Ndasakáʼnundó Jehová

Táki̱ʼva xi̱niún nu̱ú folleto yóʼo, nu̱ú Biblia ku̱a̱ʼání consejo va̱xi ña̱ kivi chindeé yóʼó xíʼin na̱ veʼún. Jehová kúni̱ra si̱í koondó. Tá siʼnaka chiñura ná keʼéndó ‘ta ndiʼi ña̱ʼa ña̱ xíniñúʼundó taxiraña ndaʼa̱ndó’ (Mateo 6:33). Ndióxi̱ kúni̱ra kuura migoún. Chika̱a̱ ndée ña̱ kutáʼankaún xíʼinra chi ña̱yóʼo kúúña va̱ʼaka nu̱ú ndiʼi ña̱ʼa (Mateo 22:37, 38).

1 KUTÁʼAN VA̱ʼA XÍʼIN JEHOVÁ

ÑA̱ KÁʼA̱N BIBLIA: “‘Yi̱ʼi̱ kuu yivándó, ta ndóʼó kuundó se̱ʼi̱ʼ, káchi Jehová” (2 Corintios 6:18). Jehová kúni̱ra kuura migoún, ta ná ka̱ʼún xíʼinra chindeéra yóʼó ña̱ kuyatiún nu̱úra. Mií Jehová kúú ta̱ káʼa̱n: ‘Kǒo sandákoondó ka̱ʼa̱nndó xíʼi̱n’ (1 Tesalonicenses 5:17). Jehová kúsi̱í-inira tá káʼa̱nyó xíʼinra xa̱ʼa ña̱ sándi̱ʼi̱-iniyó á ña̱ ndákanixi̱níyó (Filipenses 4:6). Tá káʼún xíʼin Jehová xíʼin na̱ veʼún, na̱yóʼo kunda̱a̱-inina ña̱ ndinuʼu-iniún kándíxaúnra.

Soo, su̱ví ka̱ʼa̱n kuitíún xíʼinra, xíniñúʼu kuniso̱ʼún ña̱ káʼa̱nra. ¿Ndáaña xíniñúʼu keʼún ña̱ va̱ʼa kuniso̱ʼún ña̱ káʼa̱nra? Kaʼvi Biblia xíʼin inkaka tutu ña̱ távána nu̱úña (Salmo 1:1, 2). Ndakanixi̱ní xa̱ʼa ña̱ sákuaʼún (Salmo 77:11, 12). Ta saátu xíniñúʼu ku̱ʼún reunión nu̱ú sákuaʼana xa̱ʼa Ndióxi̱ (Salmo 122:1-4).

Inka ña̱ kivi chindeé yóʼó ña̱ kutáʼan va̱ʼún xíʼin Jehová kúú ña̱ natúʼún xíʼin inka na̱ yiví xa̱ʼara. Tá ná keʼé ni̱ʼún ña̱yóʼo yatinka koún nu̱úra (Mateo 28:19, 20).

ÑA̱ VA̱ʼA KEʼÉNDÓ:

• Ndiʼi ki̱vi̱ kaʼviún Biblia ta ka̱ʼún xíʼin Ndióxi̱

• Chindeé na̱ veʼún ña̱ va̱ʼa siʼnaka chiñu Jehová ná keʼéna tasaá keʼéna inka ña̱ʼa

2 KUSI̱Í-ININDÓ TÁ NDÁKUTÁʼANNDÓ NDÁSAKÁʼNUNDÓ JEHOVÁ

ÑA̱ KÁʼA̱N BIBLIA: “Kuyatinndó nu̱ú Ndióxi̱ tasaá kuyatinra nu̱úndó” (Santiago 4:8). Ndakaxin ndáa ki̱vi̱ ta ndáa hora ndasakáʼnún Jehová xíʼin na̱ veʼún (Génesis 18:19). Soo su̱ví ña̱yóʼo kúú ndiʼiña: ndiʼi chiñu keʼún ki̱vi̱ tá ki̱vi̱ xíniñúʼu kiʼún kuenta xíʼin Jehová. Chindeé na̱ veʼún ña̱ ná kandíxakana Jehová. Ña̱ Biblia káchiña, xíniñúʼu ka̱ʼún xa̱ʼa Jehová “tá nínduʼún veʼún, tá xíkaún yichi̱, tá xa̱ku̱sún, ta saátu tá ndakoún” (Deuteronomio 6:6, 7). Ka̱ʼa̱n táki̱ʼva ni̱ka̱ʼa̱n ta̱ Josué: “Yi̱ʼi̱ xíʼin na̱ veʼi̱ Jehová kúú ta̱ ndasakáʼnundi̱” (Josué 24:15).

ÑA̱ VA̱ʼA KEʼÉNDÓ:

• Keʼé iin tutu, ta nu̱ú ña̱yóʼo kaʼyíún ña̱ xíniñúʼu iin iin na̱ veʼún ña̱ va̱ʼa sanáʼúnna