Ña̱ ndátuyó koo chí nu̱únínu

¿Á kándíxaún ña̱ ndixa koo ña̱ va̱ʼa chí nu̱únínu? Ni íyoní tu̱ndóʼo tiempo vitin, ku̱a̱ʼání na̱ yiví chíkaa̱na ndee̱ ña̱ kusi̱í-inina. Soo, ¿á ndixa kǒoka tu̱ndóʼo koo chí nu̱únínu? Ndixava. Saáchi Biblia káʼa̱nña ña̱ ku̱a̱ʼání ña̱ va̱ʼa koo chí nu̱únínu.

¿Ndáaña káʼa̱n Biblia xa̱ʼa̱?

Ña̱ Biblia va̱ása káʼa̱nña ña̱ kǒo tu̱ndóʼo koo nu̱ú ñuʼú yóʼo, soo káʼa̱nvaña ña̱ ndiʼi-xa̱ʼa̱va tu̱ndóʼo yóʼo. Ná kotoyó savaña.

Tu̱ndóʼo: xa̱ʼa̱ ña̱ kǒo veʼe nu̱ú koona

Ña̱ káʼa̱n Biblia: “Keʼéna veʼe ta miína koo iniña” (Isaías 65:21).

Ña̱ koo chí nu̱únínu: Ndiʼi na̱ yiví koo veʼena.
Tu̱ndóʼo: loʼoní chiñu koo ta kooní na̱ nda̱ʼví

Ña̱ káʼa̱n Biblia: “Na̱ ñui̱ ku̱a̱ʼáka tiempo koona nda̱a̱ táki̱ʼva íyo iin yitu̱n, ndiʼi chiñu keʼéna kusi̱í-inina xíʼinña” (Isaías 65:22).

Ña̱ koo chí nu̱únínu: Ndiʼi na̱ yiví kuumiína iin chiñu ta kusi̱í-inina xíʼin ña̱ keʼéna.
Tu̱ndóʼo: xo̱ʼvi̱ní na̱ yiví xíʼin ña̱ kéʼé inkana xíʼinna

Ña̱ káʼa̱n Biblia: “Nda̱kúní kaʼndachíñu iin rey, ta na̱ kúúmií chiñu ña̱ ndáyáʼvi nda̱kúní kaʼndachíñuna” (Isaías 32:1).

Ña̱ koo chí nu̱únínu: Nda̱a̱ ni iin na̱ yiví va̱ása kundi̱va̱ʼana xíʼin inkana. Va̱ása koo na̱ ndáʼvi ni va̱ása kundi̱va̱ʼana xíʼin na̱ yiví xa̱ʼa̱ razana á xa̱ʼa̱ chiñu ña̱ kúúmiína.
Tu̱ndóʼo: kúma̱ní ña̱ʼa kuxu na̱ yiví

Ña̱ káʼa̱n Biblia: “Koo ku̱a̱ʼání ña̱ kuxuna nu̱ú ñuʼú yóʼo, nda̱a̱ xi̱ní yuku̱ koo ku̱a̱ʼání ña̱ kuxuna” (Salmo 72:16).

Ña̱ koo chí nu̱únínu: Ku̱a̱ʼání ña̱ va̱ʼa koo kuxu ndiʼi na̱ yiví. Nda̱a̱ ni iinna va̱ása ku̱ʼu̱nna ku̱su̱nna tá ta̱ʼán kuxuna chi ndiʼivana kuxu, ni va̱ása kiʼinka kue̱ʼe̱na xa̱ʼa̱ ña̱ kǒo ña̱ kuxuna.
Tu̱ndóʼo: íyoní na̱ kéʼé ña̱ va̱ása va̱ʼa ta saátu na̱ xáʼní

Ña̱ káʼa̱n Biblia: “Iin tá iinna kundoona xa̱ʼa̱ tú uvana, saátu xa̱ʼa̱ tú higona ta nda̱a̱ ni iinna kǒo sayíʼvi-ñaʼá” (Miqueas 4:4).

Ña̱ koo chí nu̱únínu: “Ndiʼi na̱ yiví va̱ʼaní kundoona saáchi va̱ása kooka na̱ yiví na̱ kéʼé ña̱ va̱ása va̱ʼa, ta na̱ kéʼé ña̱ nda̱kú ndakiʼinna ñuʼú yóʼo” (Salmo 37:10, 29).
Tu̱ndóʼo: íyoní guerra

Ña̱ káʼa̱n Biblia: “Ndiʼi na̱ ñuu va̱ása kanitáʼankana xíʼin espada, ni va̱ása sakúaʼakana ku̱ʼu̱nna nu̱ú ku̱a̱chi ña̱ kanitáʼanna” (Isaías 2:4).

Ña̱ koo chí nu̱únínu: Va̱ása kooka ku̱a̱chi iníísaá nu̱ú ñuʼú (Salmo 72:7). Nda̱a̱ ni iinna va̱ása xo̱ʼvi̱kana saáchi kǒoka ku̱a̱chi koo. Ni va̱ása xíniñúʼu kunukana ku̱ʼu̱nna inka ñuu, ta ni va̱ása kuakukana chi va̱ása kuvika na̱ veʼena.
Tu̱ndóʼo: íyoní kue̱ʼe̱

Ña̱ káʼa̱n Biblia: “Nda̱a̱ ni iin na̱ yiví va̱ása ka̱ʼa̱nna: ‘Ndeéndóʼi̱’” (Isaías 33:24).

Ña̱ koo chí nu̱únínu: Va̱ása kooka na̱ ndu̱chiʼña ta ni va̱ása kooka kue̱ʼe̱ (Isaías 35:5, 6). Biblia káchiña “va̱ása kuvika na̱ yiví” (Apocalipsis 21:4).
Tu̱ndóʼo: ku̱a̱ʼa̱n sándiʼi-xa̱ʼa̱na nu̱ú ñuʼú yóʼo

Ña̱ káʼa̱n Biblia: “Kusi̱íní-inina nu̱ú ñuʼú yi̱chí, kusi̱íní-inina nu̱ú yoso̱ yi̱chí, kusi̱íní-ini yoso̱ yi̱chí ta xaaña nda̱a̱ táki̱ʼva xáa azafrán” (Isaías 35:1).

Ña̱ koo chí nu̱únínu: Iníísaá ñuyǐví yóʼo nduuña iin ñuʼú liviní ña̱ kundoo na̱ yiví, nda̱a̱ táki̱ʼva xi̱kuni̱ Ndióxi̱ tá xa̱ʼa̱ (Génesis 2:15; Isaías 45:18).

¿Á ña̱ ndixa kúu ña̱ xi̱nu ña̱ káʼa̱n Biblia?

Ña̱ ndixa kúúvaña, soo ná ka̱ʼa̱nkayó xa̱ʼa̱ ña̱ káʼa̱n Biblia koo chí nu̱únínu, ña̱ káʼa̱n Biblia koo chí nu̱únínu, va̱ása kítáʼanña xíʼin ña̱ káʼa̱n na̱ yiví. Ña̱ káʼa̱n Biblia xa̱ʼa̱ ña̱ koo chí nu̱únínu, mií Ndióxi̱ kúú ta̱ ni̱ka̱ʼa̱n ña̱ koo ña̱yóʼo. Tá saá, ¿nda̱chun síín íyo ña̱yóʼo nu̱ú ña̱ káʼa̱n na̱ yiví? Ná kotoyó:

Kivi kandíxayó ña̱ káʼa̱n Ndióxi̱. Ña̱ Biblia káʼa̱nña ña̱ va̱ása sándaʼvi Ndióxi̱ (Tito 1:2). Ta saátu iinlá Ndióxi̱ kúú ta̱ kivi ka̱ʼa̱n xíʼinyó xa̱ʼa̱ ña̱ koo chí nu̱únínu (Isaías 46:10). Nu̱ú Biblia va̱xi ku̱a̱ʼání ejemplo ña̱ náʼa̱ ña̱ ndiʼi tiempo xínu ña̱ káʼa̱n Ndióxi̱. Tá kúni̱ún kunda̱a̱ka-iniún xa̱ʼa̱ ña̱yóʼo, koto video ña̱ naní ¿Nda̱chun xíniñúʼu kandíxayó ña̱ nda̱a̱ kúú ña̱ káʼa̱n Biblia?
Kivi ndasavií Ndióxi̱ tu̱ndóʼo ña̱ kúúmiíyó. Ña̱ Biblia káʼa̱nña ña̱ kúúmiíníva Ndióxi̱ ndee̱ ta kivi keʼéra ndiʼi ña̱ kúni̱ra (Salmo 135:5, 6). Ña̱yóʼo kúni̱ kachiña ña̱ kǒo nda̱a̱ ni iin ña̱ʼa kivi kasi nu̱ú Ndióxi̱ ña̱ saxínura ña̱ kúni̱ra keʼéra. Ta Ndióxi̱ kúni̱nívara chindeétáʼanra xíʼinyó saáchi kúʼvi̱ní-inira xínira miíyó (Juan 3:16).

Xa̱ʼa̱ ña̱yóʼo sana ndáka̱tu̱ʼún miíún: “Tá Ndióxi̱ kúni̱ra chindeétáʼanra xíʼinyó ta kúúmiíra ndee̱ ña̱ keʼéraña, ¿nda̱chun íyoníka tu̱ndóʼo?”. Tá kúni̱ún kunda̱a̱ka-iniún xa̱ʼa̱ ña̱yóʼo, koto video ña̱ naní ¿Nda̱chun táxi Ndióxi̱ ña̱ íyoní tu̱ndóʼo ñuyǐví yóʼo?

¿Ndáa ki̱ʼva xi̱nu ña̱ káʼa̱n Biblia?

Ndióxi̱ kuniñúʼura Reinora ña̱ va̱ʼa saxínura ña̱yóʼo, ta ña̱ Reino yóʼo íyoña chí ndiví. Nda̱kaxinra ta̱ Jesucristo ña̱ kaʼndachíñura ti̱xin ña̱ Reino yóʼo ta ta̱xira nda̱yí ndaʼa̱ra ña̱ kundaara ñuʼú yóʼo ta saátu na̱ ndóo nu̱úña. Tá ni̱xi̱yo ta̱ Jesús nu̱ú ñuʼú yóʼo sa̱ndáʼara na̱ xi̱kuumií kue̱ʼe̱, ta̱xira ña̱ xi̱xi na̱ kǒo ña̱ kuxu, sa̱yáa̱ra ta̱chí ta nda̱a̱ sa̱ndátakura sava na̱ yiví na̱ ni̱xi̱ʼi̱ (Marcos 4:39; 6:41-44; Lucas 4:40; Juan 11:43, 44). Xíʼin ña̱yóʼo ni̱na̱ʼa̱ra ndáaña keʼéra tá ná kaʼndachíñura ti̱xin Reino Ndióxi̱ chí nu̱únínu.

Tá kúni̱ún kunda̱a̱ka-iniún ndáaña keʼé Reino Ndióxi̱ xa̱ʼa̱yó, koto video ña̱ naní ¿Ndáa ki̱ʼva kaʼndachíñu Ndióxi̱?

¿Ama kúú ña̱ xi̱nu ña̱ káʼa̱n Biblia?

Si̱lóʼoníva kúma̱ní. ¿Nda̱chun va̱ʼa kandíxayó ña̱yóʼo? Biblia ni̱ka̱ʼa̱nña ña̱ ku̱a̱ʼáníva ña̱ʼa kuu, ta ña̱yóʼo na̱ʼa̱ña ña̱ si̱lóʼo kúma̱ní ta kixáʼa Reino Ndióxi̱ kaʼndachíñuña nu̱ú ñuʼú yóʼo (Lucas 21:10, 11). Ta tiempo vitin, ndiʼiyó xa̱a̱ xítoyó ndáa ki̱ʼva ku̱a̱ʼa̱n xínu ña̱ ni̱ka̱ʼa̱n Biblia.

Tá kúni̱ún kunda̱a̱ka-iniún xa̱ʼa̱ ña̱yóʼo, kaʼvi artículo ña̱ naní “¿Cuándo gobernará la Tierra el Reino de Dios?”.

¿Ndáa ki̱ʼva chíndeétáʼan ña̱ káʼa̱n Biblia xíʼinyó tiempo vitin?

Iin ta̱ ka̱ʼyi Biblia ni̱ka̱ʼa̱nra: “Ña̱ ndátuyó, chíndeétáʼanña xíʼinyó ña̱ va̱ʼa kutakuyó ta íyoña nda̱a̱ táki̱ʼva íyo iin ka̱a ña̱ tíin iin barco” (Hebreos 6:19). Nda̱a̱ táki̱ʼva chíndeétáʼan ka̱a xíʼin tú barco ña̱ va̱ása kanda̱nú tá ndeéní kúun sa̱vi̱ ta káni ta̱chí, ki̱ʼva saátu chíndeétáʼan ña̱ ndátuyó koo chí nu̱únínu xíʼinyó ña̱ ya̱ʼayó nu̱ú tu̱ndóʼo tiempo vitin. Ña̱ káʼa̱n Biblia xa̱ʼa̱ ña̱ koo chí nu̱únínu kivi chindeétáʼanña xíʼinyó ña̱ va̱ása kundi̱ʼiní-iniyó, ña̱ kusi̱í-iniyó ta saátu nda̱a̱ kivi chindeétáʼanña xíʼinyó ña̱ va̱ása kiʼinyó kue̱ʼe̱ (1 Tesalonicenses 5:8).