ʼa̱n yivára ña̱ ná ka̱ʼa̱nna ña̱ kǒora íyo tá ka̱nanara chí yéʼé, tá kǒo níxiinra kitara.

“Ku̱a̱ʼání na̱ yiví káʼa̱nna: ‘Keʼé ña̱ káʼi̱n ta su̱ví ña̱ kéʼíi̱’, soo ña̱yóʼo va̱ása kivi chindeétáʼanña xíʼin na̱ va̱lí se̱ʼeyó. Na̱ va̱lí se̱ʼeyó íyona nda̱a̱ táki̱ʼva íyo iin esponja saáchi sákuaʼana xíʼin ndiʼi ña̱ kéʼéyó ta saátu xíʼin ña̱ káʼa̱nyó, tá sánáʼa̱yóna iin ña̱ʼa ta kéʼéyó inka ña̱ʼa, na̱yóʼo kiʼinna kuenta ta ka̱ʼa̱nna xíʼinyó ña̱ va̱ása kéʼéyó ña̱ ni̱ka̱ʼa̱nyó xíʼinna” (ta̱ David).

TEXTO ÑA̱ VA̱XI NU̱Ú BIBLIA: “Yóʼó na̱ nátúʼun xíʼin inkana ‘Va̱ása ixakuíʼnáún’, ¿á íxakuíʼnáún?” (Romanos 2:21).

¿NDA̱CHUN NDÁYÁʼVINÍ ÑA̱YÓʼO?

Na̱ va̱lí sákuaʼakana xíʼin ña̱ kéʼé na̱ yivána nu̱úka ña̱ kéʼé na̱ káʼvi xíʼinna escuela, ta saátu kéʼéna tá xa̱a̱ ku̱a̱ʼá ku̱i̱ya̱ kúúmiína. Ña̱yóʼo kúni̱ kachiña, ña̱ miíndó na̱ íyo se̱ʼe kúú na̱ xíniñúʼu chinúu iin yichi̱ va̱ʼa nu̱ú na̱ va̱lí se̱ʼendó, tá kéʼéndó ña̱ sánáʼa̱ndóna.

“Kivi ku̱a̱ʼá yichi̱ ndikóyó ka̱ʼa̱nyó xíʼin na̱ va̱lí se̱ʼeyó xa̱ʼa̱ iin ña̱ʼa, soo va̱ása kúnda̱a̱-iniyó á xíniso̱ʼona ña̱ káʼa̱nyó xíʼinna. Ta, tá va̱ása kéʼéyó ña̱ káʼa̱nyó xíʼinna kivi ka̱ʼa̱n ku̱a̱china xíʼinyó xa̱ʼa̱ ña̱yóʼo. Na̱ va̱lí se̱ʼeyó kíʼin va̱ʼana kuenta xíʼin ña̱ kéʼéyó, ni va̱ása kíʼinyó kuenta” (ñá Nicole).

TEXTO ÑA̱ VA̱XI NU̱Ú BIBLIA: “Ña̱ ndíchi ña̱ va̱xi chí ndiví chíndeétáʼanña xíʼin na̱ yiví [...] ña̱ va̱ása koona na̱ vatá” (Santiago 3:17).

¿NDÁAÑA KIVI KEʼÚN?

Ndakanixi̱ní xa̱ʼa̱ ña̱yóʼo: “¿Ndáa ki̱ʼva kéʼíi̱ xíʼin na̱ ti̱ndaʼa̱ xíʼi̱n ta saátu xíʼin na̱ va̱lí se̱ʼi̱? ¿Ndáa ña̱ʼa kúú ña̱ xítonde̱ʼi̱? ¿Ndáana kúú migoi̱? ¿Á ndíʼi̱-inii̱ xa̱ʼa̱ inkana?”. ¿Á kúni̱ún ña̱ ná xa̱a̱ na̱ va̱lí se̱ʼún keʼéna nda̱a̱ táki̱ʼva kéʼé miíún?

“Ni miíi̱ ta ni yiíi̱ va̱ása káʼa̱nndi̱ xíʼin na̱ va̱lí se̱ʼendi̱ ña̱ ná keʼéna iin ña̱ʼa ña̱ kǒo keʼé miíndi̱” (ñá Christine).

Ndukú ña̱ káʼnu-ini. Na̱ va̱lí xa̱a̱ xíni̱vana na̱ yiví ku̱a̱chi kúú na̱ yivána. Ña̱kán tá ndúkún ña̱ káʼnu-ini nu̱ú na̱ ti̱ndaʼa̱ xíʼún á nu̱ú na̱ va̱lí se̱ʼún tá ke̱ʼún iin ña̱ va̱ása va̱ʼa, saá kúú ña̱ sánáʼúnna iin ña̱ʼa ña̱ ndáyáʼviní ña̱ ka̱ʼa̱nna ña̱ nda̱a̱ ta vitá koo inina.

“Xíniñúʼu ndakuniyó ña̱ va̱ása va̱ʼa ña̱ ke̱ʼéyó ta ndukúyó ña̱ káʼnu-ini, saáchi tá va̱ása kéʼéyó ña̱yóʼo na̱ va̱lí se̱ʼeyó kǒo sakuaʼana keʼénaña” (ta̱ Robin).