Ña̱ chindeétáʼan xíʼin ná válí ña̱ keʼéná ña̱ kútóo Ndióxi̱

1. ¿Ndáaña xíniñúʼu keʼéyó ña̱ va̱ʼa sakúaʼakayó xa̱ʼa̱ Ndióxi̱?

¿Á SU̱VÍ ndákanda̱ní-iniyó ña̱ kamaní xáʼnu na̱ va̱lí ta xáa̱na ndúuna na̱ chée? Ni kǒo kíʼinyó kuenta ta xa̱a̱ xa̱ʼnuva na̱yóʼo. Soo ña̱ sákuaʼayó xa̱ʼa̱ Ndióxi̱, su̱ví saáví íyoña chi loʼo tá loʼova sákuaʼayó xa̱ʼa̱ra (1 Cor. 13:11; Heb. 6:1).b Ña̱ va̱ʼa sakúaʼakayó xa̱ʼa̱ Jehová, xíniñúʼu viíní kutáʼanyó xíʼinra. Ta xíniñúʼuyó espíritu santora ña̱ va̱ʼa chindeétáʼanña xíʼinyó keʼéyó ña̱ va̱ʼa. Tasaá sákuaʼayó keʼéyó chiñu ña̱ taxina ndaʼa̱yó chí nu̱únínu (Prov. 1:5).

2. ¿Ndáaña sánáʼa̱ Génesis 1:27 miíyó, ta ndáaña sakúaʼayó nu̱ú artículo yóʼo?

² Jehová kúú ta̱ i̱xava̱ʼa na̱ yiví, i̱xava̱ʼara ta̱a ta i̱xava̱ʼara ñaʼá (kaʼvi Génesis 1:27).c Na̱ ta̱a xíʼin ná ñaʼá síínní ku̱vaʼa na̱yóʼo, ta síínní ndákanixi̱nína. Síín chiñu ta̱xi Jehová ndaʼa̱ na̱ ta̱a keʼéna ta sííntu ña̱ keʼé ná ñaʼá. Ta ña̱ va̱ʼa sáxi̱nuna chiñu yóʼo xíniñúʼu sakúaʼana keʼénaña (Gén. 2:18). Nu̱ú artículo yóʼo sakúaʼayó ndáaña xíniñúʼu keʼé ná hermana válí ña̱ kuxa-ininá xíʼin tu̱ʼun Ndióxi̱. Ta nu̱ú inka artículo sakúaʼayó ndáaña xíniñúʼu keʼé na̱ ta̱a válí ña̱ kuxa-inina xíʼin tu̱ʼun Ndióxi̱.

SAKÚAʼA KEʼÚN ÑA̱ VA̱ʼA ÑA̱ KÚTÓO JEHOVÁ

3, 4. Ná hermana válí, ¿ndáana kivi kundiku̱nndó yichi̱? (Koto na̱ʼná).

³ Biblia káʼa̱nña xa̱ʼa̱ ku̱a̱ʼání ná ñaʼá ná xi̱ndasakáʼnu Jehová ta xi̱kuʼvi̱ní-ininá xi̱xininára (kaʼvi artículo ña̱ va̱xi nu̱ú jw.org, ña̱ naní “¿Qué aprendemos de las mujeres de la Biblia?”). Texto ña̱ xi̱niñúʼuna nu̱ú kíxáʼa artículo yóʼo, káʼa̱nña: “Ndiʼi ña̱ xi̱keʼéná xi̱kiʼinníná kuenta xíʼinña. Ta xíʼin ndiʼi ña̱ xi̱keʼéná xi̱naʼa̱ná ña̱ nda̱kúní ni̱xi̱yo ininá xíʼin Ndióxi̱”. Sana ti̱xin congregación nu̱ú ku̱a̱ʼún íyo ku̱a̱ʼá ná hermana ná xa̱a̱ ku̱a̱ʼá tiempo ñúʼu ti̱xin ñuu Ndióxi̱ ta kivi kundiku̱n yichi̱ náyóʼo.

⁴ Tá iin ñá loʼo kúún, ndakanixi̱ní xa̱ʼa̱ sava ná hermana ná va̱ʼaní káchíñu nu̱ú Ndióxi̱ ta chika̱a̱ ndee̱ ña̱ kundiku̱n yichi̱ná. Xa̱ʼa̱ ña̱kán, xíniñúʼu kiʼún kuenta xíʼin ña̱ va̱ʼa ña̱ kéʼéná, ta tándi̱ʼi kivi ndakanixi̱níún ndáa ki̱ʼva kivi keʼún ña̱yóʼo. Nu̱ú párrafo ña̱ va̱xi chí nu̱úka, ka̱ʼa̱nyó xa̱ʼa̱ u̱ni̱ ña̱ va̱ʼa ña̱ xíniñúʼu keʼé ndiʼi ná hermana ná xu̱xa-ini.

5. ¿Nda̱chun xíniñúʼu vitá koo ini ná hermana?

⁵ Vitá koo iniún. Ná ñaʼá ná vitá-ini va̱ʼaní kítáʼanná xíʼin Jehová ta saátu va̱ʼaní kítáʼanná xíʼin inkana (Sant. 4:6). Xa̱ʼa̱ ña̱ vitá-ininá kúʼvi̱-ininá xíniná Jehová ta íxato̱ʼóná na̱ nda̱kaxinra kuniʼi yichi̱ nu̱úná. Chi Jehová kúú ta̱ ni̱ka̱ʼa̱n ndáana kuniʼi yichi̱ ti̱xin congregación ta saátu ti̱xin veʼena (1 Cor. 11:3).d

6. ¿Ndáa ki̱ʼva kundiku̱n ná hermana válí yichi̱ ñá Rebeca?

⁶ Ná ka̱ʼa̱nyó xa̱ʼa̱ ñá Rebeca, ñáyóʼo va̱ʼaní xi̱ndakanixi̱níñá. Ta xi̱xini̱ñá ama kúú ña̱ kivi keʼéñá iin chiñu ta ama kúú ña̱ kǒo kivi keʼéñáña (Gén. 24:58; 27:​5-17). Ta saátu to̱ʼóní ni̱xi̱yo-iniñá ta va̱ʼaní xi̱xiniso̱ʼoñá ña̱ xi̱ka̱ʼa̱nna xíʼinñá (Gén. 24:​17, 18, 65). Tá vitá íyo iniún nda̱a̱ táki̱ʼva ni̱xi̱yo ñá Rebeca ta íxato̱ʼún na̱ nda̱kaxin Jehová kuniʼi yichi̱ nu̱ún, saá kúú ña̱ va̱ʼaní yichi̱ chinúun nu̱ú na̱ veʼún ta saátu nu̱ú na̱ congregación.

7. ¿Ndáa ki̱ʼva kundiku̱n ná hermana válí yichi̱ ñá Ester?

⁷ Ndakuni ndáaña kivi keʼún ta ndáaña va̱ása. Biblia káchiña: “Ña̱ ndíchi íyoña xíʼin na̱ ndákuni ña̱ va̱ása kivi keʼéna ndiʼi ña̱ʼa” (Prov. 11:2). Ñá Ester va̱ʼaní xi̱ndasakáʼnuñá Ndióxi̱, ta va̱ʼaní ke̱ʼéñá ña̱ káʼa̱n texto yóʼo. Tá ndu̱uñá reina va̱ása ni̱nu níxi̱kuniñá. Ta saátu xi̱xiniso̱ʼoñá consejo ña̱ xi̱taxi ta̱ primoñá Mardoqueo ndaʼa̱ñá (Est. 2:​10, 20, 22). Kivi kundikún yichi̱ ñáyóʼo tá ná ndukún consejo nu̱ú inkana ta keʼún ña̱ káʼa̱nna xíʼún (Tito 2:​3-5).

8. ¿Ndáa ki̱ʼva kundiku̱n ná hermana consejo ña̱ va̱xi nu̱ú 1 Timoteo 2:​9, 10?

⁸ Ná ka̱ʼa̱nyó xa̱ʼa̱ inka ña̱ va̱ʼaní ke̱ʼé ñá Ester. Ñáyóʼo, ni liviní ni̱xi̱yoñá ta va̱ʼaní xi̱naʼa̱ñá, soo kǒo níxi̱kuni̱ñá ña̱ ka̱ʼa̱nna xa̱ʼa̱ iinlá mií kuitíñá (Est. 2:​7, 15). ¿Ndáa ki̱ʼva kundikún yichi̱ñá? Iin ña̱ kivi keʼún kúú ña̱ káʼa̱n 1 Timoteo 2:​9, 10 (kaʼviña). Yóʼo ni̱ka̱ʼa̱n ta̱ apóstol Pablo xíʼin ná hermana ña̱ xíniñúʼu kiʼinníná kuenta xíʼin ti̱ko̱to̱ ña̱ ndíxiná ña̱ viíní ná kooña, ta va̱ʼaní ná ndakanixi̱níná. Tu̱ʼun griego ña̱ xi̱niñúʼu ta̱ Pablo kúni̱ kachiña, ná hermana xíniñúʼu kiʼinníná kuenta xíʼin ki̱ʼva ña̱ ndíxiná ña̱ viíní ná kooña ta ná kiʼinníná kuenta ndáaña kivi ndakanixi̱ní inkana xa̱ʼa̱ná xíʼin ki̱ʼva ña̱ ndíxiná. Kúsi̱íní-iniyó chi ná hermana va̱ʼaní ndáka̱xinná ti̱ko̱to̱ ña̱ ndíxiná.

9. ¿Ndáaña sákuaʼayó xíʼin ña̱ ke̱ʼé ñá Abigaíl?

⁹ Viíní ndakanixi̱níún. Ña̱yóʼo kúú ña̱ chindeétáʼan xíʼinná kunda̱a̱-ininá ndáaña kúú ña̱ va̱ʼa ta ndáaña kúú ña̱ va̱ása va̱ʼa. Ná ka̱ʼa̱nyó xa̱ʼa̱ ñá Abigaíl. Yií ñáyóʼo va̱ása va̱ʼa níkeʼéra, ta ñáyóʼo ki̱ʼinñá kuenta ña̱ kivi kixi tu̱ndóʼo nu̱ú ndiʼi na̱ veʼeñá xa̱ʼa̱ ña̱ ke̱ʼéra. Xa̱ʼa̱ ña̱ va̱ʼaní nda̱kanixi̱níñá, íyo iin ña̱ kamaní ke̱ʼéñá tasaá ni̱ka̱ku ku̱a̱ʼání na̱ yiví (1 Sam. 25:​14-23, 32-35). Ña̱ viíní ndákanixi̱níyó chíndeétáʼanña xíʼinyó ña̱ kunda̱a̱-iniyó ama kúú ña̱ ka̱ʼa̱nyó ta ama kúú ña̱ va̱ása ka̱ʼa̱nyó. Ña̱yóʼo chindeétáʼanña xíʼinyó ña̱ kundi̱ʼi̱-iniyó xa̱ʼa̱ inkana, ta va̱ása sakúkaʼanyó nu̱úna (1 Tes. 4:11).

SAKÚAʼA KEʼÚN ÑA̱ KIVI CHINDEÉTÁʼAN XÍʼÚN

10, 11. ¿Ndáaña va̱ʼa ndakiʼún tá ná sakúaʼún kaʼviún xíʼin ña̱ taaún? (Koto na̱ʼná).

¹⁰ Iin ña̱ va̱ʼaní kúú ña̱ sakúaʼa ná hermana válí keʼéna ku̱a̱ʼá ña̱ʼa, chi ña̱yóʼo va̱ʼaní chindeétáʼan xíʼinná tá xa̱a̱ ná kuchéená. Ná ka̱ʼa̱nyó xa̱ʼa̱ sava ña̱yóʼo.

¹¹ Sakúaʼa kaʼviún ta saátu ña̱ taaún. Sava lugar kǒo ndáyáʼvi ña̱ sakúaʼa ná ñaʼá kaʼviná ni ña̱ taaná. Soo ña̱yóʼo ndáyáʼviníña nu̱ú miíyó na̱ ndásakáʼnu Ndióxi̱ (1 Tim. 4:13).e Ña̱kán, va̱ása taxiún kasi nda̱a̱ ni iin ña̱ʼa nu̱ún ña̱ sákuaʼún kaʼviún xíʼin ña̱ taaún. ¿Ndáaña va̱ʼa ndakiʼún tá ná keʼún ña̱yóʼo? Va̱ása ixayo̱ʼvi̱ña xíʼún ña̱ ndani̱ʼún iin chiñu ña̱ kachíñún, saátu va̱ʼaní kaʼviún tu̱ʼun Ndióxi̱ ta sánáʼún inkana. Soo iin ña̱ va̱ʼaníka kúú ña̱ kaʼviún Biblia ta ndakanixi̱níún xa̱ʼa̱ña, chi saá kúú ña̱ va̱ʼaníka kutáʼún xíʼin Jehová (Jos. 1:8; 1 Tim. 4:15).

12. ¿Ndáaña sákuaʼún xíʼin ña̱ káʼa̱n Proverbios 31:26?

¹² Sakúaʼa natúʼún xíʼin inkana. Ndiʼi miíyó na̱ ndásakáʼnu Ndióxi̱ ndáyáʼviní ña̱ sakúaʼayó natúʼun xíʼin táʼanyó. Ta̱ discípulo Santiago va̱ʼaní consejo ta̱xira ndaʼa̱yó: “Koo tu̱ʼvandó ña̱ kuniso̱ʼondó ña̱ káʼa̱n inkana, kúee koo inindó ka̱ʼa̱nndó” (Sant. 1:19). Tá va̱ʼaní xíniso̱ʼoyó tá káʼa̱nna xíʼinyó, saá kúú ña̱ náʼa̱yó ña̱ kúnda̱a̱-iniyó xíʼin ña̱ ndóʼona (1 Ped. 3:8). Tá kǒo kúnda̱a̱ va̱ʼa iniún xíʼin ña̱ káʼa̱nna xíʼún á xíʼin ña̱ ndóʼona, xíʼin ña̱ to̱ʼó nda̱ka̱tu̱ʼúnna tasaá vií ndakuiún yuʼúna (Prov. 15:​28, nota). Ndakanixi̱ní xa̱ʼa̱ ña̱yóʼo: “Ña̱ ka̱ʼi̱n xíʼinna, ¿á ña̱ nda̱a̱ kúúña? ¿Á chika̱a̱ña ndee̱ xíʼinna? ¿Á ña̱ to̱ʼó kúúña? ¿Á ña̱ va̱ʼa kúúña?”. Koto ndáa ná hermana kúú ná va̱ʼaní nátúʼun xíʼin inkana ta kundikún yichi̱ná (kaʼvi Proverbios 31:26).f Koto va̱ʼún ndáaña káʼa̱nná ta ndáa ki̱ʼva káʼa̱nnañá, sakúaʼa keʼún ña̱yóʼo tasaá kúúña va̱ʼaníka kitáʼún xíʼin inkana.

13. ¿Ndáana kivi sanáʼa̱ yóʼó ña̱ keʼún chiñu ti̱xin veʼún? (Koto na̱ʼná).

¹³ Sakúaʼa keʼún chiñu ti̱xin veʼún. Ku̱a̱ʼání lugar ná ñaʼá kúú ná kéʼé chiñu ti̱xin veʼená. Siʼún á iin ñá hermana kivi sanáʼa̱ yóʼó keʼún chiñu yóʼo. Iin ñá hermana ñá naní Cindy káchiñá: “Siʼíi̱ ni̱ka̱ʼa̱nñá xíʼi̱n ña̱ va̱ʼaní kúniyó tá kéʼéyó ku̱a̱ʼá chiñu. Sa̱kúaʼi̱ keʼíi̱ ña̱ kuxundi̱, ña̱ ndaya̱kúi̱n veʼe, ña̱ ku̱kui̱ á ña̱ ku̱ʼi̱n satái̱ ña̱ʼa. Ña̱yóʼo va̱ʼaní chi̱ndeétáʼanña xíʼi̱n ña̱ keʼíi̱ ku̱a̱ʼáka chiñu nu̱ú Jehová. Ta saátu, sa̱náʼa̱ñá yi̱ʼi̱ ña̱ va̱ʼa koo inii̱ xíʼin inkana, ta xa̱ʼa̱ ña̱yóʼo ku̱a̱ʼá na̱ hermano xi̱nitáʼi̱n xíʼin ta ku̱a̱ʼání ña̱ va̱ʼa sa̱kúaʼi̱ xíʼin ña̱ kéʼéna” (Prov. 31:​15, 21, 22). Ná ñaʼá ná va̱ʼaní káchiñu, ná va̱ʼaní-ini, ná xíni̱ keʼé chiñu ti̱xin veʼená, ndáyáʼviníná nu̱ú na̱ veʼená ta saátu nu̱ú na̱ congregación (Prov. 31:​13, 17, 27; Hech. 16:15).

14. ¿Ndáaña sákuaʼún xíʼin ña̱ káʼa̱n ñá Crystal, ta ndáaña xíniñúʼu keʼún?

¹⁴ Kachíñu ña̱ va̱ʼa koo xu̱ʼún nu̱ún. Ndiʼi na̱ ndásakáʼnu Ndióxi̱ xíniñúʼu sakúaʼana kachíñuna ña̱ va̱ʼa kǒo kuma̱ní ña̱ʼa nu̱úna ta saátu ña̱ kusi̱í-inina xíʼin ña̱ xa̱a̱ kúúmiína (Filip. 4:11). Iin ñá hermana ñá naní Crystal káchiñá: “Tá xi̱xaʼi̱n escuela. Xi̱xiyo sava clase ña̱ kivi ndaka̱xii̱n ndáaña kúú ña̱ kúnii̱ kaʼvii̱. Ta na̱ yivái̱ ni̱ka̱ʼa̱nna xíʼi̱n ña̱ ná ndaka̱xii̱n iin oficio ña̱ kivi chindeétáʼan xíʼi̱n. Tá kúú, yivái̱ ni̱ka̱ʼa̱nra xíʼi̱n ña̱ ná sakúaʼi̱ contabilidad, ta ña̱yóʼo va̱ʼaní chi̱ndeétáʼanña xíʼi̱n”. Va̱ʼava ña̱ sakúaʼún kachíñún, soo saátu xíniñúʼu sakúaʼún kundaún xu̱ʼún ña̱ kúúmiíún (Prov. 31:​16, 18). Kǒo kuníkaún xu̱ʼún nu̱ú inkana, ta kusi̱í-iniún xíʼin ña̱ kúúmiíún, tá saá kéʼún ku̱a̱ʼáníka chiñu keʼún nu̱ú Ndióxi̱ (1 Tim. 6:8).

ÑA̱ KIVI CHINDEÉTÁʼAN XÍʼINNDÓ CHÍ NU̱ÚNÍNU

15, 16. ¿Nda̱chun ndáyáʼviní ná hermana kúa̱an? (Marcos 10:​29, 30).

¹⁵ Tá ná sakúaʼún keʼún ña̱ʼa ña̱ kútóo Jehová ta saátu ña̱ sakúaʼún kachíñún, saá kúú ña̱ koo tu̱ʼvaún nu̱ú ña̱ kixi nu̱ún chí nu̱únínu. Ná kotoyó ndáaña kivi keʼún.

¹⁶ Kivi ndaka̱xiún ña̱ koo kúa̱aún iin tiempo. Nda̱a̱ táki̱ʼva ni̱ka̱ʼa̱n ta̱ Jesús, savana ndáka̱xinna ña̱ va̱ása tindaʼa̱na ni íxandúxa̱nína xíʼinna ña̱ tindaʼa̱na (Mat. 19:​10-12). Savatuna íyo kúa̱anna xa̱ʼa̱ inkaka ña̱ʼa. Ña̱kán tá ta̱ʼán tindaʼún, ndáyáʼviníún nu̱ú Jehová xíʼin ta̱ Jesús. Iníísaá ñuyǐví ná hermana kúa̱an ndáyáʼvinína nu̱ú ndiʼi na̱ congregación. Ta xa̱ʼa̱ ña̱ kúʼvi̱ní-ininá xíniná na̱ congregación ta ndíʼi̱-ininá xa̱ʼa̱na, nda̱a̱ táki̱ʼva íyo siʼína á ku̱ʼvana saá íyoná (kaʼvi Marcos 10:​29, 30; 1 Tim. 5:2).

17. ¿Ndáaña chindeétáʼan xíʼin ná hermana válí ña̱ keʼéná ku̱a̱ʼáka chiñu nu̱ú Jehová?

¹⁷ Kivi ku̱a̱ʼáka kachíñún nu̱ú Jehová. Iníísaá ñuyíví ná nátúʼunka xa̱ʼa̱ Ndióxi̱ kúú ná hermana (Sal. 68:11). ¿Á kivi chika̱a̱ún ndee̱ ña̱ ku̱a̱ʼáka kachíún nu̱ú Jehová? Tá kúú, kivi koún precursora, ku̱ʼún nu̱ú íxava̱ʼana salón á kivitu koún Betelita. ¿Ndáaña chindeétáʼan xíʼún ña̱ keʼún ña̱yóʼo? Ka̱ʼa̱n xíʼin Jehová, natúʼún xíʼin sava na̱ xa̱a̱ káchíñu nu̱ú Jehová ndiʼi tiempo, ña̱ va̱ʼa kunda̱a̱-iniún ndáaña xíniñúʼu keʼún. Tándi̱ʼi, kaʼyí nu̱ú iin tutu ndáaña kivi chindeétáʼan xíʼún. Tá ku̱a̱ʼá chiñu ná keʼún nu̱ú Jehová, saá kúú ña̱ va̱ʼaníka kuniñúʼuna yóʼó ti̱xin ñuura.

18. ¿Nda̱chun xíniñúʼu kiʼinní ná hermana kuenta ndáa ta̱a kúú ta̱ tindaʼa̱ xíʼinná? (Koto na̱ʼná).

¹⁸ Kivi ndaka̱xiún ña̱ tindaʼún. Ndiʼi ña̱ xa̱a̱ ni̱ka̱ʼa̱nyó xa̱ʼa̱ yóʼo kivi chindeétáʼanña xíʼún tá xa̱a̱ ná tindaʼún. Soo, tá kúni̱ún tindaʼún xíniñúʼu viíní ndaka̱xiún ta̱ tindaʼa̱ xíʼún. Ña̱yóʼo su̱ví iin si̱ki kúúña chi iin ña̱ ndáyáʼviní kúúña. Ndakaʼán chi ta̱ tindaʼún xíʼin, ta̱yóʼo kúú ta̱ kuniʼi yichi̱ nu̱ún (Rom. 7:2; Efes. 5:​23, 33). Ña̱kán ndakanixi̱ní xa̱ʼa̱ pregunta yóʼo: “¿Á iin ta̱ hermano ta xu̱xa-ini xíʼin tu̱ʼun Ndióxi̱ kúúra? ¿Á siʼna chiñu Ndióxi̱ kúú ña̱ ndáyáʼvika nu̱úra? ¿Á vií íyo ña̱ ndáka̱xinra keʼéra? Tá va̱ása va̱ʼa kéʼéra iin ña̱ʼa, ¿á ndákunira ña̱ ku̱a̱chira kúúña? ¿Á íxato̱ʼóra ná ñaʼá? ¿Á kuchiñura chindeétáʼanra xíʼi̱n ña̱ sakúaʼakai̱ xa̱ʼa̱ Ndióxi̱, ña̱ taxira ña̱ xíniñúʼi̱ á ña̱ kunda̱a̱-inira xíʼin ña̱ ndóʼi̱? ¿Á vií kéʼéra chiñu ña̱ táxina ndaʼa̱ra? Tá kúú, ¿ndáa chiñu kúúmiíra ti̱xin congregación, ta ndáa ki̱ʼva kéʼéra ña̱yóʼo?” (Luc. 16:10; 1 Tim. 5:8). Tá kúni̱ún ndani̱ʼún iin ta̱ hermano ta̱ koo xíʼún, saátu miíún xíniñúʼu chika̱a̱níún ndee̱ ña̱ viíní keʼún.

19. ¿Nda̱chun iin ña̱ va̱ʼaní kúú ña̱ chindeétáʼan iin ñaʼá xíʼin yiíñá?

¹⁹ Biblia káʼa̱nña xa̱ʼa̱ ná ñaʼá ña̱ chindeétáʼanná xíʼin yiíná (Gén. 2:18). ¿Á ña̱yóʼo kúni̱ kachiña ña̱ va̱ása ndáyáʼviná? Su̱ví saá íyoña, saáchi ña̱ chindeétáʼanná xíʼin yiíná iin chiñu ña̱ ndáyáʼvi kúú ña̱yóʼo. Ku̱a̱ʼání yichi̱ káʼa̱n Biblia xa̱ʼa̱ Jehová ña̱ chíndeétáʼanra xíʼin na̱ ñuura (Éx. 18:4; Heb. 13:6). Iin ñaʼá ñá ndíchiní ndákanixi̱ní, chíndeétáʼanñá xíʼin yiíñá tá ndáka̱xinra ña̱ keʼéra. Ta saátu xa̱ʼa̱ ña̱ kúʼvi̱-iniñá xíniñá Jehová kíʼinñá kuenta xíʼin ña̱ káʼa̱nñá á ña̱ kéʼéñá, ña̱ va̱ʼa ná kǒo ka̱ʼa̱nna ña̱ va̱ása va̱ʼa xa̱ʼa̱ yiíñá (Prov. 31:​11, 12; 1 Tim. 3:11). Tá ndákanixi̱níún ña̱ tindaʼún, xíniñúʼu chika̱ún ndee̱ ña̱ kuʼvi̱ka-iniún kuniún Jehová, ta xíniñúʼu chika̱níún ndee̱ ña̱ chindeétáʼún xíʼin na̱ veʼún ta saátu xíʼin na̱ congregación.

20. ¿Ndáa ki̱ʼva chindeétáʼún xíʼin na̱ veʼún?

²⁰ Kivi xa̱ún koo se̱ʼún. Tá ná tindaʼún sana kivi koo se̱ʼún (Sal. 127:3). Ña̱kán, xa̱a̱ ya̱chi̱ka ndakanixi̱níún ndáa ki̱ʼva kundaún na̱ va̱lí se̱ʼún tá xa̱a̱ ná koona. Ndiʼi ña̱ sa̱kúaʼayó nu̱ú artículo yóʼo va̱ʼaní chindeétáʼanña xíʼún. Ña̱ kuʼvi̱-iniún kuniún na̱ veʼún ta saátu ña̱ va̱ʼa koo iniún xíʼinna. Ta na̱ va̱lí se̱ʼendó kǒo ña̱ sándi̱ʼi̱-inina ta va̱ʼaní kuaʼnuna (Prov. 24:3).

21. ¿Á ndáyáʼvi ná hermana nu̱ún, ta nda̱chun? (Koto na̱ʼná ña̱ va̱xi chí nu̱ú kíxáʼa tutu yóʼo).

²¹ Ndóʼó ná ku̱ʼvayó ná kúa̱an, kúʼvi̱ní-inindi̱ xíni̱ndi̱ ndóʼó xa̱ʼa̱ ndiʼi ña̱ kéʼéndó nu̱ú Jehová xíʼin na̱ ñuura (Heb. 6:10). Chíka̱a̱níndó ndee̱ ña̱ viíní koo ndiʼi ña̱ keʼéndó nu̱ú Ndióxi̱ ta saátu ku̱a̱ʼání ña̱ʼa sákuaʼandó ña̱ va̱ʼa chindeétáʼanndó xíʼin inkana. Ta saátu ña̱ koo tu̱ʼvandó ña̱ keʼéndó ku̱a̱ʼání ña̱ʼa chí nu̱únínu. Ndiʼindó ndáyáʼviníndó nu̱ú Jehová ta saátu nu̱ú na̱ ñuura.