¿Nda̱saa va̱ʼa sanáʼa̱ndó se̱ʼendó?

Tá i̱xava̱ʼa Jehová na̱ yiví na̱ nu̱ú, ni̱ka̱ʼa̱nra xíʼinna ña̱ ná kundaana se̱ʼena (Colosenses 3:20). Ndóʼó na̱ íyo se̱ʼe, xíniñúʼu sanáʼa̱ndó se̱ʼendó xa̱ʼa Jehová ña̱ va̱ʼa xa̱a̱na kuʼvi̱-inina kuninara tasaá tá ná kuchéena xa̱a̱na kuuna na̱ yiví va̱ʼa (2 Timoteo 1:5; 3:15). Xíniñúʼu natúʼunndó xíʼinna ña̱ va̱ʼa kunda̱a̱-inindó ndáaña ndákanixi̱nína. Soo siʼna miíndó xíniñúʼu chinúu yichi̱ nu̱úna xíʼin ña̱ kéʼéndó. Ña̱ va̱ʼa sanáʼa̱ndóna xa̱ʼa ña̱ káʼa̱n tu̱ʼun Ndióxi̱ siʼnaka miíndó xíniñúʼu kaʼviña ta kandíxandó ña̱ káʼa̱nña (Salmo 40:8).

1 TAXI NÁ NATÚʼUN SE̱ʼÚN XÍʼÚN

ÑA̱ KÁʼA̱N BIBLIA: ‘Ndiʼina xíniñúʼu sakuaʼana kuniso̱ʼona ña̱ káʼa̱n inkana, ná kǒo ndakuiin kamanaʼ (Santiago 1:19). Sana kúni̱vandó ña̱ ná natúʼun se̱ʼendó xíʼinndó xa̱ʼa ndiʼi ña̱ ndóʼona. Xa̱ʼa ña̱yóʼo tá kúni̱na natúʼunna xíʼinndó taxindó ná natúʼunna xíʼinndó. Kǒo nda̱ʼyi̱ kamandó nu̱úna, ña̱kán va̱ʼa natúʼunna xíʼinndó ndiʼi ña̱ kúni̱na ka̱ʼa̱nna (Santiago 3:18). Tá xíni̱na ña̱ kue̱ʼe̱níndó xíʼinna sana kǒo natúʼunna ña̱ nda̱a̱ xíʼinndó. Ndiʼi yichi̱ ka̱ʼa̱nndó xíʼinna ña̱ kúni̱ndó xínindóna (Mateo 3:17; 1 Corintios 8:1).

ÑA̱ VA̱ʼA KEʼÉNDÓ:

• Taxindó ná natúʼun se̱ʼendó xíʼinndó tá kúni̱na natúʼunna

• Ndiʼi ki̱vi̱ natúʼunndó xíʼin se̱ʼendó, su̱ví tá íyo kuití ku̱a̱chi nu̱úndó

2 KOTO VA̱ʼANDÓ NDÁAÑA KÚNI̱NA KA̱ʼA̱NNA XÍʼINNDÓ

ÑA̱ KÁʼA̱N BIBLIA: “Ta̱ xíniso̱ʼo tá káʼa̱n iinna ku̱a̱ʼá ña̱ va̱ʼa ni̱ʼíra” (Proverbios 16:20). Sava yichi̱ ku̱a̱ʼáka ña̱ʼa nda̱ka̱tu̱ʼunndóna ña̱ va̱ʼa kunda̱a̱-inindó ndáaña ndákanixi̱nína. Chi na̱ va̱lí sava yichi̱ chínúuvana ña̱ káʼa̱nna á savatu ni kǒo ndákanixi̱nína ña̱ káʼa̱nna. “Na̱ kúma̱níka kuniso̱ʼo ta ndi̱ku̱n ndákuiinna ña̱ káʼa̱n inkana, na̱ kíʼvi kúú na̱yóʼo.” (Proverbios 18:13.) Xa̱ʼa ña̱yóʼo kǒo sa̱a̱ kamaún (Proverbios 19:11).

ÑA̱ VA̱ʼA KEʼÉNDÓ:

• Nda̱a̱ ndáaka ña̱ nátúʼun se̱ʼendó xíʼinndó va̱ása ka̱ʼnu̱ndó tu̱ʼunna ni kǒo sa̱a̱ kamandó xíʼinna

• Ndakaʼánndó ndáaña xi̱ndoʼondó tá ni̱xi̱yo válíndó ta ndáaña kúú ña̱ xi̱kutóokandó keʼéndó

3 INKÁCHI KA̱ʼA̱NNDÓ

ÑA̱ KÁʼA̱N BIBLIA: “Se̱ʼe miíi̱, kuniso̱ʼo ña̱ káʼa̱n yiváún ta kǒo sandákoún tu̱ʼun ña̱ káʼa̱n siʼún” (Proverbios 1:8). Ndóʼó na̱ íyo se̱ʼe, Jehová ta̱xira chiñu ndaʼa̱ndó ña̱ kundaandóna. U̱vi̱ saándó xíniñúʼu sanáʼa̱ndóna ña̱ to̱ʼó ná koona ta ná kuniso̱ʼona ña̱ ka̱ʼa̱nndó xíʼinna (Efesios 6:1-3). Na̱ va̱lí se̱ʼendó kúnda̱a̱-inina tá su̱ví inkáchi káʼa̱nndó xa̱ʼa iin ña̱ʼa (1 Corintios 1:10). Ña̱kán, tá kǒo inkáchi káʼa̱nndó xa̱ʼa iin ña̱ʼa kǒo nda̱ʼyi̱ nu̱ú táʼanndó nu̱ú na̱ va̱lí se̱ʼendó, ña̱ va̱ʼa kandíxana ña̱ káʼa̱nndó.

ÑA̱ VA̱ʼA KEʼÉNDÓ:

• U̱vi̱ saándo inkáchi ka̱ʼa̱nndó xa̱ʼa consejo ña̱ taxindó ndaʼa̱ se̱ʼendó

• Tá va̱ása kútóún nda̱saa sánáʼa̱ ñá síʼún á yiíún se̱ʼendó, xíniñúʼu natúʼunndó xa̱ʼa ña̱yóʼo

4 NDAKANIXI̱NÍNDÓ NDÁAÑA VA̱ʼA KEʼÉNDÓ

ÑA̱ KÁʼA̱N BIBLIA: ‘Sanáʼa̱ ta̱ loʼo se̱ʼún iin yichi̱ va̱ʼa chi ña̱ va̱ʼa miíra kuuña’ (Proverbios 22:6). Tá kúni̱ndó vií sakuaʼa se̱ʼendó, va̱ása sandákoondó ña̱ sanáʼa̱ndóna. Xíniñúʼu ndakanixi̱níndó ndáa consejo taxindó ndaʼa̱na (Salmo 127:4; Proverbios 29:17). Ña̱ taxindó consejo ndaʼa̱na kǒo kúni̱ kachiña ndiʼi tiempo nda̱ʼyi̱ndó nu̱úna á kanindóna, kúni̱ kachiña ka̱ʼa̱nndó xíʼinna ná kunda̱a̱-inina ndáa xa̱ʼa kúúña kǒo xíinndó taxindó keʼéna sava ña̱ʼa (Proverbios 28:7). Sanáʼa̱ndóna ná kutóona kaʼvina Biblia ña̱ va̱ʼa kunda̱a̱-inina xíʼin consejo ña̱ va̱xi nu̱úña (Salmo 1:2). Tasaá kúúña sakuaʼana keʼéna ña̱ va̱ʼa (Hebreos 5:14).

ÑA̱ VA̱ʼA KEʼÉNDÓ:

• Sanáʼa̱ndó se̱ʼendó ña̱ ndinuʼu-inina ná kandíxana Ndióxi̱

• Chindeé táʼanndó xíʼinna ná kunda̱a̱-inina ndachun xíniñúʼu kundaana miína tá kíʼvina nu̱ú Internet. Sanáʼa̱ndóna ña̱ ná kǒo ndakuiinna yu̱ʼu̱ na̱ kéʼé ña̱ kini ña̱ kána nu̱ú Internet