¿Ndáa ki̱ʼva ndákuiin Jehová oraciónyó?

1, 2. ¿Ndáaña kivi ndakanixi̱níyó sava yichi̱?

¿Á XA̱A̱ ndákanixi̱níún sava yichi̱ á ndákuiin Jehová oración ña̱ kéʼún nu̱úra? Tá saá ndóʼún, su̱ví iinlá yóʼó ndóʼo saá. Chi ku̱a̱ʼání na̱ hermano xa̱a̱ ndákanixi̱nína xa̱ʼa̱ ña̱yóʼo tá yáʼana nu̱ú iin tu̱ndóʼo ña̱ yo̱ʼvi̱ní. Sanatu kivi ixayo̱ʼvi̱ña xíʼin miíyó ña̱ kotoyó ndáa ki̱ʼva ndákuiin Jehová oraciónyó tá yáʼayó nu̱ú iin tu̱ndóʼo ña̱ sáxo̱ʼvi̱ní miíyó.

² Nu̱ú artículo yóʼo sakúaʼayó nda̱chun kivi kandíxayó ña̱ ndákuiin Jehová oración ña̱ kéʼé na̱ ndásakáʼnu miíra (1 Juan 5:15). Ta saátu kotoyó nda̱chun sava yichi̱ kivi ndakanixi̱níyó ña̱ va̱ása ndákuiin Jehová oraciónyó, ta sakúaʼatuyó ndáa ki̱ʼva ndákuiin Jehová oraciónyó.

SAVA YICHI̱ KǑO NDAKUIIN JEHOVÁ ORACIÓNYÓ NDA̱A̱ TÁKI̱ʼVA KÚNI̱ MIÍYÓ

3. ¿Nda̱chun kúni̱ Jehová ná ka̱ʼa̱nyó xíʼinra?

³ Biblia káʼa̱nña xíʼinyó xa̱ʼa̱ Jehová ña̱ kúʼvi̱ní-inira xínira miíyó ta ndáyáʼviníyó nu̱úra (Ageo 2:7; 1 Juan 4:10). Xa̱ʼa̱ ña̱kán káʼa̱nra xíʼinyó ña̱ ná ka̱ʼa̱nyó xíʼinra ña̱ chindeétáʼanra xíʼinyó (1 Ped. 5:6, 7). Saátu kúni̱ra chindeétáʼanra xíʼinyó ña̱ yatin kooyó xíʼinra ña̱ va̱ʼa kundeé-iniyó ya̱ʼayó nu̱ú nda̱a̱ ndáaka tu̱ndóʼo ña̱ kúúmiíyó.

4. ¿Nda̱chun va̱ʼa kúnda̱a̱-iniyó ña̱ ndákuiin Jehová oración na̱ ndásakáʼnu miíra? (Koto na̱’ná).

⁴ Nu̱ú Biblia ndáni̱ʼíyó ku̱a̱ʼání ña̱ káʼa̱n xíʼinyó ndáa ki̱ʼva nda̱kuiin Jehová oración na̱ xi̱ndasakáʼnu miíra tiempo xi̱naʼá. Tá kúú ta̱ rey David ni̱xi̱yo ku̱a̱ʼání na̱ xi̱saa̱-ini xi̱xiniñaʼá ta ndiʼi tiempo xi̱ka̱ʼa̱nra xíʼin Jehová ña̱ ná chindeétáʼanra xíʼinra. Ta iin yichi̱ ni̱ka̱ʼa̱n-ndáʼvira xíʼin Jehová: “Jehová kuniso̱ʼo oración ña̱ kéʼíi̱ nu̱ún; káʼa̱n-ndáʼvii̱ xíʼún ña̱ ná kuniso̱ʼún yi̱ʼi̱ ta chindeétáʼún xíʼi̱n. Xa̱ʼa̱ ña̱ nda̱kúní íyo ndiʼi ña̱ kéʼún ndakuiin ña̱ káʼi̱n xíʼún” (Sal. 143:1). Jehová nda̱kuiinra oración ta̱ David ta chi̱ndeétáʼanra xíʼinra (1 Sam. 19:10, 18-20; 2 Sam. 5:17-25). Xa̱ʼa̱ ña̱kán xíʼin ndinuʼu-ini ta̱ David ni̱ka̱ʼa̱nra ña̱yóʼo: “Jehová íyo yatinra xíʼin ndiʼi na̱ káʼa̱n xíʼinra”. Ta saátu miíyó xíʼin ndinuʼu-iniyó ná kandíxayó ña̱ chindeétáʼan Jehová xíʼinyó (Sal. 145:18).

5. ¿Á xi̱ndakuiin Jehová oración na̱ xi̱ndoo xi̱naʼá nda̱a̱ táki̱ʼva xi̱kuni̱ miína? Ka̱ʼa̱n xa̱ʼa̱ iin ejemplo. (Koto na̱’ná).

⁵ Sava yichi̱ su̱ví nda̱a̱ táki̱ʼva kúni̱ miívíyó ndákuiin Jehová oración ña̱ kéʼéyó nu̱úra. Ta ña̱yóʼo kúú ña̱ ndo̱ʼo ta̱ apóstol Pablo. Ta̱yóʼo xi̱ndikaa̱ “iin ña̱ káa táki̱ʼva káa iin iñú ku̱ñura” ta ña̱yóʼo xi̱kuu iin tu̱ndóʼo ña̱ xi̱kuumiíra, ta u̱ni̱ yichi̱ ni̱ka̱ʼa̱n ndáʼvira xíʼin Jehová ña̱ ná sakútaʼaraña. ¿Á nda̱kuiin Jehová oración ña̱ ke̱ʼéra? Nda̱kuiinvaraña, soo su̱ví nda̱a̱ táki̱ʼva níxikuni̱ mií ta̱ Pablo saá ni̱xi̱yoña. Ni va̱ása níkindaa Jehová tu̱ndóʼo ña̱ xi̱kuumiíra, soo ta̱xivara ndee̱ ndaʼa̱ra ña̱ va̱ʼa nda̱kú koo inira xíʼinra (2 Cor. 12:7-10).

6. ¿Nda̱chun túviyó ña̱ kǒo ndákuiin Jehová oraciónyó sava yichi̱?

⁶ Sava yichi̱ ndúkúyó ña̱ʼa nu̱ú Jehová soo inkavaña kivi taxira ndaʼa̱yó. Soo kivi kandíxayó ña̱ kúnda̱a̱-ini Jehová ndáaña xíniñúʼuyó ta mií ña̱kán taxira ndaʼa̱yó. Ta nda̱a̱ kivi taxira ku̱a̱ʼáníka ña̱ʼa ndaʼa̱yó nu̱úka ña̱ ndu̱kúyó nu̱úra á ña̱ ndákanixi̱níyó xa̱ʼa̱ (Efes. 3:20). Kivi ndakuiinra oraciónyó iin ki̱vi̱ ña̱ kǒo ndátuyó ña̱ ndakuiinraña á keʼéra iin ña̱ʼa ña̱ kǒo níndakanixi̱níyó xa̱ʼa̱.

7. ¿Nda̱chun sava yichi̱ xíniñúʼu nasamayó ña̱ ndúkúyó nu̱ú Jehová? Ka̱ʼa̱n xa̱ʼa̱ iin ejemplo.

⁷ Sava yichi̱ kivi xa̱a̱yó nasamayó ña̱ ndúkúyó nu̱ú Jehová tá xáa̱yó kúnda̱a̱-iniyó xa̱ʼa̱ ña̱ kúni̱ra. Ná ka̱ʼa̱nyó xa̱ʼa̱ ña̱ ndo̱ʼo ta̱ hermano Martin Poetzinger. Tá sa̱kán íyo loʼo tiempo ti̱ndaʼa̱ra, chi̱ndaʼánara ku̱a̱ʼa̱nra chí campo ña̱ concentración nazi. Tá xa̱ʼa̱, ni̱ka̱ʼa̱nra xíʼin Jehová ña̱ ná chindeétáʼanra xíʼinra ña̱ va̱ʼa sañánara ta ndakutáʼanra xíʼin ñá síʼira ta kixáʼa tukura natúʼunra xíʼin na̱ yiví xa̱ʼa̱ra. Soo ni̱ya̱ʼa u̱vi̱ semana ta ki̱ʼinra kuenta ña̱ va̱ása ndákuiin Jehová oraciónra. Xa̱ʼa̱ ña̱kán ta̱ hermano Poetzinger ke̱ʼéra inka oración ta ni̱ka̱ʼa̱nra xíʼin Jehová: “Chindeétáʼan xíʼi̱n ña̱ va̱ʼa kunda̱a̱-inii̱ ndáaña kúni̱ún keʼíi̱”. Tasaá ki̱xáʼara ndákanixi̱níra ña̱ xóʼvi̱nítu na̱ hermano na̱ ñúʼu xíʼinra veʼeka̱a, saáchi ndíʼi̱ní-inina xa̱ʼa̱ ña̱ síʼina xíʼin xa̱ʼa̱ na̱ va̱lí se̱ʼena. Tasaá ni̱ka̱ʼa̱n ta̱ hermano Poetzinger xíʼin Jehová: “Tíxa̱ʼviníún xa̱ʼa̱ ña̱ ta̱xiún chiñu yóʼo ndaʼíi̱. Chindeétáʼan xíʼi̱n ña̱ va̱ʼa chika̱i̱ ndee̱ xíʼin na̱ hermano ta ndasandakúi̱-inina”. Ta ña̱yóʼo kúú ña̱ ke̱ʼévara ti̱xin 9 ku̱i̱ya̱ ña̱ xi̱ndika̱a̱ra kán.

8. ¿Ndáaña xíniñúʼu ndakaʼányó tá káʼa̱nyó xíʼin Jehová?

⁸ Ná ndakaʼányó chi íyo ña̱ kúni̱ Jehová keʼéra xa̱ʼa̱yó chí nu̱únínu. Iin ña̱yóʼo kúú ña̱ sandíʼi-xa̱ʼa̱ra ndiʼi ña̱ sáxo̱ʼvi̱ miíyó, tá kúú ña̱ ndeéní táan, ña̱ ndeéní kúún sa̱vi̱, ña̱ kíʼin kue̱ʼe̱ miíyó ta xíʼi̱yó. Ta ña̱ va̱ʼa saxínu Jehová ndiʼi ña̱yóʼo kuniñúʼura Reinora (Dan. 2:44; Apoc. 21:3, 4). Soo nani ndátura kixaa̱ ki̱vi̱ ña̱ keʼéra ndiʼi ña̱yóʼo, táxira ña̱ ná kaʼndachíñu ta̱ Ndi̱va̱ʼa ñuyǐví yóʼo (Juan 12:31; Apoc. 12:9).b Saáchi, tá ná sandíʼi-xa̱ʼa̱ Jehová ndiʼi ña̱ sáxo̱ʼvi̱ miíyó tiempo vitin, kivi ndakanixi̱ní na̱ yiví ña̱ va̱ʼava íyo ña̱ xáʼndachíñu ta̱ Ndi̱va̱ʼa. Ña̱kán, ni xóʼvi̱yó tiempo vitin soo Jehová táxivara ndee̱ ndaʼa̱yó ña̱ va̱ʼa kundeé-iniyó. Ná ka̱ʼa̱nyó xa̱ʼa̱ sava ña̱ʼa ña̱ kéʼé Jehová xa̱ʼa̱yó.

¿NDAÁ KI̱ʼVA NDÁKUIIN JEHOVÁ ORACIÓN ÑA̱ KÉʼÉYÓ?

9. ¿Ndáa ki̱ʼva chíndeétáʼan Jehová xíʼinyó ña̱ ndaka̱xin viíyó ña̱ keʼéyó? Ka̱ʼa̱n xa̱ʼa̱ iin ejemplo.

⁹ Táxira ña̱ ndíchi ndaʼa̱yó. Jehová káʼa̱nra taxira ña̱ ndíchi ndaʼa̱yó tasaá vií koo ña̱ ndaka̱xinyó keʼéyó. Ta tá xíniñúʼu ndaka̱xinyó iin ña̱ ndáyáʼviní keʼéyó saá kúú ña̱ xíniñúʼuníkayó ña̱ taxira ña̱ ndíchi ndaʼa̱yó, tá kúú ña̱ tindaʼa̱yó á va̱ása tindaʼa̱yó (Sant. 1:5). Ná kotoyó ña̱ ndo̱ʼo iin ñá loʼo kúa̱an ñá naní María.c Ñáyóʼo xi̱kusi̱íní-iniñá xi̱kachíñuñá nu̱ú Jehová ta xi̱kuuñá precursora regular tasaá xi̱nitáʼanñá xíʼin iin ta̱ hermano, ñáyóʼo káchiñá: “Tá ni̱ya̱ʼa tiempo va̱ʼaní ki̱xáʼandi̱ kítáʼanndi̱ ta loʼo tá loʼo ki̱xáʼa kútóo táʼanndi̱. Xi̱kunda̱a̱-inii̱ ña̱ xi̱niñúʼu ndaka̱xii̱n ndáaña keʼíi̱. Xa̱ʼa̱ ña̱kán ni̱ka̱ʼi̱n xíʼin Jehová ña̱ ná chindeétáʼanra xíʼi̱n, xi̱kunda̱a̱-inii̱ ña̱ miíi̱ kúú ñá xi̱niñúʼu ndaka̱xin ndáaña keʼíi̱”. Ñá María ki̱ʼinñá kuenta ña̱ va̱ʼaníva nda̱kuiin Jehová oración ña̱ ke̱ʼéñá nu̱úra ta saátu ta̱xira ña̱ ndíchi ndaʼa̱ñá. ¿Ndáa ki̱ʼva chi̱ndeétáʼanra xíʼinñá? Ñáyóʼo na̱ndukúñá ña̱ xi̱kuni̱ñá kunda̱a̱-iniñá xa̱ʼa̱ nu̱ú sava tutu ña̱ kúúmiíyó ta nda̱ni̱ʼíñá sava artículo ña̱ va̱ʼaní chi̱ndeétáʼan xíʼinñá xa̱ʼa̱ ña̱ xi̱kuni̱ñá kunda̱a̱-iniñá xa̱ʼa̱. Saátu siʼíñá va̱ʼaní consejo ta̱xiñá ndaʼa̱ñá ña̱ chindeétáʼan xíʼinñá. Ta tándi̱ʼi, va̱ʼaní íyo ña̱ nda̱kaxin ñá María.

10. Nda̱a̱ táki̱ʼva káchi Filipenses 4:13, ¿ndáa ki̱ʼva chíndeétáʼan Jehová xíʼinyó? Ka̱ʼa̱n xa̱ʼa̱ iin ejemplo. (Koto na̱ʼná).

¹⁰ Táxira ndee̱ ndaʼa̱yó ña̱ va̱ʼa kundeé-iniyó. Nda̱a̱ táki̱ʼva ke̱ʼé Jehová xíʼin ta̱ apóstol Pablo saátu kivi taxira ndee̱ ndaʼa̱yó ña̱ va̱ʼa kundeé-iniyó ya̱ʼayó nu̱ú tu̱ndóʼo (kaʼvi Filipenses 4:13). Ná kotoyó ndáa ki̱ʼva chi̱ndeétáʼan Jehová xíʼin iin ta̱ hermano ta̱ naní Benjamin. Nani tá loʼovíra miíra xíʼin na̱ veʼera ku̱a̱ʼání ku̱i̱ya̱ ni̱xi̱yona iin lugar nu̱ú xi̱ndakiʼinna na̱ yiví na̱ xi̱kee inka ñuu chí África á ña̱ káʼa̱nna xíʼin campo de refugiado. Ta̱yóʼo káchira: “Ndiʼi tiempo xi̱ka̱ʼi̱n xíʼin Jehová ña̱ ná chindeétáʼanra xíʼi̱n ña̱ keʼíi̱ ña̱ va̱ʼa. Jehová nda̱kuiinra oración ña̱ ke̱ʼíi̱ nu̱úra, saáchi sa̱ndíkora-inii̱. Ta chi̱ndeétáʼanra xíʼi̱n ña̱ ndakú koo inii̱ ña̱ va̱ʼa natúʼi̱n xa̱ʼa̱ra xíʼin na̱ yiví. Ta saátu ta̱xira tutu ña̱ tává na̱ ñuura ndaʼíi̱ ña̱ va̱ʼa chindeétáʼanña xíʼi̱n ña̱ ndakundeéi̱ ndasakáʼnui̱ra”. Ta̱yóʼo káchikara: “Ña̱ ka̱ʼvii̱ xa̱ʼa̱ ña̱ ndo̱ʼo na̱ hermano ta ndáa ki̱ʼva chi̱ndeétáʼan Jehová xíʼinna ña̱yóʼo chi̱ndeétáʼanña xíʼi̱n ña̱ va̱ása ndakava-inii̱ ta nda̱kú koo inii̱ xíʼin Jehová”.

11, 12. ¿Ndáa ki̱ʼva xíniñúʼu Jehová na̱ hermanoyó ña̱ ndakuiinra oración ña̱ kéʼéyó nu̱úra? (Koto na̱ʼná).

¹¹ Xíniñúʼura ná ku̱ʼvayó xíʼin na̱ ñaniyó ña̱ va̱ʼa chindeétáʼanna xíʼinyó. Ñuú tá kúma̱ní kuvi ta̱ Jesús ni̱ka̱ʼa̱n ndáʼvira xíʼin Jehová. Ta ni̱ka̱ʼa̱nra xíʼinra ña̱ ná va̱ása taxira ña̱ ka̱ʼa̱n na̱ yiví xa̱ʼa̱ra ña̱ ni̱ka̱ʼa̱nra ña̱ va̱ása va̱ʼa xa̱ʼa̱ mií Jehová. Nu̱úka ña̱ keʼé Jehová ña̱yóʼo, va̱ʼaka chi̱ndaʼára iin ángel ña̱ va̱ʼa ndasandakúra-ini ta̱ Jesús (Luc. 22:42, 43). Ta ki̱ʼva saátu kivi kuniñúʼu Jehová na̱ hermanoyó ña̱ va̱ʼa chika̱a̱na ndee̱ xíʼinyó, kivi ku̱ʼu̱nna kotona miíyó á ka̱ʼa̱nna xíʼinyó xíʼin teléfono. Ndiʼiyó kivi ka̱ʼa̱n tu̱ʼun ña̱ kivi chika̱a̱ ndee̱ xíʼin na̱ hermanoyó (Prov. 12:25).

¹² Ná ka̱ʼa̱nyó xa̱ʼa̱ ña̱ ndo̱ʼo iin ñá hermana ñá naní Míriam. Tá xa̱a̱ ni̱ya̱ʼa loʼo semana ña̱ ni̱xi̱ʼi̱ yiíñá, ñáyóʼo ni̱xi̱yo mitúʼunñá veʼeñá ta xa̱ʼa̱ ña̱kán ki̱xáʼa kúsuchíní-iniñá ta ndákavaní-iniñá. Ñáyóʼo xi̱xakuníñá ta xi̱kuni̱ñá natúʼunñá xa̱ʼa̱ ña̱ xi̱ndoʼoñá xíʼin inkana. Ñáyóʼo káchiñá: “Xa̱ʼa̱ ña̱ xi̱kusuchíní-inii̱ ta xi̱xakuníi̱, va̱ása níxi̱yo ndeéi̱ ña̱ kiʼi̱n teléfono ta ka̱ʼi̱n xíʼin na̱ hermano. Ña̱kán ni̱ka̱ʼi̱n xíʼin Jehová ta nani káʼa̱nkai̱ xíʼinra ki̱xaa̱ iin llamada nu̱ú teléfonoi̱. Iin ta̱ anciano ta̱ va̱ʼaní kítáʼan xíʼinndi̱ kúú ta̱ ni̱ka̱ʼa̱n xíʼi̱n”. Ta̱ anciano yóʼo xíʼin ñá síʼira va̱ʼaní sa̱ndíkona-ini ñá hermana yóʼo. Ta ñá hermana yóʼo kándíxaníñá ña̱ mií Jehová chi̱kaa̱-ini ta̱ hermano yóʼo ña̱ ka̱ʼa̱nra xíʼinñá.

13. Ka̱ʼa̱n ndáa ki̱ʼva xíniñúʼu Jehová na̱ kǒo ndásakáʼnu miíra ña̱ va̱ʼa ndakuiinra oraciónyó.

¹³ Kivi kuniñúʼura na̱ yiví na̱ kǒo ndásakáʼnu miíra ña̱ va̱ʼa chindeétáʼanna xíʼinyó (Prov. 21:1). Sava yichi̱ Jehová kivi kuniñúʼura na̱ kǒo ndásakáʼnu miíra ña̱ va̱ʼa ndakuiinra oración na̱ káchíñu nu̱úra. Tá kúú, Jehová xi̱niñúʼura ta̱ rey Artajerjes ña̱ va̱ʼa chindeétáʼanra xíʼin ta̱ Nehemías ña̱ ndikóra ñuu Jerusalén ta chindeétáʼanra xíʼin na̱ ñuu ña̱ va̱ʼa sandáʼana ña̱ ñuu yóʼo (Neh. 2:3-6). Ta saátu tiempo vitin, Jehová xíniñúʼura na̱ va̱ása ndásakáʼnu miíra ña̱ va̱ʼa chindeétáʼanna xíʼinyó.

14. ¿Ndáa ki̱ʼva chíndeétáʼan ña̱ ndo̱ʼo ñá Soo Hing xíʼún? (Koto na̱ʼná).

¹⁴ Iin ñá hermana ñá naní Soo Hing ki̱ʼinñá kuenta ndáa ki̱ʼva xi̱niñúʼu Jehová iin ta̱ doctor ña̱ va̱ʼa chi̱ndeétáʼanra xíʼinñá. Tá ni̱xi̱yo loʼo ta̱ loʼo se̱ʼeñá, na̱ doctor xi̱nina ña̱ kúúmiíra ku̱a̱ʼání kue̱ʼe̱ ña̱ sásana xi̱níra. Xa̱ʼa̱ ña̱kán ndo̱ʼora iin tu̱ndóʼo ña̱ ndeéní, nda̱kavara nu̱ú iin lugar ña̱ súkunní. Xa̱ʼa̱ ña̱kán ñá Soo Hing xíʼin yiíñá kǒo níkachíñukana ña̱ va̱ʼa kundaanara, ña̱kán ndi̱ʼi xu̱ʼúnna. Xa̱ʼa̱ ña̱ ndeéní tu̱ndóʼo xi̱ndika̱a̱na nu̱ú, ñá Soo Hing ni̱ka̱ʼa̱nñá ña̱ kǒo kúndeéka-iniñá xíʼin ña̱yóʼo. Ña̱kán ni̱ka̱ʼa̱nñá xíʼin Jehová xa̱ʼa̱ ndiʼi ña̱ ndóʼoñá ta ni̱ka̱ʼa̱nñá xíʼinra ña̱ ná chindeétáʼanra xíʼinñá. Ta̱ doctor ndu̱kúra ki̱ʼva ña̱ va̱ʼa chindeétáʼan na̱ chíñu xíʼinna, ta saátu ndu̱kúna iin veʼe nu̱ú loʼoní xu̱ʼún cháʼvina ña̱ va̱ʼa koona. Ñá Soo Hing káchiñá: “Ki̱ʼinndi̱ kuenta ndáa ki̱ʼva chi̱ndeétáʼan Jehová xíʼinndi̱ tá ni̱ya̱ʼandi̱ nu̱ú tu̱ndóʼo yóʼo ta xíʼin ña̱yóʼo ki̱ʼi̱n kuenta ña̱ xíniso̱ʼova Jehová oraciónyó” (Sal. 65:2).

NÁ KANDÍXAYÓ ÑA̱ NDÁKUIINVA JEHOVÁ ÑA̱ KÁʼA̱NYÓ XÍʼINRA

15. ¿Ndáaña chi̱ndeétáʼan xíʼin iin ñá hermana ña̱ ku̱ndaa̱-iniñá ña̱ ndákuiinva Jehová oraciónñá?

¹⁵ Sava yichi̱ túviyó ña̱ va̱ása ndákuiin Jehová oración ña̱ kéʼéyó nu̱úra nda̱a̱ táki̱ʼva kúni̱yó. Soo ndákuiinvara oraciónyó nda̱a̱ táki̱ʼva kúni̱ miíra ña̱ va̱ʼa chindeétáʼanra xíʼinyó ña̱ nda̱kú koo iniyó xíʼinra. Ña̱kán ná kiʼin va̱ʼayó kuenta ndáa ki̱ʼva ndákuiin Jehová oraciónyó. Iin ñá hermana ñá naní Yoko xi̱ndakanixi̱níñá ña̱ va̱ása níxi̱ndakuiin Jehová oraciónñá. Ña̱kán ki̱xáʼañá káʼyíñá ndiʼi ña̱ ndúkúñá nu̱ú Jehová nu̱ú iin tutu loʼo. Tá ni̱ya̱ʼa tiempo nda̱ndikó tukuñá xi̱toñá ndiʼi ña̱ ka̱ʼyiñá nu̱ú tutu yóʼo ta ki̱ʼinñá kuenta ña̱ nda̱kuiinva Jehová ku̱a̱ʼá oración ña̱ ke̱ʼéñá nu̱úra, saátu nda̱kuiinra oración ña̱ xa̱a̱ ku̱a̱ʼání tiempo ke̱ʼéñá nu̱úra. Ña̱kán ndáyáʼviní taváyó tiempo ña̱ kotoyó ndáa ki̱ʼva ndákuiin Jehová oraciónyó (Sal. 66:19, 20).

16. ¿Ndáa ki̱ʼva náʼa̱yó ña̱ kándíxaníyó Jehová tá káʼa̱nyó xíʼinra? (Hebreos 11:6).

¹⁶ Tá ndúkúyó ña̱’a nu̱ú Jehová kándíxaníyó ña̱ taxivaraña ndaʼa̱yó, soo tá su̱ví ña̱ ndúkúyó nu̱ú Jehová kúú ña̱ ta̱xira ndaʼa̱yó ná ndakiʼinvayóña (kaʼvi Hebreos 11:6). Ná kotoyó ña̱ xi̱kuni̱ ta̱ Mike xíʼin ñá Chrissy keʼéna, na̱yóʼo xi̱kuni̱na ku̱ʼu̱nna kachíñuna Betel. Ta̱ Mike káchira: “Ku̱a̱ʼá yichi̱ chi̱ndaʼándi̱ solicitud ta xi̱ka̱ʼa̱n ni̱ʼindi̱ xíʼin Jehová xa̱ʼa̱ ña̱yóʼo, soo kǒo níkanavína ndi̱ʼi̱ ña̱ ku̱ʼu̱nndi̱ Betel”. Ta̱ Mike xíʼin ñá Chrissy ka̱ndíxanína ña̱ viíní kuniñúʼu Jehová na̱yóʼo. Ña̱kán chi̱ka̱a̱nína ndee̱ ña̱ kachíñuna nu̱ú Jehová: xi̱kuuna precursor regular ti̱xin iin congregación nu̱ú xi̱xiniñúʼunína na̱ natúʼun xa̱ʼa̱ Ndióxi̱, ta chi̱ndeétáʼanna xíʼin na̱ hermano ña̱ ixava̱ʼana veʼe nu̱ú ndásakáʼnuyó Ndióxi̱, ta vitin ta̱ hermano yóʼo kúúra superintendente ña̱ circuito. Ta̱ Mike káchira: “Su̱ví ndiʼi tiempoví ndákuiin Jehová oraciónndi̱ nda̱a̱ táki̱ʼva kúni̱ miíndi̱, soo ña̱ ta̱xira ndaʼa̱ndi̱ va̱ʼaní chíndeétáʼanña xíʼinndi̱ ña̱ ndasakáʼnundi̱ra ta ña̱yóʼo sákusi̱íníña-inindi̱”.

17, 18. Nda̱a̱ táki̱ʼva káchi Salmo 86:6, 7, ¿ndáaña kándíxaníyó?

¹⁷ (Kaʼvi Salmo 86:6, 7).d Ta̱ David xi̱kandíxaníra ña̱ xi̱xiniso̱ʼo Jehová oración ña̱ xi̱keʼéra nu̱úra ta saátu ña̱ xi̱ndakuiinraña. Ta saátu miíún kivi kandíxaún ña̱ ndakuiin Jehová oración ña̱ kéʼún nu̱úra. Nu̱ú artículo yóʼo sa̱kuaʼayó ña̱ mií Jehová kivi taxira ndee̱ xíʼin ña̱ ndíchi ndaʼa̱yó ña̱ va̱ʼa kuchiñuyó ya̱ʼayó nu̱ú nda̱a̱ ndáaka tu̱ndóʼo ña̱ ná kixi nu̱úyó. Ta saátu sa̱kuaʼayó ña̱ kivi kuniñúʼura na̱ hermanoyó xíʼin na̱ yiví na̱ kǒo ndásakáʼnu miíra ña̱ va̱ʼa chindeétáʼanna xíʼinyó.

¹⁸ Ni sava yichi̱ kǒo ndákuiin Jehová oraciónyó nda̱a̱ táki̱ʼva kúni̱ miíyó, soo kándíxavayó ña̱ ndakuiinraña. Táxira mií ña̱ xíniñúʼuyó ta mií tiempo ña̱ xíniñúʼuyóña táxiraña ndaʼa̱yó. Ña̱kán xíʼin ndinuʼu-iniyó ná ka̱ʼa̱nyó xíʼin Jehová ta ná kandíxayó ña̱ kundaara miíyó tiempo vitin, ta chí nu̱únínu taxira ndiʼi ña̱ xíniñúʼuyó (Sal. 145:16).