Agosto

Nu̱ú versículo yóʼo káʼa̱nña xa̱ʼa̱ u̱vi̱ ña̱ʼa ña̱ ndáyáʼviní. Ña̱ nu̱ú: na̱ yiví va̱ʼa kixiva tu̱ndóʼo nu̱úna. Ta ña̱ u̱vi̱: chindeétáʼanva Jehová xíʼinna ña̱ ya̱ʼana nu̱ú ña̱yóʼo. Iin ña̱ kéʼé Jehová ña̱ va̱ʼa chindeétáʼanra xíʼinyó ya̱ʼayó nu̱ú tu̱ndóʼo kúú ña̱ sándakaʼánra miíyó ña̱ koova tu̱ndóʼo nu̱úyó nani ndóoyó ñuyǐví yóʼo. Ña̱ ndixava kúú ña̱ káʼa̱n Jehová xíʼinyó ña̱ si̱íní kooyó tá ná ndasakáʼnuyóra, soo su̱ví ña̱yóʼo kúni̱ kachiña ña̱ ni loʼoví va̱ása kixi tu̱ndóʼo nu̱úyó (Is. 66:14). Jehová kúni̱ra ña̱ ná ndakanixi̱níyó xa̱ʼa̱ ña̱ káʼa̱nra taxira ndaʼa̱yó chí nu̱únínu, ña̱ kutakuyó ndiʼi tiempo (2 Cor. 4:​16-18). Soo tiempo vitin chíndeétáʼanvara xíʼinyó ña̱ ndakundeéyó ndasakáʼnuyóra ki̱vi̱ tá ki̱vi̱ (Lam. 3:​22-24). ¿Ndáaña kivi sakúaʼayó xa̱ʼa̱ sava na̱ xi̱ndasakáʼnu Jehová na̱ xi̱ndoo tiempo xi̱naʼá ta saátu xa̱ʼa̱ na̱ ndóo tiempo vitin? Xíʼin ña̱yóʼo sakúaʼayó ña̱ sana iin kama kixi tu̱ndóʼo nu̱úyó. Soo tá ndáaní-iniyó Jehová, ta̱yóʼo chindeétáʼanvara xíʼinyó ña̱ ya̱ʼayó nu̱úña (Sal. 55:22). w23.04 14, 15 párr. 3, 4

Ku̱a̱ʼání ña̱ kivi sákuaʼayó xíʼin ña̱ ke̱ʼé ta̱ José xíʼin ñá María. Na̱yóʼo chi̱kaa̱na ndee̱ ña̱ kuniso̱ʼona ña̱ ni̱ka̱ʼa̱n na̱ chíñu ni i̱xayo̱ʼvi̱ña xíʼinna keʼénaña (Luc. 2:​1-6). Tá kúú, tá xa̱a̱ ku̱a̱ʼa̱n i̱i̱n yo̱o̱ ña̱ ñúʼu se̱ʼe ñá María, ta̱ emperador romano César Augusto ni̱ka̱ʼa̱nra ña̱ keʼéna iin censo. Ta ña̱ va̱ʼa keʼé ta̱ José xíʼin ñá María ña̱yóʼo xi̱niñúʼu ku̱ʼu̱nna ñuu Belén, ta xi̱niñúʼu kakana 150 kilómetro (93 milla) ña̱ va̱ʼa xa̱a̱na. Ña̱kán yo̱ʼvi̱ní ni̱xi̱yo ña̱yóʼo nu̱ú ñá María, ta sana ni̱ndi̱ʼi̱ní-inina xa̱ʼa̱ ña̱yóʼo. Saáchi, ¿ndáaña keʼé ta̱ José tá yichi̱ ki̱xáʼa kúni̱ kaku se̱ʼe ñá María? Ta̱ loʼo ta̱ kaku kán ta̱ Mesías xa̱a̱ra koora. ¿Á xa̱ʼa̱ ña̱kán kindo̱ona ta va̱ása ku̱ʼu̱nna ñuu Belén ña̱ ka̱ʼyi̱ ki̱vi̱na nu̱ú ña̱ censo? Ta̱ José xíʼin ñá María kǒo nítaxina ña̱ kasi nda̱a̱ iin ña̱ʼa nu̱úna ña̱ kuniso̱ʼona ña̱ ni̱ka̱ʼa̱n ta̱ chíñu kán. Jehová ta̱xira ña̱ va̱ʼa ndaʼa̱na xa̱ʼa̱ ña̱ xi̱niso̱ʼona ña̱ ni̱ka̱ʼa̱nra. Ñá María ni̱xa̱a̱ñá ñuu Belén, ta kán ka̱ku se̱ʼeñá, ta xa̱ʼa̱ ña̱ ke̱ʼéñá ña̱yóʼo va̱ʼa ni̱xi̱nu iin profecía (Miq. 5:2). w23.10 8 párr. 11; 9 párr. 12

Ku̱a̱ʼání na̱ hermano tá ndakani kuití xi̱nína ña̱ taxina iin comentario ti̱xin reunión, ndeéní kíxáʼa yíʼvina. Iin ña̱ kivi chindeétáʼan xíʼún kúú ña̱ xa̱a̱ ya̱chi̱ka ná kaʼvi kúeeún ña̱ va̱ʼa taxiún comentario (Prov. 21:5). Tá ná kundaa̱ka-iniún ndáaña káʼa̱n ña̱ káʼviún xa̱ʼa̱, va̱ása ixayo̱ʼvi̱ña xíʼún taxiún comentario. Inka ña̱ kivi keʼún kúú ña̱ loʼo kuití ka̱ʼún (Prov. 15:23; 17:27). Chi tá loʼo ná ka̱ʼún va̱ása yi̱ʼvíún saá. Tá loʼo ná ka̱ʼún ta xíʼin tu̱ʼun miíún ka̱ʼún, inkana kunina ña̱ xa̱a̱ ya̱chi̱ka ka̱ʼvi kúeún ña̱kán va̱ʼaní kúnda̱a̱-iniún xíʼinña. Tá xa̱a̱ ke̱ʼún ña̱ xa̱a̱ ni̱ka̱ʼa̱nyó xa̱ʼa̱ yóʼo ta ndákundeún yíʼviún ña̱ taxiún ku̱a̱ʼá comentario, ¿ndáaña kivi keʼékaún? Ndakaʼán chi Jehová kúsi̱íníva-inira tá xítora ña̱ chíkaa̱níún ndee̱ ña̱ taxiún comentario (Luc. 21:​1-4). Jehová kǒo kúni̱ra ña̱ ná ixandúxaníún xíʼin miíún tá kǒo kívi keʼún iin ña̱ʼa (Filip. 4:5). Ña̱kán ndakanixi̱ní nda̱saa comentario kivi taxiún ta ka̱ʼa̱n xíʼin Jehová ná chindeétáʼanra xíʼún ña̱ va̱ʼa kuchiñún keʼún ña̱yóʼo. Ta ña̱ va̱ʼa kixáʼún taxiún comentario, loʼo kuitíva kivi ka̱ʼún. w23.04 21 párr. 6-8

Ta̱ apóstol Pablo chi̱táʼanra miíyó xíʼin na̱ soldado na̱ xa̱a̱ íyo tu̱ʼva ña̱ ku̱ʼu̱nna nu̱ú ku̱a̱chi. Tiempo ña̱ ndíkaa̱ ku̱a̱chi iin ta̱ soldado xíniñúʼu koo tu̱ʼvaníra ña̱ ku̱ʼu̱nra kanitáʼanra, ki̱ʼva saá ndóʼo miíyó tiempo vitin. Náʼa̱yó ña̱ xa̱a̱ íyo tu̱ʼvayó ña̱ kixaa̱ ki̱vi̱ Jehová saáchi kúʼvi̱-iniyó xínitáʼanyó ta ña̱yóʼo íyoña nda̱a̱ táki̱ʼva íyo ña̱ ndási kándíkayó, ta saátu kándíxayó ña̱ sakǎku Ndióxi̱ miíyó ta ña̱yóʼo íyoña nda̱a̱ táki̱ʼva íyo iin casco ña̱ ndási xi̱níyó. Nda̱a̱ táki̱ʼva ndáa ka̱a kándíka iin ta̱ soldado tá ku̱a̱ʼa̱nra nu̱ú ku̱a̱chi, ki̱ʼva saá ndáa ña̱ kándíxayó Ndióxi̱ miíyó xíʼin ña̱ kúʼvi̱-iniyó xíniyó inkana. Ña̱yóʼo chíndeétáʼanña xíʼinyó ña̱ kǒo sandákooyó ña̱ ndasakáʼnuyó Jehová xíʼin ña̱ kundiku̱nyó ta̱ Jesús. Ta tá kándíxayó Jehová, miíra taxi ku̱a̱ʼání ña̱ va̱ʼa ndaʼa̱yó chí nu̱únínu (Heb. 11:6). Saátu tá kándíxayó Jehová, ña̱yóʼo chindeétáʼan xíʼinyó ña̱ nda̱kú koo iniyó xíʼin ta̱ Jesús ni ku̱a̱ʼání tu̱ndóʼo ná ya̱ʼayó nu̱ú. Ná kotoyó ndáaña chíndeétáʼan xíʼin sava na̱ hermano ña̱ nda̱kú íyo inina xíʼin Ndióxi̱ tá kúma̱ní xu̱ʼún ndaʼa̱na á tá íxandi̱va̱ʼa na̱ chíñu xíʼinna. Iin ña̱ kivi chindeétáʼan xíʼinyó ña̱ kǒo taxiyó ña̱ sandáʼvi na̱ yiví yóʼo miíyó ña̱ kuumiíyó ku̱a̱ʼání ña̱ʼa kúú, ña̱ kotoyó ña̱ kéʼé inka na̱ hermano na̱ ndíʼi̱ka-ini xa̱ʼa̱ chiñu Ndióxi̱ ta va̱ása ndíʼi̱ní-inina ña̱ kuumiína ku̱a̱ʼá ña̱ʼa. w23.06 10 párr. 8, 9

Ná ka̱ʼa̱nyó xíʼin Jehová ña̱ ná chindeéra miíyó ña̱ ná ka̱ʼnu̱-iniyó. Na̱ yiví na̱ xáʼnu-ini viíní ndákanixi̱nína ta saátu viíní ndáka̱xinna ña̱ keʼéna. Chindeétáʼanña xíʼinyó ña̱ keʼéyó iin ña̱ʼa ni tá íxayo̱ʼvi̱ña xíʼinyó á kǒo kúsi̱í-iniyó keʼéyóña. Ná ndakaʼányó chi espíritu santo Ndióxi̱ chindeétáʼan xíʼinyó ña̱ ka̱ʼnu̱-iniyó. Ña̱kán ná ka̱ʼa̱nyó xíʼin Jehová ña̱ ná taxira espíritu santora ndaʼa̱yó ña̱ va̱ʼa ka̱ʼnu̱-iniyó (Luc. 11:13; Gál. 5:​22, 23). Ná kǒo kundatuyó ña̱ ná kixaa̱ tiempo ña̱ va̱ʼa ta saáví keʼéyó iin ña̱ʼa. Tá ná numindaʼa̱yó kundooyó, sana va̱ása saxínuvíyó ña̱ kúni̱yó keʼéyó. Sava yichi̱ kǒo káchi-iniyó sáxi̱nuyó ña̱ nda̱kaxinyó keʼéyó chi yo̱ʼvi̱níña túviyó. Tá íxayo̱ʼvi̱ña xíʼún keʼúnña loʼo tá loʼo kixáʼún keʼúnña. Tá kúú, tá kúni̱ún koún iin na̱ yiví va̱ʼaníka-ini, chikaa̱ ndee̱ ña̱ loʼo tá loʼo keʼúnña. Ta tá kúni̱ún kaʼviún Biblia ndiʼi ki̱vi̱, loʼo tá loʼo kixáʼún kaʼviúnña. w23.05 29 párr. 11-13

Tiempo so̱ndíʼi ña̱ ndóoyó vitin, Jehová xíniñúʼura na̱ ñuura ña̱ va̱ʼa chindeétáʼanna xíʼinyó ña̱ va̱ʼa ndakundeéyó sakúaʼayó xa̱ʼa̱ra ta ndakundeéyó kakayó “Yichi̱ ña̱ Yi̱i̱” (Is. 35:8; 48:17; 60:17). Tá iin na̱ yiví kíxáʼana sákuaʼana xa̱ʼa̱ Ndióxi̱ saá kíxáʼana xíkana “Yichi̱ ña̱ Yi̱i̱” yóʼo. Savana loʼova xíkana nu̱ú yichi̱ yóʼo ta sándakoonaña. Ta inkatuna chi̱kaa̱-inina ña̱ kakana nu̱ú yichi̱ yóʼo nda̱a̱ ná xa̱a̱na nu̱ú ndíʼiña. Soo, ¿nda̱a̱ míí xáa̱ yichi̱ yóʼo? Na̱ ndátu ku̱ʼu̱n chí ndiví, “Yichi̱ ña̱ Yi̱i̱” táki̱ʼva íyo ña̱ kuniʼi miína ku̱ʼu̱nna chí ndiví saá íyoña (Apoc. 2:7). Ta na̱ ndátu kundoo nu̱ú ñuʼú yóʼo, yichi̱ yóʼo kuniʼiñana xa̱a̱na nda̱a̱ nu̱ú ndíʼi ña̱ mil ku̱i̱ya̱ ña̱ kaʼndachíñu ta̱ Jesús tasaá ni̱ʼína ña̱ kutakuna ndiʼi tiempo. Tá xa̱a̱ ku̱a̱ʼún nu̱ú yichi̱ yóʼo va̱ása kitaún nu̱úña, chikaa̱ ndee̱ nda̱a̱ ná xa̱ún nu̱ú ñuyǐví xa̱á. w23.05 17 párr. 16; 19 párr. 17, 18

Tá ndákanixi̱níún xa̱ʼa̱ ndiʼi ña̱ kéʼé Jehová xa̱ʼún ta kúsi̱í-iniún xa̱ʼa̱ ña̱ kéʼéra xa̱ʼún, saá kúú ña̱ kǒo ixayo̱ʼvi̱ña xíʼún ña̱ ndataxiún miíún ndaʼa̱ra (Sal. 116:​12-14). Biblia káchiña, ndiʼi ña̱ va̱ʼa chí ndiví va̱xiña ta Jehová kúú ta̱ táxiña (Sant. 1:17). Iin regalo ña̱ ndáyáʼviní ña̱ ta̱xi Jehová ndaʼa̱yó kúú se̱ʼera ta̱ Jesús. Xa̱ʼa̱ ña̱ ni̱xi̱ʼi̱ ta̱ Jesús kivi koún migo Ndióxi̱ ta kutakún ndiʼi tiempo (1 Juan 4:​9, 10). Ña̱ va̱ʼa na̱ʼún ña̱ táxiún tíxa̱ʼvi ndaʼa̱ Jehová ndaka̱xin ña̱ ndataxiún miíún ndaʼa̱ra ta kachíñún nu̱úra (Deut. 16:17; 2 Cor. 5:15). w24.03 5 párr. 8

Ndó’oyó nda̱a̱ táki̱ʼva ndo̱ʼo iin ta̱ nda̱kúní ni̱xi̱yo ini xíʼin Jehová, ta̱ xi̱naní Lot, ta̱yóʼo xi̱ndi̱ʼi̱ní-inira xa̱ʼa̱ ña̱ kini ña̱ xi̱keʼé na̱ yiví saáchi xi̱xini̱ra ña̱ sáa̱ní-ini Jehová xínira na̱ yiví na̱ kéʼé ña̱ kini (2 Ped. 2:​7, 8). Ta xa̱ʼa̱ ña̱ xi̱kuʼvi̱ní-inira xi̱xinira Jehová, xi̱kundasíníra ndiʼi ña̱ kini ña̱ kǒo kútóo Jehová. Ta saátu íyo tiempo ña̱ ndóo miíyó vitin, saáchi ku̱a̱ʼání na̱ yiví ni loʼo kǒo íxato̱ʼóna ña̱ káʼa̱nra, soo tá kúʼvi̱-iniyó xíniyóra ta íxato̱ʼóyóra saá kǒo keʼéyó ña̱ kini ña̱ va̱ása kútóora. Iin ña̱ kivi chindeétáʼan xíʼinyó ña̱ kǒo keʼéyó ña̱ kini kúú, ña̱ káʼa̱n Jehová xíʼinyó nu̱ú tutu ña̱ Proverbios. Ndiʼiyó kivi kundiku̱nyó consejo yóʼo, kúúyó na̱ va̱lí, na̱ xa̱a̱ chée, ná ñaʼá, á na̱ ta̱a. Na̱ yíʼvi xíni Jehová tá kéʼéna iin ña̱ʼa kini ndákunina ña̱ ku̱a̱chi miína kúúña, saátu kúnda̱a̱-inina tá kítáʼanna xíʼin na̱ yiví na̱ kǒo ndásakáʼnu Jehová kivi xa̱a̱na keʼéna ña̱ kini. w23.06 20 párr. 1, 2; 21 párr. 5

Sana íxandi̱va̱ʼa na̱ veʼún xíʼún xa̱ʼa̱ ña̱ sákuaʼún xa̱ʼa̱ Ndióxi̱, á sanatu sa̱ndákoún iin chiñu nu̱ú va̱ʼaní xi̱chaʼvina yóʼó xa̱ʼa̱ ña̱ kúni̱ún ku̱a̱ʼáka kachíñún nu̱ú Ndióxi̱ (Mat. 6:33). Tá ña̱yóʼo kúú ña̱ ndóʼún, kivi kandíxaún ña̱ kúnda̱a̱va-ini Jehová xíʼin ña̱ ndóʼún (Heb. 6:10). Sana xa̱a̱ kíʼún kuenta ndáa ki̱ʼva ni̱xi̱nu ña̱ ni̱ka̱ʼa̱n ta̱ Jesús tá ka̱chira: “Ña̱ nda̱a̱ káʼi̱n xíʼinndó, nda̱a̱ ndáaka na̱ sa̱ndákoo veʼena, ñanina, ku̱ʼvana, siʼína, yivána, se̱ʼena á ñuʼúna xa̱ʼíi̱ ta saátu xa̱ʼa̱ tu̱ʼun va̱ʼa, tiempo vitin ndakiʼinna veʼena, ñanina, ku̱ʼvana, siʼína, se̱ʼena, ñuʼúna, ta nda̱a̱ yáʼaka 100 yichi̱ ndakiʼinnaña nu̱úka ña̱ xi̱kuumiína, ni kixiva tu̱ndóʼo nu̱úna, soo chí nu̱únínu ndakiʼinna ña̱ kutakuna ndiʼi tiempo” (Mar. 10:​29, 30). Sana ku̱a̱ʼáva ña̱ʼa sa̱ndákoún ña̱ va̱ʼa ndasakáʼnún Ndióxi̱, soo vitin kíʼún kuenta ña̱ ku̱a̱ʼáníkavaña táxi Ndióxi̱ ndaʼún (Sal. 37:4). w24.03 9 párr. 5

Ni̱xo̱ʼvi̱ na̱ cristiano na̱ xi̱ndoo chí Judea tá xi̱ndikaa̱ní so̱ko. Sava na̱ cristiano na̱ xi̱ndoo chí Antioquia loʼo ña̱ʼa xi̱kuumiína ta savatuna ku̱a̱ʼáña xi̱kuumiína, soo ndiʼina chi̱ndaʼána ña̱ʼa ku̱a̱ʼa̱n ndaʼa̱ na̱ xi̱ndoo chí Judea (Hech. 11:​27-30). Ni xíká xi̱ndoo na̱ cristiano na̱ ni̱ya̱ʼa nu̱ú tu̱ndóʼo yóʼo, soo na̱ ni̱xi̱yo chí Antioquia chi̱ndeétáʼanvana xíʼinna (1 Juan 3:​17, 18). Saátu miíyó kivi na̱ʼa̱yó ña̱ kúndaʼvi-iniyó xíniyó na̱ hermanoyó tá kúnda̱a̱-iniyó ña̱ yáʼana nu̱ú tu̱ndóʼo. Ta ndi̱ku̱n kama ná nda̱ka̱tu̱ʼúnyó na̱ anciano ndáaña kivi keʼéyó. Ná taxiyó xu̱ʼún ña̱ kúúmiíyó ndaʼa̱ na̱ ñuu Ndióxi̱, ta ná ka̱ʼa̱nyó xíʼin Jehová xa̱ʼa̱ na̱ hermano na̱ yáʼa nu̱ú tu̱ndóʼo. Tá ná kuu ña̱yóʼo, saá kúú ña̱ chindeétáʼanníkayó xíʼin na̱ hermanoyó ta taxiyó ña̱ xíniñúʼuna. Tá ná kixi tátayó Jesucristo ña̱ ndatiinra ku̱a̱chi xíʼin na̱ yiví, kúni̱yó ña̱ ndani̱ʼíra miíyó ña̱ chíndeétáʼanyó xíʼin inkana á ña̱ kúndáʼvi-iniyó xíniyóna. Tá saá kéʼéyó, ka̱ʼa̱nra ña̱yóʼo xíʼinyó: “Ndakiʼinndó ña̱ʼa va̱ʼa xa̱ʼa̱ Reino Ndióxi̱ ña̱ i̱xava̱ʼara xa̱ʼa̱ndó” (Mat. 25:​34-40). w23.07 4 párr. 9, 10; 6 párr. 12

Nda̱a̱ táki̱ʼva ndákanixi̱ní Jehová saá ndákanixi̱ní ta̱ Jesús, ta ni̱na̱ʼa̱ra ña̱yóʼo tá ki̱xira nu̱ú ñuʼú. Ña̱ nda̱a̱, nda̱saa xíʼin na̱ ñuu Israel xi̱niñúʼu natúʼun ta̱ Jesús xa̱ʼa̱ Ndióxi̱, soo ni saá iin yichi̱ chi̱ndeétáʼanra xíʼin iin ñaʼá ñá inka ñuu. Ñá ñaʼá yóʼo xa̱ku-ndáʼviñá nu̱ú ta̱ Jesús, ña̱ ná sandáʼara se̱ʼeñá saáchi xi̱kuumiíñá ta̱chí ndi̱va̱ʼa. Ta̱ Jesús ku̱ndáʼviní-inira xi̱nira ñá ñaʼá yóʼo, xa̱ʼa̱ ña̱kán sa̱ndáʼara ñá loʼo se̱ʼeñá (Mat. 15:​21-28). Ná ka̱ʼa̱nyó xa̱ʼa̱ inka ejemplo, tá sa̱kán ki̱xáʼa ta̱ Jesús nátúʼunra xíʼin na̱ yiví xa̱ʼa̱ Ndióxi̱, ña̱yóʼo ni̱ka̱ʼa̱nra: “Tá iinna káʼa̱nna ña̱ va̱ása xíni̱na yi̱ʼi̱ nu̱ú na̱ yiví, saátu yi̱ʼi̱ ka̱ʼi̱n ña̱ va̱ása xíni̱i̱na” (Mat. 10:33). U̱ni̱ yichi̱ ni̱ka̱ʼa̱n ta̱ Pedro ña̱ va̱ása xíni̱ra ta̱ Jesús, xa̱ʼa̱ ña̱kán, ¿á xi̱kuni̱ka ta̱ Jesús kutáʼanra xíʼin ta̱ Pedro? Xi̱kuni̱vara kutáʼanra xíʼinra, saáchi xi̱kunda̱a̱va-inira ña̱ ndi̱kó-inira xa̱ʼa̱ ña̱ va̱ása va̱ʼa ke̱ʼéra ta nda̱kú ni̱xi̱yo inira xíʼin Ndióxi̱. Tá nda̱taku ta̱ Jesús, ki̱tara nu̱ú ta̱ Pedro ta ni̱ka̱ʼa̱nra xíʼinra ña̱ xa̱a̱ i̱xakáʼnu-inira xa̱ʼa̱ra ta saátu ña̱ kúʼvi̱-inira xínirara (Luc. 24:​33, 34). Jehová xíʼin ta̱ Jesús viíní ndákanixi̱nína, ta saátu kúni̱ Jehová ña̱ ná ndakanixi̱níyó. w23.07 21, 22 párr. 6, 7

¿Ndáaña kivi ka̱ʼa̱nyó xíʼin inka na̱ yiví ña̱ va̱ʼa kandíxana ña̱ saxínuva Ndióxi̱ ña̱ ni̱ka̱ʼa̱nra? Ña̱ nu̱ú, kivi ka̱ʼa̱nyó xíʼinna ña̱ mií Jehová kúú ta̱ ni̱ka̱ʼa̱n ña̱yóʼo. Apocalipsis káchiña: “Ta̱ íyo nu̱ú trono ni̱ka̱ʼa̱nra ña̱yóʼo: ‘Ndásaxa̱ái̱ ndiʼi ña̱ʼa’”. Jehová kúni̱ra saxínura ña̱ ni̱ka̱ʼa̱nra chi ndíchiníra ta íyoní ndee̱ra keʼéraña. Ña̱ u̱vi̱, Jehová kúnda̱a̱-inira ña̱ xi̱nuvaña, saáchi ndiʼi ña̱ káʼa̱nra: “Mií ña̱ nda̱a̱ kúúña”. Ta káʼa̱nkara: “Xa̱a̱ ni̱xi̱nuvaña”. Ña̱ u̱ni̱, tá kíxáʼa Jehová kéʼéra iin ña̱ʼa sándiʼivaraña. Ta va̱ʼa kúnda̱a̱-iniyó ña̱yóʼo xíʼin tu̱ʼun ña̱ ni̱ka̱ʼa̱nra, ña̱ miíra kúú “Alfa xíʼin Omega” (Apoc. 21:6). Jehová na̱ʼa̱ra ña̱ ta̱ Ndi̱va̱ʼa kúú ta̱ sándaʼvi ta kǒo ni iin ña̱ va̱ʼa kéʼéra. Ta tá iin na̱ yiví káʼa̱nna xíʼún “Su̱ví ña̱ ndixaví kúúña, kǒo xi̱nuvíña”, kivi kaʼviún ña̱ káʼa̱n Apocalipsis 21:​5, 6 nu̱úna ta ndakaniúnña nu̱úna. Kivi ka̱ʼún xíʼinna ña̱ mií Jehová kúú ta̱ ni̱ka̱ʼa̱n ña̱ xi̱nuña, ta nda̱a̱ táki̱ʼva íyo ña̱ chi̱kaa̱ra firmara nu̱ú iin tutu saá íyoña (Is. 65:16). w23.11 7 párr. 18, 19

Jehová ni̱ka̱ʼa̱nra xíʼin ta̱ Abrahán ña̱ koo ku̱a̱ʼání se̱ʼera, soo xa̱a̱ 75 ku̱i̱ya̱ xi̱kuumiíra ta ni iin se̱ʼera kǒo níxi̱yo. ¿Á xi̱ni ta̱ Abrahán ña̱ ni̱xi̱nu ña̱ ni̱ka̱ʼa̱n Jehová xíʼinra? Kǒo níxinivíra ndiʼiña chi loʼo kuitívaña xi̱nira. Tá ni̱ya̱ʼara yu̱ta Éufrates xi̱niñúʼu kundatura 25 ku̱i̱ya̱ tasaá ka̱ku se̱ʼera ta̱ Isaac. Ta tá ni̱ya̱ʼa 60 ku̱i̱ya̱ ka̱ku na̱ se̱ʼe-ñánira, ta̱ Esaú xíʼin ta̱ Jacob (Heb. 6:15). Ta̱ Abrahán kǒo níxinivíra ña̱ ku̱a̱ʼání xa̱a̱ na̱ se̱ʼera koona, ta ni kǒo níxinira tá ni̱ki̱ʼvina ñuʼú ña̱ ni̱ka̱ʼa̱n Jehová taxira ndaʼa̱na. Ni saá ta̱ Abrahán va̱ʼaní xi̱kitáʼanra xíʼin Jehová (Sant. 2:23). Tá ná ndataku ta̱ Abrahán kusi̱íní-inira tá ná kunda̱a̱-inira ña̱ xa̱ʼa̱ ña̱ kúee ni̱xi̱yo inira ta saátu xa̱ʼa̱ ña̱ xi̱kandíxaníra Ndióxi̱, ku̱a̱ʼání na̱ yiví nda̱kiʼin ña̱ va̱ʼa ña̱ kutakuna ndiʼi tiempo (Gén. 22:18). ¿Ndáaña sákuaʼayó xíʼin ña̱yóʼo? Sana miíyó kǒo kunivíyó xi̱nu ndiʼi ña̱ ni̱ka̱ʼa̱n Jehová keʼéra, soo tá kúee íyo iniyó nda̱a̱ táki̱ʼva ni̱xi̱yo ta̱ Abrahán ku̱a̱ʼání ña̱ va̱ʼa taxi Jehová ndaʼa̱yó tiempo vitin, soo ku̱a̱ʼáníkaña ndakiʼinyó chí nu̱únínu (Mar. 10:​29, 30). w23.08 24 párr. 14

Vitání ni̱xi̱yo ini ta̱ rey Uzías tá ni̱xi̱yo loʼora ta xi̱ ixato̱ʼóníra Ndióxi̱. Ta̱yóʼo 68 ku̱i̱ya̱ xi̱takura ta ku̱a̱ʼání ña̱ va̱ʼa ta̱xi Jehová ndaʼa̱ra (2 Crón. 26:​1-4). Va̱ʼaní xi̱ndaara na̱ ñuu Jerusalén ta sa̱ndíʼi-xa̱ʼa̱ra ku̱a̱ʼání na̱ ñuu na̱ xi̱saa̱-ini xi̱xini Ndióxi̱ (2 Crón. 26:​6-15). Sana ku̱si̱íní-ini ta̱ Uzías xa̱ʼa̱ ña̱ va̱ʼaní xi̱chindeétáʼan Jehová xíʼinra (Ecl. 3:​12, 13). Xa̱ʼa̱ ña̱ xi̱kuu ta̱ Uzías rey xi̱kaʼa̱nra xíʼin inkana ndáaña xíniñúʼu keʼéna, ña̱kán nda̱kanixi̱níra ña̱ kivi keʼéra ña̱ kúni̱ miíra. Iin ki̱vi̱ ni̱ki̱ʼvira templo Jehová ta xa̱ʼmira incienso, soo nda̱saa na̱ su̱tu̱ kuití xi̱keʼé chiñu yóʼo (2 Crón. 26:​16-18). Ta̱ su̱tu̱ káʼnu Azarías ni̱ka̱ʼa̱nra xíʼinra ña̱ va̱ása va̱ʼa íyo ña̱ ke̱ʼéra, xa̱ʼa̱ ña̱yóʼo ni̱sa̱a̱ní ta̱ Uzías. Va̱ása viíka níxi̱kitáʼan ta̱ Uzías xíʼin Jehová, ña̱kán ta̱xi Jehová ña̱ kuumiíra kue̱ʼe̱ lepra (2 Crón. 26:​19-21). Si̱íníkava koo ta̱ Uzías tá vitá níxi̱yo inira. w23.09 10 párr. 9, 10

Ni xa̱a̱ nda̱kaxin Ndióxi̱ ta̱ apóstol Pedro ña̱ ku̱ʼunra chí ndiví, ni saá xi̱niñúʼu chikaa̱kara ndee̱ ña̱ vií keʼéra sava ña̱ʼa. Tá ku̱i̱ya̱ 36, ta̱ Pedro xi̱nira iin ta̱a ta̱ va̱ása kúú judío ta̱ xi̱naní Cornelio ta̱ nda̱kiʼin espíritu santo i̱xaa Ndióxi̱. Xíʼin ña̱yóʼo ki̱ʼin ta̱ Pedro kuenta ña̱ va̱ása ndáka̱xin Ndióxi̱ na̱ yiví, chi kiviva ndasakáʼnu na̱ inka ñuu Ndióxi̱ (Hech. 10:​34, 44, 45). Tá ku̱ndaa̱-ini ta̱ Pedro ña̱ inkáchi íyo ndiʼi na̱ yiví nu̱ú Ndióxi̱, ña̱yóʼo chi̱ndeétáʼan xíʼinra ña̱ kǒo ixayo̱ʼvi̱ña xíʼinra kuxura xíʼin na̱ kǒo kúú judío. Soo sava na̱ cristiano na̱ xi̱kuu judío xi̱ndakanixi̱nína ña̱ va̱ása xíniñúʼu kuxuna xíʼin na̱ kǒo kúú judío. Sava na̱ judío na̱ xi̱ndakanixi̱ní saá ni̱xaa̱na ñuu Antioquía, ta xa̱ʼa̱ ña̱yóʼo ta̱ Pedro kǒo níxiinkara kuxura xíʼin na̱ kǒo kúú judío saáchi ni̱yi̱ʼvíra ña̱ sa̱a̱ na̱ judío xíʼinra. Tá xi̱ni ta̱ Pablo ña̱ va̱ása va̱ʼa íyo ña̱ kéʼé ta̱ Pedro, nu̱ú ndiʼi na̱ cristiano ta̱xira consejo ndaʼa̱ra (Gál. 2:​13, 14). Ni ndo̱ʼo ta̱ Pedro ña̱yóʼo, kǒo níndakava-inira chi chi̱kaa̱ra ndee̱ ña̱ ndasakáʼnura Ndióxi̱, ¿ndáaña chi̱ndeétáʼan xíʼinra? w23.09 22 párr. 8

Tá anciano kúún, ¿á kúsi̱í-iniún ña̱ chíndeétáʼún xíʼin na̱ hermano ta ndáúnna? Tá xa̱a̱ nda̱kanixi̱níún xa̱ʼa̱ ña̱yóʼo ta xítoún ña̱ va̱ása kéʼúnña, kǒo ndakava iniún. Ndakaʼán chi va̱ʼaní-ini Jehová ta miíra chindeétáʼan xíʼún ña̱ vií keʼúnña (1 Ped. 2:3). Ta̱ apóstol Pedro ni̱ka̱ʼa̱nra: “[Ndióxi̱] sanáʼa̱ ndóʼó nda̱a̱ ná xa̱a̱ndó koo tu̱ʼvandó, miíra taxi ndee̱ ndaʼa̱ndó, miíra chindeétáʼan xíʼinndó ña̱ nda̱kú koo inindó”. Ta̱ Pedro xi̱kundaa̱-inira ña̱ kúúra iin ta̱ ku̱a̱chi ña̱kán kǒo níxiinra kuyatinra nu̱ú ta̱ Jesús (Luc. 5:8). Soo Jehová xíʼin ta̱ Jesús chi̱ndeétáʼanna xíʼin ta̱ Pedro chi xi̱kuʼvi̱-inina xi̱xininara. Ta ta̱ Pedro kǒo nísandákoora ña̱ kundiku̱nra ta̱ Jesús. Xa̱ʼa̱ ña̱yóʼo ta̱ Pedro nda̱kiʼinra ña̱ va̱ʼa ña̱ koora ti̱xin Reino “tátayó Jesucristo ta̱ sáka̱ku miíyó” (2 Ped. 1:11). Ta saátu yóʼóva tá chíka̱ún ndee̱ ña̱ ndasakáʼnún Jehová ta táxiún ña̱ sanáʼa̱ra yóʼó, miíra taxi ña̱ kutakún ndiʼi tiempo. Ta xa̱ʼa̱ ña̱ kándíxaúnra kusi̱íní-iniún chi ka̱kuvaún (1 Ped. 1:9). w23.09 31 párr. 16, 17

Ndíka̱ní ni̱xi̱yo yéʼé ña̱ tabernáculo ta kán xi̱keʼé na̱ su̱tu̱ chiñuna. Yéʼé kán xi̱ndichi iin altar ña̱ káʼnu ña̱ cobre ta nu̱ú ña̱kán xi̱sokóna ña̱ʼa nu̱ú Ndióxi̱. Ta saátu xi̱ndichi iin ña̱ʼa ña̱ cobre ta kán xi̱ndaʼá na̱ su̱tu̱ ta xi̱ndakatana xa̱ʼa̱na ña̱ va̱ʼa kixáʼana keʼéna chiñu nu̱ú Ndióxi̱ (Éx. 30:​17-20; 40:​6-8). Na̱ ungido na̱ ndóoka nu̱ú ñuʼú yóʼo nda̱kúní-inina ña̱ ndásakáʼnuna Ndióxi̱, ta kéʼéna chiñu nu̱úra chí yéʼé ña̱ íyo ini templo espiritual ña̱ kúúmiíra, saáchi kúma̱ní koona su̱tu̱ xíʼin ta̱ Jesús chí ndiví. Ña̱ʼa nu̱ú xi̱ñuʼu ti̱kui̱í nu̱ú xi̱ndakata na̱ su̱tu̱ ndaʼa̱na xíʼin xa̱ʼa̱na ña̱ ni̱xi̱yo tabernáculo xíʼin templo, sándakaʼánña na̱ ku̱ʼu̱n chí ndiví ta saátu sándakaʼánña miíyó ña̱ xíniñúʼu limpio kooyó nu̱ú Jehová. Ta, ¿ndáa míí xáʼa̱n na̱ “gran muchedumbre”, ña̱ ndasakáʼnuna Jehová? Ta̱ apóstol Juan xi̱nira ña̱ na̱yóʼo “ndítana nu̱ú trono Ndióxi̱, ta ndásakáʼnunara ini templora ñuú xíʼin káʼñu”. Na̱ gran muchedumbre ndásakáʼnuna Ndióxi̱ chí yéʼé ña̱ ndíka̱ní ña̱ kúúmií templo espiritual (Apoc. 7:​9, 13-15). Kúsi̱íní-iniyó saáchi ndiʼiyó íyova nu̱ú ndásakáʼnuyó Ndióxi̱. w23.10 28 párr. 15, 16

Jehová xíniñúʼura na̱ anciano ña̱ ndasandakúna-iniyó (Is. 32:​1, 2). Ña̱kán ka̱ʼa̱n xíʼinna tá íyo ña̱ sándi̱ʼi̱-iniún, ta tá káʼa̱nna ña̱ chindeétáʼanna xíʼún taxi ná chindeéna yóʼó. Jehová xíniñúʼu na̱yóʼo ña̱ va̱ʼa chindeéna yóʼó. Ña̱ káʼa̱n Biblia koo chí nu̱únínu ndásandakúña-iniyó. Ndiʼi miíyó na̱ ndásakáʼnu Ndióxi̱ ndátuyó kutakuyó ndiʼi tiempo, savana koona nu̱ú ñuʼú yóʼo ta savana koona chí ndiví (Rom. 4:​3, 18, 19). Ña̱ ndátuyó koo chí nu̱únínu táxiña ndee̱ ndaʼa̱yó ña̱ va̱ʼa kundeé-iniyó tá yáʼayó nu̱ú tu̱ndóʼo, ña̱ natúʼunyó xíʼin na̱ yiví xa̱ʼa̱ Ndióxi̱ ta saátu ña̱ keʼéyó chiñu ña̱ táxira ndaʼa̱yó ti̱xin congregación (1 Tes. 1:3). Ná kotoyó ndáa ki̱ʼva chi̱ndeétáʼan ña̱yóʼo xíʼin ta̱ apóstol Pablo. Ni̱ka̱ʼa̱nra ña̱ i̱xandi̱va̱ʼana xíʼinra, ña̱ sa̱xóʼvi̱nara, ña̱ ni̱xi̱kaní-inira ta si̱lóʼo kuvira (2 Cor. 4:​8-10). ¿Ndáaña chi̱ndeétáʼan xíʼin ta̱ Pablo ña̱ ndakú koo inira? Ña̱ nda̱kaʼánra xa̱ʼa̱ ña̱ ndátura ndakiʼinra chí nu̱únínu (2 Cor. 4:​16-18). Chi xi̱kuni̱ra ndakiʼinra ña̱ taxi Ndióxi̱ ndaʼa̱ra ña̱ ku̱ʼu̱nra chí ndiví. Ta xa̱ʼa̱ ña̱ nda̱kanixi̱ní ta̱ Pablo xa̱ʼa̱ ña̱ ndakiʼinra chí nu̱únínu ña̱yóʼo kúú ña̱ chi̱kaa̱ ndee̱ xíʼinra. w23.10 15, 16 párr. 14-17

Tá ka̱’ún xí’in Jehová, kivi nda̱ka̱tu̱ʼún ña̱yóʼo miíún: “¿Á túvi Jehová ña̱ tiempo yóʼo kúú ña̱ xíniñúʼi̱ ña̱ʼa ña̱ ndu̱kúi̱ nu̱úra?”. Sana ndákanixi̱níyó ña̱ xíniñúʼu kamaní ndakuiin Jehová oración ña̱ kéʼéyó nu̱úra. Soo mií ña̱ nda̱a̱, Jehová xíni̱vara ama kúú ña̱ chindeétáʼanra xíʼinyó (Heb. 4:16). Tá xítoyó ña̱ va̱ása kama ndákuiin Jehová oraciónyó, kivi ndakanixi̱níyó ña̱ kǒo chíndeétáʼankavíra xíʼinyó. Soo sana ndátura ta xítora ndáa ki̱ʼva keʼéra ña̱yóʼo. Ná ka̱ʼa̱nyó xa̱ʼa̱ ña̱ ndo̱ʼo iin ta̱ hermano ta̱ xi̱kaʼa̱n xíʼin Jehová ña̱ ná sandáʼarara, soo kǒo nínda’ara. Tá nísándaʼa Jehová ta̱ hermano yóʼo, ta̱ Ndi̱va̱ʼa kivi ka̱ʼa̱nra xíʼin Jehová ña̱ ndásakáʼnurara xa̱ʼa̱ ña̱ sa̱ndáʼarara (Job 1:​9-11; 2:4). Soo Jehová xa̱a̱ ni̱ka̱ʼa̱nvara ña̱ nu̱ú ñuyǐví xa̱á sandíʼi-xa̱ʼa̱ra ndiʼi kue̱ʼe̱ (Is. 33:24; Apoc. 21:​3, 4). Ña̱kán, va̱ása kundatuvíyó ña̱ keʼé Jehová milagro ña̱ sandáʼara na̱ yiví. Tá saá, ¿ndáaña kivi ndukú ta̱ hermano yóʼo nu̱ú Jehová? Kivi ka̱ʼa̱nra xíʼinra ña̱ ná taxira ndee̱ ndaʼa̱ra ña̱ va̱ʼa kundeé-inira ta saátu ña̱ kusi̱í-inira ndasakáʼnurara ni ndóʼora iin kue̱ʼe̱ ña̱ yo̱ʼvi̱ní. w23.11 24 párr. 13

Ni ke̱ʼé ta̱ Sansón ña̱ va̱ása va̱ʼa soo xi̱kuni̱kavara keʼéra chiñu ña̱ ta̱xi Jehová ndaʼa̱ra, ña̱ kanitáʼanra xíʼin na̱ filisteo (Juec. 16:​28-30). Ña̱kán ni̱ka̱ʼa̱n-ndáʼvi ta̱ Sansón xíʼin Jehová: “Kúni̱i̱ ña̱ ná chaʼvi na̱ filisteo xa̱ʼa̱ ña̱ ke̱ʼéna”. Jehová xi̱niso̱ʼora ña̱ ni̱ka̱ʼa̱nra ta ta̱xi tukura ndee̱ ndaʼa̱ra. Ku̱a̱ʼáníka na̱ filisteo xa̱ʼníra ki̱vi̱ saá nu̱úka na̱ xa̱ʼníra tá xi̱xikara xi̱kanitáʼanra xíʼinna. Ni ni̱xo̱ʼvi̱va ta̱ Sansón xa̱ʼa̱ ña̱ va̱ása va̱ʼa ke̱ʼéra, soo chi̱kaa̱vara ndee̱ ña̱ keʼéra ña̱ kúni̱ Jehová. Ta saátu miíyó, tá kéʼéyó ña̱ va̱ása va̱ʼa ta xa̱ʼa̱ ña̱yóʼo táxina consejo ndaʼa̱yó á sándakooyó kéʼéyó iin chiñu nu̱ú Jehová ná kǒo ndakava-iniyó. Ná ndakaʼányó chi Jehová kúni̱ra ña̱ chikaa̱yó ndee̱ ña̱ kachíñu tukuyó nu̱úra (Sal. 103:​8, 9). Ni kúúyó na̱ yiví ku̱a̱chi ta sava yichi̱ kéʼéyó ña̱ va̱ása va̱ʼa, kiviva kuniñúʼu Jehová miíyó nda̱a̱ táki̱ʼva ke̱ʼéra xíʼin ta̱ Sansón. w23.09 6 párr. 15, 16

Su̱ví ña̱yóʼo kúni̱ kachiña ña̱ kúsi̱í-ini Jehová tá yáʼún nu̱ú tu̱ndóʼo, chi ña̱ sákusi̱í-inira kúú ña̱ kúndeé-iniún. Ña̱kán, tá yáʼún nu̱ú iin tundóʼo ta kúndeé-iniún, saá kúú ña̱ sákusi̱íún-ini Jehová (Sal. 5:12). Ná ka̱ʼa̱nyó xa̱ʼa̱ ta̱ Abrahán. Jehová ku̱si̱íní-inira xíʼinra saáchi ku̱ndeé-inira tá ni̱ya̱ʼara nu̱ú tu̱ndóʼo. Ta ni̱ka̱ʼa̱nra ña̱ migora xi̱kuu ta̱ Abrahán saáchi nda̱kúní ni̱xi̱yo inira xíʼinra (Gén. 15:6; Rom. 4:​13, 22). Kúsi̱íva-ini Jehová xíʼin chiñu ña̱ kéʼéyó nu̱úra ti̱xin congregación, soo ña̱ ndáyáʼvika nu̱úra kúú ña̱ kúndeé-iniyó tá yáʼayó nu̱ú tu̱ndóʼo ta nda̱kú íyo iniyó xíʼinra, ta ndiʼiyó kiviva nda̱kú koo iniyó xíʼinra. ¿Á yáʼún nu̱ú tu̱ndóʼo ña̱ sáxo̱ʼviní yóʼó? Tá saá ndóʼún, ndakaʼán ña̱ kúsi̱íva-ini Ndióxi̱ xíʼin ña̱ kéʼún tá nda̱kú íyo iniún xíʼinra. Ña̱kán, tá kúnda̱a̱-iniyó ña̱ kúsi̱í-ini Jehová xíʼin ña̱ kéʼéyó saá kúú ña̱ kǒo xíka-iniyó xa̱ʼa̱ ña̱ ndakiʼinyó chí nu̱únínu. w23.12 11 párr. 13, 14

Ndiʼi ta̱a xíniñúʼu kundaa̱-inira xíʼin ña̱ ndákanixi̱ní inkana ta saátu xíʼin ña̱ ndóʼona (Prov. 20:5). Kivi sakúaʼún kunda̱a̱-iniún xíʼin ña̱ ndóʼo inkana, tá xítoún ndáa ki̱ʼva káʼa̱nna ta saátu ndáa ki̱ʼva xítona. Ña̱yóʼo kúni̱ kachiña, ña̱ xíniñúʼu taváún tiempo ña̱ natúʼún xíʼinna. Tá ndiʼi tiempo káʼún xíʼinna xíʼin celular, correo á mensaje ixayo̱ʼvi̱nívaña xíʼún ña̱ natúʼún xíʼinna tá ná kuniúnna. Xa̱ʼa̱ ña̱kán, tavá tiempo ña̱ kitáʼún xíʼinna ta natúʼún xíʼinna (2 Juan 12). Iin ta̱ cristiano ta̱ xa̱a̱ xu̱xa-ini xíniñúʼu kundaara na̱ veʼera (1 Tim. 5:8). Ni nda̱a̱ ndáaka ña̱ ná keʼéna kivi sakúaʼana kachíñuna tasaá kǒo ixama̱ní ña̱ʼa nu̱úna (Hech. 18:​2, 3; 20:34; Efes. 4:28). Chikaa̱ ndee̱ ña̱ viíní kachíñún tasaá va̱ʼaní ka̱ʼa̱nna xa̱ʼún ta va̱ása ixayo̱ʼvi̱ña xíʼún ndani̱ʼún chiñu nu̱ú kachíñún. w23.12 27 párr. 12, 13

Tá ká’a̱n Biblia xa̱ʼa̱ “ki̱vi̱ káʼnu Jehová” káʼa̱nña xa̱ʼa̱ ki̱vi̱ ña̱ sandíʼi-xa̱ʼa̱ra na̱ yiví na̱ kéʼé ña̱ va̱ása va̱ʼa ta sakǎkura na̱ ñuura. Tá tiempo xi̱naʼá, Jehová sa̱ndíʼi-xa̱ʼa̱ra na̱ kǒo níkeʼé ña̱ ni̱ka̱ʼa̱nra (Is. 13:​1, 6; Ezeq. 13:5; Sof. 1:8). Ña̱ siʼna kuu tá ná ki̱xaa̱ “ki̱vi̱ káʼnu Jehová” kúú, ña̱ ndiʼi-xa̱ʼa̱ ndiʼi na̱ veʼe-ñu̱ʼu vatá ta tándi̱ʼi saá kixaa̱ ña̱ Armagedón. Ña̱ va̱ʼa ka̱kuyó “ki̱vi̱” yóʼo, vitin kúú ña̱ xa̱a̱ xíniñúʼu koo tu̱ʼvayó. Ta̱ Jesús sa̱náʼa̱ra, ña̱ “xíniñúʼu koo tu̱ʼvayó” tá ná kixaa̱ ña̱ “gran tribulación”, ta ndiʼi tiempo xíniñúʼu keʼéyó ña̱yóʼo (Luc. 12:40; Mat. 24:21). Nu̱ú 1 Tesalonicenses, ta̱ apóstol Pablo ni̱ka̱ʼa̱nra xa̱ʼa̱ sava ña̱ʼa ña̱ kivi chindeétáʼan xíʼin na̱ cristiano ña̱ koo tu̱ʼvana tá ná kixaa̱ ki̱vi̱ káʼnu Jehová. Ta̱ apóstol Pablo xi̱kunda̱a̱-inira ña̱ xi̱kumaní ku̱a̱ʼání tiempo ña̱ ndatiin Ndióxi̱ ku̱a̱chi xíʼin na̱ yiví na̱ íyo nu̱ú ñuʼú yóʼo (2 Tes. 2:​1-3). Soo nisaá ni̱ka̱ʼa̱nra xíʼin na̱ cristiano ña̱ ná koo tu̱ʼvanína ta saátu miíyó kivi kundiku̱nyó consejo yóʼo. w23.06 8 párr. 1, 2

Ku̱i̱ya̱ 1978 ki̱xáʼana íxava̱ʼana iin veʼe ña̱ súkunní ña̱ 60 piso chí ñuu Tokio, Japón. Na̱ yiví na̱ xi̱xito ña̱yóʼo xi̱ndakanixi̱nína á kǒo ndakavaña tá xa̱a̱ ná ta̱an, saáchi táanní ñuu kán. ¿Ndáaña ke̱ʼé na̱ ingeniero ña̱ va̱ʼa kǒo ndakavaña? Viíní i̱xava̱ʼana xa̱ʼa̱ña, ta ni ná kanda̱ña kǒo ndakavavíña. Miíyó na̱ ndásakáʼnu Ndióxi̱ íyoyó nda̱a̱ táki̱ʼva íyo veʼe yóʼo. ¿Nda̱chun? Saáchi kǒo táxiyó ña̱ nasama na̱ yiví ña̱ ndákanixi̱níyó. Ta xíniñúʼu kuniso̱ʼoyó ndiʼi ley ña̱ káʼa̱n Jehová xíʼinyó nu̱ú tu̱ʼunra. Ná koo tu̱ʼvayó ña̱ kandíxayó ndiʼi ña̱ káʼa̱n Jehová xíʼinyó, ta ná kǒo keʼéyó ña̱ va̱ása kútóora. Soo tá kǒo kítáʼan ña̱ ndákanixi̱níyó xíʼin ña̱ ndákanixi̱ní Jehová xíniñúʼu nasamayóña (Sant. 3:17). Tá va̱ʼaní íyo ña̱ ndákanixi̱níyó xa̱ʼa̱ sava ña̱ʼa, ña̱yóʼo chindeétáʼanña xíʼinyó ña̱ viíní koo ña̱ ndaka̱xinyó keʼéyó. w23.07 14 párr. 1, 2

Ta̱ Ndi̱va̱ʼa ni̱ka̱ʼa̱nra xíʼin ta̱ Jesús ña̱ keʼéra ña̱ kǒo kútóo Jehová (Mat. 4:​1-11). Ña̱ xi̱kuni̱ ta̱ Ndi̱va̱ʼa kúú ña̱ ki̱ʼvi ta̱ Jesús ku̱a̱chi, tasaá kǒo kivika chaʼvira xa̱ʼa̱ ku̱a̱chi na̱ yiví. Tá xa̱a̱ ki̱xáʼa ta̱ Jesús nátúʼunra xa̱ʼa̱ Ndióxi̱, ni̱ya̱ʼara nu̱ú inkaka tu̱ndóʼo. Tá kúú, na̱ xi̱saa̱-ini xi̱xini miíra i̱xandi̱va̱ʼana xíʼinra ta xi̱kuni̱na kaʼnínara (Luc. 4:​28, 29; 13:31). Ta sava yichi̱ na̱ discípulora xi̱keʼéna sava ña̱ kǒo níxikutóora xa̱ʼa̱ ña̱ xi̱kuuna na̱ yiví ku̱a̱chi (Mar. 9:​33, 34). Tá nda̱tiin na̱ chíñu ku̱a̱chi xíʼinra, i̱xandi̱va̱ʼanína xíʼinra ta ni̱kusi̱kindaanara. Tándi̱ʼi, xa̱ʼnínara nda̱a̱ táki̱ʼva xáʼnína iin na̱ kui̱ʼná (Heb. 12:​1-3). Tá si̱lóʼo kúma̱ní kuvira sa̱ndákoo ndaʼa̱ Jehová miíra, ña̱kán iinlá miíra ni̱ya̱ʼa nu̱ú tu̱ndóʼo ña̱ yo̱ʼvi̱ní kán (Mat. 27:46). Ni̱xo̱ʼvi̱ní ta̱ Jesús ña̱ va̱ʼa chaʼvira xa̱ʼa̱ ku̱a̱chiyó. Tá ndákanixi̱níyó xa̱ʼa̱ ndiʼi ña̱ ke̱ʼé ta̱ Jesús xa̱ʼa̱yó, kúʼvi̱ní-iniyó xíniyóra. w24.01 10, 11 párr. 7-9

Ña̱ chindeétáʼan xíʼinyó ña̱ vií kitáʼanyó xíʼin inkana kúú ña̱ kúee koo iniyó. Tá kǒo kamaní-iniyó kuniso̱ʼoyó ña̱ káʼa̱n inkana xíʼinyó ta kǒo ka̱ʼnu̱yó tu̱ʼunna (Sant. 1:19). Saátu vií kitáʼanyó ti̱xin congregación ta kǒo ku̱a̱chi kaku. Tá kúee íyo iniyó kǒo ka̱ʼa̱nyó ña̱ va̱ása va̱ʼa xíʼin inkana á tu̱ʼun ña̱ sáxo̱ʼvi̱-inina tá káʼa̱nna iin ña̱ va̱ása va̱ʼa xíʼinyó. Ta kǒo keʼéyó nda̱a̱ táki̱ʼva kéʼéna xíʼinyó, saáchi kundeé-iniyó nu̱ú táʼanyó ta koo káʼnu iniyó xa̱ʼa̱ táʼanyó (Col. 3:​12, 13). Ña̱ kúee koo iniyó chindeétáʼanña xíʼinyó ña̱ vií koo ña̱ ndaka̱xinyó keʼéyó. Nu̱úka ña̱ kamaní ndaka̱xinyó ña̱ keʼéyó va̱ʼaka ná taváyó tiempo ña̱ ndakanixi̱níyó ndáaña va̱ʼa kúú ña̱ ndakiʼinyó xíʼin ña̱ ndaka̱xinyó keʼéyó. Tá kúú, tá chiñu xíkayó ndúkúyó, ta xa̱ʼa̱ ña̱ xa̱a̱ kúni̱yó kachíñuyó kivi kiʼinyó iin chiñu ña̱ kasi nu̱úyó ña̱ ku̱ʼu̱nyó reunión á ña̱ keeyó natúʼunyó xíʼin na̱ yiví xa̱ʼa̱ Ndióxi̱. Soo, tá kúee íyo iniyó ña̱yóʼo chindeétáʼanña xíʼinyó ña̱ kiʼinyó kuenta ña̱ kǒo kasiña nu̱úyó ña̱ kooyó xíʼin na̱ veʼeyó, ta saátu ña̱ ndasakáʼnuyó Jehová. Ña̱kán, tá kúee íyo iniyó saá kúú ña̱ ndaka̱xin viíyó ña̱ keʼéyó. w23.08 22 párr. 8, 9

Sava yichi̱ kuni̱ún keʼún ña̱ kini ta xa̱ʼa̱ ña̱yóʼo kixáʼa ndi̱ʼi̱ní-iniún, soo ña̱ chindeétáʼan xíʼún ña̱ kǒo keʼún ña̱yóʼo kúú ña̱ ndakaʼún xa̱ʼa̱ ña̱ ki̱ndoún keʼún nu̱ú Ndióxi̱ tá nda̱kuchiún. ¿Nda̱chun káʼa̱nyó ña̱yóʼo? Tá ni̱ka̱ʼa̱nyó xíʼin Jehová ña̱ iinlá miíra ndasakáʼnuyó, ni̱ka̱ʼa̱nyó xíʼinra ña̱ kǒo keʼékayó ña̱ kúni̱ miíyó (Mat. 16:24). Ña̱kán, tá xa̱a̱ ná ya̱ʼayó nu̱ú iin prueba kǒo ndakanixi̱níyó ndáaña keʼéyó chi xa̱a̱ xíni̱vayó ña̱ kǒo keʼéyó ña̱ kǒo kútóo Jehová ta nda̱kú koo iniyó xíʼinra. Tá xa̱a̱ nda̱taxiyó miíyó ndaʼa̱ Jehová ni̱ka̱ʼa̱nyó xíʼinra ña̱ iinlá miíra kúni̱yó sakúsi̱íyó-ini ta kǒo keʼékayó inka ña̱ʼa. Ná kooyó nda̱a̱ táki̱ʼva ni̱xi̱yo ta̱ Job saáchi ni ni̱ya̱ʼara nu̱ú ku̱a̱ʼání tu̱ndóʼo ña̱ yo̱ʼvi̱ní, ta̱yóʼo ni̱ka̱ʼa̱nra “ndiʼi tiempo nda̱kú koo inii̱ xíʼin Ndióxi̱” (Job 27:5). w24.03 9 párr. 6, 7

Kúʼvi̱ní-ini Jehová Ndióxi̱ xínira miíyó (2 Cor. 13:11). Ndíʼi̱ní-ini Jehová xa̱ʼa̱ iin tá iinyó, ña̱kán kǒo xíka-iniyó ña̱ kúʼvi̱ní-inira xínira miíyó (Sal. 32:10). Tá ndákanixi̱níyó xa̱ʼa̱ ki̱ʼva ña̱ náʼa̱ Jehová ña̱ kúʼvi̱-inira xínira miíyó saá kuyatinkayó nu̱úra ta saátu kandíxakayóra. Ña̱kán, kivi ka̱ʼa̱nyó xíʼinra xa̱ʼa̱ ndiʼi ña̱ sándi̱ʼi̱-iniyó, ta kivitu ka̱ʼa̱nyó xíʼinra ña̱ xíniñúʼuníyó ña̱ kuʼvi̱-inira kunira miíyó. Kúnda̱a̱va-inira xíʼin ña̱ ndóʼoyó ta kúni̱ra chindeétáʼanra xíʼinyó (Sal. 145:19). Kúʼvi̱ní-ini Jehová xínira miíyó, ta ña̱yóʼo íyoña nda̱a̱ táki̱ʼva íyo ñuʼu̱ ña̱ sándasa̱a̱ miíyó tiempo ña̱ vi̱xin. Ndiʼi ki̱vi̱ kúni̱yó kuyatinyó nu̱úra. Ni ndakúníva Jehová soo kúʼvi̱ní-inira xínira miíyó ta viíní káʼa̱nra xíʼinyó. Kúsi̱íní-iniyó xa̱ʼa̱ ña̱ kúni̱ní Jehová xínira miíyó, ña̱kán ndiʼiyó kivi ka̱ʼa̱nyó: “Kúni̱níi̱ xínii̱ Jehová” (Sal. 116:1). w24.01 31 párr. 19, 20

Ta̱ Jesús kǒo níka̱ʼa̱n kuitíra xa̱ʼa̱ ki̱vi̱ Jehová xíʼin na̱ yiví, chi xi̱xini̱va na̱ judío ndáaña xi̱kuu ki̱vi̱ra. Ña̱kán, ña̱ ni̱ka̱ʼa̱nra xíʼinna xi̱kuu ndáa ki̱ʼva íyora (Juan 1:​17, 18). Tá kúú, ña̱ Escrituras Hebreas káʼa̱nña ña̱ kúndáʼvi-ini Jehová xínira na̱ yiví ta va̱ʼaní-inira (Éx. 34:​5-7). Soo ta̱ Jesús va̱ʼaníka chi̱ndeétáʼanra xíʼin na̱ yiví ña̱ kunda̱a̱-inina xa̱ʼa̱ ña̱yóʼo tá ni̱ka̱ʼa̱nra iin ilustración ña̱ káʼa̱n xa̱ʼa̱ iin ta̱ loʼo ta̱ sa̱ndákoo yivá: “Tá xíkáka va̱xira xi̱ni yivárara ta ndeéní ku̱ndáʼvi-inira xi̱nirara. Ta xínura ni̱xa̱ʼa̱nra nda̱a̱ nu̱ú va̱xi ta̱ loʼo kán ta i̱xakáʼnu-inira xa̱ʼa̱ra”. Xíʼin ña̱ ilustración yóʼo kúnda̱a̱-iniyó ña̱ kúndáʼviníva-ini Jehová xínira miíyó ta va̱ʼaní-inira (Luc. 15:​11-32). Ta̱ Jesús chi̱ndeétáʼanra xíʼin na̱ yiví ña̱ va̱ʼa kunda̱a̱-inina ndáa ki̱ʼva íyo Jehová. w24.02 10 párr. 8, 9

¿Ndáaña chindeétáʼan xíʼinyó ña̱ kundáʼvi-iniyó kuniyó inkana ta sandíkoyó-inina nda̱a̱ táki̱ʼva kéʼé Jehová? Ña̱ chikaa̱yó ndee̱ ña̱ kuumiíyó ña̱ va̱ʼa ña̱ kúúmií Jehová. Ná ka̱ʼa̱nyó xa̱ʼa̱ sava ña̱yóʼo. ¿Ndáaña chindeétáʼan xíʼinyó ña̱ kǒo sandákooyó ña̱ kuʼvi̱-iniyó kuniyó inkana xíʼin ña̱ sandíkoyó-inina? (1 Tes. 4:18). Ña̱ kunda̱a̱-iniyó xíʼin ña̱ ndóʼona, ña̱ kuʼvi̱-iniyó kuniyóna ta va̱ʼa koo iniyó xíʼinna (Col. 3:12; 1 Ped. 3:8). Ña̱ kuumiíyó ña̱ va̱ʼa ña̱ kúúmií Jehová kúú ña̱ chindeétáʼan xíʼinyó ña̱ va̱ʼa sandíkoyó-ini inkana tá yáʼana nu̱ú tu̱ndóʼo. Ta̱ Jesús ni̱ka̱ʼa̱nra ña̱yóʼo: “Saáchi ña̱ʼa ña̱ káʼa̱nyó kúú ña̱ ndíka̱a̱ níma̱yó. Ta̱a ta̱ va̱ʼa káʼa̱nra nina ña̱ va̱ʼa, saáchi nina ña̱ va̱ʼa ndíka̱a̱ níma̱ra” (Mat. 12:​34, 35). Ña̱kán, iin ki̱ʼva ña̱ na̱ʼa̱yó ña̱ kúʼvi̱-iniyó xíniyó na̱ hermanoyó kúú ña̱ sandíkoyó-inina. w23.11 10 párr. 10, 11

Ña̱ va̱ʼa kunda̱a̱-iniyó xíʼin profecía ña̱ va̱xi nu̱ú Biblia xíniñúʼu ka̱ʼa̱nyó xíʼin inkana ña̱ chindeétáʼanna xíʼinyó. Ná ka̱ʼa̱nyó xa̱ʼa̱ iin ejemplo. Ndakanixi̱ní ña̱ ni̱xa̱ún iin ñuu ña̱ ni iin yichi̱ ta̱ʼán ku̱ʼún, soo kǒo ku̱a̱ʼa̱n mitúʼún chi iin na̱ migoún ku̱a̱ʼa̱n xíʼún ta na̱kán xíni̱nívana ñuu kán. Xíni̱na nu̱ú ni̱xa̱a̱ndó ta saátu xínina iin tá iin calle ña̱ íyo kán. Va̱ʼaní kúniún ña̱ ku̱a̱ʼa̱n na̱yóʼo xíʼún chi saá kǒo ndañúʼún. Ki̱ʼva saá íyo Jehová chi xíni̱ra ndáa tiempo kúú ña̱ ndóoyó vitin ta ndáaña kúú ña̱ kúma̱níka kuu chí nu̱únínu. Ña̱kán, ña̱ va̱ʼa kunda̱a̱-iniyó xíʼin profecía ña̱ va̱xi nu̱ú Biblia xíniñúʼu vitá koo iniyó ta ka̱ʼa̱nyó xíʼin Jehová ña̱ chindeétáʼanra xíʼinyó (Dan. 2:28; 2 Ped. 1:​19, 20). Na̱ íyo se̱ʼe kúni̱na ña̱ si̱íní ná koo se̱ʼena tá xa̱a̱ ná kuchéena, ta ki̱ʼva saá íyo Jehová chi kúni̱ra ña̱ si̱íní kooyó chí nu̱únínu (Jer. 29:11). Soo síínva íyo Jehová nu̱ú na̱ íyo se̱ʼe, chi ta̱kán kiviva kunda̱a̱-inira ndáaña kuu chí nu̱únínu. Ta ta̱xira ka̱ʼyi̱ sava profecía nu̱ú tu̱ʼunra saáchi kúni̱ra ná kunda̱a̱-iniyó ndáaña ndáyáʼviní kuu chí nu̱únínu (Is. 46:10). w23.08 8 párr. 3, 4