Noviembre

Tá íyo na̱ va̱lí se̱ʼún, chindeétáʼan xíʼinna ña̱ ná taxina comentario ña̱ kivi taxina. Sava yichi̱, ti̱xin reunión káʼa̱nna ndáaña kivi keʼé na̱ ti̱ndaʼa̱ tá íyo tu̱ndóʼo nu̱úna á ndáa ki̱ʼva kundaayó miíyó nu̱ú ña̱ kini. Soo ni ná ka̱ʼa̱nvana xa̱ʼa̱ ña̱yóʼo, sana koova iin á u̱vi̱ párrafo nu̱ú kivi taxi na̱ va̱lí comentario. Saátu kivi ka̱ʼún xíʼin na̱ va̱lí se̱ʼún nda̱chun su̱ví ndiʼiví yichi̱ kivi taxina comentario ndaʼa̱na. Tá ná ka̱ʼún ña̱yóʼo xíʼin na̱ va̱lí se̱ʼún, kǒo ndakava-inina tá ná taxina comentario ndaʼa̱ inkana (1 Tim. 6:18). Ndiʼiyó kivi taváyó comentario ña̱ kivi ndasakáʼnu Jehová ta chikaa̱ña ndee̱ xíʼin na̱ hermano (Prov. 25:11). Ni sava yichi̱ kiviva ka̱ʼa̱nyó xa̱ʼa̱ ña̱ ndóʼo miíyó, soo va̱ása xíniñúʼu ku̱a̱ʼání tiempo ka̱ʼa̱nyó xa̱ʼa̱ miíyó (Prov. 27:2; 2 Cor. 10:18). Ta ta̱ xíniñúʼu ka̱ʼa̱nkayó xa̱ʼa̱ kúú Jehová, xa̱ʼa̱ tu̱ʼunra xíʼin xa̱ʼa̱ na̱ ñuura (Apoc. 4:11). w23.04 24, 25 párr. 17, 18

Iin ña̱ chindeétáʼan xíʼinyó ña̱ koo tu̱ʼvaníyó ta vií koo ña̱ keʼéyó kúú ña̱ kuʼvi̱-iniyó kuniyó inkana (Mat. 22:​37-39). Tá kúú, xa̱ʼa̱ ña̱ kúʼvi̱-iniyó xíniyó Jehová kúú ña̱ ndákundeéyó nátúʼunyó xa̱ʼa̱ra ni íyo tu̱ndóʼo nu̱úyó (2 Tim. 1:​7, 8). Ta xa̱ʼa̱ ña̱ kúʼvi̱-iniyó xíniyó na̱ yiví kúú ña̱ nátúʼunyó xíʼinna xa̱ʼa̱ Ndióxi̱, ta kéʼéyó ña̱yóʼo tá káʼa̱nyó xíʼinna xíʼin teléfono á tá káʼyiyó carta. Kúni̱yó ña̱ nasamana ki̱ʼva ña̱ íyona, tasaá viíní koo ña̱ keʼéna (Ezeq. 18:​27, 28). Saátu kúʼvi̱ní-iniyó xíniyó na̱ ñaniyó xíʼin ná ku̱ʼvayó ta iin ki̱ʼva ña̱ kéʼéyó ña̱yóʼo kúú ña̱ chíkaa̱yó ndee̱ xíʼinna ta káʼa̱nyó tu̱ʼun va̱ʼa xíʼinna (1 Tes. 5:11). Na̱ soldado na̱ ku̱a̱ʼa̱n nu̱ú ku̱a̱chi chíndeétáʼan xíʼin táʼanna. Saátu miíyó, sana kǒo kúni̱víyó ka̱ʼa̱nyó á keʼéyó iin ña̱ʼa ña̱ sákusuchí-ini na̱ hermanoyó, soo sana kǒo kíʼinyó kuenta ta kéʼévayó ña̱yóʼo. Ta tá kéʼéna ña̱ va̱ása va̱ʼa xíʼinyó, kǒo kéʼéyó nda̱a̱ táki̱ʼva kéʼéna (1 Tes. 5:​13, 15). Inka ki̱ʼva ña̱ na̱ʼa̱yó ña̱ kúʼvi̱-iniyó xíniyó na̱ ñaniyó xíʼin ná ku̱ʼvayó kúú, ña̱ ixato̱ʼóyó na̱ níʼi yichi̱ nu̱úyó ti̱xin congregación (1 Tes. 5:12). w23.06 11 párr. 10, 11

Iin ña̱ chindeétáʼanníka xíʼinyó ña̱ kandíxayó Ndióxi̱ kúú ña̱ ndakanixi̱níyó xa̱ʼa̱ ña̱ ta̱xira se̱ʼera ni̱xi̱ʼi̱ra xa̱ʼa̱yó. Saáchi ña̱ ni̱xi̱ʼi̱ ta̱ Jesús xa̱ʼa̱yó náʼa̱ña nu̱úyó ña̱ xi̱nuva ña̱ káʼa̱n Jehová keʼéra. Ña̱kán ndáyáʼviní taváyó tiempo ña̱ ndakanixi̱níyó xa̱ʼa̱ ndiʼi ña̱ ke̱ʼé Jehová ña̱ va̱ʼa chi̱ndaʼára se̱ʼera ni̱xi̱ʼi̱ra xa̱ʼa̱yó. Chi saá kúú ña̱ ndinuʼuní-iniyó kandíxayó ña̱ káʼa̱n Jehová ña̱ taxira ñuyǐví xa̱á kundooyó ta kutakuyó ndiʼi tiempo. Soo, ¿nda̱chun va̱ʼa káʼa̱nyó saá? Ná ndakanixi̱níyó xa̱ʼa̱ ndiʼi ña̱ ke̱ʼé Jehová ña̱ chi̱ndaʼára se̱ʼera ni̱xi̱ʼi̱ra xa̱ʼa̱yó. Nda̱a̱ chí ndiví, Jehová chi̱ndaʼára se̱ʼera ta̱ mitúʼun ta̱ va̱ʼaní kítáʼan xíʼinra, ña̱ va̱ʼa kakura nu̱ú ñuʼú yóʼo ta koora iin na̱ yiví na̱ kǒo ku̱a̱chi. Ta tá ni̱xi̱yo ta̱ Jesús nu̱ú ñuʼú yóʼo ni̱xo̱ʼvi̱níra, ni̱ya̱ʼara nu̱ú tu̱ndóʼo ña̱ yo̱ʼvi̱ní ta xa̱ʼnínara. Ña̱yóʼo náʼa̱ña nu̱úyó ña̱ ndáyáʼviní ña̱ ke̱ʼé Jehová xa̱ʼa̱yó. Jehová kǒo nítaxira ña̱ xo̱ʼvi̱ní se̱ʼera xa̱ʼa̱yó ña̱ va̱ʼa kutakuyó loʼo kuití tiempo (Juan 3:16; 1 Ped. 1:​18, 19). Chi xa̱ʼa̱ ña̱ ndáyáʼviní ke̱ʼéra, kivi kutakuyó ndiʼi tiempo nu̱ú ñuyǐví xa̱á. w23.04 27 párr. 8, 9

¿Á kúni̱ Ndióxi̱ sandátakura na̱ ni̱xi̱ʼi̱? Kúni̱vara. Ta̱kán chi̱ndeétáʼanra xíʼin sava na̱ ka̱ʼyi Biblia ña̱ ka̱ʼa̱nna xa̱ʼa̱ ña̱ ndataku na̱ ni̱xi̱ʼi̱ (Is. 26:19; Apoc. 20:​11-13). Tá káʼa̱n Jehová keʼéra iin ña̱ʼa, sáxi̱nuvaraña (Jos. 23:14). Jehová kúni̱níra sandátakura na̱ ni̱xi̱ʼi̱. Ná ndakanixi̱níyó xa̱ʼa̱ ña̱ ni̱ka̱ʼa̱n ta̱ Job. Ta̱kán xi̱kunda̱a̱-inira ña̱ tá ná kuvira, Jehová kusi̱íní-inira sandátakurara (Job 14:​14, 15, nota). Saátu kúni̱ní Jehová sandátakura na̱ xi̱ndasakáʼnu miíra. Kúni̱níra sandátakurana ta va̱ása kuumiíkana kue̱ʼe̱ ta si̱íní kutakuna. Soo, ¿ndáaña keʼé Jehová xa̱ʼa̱ ndiʼi na̱ ni̱xi̱ʼi̱ na̱ va̱ása níkivi sakúaʼa xa̱ʼa̱ra? Jehová kúni̱tura sandátakura na̱yóʼova (Hech. 24:15). Kúni̱ra ná xa̱a̱na koona migora ta kutakuna ndiʼi tiempo nu̱ú ñuʼú yóʼo (Juan 3:16). w23.04 9 párr. 5, 6

¿Ndáaña kivi keʼún ña̱ va̱ʼa kandíxakaún ña̱ káʼa̱n Ndióxi̱ keʼéra chí nu̱únínu? Tá nu̱ú ñuʼú yóʼo kúú ña̱ koún, kaʼvi ña̱ káʼa̱n Biblia xa̱ʼa̱ paraíso ta ndakanixi̱ní ña̱ xa̱a̱ íyoún kán (Is. 25:8; 32:​16-18). Tá ndákanixi̱níyó ndáa ki̱ʼva koo ñuyǐví xa̱á, ña̱yóʼo chindeétáʼan xíʼinyó ña̱ kundeé-iniyó ni yáʼayó nu̱ú tu̱ndóʼo (2 Cor. 4:17). Ña̱ káʼa̱n Jehová taxira ndaʼa̱yó chí nu̱únínu kúú ña̱ ndásandakú-iniyó. Ku̱a̱ʼání ña̱ʼa táxi Jehová ndaʼa̱yó ña̱ va̱ʼa chindeétáʼanra xíʼinyó ña̱ ndakú koo iniyó. Ña̱kán tá íxayo̱ʼvi̱ña xíʼún saxínún iin chiñu ña̱ ta̱xina ndaʼún ti̱xin ñuu Ndióxi̱, tá yáʼún nu̱ún iin tu̱ndóʼo, á ña̱ va̱ása kúsi̱íka-iniún, xíʼin ndiʼi níma̱ún ka̱ʼún xíʼin Jehová, ta kaʼvi Biblia ña̱ va̱ʼa ndaka̱xin viíún ña̱ keʼún. Ta saátu taxi ná chindeétáʼan na̱ hermano xíʼún. Ta kǒo nandóso-iniún xa̱ʼa̱ ña̱ káʼa̱n Jehová taxira ndaʼún chí nu̱únínu. Saáchi Jehová ku̱a̱ʼání ndee̱ kúúmiíra ta chindeétáʼanra xíʼún ya̱ʼún nu̱ú tu̱ndóʼo tasaá kusi̱í-iniún (Col. 1:11). w23.10 17 párr.19, 20

Tá kéʼéyó oración nu̱ú Jehová, kivi taxiyó tíxa̱ʼvi ndaʼa̱ra xa̱ʼa̱ ku̱a̱ʼání ña̱ʼa. Ná taxiyó tíxa̱ʼvi ndaʼa̱ra xa̱ʼa̱ ndiʼi ña̱ʼa ña̱ kúúmiíyó. Saáchi miíra kúú ta̱ táxi ndiʼi ña̱yóʼo (Sant. 1:17). Tá kúú, kivi taxiyó tíxa̱ʼvi ndaʼa̱ra xa̱ʼa̱ ña̱ liviní i̱xava̱ʼara ñuʼú nu̱ú ndóoyó, xa̱ʼa̱ ña̱ʼa ña̱ liviní íyo nu̱úña, xa̱ʼa̱ ña̱ tákuyó, xa̱ʼa̱ na̱ veʼeyó, xa̱ʼa̱ na̱ migoyó xíʼin ña̱ káʼa̱nra keʼéra xa̱ʼa̱yó chí nu̱únínu. Saátu kivi taxiyó tíxa̱ʼvi ndaʼa̱ra xa̱ʼa̱ ña̱ ta̱xira ña̱ kutáʼanyó xíʼinra. Iin tá iinyó íyo ku̱a̱ʼání ña̱ kivi taxiyó tíxa̱ʼvi xa̱ʼa̱. Ta sana kivi ixayo̱ʼvi̱ña xíʼinyó kiʼinyó kuenta ndáaña kúú ña̱yóʼo, saáchi ndóoyó ñuyǐví nu̱ú va̱ása táxi na̱ yiví tíxa̱ʼvi ndaʼa̱ Ndióxi̱ xa̱ʼa̱ ña̱ʼa ña̱ kúúmiína. Ndíʼi̱níka-inina xa̱ʼa̱ ña̱ʼa ña̱ kúni̱na nu̱úka ña̱ taxina tíxa̱ʼvi xa̱ʼa̱ ña̱ xa̱a̱ kúúmiína. Ná kǒo keʼéyó táki̱ʼva kéʼé na̱ yiví yóʼo, ña̱ nina ña̱ʼa kuití kixáʼayó ndukúyó nu̱ú Jehová. Ña̱ va̱ʼa kǒo keʼéyó táki̱ʼva kéʼé na̱ yiví yóʼo, xíniñúʼu chikaa̱yó ndee̱ ña̱ taxiyó tíxa̱ʼvi ndaʼa̱ Jehová xa̱ʼa̱ ndiʼi ña̱ táxira ndaʼa̱yó (Luc. 6:45). w23.05 4 párr. 8, 9

Yiváyó Jehová kúʼvi̱ní-inira xínira miíyó ta kǒo kúni̱ra ña̱ xo̱ʼvi̱yó (Is. 63:9). Soo kǒo sáka̱kuvíra miíyó nu̱ú ndiʼi tu̱ndóʼo ña̱ yáʼayó nu̱ú. Biblia chítáʼanña tu̱ndóʼo ña̱ ndóʼoyó xíʼin yu̱ta ta saátu xíʼin ñuʼu̱ ña̱ xíxi̱ (Is. 43:2). Soo Jehová káʼa̱nra ña̱ chindeétáʼanvara xíʼinyó tá ná ya̱ʼayó nu̱ú tu̱ndóʼo, ta kǒo taxira ña̱ ndiʼi tiempo sáxo̱ʼvi̱ña miíyó. Ta saátu Jehová táxira espíritu santora ndaʼa̱yó ña̱ chindeétáʼanña xíʼinyó ña̱ ndakú koo iniyó (Luc. 11:13; Filip. 4:13). Ña̱kán, Jehová chindeétáʼanvara xíʼinyó ña̱ va̱ʼa kundeé-iniyó tasaá nda̱kú koo iniyó ña̱ ndasakáʼnuyóra. Jehová kúni̱ra ña̱ ná kandíxayó ña̱ káʼa̱nra (Heb. 11:6). Sava yichi̱, tu̱ndóʼo ña̱ yáʼayó nu̱ú yo̱ʼvi̱níña ta ndákanixi̱níyó ña̱ kǒo chíndeétáʼanví Jehová xíʼinyó. Soo Biblia káʼa̱nña ña̱ ndee̱ ña̱ kúúmií Ndióxi̱ kivi chindeétáʼanña xíʼinyó ña̱ ya̱ʼayó nu̱ú tu̱ndóʼo (Sal. 18:29). Ña̱kán ná kǒo kaka-iniyó ta ná ka̱ʼa̱nyó xíʼin Jehová chi chindeétáʼanvara xíʼinyó (Sant. 1:​6, 7). w23.11 22 párr. 8, 9

Liviní káʼa̱n ña̱ texto yóʼo. Xíʼin tu̱ʼun yóʼo kúnda̱a̱-iniyó ña̱ ndiʼi na̱ ti̱ndaʼa̱ kiviva kuʼvi̱-inina kunitáʼanna ndiʼi tiempo ta nda̱a̱ ni iinna va̱ása kivi taʼví miína. Tá kúni̱ na̱ xa̱a̱ ti̱ndaʼa̱ viíní kutáʼanna ta kuʼvi̱-inina kunitáʼanna, xíniñúʼu kuniso̱ʼona consejo ña̱ táxi Jehová ndaʼa̱na ta keʼéna ña̱ káʼa̱nra. Tá kúú ná ka̱ʼa̱nyó xa̱ʼa̱ iin ñuʼu̱ ña̱ xíxi̱, tá kǒo kúni̱yó nda̱ʼva̱ ña̱yóʼo xíniñúʼu taányó titu̱n nu̱úña chi tá ná kǒo taányó titu̱n nu̱úña ndaʼvavaña. Ki̱ʼva saá xíniñúʼu keʼé na̱ xa̱a̱ ti̱ndaʼa̱, xíniñúʼu chikaa̱na ndee̱ ña̱ kuʼvi̱-inina kunitáʼanna. Chi tá ná kǒo keʼéna ña̱yóʼo, tá ná ya̱ʼa tiempo va̱ása kuʼvi̱ka-inina kunitáʼanna. Tá ná kixi tu̱ndóʼo nu̱úna, tá kúú ña̱ ixama̱ní xu̱ʼún nu̱úna á ña̱ kuumiína kue̱ʼe̱, á tá íxayo̱ʼvi̱ña xíʼinna ña̱ sakúaʼnuna na̱ va̱lí se̱ʼena sana va̱ása kuʼvi̱ka-inina kunitáʼanna. Na̱ ti̱ndaʼa̱, tá kúni̱na kuʼvi̱-inina kunitáʼanna xíniñúʼu chikaa̱na ndee̱ ña̱ va̱ʼaní koona migo Jehová. w23.05 20, 21 párr. 1-3

Ni ndakúní-ini na̱ yiváyó, soo miíyó kǒo ña̱yóʼo kúúmiíyó tá kákuyó, xa̱ʼa̱ ña̱kán xíniñúʼu chikaa̱yó ndee̱ ña̱ sakúaʼayó ndakú koo iniyó. Ña̱ va̱ʼa keʼéyó iin ña̱ʼa, xíniñúʼu koto va̱ʼayó ndáaña kéʼé na̱ sánáʼa̱ miíyó tasaá va̱ʼaní keʼéyóña. Tá kúni̱yó ndakú koo iniyó, xíniñúʼu kotoyó ndáaña kéʼé na̱ ndakú-ini ta kundiku̱nyó yichi̱na. Ña̱kán, ¿ndáaña sákuaʼayó xíʼin ña̱ ndo̱ʼo ta̱ Daniel? Ña̱ xíniñúʼu kaʼviyó Biblia ta ndakanixi̱níyó xa̱ʼa̱ ña̱ káʼa̱nña, ña̱ kooyó migo Jehová, ña̱ ka̱ʼa̱nyó xíʼinra xa̱ʼa̱ ndiʼi ña̱ sándi̱ʼi̱-iniyó, ta ná kandíxayó ña̱ ndiʼi tiempo chindeétáʼanra xíʼinyó. Tá ná keʼéyó ndiʼi ña̱yóʼo saá kúú ña̱ ndakú koo iniyó tá ná kixi tu̱ndóʼo nu̱úyó. Tá ndakú íyo iniyó, inka na̱ yiví xítona ña̱yóʼo ta íxato̱ʼóna miíyó ta saátu chíndeétáʼanña xíʼin inkana ña̱ kuni̱na sakúaʼana xa̱ʼa̱ Jehová. Ña̱kán ndáyáʼviníva ña̱ ndakú koo iniyó. w23.08 4 párr. 8, 9

Ña̱ tu̱ʼun “nandukúndó” ti̱xin tu̱ʼun griego ka̱naña ta ña̱ tu̱ʼun yóʼo xi̱xiniñúʼunaña tá xi̱nandukúna xa̱ʼa̱ plata á oro ña̱ va̱ʼa kotona á ndixa ña̱ va̱ʼa kúúña. Ta saátu xíniñúʼu keʼé miíyó, saáchi xíniñúʼu nandukú va̱ʼayó xa̱ʼa̱ iin ña̱ʼa ña̱ xítoyó á ña̱ káʼviyó á ndixa ña̱ nda̱a̱ kúúña. Soo ndáyáʼviníka ña̱ keʼé miíyóña tiempo vitin, saáchi xa̱a̱ ku̱nu̱míní kixaa̱ ña̱ gran tribulación. Nu̱úka ña̱ kandíxayó ndiʼi ña̱ káʼa̱n na̱ yiví, va̱ʼaka siʼna ná nandukúyó xa̱ʼa̱ ña̱yóʼo nu̱ú tu̱ʼun Ndióxi̱ ta saátu ná kotoyó ña̱ tává na̱ ñuura, saá kunda̱a̱-iniyó á ña̱ ndixa kúúña. Tá ná keʼéyó ña̱yóʼo, va̱ása taxiyó ña̱ sandáʼvi na̱ ta̱chí ndi̱va̱ʼa miíyó (Prov. 14:15; 1 Tim. 4:1). Kúnda̱a̱-iniyó ña̱ ka̱kuva miíyó na̱ ñuu Jehová tá ná kixaa̱ ña̱ gran tribulación, soo kǒo kúnda̱a̱-iniyó ndáaña kuu xíʼin iin tá iinyó (Sant. 4:14). Ni ná kuviyó tiempo vitin á ni ná ya̱ʼa tákuyó ñuyǐví xa̱á, Jehová taxira ña̱ kutakuyó ndiʼi tiempo. Nani ndátuyó kuu ña̱yóʼo, ná kǒo nandósoyó xa̱ʼa̱ ña̱ ndátuyó ndakiʼinyó chí nu̱únínu. Ta ná koo tu̱ʼvaníyó chi xa̱a̱ ku̱nu̱míní kixaa̱ ki̱vi̱ káʼnu Jehová. w23.06 13 párr. 15, 16

Kǒo xíni̱yó ndáa ki̱ʼva xi̱nu sava profecía ña̱ káʼa̱n Biblia (Dan. 12:​8, 9). Sana va̱ása kúnda̱a̱-iniyó ndáaña kúni̱ kachi iin profecía, soo ná kǒo kaka-iniyó chi xi̱nuvaña. Kúnda̱a̱-iniyó ña̱ mií Jehová chindeétáʼan xíʼinyó ña̱ kunda̱a̱-iniyó xa̱ʼa̱ iin tá iin ña̱yóʼo. Nda̱a̱ táki̱ʼva ke̱ʼéra tiempo xi̱naʼá. Si̱lóʼoní kúma̱ní ta na̱ yiví ka̱ʼa̱nna “vitin va̱ʼaní ndóo ndiʼiyó ta kǒoka ña̱ sándi̱ʼi̱-iniyó” (1 Tes. 5:3). Tasaá na̱ chíñu ñuyǐví yóʼo sandíʼi-xa̱ʼa̱na ndiʼi veʼe-ñu̱ʼu vatá (Apoc. 17:​16, 17). Tándi̱ʼi, kuni̱na sandíʼi-xa̱ʼa̱na na̱ ñuu Ndióxi̱ (Ezeq. 38:​18, 19). Tasaá kúú ña̱ kixáʼa ña̱ Armagedón (Apoc. 16:​14, 16). Kándíxaníyó ña̱ xa̱a̱ ku̱nu̱mí kuu ndiʼi ña̱yóʼo. Soo nani ndátuyó ña̱ kixaa̱ ki̱vi̱ yóʼo, ná chikaa̱yó ndee̱ ña̱ kaʼvikayó xa̱ʼa̱ profecía ña̱ va̱xi nu̱ú Biblia. Ta ná chindeétáʼanyó xíʼin inka na̱ yiví ña̱ kunda̱a̱-inina xíʼin ña̱yóʼo, saá kúú ña̱ na̱ʼa̱yó ña̱ táxiníyó tíxa̱ʼvi ndaʼa̱ Jehová xa̱ʼa̱ ndiʼi ña̱ kéʼéra xa̱ʼa̱yó. w23.08 13 párr. 19, 20

Tá xa̱a̱ ndi̱ʼi̱ ni̱ka̱ʼa̱n ta̱ apóstol Pablo xa̱ʼa̱ ña̱ kándíxayó Ndióxi̱, ña̱ ndátuyó ndakiʼinyó chí nu̱únínu xíʼin ña̱ kúʼvi̱-iniyó xíniyó inkana, ni̱ka̱ʼa̱nra ña̱yóʼo: “Soo ña̱ ndáyáʼvika nu̱ú ndiʼi ña̱yóʼo kúú ña̱ kuʼvi̱-iniyó kuniyó inkana” (1 Cor. 13:13). ¿Nda̱chun ni̱ka̱ʼa̱nra ña̱yóʼo? Saáchi tá ná kooyó nu̱ú ñuyǐví xa̱á va̱ása kundi̱ʼi̱ka-iniyó ta ndakanixi̱níyó á sáxi̱nu Ndióxi̱ ña̱ ni̱ka̱ʼa̱nra xíʼinyó, chi xa̱a̱ kotovayó ña̱ ndixa ni̱xi̱nu ndiʼi ña̱ ni̱ka̱ʼa̱nra xíʼinyó. Soo ndiʼi tiempova kuʼvi̱-iniyó kuniyó Jehová xíʼin na̱ yiví. Tá kúʼvi̱-iniyó xínitáʼanyó, saá náʼa̱yó ña̱ ndixa ndásakáʼnuyó Ndióxi̱. Ta̱ Jesús ni̱ka̱ʼa̱nra xíʼin na̱ apóstolra: “Tasaá kúú ña̱ kunda̱a̱-ini ndiʼina ña̱ kúúndó discípuloi̱: tá kúʼvi̱-inindó xínitáʼanndó” (Juan 13:35). Ta saátu, tá kúʼvi̱-iniyó xíniyó inkana va̱ʼaní kítáʼanyó xíʼinna. Ña̱kán ta̱ Pablo ni̱ka̱ʼa̱nra, ña̱ ndiʼi “na̱ kúʼvi̱-ini xínitáʼan va̱ʼaní kítáʼanna” (Col. 3:14). Ta̱ apóstol Juan ni̱ka̱ʼa̱nra xa̱ʼa̱ ña̱yóʼo tá ka̱chira: “Na̱ kúʼvi̱-ini xíni Ndióxi̱ saátu ná kuʼvi̱-inina kunina ñanina” (1 Juan 4:21). Ña̱kán, tá náʼa̱yó ña̱ kúʼvi̱-iniyó xíniyó na̱ hermanoyó, saátu náʼa̱yó ña̱ kúʼvi̱-iniyó xíniyó Jehová. w23.11 8 párr. 1, 3

Biblia káʼa̱nña ña̱ miíyó na̱ ndásakáʼnu Ndióxi̱ nda̱a̱ táki̱ʼva íyo na̱ xínu ku̱a̱ʼa̱n saá íyoyó. Na̱ xáa̱ nu̱ú ndíʼi carrera yóʼo níʼi̱na ña̱ kutakuna ndiʼi saá tiempo (2 Tim. 4:​7, 8). Ndiʼiyó xíniñúʼu chikaa̱níyó ndee̱ ña̱ ndakundeéyó kunuyó chi si̱lóʼoní kúma̱ní tasaá xa̱a̱yó nu̱ú ndíʼi carrera yóʼo. Ta̱ apóstol Pablo ni̱ka̱ʼa̱nra sava ña̱ʼa ña̱ chindeétáʼan xíʼinyó ña̱ sandíʼiyóña. Ta̱yóʼo ni̱ka̱ʼa̱nra: “Ná sakútaʼayó ndiʼi ña̱ʼa ña̱ ve̱ení ndísoyó […], ta ná ixandakúní-iniyó kunuyó carrera ña̱ xa̱a̱ xínuyó ku̱a̱ʼa̱nyó”. Ta̱ Pablo kǒo níxi̱kuni kachira ña̱ sakútaʼayó ndiʼi ña̱ʼa ña̱ ndísoyó, chi ña̱ xi̱kuni̱ kachira kúú ña̱ sakútaʼayó sava ña̱ kivi kasi nu̱úyó ña̱ ndakundeéyó kunuyó. Ña̱yóʼo kǒo táxiña kunuyó ta kamaní sákunaáña miíyó. Ña̱ va̱ʼa ndakundeéyó kunuyó ná kotoyó á íyoka inka ña̱ʼa ndísoyó, ta tá íyoña ndi̱ku̱n kama ná sandákooyóña. Soo íyo sava ña̱ ndáyáʼviní ña̱ ndísoyó ta kǒo xíniñúʼu sandákooyóña, chi tá ná sandákooyóña kǒo kivika kunuyó ta ni kǒo kivika ni̱ʼíyó ña̱ kutakuyó ndiʼi saá tiempo (2 Tim. 2:5). w23.08 26 párr. 1, 2

Tá viíní ndákanixi̱níyó saá kúú ña̱ kiʼinníyó kuenta xíʼin ña̱ ndákanixi̱ní inkana. Tá kúú, sava ná hermana kútóoníná ndakaʼyi̱ nu̱úná ta savaná kǒo kútóoná nda̱kaʼyi̱ nu̱úná. Sava na̱ hermano kútóona koʼona loʼo ndixi ta savana va̱ása kútóona koʼonará. Ni iin na̱ hermano kǒo kúni̱na kiʼin kue̱ʼe̱ miína, soo tá xa̱a̱ kíʼin kue̱ʼe̱ miína xa̱a̱ síín síín ta̱tán ndáka̱xinna kuniñúʼuna. Tá ndákanixi̱níyó ña̱ iinlá ña̱ káʼa̱nyó kúú ña̱ va̱ʼaníka ta káʼa̱nyó xíʼin inkana ña̱ keʼéna ña̱yóʼo, kivi ndataʼvíyó na̱ hermano ti̱xin congregación (1 Cor. 8:9; 10:​23, 24). Tá kúú, nu̱úka ña̱ ka̱ʼa̱n káxi Jehová xíʼinyó ndáa ki̱ʼva kundixiyó, nu̱ú tu̱ʼunra va̱xi ña̱ chindeétáʼan xíʼinyó ña̱ ndaka̱xin viíyó ti̱ko̱to̱ kundixiyó. Xíniñúʼu na̱ʼa̱yó ña̱ íxato̱ʼóyó Jehová xíʼin ki̱ʼva ña̱ ndíxiyó, tasaá na̱ʼa̱yó ña̱ viíní ndákanixi̱níyó (1 Tim. 2:​9, 10). Kǒo kúni̱yó ña̱ ndiʼi na̱ yiví ná kotona miíyó xa̱ʼa̱ ki̱ʼva ña̱ ndíxiyó. Consejo ña̱ va̱xi nu̱ú tu̱ʼun Ndióxi̱ kivi chindeétáʼanña xíʼin na̱ anciano ña̱ va̱ása ka̱ʼa̱nna xíʼin na̱ hermano ndáa ti̱ko̱to̱ kúú ña̱ kundixina á ndáa ki̱ʼva chuʼunna xi̱nína. w23.07 23, 24 párr. 13, 14

Jehová xi̱niñúʼura u̱vi̱ ná ñaʼá yóʼo ña̱ va̱ʼa na̱ʼa̱ra ndáaña xíniñúʼu keʼéyó tasaá si̱í kooyó. Ta na̱ xíniso̱ʼo ña̱ káʼa̱n ñaʼá ñá kíʼví, na̱yóʼo kúú na̱ kéʼé ña̱ kini saáchi kúni̱na keʼéna ña̱ʼa ña̱ sákusi̱í-ini mií kuitína, ta kǒo ndákanixi̱nína xa̱ʼa̱ tu̱ndóʼo ña̱ ki̱xi nu̱úna chí nu̱únínu, ta xa̱ʼa̱ ña̱yóʼo kuvina (Prov. 9:​13, 17, 18). Soo na̱ xíniso̱ʼo ña̱ káʼa̱n Ndióxi̱ ta kándíxanara ku̱a̱ʼání ña̱ va̱ʼa ndákiʼinna ta kúsi̱íní-inina (Prov. 9:1). Ná sakúaʼayó kutóoyó ña̱ kútóo Jehová ta ná kundasíyó kuniyó ña̱ kúndasíra xínira (Sal. 97:10). Kúsi̱íní-iniyó ña̱ káʼa̱nyó xíʼin inkana ña̱ kuyatinna nu̱ú Ndióxi̱ ña̱ va̱ʼa xa̱a̱na kuumiína ña̱ ndíchi. Ta íyoyó nda̱a̱ táki̱ʼva íyo ná ñaʼá ná káʼa̱n: “Na̱ va̱ása xíni̱ ná kixina yóʼo”. Ndiʼi miíyó ta saátu na̱ xíniso̱ʼo ña̱ káʼa̱nyó ku̱a̱ʼání ña̱ va̱ʼa ndakiʼinyó tiempo vitin ta saátu chí nu̱únínu, ña̱kán tá ná chíka̱a̱yó ndee̱ ña̱ kakayó “yichi̱ ña̱ táxi ña̱ ndíchi ndaʼa̱yó”, kivi kutakuyó ndiʼi saá tiempo (Prov. 9:​3, 4, 6). w23.06 24 párr. 17, 18

¿Ndáa ki̱ʼva kúniún tá iin na̱ káchíñu xíʼún á na̱ káʼvi xíʼún ndáka̱tu̱ʼunna yóʼó xa̱ʼa̱ ña̱ kándíxaún Ndióxi̱? ¿Á yíʼviún? Ku̱a̱ʼáníyó yíʼvivayó. Soo ña̱ va̱ʼava kúúña tá ndáka̱tu̱ʼunna miíyó chi saá kivi kunda̱a̱-iniyó ndáaña kándíxana á ña̱ ndákanixi̱nína. Ta saátu kivi natúʼunyó xíʼinna xa̱ʼa̱ tu̱ʼun Ndióxi̱. Soo, sava yichi̱ na̱ yiví ndáka̱tu̱ʼunna miíyó saáchi kúni̱na kotondosóna miíyó, ta kéʼéna ña̱yóʼo xa̱ʼa̱ ña̱ xíniso̱ʼona káʼa̱n inka na̱ yiví xa̱ʼa̱yó (Hech. 28:22). Ta saátu xa̱a̱ “ki̱vi̱ nu̱ú ndíʼi” kúú ña̱ ndóoyó ta ku̱a̱ʼání na̱ yiví “va̱ása kindo̱o inina xíʼin ni iin ña̱ʼa” ta “ndi̱va̱ʼaní koo inina” (2 Tim. 3:​1, 3). Sana ndákanixi̱niún ta káchiún: “Tá su̱ví inkáchi íyo ña̱ kándíxai̱ xíʼin na̱ yiví, ¿ndáaña keʼíi̱ ña̱ va̱ʼa ka̱ʼa̱n to̱ʼíi̱ xíʼinna ta kǒo sa̱íi̱?”. Ña̱ kivi chindeétáʼan xíʼún kúú ña̱ vitá koo iniún. Iin na̱ yiví vitá-ini va̱ása kama sáa̱na tá káʼa̱nna iin ña̱ va̱ása va̱ʼa xíʼinna. w23.09 14 párr. 1, 2

Na̱ ñuu Jehová táxina consejo ndaʼa̱yó ña̱ kiʼinníyó kuenta xíʼin xu̱ʼún á káʼa̱nna xíʼinyó ña̱ kǒo keʼéyó ña̱ʼa ña̱ kivi sakúyaku̱a̱ miíyó nu̱ú Jehová, ña̱kán tá ná kuniso̱ʼoyó ña̱ káʼa̱nra ku̱a̱ʼáníva ña̱ va̱ʼa ndakiʼinyó. Saá kivi chikaa̱yó ndee̱ ña̱ kachíñukayó nu̱úra. Kusi̱íní-iniyó ta kǒo ña̱ʼa sandíʼi̱-iniyó (Is. 48:​17, 18; 1 Tim. 6:​9, 10). Kuniñúʼukava Jehová na̱ nda̱kaxinra ña̱ kuniʼina yichi̱ nu̱ú na̱ ñuura tá xa̱a̱ ná koo ña̱ gran tribulación ta saátu ti̱xin ña̱ mil ku̱i̱ya̱ tá xa̱a̱ ná kaʼndachíñu ta̱ Cristo. Tiempo kán, ¿á kuniso̱ʼoyó ña̱ káʼa̱n Jehová? Tá xíniso̱ʼoyó ña̱ káʼa̱nra xíʼinyó tiempo vitin saátu kuniso̱ʼoyó ña̱ ka̱ʼa̱nra xíʼinyó chí nu̱únínu. Ña̱kán, ndiʼi tiempo ná kuniso̱ʼoyó ña̱ káʼa̱n Jehová xíʼinyó ta saátu ná kuniso̱ʼoyó na̱ nda̱kaxinra kuniʼi yichi̱ nu̱úyó (Is. 32:​1, 2; Heb. 13:17). Va̱ʼaní níʼi Jehová yichi̱ nu̱úyó saáchi chíndeétáʼanra xíʼinyó ña̱ va̱ása kuxíkayó nu̱úra tasaá va̱ʼa xa̱a̱yó kooyó nu̱ú ñuyǐví xa̱á ta kutakuyó ndiʼi saá tiempo. w24.02 25 párr. 17, 18

Ta̱ apóstol Pablo xi̱kusi̱íní-inira tá xi̱natúʼunra xa̱ʼa̱ Ndióxi̱, soo ni̱ya̱ʼara nu̱ú ku̱a̱ʼání tu̱ndóʼo. Sava yichi̱ xi̱niñúʼu xíkaní ku̱ʼu̱nra ña̱ va̱ʼa natúʼunra xa̱ʼa̱ Ndióxi̱ xíʼin na̱ yiví, ta xi̱ ixayo̱ʼvi̱níña xíʼinra. Tá kúú, xi̱niñúʼu ya̱ʼara yu̱ta náʼnu ta saátu nu̱ú íyo na̱ kui̱ʼná. Ta na̱ yiví na̱ xi̱saa̱ní-ini xi̱xiniñaʼá xi̱ ixandi̱va̱ʼanína xíʼinra (2 Cor. 11:​23-27). Ku̱a̱ʼání chiñu ke̱ʼé ta̱ apóstol Pablo ña̱ va̱ʼa chindeétáʼanra xíʼin na̱ hermano, soo sava yichi̱ kǒo níxi̱ndayáʼviña nu̱úna (2 Cor. 10:10; Filip. 4:15). ¿Ndáaña chi̱ndeétáʼan xíʼin ta̱ apóstol Pablo ña̱ kǒo nísandákoora ña̱ kachíñura nu̱ú Jehová? Ku̱a̱ʼání ña̱ sa̱kúaʼara xa̱ʼa̱ Jehová tá xi̱kaʼvira tu̱ʼunra, ta saátu ku̱a̱ʼání ña̱ sa̱kúaʼara xíʼin ña̱ ndo̱ʼora. Ta xi̱kandíxara ña̱ xi̱kuʼvi̱ní-ini Jehová xi̱xinirara (Rom. 8:​38, 39; Efes. 2:​4, 5). Ña̱yóʼo chi̱ndeétáʼan xíʼin ta̱ apóstol Pablo ña̱ kuʼvi̱ka-inira kunira Jehová, ta ni̱na̱ʼa̱ra ña̱yóʼo tá ka̱chíñura nu̱ú na̱ nda̱kaxin Ndióxi̱ ku̱ʼu̱n chí ndiví ta chi̱ndeétáʼanra xíʼinna (Heb. 6:10). w23.07 9 párr. 5, 6

Na̱ yiví káʼa̱nna ña̱ ndáyáʼviva na̱ chíñu ta xíniñúʼu kuniso̱ʼoyó sava ley ña̱ káʼa̱nna. Soo tá túvina ña̱ iin ley va̱ása va̱ʼa íyoña á ku̱a̱ʼání ña̱ʼa ndúkúña nu̱úna, íxayo̱ʼvi̱níña xíʼinna kandíxanaña. Biblia káʼa̱nña ña̱ na̱ chíñu na̱ íyo nu̱ú ñuʼú yóʼo sáxo̱ʼvi̱nína na̱ yiví saáchi ta̱ Ndi̱va̱ʼa kúú ta̱ xíniñúʼuna ta si̱lóʼo tiempo ndiʼi-xa̱ʼa̱vana (Sal. 110:​5, 6; Ecl. 8:9; Luc. 4:​5, 6). Soo saátu káʼa̱nña “na̱ kǒo xíín kandíxa ña̱ káʼa̱n na̱ chíñu kǒo xíínna kandíxana ña̱ káʼa̱n Ndióxi̱”. Soo táxivara ña̱ koona, ña̱ va̱ʼa kiʼinna kuenta xíʼin na̱ yiví, ta kúni̱ra ña̱ ná ixato̱ʼóyó na̱yóʼo. Xa̱ʼa̱ ña̱kán xíniñúʼu kuniso̱ʼoyó ña̱ káʼa̱nna, ña̱yóʼo kúni̱ kachiña ña̱ xíniñúʼu chaʼviyó impuesto ta saátu ña̱ ixato̱ʼóyóna (Rom. 13:​1-7). Sana ndákanixi̱níyó ña̱ va̱ása chíndeétáʼanví ley ña̱ kúúmií na̱ chíñu yóʼo xíʼinyó saáchi ku̱a̱ʼání xu̱ʼún cháʼviyó. Soo xíniso̱ʼoyó ña̱ káʼa̱n Jehová ta kúni̱ra ña̱ ná kuniso̱ʼoyó ña̱ káʼa̱nna, nani tá va̱ása yáʼandosoyó ña̱ káʼa̱n leyra (Hech. 5:29). w23.10 8 párr. 9, 10

Tá ka̱ku ta̱ Sansón, na̱ ñuu Filistea xi̱ i̱xandi̱va̱ʼanína xíʼin na̱ ñuu Israel (Juec. 13:1). Xa̱ʼa̱ ña̱ ndi̱va̱ʼaní ni̱xi̱yo ini na̱ filisteo ndeéní xi̱saxóʼvi̱na na̱ ñuu Israel. Ña̱kán Jehová nda̱kaxinra ta̱ Sansón ña̱ va̱ʼa sakǎkura na̱ ñuura (Juec. 13:5). Iin chiñu ña̱ yo̱ʼvi̱ní kúú ña̱ nda̱kiʼinra, ta ña̱ va̱ʼa keʼéraña xi̱niñúʼu kundaa-inira Jehová. Iin yichi̱, iin tiʼvi na̱ soldado filisteo ni̱xa̱ʼa̱nna ñuu Lehí, ña̱ kíndo̱o chí Judá ña̱ va̱ʼa tiinna ta̱ Sansón. Xa̱ʼa̱ ña̱ ni̱yi̱ʼvíní ndiʼi na̱ ni̱xi̱yo Judá, ni̱ka̱ʼa̱nna taxina ta̱ Sansón ndaʼa̱ na̱ soldado filisteo. Suvi mií na̱ ñuura ka̱túnnara xíʼin u̱vi̱ yoʼo̱ xa̱á ta ta̱xinara ndaʼa̱ na̱ soldado filisteo (Juec. 15:​9-13). Soo espíritu santo Jehová ta̱xi ndee̱ ndaʼa̱ra tasaá va̱ʼa ni̱sa̱ñára. Tá ndi̱ʼi nda̱ni̱ʼíra iin leke yuʼú tí burro tí sa̱kán loʼo tiempo ni̱xi̱ʼi̱, nda̱kiʼinraña ta xíʼin ña̱yóʼo xa̱ʼníra 1,000 na̱ filisteo (Juec. 15:​14-16). w23.09 2 párr. 3, 4

“Jehová xíniñúʼura ndiʼi ña̱ i̱xava̱ʼara ña̱ va̱ʼa xi̱nu ña̱ kúni̱ra” (Prov. 16:4). Ta ndiʼi ña̱ káʼa̱nra keʼéra, kooña ndiʼi tiempo. Ña̱kán, ¿ndáaña kúni̱ Jehová keʼéra, ta ndáaña xa̱a̱ kéʼéra ña̱ va̱ʼa xi̱nuña? Ña̱yóʼo ni̱ka̱ʼa̱n Ndióxi̱ xíʼin ta̱ Adán xíʼin ñá Eva keʼéna: “Kaku se̱ʼendó ta ku̱a̱ʼá ná koona, ta sakutúndó nu̱ú ñuʼú, ta kundaandóña, ta kiʼinndó kuenta xíʼin kití tí ñúʼu ini mar, xíʼin ndiʼi tí ndáchí, xíʼin ndiʼi tí íyo nu̱ú ñuʼú” (Gén. 1:28). Tá i̱xaso̱ʼo ta̱ Adán xíʼin ñá Eva, ndiʼi na̱ se̱ʼena ni̱xa̱a̱na ndu̱una na̱ yiví ku̱a̱chi, soo kǒo nítaxi Jehová kasi ña̱yóʼo nu̱úra ña̱ saxínura ña̱ kúni̱ra. Ndi̱ku̱n kama ni̱ka̱ʼa̱nra ña̱ koo iin Reino chí ndiví ta ña̱yóʼo kúú ña̱ chindeétáʼan xíʼin na̱ yiví ña̱ koona nda̱a̱ táki̱ʼva xi̱kuni̱ra tá xa̱ʼa̱ (Mat. 25:34). w23.10 20 párr. 6, 7

Jehová kivi chindeétáʼanra xíʼinyó ña̱ kǒo ndakava-iniyó. Soo sana kivi ixayo̱ʼvi̱ña xíʼinyó chi sana xa̱a̱ ku̱a̱ʼání tiempo chíkaa̱yó ndee̱ ña̱ sandákooyó kéʼéyó ña̱ va̱ása va̱ʼa. Ta sana ndákanixi̱níyó ña̱ yo̱ʼvi̱níka ña̱ ndóʼo miíyó nu̱úka ña̱ ndo̱ʼo ta̱ apóstol Pedro, soo mií Jehová kivi taxi ndee̱ ndaʼa̱yó ña̱ kundeé-iniyó (Sal. 94:​18, 19). Ná ka̱ʼa̱nyó xa̱ʼa̱ ña̱ ndo̱ʼo iin ta̱ hermano. Tá kúma̱níka sakúaʼara xa̱ʼa̱ Jehová, xi̱kutoora ta̱a. Ni xa̱a̱ sa̱ndákoora ña̱yóʼo soo ndákanikavaxi̱níra xa̱ʼa̱ ña̱ kini kán sava yichi̱. ¿Ndáaña chi̱ndeétáʼan xíʼinra ña̱ kǒo ndakava-inira? Ta̱yóʼo káchira: “Jehová táxi ndee̱ ndaʼa̱yó”. Ta káʼa̱nkara: “Mií Jehová kúú ta̱ chíndeétáʼan xíʼi̱n ña̱ kiviva kundeé-inii̱ tasaá keʼíi̱ ña̱ va̱ʼa nu̱úra”. Ta káchikara: “Jehová táxira ña̱ kachíñui̱ nu̱úra ni kúnda̱a̱va-inira xa̱ʼa̱ sava ña̱ʼa ña̱ íxayo̱ʼvi̱ xíʼi̱n soo ndákundeéra chíndeétáʼanra xíʼi̱n”. w23.09 23 párr. 12

Tá iin ta̱ loʼo kúa̱an kúún, chikaa̱ ndee̱ chi kuchiñuvaún keʼún ña̱ káʼa̱n Jehová xíʼún. Soo xíniñúʼu ndaka̱xiún ndáana kundikún yichi̱, viíní ndakanixi̱níún, ná kundaa-ini inkana yóʼó ta saátu sakúaʼún keʼún inkaka chiñu, saáchi ña̱yóʼo chindeétáʼan xíʼún tá ná taxina chiñu ndaʼún chí nu̱únínu. Sana kivi ndakanixi̱níún ña̱ va̱ása kuchiñún keʼún ndiʼi ña̱ xa̱a̱ ni̱ka̱ʼa̱nyó xa̱ʼa̱ yóʼo. Soo kǒo ndakava-iniún saáchi kuchiñuvaún keʼúnña, chi Jehová kúni̱vara chindeétáʼanra xíʼún (Is. 41:​10, 13). Ta saátu na̱ hermano kivi chindeétáʼanna xíʼún. Tá ná keʼún ña̱ kúni̱ Jehová, saá kúú ña̱ si̱íní koún. Kúʼvi̱ní-inindi̱ xínindi̱ yóʼó, ta kúni̱ndi̱ ña̱ ná taxi Jehová ku̱a̱ʼání ña̱ va̱ʼa ndaʼún xa̱ʼa̱ ña̱ chíkaa̱níún ndee̱ ña̱ viíní kutáʼún xíʼinra. w23.12 29 párr. 19, 20

Ná kachiyó ña̱ ndátakayó kuxuyó xíʼin na̱ hermanoyó ta kúsi̱íkaví-iniyó. Tasaá ni̱ka̱ʼa̱nyó ña̱ taváyó na̱ʼná, ta ta̱váyó u̱ni̱ña, soo nu̱ú iinña va̱ása va̱ʼa nínana iin na̱ hermano. Xíniñúʼu ndakatayóña ta kindo̱oyó xíʼin u̱vi̱ ña̱ va̱ʼaní ka̱na nu̱ú xáku̱ ndiʼina. Soo ná kachiyó ña̱ iin na̱ hermano kán ni̱ka̱ʼa̱nna á ke̱ʼéna iin ña̱ʼa ña̱ kǒo níkutóoyó. ¿Ndáaña keʼéyó xíʼin ña̱ ni̱ka̱ʼa̱nna? ¿Á kivi nandóso-iniyó xa̱ʼa̱ ña̱ ke̱ʼéna nda̱a̱ táki̱ʼva kéʼéyó xíʼin na̱ʼná ña̱ nda̱katayó? (Efes. 4:32). Ná ndakaʼányó xa̱ʼa̱ nina ña̱ va̱ʼa ña̱ kéʼé na̱ hermanoyó nda̱a̱ táki̱ʼva kéʼéyó xíʼin na̱ʼná ña̱ kútóoníyó. w23.11 12 párr. 16, 17

Tu̱ʼun griego ña̱ xi̱niñúʼu ta̱ Pablo kúni̱ kachiña, ná hermana xíniñúʼu kiʼinníná kuenta xíʼin ki̱ʼva ña̱ ndíxiná ña̱ viíní ná kooña ta ná kiʼinníná kuenta ndáaña kivi ndakanixi̱ní inkana xa̱ʼa̱ná xíʼin ki̱ʼva ña̱ ndíxiná. Kúsi̱íní-iniyó chi ná hermana va̱ʼaní ndáka̱xinná ti̱ko̱to̱ ña̱ ndíxiná. Xíniñúʼu viíní ndakanixi̱níná. Ña̱yóʼo kúú ña̱ chindeétáʼan xíʼinná kunda̱a̱-ininá ndáaña kúú ña̱ va̱ʼa ta ndáaña kúú ña̱ va̱ása va̱ʼa. Ná ka̱ʼa̱nyó xa̱ʼa̱ ñá Abigaíl. Yii̱ ñáyóʼo va̱ása va̱ʼa níkeʼéra, ta ñáyóʼo ki̱ʼinñá kuenta ña̱ kivi kixi tu̱ndóʼo nu̱ú ndiʼi na̱ veʼeñá xa̱ʼa̱ ña̱ ke̱ʼéra. Xa̱ʼa̱ ña̱ va̱ʼaní nda̱kanixi̱níñá, íyo iin ña̱ kamaní ke̱ʼéñá tasaá ni̱ka̱ku ku̱a̱ʼání na̱ yiví (1 Sam. 25:​14-23, 32-35). Ña̱ viíní ndákanixi̱níyó chíndeétáʼanña xíʼinyó ña̱ kunda̱a̱-iniyó ama kúú ña̱ ka̱ʼa̱nyó ta ama kúú ña̱ va̱ása ka̱ʼa̱nyó. Ña̱yóʼo chindeétáʼanña xíʼinyó ña̱ kundi̱ʼi̱-iniyó xa̱ʼa̱ inkana, ta va̱ása sakúkaʼanyó nu̱úna (1 Tes. 4:11). w23.12 20 párr. 8, 9

Ta̱ apóstol Pablo ka̱ʼyira tu̱ʼun yóʼo ku̱a̱ʼa̱n nu̱ú na̱ cristiano na̱ xi̱ndoo ñuu Roma. Na̱yóʼo ni̱xa̱a̱na sa̱kuaʼana xa̱ʼa̱ Jehová xíʼin ta̱ Jesús, ni̱na̱ʼa̱na ña̱ kándíxanína Jehová ta ndu̱una cristiano. Xa̱ʼa̱ ña̱ xi̱kandíxanína Jehová, ni̱xa̱a̱na ndu̱una na̱ yiví nda̱kú-ini nu̱úra ta nda̱kaxinrana xíʼin espíritu santo (Rom. 5:1). Ta nani tiempo saá ki̱xáʼana ndátuna iin ña̱ ndáyáʼviní ña̱ ndakiʼinna chí nu̱únínu. Tá ni̱ya̱ʼa loʼo tiempo, ta̱ Pablo ka̱ʼyira iin carta ku̱a̱ʼa̱n nu̱ú na̱ cristiano na̱ ni̱xi̱yo ñuu Éfeso, ta ni̱ka̱ʼa̱nra xíʼinna ña̱ íyo iin ña̱ va̱ʼa taxi Ndióxi̱ ndaʼa̱ ndiʼi na̱ nda̱kaxinra xíʼin espíritu santo (Efes. 1:18). Ta xíʼin na̱ colosenses ni̱ka̱ʼa̱nra ña̱ íyo iin ña̱ ndátuna ndakiʼinna chí ndiví (Col. 1:​4, 5). Ndiʼi na̱ cristiano na̱ nda̱kaxin Ndióxi̱ xíʼin espíritu santo ndátuna koona chí ndiví ndiʼi tiempo, ta kán kaʼndachíñuna xíʼin ta̱ Cristo (1 Tes. 4:​13-17; Apoc. 20:6). w23.12 9 párr. 4, 5

Ña̱ tu̱ʼun “ndáara” xi̱xiniñúʼunaña ña̱ ka̱ʼa̱nna xa̱ʼa̱ na̱ soldado na̱ xi̱ndaa iin ñuu tasaá kǒo ki̱ʼvi na̱ yiví ña̱ ixandi̱va̱ʼana xíʼinna, ta na̱ ni̱xi̱yo ñuu kán kǒo níxindi̱ʼi̱-inina saáchi xi̱kunda̱a̱-inina ña̱ chí yéʼé ñuu kán ndíta na̱ soldado ndáanana. Ta saátu kéʼé Jehová xíʼin miíyó chi ndáara níma̱yó xíʼin ña̱ ndákanixi̱níyó tasaá va̱ʼaní kúniyó ta kǒo ña̱ sándi̱ʼi̱-iniyó (Sal. 4:8). Sana va̱ása ndiʼiví tu̱ndóʼo ña̱ yáʼayó nu̱ú, soo kivi sandíko Jehová iniyó nda̱a̱ táki̱ʼva ke̱ʼéra xíʼin ñá Ana (1 Sam. 1:​16-18). Tasaá viíka koo ña̱ ndakanixi̱níyó ta viíka koo ña̱ ndaka̱xinyó keʼéyó. ¿Ndáaña kivi keʼéyó? Nda̱a̱ táki̱ʼva íyo na̱ yiví na̱ ndóo iin ñuu kivi ka̱ʼa̱nna xíʼin na̱ soldado ña̱ kundaanana, saátu miíyó kivi ka̱ʼa̱nyó xíʼin Jehová ña̱ kundaara miíyó. Ná ka̱ʼa̱n ni̱ʼiyó xíʼinra nda̱a̱ ná sandíkora-iniyó (Luc. 11:9; 1 Tes. 5:17). Tá yáʼún nu̱ú iin tu̱ndóʼo ña̱ yo̱ʼvi̱ní, kǒo sandákoún ña̱ ka̱ʼún xíʼin Jehová tasaá kotoún ña̱ sándi̱kora-iniún ta kundaara níma̱ún xíʼin ña̱ ndákanixi̱níún (Rom. 12:12). w24.01 21 párr. 5, 6

Ta̱ Jesús chi̱kaa̱-inira ña̱ xo̱ʼvi̱ra, ña̱ ka̱ʼa̱n ndi̱va̱ʼana xíʼinra, ña̱ ka̱ʼa̱nna ña̱ vatá xa̱ʼa̱ra, ta ke̱ʼéra ndiʼi ña̱yóʼo chi xi̱kuni̱ra ndasakáʼnura ki̱vi̱ yivára. Ta kǒo níxi̱kukaʼan nu̱úra saáchi va̱ʼaní xi̱xiniso̱ʼora ndiʼi ña̱ xi̱kaʼa̱n yivára xíʼinra (Heb. 12:2). Saátu xi̱kunda̱a̱-inira ña̱ ta̱ Ndi̱va̱ʼa kúú ta̱ xi̱xitondosoñaʼá (Luc. 22:​2-4; 23:​33, 34). Kǒo níkuchiñu ta̱ Ndi̱va̱ʼa sandáʼvira ta̱ Jesús chi nda̱kúníva ni̱xi̱yo inira xíʼin Jehová. Xíʼin ña̱ ke̱ʼé ta̱ Jesús ni̱na̱ʼa̱ra ña̱ su̱ví ña̱ ndixa kúú ña̱ káʼa̱n ta̱ Ndi̱va̱ʼa ta saátu ni̱na̱ʼa̱ra ña̱ íyova na̱ nda̱kúní íyo ini xíʼin Jehová ni yáʼana nu̱ú tu̱ndóʼo ña̱ yo̱ʼvi̱ní. ¿Á kúni̱ún sakúsi̱íún-ini ta̱ rey Jesucristo? Tá saá, kǒo sandákoún ña̱ ndasakáʼnún ki̱vi̱ Jehová ta chindeétáʼún xíʼin inkana ña̱ kunda̱a̱-inina ndáa ki̱ʼva íyora. Tá ná keʼún ña̱yóʼo, saá kundikún yichi̱ ta̱ Jesús (1 Ped. 2:21). Ta nda̱a̱ táki̱ʼva ke̱ʼé ta̱ Jesús, kivi sakúsi̱íún-ini Jehová tasaá na̱ʼún ña̱ su̱ví ña̱ ndixa kúú ña̱ káʼa̱n ta̱ Ndi̱va̱ʼa. w24.02 11 párr. 12, 13

Ti̱xin 5 ku̱i̱ya̱ ña̱ ni̱ya̱ʼa, yáʼaka iin millón na̱ yiví ndakuchi ta ndu̱una testigo Jehová. Ña̱ ndataxiyó miíyó ndaʼa̱ Ndióxi̱ kúni̱ kachiña ña̱ ndaka̱xinyó kooyó discípulo ta̱ Jesús ta siʼna chiñu Ndióxi̱ kundi̱ʼi̱-iniyó xa̱ʼa̱. Ta̱ Jesús ni̱ka̱ʼa̱nra: “Tá iinna kúni̱na kundiku̱nna yi̱ʼi̱ ná sandákoona keʼéna ña̱ kúni̱ miína” (Mat. 16:24). Ña̱ tu̱ʼun griego ña̱ va̱xi nu̱ú texto yóʼo ña̱ káchi, “ná sandákoona keʼéna ña̱ kúni̱ miína” kivitu kooña “ná kǒo keʼéna ña̱ kútóo miína”. Tá ná ndataxiún miíún ndaʼa̱ Jehová saá ka̱ʼún xíʼinra ña̱ kǒo keʼún ña̱ʼa ña̱ kǒo kútóora (2 Cor. 5:​14, 15). Ña̱yóʼo kúni̱ kachiña ña̱ kǒo keʼún ña̱ʼa ña̱ kútóo ku̱ñún, tá kúú ña̱ ku̱su̱n xíʼin na̱ ta̱ʼán tindaʼa̱ xíʼún (Gál. 5:​19-21; 1 Cor. 6:18). ¿Á ña̱ yo̱ʼvi̱ní kúú ña̱ ndúkú Jehová nu̱ún? Va̱ásaví, tá ndixa kúʼvi̱-iniún xíniún Jehová saá keʼún ña̱ kútóora chi ña̱ va̱ʼa miívaún kúúña (Sal. 119:97; Is. 48:​17, 18). w24.03 2 párr. 1, 4

Jehová táxira espíritu santora ndaʼa̱ na̱ sákusi̱í-inira (Mat. 12:18). Ña̱kán kivi ndakanixi̱níyó xa̱ʼa̱ pregunta yóʼo: “¿Á náʼi̱ xíʼin ña̱ kéʼíi̱ ña̱ kúúmiíi̱ ña̱ va̱ʼa ña̱ táxi espíritu santo?”. Tá kúú, ¿á kamaní xi̱saún tá kúma̱níka sakúaʼún xa̱ʼa̱ Jehová? Tá kíʼún kuenta ña̱ kéʼún ña̱ va̱ʼa ña̱ kúúmií espíritu Ndióxi̱, saá kivi kandíxaún ña̱ kúsi̱íní-ini Jehová xíʼún. Íxakáʼnu-ini Jehová xa̱ʼa̱ na̱ sákusi̱í-inira ta va̱ʼa kéʼéra ña̱yóʼo xa̱ʼa̱ ña̱ ni̱xi̱ʼi̱ ta̱ Jesús xa̱ʼa̱yó (1 Tim. 2:​5, 6). Soo ni xa̱a̱ nda̱kuchiyó ta kándíxayó ña̱ ni̱xi̱ʼi̱ ta̱ Jesús xa̱ʼa̱yó, ¿ndáaña keʼéyó tá íxayo̱ʼvi̱ña xíʼinyó kandíxayó ña̱ kúsi̱íní-ini Jehová xíʼinyó? Ná ndakaʼányó chi níma̱yó kivi sandáʼviña miíyó. Soo ta̱ kǒo sándaʼvi miíyó kúú Jehová. Ta na̱ kándíxa ña̱ ni̱xi̱ʼi̱ ta̱ Jesús, taxira ku̱a̱ʼání ña̱ va̱ʼa ndaʼa̱na (Sal. 5:12; Rom. 3:26). w24.03 30 párr. 15; 31 párr. 17