Kúsi̱íníva-ini Jehová xíʼin ña̱ kéʼún

1. ¿Ndáaña kivi ndakanixi̱ní sava na̱ ndásakáʼnu Ndióxi̱?

VA̱ʼANÍ kúniyó chi kúnda̱a̱-iniyó “ña̱ kúsi̱íní-ini Jehová xíʼin na̱ ñuura” (Sal. 149:4). Soo, sava yichi̱ savana kivi ndakava-inina ta ndakanixi̱nína ña̱yó’o: “Ña̱ nda̱a̱, kúsi̱íva-ini Jehová xíʼin na̱ ñuura, soo ¿á kúsi̱í-inira xíʼin ña̱ kéʼíi̱?”. Saátu ndo̱ʼo ku̱a̱ʼání na̱ xi̱ndasakáʼnu Ndióxi̱ tiempo xi̱naʼá chi xi̱ ixayo̱ʼvi̱ña xíʼinna kandíxana ña̱ xi̱kusi̱í-inira xíʼin ña̱ xi̱keʼéna (1 Sam. 1:​6-10; Job 29:​2, 4; Sal. 51:11).

2. ¿Ndáana sákusi̱í-ini Jehová?

² Biblia káʼa̱nña ña̱ ni kúúyó na̱ yiví ku̱a̱chi soo kiviva kusi̱í-ini Jehová xíʼin ña̱ kéʼéyó. Ña̱kán, ¿ndáaña xíniñúʼu keʼéyó? Xíniñúʼu na̱ʼa̱yó ña̱ kándíxayó ta̱ Jesucristo ta ndakuchiyó (Juan 3:16). Saá náʼa̱yó nu̱ú ndiʼi na̱ yiví ña̱ xa̱a̱ nda̱ndikó-iniyó xa̱ʼa̱ ku̱a̱chiyó ta ni̱ka̱ʼa̱nyó xíʼin Ndióxi̱ ña̱ kúni̱yó keʼéyó ña̱ kútóora (Hech. 2:38; 3:19). Kúsi̱íníva-ini Jehová tá xítora kéʼéyó ña̱yóʼo ña̱ va̱ʼa xa̱a̱yó kooyó migora. Tá chíkaa̱yó ndee̱ ña̱ sáxi̱nuyó ña̱ ki̱ndooyó nu̱ú Jehová kúsi̱í-inira xíʼin ña̱ kéʼéyó ta va̱ʼaní xáa̱yó kítáʼanyó xíʼinra (Sal. 25:14).

3. ¿Ndáa pregunta ndakuiinyó nu̱ú artículo yóʼo?

³ ¿Nda̱chun ndákanixi̱ní savana ña̱ kǒo kúsi̱í-ini Jehová xíʼin ña̱ kéʼéna? ¿Ndáa ki̱ʼva náʼa̱ Jehová nu̱úyó ña̱ kúsi̱í-inira xíʼin ña̱ kéʼéyó? Ta, ¿ndáaña chindeétáʼan xíʼinyó ña̱ kandíxayó ña̱ kúsi̱íva-inira xíʼin ña̱ kéʼéyó?

¿NDA̱CHUN TÚVI SAVANA ÑA̱ KǑO KÚSI̱Í-INI JEHOVÁ XÍʼINNA?

4, 5. Ni sava yichi̱ ndákanixi̱níyó ña̱ kǒo ndáyáʼviyó soo, ¿ndáaña ndákanixi̱ní Jehová xa̱ʼa̱yó?

⁴ Ku̱a̱ʼání miíyó nda̱a̱ tá loʼovíyó ndákanixi̱níyó ña̱ kǒo ndáyáʼviyó (Sal. 88:15). Iin ta̱ hermano ta̱ naní Adrián káchira: “Ndiʼi tiempo ndákanixi̱níi̱ ña̱ kǒo ndáyáʼvíi̱, ndákaʼíi̱n ña̱ tá ni̱xi̱yo loʼi̱ xi̱kaʼi̱n xíʼin Jehová ña̱ ndiʼi na̱ veʼi̱ ná koona nu̱ú ñuyǐví xa̱á, soo yi̱ʼi̱ xi̱ndakanixi̱níi̱ ña̱ kǒo ndáyáʼvivíi̱ ña̱kán kǒo xíniñúʼu koi̱ kán”. Ta saátu ndo̱ʼo ta̱ Tony su̱ví testigo Jehová níxi̱kuu na̱ yivára, ña̱kán káʼa̱nra xa̱ʼa̱ ki̱ʼva ña̱ sa̱kúaʼnunara. Ta̱yóʼo káchira: “Ni iin yichi̱ kǒo níka̱ʼa̱nna xíʼi̱n ña̱ kúsi̱í-inina xíʼin ña̱ kéʼíi̱, ta saátu kǒo níxi̱kaʼa̱nna xíʼi̱n ña̱ kúʼvi̱-inina xínina yi̱ʼi̱. Ku̱a̱ʼání ña̱ʼa xi̱kuni̱na keʼíi̱, soo xi̱ndakanixi̱níi̱ ña̱ kǒo níxi̱kusi̱í-inina xíʼin ña̱ xi̱keʼíi̱”.

⁵ Sava yichi̱ ndákanixi̱níyó ña̱ kǒo ndáyáʼviyó, soo ná ndakaʼányó chi mií Jehová kúú ta̱ ka̱na miíyó ña̱ kuñuʼuyó xíʼin na̱ ñuura (Juan 6:44). Xítova Jehová ña̱ va̱ʼa ña̱ kúúmiíyó ni sava yichi̱ miíyó kǒo kíʼinyó kuenta xíʼin ña̱yóʼo, ta xíni̱ra ndáa ki̱ʼva íyoyó (1 Sam. 16:7; 2 Crón. 6:30). Ña̱kán, tá káʼa̱n Jehová ña̱ ndáyáʼviníyó ná kandíxayó ña̱ káʼa̱nra (1 Juan 3:​19, 20).

6. ¿Ndáaña xi̱ndoʼo ta̱ apóstol Pablo tá xi̱ndakaʼánra xa̱ʼa̱ ku̱a̱chi ña̱ ni̱ki̱ʼvira?

⁶ Savayó ndákavaní-iniyó tá ndákaʼányó xa̱ʼa̱ ña̱ va̱ása va̱ʼa ke̱ʼéyó tá ya̱chi̱ tá kúma̱níka sakúaʼayó xa̱ʼa̱ Jehová (1 Ped. 4:3). Inkana xa̱a̱ ku̱a̱ʼání ku̱i̱ya̱ ndásakáʼnuna Jehová ta nda̱kúní íyo inina xíʼinra, soo chíkaa̱na ndee̱ ña̱ kǒo keʼéna ña̱ xi̱kutóona keʼéna tá ya̱chi̱. Ta yóʼótu, ¿á xóʼvi̱ún tá ndákaʼún xa̱ʼa̱ ku̱a̱chi ña̱ ni̱ki̱ʼviún tá ya̱chi̱? Tá saá ndóʼún, kǒo kundi̱ʼi̱-iniún chi saátu xi̱ndoʼo sava na̱ xi̱ndasakáʼnu Ndióxi̱ tiempo xi̱naʼá. Tá kúú, ta̱ apóstol Pablo xi̱ndakavaní-inira tá xi̱ndakanixi̱níra xa̱ʼa̱ ña̱ va̱ása va̱ʼa ke̱ʼéra (Rom. 7:24). Ni ndi̱kóva-inira xa̱ʼa̱ ku̱a̱chira ta nda̱kuchira xi̱ndakanixi̱níra ña̱ xi̱kuura “ta loʼoka ndáyáʼvi nu̱ú ndiʼika na̱ apóstol” ta saátu ni̱ka̱ʼa̱nra ña̱ miíra kúú ta̱ kúúmiíníka ku̱a̱chi nu̱ú inkana (1 Cor. 15:9; 1 Tim. 1:15).

7. ¿Ndáaña káʼa̱n Jehová keʼéra tá ndixa ndíkó-iniyó xa̱ʼa̱ ku̱a̱chiyó?

⁷ Yiváyó Jehová káʼa̱nra xíʼinyó ña̱ ixakáʼnu-inira xa̱ʼa̱yó tá ndixa ndíkó-iniyó xa̱ʼa̱ ku̱a̱chiyó (Sal. 86:5). Ña̱kán, tá ndixa ndíkó-iniyó xa̱ʼa̱ ku̱a̱chiyó ixakáʼnuva-ini Jehová xa̱ʼa̱yó (Col. 2:13).

8, 9. Tá túviyó ña̱ kǒo kúsi̱í-ini Jehová xíʼinyó, ¿ndáaña chindeétáʼan xíʼinyó ña̱ kǒo ndakanixi̱níyó saá?

⁸ Xíʼin ndinuʼu-iniyó kúni̱yó kachíñuyó nu̱ú Jehová. Soo savana ndákanixi̱nína ña̱ kǒo ndáyáʼviví ña̱ kéʼéna nu̱úra ta kǒo kúsi̱íví-inira xíʼinna. Iin ñá hermana ñá naní Amanda káchiñá: “Ndákanixi̱níi̱ ña̱ va̱ʼa sákusi̱í-inii̱ Jehová xíniñúʼu ku̱a̱ʼáníka kachíñui̱ nu̱úra, ña̱kán ku̱a̱ʼání yichi̱ íxandúxai̱ ña̱ keʼíi̱ ku̱a̱ʼáníka ña̱ʼa ña̱ kǒo kúchiñui̱ keʼíi̱. Loʼoní chiñu kéʼíi̱ nu̱ú Jehová túvii̱, ña̱kán ndákanixi̱níi̱ ña̱ kǒo kúsi̱íví-inira xíʼin ña̱ kéʼíi̱ ta ndákavaní-inii̱”.

⁹ Tá ndákanixi̱níyó ña̱ ni iin ña̱ kéʼéyó kǒo sákusi̱íña-ini Jehová, ¿ndáaña chindeétáʼan xíʼinyó ña̱ kǒo ndakanixi̱níyó saá? Ná ndakaʼányó chi va̱ʼaní-ini Jehová ta kǒo íxandúxara xíʼinyó keʼéyó ña̱ kǒo kúchiñuyó keʼéyó. Tá xíʼin ndinuʼu-iniyó káchíñuyó nu̱úra ni loʼo á ku̱a̱ʼá kúú ña̱ kéʼéyó kúsi̱íníva-inira xíʼinña ta ndáyáʼviníña nu̱úra. Saátu, ná ndakanixi̱níyó xa̱ʼa̱ na̱ xi̱ndoo tiempo xi̱naʼá na̱ va̱ʼaní xi̱ndasakáʼnu Jehová, tá kúú ta̱ apóstol Pablo ku̱a̱ʼání ñuu ni̱xa̱ʼa̱nra na̱túʼunra xíʼin na̱ yiví ta saátu ku̱a̱ʼání congregación ki̱xáʼa ni̱xi̱yo xa̱ʼa̱ chiñu ña̱ ke̱ʼéra. Soo ki̱xaa̱ iin tiempo ña̱ kǒo níkivi natúʼunkara xíʼin na̱ yiví nda̱a̱ táki̱ʼva xi̱keʼéra tá ya̱chi̱, ña̱kán ¿á xi̱kusi̱íka-ini Jehová xíʼinra? Xi̱kusi̱íva-inira, ni kǒo níkivi kachíñu ku̱a̱ʼáka ta̱ apóstol Pablo nu̱ú Jehová soo xi̱taxikava Jehová ña̱ va̱ʼa ndaʼa̱ra (Hech. 28:​30, 31). Ta saátu miíyó, sana kǒo kívi kachíñuyó nu̱ú Jehová nda̱a̱ táki̱ʼva xi̱keʼéyó tá ya̱chi̱ soo ña̱ ndáyáʼvika nu̱úra kúú ña̱ kéʼéyóña xíʼin ndiʼi níma̱yó. Vitin, ná kotoyó ndáa ki̱ʼva náʼa̱ Jehová ña̱ kúsi̱í-inira xíʼin ña̱ kéʼéyó.

¿NDÁA KI̱ʼVA NÁʼA̱ JEHOVÁ ÑA̱ KÚSI̱Í-INIRA XÍʼINYÓ?

10. ¿Ndáa ki̱ʼva náʼa̱ Jehová ña̱ kúsi̱í-inira xíʼinyó? (Juan 16:27).

¹⁰ Xíniñúʼura Biblia. Kútóoní Jehová na̱ʼa̱ra nu̱úyó ña̱ kúni̱níra xínira miíyó ta kíndo̱o-inira xíʼin ña̱ kéʼéyó. Biblia káʼa̱nña ña̱ u̱vi̱ yichi̱ ni̱ka̱ʼa̱n Jehová ña̱yóʼo xíʼin ta̱ Jesús: “Ta̱yóʼo kúú se̱ʼi̱ ta̱ kúʼvi̱ní-inii̱ xínii̱, ta̱ sákusi̱í-inii̱” (Mat. 3:17; 17:5). ¿Á kúni̱ún ña̱ ka̱ʼa̱n Jehová xíʼún ña̱ kúsi̱í-inira xíʼún? Sana kúni̱vaún ña̱ ka̱ʼa̱nra xíʼún, ña̱kán xíniñúʼura tu̱ʼunra ña̱ Biblia ña̱ ka̱ʼa̱nra xíʼinyó. Tá káʼviyó tu̱ʼun ña̱ liviní ña̱ xi̱ka̱ʼa̱n ta̱ Jesús xíʼin na̱ discípulora túviyó ña̱ mií Jehová kúú ta̱ káʼa̱nña xíʼinyó (kaʼvi Juan 16:27). Nda̱a̱ táki̱ʼva kéʼé Jehová saá ke̱ʼé ta̱ Jesús. Ña̱kán, tá káʼviyó ña̱ ni̱ka̱ʼa̱n ta̱ Jesús xíʼin na̱ discípulora ña̱ xi̱kuʼvi̱ní-inira xi̱xinirana ni xi̱kuuna na̱ yiví ku̱a̱chi, kivi ndakanixi̱níyó ña̱ mií Jehová kúú ta̱ káʼa̱n tu̱ʼun yóʼo xíʼinyó (Juan 15:​9, 15).

11. ¿Ndáaña kǒo xíniñúʼu ndakanixi̱níyó tá yáʼayó nu̱ú tu̱ndóʼo? (Santiago 1:12).

¹¹ Ña̱ kéʼéra. Kúni̱va Jehová chindeétáʼanra xíʼinyó. Tá kúú, táxira ña̱ xíniñúʼuyó soo sava yichi̱ táxira ña̱ yáʼayó nu̱ú tu̱ndóʼo nda̱a̱ táki̱ʼva ke̱ʼéra xíʼin ta̱ Job (Job 1:​8-11). Ña̱kán, tá yáʼayó nu̱ú iin tu̱ndóʼo ná kǒo ndakanixi̱níyó ña̱ kǒo kúsi̱íka-ini Ndióxi̱ xíʼin ña̱ kéʼéyó, va̱ʼaka ná ndakanixi̱níyó ña̱ saá kivi na̱ʼa̱yó ña̱ kúʼvi̱ní-iniyó xíniyóra ta ndáa-iniyóra (kaʼvi Santiago 1:12). Tá ndíkaa̱yó nu̱ú tu̱ndóʼo chíndeétáʼanra xíʼinyó ña̱ kundeé-iniyó tasaá náʼa̱ra ña̱ kúʼvi̱-inira xínira miíyó.

12. ¿Ndáaña sákuaʼayó xíʼin ña̱ ndo̱ʼo ta̱ Dimitri?

¹² Ná ka̱ʼa̱nyó xa̱ʼa̱ ña̱ ndo̱ʼo iin ta̱ hermano ta̱ íyo chí Asia ta̱ naní Dimitri. Kǒo níkivika kachíñura nu̱ú xi̱kachíñura. Ku̱a̱ʼání yo̱o̱ kǒo níkivi ni̱ʼíra chiñu ña̱ kachíñura. Ña̱kán, ki̱xáʼara kéera ku̱a̱ʼáka hora predicación ña̱ va̱ʼa na̱ʼa̱ra nu̱ú Ndióxi̱ ña̱ ndáaní-inirara. Soo, ku̱a̱ʼání yo̱o̱ ni̱ya̱ʼa ta kǒo níkivi ni̱ʼíra chiñu ña̱ kachíñura, tándi̱ʼi ki̱ʼin kue̱ʼe̱ra ta kǒo níkivika kakara ta ki̱xáʼa ndákanixi̱níra ña̱ va̱ása vií ndáara na̱ veʼera ta sana kǒo kúsi̱íka-ini Jehová xíʼinra. Soo, iin ñuú ñá loʼo se̱ʼera ka̱ʼyíñá nu̱ú iin tutu ña̱ káʼa̱n Isaías 30:15: “Xa̱a̱ndó ndakú koo inindó tá kándíxandó yi̱ʼi̱ ta táxi̱n íyo inindó”. Tasaá ta̱xiñá tutu yóʼo ndaʼa̱ yiváñá ta ni̱ka̱ʼa̱nñá xíʼinra: “Apá, tá kúsuchí-iniún ndakaʼán xa̱ʼa̱ texto yóʼo”. Ta̱ Dimitri ki̱ʼinra kuenta ña̱ mií Jehová chi̱ndeétáʼan xíʼinra, saáchi ni̱xi̱yova ti̱ko̱to̱ ña̱ kundixi na̱ veʼera ña̱ kuxuna xíʼin nu̱ú koona. Ta̱yóʼo káchira: “Ña̱ xi̱niñúʼu keʼíi̱ kúú ña̱ kǒo ndi̱ʼi-inii̱ ta chikai̱ ndee̱ ña̱ kandíxai̱ Ndióxi̱”. Tá ndóʼún táʼan ña̱ ndo̱ʼo ta̱ Dimitri, kǒo kaka-iniún chi ndíʼi̱níva-ini Jehová xa̱ʼún ta taxira ndee̱ ndaʼún ña̱ kundeé-iniún.

13. ¿Ndáa inka ki̱ʼva náʼa̱ Jehová ña̱ kúsi̱í-inira xíʼinyó?

¹³ Xíniñúʼura na̱ hermano. Kivi kuniñúʼu Jehová na̱ hermano ña̱ va̱ʼa chikaa̱na ndee̱ xíʼinyó mií tiempo ña̱ xíniñúʼuyóña. Ña̱yóʼo kúú ña̱ ndo̱ʼo iin ñá hermana ñá íyo chí Asia. Kǒoka chiñu níxi̱kuumiíñá ta ki̱ʼin kue̱ʼe̱ miíñá. Tándi̱ʼi, yii̱ñá ke̱ʼéra iin ña̱ kini ta va̱ása níkivika koora anciano. Xi̱ndi̱ʼi̱ní-ini ñá hermana yóʼo ña̱kán ni̱ka̱ʼa̱nñá: “Kǒo níxi̱kunda̱a̱-inii̱ nda̱chun xi̱ndoʼi̱ ña̱yóʼo, xi̱ndakanixi̱níi̱ ña̱ ke̱ʼíi̱ iin ña̱ kini nu̱ú Jehová ña̱kán kǒo níxi̱kusi̱íka-inira xíʼin ña̱ xi̱keʼíi̱”. Ña̱kán, xa̱kundáʼviñá nu̱ú Jehová ña̱ ná na̱ʼa̱ra nu̱úñá ña̱ ndixa kúni̱ra xínirañá ta nda̱kuiinvara oración ña̱ ke̱ʼéñá nu̱úra. ¿Ndáa ki̱ʼva nda̱kuiinraña? Ñáyóʼo káchiñá: “Na̱ anciano chi̱ndeétáʼanna xíʼi̱n ña̱ kunda̱a̱-inii̱ ña̱ kúʼvi̱va-ini Jehová xínira yi̱ʼi̱”. Tá ni̱ya̱ʼa tiempo ni̱ka̱ʼa̱n tukuñá xíʼin Jehová ña̱ xi̱niñúʼu kunda̱a̱-iniñá ña̱ ndixa chíndeétáʼanra xíʼinñá. ¿Ndáaña ku̱u? Ñáyóʼo káchiñá: “Mií ki̱vi̱ saá na̱ hermano na̱ ñúʼu congregación nu̱ú xáʼi̱n ta̱xina iin carta ña̱ liviní ndaʼíi̱, tá ka̱ʼvii̱ña ku̱ndaa̱-inii̱ ña̱ xi̱niso̱ʼova Jehová ña̱ ni̱ka̱ʼi̱n xíʼinra”. Xíʼin ña̱yóʼo kúnda̱a̱-iniyó ña̱ tu̱ʼun ña̱ káʼa̱n inkana xíʼinyó náʼa̱ña ña̱ kúsi̱íva-ini Jehová xíʼin ña̱ kéʼéyó (Sal. 10:17).

14. ¿Ndáa ki̱ʼva xíniñúʼu Jehová na̱ hermano ña̱ na̱ʼa̱ra nu̱úyó ña̱ kúsi̱í-inira xíʼinyó?

¹⁴ Saátu náʼa̱ Jehová ña̱ kúsi̱í-inira xíʼin ña̱ kéʼéyó tá xíniñúʼura na̱ hermano ña̱ taxina consejo ndaʼa̱yó. Tá kúú, tá siglo nu̱ú ta̱ apóstol Pablo ka̱ʼyíra 14 carta ña̱ chi̱ndaʼára ku̱a̱ʼa̱n nu̱ú na̱ hermano, ta nu̱ú ña̱yóʼo ta̱xira consejo ndaʼa̱na soo viíní ni̱ka̱ʼa̱nra xíʼinna. ¿Nda̱chun ni̱ka̱ʼa̱n Jehová xíʼin ta̱ apóstol Pablo ña̱ taxira consejo yóʼo ndaʼa̱na? Saáchi va̱ʼaní-ini Jehová ta táxira consejo ndaʼa̱yó “nda̱a̱ táki̱ʼva kéʼé iin ta̱a xíʼin se̱ʼera ta̱ kúni̱níra xínira” (Prov. 3:​11, 12). Ña̱kán, tá iin na̱ hermano xíniñúʼuna Biblia ña̱ taxina consejo ndaʼa̱yó ná kǒo ndakanixi̱níyó ña̱ kǒo kúsi̱íka-ini Jehová xíʼinyó saáchi xíʼin ña̱yóʼo náʼa̱ra ña̱ kúni̱kavara xínira miíyó (Heb. 12:6). ¿Ndáa ki̱ʼva náʼa̱ Jehová ña̱ kúsi̱í-inira xíʼinyó?

KÚSI̱ÍVA-INI JEHOVÁ XÍʼIN ÑA̱ KÉʼÉYÓ

15. ¿Ndáana táxi Jehová espíritu santo ndaʼa̱, ta ndáaña kivi kandíxayó?

¹⁵ Jehová táxira espíritu santora ndaʼa̱ na̱ sákusi̱í-inira (Mat. 12:18). Ña̱kán kivi ndakanixi̱níyó xa̱ʼa̱ pregunta yóʼo: “¿Á náʼi̱ xíʼin ña̱ kéʼíi̱ ña̱ kúúmiíi̱ ña̱ va̱ʼa ña̱ táxi espíritu santo?”. Tá kúú, ¿á kamaní xi̱saún tá kúma̱níka sakúaʼún xa̱ʼa̱ Jehová? Tá kíʼún kuenta ña̱ kéʼún ña̱ va̱ʼa ña̱ kúúmií espíritu Ndióxi̱ saá kivi kandíxaún ña̱ kúsi̱íní-ini Jehová xíʼún. (Koto recuadro ña̱ naní “Ña̱ va̱ʼa ña̱ kúúmií espíritu kúú...”).

16. Nda̱a̱ táki̱ʼva káchi 1 Tesalonicenses 2:​4, ¿ndáana xíniñúʼu Jehová ña̱ natúʼunna xa̱ʼa̱ tu̱ʼunra, ta ndáa ki̱ʼva kúniún xa̱ʼa̱ ña̱yóʼo?

¹⁶ Na̱ yiví na̱ sákusi̱í-ini Jehová kúú na̱ táxira ña̱ natúʼunna tu̱ʼun va̱ʼa xa̱ʼa̱ra (kaʼvi 1 Tesalonicenses 2:4). Ná ka̱ʼa̱nyó xa̱ʼa̱ ña̱ ndo̱ʼo iin ñá hermana ñá naní Jocelyn. Iin ki̱vi̱ nda̱kavaní-iniñá ta ni̱ka̱ʼa̱nñá ña̱yóʼo: “Kǒo ndee̱ níxi̱kuumiíi̱ ta kǒo níxi̱kunii̱ keʼíi̱ ni iin ña̱ʼa. Precursora xi̱kui̱ ta ki̱vi̱ kán xi̱niñúʼu natúʼi̱n xíʼin na̱ yiví xa̱ʼa̱ Ndióxi̱. Ña̱kán ni̱ka̱ʼi̱n xíʼin Jehová ta ki̱tai̱ ku̱a̱ʼi̱n”. Ki̱vi̱ kán ñá Jocelyn na̱túʼunñá xíʼin ñá Mary xa̱ʼa̱ tu̱ʼun Ndióxi̱ ta va̱ʼaní xi̱niso̱ʼoñá ta ka̱ndíxañá kaʼviñá Biblia xíʼinñá. Tá ni̱ya̱ʼa yo̱o̱ ñá Mary na̱túʼunñá xíʼin ñá Jocelyn, ña̱ ki̱vi̱ tá ni̱xa̱ʼa̱nñá veʼeñá ñáyóʼo ni̱ka̱ʼa̱nñá xíʼin Ndióxi̱ ña̱ ná chindeétáʼanra xíʼinñá chi xi̱kuni̱ñá sakúaʼañá xa̱ʼa̱ra. ¿Ndáaña sa̱kúaʼa ñá Jocelyn xa̱ʼa̱ ña̱ ku̱u kán? Ñáyóʼo káchiñá: “Nda̱kanixi̱níi̱ ña̱ mií Jehová kúú ta̱ ni̱ka̱ʼa̱n xíʼi̱n, ‘kúsi̱íva-inii̱ xíʼin ña̱ kéʼún’”. Ña̱ nda̱a̱ su̱ví ndiʼiví na̱ yiví kuniso̱ʼo ña̱ káʼa̱nyó, soo ná kǒo kaka-iniyó ña̱ kúsi̱íníva-ini Jehová tá xítora ña̱ chíkaa̱níyó ndee̱ ña̱ ka̱ʼa̱nyó xíʼin inka na̱ yiví xa̱ʼa̱ra.

17. ¿Ndáaña chindeétáʼan xíʼinyó ña̱ kunda̱a̱-iniyó ña̱ kúʼvi̱-ini Jehová xínira miíyó? (Salmo 5:12).

¹⁷ Íxakáʼnu-ini Jehová xa̱ʼa̱ na̱ sákusi̱í-inira ta va̱ʼa kéʼéra ña̱yóʼo xa̱ʼa̱ ña̱ ni̱xi̱ʼi̱ ta̱ Jesús xa̱ʼa̱yó (1 Tim. 2:​5, 6). Soo, ni xa̱a̱ nda̱kuchiyó ta kándíxayó ña̱ ni̱xi̱ʼi̱ ta̱ Jesús xa̱ʼa̱yó, ¿ndáaña keʼéyó tá íxayo̱ʼvi̱ña xíʼinyó kandíxayó ña̱ kúsi̱íní-ini Jehová xíʼinyó? Ná ndakaʼányó chi níma̱yó kivi sandáʼviña miíyó. Soo ta̱ kǒo sándaʼvi miíyó kúú Jehová. Ta káʼa̱nra ña̱ na̱ kándíxa ña̱ ni̱xi̱ʼi̱ ta̱ Jesús taxira ku̱a̱ʼání ña̱ va̱ʼa ndaʼa̱na (kaʼvi Salmo 5:12;a Rom. 3:26). Ña̱ chi̱ndeétáʼanní xíʼin iin ñá hermana ñá naní Vicky kúú ña̱ nda̱kanixi̱níñá xa̱ʼa̱ ña̱ ni̱xi̱ʼi̱ ta̱ Jesús xa̱ʼa̱yó. Ni i̱xayo̱ʼvi̱ña xíʼinñá kandíxañá ña̱ kúni̱ Jehová xínirañá, ñáyóʼo káchiñá: “Xa̱a̱ ku̱a̱ʼání ku̱i̱ya̱ xi̱kuni̱ Jehová na̱ʼa̱ra nu̱úi̱ ña̱ xi̱kuʼvi̱ní-inira xi̱xinira yi̱ʼi̱, soo kǒo níxi̱kiʼi̱n kuenta. Ta ki̱ʼva siaʼa xi̱kaʼi̱n xíʼinra túvii̱. ‘Kǒo xíniñúʼu kuʼvi̱-iniún kuniún iin na̱ yiví na̱ íyo nda̱a̱ táki̱ʼva íyo yi̱ʼi̱, kǒo kiviví chaʼvi ta̱ Jesús xa̱ʼa̱ ndiʼi ku̱a̱chi ña̱ kéʼíi̱’”. Saátu miíyó ña̱ chindeétáʼan xíʼinyó ña̱ kandíxayó ña̱ kúʼvi̱ní-ini Jehová xínira miíyó kúú ña̱ ndakanixi̱níyó xa̱ʼa̱ ña̱ ni̱xi̱ʼi̱ ta̱ Jesús xa̱ʼa̱yó.

18. ¿Nda̱chun kivi kandíxayó ña̱ kúʼvi̱-ini Jehová xínira miíyó?

¹⁸ Ni chíka̱a̱yó ndee̱ ña̱ keʼéyó ndiʼi ña̱ sa̱kúaʼayó nu̱ú artículo yóʼo soo sava yichi̱ kivi ndakava-iniyó, ta kixáʼayó ndakanixi̱níyó ña̱ va̱ása kúsi̱íka-ini Jehová xíʼin ña̱ kéʼéyó. Tá saá ndóʼún ndakaʼán chi mií Jehová kíndo̱o-inira xíʼin ndiʼi ña̱ kéʼé na̱ kúʼvi̱-ini xíni miíra (Sant. 1:12). Ña̱kán, chikaa̱ ndee̱ ña̱ kuyatinkaún nu̱ú Jehová ta koto ndáa ki̱ʼva náʼa̱ra ña̱ kúsi̱í-inira xíʼún. Ta kǒo nandósó-iniún chi Jehová “va̱ása xíka íyora nu̱ú iin iinyó” (Hech. 17:27).