Octubre

¿Á íxayo̱ʼvi̱ña xíʼún kuniso̱ʼún ña̱ káʼa̱nna xíʼún? Sava yichi̱ i̱xayo̱ʼvi̱ña xíʼin ta̱ David kandíxara. Ña̱kán ni̱ka̱ʼa̱nra xíʼin Ndióxi̱: “Taxi ña̱ ná kunii̱ kandíxai̱ yóʼó” (Sal. 51:12). Ni xi̱kuʼvi̱ní-ini ta̱ David xi̱xinira Ndióxi̱, soo sava yichi̱ i̱xayo̱ʼvi̱níña xíʼinra kuniso̱ʼora ña̱ xi̱ka̱ʼa̱nra xíʼinra, ta ki̱ʼva saá ndóʼo miíyó. ¿Nda̱chun? Ña̱ nu̱ú, saáchi kúúyó na̱ yiví ku̱a̱chi xa̱ʼa̱ ña̱kán íxayo̱ʼvi̱ña xíʼinyó kandíxayó. Ña̱ u̱vi̱, ta̱ Ndi̱va̱ʼa kúni̱ra ña̱ ndiʼi tiempo ná ixaso̱ʼoyó táki̱ʼva kéʼé miíra (2 Cor. 11:3). Ña̱ u̱ni̱, na̱ yiví na̱ íyo tiempo vitin va̱ása xíínna kuniso̱ʼona ña̱ káʼa̱n inkana xíʼinna ta “nda̱a̱ táki̱ʼva íyo ta̱chí saá íyoña chi iníí ndíka̱a̱ña ta chíka̱a̱ña-inina ña̱ va̱ása kandíxana ña̱ káʼa̱n Ndióxi̱” (Efes. 2:2). Ña̱kán, ña̱ va̱ʼa kandíxayó ña̱ káʼa̱n Jehová xíʼin ña̱ káʼa̱n na̱ nda̱kaxinra kuniʼi yichi̱ nu̱úyó ti̱xin congregación, kǒo xíniñúʼu keʼéyó ña̱ kúni̱ ta̱ Ndi̱va̱ʼa ni na̱ yiví na̱ kéʼé ña̱ kini. w23.10 6 párr. 1

¿Ndáaña sákuaʼayó xíʼin milagro ña̱ ke̱ʼé ta̱ Jesús? Ña̱yóʼo sánáʼa̱ña miíyó ña̱ vitání xíniñúʼu koo iniyó. Ta̱ Jesús va̱ása níka̱ʼa̱nra ña̱ miíra kúú ta̱ ke̱ʼé vino ta nda̱a̱ ni iin yichi̱ va̱ása ni̱nu níxi̱kunira xa̱ʼa̱ ña̱ʼa ña̱ xi̱keʼéra. Vitání ni̱xi̱yo inira ta ndiʼi tiempo xi̱ndasakáʼnura yivára Jehová (Juan 5:​19, 30; 8:28). Tá ná kundiku̱nyó yichi̱ ta̱ Jesús saá kúú ña̱ vitá koo iniyó ta va̱ása ni̱nu kuniyó. Vitá ná koo iniyó ta ta̱kán ná ndukáʼnu xíʼinña (Jer. 9:​23, 24). Va̱ʼaka ná ndasakáʼnuyó Jehová chi ta̱yóʼo kúú ta̱ táxi ndee̱ ndaʼa̱yó ña̱ va̱ʼa keʼéyó ndiʼi chiñu yóʼo (1 Cor. 1:​26-31). Iin na̱ vitá-ini, va̱ása ndátuvína ka̱ʼa̱n va̱ʼana xa̱ʼa̱na xa̱ʼa̱ ña̱ chíndeétáʼanna xíʼin inkana. Chi na̱yóʼo kúsi̱íní-inina chi kúnda̱a̱-inina ña̱ mií Jehová xítora ta chíndayáʼviníra chiñu ña̱ kéʼéna (kivitu nandukún Mateo 6:​2-4 xíʼin Hebreos 13:16). Jehová kúsi̱íní-inira tá xítora ña̱ chíkaa̱níyó ndee̱ ña̱ vitá koo iniyó nda̱a̱ táki̱ʼva ni̱xi̱yo ta̱ Jesús (1 Ped. 5:6). w23.04 5 párr. 11, 12

Ndióxi̱ xi̱niñúʼura ta̱ apóstol Pablo ña̱ va̱ʼa ka̱ʼa̱nra xíʼin na̱ hermano ña̱ ná kundi̱ʼi̱-inina xa̱ʼa̱ inkana. ¿Ndáa ki̱ʼva kundiku̱nyó consejo yóʼo ti̱xin reunión? Ná ndakaʼányó chi íyo inkaka na̱ hermano na̱ kúni̱ taxi comentario. Ná ka̱ʼa̱nyó xa̱ʼa̱ iin ejemplo ña̱ kivi chindeétáʼan xíʼinyó kunda̱a̱-iniyó xa̱ʼa̱ ña̱yóʼo. Tá nátúʼún xíʼin na̱ migoún, su̱ví iinlá miíún kúú na̱ káʼa̱n chi saátu táxiún ña̱ ka̱ʼa̱n na̱yóʼova. Saáchi ña̱ kúni̱ún kúú ña̱ ndiʼina ná kusi̱í-ini tá nátúʼun xíʼin táʼanndó. Ta ki̱ʼva saá ndóʼoyó ti̱xin reunión. Kúni̱yó ña̱ ndiʼi na̱ hermano ná taxina comentario. Tá táxiyó ña̱ ná taxi na̱ hermanoyó comentario, saá kúú ña̱ chíkaa̱yó ndee̱ xíʼinna (1 Cor. 10:24). Tá ná taxiyó comentario, loʼo ná koo ña̱ ka̱ʼa̱nyó. Chi saá kindo̱o tiempo ña̱ taxi inka na̱ hermano comentario. Válí ná koo comentario ña̱ taxiyó ta ná kǒo ka̱ʼa̱nyó xa̱ʼa̱ ku̱a̱ʼání ña̱ʼa. w23.04 22, 23 párr. 11-13

Ná chikaa̱yó ndee̱ ña̱ chindeétáʼanyó xíʼin inkana, tá kúú ña̱ natúʼunyó xíʼin na̱ yiví xa̱ʼa̱ Ndióxi̱. Xa̱a̱ síín síín ñuu na̱ yiví na̱ nátúʼunyó xíʼin xa̱ʼa̱ Ndióxi̱, ta xa̱ʼa̱ ña̱ su̱ví inkáchi íyo ña̱ kándíxana á ña̱ kéʼéna, xíniñúʼu kiʼinníyó kuenta ndáa ki̱ʼva natúʼunyó xíʼinna. ¿Nda̱chun xíniñúʼu chikaa̱yó ndee̱ ña̱ kundiku̱nyó yichi̱ ta̱ apóstol Pablo? Saáchi va̱ʼaní xi̱kunda̱a̱-inira xíʼin ña̱ xi̱ndoʼo na̱ yiví, ta va̱ʼaní xi̱natúʼunra xíʼinna. Ta̱ Jesús ta̱xira ña̱ ná koora “apóstol nu̱ú na̱ ñuu” (Rom. 11:13). Ta ña̱ va̱ʼa saxínu ta̱ Pablo chiñu ña̱ ta̱xi ta̱ Jesús nda̱ʼara, chi̱ka̱a̱ra ndee̱ ña̱ natúʼunra xíʼin na̱ judío, na̱ griego, na̱ ndíchi, na̱ káchíñu ndáʼvi, xíʼin na̱ xi̱kuumií chiñu ña̱ ndáyáʼviní nu̱ú na̱ chíñu xíʼin na̱ xi̱kuu rey. Ta xa̱ʼa̱ ña̱ xi̱kuni̱ra chindeétáʼanra xíʼin na̱ yiví ña̱ sakúaʼana xa̱ʼa̱ Ndióxi̱ ni̱ka̱ʼa̱nra ña̱ nda̱sara miíra nda̱a̱ táki̱ʼva íyo mií na̱ yiví kán (1 Cor. 9:​19-22). Tá xi̱natúʼunra xíʼin na̱ yiví xi̱kiʼinra kuenta ndáa ñuu ke̱ena ta ndáaña xi̱kandíxana. ¿Ndáaña sákuaʼayó xíʼin ña̱yóʼo? Tá nátúʼunyó xíʼin na̱ yiví xa̱ʼa̱ Ndióxi̱, ná chikaa̱yó ndee̱ ña̱ kotoyó ndáaña xíniñúʼuna, ndáaña ndákanixi̱nína xa̱ʼa̱, tasaá chindeétáʼanyó xíʼinna ña̱ sakúaʼana xa̱ʼa̱ Ndióxi̱. w23.07 23 párr. 11, 12

Sava na̱ yiví ndákanixi̱nína tá vitá íyo iniyó saá táxiyó ña̱ xáʼnda inkana chiñu nu̱úyó, soo su̱ví saáví íyoña. Saáchi tá káʼa̱nna iin ña̱ va̱ása va̱ʼa xíʼinyó, to̱ʼó ndákuiinyó yuʼúna tasaá náʼa̱yó ña̱ ndakúní-iniyó. Ta ña̱yóʼo kúú iin ña̱ va̱ʼa ña̱ kúúmií Ndióxi̱ (Gál. 5:​22, 23). Tu̱ʼun griego ña̱ xi̱niñúʼuna ña̱ sa̱ndáya̱ʼana ña̱ tu̱ʼun “vitá koo iniyó” sava yichi̱ xi̱xiniñúʼunaña ña̱ ka̱ʼa̱nna xa̱ʼa̱ iin kuáyi̱ yukú tí xa̱a̱ ku̱máso, ni xa̱a̱ ku̱másorí soo ndakúnívarí. Ta miíyó, ¿ndáa ki̱ʼva na̱ʼa̱yó ña̱ ndakú iniyó ta saátu ña̱ vitá-iniyó? Ña̱ va̱ʼa na̱ʼa̱yó ña̱yóʼo xíniñúʼu chindeétáʼan mií Ndióxi̱ xíʼinyó. Ná ka̱ʼa̱nyó xíʼinra ña̱ chindeétáʼanra xíʼinyó ña̱ na̱ʼa̱yó ña̱ va̱ʼa ña̱ kúúmiíra, tasaá ndiʼiyó kiviva vií ka̱ʼa̱nyó xíʼin na̱ yiví tá ndáka̱tu̱ʼunna miíyó. Tá kúú, sava na̱ testigo xa̱a̱ vitáníva-inina. Tá káʼa̱n sava na̱ yiví ña̱ va̱ása va̱ʼa xa̱ʼa̱ Ndióxi̱ na̱yóʼo viíní ndákuiinna, ta inka na̱ yiví xítona ña̱yóʼo ta káʼa̱n va̱ʼana xa̱ʼa̱na (2 Tim. 2:​24, 25). w23.09 15 párr. 3

Ti̱xin iin visión xi̱ni ta̱ apóstol Juan 24 na̱ anciano na̱ ndásakáʼnu Jehová chí ndiví. Ta xi̱ka̱ʼa̱nna “yóʼó kúú ta̱ xíniñúʼu ndukáʼnu, yóʼó kúú ta̱ xíniñúʼu ixato̱ʼóna, yóʼó kúú ta̱ kúúmií ndiʼi ndee̱” (Apoc. 4:​10, 11). Saátu na̱ ángel kúnda̱a̱-inina nda̱chun xíniñúʼu ixato̱ʼóna Jehová ta ndasakáʼnunara, na̱kán íyona xíʼinra chí ndiví ta xíni̱ va̱ʼanara. Ta xíʼin ndiʼi ña̱ kéʼéra kíʼinna kuenta ña̱ va̱ʼaní-inira, ta xa̱ʼa̱ ña̱yóʼo kúni̱nína ndasakáʼnunara (Job 38:​4-7). Tá kéʼéyó oración nu̱ú Jehová ná ka̱ʼa̱nyó xíʼinra xa̱ʼa̱ ndiʼi ña̱ʼa ña̱ livi ña̱ kúúmiíra ta saátu ná ka̱ʼa̱nyó xíʼinra ndáa xa̱ʼa̱ kúú ña̱ íxato̱ʼóyóra. Tá káʼviyó Biblia, ná chikaa̱yó ndee̱ ña̱ kotoyó ndáaña va̱ʼa ña̱ kúúmií Jehová kúú ña̱ kútóokayó (Job 37:23; Rom. 11:33). Tándi̱ʼi ka̱ʼviyó Biblia, ná natúʼunyó xíʼin Jehová ndáaña ndákanixi̱níyó xa̱ʼa̱ ña̱ va̱ʼa ña̱ kúúmiíra, saátu kivi taxiyó tíxa̱ʼvi ndaʼa̱ra tá xítoyó ndáa ki̱ʼva chíndeétáʼanra xíʼinyó (1 Sam. 2:​1, 2). w23.05 3, 4 párr. 6, 7

Tá ku̱i̱ya̱ 1919, Babilonia ña̱ káʼnu va̱ása níkuchiñukaña sandáʼviña na̱ ñuu Ndióxi̱. Saáchi ku̱i̱ya̱ saá ki̱xáʼa íyo ta̱ “esclavo ta̱ nda̱kúní-ini ta̱ ndíchiní”. Ta va̱ʼaníva ke̱ʼé ta̱ esclavo yóʼo chi chi̱ndeétáʼanra xíʼin na̱ yiví ña̱ kakana nu̱ú “Yichi̱ ña̱ Yi̱i̱” (Mat. 24:​45-47; Is. 35:8). Ta xa̱ʼa̱ ña̱ va̱ʼaní chiñu ke̱ʼé inkana ña̱ nda̱saviína yichi̱ yóʼo, na̱ ki̱xáʼa xíka nu̱úña ku̱a̱ʼání ña̱ʼa sa̱kúaʼana xa̱ʼa̱ Jehová xíʼin xa̱ʼa̱ ña̱ káʼa̱nra keʼéra chí nu̱únínu (Prov. 4:18). Ta saátu ni̱xa̱a̱na na̱samana ki̱ʼva ña̱ ni̱xi̱yona ña̱ va̱ʼa sakúsi̱ína-ini Jehová. Soo Jehová xi̱kunda̱a̱-inira ña̱ va̱ása ndi̱ku̱n kamaví sandákoona ndiʼi ña̱ va̱ása va̱ʼa xi̱keʼéna, chi loʼo tá loʼo chindeétáʼanra xíʼin na̱ ñuura ña̱ xa̱a̱na nasa̱mana. Kusi̱íní-iniyó tá ná kixaa̱ ki̱vi̱ ña̱ xa̱a̱yó sakúsi̱íyó-ini Jehová xíʼin ndiʼi ña̱ kéʼéyó. Ña̱ va̱ʼa kǒo ndiʼi-xa̱ʼa̱ iin yichi̱ xíniñúʼu kundaanaña. Nani tá ku̱i̱ya̱ 1919 va̱ʼaní ndáana “Yichi̱ ña̱ Yi̱i̱” ña̱ va̱ʼa ku̱a̱ʼáka na̱ yiví na̱ kée ti̱xin Babilonia ña̱ káʼnu ná kixáʼana kakana nu̱ú ña̱yóʼo. w23.05 17 párr. 15, 16

Na̱ Cuerpo Gobernante xa̱a̱ viíní sánáʼa̱na na̱ chíndeétáʼan xíʼinna. Na̱ hermano yóʼo ku̱a̱ʼání chiñu kúúmiína ta va̱ʼaní kéʼénaña, ña̱kán xa̱a̱ íyo tu̱ʼvavana ña̱ kundaana ndikachi sa̱na̱ ta̱ Cristo. Tá xa̱a̱ ku̱nu̱mí ndiʼi ña̱ gran tribulación saá kúú ña̱ ku̱ʼu̱n ndiʼi na̱ ungido chí ndiví. Xa̱ʼa̱ ña̱ kuniʼi ta̱ Jesús yichi̱ nu̱ú na̱ ndásakáʼnu Ndióxi̱ kǒo sandákoonara. Tiempo saá, iin tiʼvi na̱ yiví kuni̱na ixandi̱va̱ʼana xíʼin na̱ ñuu Ndióxi̱, Biblia káʼa̱nña xa̱ʼa̱ na̱yóʼo ña̱ nanína Gog de Magog (Ezeq. 38:​18-20). Loʼova tiempo ixandi̱va̱ʼana xíʼinyó, soo kǒo kuchiñuna sandíʼi-xa̱ʼa̱na miíyó. Kǒo kuchiñuna sakúxíkana miíyó nu̱ú Jehová chi miíra sakǎku miíyó. Nu̱ú iin visión xi̱ni ta̱ apóstol Juan ku̱a̱ʼání na̱ yiví, ta ni̱ka̱ʼa̱nra ña̱ na̱yóʼo kúú na̱ ni̱ka̱ku ti̱xin ña̱ gran tribulación. Ña̱kán kúnda̱a̱-iniyó ña̱ ka̱kuva miíyó na̱ ndásakáʼnu Jehová (Apoc. 7:​9, 14). w24.02 5, 6 párr. 13, 14

¿Ndáaña kivi keʼéyó ña̱ va̱ʼa taxi Jehová espíritu santora ndaʼa̱yó? Ná kaʼviyó tu̱ʼunra ta ná kǒo sandákooyó ña̱ kutáʼanyó xíʼin na̱ ñuura. Tá kéʼéyó ña̱yóʼo, saá kúúña xa̱a̱yó kuumiíyó ña̱ va̱ʼa ña̱ kúúmií Ndióxi̱ (Gál. 5:​22, 23). Ña̱ va̱ʼa taxi Jehová espíritu santora ndaʼa̱yó, ndiʼi ña̱ kéʼéyó xíʼin ña̱ ndákanixi̱níyó xíniñúʼu viíní kooña. Tá ndákanixi̱níyó xa̱ʼa̱ ña̱ kini ta kéʼéyóña, saá va̱ása taxika Jehová espíritu santora ndaʼa̱yó (1 Tes. 4:​7, 8). ¿Ndáa inkaka ña̱ xíniñúʼu kiʼinyó kuenta xíʼin? Ta̱ Pablo ni̱ka̱ʼa̱nra ña̱ kǒo kundasíyó kuniyó profecía ña̱ káʼa̱n Ndióxi̱ (1 Tes. 5:20). Ña̱ tu̱ʼun “profecía” kúni̱ kachina, ña̱ keʼé Ndióxi̱ chí nu̱únínu ta espíritu santora xi̱niñúʼura ña̱ va̱ʼa ka̱ʼa̱nra xíʼin na̱ yiví xa̱ʼa̱ ña̱yóʼo. Ta iin ña̱yóʼo kúú ña̱ káʼa̱n ña̱ xa̱a̱ ku̱nu̱míní kixaa̱ ki̱vi̱ káʼnu Jehová. Miíyó va̱ása ndákanixi̱níyó ña̱ kúma̱ní ku̱a̱ʼáníka tiempo saá kixaa̱ ki̱vi̱ Jehová, ta ni kǒo ndákanixi̱níyó ña̱ ya̱chi̱ka kuviyó tasaá kǒo kuniyó kixaa̱ ña̱ Armagedón. Chi kúnda̱a̱va-iniyó ña̱ si̱lóʼoní kúma̱ní tasaá kixaa̱ña. Ña̱kán kíʼinníyó kuenta xíʼin ndiʼi ña̱ kéʼéyó, ta kéʼéyó ña̱ kútóo Jehová (2 Ped. 3:​11, 12). w23.06 12 párr. 13, 14

¿Ndáaña xíniñúʼu keʼéyó tá nu̱ú tabletayó á celularyó kána na̱ʼná na̱ yiví chálá? Ndi̱ku̱n kama ná sayáʼayóña ta kǒo kotoyóña. Iin ña̱ chindeétáʼan xíʼinyó ña̱ va̱ása kotoyó ña̱yóʼo kúú, ña̱ ndakaʼányó ña̱ ndáyáʼviníka ña̱ vií kutáʼanyó xíʼin Jehová. Soo, sava na̱ʼná su̱ví na̱ yiví cháláví va̱xi nu̱úña, nisaá xíniñúʼu kiʼinníyó kuenta chi kivi saxínuña-iniyó ta keʼéyó ña̱ kini, ¿nda̱chun kǒo xíniñúʼu kotoyó ña̱yóʼo? Saáchi kǒo kúni̱yó ndakanixi̱níyó xa̱ʼa̱ ña̱ kini, ña̱ kuni̱yó ku̱su̱nyó xíʼin na̱ kǒo nítindaʼa̱ xíʼinyó (Mat. 5:​28, 29). Iin ta̱ anciano ta̱ ñuu Tailandia ta̱ naní David káchira: “Ndiʼi tiempo ndákanixi̱níi̱ ña̱yóʼo: ‘Ni su̱ví na̱ yiví chálá va̱xi nu̱ú na̱ʼná yóʼo, soo ¿á kutóo Jehová ña̱ kotoi̱ña?’. Ña̱yóʼo kúú ña̱ chíndeétáʼan xíʼi̱n ña̱ vií koo ña̱ keʼíi̱”. Tá chíkaa̱yó ndee̱ ña̱ ixato̱ʼóyó Jehová saá kúú ña̱ viíní koo ña̱ ndaka̱xinyó keʼéyó, xa̱ʼa̱ ña̱kán Proverbios 9:10 káchiña: “Ña̱ yíʼviyó xíniyó Jehová kúú ña̱ chindeétáʼan xíʼinyó ña̱ ni̱ʼíyó ña̱ ndíchi”. w23.06 23 párr. 12, 13

Ña̱ tu̱ʼun “cuarto ña̱ ñúʼu chí ma̱á” sana ndánaʼa̱ña congregación ña̱ kúúmiíyó tiempo vitin. Tá va̱ʼaní kítáʼanyó, Jehová kundaavara miíyó tá xa̱a̱ ná koo ña̱ gran tribulación saáchi miíra ni̱ka̱ʼa̱n ña̱ keʼéra ña̱yóʼo. Ña̱kán, tá kéʼé na̱ hermano ña̱ va̱ása va̱ʼa xíʼinyó, ná ixakáʼnu-iniyó xa̱ʼa̱na ta ná na̱ʼa̱yó ña̱ ndixa kúʼvi̱-iniyó xíniyóna, saáchi tá kǒo vií kítáʼanyó á kǒo kúʼvi̱-iniyó xíni táʼanyó ndiʼi-xa̱ʼa̱vayó. Tá ná kixaa̱ “ki̱vi̱ káʼnu Jehová” ndiʼi na̱ yiví kundi̱ʼiní-inina (Sof 1:​14, 15). Miíyó na̱ ndásakáʼnu Jehová ya̱ʼayó nu̱ú sava tu̱ndóʼo. Soo tá vitin xa̱a̱ ki̱xáʼayó íxatu̱ʼvayó miíyó ña̱yóʼo chindeétáʼanña xíʼinyó tá ná kixaa̱ ki̱vi̱ kán, ña̱ kǒo ndi̱ʼi-iniyó ta kivi chindeétáʼanyó xíʼin inkana. Ni nda̱a̱ ndáaka tu̱ndóʼo ná kixi nu̱úyó kuchiñuvayó ya̱ʼayó nu̱úña tá kúndeé-iniyó. Saátu tá kúndáʼvi-iniyó xíniyó na̱ hermano taxiyó ña̱ xíniñúʼuna ta chindeétáʼanyó xíʼinna. Ta xa̱ʼa̱ ña̱ kúʼvi̱-iniyó xíniyóna viíní kitáʼanyó xíʼinna. Jehová taxira ña̱ kutakuyó ndiʼi saá tiempo ta ni kǒo ndakaʼánkayó xa̱ʼa̱ ndiʼi tu̱ndóʼo ña̱ yáʼayó tiempo vitin (Is. 65:17). w23.07 7 párr. 16, 17

Ku̱a̱’á yichi̱ káʼa̱n Biblia xa̱ʼa̱ na̱ xi̱ndasakáʼnu Ndióxi̱ tiempo xi̱naʼá ña̱ ndakúní ni̱xi̱yo inina. Soo sava yichi̱ xi̱ndakavaní-inina. Tá kúú, ta̱ rey David ndakúní ni̱xi̱yo inira, ta nda̱kanixi̱níra ña̱ ni̱xi̱yora táki̱ʼva íyo iin xi̱kí káʼnu, soo sava yichi̱ xi̱ndakavaní-inira ta xi̱yiʼvíra (Sal. 30:7). Soo saátu ta̱ Sansón ndakúní ni̱xi̱yora, saáchi xi̱ndakunira ña̱ mií Jehová xi̱taxi ndee̱ ndaʼa̱ra, chi tá su̱ví saá níxi̱yoña vitání koora nda̱a̱ táki̱ʼva íyo ndiʼi na̱ yiví (Juec. 14:​5, 6; 16:17). Soo, ¿ndáana xi̱chindeétáʼan xíʼinna ña̱ ndakú koo inina? Jehová. Saátu ta̱ apóstol Pablo ni̱ka̱ʼa̱nra ña̱ xi̱niñúʼura ndee̱ ña̱ táxi Jehová (2 Cor. 12:​9, 10). Ta̱ Pablo ku̱a̱ʼání yichi̱ xi̱kiʼinra kue̱ʼe̱ (Gál. 4:​13, 14). Saátu xi̱chika̱a̱níra ndee̱ ña̱ kǒo keʼéra ña̱ va̱ása va̱ʼa (Rom. 7:​18, 19). Ta sava yichi̱ xi̱ndi̱ʼi̱ní-inira ta xi̱yiʼvíra ña̱ kuvira (2 Cor. 1:​8, 9). Ni saá ni̱ka̱ʼa̱nra ña̱yóʼo: “Saáchi tá vitá kúnii̱ saá kúú ña̱ ndúndakúkai̱”. ¿Nda̱chun ni̱ka̱ʼa̱nra ña̱yóʼo? Saáchi mií Jehová kúú ta̱ xi̱taxi ndee̱ ndaʼa̱ra, xa̱ʼa̱ ña̱kán ndu̱ndakú-inira. w23.10 12 párr. 1, 2

Sava yichi̱ ndákanixi̱níyó ña̱ kǒo ndáyáʼviyó, soo ná ndakaʼányó chi mií Jehová kúú ta̱ ka̱na miíyó ña̱ kuñuʼuyó xíʼin na̱ ñuura (Juan 6:44). Xítova Jehová ña̱ va̱ʼa ña̱ kúúmiíyó ni sava yichi̱ miíyó kǒo kíʼinyó kuenta xíʼin ña̱yóʼo, ta xíni̱ra ndáa ki̱ʼva íyoyó (2 Crón. 6:30). Ña̱kán, tá káʼa̱n Jehová ña̱ ndáyáʼviníyó ná kandíxayó ña̱ káʼa̱nra (1 Juan 3:​19, 20). Savayó ndákavaní-iniyó tá ndákaʼányó xa̱ʼa̱ ña̱ va̱ása va̱ʼa ke̱ʼéyó tá ya̱chi̱ tá kúma̱níka sakúaʼayó xa̱ʼa̱ Jehová (1 Ped. 4:3). Inkana xa̱a̱ ku̱a̱ʼání ku̱i̱ya̱ ndásakáʼnuna Jehová ta nda̱kúní íyo inina xíʼinra, soo chíkaa̱na ndee̱ ña̱ kǒo keʼéna ña̱ kini. Ta yóʼótu, ¿á xóʼvi̱ún tá ndákaʼún xa̱ʼa̱ ku̱a̱chi ña̱ ni̱ki̱ʼviún tá ya̱chi̱? Tá saá ndóʼún, kǒo kundi̱ʼi̱-iniún chi saátu xi̱ndoʼo sava na̱ xi̱ndasakáʼnu Ndióxi̱ tiempo xi̱naʼá. Tá kúú, ta̱ apóstol Pablo xi̱ndakavaní-inira tá xi̱ndakanixi̱níra xa̱ʼa̱ ña̱ va̱ása va̱ʼa ke̱ʼéra (Rom. 7:24). Ni ndi̱kóva-inira xa̱ʼa̱ ku̱a̱chira ta nda̱kuchira xi̱ndakanixi̱níra ña̱ xi̱kuura “ta̱ loʼoka ndáyáʼvi nu̱ú ndiʼika na̱ apóstol” ta saátu ni̱ka̱ʼa̱nra ña̱ miíra kúú ta̱ kúúmiíníka ku̱a̱chi nu̱ú inkana (1 Cor. 15:9; 1 Tim. 1:15). w24.03 27 párr. 5, 6

Íyo iin ña̱ ndáyáʼviní sákuaʼayó xíʼin ña̱ va̱ása va̱ʼa ke̱ʼé ta̱ rey Jehoás: ná ndaka̱xinyó na̱ ndásakáʼnu Jehová ña̱ koona migoyó, saáchi na̱yóʼo kúú na̱ sákusi̱í-ini Jehová ta na̱yóʼo kúú na̱ kivi chindeétáʼan xíʼinyó. Ni nda̱a̱ ndáaka ku̱i̱ya̱ kúúmií na̱ hermano, kivi koona migoyó. Ta̱ Jehoás iin ta̱ loʼo xi̱kuura, soo va̱ʼaní xi̱kitáʼanra xíʼin ta̱ Jehoiadá. Ndakaʼán ndáana kúú na̱ migoún ta ndakanixi̱ní xa̱ʼa̱ ña̱yóʼo: “¿Á chíndeétáʼanna xíʼi̱n ña̱ kandíxakai̱ Jehová? ¿Á chíkaa̱na ndee̱ xíʼi̱n ña̱ kuniso̱ʼokai̱ ña̱ káʼa̱n Jehová? ¿Á kútóona ka̱ʼa̱nna xa̱ʼa̱ Jehová xíʼin xa̱ʼa̱ ña̱ sákuaʼana nu̱ú Biblia? ¿Á íxato̱ʼóna ndiʼi ña̱ káʼa̱n Jehová? ¿Á táxina consejo ndaʼíi̱ tá kéʼíi̱ ña̱ va̱ása va̱ʼa? ¿Á nda̱saa ña̱ kútói̱ kuniso̱ʼi̱ káʼa̱nna xíʼi̱n?” (Prov. 27:​5, 6, 17). Tá na̱ migoún va̱ása kúʼvi̱-inina xínina Jehová, kǒo xíniñúʼu kutáʼankaún xíʼinna. Soo tá kúʼvi̱-inina xíninara kǒo sandákoún ña̱ kutáʼún xíʼinna (Prov. 13:20). w23.09 10 párr. 7

Ña̱ tu̱ʼun Alfa kúú letra ña̱ nu̱ú ña̱ xi̱xiniñúʼu na̱ griego, ta ña̱ omega kúú letra ña̱ so̱ndíʼi. Ña̱kán tá káʼa̱n Jehová ña̱ kúúra “Alfa xíʼin Omega”, kúni̱ kachira ña̱ tá kíxáʼara kéʼéra iin ña̱ʼa sándiʼivaraña. Tándi̱ʼi i̱xava̱ʼa Jehová ta̱ Adán xíʼin ñá Eva, ni̱ka̱ʼa̱nra xíʼinna: “Ná koo ku̱a̱ʼání se̱ʼendó, ku̱a̱ʼání ná xa̱a̱ndó koondó, ná kutú se̱ʼendó nu̱ú ñuʼú ta kuisochíñundó xíʼinña” (Gén. 1:28). Yóʼo ni̱ka̱ʼa̱n Jehová ndáaña xi̱kuni̱ra keʼéra ta nda̱a̱ táki̱ʼva íyo ña̱ ni̱ka̱ʼa̱nra tu̱ʼun “Alfa” saá ni̱xi̱yoña. Tá ná ya̱ʼa tiempo, na̱ se̱ʼe ta̱ Adán xíʼin ñá Eva na̱ kǒo ku̱a̱chi kúúmií, kaku se̱ʼena ta ku̱a̱ʼání koona ta ñuʼú yóʼo nduuña iin paraíso. Tá ná kuu ña̱kán, Jehová ka̱ʼa̱nra ña̱ tu̱ʼun “Omega”. Tándi̱ʼi i̱xava̱ʼa Jehová ñuʼú, ndiví xí’in ndi’i ña̱ʼa ña̱ íyo nu̱úña, ke̱ʼéra inka ña̱ʼa ña̱ va̱ʼa saxínura ña̱ ni̱ka̱ʼa̱nra. ¿Ndáaña ke̱ʼéra? Ña̱ nda̱kaxin Jehová ki̱vi̱ u̱xa̱ ña̱ va̱ʼa xi̱nu ña̱ kúni̱ra keʼéra nu̱ú ñuʼú yóʼo. Tá ná ndiʼi ki̱vi̱ u̱xa̱ yóʼo xi̱nuva ndiʼi ña̱ kúni̱ra (Gén. 2:​1-3). w23.11 5 párr. 13, 14

Yo̱ʼvi̱ní kooña nu̱ú na̱ judío saáchi ki̱ʼva ku̱mí yo̱o̱ xi̱niñúʼu kakana ña̱ va̱ʼa ndikóna ñuuna. Soo Jehová ni̱ka̱ʼa̱nra ña̱ chindeétáʼanra xíʼinna ta sakútaʼara nda̱a̱ ndáaka ña̱ʼa ña̱ kivi kasi nu̱úna yichi̱ nu̱ú ku̱ʼu̱nna. Na̱ judío na̱ nda̱kúní-ini xi̱kunda̱a̱-inina ña̱ ndikóna chí ñuu Israel, va̱ʼaní chindeétáʼanña xíʼinna ni xi̱niñúʼu sandákoona ña̱ xi̱kuumiína ñuu Babilonia. Ta iin bendición ña̱ káʼnuní ndakiʼinna kúú ña̱ ndikó tukuna ndasakáʼnuna Jehová. Soo kǒo níxi̱yo iin veʼe nu̱ú ndasakáʼnuna Jehová ñuu Babilonia. Ni altar kǒo níxi̱yo ta ni na̱ su̱tu̱ kǒo níxi̱yo ña̱ va̱ʼa taxi na̱ judío ña̱ʼa ndaʼa̱ Jehová nda̱a̱ táki̱ʼva xi̱ka̱ʼa̱n ley ta̱ Moisés. Ta loʼoníva ni̱xi̱yo na̱ xi̱ndasakáʼnu Jehová ta xi̱ ixato̱ʼóna leyra ta ku̱a̱ʼáníka ni̱xi̱yo na̱ xi̱ndasakáʼnu ndióxi̱ vatá. Xa̱ʼa̱ ña̱kán ku̱a̱ʼání na̱ judío na̱ xi̱kuʼvi̱-ini xi̱xini Jehová xi̱kuni̱nína ndikó tukuna chí ñuuna ña̱ va̱ʼa ndasakáʼnuna iinlá miíra. w23.05 14, 15 párr. 3, 4

Tá kúni̱yó kooyó nda̱a̱ táki̱ʼva íyo na̱ ñúʼu nu̱ú luz xíniñúʼu taxiyó ña̱ chindeétáʼan espíritu santo Ndióxi̱ xíʼinyó. ¿Nda̱chun? Saáchi íxayo̱ʼvi̱níña xíʼinyó ña̱ nda̱kú koo iniyó xíʼin Ndióxi̱ tiempo ña̱ ndóoyó vitin (1 Tes. 4:​3-5, 7, 8). Espíritu santo kivi chindeétáʼanña xíʼinyó ña̱ kǒo kandíxayó ña̱ sánáʼa̱ na̱ yiví na̱ kǒo ndásakáʼnu Jehová chi nina ña̱ kǒo kútóora kéʼéna. Saátu kivi chindeétáʼanña xíʼinyó ña̱ va̱ʼa koo iniyó, ña̱ nda̱kú koo iniyó ta saátu ña̱ kandíxayó ña̱ nda̱a̱ (Efes. 5:9). Ta̱ Jesús ni̱ka̱ʼa̱nra ña̱ mií Jehová taxira espíritu santo ndaʼa̱ na̱ ndúkúña nu̱úra (Luc. 11:13). Ña̱kán, kivi keʼéyó oración nu̱ú Jehová ta ka̱ʼa̱nyó xíʼinra ña̱ ná taxira espíritu santo ndaʼa̱yó. Inka ki̱ʼva ña̱ ndakiʼinyó ña̱yóʼo kúú tá xáʼa̱nyó reunión xíʼin na̱ hermanoyó ña̱ ndasakáʼnuyó Jehová (Efes. 5:​19, 20). Ña̱ espíritu santo chindeétáʼanña xíʼinyó ña̱ keʼéyó ña̱ kútóo Jehová ta sakúsi̱íyó-inira. w24.03 23 párr. 14; 24 párr. 15

¿A xíninu’u kúeeka koo iniún? Tá saá íyoña, ka̱ʼa̱n xíʼin Jehová ña̱ chindeétáʼanra xíʼún ña̱ kúeeka koo iniún. Ña̱ kúee koo iniyó kúú ña̱ va̱ʼa ña̱ kúúmií espíritu santo Ndióxi̱ (Gál. 5:​22, 23). Ña̱kán, ná ka̱ʼa̱nyó xíʼin Jehová ña̱ taxira espíritu santora ndaʼa̱yó ña̱ kuumiíyó ña̱ va̱ʼa ña̱ kúúmiíra. Tá ku̱a̱yaʼayó nu̱ú iin tu̱ndóʼo ta xa̱ʼa̱ ña̱yóʼo íxayo̱ʼvi̱ña xíʼinyó ña̱ kúee koo iniyó, ná ka̱ʼa̱nyó xíʼin Jehová ña̱ taxira espíritu santora ndaʼa̱yó (Luc. 11:13). Saátu kivi ka̱ʼa̱nyó xíʼin Jehová ña̱ chindeétáʼanra xíʼinyó ña̱ ndakanixi̱níyó nda̱a̱ táki̱ʼva ndákanixi̱ní miíra. Tándi̱ʼi ni̱ka̱ʼa̱nyó xíʼinra, ná chikaa̱yó ndee̱ ña̱ kúee koo iniyó ndiʼi ki̱vi̱. Tá chíkaa̱níyó ndee̱ ña̱ ka̱ʼa̱nyó xíʼin Jehová ña̱ chindeétáʼanra xíʼinyó ña̱ kúee koo iniyó, saá kúú ña̱ xa̱a̱yó kuumiíyó ña̱yóʼo. Biblia káʼa̱nña xa̱ʼa̱ ku̱a̱ʼání na̱ yiví na̱ kúee ni̱xi̱yo ini. Tá ndákanixi̱níyó xa̱ʼa̱ na̱yóʼo, saá kúú ña̱ sákuaʼayó keʼéyó nda̱a̱ táki̱ʼva xi̱keʼéna. w23.08 22 párr. 10, 11

Ta̱ Jesús ni̱ka̱ʼa̱nra xíʼin ta̱ apóstol Pedro ña̱ mií Jehová kiʼin kuenta xíʼinra. Tá xa̱a̱ nda̱taku ta̱ Jesús chi̱ndeétáʼanra xíʼin ta̱ Pedro xíʼin inka na̱ apóstol ña̱ kotona inka milagro, saáchi tá ni̱xa̱ʼa̱nna ti̱inna ti̱a̱ká ku̱a̱ʼánírí ti̱inna (Juan 21:​4-6). Milagro yóʼo chi̱ndeétáʼanña xíʼin ta̱ Pedro ña̱ ku̱nda̱a̱-inira ña̱ mií Jehová kivi taxi ndiʼi ña̱ xíniñúʼura. Sana nda̱kaʼán ta̱ Pedro xa̱ʼa̱ ña̱ ni̱ka̱ʼa̱n ta̱ Jesús, ña̱ mií Jehová kundaara ta taxira ña̱ xíniñúʼu na̱ nándukú “siʼnaka Reino Ndióxi̱” (Mat. 6:33). Xa̱ʼa̱ ña̱yóʼo, ta̱ Pedro ni̱ndiʼiníka-inira ña̱ natúʼunra xa̱ʼa̱ Reino Ndióxi̱ nu̱úka ña̱ tiinra ti̱a̱ká. Ña̱kán, tá pentecostés ña̱ ku̱i̱ya̱ 33 ni̱ka̱ʼa̱nra iin ña̱ʼa ña̱ chi̱ndeétáʼan xíʼin ku̱a̱ʼání na̱ yiví ña̱ sakúaʼana xa̱ʼa̱ Ndióxi̱ (Hech. 2:​14, 37-41). Tá ni̱ya̱ʼa tiempo chi̱ndeétáʼanra xíʼin ku̱a̱ʼání na̱ samaritano saátu xíʼin na̱ yiví na̱ ke̱e inka ñuu ña̱ koona discípulo ta̱ Cristo (Hech. 8:​14-17; 10:​44-48). Va̱ʼaní xi̱niñúʼu Jehová ta̱ Pedro ña̱ chindeétáʼanra xíʼin ku̱a̱ʼá na̱ yiví ña̱ sakúaʼana xa̱ʼa̱ra. w23.09 23 párr. 11

Tá ni̱ya̱ʼa u̱vi̱ ku̱i̱ya̱ ña̱ sa̱ndíʼi-xa̱ʼa̱ na̱ ñuu Babilonia ñuu Jerusalén, ta̱ Nabucodonosor ni̱xa̱níra ta xi̱nira iin imagen ña̱ káʼnuní. Xa̱ʼa̱ ña̱kán ni̱ndi̱ʼi̱ní-inira ta ni̱ka̱ʼa̱nra xíʼin ndiʼi na̱ ndíchi na̱ ni̱xi̱yo ñuu Babilonia, nda̱a̱ ta̱ Daniel ni̱ka̱ʼa̱nra xíʼin ña̱ ná ka̱ʼa̱nna xíʼinra ndáaña ni̱xa̱níra ta ndáaña kúni̱ kachi ña̱yóʼo, chi tá ná kǒo ka̱ʼa̱nna xíʼinra xa̱ʼa̱ ña̱yóʼo kaʼníra ndiʼina (Dan. 2:​3-5). Ndi̱ku̱n kama ni̱ka̱ʼa̱n ta̱ Daniel xíʼin ta̱ rey ña̱ ná taxira loʼo tiempo ndaʼa̱ra tasaá ka̱ʼa̱nra xíʼinra ndáaña kúni̱ kachi xa̱ni ña̱ ni̱xa̱níra, chi tá ná kǒo keʼéra ña̱yóʼo ku̱a̱ʼánína kuvi (Dan. 2:16). Xi̱niñúʼu kandíxaní ta̱ Daniel ña̱ chindeétáʼan Ndióxi̱ xíʼinra ta saátu ña̱ ndakúní koo inira. ¿Nda̱chun? Saáchi nda̱a̱ ni iin yichi̱ ta̱ʼán keʼéra táʼan ña̱yóʼo, ña̱kán ta̱ Daniel ni̱ka̱ʼa̱nra xíʼin u̱ni̱ ta̱ migora ña̱ ná ka̱ʼa̱nna xa̱ʼa̱ra xíʼin Ndióxi̱ ña̱ ná chindeétáʼanra xíʼinra ña̱ va̱ʼa kunda̱a̱-inira ndáaña kúni̱ kachi ña̱ ni̱xa̱ní ta̱ rey (Dan. 2:18). Xi̱niso̱ʼova Jehová ña̱ ni̱ka̱ʼa̱n na̱yóʼo ta chi̱ndeétáʼanra xíʼin ta̱ Daniel ña̱ va̱ʼa ka̱ʼa̱nra ndáaña ni̱xa̱ní ta̱ rey tasaá ni̱ka̱kuna. w23.08 2 párr. 4

Ná ka̱ʼa̱nyó xa̱ʼa̱ ña̱ va̱ʼa ndákiʼinyó tá kúee íyo iniyó. Tá kúee íyo iniyó saá kúsi̱íní-iniyó ta kǒo ndíʼi̱-iniyó. Ña̱yóʼo chíndeétáʼanña xíʼinyó ña̱ kǒo kiʼin kue̱ʼe̱ miíyó ta saátu ña̱ vií kitáʼanyó xíʼin Ndióxi̱. Saátu chíndeétáʼanña xíʼinyó ña̱ vií kitáʼanyó xíʼin ndiʼina, ta xa̱ʼa̱ ña̱yóʼo kivi viíní kitáʼan ndiʼiyó ti̱xin congregación. Sana káʼa̱nna iin ña̱ va̱ása va̱ʼa xíʼinyó, soo tá kǒo kamaní sáa̱yó ña̱yóʼo chindeétáʼan xíʼinyó ña̱ vií ndakuiinyó yuʼúna (Sal. 37:​8, nota; Prov. 14:29). Soo, iin ña̱ va̱ʼaníka ndákiʼinyó kúú ña̱ va̱ʼaníka kítáʼanyó xíʼin yiváyó Jehová chi saá kéʼéyó nda̱a̱ táki̱ʼva kéʼéra. Nda̱a̱ táki̱ʼva xa̱a̱ sa̱kuaʼayó, ku̱a̱ʼání ña̱ va̱ʼa ndákiʼinyó tá kúee íyo iniyó. Sava yichi̱ íxayo̱ʼvi̱ña xíʼinyó na̱ʼa̱yó ña̱yóʼo, soo mií Jehová chindeétáʼan xíʼinyó ña̱ na̱ʼa̱yóña. Nani ndátuyó ña̱ kixaa̱ ñuyǐví xa̱á, kǒo xíka-iniyó ña̱ mií Jehová xítora ña̱ kéʼé na̱ yiví na̱ nda̱kú íyo ini xíʼinra na̱ ndátu ña̱ kuʼvi̱-inira kunirana (Sal. 33:18). Ña̱kán ndiʼi miíyó xíniñúʼu chika̱a̱yó ndee̱ ña̱ kúee koo iniyó. w23.08 25 párr. 16, 17

Ta̱ Santiago ni̱ka̱ʼa̱nra ña̱ iin na̱ yiví sana káʼa̱nna ña̱ kándíxana Ndióxi̱ soo xíʼin ña̱ kéʼéna náʼa̱na ña̱ kǒo kándíxanara (Sant. 2:​1-5, 9). Saátu, ni̱ka̱ʼa̱nra ña̱ tá iinna xítona ña̱ iin na̱ hermano kúma̱ní ña̱ kuxuna á ti̱ko̱to̱na, soo kǒo chíndeétáʼanna xíʼinna, ni káʼa̱nna ña̱ kándíxana Ndióxi̱ soo xa̱ʼa̱ ña̱ kǒo chíndeétáʼanna xíʼin inkana, kǒo ndáyáʼviví ña̱yóʼo nu̱ú Ndióxi̱ (Sant. 2:​14-16). Ta̱ Santiago ni̱ka̱ʼa̱nra xa̱ʼa̱ ñá Rahab, ña̱ ni̱na̱ʼa̱ñá xíʼin ña̱ ke̱ʼéñá ña̱ xi̱kandíxaníñá Ndióxi̱ (Sant. 2:​25, 26). Ñáyóʼo xi̱niso̱ʼoñá ña̱ va̱ʼaní xi̱chindeétáʼan Jehová xíʼin na̱ ñuu Israel (Jos. 2:​9-11). Soo, ¿ndáaña ke̱ʼéñá tasaá ni̱na̱ʼa̱ñá ña̱ xi̱kandíxaníñá Jehová? Chi̱se̱ʼéñá u̱vi̱ na̱ ta̱a na̱ ñuu Israel na̱ ni̱xa̱ʼa̱n xi̱to se̱ʼe ñuuñá, ña̱ va̱ʼa ná kǒo kaʼnína na̱yóʼo. Nda̱a̱ táki̱ʼva ni̱ka̱ʼa̱n Jehová xa̱ʼa̱ ta̱ Abrahán saátu ni̱ka̱ʼa̱nra xa̱ʼa̱ ñá Rahab ni va̱ása níxi̱kuuñá ñá ñuu Israel. Ña̱ ke̱ʼé ñáyóʼo náʼa̱ñá nu̱úyó ña̱ ndáyáʼviní na̱ʼa̱yó xíʼin ña̱ kéʼéyó ña̱ kándíxayó Ndióxi̱. w23.12 5 párr. 12, 13

Miíyó na̱ ndásakáʼnu Jehová, chíkaa̱yó ndee̱ ña̱ sakúaʼakayó xa̱ʼa̱ ña̱ va̱xi nu̱ú Biblia. Ta espíritu santo kúú ña̱ chíndeétáʼan xíʼinyó ña̱ va̱ʼa kunda̱a̱-iniyó xa̱ʼa̱ ña̱ ndíchi ña̱ sánáʼa̱ Ndióxi̱ miíyó (1 Cor. 2:​9, 10). Iin ña̱ kivi chindeétáʼan xíʼinyó ña̱ va̱ʼaka kutáʼanyó xíʼin Jehová kúú, ña̱ keʼéyó iin programa ta kundiku̱nyóña. Íyo ku̱a̱ʼání ña̱ kivi kaʼviyó xa̱ʼa̱, tá kúú kivi kaʼviyó xa̱ʼa̱ ndáa ki̱ʼva ni̱na̱ʼa̱ Jehová ña̱ xi̱kuʼvi̱-inira xi̱nira na̱ xi̱ndasakáʼnu miíra tiempo xi̱naʼá ta ndáa ki̱ʼva kúʼvi̱ní-inira xínira miíyó tiempo vitin. Kivi kaʼviyó xa̱ʼa̱ ndáaña xi̱niñúʼu Jehová tasaá va̱ʼa nda̱sakáʼnu na̱ ñuu Israel miíra táki̱ʼva xi̱kuni̱ra, ta kotoyó ndáa ki̱ʼva kítáʼan ña̱yóʼo xíʼin ki̱ʼva ña̱ ndásakáʼnuyóra tiempo vitin. Saátu kivi kaʼviyó xa̱ʼa̱ profecía ña̱ sa̱xínu ta̱ Jesús tá ki̱xira nu̱ú ñuʼú yóʼo. Ta ña̱ va̱ʼa kunda̱a̱-iniún xíʼin ña̱yóʼo kivi kuniñúʼún Índice de las publicaciones Watch Tower xíʼin ña̱ Guía de estudio para los testigos de Jehová. Ña̱yóʼo chindeétáʼan xíʼún ña̱ kunda̱a̱ka-iniún xa̱ʼa̱ Ndióxi̱ ta kandíxakaúnra (Prov. 2:​4, 5). w23.10 19 párr. 4, 5

Tá ni̱ka̱ʼa̱n ta̱ Pedro ña̱ xíniñúʼu kuʼvi̱ní-iniyó kunitáʼanyó, ña̱yóʼo kúni̱ kachiña ña̱ xíʼin ndiʼi níma̱yó ná keʼéyóña. Saáchi tá kéʼé na̱ hermano ña̱ va̱ása va̱ʼa xíʼinyó, ná ixakáʼnu-iniyó xa̱ʼa̱na. Ña̱ va̱ʼa kunda̱a̱-iniyó xíʼin ña̱yóʼo: ná ndakanixi̱níyó ña̱ kúúmiíyó iin mesa, ta íyoní mancha nu̱únú á kininí káa nu̱únú ta ña̱ va̱ʼa kunaʼa̱ nu̱únú ndákasiyó iin tela káʼnu nu̱únú, tasaá kǒo kunaʼa̱ mancha ña̱ kúúmiínú. Ta ki̱ʼva saá xíniñúʼu keʼéyó xíʼin na̱ hermanoyó, tá ndixaní kúʼvi̱-iniyó xínitáʼanyó ni nda̱a̱ ndáaka ña̱ ná keʼéna xíʼinyó ixakáʼnuva-iniyó xa̱ʼa̱na. Tá ndixaní kúʼvi̱-iniyó xíniyó na̱ hermano, ña̱yóʼo chindeétáʼan xíʼinyó ña̱ ixakáʼnu-iniyó xa̱ʼa̱na ni sava yichi̱ ixayo̱ʼvi̱níña xíʼinyó (Col. 3:13). Ta tá íxakáʼnu-iniyó xa̱ʼa̱na, saá kúú ña̱ náʼa̱yó ña̱ kúʼvi̱-iniyó xíniyóna ta kúni̱yó sakúsi̱íyó-ini Jehová. w23.11 11 párr. 14; 12 párr. 15

Tá xi̱kuumií ta̱ rey Josías 26 ku̱i̱ya̱ ki̱xáʼara ndásaviíra templo, tá xa̱a̱ ndásaviína ña̱yóʼo nda̱ni̱ʼína iin libro nu̱ú va̱xi ley Jehová ña̱ ka̱ʼyí ta̱ Moisés. Tá xi̱niso̱ʼo ta̱ Josías ña̱ xi̱ka̱ʼa̱n ley yóʼo ndi̱ku̱n kama ki̱xáʼara kéʼéra ña̱ káʼa̱nña (2 Crón. 34:​14, 19-21). ¿Á kúni̱ún kaʼviún Biblia ndiʼi ki̱vi̱? Tá xa̱a̱ kéʼúnña, ¿á kúsi̱í-iniún tá káʼviúnña? ¿Ndáaña kéʼún ña̱ va̱ʼa kǒo nandóso-iniún xa̱ʼa̱ versículo ña̱ káʼviún? Tá xi̱kuumií ta̱ Josías 39 ku̱i̱ya̱ kǒo níndaka̱xin viíra ña̱ keʼéra xa̱ʼa̱ ña̱kán ni̱xi̱ʼi̱ra. Nu̱úka ña̱ ndaka̱tu̱ʼúnra Jehová ndáaña xi̱niñúʼu keʼéra, ke̱ʼéra ña̱ kúni̱ miívara (2 Crón. 35:​20-25). ¿Ndáaña kivi sakúaʼayó xíʼin ña̱yóʼo? Ni nda̱a̱ ndáaka ku̱i̱ya̱ kúúmiíyó, á ni xa̱a̱ ku̱a̱ʼání tiempo ndásakáʼnuyó Jehová, ndiʼiyó xíniñúʼu ka̱ʼa̱nyó xíʼin Jehová ña̱ chindeétáʼanra xíʼinyó. Ta ña̱ va̱ʼa keʼéyó ña̱yóʼo, ndiʼi ki̱vi̱ ná ndakanixi̱níyó ndáaña kúni̱ Jehová ná keʼéyó, ná kaʼviyó Biblia, ta ná kuniso̱ʼoyó consejo ña̱ táxi na̱ hermano na̱ va̱ʼaní chínuu yichi̱ nu̱úyó ti̱xin congregación. Tá saá ná keʼéyó, saá kúú ña̱ ndaka̱xin viíyó ña̱ keʼéyó ta kusi̱íní-iniyó (Sant. 1:25). w23.09 12 párr. 15, 16

Biblia káʼa̱nña xa̱ʼa̱ ku̱a̱ʼání ná ñaʼá ná xi̱ndasakáʼnu Jehová ta xi̱kuʼvi̱ní-ininá xi̱xininára. “Ndiʼi ña̱ xi̱keʼéná xi̱kiʼinníná kuenta xíʼinña. Ta xíʼin ndiʼi ña̱ xi̱keʼéná xi̱naʼa̱ná ña̱ nda̱kúní ni̱xi̱yo ininá xíʼin Ndióxi̱” (1 Tim. 3:11). Sana ti̱xin congregación nu̱ú ku̱a̱ʼún íyo ku̱a̱ʼá ná hermana ná xa̱a̱ ku̱a̱ʼá tiempo ñúʼu ti̱xin ñuu Ndióxi̱ ta kivi kundiku̱n yichi̱ náyóʼo. Tá iin ñá loʼo kúún, ndakanixi̱ní xa̱ʼa̱ sava ná hermana ná va̱ʼaní káchíñu nu̱ú Ndióxi̱ ta chikaa̱ ndee̱ ña̱ kundiku̱n yichi̱ná. Xa̱ʼa̱ ña̱kán, xíniñúʼu kiʼún kuenta xíʼin ña̱ va̱ʼa ña̱ kéʼéná, ta tándi̱ʼi kivi ndakanixi̱níún ndáa ki̱ʼva kivi keʼún ña̱yóʼo. Ná ñaʼá ná vitá-ini va̱ʼaní kítáʼanná xíʼin Jehová ta saátu va̱ʼaní kítáʼanná xíʼin inkana. Xa̱ʼa̱ ña̱ vitá-ininá kúʼvi̱-ininá xíniná Jehová ta íxato̱ʼóná na̱ nda̱kaxinra kuniʼi yichi̱ nu̱úná. Chi Jehová kúú ta̱ ni̱ka̱ʼa̱n ndáana kuniʼi yichi̱ ti̱xin congregación ta saátu ti̱xin veʼena (1 Cor. 11:3). w23.12 18, 19 párr. 3-5

Jehová káʼa̱nra xíʼin ta̱ ti̱ndaʼa̱ ña̱ ná kuʼvi̱-inira kunira ñá síʼira, ña̱ kundaarañá ta saátu kundi̱ʼi̱-inira xa̱ʼa̱ñá ña̱ sakúaʼakañá xa̱ʼa̱ Ndióxi̱, ta taxira ña̱ xíniñúʼuñá. Tá chíka̱ún ndee̱ ña̱ kundaa-ini inkana yóʼó, ta viíní ndákanixi̱níún, ta íxato̱ʼún ná ñaʼá, saá kúú ña̱ koo tu̱ʼvaún ña̱ tindaʼún ta viíní kuniʼún yichi̱ nu̱ú na̱ veʼún. Tá ná tindaʼún sana kivi koo se̱ʼún. Xa̱ʼa̱ ña̱kán, ejemplo Jehová va̱ʼaní chindeétáʼanña xíʼún ña̱ viíní kundaún se̱ʼún (Efes. 6:4). Jehová ni̱ka̱ʼa̱nra xíʼin ta̱ Jesús ña̱ kúʼvi̱ní-inira xínirara ta saátu ña̱ ku̱si̱í-inira xíʼin chiñu ña̱ ke̱ʼéra (Mat. 3:17). Tá xa̱a̱ ná koo se̱ʼún, ka̱ʼa̱n xíʼinna ña̱ kúʼvi̱-iniún xíniúnna ta kúsi̱íní-iniún xíʼin chiñu ña̱ kéʼéna. Na̱ íyo se̱ʼe, na̱ ndíku̱n yichi̱ Jehová chíndeétáʼanna xíʼin se̱ʼena ña̱ va̱ʼaní kutáʼanna xíʼinra. Soo, ¿ndáaña xíniñúʼu kixáʼún keʼún vitin tasaá viíní kundaún na̱ va̱lí se̱ʼún? Xíniñúʼu kuʼvi̱-iniún kuniún na̱ veʼún, xíʼin na̱ hermano, ta saátu xíniñúʼu sakúaʼún ka̱ʼún xíʼinna ña̱ kúʼvi̱-iniún xíniúnna ta ndáyáʼvinína nu̱ún (Juan 15:9). w23.12 28, 29 párr. 17, 18

Ni ndásakáʼnuyó Jehová soo ndóʼoyó nda̱a̱ táki̱ʼva ndóʼo ndiʼi na̱ yiví chi kíʼin kue̱ʼe̱ miíyó ta yá’ayó nu̱ú ku̱a̱ʼání tu̱ndóʼo. Xa̱ʼa̱ ña̱ ndásakáʼnuyó Jehová íyo sava na̱ sáa̱-ini xíni miíyó ta íxandi̱va̱ʼana xíʼinyó, soo kǒo sándakoo ndaʼa̱ví Jehová miíyó tá yáʼayó nu̱ú tu̱ndóʼo chi káʼa̱nra chindeétáʼanra xíʼinyó (Is. 41:10). Xa̱ʼa̱ ña̱kán ná kusi̱í-iniyó chi mií Jehová chíndeétáʼan xíʼinyó ña̱ ndaka̱xin viíyó ña̱ keʼéyó. Nda̱kú ná koo iniyó xíʼinra chi taxivara ndee̱ ndaʼa̱yó ña̱ ya̱ʼayó nu̱ú tu̱ndóʼo. Nu̱ú Biblia káʼa̱nña ña̱ kivi sandíko Jehová iniyó (Filip. 4:​6, 7). Tá viíní kítáʼanyó xíʼin Jehová saá kúú ña̱ va̱ʼaní sandíkora-iniyó ta nda̱a̱ ni iin na̱ yiví kǒo kívi kúnda̱a̱-ini ndáa ki̱ʼva kéʼéraña. ¿Á xa̱a̱ xákundáʼviún nu̱ú Jehová ña̱ chindeétáʼanra xíʼún ta tándi̱ʼi kíʼún kuenta ña̱ va̱ʼaní sándi̱kora-iniún? Tá xa̱a̱ ndóʼún ña̱yóʼo, mií Ndióxi̱ kúú ta̱ sándi̱ko-iniún. w24.01 20 párr. 2; 21 párr. 4

Na̱ kúʼvi̱-ini xíni Ndióxi̱ kúni̱na ndasakáʼnunara xíʼin ndiʼi níma̱na. Ta̱ David xi̱kunda̱a̱-inira ña̱ tá xi̱ndasakáʼnura ki̱vi̱ Jehová, xi̱ndasakáʼnura mií Jehová. Tá xíniso̱ʼoyó ki̱vi̱ Jehová, ndákanixi̱níyó xa̱ʼa̱ ña̱ va̱ʼa ña̱ kúúmiíra, xa̱ʼa̱ ndáa ki̱ʼva íyora ta saátu xa̱ʼa̱ ndiʼi ña̱ʼa ña̱ i̱xava̱ʼara. Ña̱kán, yi̱i̱ní ni̱xi̱yo ki̱vi̱ Jehová nu̱ú ta̱ David ta xi̱ndasakáʼnuraña. Ta saátu na̱ levita nda̱sakáʼnuna ki̱vi̱ Jehová ta nda̱a̱ ni̱ka̱ʼa̱nna ña̱ kǒo níʼi̱na tu̱ʼun ña̱ ka̱ʼa̱nna xa̱ʼa̱ ndiʼi ña̱ va̱ʼa ña̱ kéʼéra (Neh. 9:5). Xi̱kusi̱íní-ini Jehová xa̱ʼa̱ ña̱ va̱ʼaní xi̱ndasakáʼnunara. w24.02 9 párr. 6

Kǒo ndakanixi̱níví Jehová ña̱ va̱ása va̱ʼa xa̱ʼún tá kǒo níkuchiñún saxínún ña̱ nda̱kaxiún keʼún (2 Cor. 8:12). Ndakaʼán xa̱ʼa̱ ña̱ xa̱a̱ ku̱chiñún ke̱ʼún. Biblia káchiña “Ndióxi̱ nda̱kúní-inira, va̱ása nándósó-inira xa̱ʼa̱ ndiʼi chiñu ña̱ ke̱ʼéndó” (Heb. 6:10). Saátu miíún, ndakaʼán xa̱ʼa̱ ña̱ xa̱a̱ ku̱chiñún sa̱xínún. Tá kúú ña̱ xa̱a̱ kúún migo Jehová, ña̱ sánáʼún na̱ yiví xa̱ʼa̱ Ndióxi̱ á ña̱ nda̱kuchiún. Ña̱ xa̱a̱ ku̱chiñún ke̱ʼún tá ya̱chi̱ náʼa̱ña ña̱ kuchiñuvaún saxínún ña̱ kúni̱ún keʼún chí nu̱únínu. Kivi kusi̱í-iniún xíʼin ña̱ nda̱kaxiún keʼún chi Jehová chindeétáʼan xíʼún ña̱ kuchiñún saxínúnña. Tá xítoún ña̱ chíndeétáʼan Jehová xíʼún ña̱ sáxi̱nún ña̱ nda̱kaxiún keʼún, kusi̱íníva-iniún (2 Cor. 4:7). Tá kǒo ndákava-iniún ta chíkaa̱níún ndee̱ ña̱ saxínún ña̱ kúni̱ún keʼún, ku̱a̱ʼání ña̱ va̱ʼa ndakiʼún chí nu̱únínu (Gál. 6:9). w23.05 31 párr. 16-18

Kútóoní Jehová na̱ʼa̱ra nu̱úyó ña̱ kúni̱níra xínira miíyó ta kíndo̱o-inira xíʼin ña̱ kéʼéyó. Biblia káʼa̱nña ña̱ u̱vi̱ yichi̱ ni̱ka̱ʼa̱n Jehová ña̱yóʼo xíʼin ta̱ Jesús: “Ta̱yóʼo kúú se̱ʼi̱ ta̱ kúʼvi̱ní-inii̱ xínii̱, ta̱ sákusi̱í-inii̱” (Mat. 3:17; 17:5). ¿Á kúni̱ún ña̱ ka̱ʼa̱n Jehová xíʼún ña̱ kúsi̱í-inira xíʼún? Sana kúni̱vaún ña̱ ka̱ʼa̱nra xíʼún, ña̱kán xíniñúʼura tu̱ʼunra ña̱ Biblia ña̱ ka̱ʼa̱nra xíʼinyó. Tá káʼviyó tu̱ʼun ña̱ liviní ña̱ xi̱ka̱ʼa̱n ta̱ Jesús xíʼin na̱ discípulora, túviyó ña̱ mií Jehová kúú ta̱ káʼa̱nña xíʼinyó. Nda̱a̱ táki̱ʼva kéʼé Jehová saá ke̱ʼé ta̱ Jesús. Ña̱kán, tá káʼviyó ña̱ ni̱ka̱ʼa̱n ta̱ Jesús xíʼin na̱ discípulora ña̱ xi̱kuʼvi̱ní-inira xi̱xinirana ni xi̱kuuna na̱ yiví ku̱a̱chi, kivi ndakanixi̱níyó ña̱ mií Jehová kúú ta̱ káʼa̱n tu̱ʼun yóʼo xíʼinyó (Juan 15:​9, 15). Ña̱kán, tá yáʼayó nu̱ú iin tu̱ndóʼo ná kǒo ndakanixi̱níyó ña̱ kǒo kúsi̱íka-ini Ndióxi̱ xíʼin ña̱ kéʼéyó, va̱ʼaka ná ndakanixi̱níyó ña̱ saá kivi na̱ʼa̱yó ña̱ kúʼvi̱ní-iniyó xíniyóra ta ndáa-iniyóra (Sant. 1:12). w24.03 28 párr. 10, 11