¿Á ndixaví kivi ndakutáʼan vií na̱ yiví xa̱ʼa̱ ña̱ xítona fútbol? | ¿Ndáaña káʼa̱n Biblia xa̱ʼa̱ ña̱yóʼo?

Ki̱ʼva 5,000 millón na̱ yiví kotona ña̱ kusíkina xa̱ʼa̱ ña̱ Copa Mundial de la FIFA, ta ña̱yóʼo kooña 20 tí noviembre nda̱a̱ 18 tí diciembre ña̱ ku̱i̱ya̱ 2022. Ku̱a̱ʼánína ndákanixi̱nína ña̱ tá xítona ña̱yóʼo, chíndeétáʼanña xíʼin na̱ yiví ña̱ vií kutáʼanna.

•  “Ña̱ sísikina fútbol kivi nasamaña ña̱ kéʼé na̱ yiví, kivi chindeétáʼanña xíʼinna ña̱ kuni̱na keʼéna ku̱a̱ʼáka ña̱ʼa ta iinlá ña̱yóʼo kúú ña̱ kivi chindeétáʼan xíʼinna ña̱ viíka kutáʼanna” (Ta̱ Nelson Mandela, ta̱ xi̱kuu presidente chí Sudáfrica).

•  “Ña̱ sísikina fútbol [...] chíndeétáʼanña xíʼinna ña̱ vií kutáʼanna saáchi inkáchi íyo ña̱ kúni̱ ndiʼina ndakiʼinna, inkáchi kúsi̱í-ini ndiʼina, inkáchi íyo ña̱ kútóo ndiʼina ta náʼa̱na ña̱ kúʼvi̱-inina xínitáʼanna” (Ta̱ Gianni Infantino, ta̱ kúú presidente ña̱ FIFA).a

¿Á kuchiñu ña̱yóʼo á inkaka ña̱ʼa ndachitáʼan viíña ndiʼi na̱ yiví? ¿Á kixaa̱ iin ki̱vi̱ ña̱ ndakutáʼan vií ndiʼi na̱ yiví ta va̱ása kanitáʼankana?

¿Á chíndeétáʼanña xíʼinna ña̱ vií kutáʼanna?

Ku̱a̱ʼání ña̱ʼa kúu xa̱ʼa̱ ña̱ sísikina xa̱ʼa̱ ña̱ Copa Mundial ña̱ ku̱i̱ya̱ vitin. Saáchi ndeéní náa na̱ yiví ta saátu na̱ chíñu xa̱ʼa̱ derecho ña̱ kúúmií na̱ yiví, xa̱ʼa̱ razana ta saátu xa̱ʼa̱ ña̱ íyo na̱ nda̱ʼví xíʼin na̱ ku̱i̱ká.

Soo ni saá ku̱a̱ʼání na̱ yiví ndákanixi̱nína ña̱ chíndeétáʼanva fútbol xíʼinna ña̱ kusi̱í loʼo inina. Ta ni kúni̱ní na̱ yiví ná kuu ña̱yóʼo, loʼova tiempo chíndeétáʼanña xíʼinna ña̱ vií kutáʼanna. Soo yóʼo kúú nu̱ú náʼa̱na ndáa ki̱ʼva íyo ña̱ ndákanixi̱nína ta saátu ndáaña kúni̱na keʼéna ta xa̱ʼa̱ ña̱yóʼo ndátaʼví-táʼanna. Xa̱a̱ ya̱chi̱ví ni̱ka̱ʼyi̱ nu̱ú tu̱ʼun Ndióxi̱ ña̱ saá keʼé na̱ yiví “ki̱vi̱ nu̱ú ndíʼi” (2 Timoteo 3:1-5).

Ña̱ ndixa chindeétáʼan xíʼin ndiʼi na̱ yiví ña̱ vií kutáʼanna

Tu̱ʼun Ndióxi̱ káʼa̱nña xa̱ʼa̱ ña̱ ndixa kivi chindeétáʼan xíʼin na̱ yiví ña̱ vií kutáʼanna. Ka̱ʼa̱nña ña̱ ndiʼi na̱ yiví vií kutáʼanna ti̱xin “Reino Ndióxi̱” (Lucas 4:43; Mateo 6:10).

Ta̱ Jesucristo, ta̱ kúú rey ti̱xin Reino yóʼo kúú ta̱ chindeétáʼan xíʼin na̱ yiví ña̱ vií kutáʼanna nu̱ú iníísaá ñuyǐví. Biblia káchiña:

•  “Ku̱a̱ʼání na̱ yiví na̱ va̱ʼa kundoo, ta va̱ʼaní kundoona” (Salmo 72:7).

•  “Ta̱kán chindeétáʼanra xíʼin na̱ nda̱ʼví, na̱ ndúkú ña̱ chindeétáʼanra xíʼinna [...]. Chindeérana ya̱ʼana nu̱ú tu̱ndóʼo á ku̱a̱chi ña̱ ndóʼona” (Salmo 72:12, 14).

Ta nda̱a̱ tiempo vitin, ña̱ sa̱náʼa̱ ta̱ Jesús chíndeétáʼanña xíʼin ku̱a̱ʼání na̱ yiví na̱ íyo nu̱ú ki̱ʼva 239 país ña̱ vií kutáʼanna, ta chíndeétáʼanña xíʼinna ña̱ va̱ása sa̱a̱-inina kunitáʼanna. Ña̱ va̱ʼa kunda̱a̱-iniún xa̱ʼa̱ ña̱yóʼo kaʼvi artículo ña̱ naní “Rompamos el ciclo del odio”.