Ná kiʼinníyó kuenta xíʼin ndixi

KU̱A̱ʼÁNÍ ña̱ va̱ʼa ta̱xi Jehová ndaʼa̱yó ta kúsi̱íní-iniyó xa̱ʼa̱ ña̱yóʼo. Soo, miíyó kúú na̱ xíniñúʼu ndaka̱xin ndáa ki̱ʼva kuniñúʼuyóña, ta iin ña̱yóʼo kúú ndixi. Ña̱yóʼo káʼa̱n Biblia: “Va̱ʼaní kúnina tá xíxina si̱táva̱ʼa, ta vino kúú tá sákusi̱í-inina” (Ecl. 10:19; Sal. 104:15). Sava yichi̱ xítoyó ña̱ ku̱a̱ʼání ndixi xíʼi na̱ yiví, saáchi ñuu nu̱ú íyona á costumbre ña̱ kúúmiína táxiña ña̱ koʼona ku̱a̱ʼání ndixi. Ta miíyó na̱ ndásakáʼnu Ndióxi̱, ¿ndáaña ndákanixi̱níyó xa̱ʼa̱ ña̱yóʼo?

Tá ndáka̱xinyó ña̱ koʼoyó ndixi, ná kǒo kundiku̱nyó costumbre ña̱ kéʼé na̱ yiví ñuu nu̱ú íyoyó chi xíniñúʼu kiʼinyó kuenta ndáaña ndákanixi̱ní Ndióxi̱ xa̱ʼa̱ ndixi. Ta, tá kéʼéyó ña̱yóʼo saá kúú ña̱ si̱íní kooyó.

Sana xa̱a̱ kíʼinyó kuenta ña̱ iníísaá ñuyǐví íyo ku̱a̱ʼání na̱ yiví na̱ chi̱toní xíʼi ndixi ta ku̱a̱ʼánírá xíʼina. Savana xíʼina xa̱ʼa̱ ña̱ va̱ʼaní kúnina, savatuna xíʼina xa̱ʼa̱ ña̱ kúni̱na nandósó-inina xa̱ʼa̱ tu̱ndóʼo ña̱ kúúmiína. Ta íyotu sava lugar nu̱ú íyo ku̱a̱ʼání ndixi ta ku̱a̱ʼání na̱ yiví xáʼa̱n kán ña̱ koʼonará tasaá náʼa̱na ña̱ va̱ása yíʼvina ta kivi keʼéna ña̱ kúni̱ miína.

Soo, miíyó na̱ ndásakáʼnu Jehová íyo ku̱a̱ʼání consejo ña̱ va̱xi nu̱ú tu̱ʼunra ña̱ kivi chindeétáʼan xíʼinyó. Tá kúú, káʼa̱nña xíʼinyó ndáa tu̱ndóʼo kúú ña̱ kixi nu̱úyó tá ku̱a̱ʼání ndixi xíʼiyó. Proverbios 23:​29-35 káʼa̱nña xa̱ʼa̱ ta̱a ta̱ ku̱a̱ʼání ndixi xi̱ʼi ta ni̱xi̱nira xa̱ʼa̱ ña̱yóʼo ku̱a̱ʼání tu̱ndóʼo ki̱xi nu̱úra.a Iin ta̱ anciano ta̱ íyo chí Europa ta̱ naní Daniel, nátúʼunra xa̱ʼa̱ ña̱ ndo̱ʼora tá kúma̱níka koora testigo, ta̱yóʼo káchira: “Ku̱a̱ʼání ndixi xi̱xiʼii̱ ta xa̱ʼa̱ ña̱kán va̱ása níndaka̱xin viíi̱ ña̱ keʼíi̱, ku̱a̱ʼání tu̱ndóʼo ki̱xi nu̱úi̱. Tá ndákaʼíi̱n xa̱ʼa̱ ña̱yóʼo ndákavaní-inii̱ ta sáa̱níi̱”.

¿Ndáaña kivi chindeétáʼan xíʼinyó ña̱ vií ndaka̱xinyó ña̱ keʼéyó tasaá va̱ása koʼoyó ku̱a̱ʼání ndixi? Ña̱ kivi chindeétáʼan xíʼinyó kúú, ña̱ ndakanixi̱níyó táki̱ʼva ndákanixi̱ní Ndióxi̱.

Ná kotoyó ndáaña káʼa̱n Biblia xa̱ʼa̱ ndixi, ta saátu kotoyó ndáa xa̱ʼa̱ kúú ña̱ xíʼi sava na̱ yiví ku̱a̱ʼání ndixi.

ÑA̱ KÁʼA̱N BIBLIA

Tu̱ʼun Ndióxi̱ káʼa̱nña xíʼinyó ña̱ va̱ʼava koʼoyó loʼo ndixi, ta nda̱a̱ va̱ʼa kuniyó tá ná koʼoyó loʼo táyóʼo. Eclesiastés 9:7 káchiña: “Kúáʼan kuxún ta kusi̱í-iniún koʼún vino”. Tu̱ʼun Ndióxi̱ káʼa̱nña xa̱ʼa̱ ta̱ Jesús ña̱ sava yichi̱ xi̱ʼira vino, ta saátu káʼa̱nña xa̱ʼa̱ inka na̱ xi̱ndasakáʼnu Ndióxi̱ ña̱ xi̱ʼina táyóʼo (Mat. 26:​27-29; Luc. 7:34; 1 Tim. 5:23).

Su̱ví inkáchi kúú ña̱ koʼún loʼo ndixi xíʼin ña̱ xi̱niiún, saáchi káxiní káʼa̱n Biblia xíʼinyó: “Va̱ása xi̱niindó xíʼin vino” (Efes. 5:18). Ta saátu káʼa̱nña: “Na̱ xíʼi nda̱a̱ xíniina […] va̱ása ki̱ʼvina ti̱xin Reino Ndióxi̱” (1 Cor. 6:10). Jehová kǒo kútóora ña̱ ku̱a̱ʼání koʼoyó ta nda̱a̱ xi̱niiyó. Nu̱úka ña̱ keʼéyó nda̱a̱ táki̱ʼva kéʼé inka na̱ yiví, va̱ʼaka ná ndakanixi̱níyó táki̱ʼva ndákanixi̱ní Ndióxi̱.

Ku̱a̱ʼánína káʼa̱n ña̱ kivi koʼona ku̱a̱ʼání ndixi ta kǒo xíniivína, soo, i̱yoní ña̱ ka̱ʼa̱nyó saá. Saáchi Biblia káʼa̱nña, na̱ ta̱a á ná ñaʼá na̱ xíʼi ku̱a̱ʼání ndixi, kivi ki̱ʼvina ku̱a̱chi nu̱ú Ndióxi̱ tasaá kǒo kivi kutáʼan va̱ʼakana xíʼinra (Tito 2:3; Prov. 20:1). Ta̱ Jesús ni̱ka̱ʼa̱nra ña̱ na̱ yiví na̱ xíʼiní ndixi va̱ása koona ñuyǐví xa̱á (Luc. 21:​34-36). Ña̱kán, ¿ndáaña kivi keʼé na̱ ndásakáʼnu Ndióxi̱ tá xa̱a̱ kúni̱na koʼona ndixi?

NDA̱CHUN XÍʼÚN, NDA̱SAARÁ XÍʼÚN TA Á CHI̱TO̱NÍ XÍʼÚN

Sava yichi̱ kivi ixayo̱ʼvi̱ña xíʼinyó kunda̱a̱-iniyó nda̱saa ndixi koʼoyó tá ku̱a̱ʼánírá xíʼi na̱ yiví ñuu nu̱ú íyoyó. Miíyó na̱ ndásakáʼnu Jehová, kíʼinníyó kuenta ña̱ ki̱ʼvaní ná koo ña̱ xíxiyó xíʼin ña̱ xíʼiyó chi kúni̱yó sákusi̱íyó-inira. Biblia táxiña consejo yóʼo ndaʼa̱yó: “Ña̱kán tá na̱ xíxi kúúndó, á na̱ xíʼi kúúndó, á nda̱a̱ ndáaka ña̱ kéʼéndó, keʼéndóña ña̱ va̱ʼa ná ndukáʼnu Ndióxi̱” (1 Cor. 10:31). Ná kotoyó sava pregunta, ta saátu kotoyó ndáaña káʼa̱n Ndióxi̱ nu̱ú Biblia ña̱ kivi chindeétáʼan xíʼinyó.

¿Á xíʼi̱ ndixi xa̱ʼa̱ ña̱ kúnii̱ kindo̱o vaʼi̱ xíʼin inkana? Éxodo 23:2 káʼa̱nña: “Kǒo [keʼéndó] nda̱a̱ táki̱ʼva kéʼé inkana”. Nu̱ú versículo yóʼo, Jehová ni̱ka̱ʼa̱nra xíʼin na̱ ñuu Israel ña̱ ná kǒo keʼéna ña̱ kini nda̱a̱ táki̱ʼva kéʼé inka na̱ yiví. Ta ña̱ ni̱ka̱ʼa̱nra xíʼinna chíndeétáʼanña xíʼinyó tiempo vitin. Tá ná kixáʼayó keʼéyó nda̱a̱ táki̱ʼva kéʼé inkana, kivi ki̱ʼviyó ku̱a̱chi nu̱ú Ndióxi̱ ta kivi kuxíkayó nu̱úra (Rom. 12:2).

¿Á xíʼii̱ ña̱ va̱ʼa naʼi̱ nu̱ú inkana ña̱ va̱ʼaní xíʼii̱? Íyo sava ñuu tá ku̱a̱ʼání xíʼin na̱ yiví ta chi̱toní xíʼina ña̱ va̱ʼava kúúña nu̱úna (1 Ped. 4:3). Ná kotoyó ña̱ káʼa̱n Ndióxi̱ xíʼinyó nu̱ú 1 Corintios 16:13: “Kundito va̱ʼa nu̱úndó, ndakúní koondó xíʼin ña̱ kándíxandó Ndióxi̱, ndakú koo inindó, ta ndakúní koondó”. Soo, ¿ndáaña ndóʼo na̱ yiví tá ku̱a̱ʼání ndixi xíʼina? Va̱ása viíka íyo ña̱ ndákanixi̱nína ta ni va̱ása vií íyo ña̱ ndáka̱xinna keʼéna. Na̱ xíʼi ku̱a̱ʼá ndixi, su̱ví na̱ ndúndakú-iniví kúúna chi táki̱ʼva íyo na̱ kúvita-iniva saá íyona. Isaías 28:7 káʼa̱nña ña̱ na̱ xíʼi ku̱a̱ʼá ndixi va̱ása xíni̱na ndáaña kéʼéna.

Tá kúni̱yó kuumiíyó ndee̱ ña̱ keʼéyó ña̱ va̱ʼa, xíniñúʼu ka̱ʼa̱nyó xíʼin Jehová ña̱ ná chindeétáʼanra xíʼinyó ña̱ kuenta kooyó ta saátu ña̱ kandíxaníyóra (Sal. 18:32). Ña̱kán, ná kiʼin va̱ʼayó kuenta xíʼin ña̱ ndáka̱xinyó keʼéyó saáchi sava ña̱ʼa kivi sákuxíkaña miíyó nu̱ú Jehová. Ña̱yóʼo kúú ña̱ ke̱ʼé ta̱ Jesús tá ki̱xira nu̱ú ñuʼú yóʼo, ku̱a̱ʼání na̱ yiví xi̱xininara ña̱ nda̱kúní ni̱xi̱yo inira.

¿Á xíʼii̱ xa̱ʼa̱ ña̱ kúnii̱ nandósó-inii̱ xa̱ʼa̱ tu̱ndóʼo ña̱ kúúmiíi̱? Iin ta̱ ka̱ʼyí ña̱ Salmo ni̱ka̱ʼa̱nra xíʼin Jehová: “Tá ki̱xáʼa ni̱ndi̱ʼi̱ní-inii̱ xíʼin tu̱ndóʼo ña̱ kúúmiíi̱, miíún [Jehová] sa̱ndíkoún-inii̱” (Sal. 94:19). Tá íyo iin ña̱ sándi̱ʼi̱ní-iniún, va̱ása koʼoníún ndixi, va̱ʼaka ka̱ʼa̱n xíʼin Jehová ña̱ ná chindeétáʼanra xíʼún. Ta iin ña̱ kivi keʼún kúú ña̱ ka̱ʼa̱n ni̱ʼún xíʼinra. Ña̱ va̱ʼaní chíndeétáʼan xíʼin savana kúú ña̱ ndúkuna consejo nu̱ú iin na̱ hermano na̱ xa̱a̱ ku̱a̱ʼání tiempo ndásakáʼnu Jehová. Tá iin na̱ yiví xíʼina ña̱ va̱ʼa ya̱ʼana nu̱ú iin tu̱ndóʼo, loʼoní ndee̱ kuumiína ña̱ keʼéna ña̱ va̱ʼa á ña̱ ya̱ʼana nu̱ú tu̱ndóʼo (Os. 4:11). Ta̱ Daniel ta̱ xa̱a̱ ni̱ka̱ʼa̱nyó xa̱ʼa̱ káʼa̱nra: “Xi̱kuumiíi̱ kue̱ʼe̱ ña̱ naní ansiedad ta xi̱ndakavaní-inii̱ tá xi̱ndakaʼíi̱n xa̱ʼa̱ ña̱ va̱ása va̱ʼa xi̱keʼíi̱. Xi̱xiʼi̱ ña̱ va̱ʼa nandósó-inii̱ xa̱ʼa̱ tu̱ndóʼo ña̱ xi̱kuumiíi̱, soo tá xi̱xiʼi̱ ku̱a̱ʼákava tu̱ndóʼo xi̱kixi nu̱úi̱. Xa̱ʼa̱ ña̱yóʼo ku̱a̱ʼání na̱ migoi̱ va̱ása níxikitáʼankana xíʼi̱n”. Soo, ¿ndáaña chi̱ndeétáʼan xíʼinra? Ta̱yóʼo káʼa̱nra: “Ki̱ʼi̱n kuenta ña̱ xi̱niñúʼu ka̱ʼi̱n xíʼin Jehová, su̱ví ña̱ koʼii̱ ndixi. Ta Jehová kúú ta̱ chi̱ndeétáʼan xíʼi̱n ña̱ ku̱chiñui̱ ni̱yaʼi̱ nu̱ú tu̱ndóʼo ña̱ xi̱kuumiíi̱”. Ni túviyó ña̱ kǒo kuchiñuyó ya̱ʼayó nu̱ú tu̱ndóʼo, Jehová chindeétáʼanvara xíʼinyó (Filip. 4:​6, 7; 1 Ped. 5:7).

Tá miíún kúú na̱ kútóo koʼo ndixi sava yichi̱, kivi ndakanixi̱níún xa̱ʼa̱ pregunta yóʼo. “¿Á xa̱a̱ káʼa̱n iin na̱ migoi̱ xíʼi̱n á iin na̱ táʼi̱n ña̱ ndíʼi̱ní-inina xa̱ʼíi̱ chi ku̱a̱ʼání ndixi xíʼii̱?”. Tá ndáka̱tu̱ʼunna ña̱yóʼo miíyó, ña̱yóʼo náʼa̱ña ña̱ ku̱a̱ʼání ndixi xíʼiyó ta sana ta̱ʼán kiʼinyó kuenta xíʼinña. “¿Á ku̱a̱ʼáka ndixi xíʼii̱ vitin nu̱úka tá xi̱xiʼii̱ tá ya̱chi̱?”. Sana túviyó ña̱ va̱ása ku̱a̱ʼá ndixi xíʼiyó, soo sana xa̱a̱ ku̱a̱ʼávara xíʼiyó. “¿Á ndi̱ku̱n kúnii̱ koʼii̱ ndixi tá yáʼa loʼo ki̱vi̱?”. Ña̱yóʼo náʼa̱ña ña̱ xa̱a̱ iin vicio kúúmiíún, tásaá ndóʼún xíniñúʼún ña̱ chindeétáʼan na̱ doctor xíʼún ña̱ va̱ʼa sandákoún ña̱ xíʼún ndixi.

Íyo sava na̱ hermano na̱ kǒo kúni̱ ki̱ʼvi ku̱a̱chi ña̱kán kǒo xíʼina ndixi. Íyotu inkana kǒo kútóona ki̱ʼva ña̱ xáʼa̱nrá, ña̱kán kǒo xíʼinará. Tá xíni̱yó iin na̱ hermano na̱ kǒo xíʼi ndixi ña̱ xíniñúʼu keʼéyó kúú ña̱ ixato̱ʼóyóna ta kǒo ka̱ʼa̱n kúáchiyó xa̱ʼa̱na.

Íyotu inkana viíní ndáka̱xinna ndáaña kúú ña̱ keʼéna, tá kúú sana xíʼivana soo loʼovará xíʼina, á sanatu chíka̱a̱na ndee̱ ña̱ va̱ása koʼo chi̱tonínará á tá xíxi kuitína loʼorá xíʼina. Ta savana iin yichi̱ kuití xíʼina nu̱ú ña̱ iin semana. Inkana ndáka̱xinna ndáa ndixi kúú tá kivi koʼona ta ndáatá va̱ása kivi koʼona. Savana xíʼina vino á cerveza soo loʼovará xíʼina ta kǒo xíʼina ndixi tá ndeéka. Savatuna kǒo xíʼinará ni chítáʼanna jugo xíʼinrá á inkaka ña̱ʼa. Va̱ʼaníka tá xa̱a̱ ya̱chi̱ka ndákanixi̱níyó nda̱saa ndixi koʼoyó. Iin na̱ hermano na̱ xa̱a̱ kúnda̱a̱-ini ndáaña kúú ña̱ keʼéna kǒo xíniñúʼu kukaʼan nu̱úna xa̱ʼa̱ ña̱ nda̱kaxinna keʼéna.

Soo, saátu xíniñúʼu ixato̱ʼóyó ña̱ ndákanixi̱ní inkana. Tá kúú, Romanos 14:21 káchiña: “Va̱ʼaka kǒo kuxún ku̱ñu ni kǒo koʼún vino ni kǒo keʼún nda̱a̱ ni iin ña̱ʼa ña̱ sandákava-ini na̱ ñaniún”. Ná ixato̱ʼóyó ña̱ ndákanixi̱ní inkana, ta ná na̱ʼa̱yó ña̱ kúʼvi̱-iniyó xíniyóna. Tá kíʼinyó kuenta ña̱ kivi ndakava-ini iin na̱ hermano xa̱ʼa̱ ña̱ xíʼiyó ndixi va̱ása koʼovíyórá. Tá kéʼéyó ña̱yóʼo saá kúú ña̱ íxato̱ʼóyó ña̱ ndákanixi̱ní inkana ta kǒo kéʼéyó ña̱ʼa ña̱ sákusi̱í-ini mií kuitíyó chi kéʼéyó ña̱ sákusi̱í-ini inkana (1 Cor. 10:24).

Miíyó na̱ ndásakáʼnu Ndióxi̱ íxato̱ʼóyó ña̱ káʼa̱n na̱ chíñu xa̱ʼa̱ nda̱saa ndixi koʼoyó. Tá kúú, kǒo táxina ña̱ koʼo na̱ va̱lí á na̱ ta̱ʼan xi̱nu ku̱i̱ya̱ á na̱ káva carro á inka máquina (Rom. 13:​1-5).

Kǒo sásiví Jehová nu̱úyó ña̱ kuniñúʼuyó ña̱ʼa ña̱ táxira ndaʼa̱yó. Ña̱kán, iin tá iinyó kivi ndaka̱xinyó ndáaña kuxuyó á ndáaña koʼoyó soo viíní ná ndaka̱xinyó ña̱yóʼo, tasaá na̱ʼa̱yó nu̱ú yiváyó Jehová ña̱ kúni̱yó sakúsi̱íyó-inira xíʼin ña̱ ndáka̱xinyó keʼéyó.