¿Á ndákaʼún xa̱ʼa̱ ña̱yóʼo?

¿Á ka̱ʼviún ndiʼi Tutu Ña̱ Nátúʼun xíʼinyó? Koto á kuchiñún ndakuiún ndiʼi ña̱yóʼo:

¿Ndáaña kúni̱ kachi ña̱ nasamayó ña̱ ndákanixi̱níyó? (Rom. 12:2).

Su̱ví nda̱saa loʼo kuití ña̱ʼa va̱ʼa xíniñúʼu keʼéyó. Saáchi xíniñúʼu kotoyó ndáaña ndákanixi̱níyó xíʼin ña̱ ndíkaa̱ níma̱yó ta nasamayó ña̱ kéʼéyó ña̱ va̱ʼa keʼéyó ña̱ kúni̱ Ndióxi̱ (w23.01, página 8 xíʼin 9).

¿Ndáa ki̱ʼva kotoyó ndiʼi ña̱ kúu iníísaá ñuyǐví?

Kíʼinnívayó kuenta xíʼin ña̱ kúu tiempo vitin chi sáxi̱nuña profecía ña̱ va̱xi nu̱ú Biblia. Soo, kǒo kúni̱yó ka̱ʼa̱nyó xa̱ʼa̱ ña̱ ndákanixi̱ní mií kuitíyó saáchi kǒo kúni̱yó ndataʼvíyó na̱ congregación, chi ña̱ kúni̱yó ka̱ʼa̱nyó xa̱ʼa̱ kúú ña̱ káʼa̱n na̱ ñuu Ndióxi̱ (1 Cor. 1:10) (w23.02, página 16).

¿Nda̱chun su̱ví inkáchi íyo ña̱ nda̱kuchi ta̱ Jesús xíʼin ña̱ ndákuchi na̱ discípulora?

Miíyó na̱ ku̱a̱chi kúúyó, soo ta̱ Jesús su̱ví ta̱ ku̱a̱chi kúúra, xa̱ʼa̱ ña̱kán kǒo níndataxira miíra ndaʼa̱ Jehová saáchi ka̱kura ti̱xin iin ñuu ña̱ xa̱a̱ xi̱kuu kuenta Ndióxi̱, xa̱ʼa̱ ña̱ kǒo ku̱a̱chi níxi̱kuumiíra kǒo níxi̱niñúʼu ndandikó-inira (w23.03, página 5).

¿Ndáaña kivi keʼéyó ña̱ va̱ʼa ku̱a̱ʼáka na̱ hermano taxi comentario ti̱xin reunión?

Tá táxiyó comentario loʼo ná ka̱ʼa̱nyó ña̱ va̱ʼa ku̱a̱ʼákana taxiña. Ná kǒo ka̱ʼa̱nyó xa̱ʼa̱ ku̱a̱ʼání ña̱ʼa, ña̱ va̱ʼa koo ña̱ ka̱ʼa̱n inkana (w23.04, página 23).

¿Ndáaña xi̱kuu “Yichi̱ ña̱ Yi̱i̱” ña̱ káʼa̱n Isaías 35:8 xa̱ʼa̱?

Yichi̱ ña̱ ni̱ka̱ʼa̱n Jehová xíʼin na̱ judío xi̱kitaña Babilonia ta xi̱xaa̱ña nda̱a̱ ñuu Israel, ta yichi̱ yóʼo iin ña̱ xi̱ndana̱ʼa̱ kuitíva kúúña. Tá kúma̱níka kixáʼa ku̱i̱ya̱ 1919 ki̱xáʼana ndásaviína yichi̱ yóʼo, tá kúú ki̱xáʼana távána Biblia ta ki̱xáʼana sándaya̱ʼanaña inka nu̱ú tu̱ʼun. “Yichi̱ ña̱ Yi̱i̱” chíndeétáʼanña xíʼin na̱ ñuu Ndióxi̱ ña̱ va̱ʼa inkáchi ndasakáʼnunara ta ndakiʼinna ña̱ va̱ʼa ti̱xin Reinora chí nu̱únínu (w23.05, página 15 nda̱a̱ 19).

¿Ndáaña ndánaʼa̱ u̱vi̱ ná ñaʼá ná káʼa̱n Proverbios capítulo 9 xa̱ʼa̱?

Tutu ña̱ Proverbios káʼa̱nña xa̱ʼa̱ ñaʼá ñá kíʼví, ta ndiʼi na̱ xíniso̱ʼo ña̱ káʼa̱nñá kuvina. Ta saátu káʼa̱nña xa̱ʼa̱ ñaʼá ñá ndíchi, ta na̱ kándíxa ña̱ káʼa̱nñá xáa̱na ndúuna na̱ ndíchi, ta ni̱ʼina ña̱ kutakuna (Prov. 9: 1, 6, 13, 18) (w23.06, página 22 nda̱a̱ 24).

¿Ndáa ki̱ʼva ni̱na̱ʼa̱ Jehová ña̱ vitání íyo inira ta va̱ʼaní ndákanixi̱níra tá ni̱ka̱ʼa̱nra xíʼin ta̱ Lot?

Jehová ni̱ka̱ʼa̱nra xíʼin ta̱ Lot ña̱ ná kunura ku̱ʼu̱nra chí yuku̱ saáchi sandíʼi-xa̱ʼa̱ra ñuu Sodoma. Tá xa̱kundáʼvi ta̱ Lot nu̱ú Jehová ña̱ ná taxira ku̱ʼu̱nra chí Zóar, ka̱ndíxavara ña̱ ni̱ka̱ʼa̱nra xíʼinra (w23.07, página 21).

¿Ndáaña kivi keʼé iin ñaʼá tá xíto yii̱ñá pornografía?

Ndakaʼán chi su̱ví ku̱a̱chi miíún kúú ña̱ xíto yii̱ún pornografía. Va̱ʼaka chika̱a̱ ndee̱ ña̱ vií kutáʼún xíʼin Jehová ta ndakanixi̱ní xa̱ʼa̱ ná ñaʼá ná ni̱xi̱yo xi̱naʼá ná sa̱ndíko Jehová ini. Kivi chindeétáʼún xíʼin yii̱ún ña̱ va̱ása kotokara pornografía (w23.08, página 14 nda̱a̱ 17).

¿Ndáaña kivi chindeétáʼan xíʼinyó ña̱ vií ndakuiinyó yuʼú na̱ káʼa̱n kúáchi xa̱ʼa̱ ña̱ kándíxayó Ndióxi̱?

Ña̱ kivi chindeétáʼan xíʼinyó ña̱ vií ndakuiinyó yuʼúna kúú ña̱ ndakanixi̱níyó ndáaña sándi̱ʼi̱-inina á ña̱ kúni̱na kunda̱a̱-inina xa̱ʼa̱ (w23.09, página 17).

¿Ndáaña sákuaʼayó xíʼin ña̱ ke̱ʼé ñá María ña̱ va̱ʼa ndakiʼinñá ndee̱?

Tá na̱kunda̱a̱-ini ñá María ña̱ kooñá siʼí ta̱ Mesías, ta̱xiñá ña̱ ná chindeétáʼan inkana xíʼinñá. Ta̱ ángel Gabriel xíʼin ñá Elisabet chi̱ndeétáʼanna xíʼinñá xíʼin tu̱ʼun Ndióxi̱. Ta miíyó na̱ hermanoyó kúú na̱ kivi chindeétáʼan xíʼinyó (w23.10, página 15).

¿Ndáa ki̱ʼva ndákuiin Jehová oraciónyó?

Xíniso̱ʼova Jehová ña̱ káʼa̱nyó xíʼinra, soo siʼna kíʼinra kuenta ndáa ki̱ʼva xi̱nu ña̱ kúni̱ra tá xa̱a̱ ndákuiinra oraciónyó (Jer. 29:12). Sana xa̱a̱ síín síínva ndákuiin Jehová oraciónyó, soo ndiʼi tiempova chíndeétáʼanra xíʼinyó (w23.11, página 21 xíʼin 22).

Romanos 5:2 káʼa̱nña xa̱ʼa̱ ña̱ taxi Ndióxi̱ ndaʼa̱yó chí nu̱únínu ña̱kán, ¿nda̱chun káʼa̱n tuku ña̱ versículo 4 xa̱ʼa̱ña?

Tá xíniso̱ʼo na̱ yiví xa̱ʼa̱ ña̱ keʼé Reino Ndióxi̱ chí nu̱únínu, kivi xa̱a̱na koona nu̱ú ñuyǐví xa̱á. Soo tá yáʼana nu̱ú tu̱ndóʼo ta kúchiñuna yáʼana nu̱úña ta kúnda̱a̱-inina ña̱ chíndeétáʼan Jehová xíʼinna, saá kúú ña̱ va̱ʼaníka xáa̱na kándíxana ña̱ taxi Ndióxi̱ ndaʼa̱na chí nu̱únínu (w23.12, página 12 xíʼin 13).