¿Ndáaña kuu tá ná ki̱ʼviún iin ku̱a̱chi ndeé?

Ni kúʼvi̱níva-iniún xíniún Jehová ta kǒo kúni̱ún kéʼún ni iin ña̱ʼa ña̱ va̱ása sáxo̱ʼvi̱únra, soo ni saá sava yichi̱ keʼún ña̱ va̱ása va̱ʼa. Soo íyo ku̱a̱chi ña̱ ndeéka nu̱ú inkaña (1 Corintios 6:​9, 10). Tá ná ki̱ʼviún iin ku̱a̱chi ndeé, ndakaʼán Jehová va̱ása sandákoora ña̱ kúʼvi̱-inira xínira yóʼó, xa̱ʼa̱ ña̱kán íyo tu̱ʼvara ña̱ ixakáʼnu-inira xa̱ʼún ta chindeétáʼanra xíʼún.

1. ¿Ndáaña kivi keʼéyó ña̱ va̱ʼa ixakáʼnu-ini Jehová xa̱ʼa̱yó?

Tá iin na̱ kúʼvi̱ní-ini xíni Jehová kíʼinna kuenta ña̱ ni̱ki̱ʼvina iin ku̱a̱chi ndeé kúsuchíní-inina xa̱ʼa̱ ña̱yóʼo. Soo Jehová sándi̱kora-inina xíʼin tu̱ʼun yóʼo ña̱ ni̱ka̱ʼa̱nra xíʼin na̱ ñuura: “Ni táki̱ʼva íyo color kúaʼa saá íyo ku̱a̱chindó, nduyaaña táki̱ʼva yaa nieve” (Isaías 1:​18). Tá xíʼin ndiʼi níma̱yó ndándikó-iniyó Jehová íxakáʼnu-inira xa̱ʼa̱yó. Ta ¿ndáaña kúni̱ kachi ña̱ ndandikó-iniyó? Ña̱yóʼo kúni̱ kachiña, ña̱ ndixa ndándikó-iniyó xa̱ʼa̱ ku̱a̱chi ña̱ ni̱ki̱ʼviyó ta sándákooyó ña̱ keʼéyó ña̱ va̱ása va̱ʼa, ta káʼa̱n ndáʼviyó xíʼin Jehová ña̱ ná koo káʼnu-inira xa̱ʼa̱yó. Ta chíka̱a̱yó ndee̱ ña̱ nasamayó ña̱ ndákanixi̱níyó ta saátu sándakooyó keʼéyó ña̱ chi̱ka̱a̱ miíyó nu̱ú ku̱a̱chi, ta chíka̱a̱yó ndee̱ ña̱ keʼéyó ndiʼi ña̱ káʼa̱n Jehová (kaʼvi Isaías 55:​6, 7).

2. ¿Tá ni̱ki̱ʼviyó iin ku̱a̱chi ndeé ndáa ki̱ʼva xíniñúʼu Jehová na̱ anciano ña̱ va̱ʼa chindeétáʼanna xíʼinyó?

Jehová táxira consejo yóʼo ndaʼa̱ na̱ ni̱ki̱ʼvi ku̱a̱chi ndeé: “Ka̱ʼa̱nndó xíʼin na̱ anciano ña̱ congregación” (kaʼvi Santiago 5:​14, 15). Ndióxi̱ nda̱kaxinra na̱yóʼo xíʼin espíritu santo ta kúʼvi̱-inina xínina Jehová ta saátu na̱ ndásakáʼnu miíra, ta xíni̱na ndáa ki̱ʼva chindeétáʼanna xíʼinyó ña̱ ndikó tukuyó kitáʼanyó xíʼin Jehová (Gálatas 6:1).

¿Ndáa ki̱ʼva chíndeétáʼan na̱ anciano xíʼinyó tá ni̱ki̱ʼviyó iin ku̱a̱chi ndeé? U̱vi̱ á u̱ni̱ na̱yóʼo chindeétáʼanna xíʼinyó xíʼin Biblia ña̱ kunda̱a̱-iniyó nda̱chun va̱ása va̱ʼa íyo ña̱ ke̱ʼéyó, ta saátu taxina consejo ña̱ va̱ʼaní ndaʼa̱yó ta chika̱a̱na ndee̱ xíʼinyó ña̱ ná va̱ása ndikó tukuyó ki̱ʼviyó ku̱a̱chi. Tá iin na̱ yiví ni̱ki̱ʼvina iin ku̱a̱chi ndeé ta va̱ása ndándikó-inina, na̱ anciano ka̱ʼa̱nna xíʼinna ña̱ kitana ti̱xin ña̱ congregación, ña̱ va̱ʼa kǒo xa̱a̱ na̱ congregación keʼéna ña̱ va̱ása va̱ʼa.

NÁ SAKUAʼAKAYÓ XA̱ʼA̱ÑA

3. Ña̱ káʼa̱nyó xa̱ʼa̱ ku̱a̱chiyó chíndeétáʼanña xíʼinyó

Nda̱a̱ ndáaka ku̱a̱chi kíʼviyó sáxo̱ʼvi̱yó Jehová, xa̱ʼa̱ ña̱kán ná ka̱ʼa̱nyó xíʼinra xa̱ʼa̱ ña̱ va̱ása va̱ʼa ke̱ʼéyó. Kaʼvindó Salmo 32:​1-5 ta ka̱ʼa̱nndó xa̱ʼa̱ ña̱yóʼo:

• Nu̱úka ña̱ chise̱ʼéyó ku̱a̱chiyó, ¿nda̱chun ndáyáʼviní ka̱ʼa̱nyó xa̱ʼa̱ ña̱yóʼo xíʼin Jehová?

VIDEO: Jehová táxira consejo ndaʼa̱ na̱ kúʼvi̱-inira xínira (3:​01)

• Ña̱ va̱ʼa ndi̱kó ta̱ Canon nu̱ú Jehová, ¿ndáa ki̱ʼva chi̱ndeétáʼan na̱ anciano xíʼinra?

Ná ka̱ʼa̱nyó ña̱ nda̱a̱ xa̱ʼa̱ ña̱ ke̱ʼéyó xíʼin na̱ anciano, saáchi na̱yóʼo íyona ña̱ chindeétáʼanna xíʼinyó. Kaʼvindó Santiago 5:​16 ta ka̱ʼa̱nndó xa̱ʼa̱ ña̱yóʼo:

• ¿Á kivi chindeétáʼan na̱ anciano xíʼinyó tá káʼa̱nyó ña̱ nda̱a̱ xa̱ʼa̱ ña̱ ke̱ʼéyó? ¿Nda̱chun?

4. Kúndáʼvi-ini Jehová xínira na̱ ni̱ki̱ʼvi ku̱a̱chi nu̱úra

Tá iin na̱ ni̱ki̱ʼvi ku̱a̱chi ndeé va̱ása xíínna kuniso̱ʼona ña̱ káʼa̱n Jehová, kǒo kívi kitáʼankana xíʼin na̱ congregación. Xa̱ʼa̱ ña̱kán távánana. Tasaá va̱ása kitáʼankayó xíʼinna ta va̱ása ka̱ʼa̱nkayó xíʼinna. Kaʼvindó 1 Corintios 5:​6, 11 ta ka̱ʼa̱nndó xa̱ʼa̱ ña̱yóʼo:

• Nda̱a̱ táki̱ʼva íyo yuxa̱n iyá ña̱ sáxíya̱ña yuxa̱n, ¿ndáaña kundoʼo na̱ congregación tá ná kitáʼanna xíʼin na̱ ni̱ki̱ʼvi ku̱a̱chi ta va̱ása ndándikó-inina? ¿Nda̱chun?

Jehová kúnda̱a̱-inira xíʼin ña̱ ndóʼo na̱ kíʼvi ku̱a̱chi, kúndáʼvi-inira xínirana ta vií kéʼéra xíʼinna, ¿ndáaña sákuaʼayó xa̱ʼa̱ Jehová xíʼin ña̱yóʼo?

5. Jehová íxakáʼnu-inira xa̱ʼa̱yó tá ndándikó-iniyó

Ta̱ Jesús ni̱ka̱ʼa̱nra xa̱ʼa̱ iin ña̱ʼa ña̱ chíndeétáʼan xíʼinyó ña̱ va̱ʼa kunda̱a̱-iniyó ndáaña ndóʼo Jehová tá ndándikó-ini iin na̱ yiví xa̱ʼa̱ ña̱ ke̱ʼéna. Kaʼvindó Lucas 15:1-7 ta ka̱ʼa̱nndó xa̱ʼa̱ ña̱yóʼo:

• ¿Ndáaña sákuaʼayó xa̱ʼa̱ Jehová xíʼin ña̱yóʼo?

Kaʼvindó Ezequiel 33:11 ta ka̱ʼa̱nndó xa̱ʼa̱ ña̱yóʼo:

• ¿Ndáa ña̱ʼa ña̱ ndáyáʼvi xíniñúʼu keʼéyó ña̱ va̱ʼa na̱ʼa̱yó ña̱ ndixa ndi̱kó-iniyó?

ÑA̱ XA̱A̱ SA̱KUAʼAYÓ

Tá kíʼviyó ku̱a̱chi ndeé ta ndixa ndándikó-iniyó xa̱ʼa̱ ña̱yóʼo ta va̱ása kéʼékayóña, Jehová ixakáʼnu-inira xa̱ʼa̱yó.

Ná ndakaʼányó xa̱ʼa̱ ña̱yóʼo

• ¿Nda̱chun iin ña̱ va̱ʼa kúú ña̱ ka̱ʼa̱nyó xíʼin Jehová xa̱ʼa̱ ku̱a̱chiyó?

• ¿Ndáaña xíniñúʼu keʼéyó ña̱ va̱ʼa ixakáʼnu-ini Jehová xa̱ʼa̱ ku̱a̱chiyó?

• Tá ni̱ki̱ʼviyó iin ku̱a̱chi ndeé, ¿nda̱chun xíniñúʼu ka̱ʼa̱nyó xíʼin na̱ anciano ña̱ ná chindeétáʼanna xíʼinyó?

NANDUKÚKA XA̱ʼA̱ÑA

Koto ndáaña va̱ʼa nda̱kiʼin iin ta̱a xa̱ʼa̱ ña̱ ku̱ndáʼvi-ini Jehová xi̱nirara, ña̱ káʼa̱n Isaías 1:​18 xa̱ʼa̱.

Ná kǒo kaka-iniyó ña̱ kúndáʼviní-ini Jehová xínira miíyó (5:​02)

¿Ndáaña kéʼé na̱ anciano ña̱ va̱ʼa chindeétáʼanna xíʼin na̱ kíʼvi iin ku̱a̱chi?

¿Ndáa ki̱ʼva náʼa̱ na̱ anciano ña̱ kúʼvi̱-inina xínina na̱ kíʼvi ku̱a̱chi ndeé ta kúndáʼvi-inina xíninana? (Tutu Ña̱ Nátúʼun xíʼinyó, agosto 2024)

Nda̱a̱ na̱ yiví na̱ ta̱ʼán ndikó-ini xa̱ʼa̱ ña̱ ke̱ʼéna kúndáʼviva-ini Jehová xínirana, ¿ndáa ki̱ʼva náʼa̱raña?

¿Ndáa ki̱ʼva chíndeétáʼanna xíʼin na̱ távána ti̱xin congregación? (Tutu Ña̱ Nátúʼun xíʼinyó, agosto 2024)

Koto ña̱ káʼa̱n xa̱ʼa̱ “Xi̱kuni̱i̱ ndikói̱ nu̱ú Jehová” ta kuniún ndáa ki̱ʼva ku̱nda̱a̱-ini iin ta̱a ña̱ xi̱kuni̱ Jehová ña̱ ná ndikó tukura nu̱úra.

“Biblia chi̱ndeétáʼan xíʼinna ña̱ na̱samana” (La Atalaya, 1 tí abril ku̱i̱ya̱ 2012)