Ndióxi̱ ki̱xaʼára i̱xava̱ʼara na̱ yiví

¿NDÁAÑA íyo nu̱ú na̱ʼná yóʼo vitin? Na̱ yiví na̱ xítoún yóʼo. Na̱yóʼo kúú na̱ nu̱ú ni̱xi̱yo. Ta̱a xi̱naní Adán ta ñá ñaʼá xi̱naní Eva. ¿Yukú i̱xava̱ʼa-ñaʼá? Ndióxi̱ kúú ta̱ i̱xava̱ʼana. ¿Á xi̱níún nda̱saa naníra? Jehová naníra.

Ta xíʼin ñuʼú i̱xava̱ʼa Ndióxi̱ ta̱ Adán ta kǒo ku̱a̱chi níxikuumiíra, tándi̱ʼi Ndióxi̱ ti̱vira si̱ti̱n ta̱ Adán ta nda̱kanda̱ra ta ndu̱ura iin ta̱a táku.

Ndióxi̱ ta̱xira iin chiñu ndaʼa̱ ta̱ Adán. Ni̱ka̱ʼa̱nra xíʼinra ná chinúura ki̱vi̱ iin iin kití. Sana ku̱a̱ʼá tiempo xi̱to ta̱ Adán iin iin kití ta saáví chi̱núura ki̱vi̱ iin iinrí. Tá xítora kití yóʼo íyo iin ña̱ xi̱nira. ¿Á xíni̱ún ndáaña kúú ña̱yóʼo?

Kití yóʼo u̱vi̱ u̱vi̱ xi̱kuurí, ni̱xi̱yo elefante síʼí xíʼin elefante che̱e, ni̱xi̱yo ndikaʼa síʼí xíʼin ndikaʼa che̱e. Soo ta̱ Adán kǒona kutáʼan xíʼinra iinlá miíra ni̱xi̱yo. Tasaá, Jehová sa̱kúsu̱nra ta̱ Adán ta ta̱vára iin leke kandíkara, ta xíʼin leke kandíka ta̱ Adán yóʼo i̱xava̱ʼara iin ñaʼá ta ñáyóʼo xi̱kuu ñá síʼí ta̱ Adán.

Ta kúsi̱íkaví-ini ta̱ Adán vitin. Ta saátu ñá Eva kúsi̱íkaví-iniñá ña̱ ndíka̱a̱ñá nu̱ú ñuʼú livi. Ta vitin kivi koo se̱ʼena ta si̱í kundoo ndiʼina.

Jehová xi̱kuni̱ra ña̱ koo ta̱ Adán xíʼin ñá Eva ndiʼi tiempo nu̱ú Ñuʼú yóʼo. Xi̱kuni̱ra ña̱ ndasalivina iníísaá nu̱ú Ñuʼú yóʼo ta xa̱a̱ña kooña táki̱ʼva ni̱xi̱yo ñuʼú livi ña̱ xi̱naní Edén. Á loʼoví xi̱kusi̱í-ini ta̱ Adán xíʼin ñá Eva ña̱ na̱kunda̱a̱-inina ndasalivina iníísaá nu̱ú Ñuʼú yóʼo. Tá níxi̱yoún tiempo saá, ¿á chindeún miína ña̱ ndasalivindó iníísaá nu̱ú Ñuʼú yóʼo? Soo kamaní ndi̱ʼi-xa̱ʼa ña̱yóʼo nu̱ú ta̱ Adán xíʼin ñá Eva. Ná kotoyó ndachun ndi̱ʼi-xa̱ʼaña.