¿Nda̱chun ndátaʼví ña̱ política na̱ yiví? | ¿Ndáaña káʼa̱n Biblia xa̱ʼa̱ ña̱yóʼo?

Nu̱ú iníísaá ñuyǐví, ku̱a̱ʼání na̱ yiví ndátaʼví-táʼanna xa̱ʼa̱ ña̱ xa̱a̱ síín síín partido político ndíku̱nna. Tá ku̱i̱ya̱ 2022 na̱ kéʼé investigación na̱ naní Pew Research Center, ni̱ka̱ʼa̱nna ña̱yóʼo: “Ku̱a̱ʼání na̱ yiví na̱ ndóo ti̱xin 19 país ni̱ka̱ʼa̱nna ña̱ íyoní ku̱a̱chi ña̱ ndeé ñuuna, saáchi na̱ yiví va̱ása vií kítáʼanna á nda̱a̱ kánitáʼanna xa̱ʼa̱ ña̱ xa̱a̱ síín síín partido político ndíku̱nna”.

¿Á ndátaʼví-táʼanna na̱ yiví na̱ ndóo nu̱ú íyoún xa̱ʼa̱ ña̱ xa̱a̱ síín síín partido político ndíku̱nna? ¿Nda̱chun kúu ña̱yóʼo? ¿Á íyo iin na̱ kivi ndasavií ña̱yóʼo? Koto ndáaña káʼa̱n Biblia.

Ña̱ ndátaʼví-táʼan na̱ yiví

Biblia ni̱ka̱ʼa̱nña ña̱ tiempo ña̱ ndóoyó vitin kúúña “ki̱vi̱ nu̱ú ndíʼi”, ta koo ku̱a̱ʼání ña̱ ndataʼví na̱ yiví ña̱kán va̱ása vií kutáʼanna.

•  “Ki̱vi̱ nu̱ú ndíʼi, koo tiempo ña̱ yo̱ʼvi̱ní ta kǒo kundeé-inina xíʼinña. Saáchi na̱ yiví kuʼvi̱-inina kunina miína; […] va̱ása kindo̱o-inina xíʼin ni iin ña̱ʼa” (2 Timoteo 3:1-3).

Íxayo̱ʼvi̱níña xíʼin na̱ chíñu ña̱ vií kaʼndachíñuna ni chíkaa̱níva na̱ yiví ndee̱ ña̱ vií ná keʼéna ña̱yóʼo. Xa̱ʼa̱ ña̱ xa̱a̱ síín síín ndákanixi̱ní na̱ yiví, íxayo̱ʼvi̱níña xíʼinna ña̱ inkáchi kachíñuná xíʼin inkana ña̱ ndasaviína tu̱ndóʼo ña̱ íyo. Ña̱yóʼo náʼa̱ña, ña̱ xa̱a̱ xínu ña̱ ni̱ka̱ʼa̱n Biblia kuu tiempo vitin.

•  “Ndiʼi tiempo ña̱ xa̱a̱ xáʼndachíñuna nu̱ú táʼan miína nina tu̱ndóʼova íyo” (Eclesiastés 8:9).

Soo tu̱ʼun Ndióxi̱ káʼa̱nña xíʼinyó xa̱ʼa̱ iin ta̱ kaʼndachíñu nu̱úyó ta̱ kuchiñu sandíʼi-xa̱ʼa̱ ndiʼi tu̱ndóʼo ña̱ sáxo̱ʼvi̱ na̱ yiví.

Iin ta̱ va̱ʼaní níʼi yichi̱ nu̱úyó ta ndíʼi-inira xa̱ʼa̱yó

Biblia káʼa̱nña xa̱ʼa̱ iin ta̱ va̱ʼaní kuniʼi yichi̱ nu̱úyó ta kivi ndasaviíra nda̱a̱ ndáaka tu̱ndóʼo. Ta̱yóʼo kúú ta̱ Jesucristo. Kúúmiíra ndee̱ ta saátu nda̱yí ña̱ chindeétáʼanra xíʼin na̱ yiví ña̱ vií kundoona ta inkáchi kutáʼanna, ta kúni̱níra keʼéra ña̱yóʼo.

•  “Ki̱vi̱ ná kaʼndachíñura ku̱a̱ʼání na̱ yiví na̱ va̱ʼa kundoo, ta va̱ʼaní kundoona” (Salmo 72:7).

•  “Ndiʼi na̱ ñuu kachíñuna nu̱úra” (Salmo 72:11).

Iinlá ta̱ Jesús kúú ta̱ va̱ʼaní kuniʼi yichi̱ nu̱úyó, saáchi ndixa ndíʼi-inira xa̱ʼa̱ na̱ yiví ta kúni̱ra chindeétáʼanra xíʼinna, soo kúni̱níkara chindeétáʼanra xíʼin na̱ xóʼvi̱.

•  “Ta̱kán chindeétáʼanra xíʼin na̱ nda̱ʼví, na̱ ndúkú ña̱ chindeétáʼanra xíʼinna, ta saátu chindeétáʼanra xíʼin na̱ vitá-ini ta saátu ndiʼi na̱ kǒo na̱ chindeétáʼan xíʼin. Kuʼvi̱ní-inira kunira na̱ vitá-ini xíʼin na̱ ndáʼvi ta sakǎkura miína. Ta chindeérana ya̱ʼana nu̱ú tu̱ndóʼo á ku̱a̱chi ña̱ ndóʼona” (Salmo 72:12-14).

Sakúaʼaka xa̱ʼa̱ Reino Ndióxi̱ ña̱ íyo chí ndiví, nu̱ú xa̱a̱ xáʼndachíñu ta̱ Jesús, ta koto ndáa ki̱ʼva chíndeétáʼan ña̱yóʼo xíʼún ta saátu ndáaña kivi keʼún ña̱ va̱ʼa chindeétáʼún xíʼin ña̱yóʼo.

•  Koto video ña̱ naní ¿Ndáa ki̱ʼva kaʼndachíñu Ndióxi̱?

•  Kaʼvi artículo ña̱ naní “El Reino de Dios: un gobierno sin corrupción”.